الثلاثاء، 31 ديسمبر 2013

حوليات184:موسيقى صوفى

الكل نايم و البيت ساكن حركيا و ساكت صوتيا , و انا قاعدة بسمع انشاد و مولوية و النقشبندى و اجزاء من البردة و طبعا الحلاج ...حالة استرخاء و صفاء نادرة ربنا يكتر منها 

لكن فى جمل كده تلاقى فجأة الدنيا وقفت و بتتكتب حروفها حواليك بخط عربى فى الهوا زى
"اشكو اليك امورا انت تعلمها" و "واجلو صدى قلبي بصفو محبة" و "عجبا لمن اراد النجاة فى المسلك الخطر" ...بحس ان الكون وقف ذاته و بيسمع معايا

https://soundcloud.com/manar-al-mazrouh/jxmx4y5uwywg?in=aya-khattab%2Fsets%2Fsufi

feeling relaxed.

هو انا لو حبيت اعمل تيشرت مطبوع عليه من قدام "وعجباً لمن يريد النجاة فى المسلك الخطر" و من ورا "الحزنُ في مُهجتي والنارُ في كبدي والدمعُ يشهَدُ لي فاستشهدوا بصري"

الراجل هيعمله لى ولا هيشتمنى؟! اصل انا لازم احتفظ بالجمل دى فى دماغى

الاثنين، 30 ديسمبر 2013

حوليات183:اتهكر

"وإن تعدوا نعمة الله لا تحصوها" انا مثلا ربنا رزقنى بحاجات مكنتش واخدة بالى منها غير من فترة بسيطة , منها مثلا ان "ماذا تقرأ تلك الايام" اتهكر و دى كانت الشعرة اللى قضمت ظهر البعير و خلتنى اخد خطوة اتأخرت عليها كتير و هى انى ببساطة اتخلى عنه و امشى

مكنش فى داعى ابدا فى الاستمرار فى مقر محاكم التفتيش دى 

انا اعتبرتها اشارة او علامة من ربنا بيقول لى فيها : مفيش داعى تعذبى نفسك يا دينا , الدنيا واسعة و رحمتى اوسع

الأحد، 29 ديسمبر 2013

حوليات182:وزير التعليم القادم


فى امريكا حصص الانجليزى بتجبر الطلبة انهم يقروا كتب ثقافية او تاريخية و يكتبوا عنها مقالات فيها ملخص للكتب و رأيهم فيه كجزء من المنهج و الدرجات

اهو انا لو وزيرة تعليم او ثقافة هاجبر الطالب انه على الاقل يقرا 5 كتب فى السنه بالطريقة دى , و ان المدرس يقراهم هو كمان حتى على الاقل يفهم و هو بيصحح الريفيو 

ال5 كتب يكونوا متغيرين مش كل الطلبة تقرا هو هو نفس ام الكتاب 

اه طبعا هيظهر ملخصات جاهزة للكتب عالطباعة عند الواد بحه بتاع النت , بس من ال1000 طالب فى يمكن منهم 100 يقروا فعلا , و من ال100 دول يجى 10 يعجبهم الموضوع و يقرروا يقروا كتب بره المنهج و تبقى عاده من حياتهم , و من ال10 دول واحد هيقرر ان دى متعه حياته و تبقى الكتب هى حياته نفسها مش مجرد عادة , الواحد ده لما يكبر يتعين وزير تعليم ...و هكذا

السبت، 28 ديسمبر 2013

حوليات181:حفلة التخرج

احم و الحقيقة ان حالة التحزب و التطرف و الاستقطاب اللى فى البلد ممثلة فى دفعتنا كمان , حفلة التخرج انقسمت "ايدلوجيا" لحفلتين :

الاولى فى دار تبع الجيش و فيها اوكا و اورتيجا , و التانية فى حد طلق كده و فيها خالد ابو شادى و منشدين !

