الأربعاء، 10 ديسمبر، 2014

فى حضرة فيروز

(دينا تجلس بهدوء فى الاتوبيس بعد نباطشية ليلية طويلة ، تضع سماعات متصلة بالتابلت)

فيروز: بيقولوا الحب بيقتل الوقت ، بيقولوا الوقت بيقتل الحب

صوت داخلى ١: الله الله الله ، على صوتك الرايق...على المقدمة الموسيقية القصيرة على بيانو ، على صوتك تانى

صوت داخلى ٢: "الوقت" امممم .... بذمتك الكلمة دى لوحدها مش بتفكرك اتوماتك بهيجل و نيتشه ، اساطير العود الابدى ، الكارما الهندى و نسبية اينشاتين....يعنى ينفع تسمع كلمة "الوقت" من غير ما ينط فى دماغك فيلم "انترستلر" ، فاكرة مشهد ماثيو ماكونهي و هو بيشوف الرسايل المسجلة؟

فيروز: بديت القصة تحت الشتي...بأول شتي حبو بعضن ...وخلصت القصة بتاني شتي ...تحت الشتي تركوا بعضن

صوت داخلى ١: روح يا شيخ منك لله هو كل مرة نسمع الاغنية دى تحبك معاك هرى؟! نص الاغنية فات ....اسمع كده ستك فيروز و هى بتتكلم ك طرف تالت بيحكى حدوته و فى بعض الجمل التانية كطرف اصلى . شوف تنوع صوتها بين الاحساسين

صوت داخلى ٢: مش اتفقنا نقرا " البحث عن قطة شرودنجر" بتاع جون جريبين و نخلينا عمليين بقى و نفهم فيزيا و نخلص "رقص الجزيئات" بتاع النانو تكنولوجى و نسيبنا من العاطفية و قرايه الروايات و سماع فيروز

فيروز: يا حبيبي شو نفع البكي ، شو إلو معنى بعد الحكي

صوت داخلى ٢: بقى بذمتك...

صوت داخلى ٣: "يكمم فم صوت ٢ بشريط لازق" على الصوت يا دينا

فيروز: حبو بعضن ... تركوا بعضن

#تأملات_فى_حضرة_فيروز_حبو_بعضن_نموذجا

0 التعليقات:

إرسال تعليق

حلو؟؟ وحش؟؟ طب ساكت ليه ما تقول....