احم هو الطبيعى ان حفلات التخرج لا يبقى فيها انشاد ولا يبقى فيها اوكا و اورتيجا , و الطبيعى انها تكون حفلة واحدة مش 2 , و الطبيعى ان الدفعه تكون سعيدة انها هتقضى يومها الاخير مع بعض , بس مين قال اننا فى ظروف طبيعية

هل كان طريق المنشدين رد فعل لحفلة اوكا؟ او كان اوكا رد فعل حفلة يحيى لياليها خالد ابو شادى؟ مين السبب ميهمنيش مين السبب على رأى محمد فؤاد بصراحة , و سمعنى سلام: بوعدك اخر وداع

انا شخصيا هاروح اهيص مع اوكا و اورتيجا , الليلة خمر و نساء استايل 

اخاف اروح حفلات الاخوة يطردونى الصراحة , اظن ممكن يكتبوا يافطة: الليبراليون يمتنعون

 هههه اه حفلة انكلاب بقى و نعمل الديموقراطية تماثيل عجوه و ناكلها

الجمعة، 27 ديسمبر 2013

حوليات180:كراهية و خلاص

الا قول لى يا كابتشن هو المطلوب من التفجيرات دى ان الناس تركع على ركبها و تقول احنا اسفين يا مرسى تعالى امسكنها و النبى بس بلاش تموتنا؟

ولا المفروض ان الناس تكره السيسى -لانه مش عارف يحميهم مع ان معاه ام التفويض اللى مش بيشغله غير على الطلبة- و تقول ده راجل فاشل مش عارف يحمينا من الارهابين فيرجعوا الحكم للارهابين ذاتهم ؟!

ولا هو كراهية و خلاص

انا افضل الرأى الثالث هو يعنى فى التسعينات كانوا عايزين حاجه؟ الكره كره عالم قلبها مليان عمى فقروا يخرموا عين اى حد بيشوف

الخميس، 26 ديسمبر 2013

حوليات179: (دينا و الGPS)


اه صحيح انا نسيت احكى لكم حدوته (دينا و الGPS) , الاسبوع اللى فات كنت رحت الاوبرا احجز تذاكر كسارة البندق و بالمرة اشتريت تذاكر مولوية عامر التونى , تذكرتين 2 ليا و للى عايز يجى معايا

انا: "فى حماس" انا بقى جايبة تذاكر عسل , مين جاى معايا

الجميع: "صمت تام"

انا: ايه يا جدعان دول المولوية اهل الحب يا ناس

اختى: مش دول الجماعه اللى بيلفوا دول؟

انا:  بيلفوا؟! بيلفوا بس !

ماما: "متبرعة" خلاص انا هاجى معاكى و خلاص

انا: "فى غضب" و خلااااص؟! طيب ليكى معايا رهان لو ممسكتيش السما بايديك يبقى ليكى حق عرب عندى

ماما: عارفة السكة؟

انا: "فى فخر" ها معايا التابلت و فيه GPS هننزل من المترو و هو هيوصلنا

ماما: ما بلاش التكنولوجيا الحديثة دى , هتوهى

انا: مستحيل طبعا التكنو اكيد احسن من امشى على طول و اكسر يمين و الهرى ده

"بعد نصف ساعه توهان فى الشوارع بسبب التابلت"

ماما: يا بنتى انتى تايهه مش واخدة بالك؟

انا: لا توهان ولا حبهان احنا هنمشى اخر الشارع ده و نكسر يمين

ماما: طب مع نفسك انا هاسأل...لو سمحت يا ريس مسرح الجمهورية فين؟

رجل 1: انتى ايه اللى جابك هنا؟ ارجعى كل اللى مشتيه ده و خدى الشارع اللى عاليمين

انا: "فى سخافة مطلقة" لا وصفة حلوة بصراحة

ماما: "للرجل" شكرا يا ريس , "ل انا" بس يا فاشلة يا ام التكنولوجيا

انا: ايوه احنا كده ماشين مع السهم صح كده هنمشى و نكسر مع الخريطة

"بعد نصف ساعة اخرى من التوهان"

ماما: انا مش عارفة انا بسمع كلامك انتى و البتاع الاهبل ده ليه؟

انا: خلاص قربنا و الله 

ماما: ما انتى بتقولى كده من الصبح

انا: الجهاز بيقول اننا قربنا

ماما: "مكررة" بس يا فاشلة...لو سمحت يا ريس مسرح الجمهورية فين؟

رجل 2: ما حضرتك واقفة قدامه اهو "يشير الى مبنى واضح امامه بالظبط"

ماما: "للرجل" شكرا يا ريس ... "ل انا" ابقى فكرينى اكسر لك التابلت ده لما نروح

الأربعاء، 25 ديسمبر 2013

حوليات178:معتقدى حريتى

#معتقدى_حريتى
عندى قناعه ان "الطرق الي الله بعدد نفوس الخلائق" قناعة كبيرة جدا بالجملة دى و عشان كده قررت انى ابعد عن طرق الناس فى البحث عن روحهم اولا و بحثهم عن "الاله" ثانيا 

و ابتديت اقتنع ان حتى الالحاد فى قلبه طريق من دول , و حاجات تبان كفر من بره لكن جواها ايمان ميشفوش غير عين خبيره زى بالظبط ما فى حاجات تبان طاعه و قلبها كفر

القصة و ما فيها انك تكون محكمة تفتيش بتقتل جزء من روحك من غير ما تحس 

و لان الحرية دى الضامن "الوحيد" لانك تحتار الطريق من غير نفاق او رياء فقطعا معتقدى حريتى , ببساطة لان اى عقيدة غير كده تبقى مجرد اكليشية و محاولة سيئة لنيل رضا مجتمع متهموش اصلا ولا يهم توصل لطريقك او لا

الثلاثاء، 24 ديسمبر 2013

حوليات177:انا خلصت!


انا خلصت! خدها بقى بمزاج سواء انى انا الفاعل او المفعول به و حط التشكيل اللى يعجبك 

الرحلة اللى ابتدت فى 15-9-2007 خلصت النهاردة , رحلة اطول من انها تتكتب او تتحكى , و الشخص اللى دخلها مش هو اللى خرج منها بالتاكيد , خرجت منها اقل تفاؤلا و اقصر شعرا و نظرا و -اعتقد- اكثر علما و رؤية مع ان لسه فى طريق طويل جاى

عموما كل نهاية رحلة هو مجرد بداية رحلة جديدة لعلها اطول

قررت اعادة تصنيع لرحلة السنه اللى فاتت , قررت انى اتبسط السنه دى بدل الورد و الحرافيش , قررت انه يكون فراولة و كتاب فى السياسة الروسية و خاتم كبير عليه اسمى 


اهداء الى طلبة 6 عين شمس من حد خرج خلاص و كفارة للكل:

اعرفكم جميعاً ان السجن سور
اعرفكم جميعا ان الفكر نور
اعرفكم جميعا ان السجن شايخ
واعرفكم جميعا ان بابه خايخ
واعرفكم جميعا ان الثورة فكرة
واعرفكم جميعا انه هايبقى ذكرى
وابشركم جميعاً .. ان الوعدة بكرة
والنور عندنا وعندكوا .. يا حبايب ،

عمنا نجم 

سمعنى سلام: اخيرا اتخرجت , سيبك انت #السعادة_قرار

الاثنين، 23 ديسمبر 2013

حوليات176:سولد اوت

و مش هتصدق سعادتى لما رحت احجز تذاكر الاوبرا و اكتشفت انى رحت متأخر و ان مفيش غير تذاكر ورا -مع انى اشتريتهم برضه- اه اتضايقت لانى كنت المفروض رحت بدرى لكن كانت سعادتى لا توصف ان فى "مصر" لما تتأخر 3 ايام تكون حفلات بالية فى 5 حفلات و بعدد تذاكر المسرح الكبير تخلص و ان الناس تتخانق عليها

لسه فى مصر بنشترى تذاكر كسارة البندق؟ عمار يا اوكرانيا

و لك ان تتخيل رد فعلى النهاردة لما قريت بوست الاوبرا ان التذاكر sold out فى كل الحفلات خلاص ...كنت ناقص اسجد عالارض و بعدين اقوم اعمل حركة الطيارة على انغام و الله و عملوها الرجالة

‫#‏فى_أمل‬

الأحد، 22 ديسمبر 2013

حوليات175:

لو عندك مبرر منطقى الحقنى بيه ، انا شخصيا حاولت ادور على كلام ينقع الناس العقلاء و فشلت :

عندك سبب ان قسم النسا يلعن ان الامتحان الساعة ٨ صباحا و يكرر التنويه بكدة لدرجة انه يكتبه فى ورقة النظرى خصيصا ، فالناس تروح من سابعة و نص عشان تحجز و لسبب غير مفهموم تكون البداية <فعليا> الساعه ١١ الا ربع !!

عندك سبب ان لما صديقة تعترض بادب و هدوء تحسد عليه على التهربج ده فيكون الرد ان الدكتور يزعق و يجعر و يقل ادبه على الدفعه كلها و ان مش من حقنا نعترض من اصله

عندك سبب ان تكون ورقة الغياب واحدة و المطلوب تمر على ٥٠٠ طالب قبل الامتحان فيحصل تاخير نص ساعة كمان

عندك سبب ان دكتور يزق طالب قدام اللجنة كلها و تقريبا يوقعه على الارض و لما يعترض و يحب ياخد حقه يلاقى الف من يقول له يقعد و ميعملش مشاكل

عندك سبب ان زميلى اللى جنبى تعلم الموظفة على ورقته و تعرض درجات امتحانه كلها للخطر لانه رفض يتنقل من مكانه و يقعد على كيفها خاصة ان الموقف ده حصل قبل الامتحان بربع ساعه اصلا

عندك سبب ان زميلى اللى قدامى محدش يعلم على ورقته مع انه غش تقريبا جميع الاسئلة على عينك يا تاجر و قدام الدكاترة كلهم 

عندك سبب ان لما امتحان النظرى يجى صعب يدخل رئيس القسم على الفيس بالليل يضحك و معلنا -بلا ادنى قدر من الحرج- انه بيستمتع لما بيعذب فى الطلبة

عندك سبب اننا لما نتجمع و نحب نشتكى لادارة الكلية فيتقال لنا صريحة ان فى حساسيات بين طلبة دفعتنا و بين دكاترة القسم و يقال لنا من تحت لتحت ان دى تربية القسم لينا على نية الاضراب عقب القبض على زملاء فى اغسطس الماضى

عندك مبرر غير ان وقت الطالب و كرامته و مستقبله اللى بيفرق على درجة بين تكليفك جنب بيتك او فى السلوم لا يمثلوا ادنى اهمية لادارة الجامعة عموما و للكلية خصوصا؟ و كون انك تطلع طبيب تناقش علنا اخطر بكتير على مستقبل الطب -فى راى اهل الحل و الربط عندنا- اخطر بكتيييير من تطلع دكتور غشاش لو عندك اى مبرر منطقى تانى ادينى عقلك و ريح عقلى انا
!

#احنا_كريمة_المجتمع_تاخد_لحسة؟

https://www.facebook.com/dina.nabil.712/posts/614848348582849

السبت، 21 ديسمبر 2013

حوليات174:درجات

المشكلة مش الدرجات اللى ممكن لو انت من الاوائل تخليك تاخد نيابة مش عايزاها و بالتالى تقضى عمرك كله فى تخصص انت بتكره 

و لو انت من الوسط درجة تمرجحك و تخليك فى نطاق النيابة او تطلع لارض وزارة الصحة الواسعة زى ابناء العامة , 

و لو انت من الاواخر -زى حالاتى- ممكن يحدفك من تكليف فى شبرا الى تكليف الفيوم او تتحدف الحدفه الصح و تلاقى نفسك فى السلوم ولا سينا ولا حلاليب و شلاتين 

المشكلة فى احساسك انك مبقاش عندك كرامة ولا اعتبار , صحيح انت كده كده فقدت 90 فى الميه من الحاجات دى فى ال6 سنين اللى فاتوا و يمكن قبلهم فى ثانوى ...لكن القضاء النهائى على روحك المعنوية مؤلم

الجمعة، 20 ديسمبر 2013

حوليات173:مكتبة الاسرة

عايز تعرف قيمة مشاريع الثقافة "الاشتراكية" عموما و مشروع مكتبة الاسرة خصوصا؟ ...اذكر فى معرض الكتاب 2010 على حسب ذاكرتى اللى كان قبل الثورة على طول , قالوا لى مكتبة الاسرة منزلة اعمال "دوستويفسكي" بتراب الفلوس , طبعا لا اخفيك سرا انى فى تلك الايام مكنتش بعرف انطق اسمه اصلا و كانت اقصى معلوماتى عنه ان راجل روسى كده و له دقن كبيره و انه قديم و شكرا و كان الله بالسر عليم

و طبعا كجزء من طفاسه الشعب المصرى اللى متعود على نظرية "ابو بلاش كتر منه" و ان الرخيص النهاردة بكره يبقى غالى و لانى متأكدة انى لو ما اشترتش دلوقتى هارجع اندم و اروح اشتريها من الازبكية بالغلا و الكوا قررت انى اشترى كل الاجزاء من الاعمال الكاملة المتوفرة -و فى زيارات لاحقة لمكتبة شريف كملت السلسلة- و روحت و انا معايا 6 شنط مليانة مجلدات خضرا كبيرة مكتوب عليها "الاعمال الكاملة" و اظن انى مكملتش 60 جنيه كسعر

بعد كده طبعا قريت الاجزاء و قريت غيرها و عرفت قيمة الكنز الثقافى اولا بقيمة الروايات دى و عرفت الكنز المادى لما شفت السعر "الحقيقى" للاعمال دى فى دور النشر التانية فى وقت لاحق

مفيش حاجة وردية , و المشاريع "الاشتراكية" عموما دايما فيها عيب منها مثلا ان الاخطاء المطبعية فى السلسلة دى كانت اكتر عدد سكان ماليزيا , و ان صورة السيدة الفاضلة مامى سوازان كانت قهر كده على ضهر كل كتاب سواء عجبك او لا ....لكن انا و غيرى عرفنا ان دى اخطاء ممكن تصليحها او حتى احتمالها فى مقابل توفير مادة ثقافية غنية بتراب الفلوس للقارئ المصرى و توسيع دائرة الناس اللى بتقرا ادب الجيد

من حيث حصل لها ايه بعد الثورة فحصل كتير للاسف

كانوا بيحطوا اغلافه عباره عن لوحات مصرية و عالمية على كل كتاب ..و مع تخفيض الميزانية وحدوا الغلاف فبقى كل كتب المكتبة عن اى موضوع نفس شكل الغلاف و ده شئ محبط جدا للقارئ

و بعيدا عن الشكليات المشروع كله بقى مغضوب عليه , فالنشر الجديد بقى قليل و الجديد بقى عبارة كتب جديدة لكتاب ملهمش وزن او كتب مترجمة على قدها

كان فى لحظات تنوير حاولوا فيها يطوروا و يجيبوا لجان قراءة جديدة لكن التجربه منجحتش

و عشان كده بتحسر لما بدخل فرع مكتبة الاسرة فى المعرض او مكتبة شريف بعد الثورة و ببقى نفسى اقف على الباب اقول قصائد "البكاء على الاطلال" على طريقة شعر الجاهلية:

قفا نبك من ذِكرى حبيب ومنزل بسِقطِ اللِّوى بينَ الدَّخول فحَوْملِ


الخميس، 19 ديسمبر 2013

حوليات172:الباب المفتوح


زمان كنت بكره فيلم "الباب المفتوح" من باب انى عموما بتخنق من فاتن حمامة , بس كل ما اتفرج عليه اشوف فيه حاجة مشفتهاش قبل كده 

الفيلم اتعمل فى الستينات لكن القضية اللى فيه خالدة , قصة البنت اللى بتعيش فى قالب جاهز لها من غير ما حد ياخد رأيها فيه عشان هى "بنت ناس" مش واحدة سايبة 

عن حدوته الست اللى اتعلمت ان الخيانة لجوزها فى السر افضل من الطلاق , لان الناس بتعيش فى حياتك اكثر من اللازم و بتأثر فى قرارتك اكثر مما تتخيل

عن الراجل اللى بيحب المكياج و العرى لكل البنات الا البنت اللى هيتجوزها , و المشكلة انه مش بيكتفى بانه فاسد و زبالة المشكلة انه بيفسد غيره و ينصح "اخو فاتن" انه ميتجوزش البنت اللى بيحبها و انه ممكن "يمشى معاها براحته" و يوم ما يتجوز ياخد بنت مغمضة عبيطة و صغيرة يربيها على ايده و يشكلها زى الصلصال على مقاسه 

"الباب المفتوح" فيلم عن مجتمع عايم فى مية البطيخ بمزاجه و مستمتع بالتناقض اللى فيه

الأربعاء، 18 ديسمبر 2013

حوليات171:كلام يزعل 4

كلام يزعل 4:

هاضطر اكتب البوست اللى حاوت اعطل فيه على قد ما اقدر , انما الكلام لما بيزن فى دماغى لازم يخرج عشان اترتاح...بوست "كلام يزعل" النهاردة "رابعة"

بص اطمن انا مش هاقول كلام بيوجع من عينة ان يومها مكنش ناس غلابا دخلوا عليهم بالرشاشات و انها كانت معركة حقيقية من طرفين معاهم سلاح بس منهم طرف معاه سلاح اكثر و منظم اكتر , و انها زى اى معركة وقع فيها ناس ملهاش فيها ...اطمئن انا مش هاتكلم فى الحوارات دى لان ده دم ناس و الكلام فى الحاجات دى عيب لاصحاب القلب الموجوع و ربنا يرحمنا كلنا

انا هاتكلم عن استغلال "رابعة" كعذر لاى شئ و كل شئ 

مثال 1: 
-انا: طب و انت يرضيك يا عمو البنوته اللى ماتت فى الكنيسة ؟
-عمى:طب ما هم قتلوا اطفال فى رابعه 

مثال 2:
-صديقة 1:امبارح شفت صورة عائلة ضربت فيل بالنار و وقفوا اتصوروا جنبه يا ترى مين فيهم الانسان و مين الحيوان
-صديقة 2: طب و اللى يقتل فيل مش احسن من اللى قتل الساجد؟

مثال3:
-ماما:و يرضى مين بقى ال25 عسكرى اللى اتقتلوا فى سينا امبارح و هما عزل؟
-صديقة ماما: يا سلام زعلانه على 25؟؟ ما هو اتقتل 10 الالاف و معملتوش حاجة


اظن انى مش محتاجة احلف لك انى شفت 2 من الحوارات بعينى و الثالث كنت انا طرف فيه, الفكرة و ما فيها ان لا البنت اللى فى الكنيسة ولا الفيل ولا ال25 عسكرى هما اللى قتلوا الناس فى رابعه , و بالتالى مينفعش تساوى الاول بالثانى على الاقل من باب {وَلَا تَزِرُ وَازِرَةٌ وِزْرَ أُخْرَى} اللى الاخوان حافظينه كويس من ضمن اللى بيقروه 

احيانا بحس انى لو قلت لما ان الجبنة القريش بحبها من غير طماطم هتقول لى ما الناس مات فى رابعة و معملتيش حاجة

كلام يزعل 5 هتكون عن علامة رابعة الصفراء ذاتها بقى

الثلاثاء، 17 ديسمبر 2013

حوليات170: سى سى كاتل


فى مجلس الحى عند ماما كل يوم يجى عيل غلس يرسم لهم على الحيطان جو سى سى خاين سى سى كاتل , كل ما يعملوا بوية فوقها يجى نفس الواد ال*** يرسم تانى و بيستلف جو "امسح و انا هاكتب تانى"

و بعد فترة ابتدى ينوع بقى بالوان اصفر و اخضر و بنفسجى و بعد كده اتطور و بقى يكتب "يا اللى بتسأل مرسى فين , جوه القلب و جوه العين" و يضيف فى يوم لاحق "رابعة فى القلب يا ولاد الكلب" !

فقرروا انهم يوقفوا حد من الامن اهو ارخص من تمن البوية , فوجئ الراجل بان الاخ مش بيجى لوحده و الراجل الامن كان هيتضرب لولا اهل المنطقة لحقوه

فتفتق ذهن احد المسؤولين عن فكرة مبتكرة , قرروا يرفعوا المصاحف على طريقة معاوية فرسموا على كل الحيطان ايات قرآن و احاديث و كده يمكن الواد يحس على دمه

انا شخصيا اتوقع فشل المبادرة بدليل ان المدرسة اللى جنب الحى عملوها و كتبوا اسم عمونا مرسى فوق الآيات برضه...لكن نشوف يمكن يخيب ظنى

الاثنين، 16 ديسمبر 2013

حوليات169:أحمد أمين


هو انا قلت لكوا قبل كده ان "احمد امين" ده راجل عبقرى؟ قلت؟ مش مهم ادينا بنقول تانى : الراجل عبقرى فعلا 

بداية معرفتى ب احمد امين كانت من مذكرات جلال امين ابوه سواء فى "رحيق العمر" او "ماذا علمتنى الحياة" و كان عمنا جلال عنده ازمه نفسية مع ابوه فكان بيخاف منه اكتر ما بيحبه , قول ده ابن مهما على فبيعامل ابوه كأب مش كمؤلف له وزنه

و بعد كده قررت اقرا "حياتى" سيرة ذاتية لاحمد امين نفسه , الحقيقة انه عموما كان راجل "تعيس" مكنتش سعيد معظم حياته و ضعف نظره كان عامل له اكتئاب مزمن

لكن ما ان تترك كل ده و تبدأ تقر ل احمد امين مش "عن" احمد امين ...هتلاقى نفسك قدام كاتب او مترجم جيد و جيد جدا كمان , من النوع اللى مش بيكتفى انه يكون مثقف او قارئ لكن بيصر على نشر الثقافة دى لغيره و يبسط للقارئ مفاهيم معقدة جدا فى كتب ابسط لكنها لا تخلو ابدا من القيمة و المعرفة

باختصار فجر الاسلام بال 3 اجزاء , و ضحى الاسلام ب3 اجزاء فيه المام جميل بالفترات التاريخية دى , لعله مفهوش مناقشات و اساليب الشك و التمحيص اللى مشهور بيه طه حسين فى كلامه عن نفس الفترة التاريخية , و مفهوش اسلوب العقاد المميز بيه , لكن فى رأيى ان امين بيديك معلومات "شبه" محايد تساعدك فى تكوين وجه نظرك الخاصة بيك

أحمد امين.....الله يرحمك

الأحد، 15 ديسمبر 2013

حوليات168:كلام يزعل 3


بما ان الناس حبت سلسلة "كلام يزعل" فنكتب بقى كلام يزعل 3:

لما صديقك الاخوانى يقول لك ان ايام مرسى كانت افضل و لعله يضيف "بكتير" فصدقنى هو عنده حق على حسب رؤيته ...يعنى ايه؟ يعنى كل واحد بيحكم على حسب وجه نظرة و حياته كانت ازاى و بقت ازاى 

هو كان نور عين مرسى اللى مفيش عالحجر غيره , اللى كان بيروح يفض اعتصامات الناس و "يربى" اللى ناقص تربية قدام قصر الاتحادية , كان العسول اللى بتتفتح له قاعة المؤتمرات لما يحب يروح مع اصحابه يتكلموا ,هو اللى ملى الاستاد عشان مرسى يهرى براحته و يقول امين بعد ما عبد المقصود يدعى علينا , هو اللى كان بيحط صباعه فى عينك لما تشتكى ان النور قطع عليك 14 ساعه او انك روحت مشى لان مفيش بنزين -حصلت معايا على فكرة- , هو اللى كان بيصرخ فيك : ما تدوله فرصه ما انت كنت واخد على قفاك بالجزمه من حسنى مبارك 30 سنه

لما الدايرة لفت , و بقى هو حسب التعبير الامريكانى the underdog -مش يعنى انه بقى كلب- اقصد انه بقى مستضعف فى الارض مقدرش يستحمل انه يبقى الشخص المكروه اللى بيتقال و يتعمل فيه اللى كان بيعمله هو

هتقول لى "طب و رابعه انتى مش شايفه اللى حصل فيها ولا انتى بقيتى عميا و اتنزعت منك الرحمه؟" هاقولك خليها فى "كلام يزعل 4" بقى ان شاء الله

السبت، 14 ديسمبر 2013

حوليات167:تحرش


حد من اصدقائى بعت لى الفيديو ده و طلب منى انى اشيره
http://www.youtube.com/watch?v=jePvXFz4XDc&feature=youtu.be

فتحته و اتفرجت عليه..حسيت بايه؟؟ ولا حاجة احساس العجز المعتاد , احساس القرف المعتاد , احساس "اليأس" المعتاد

فى اخر الفيديو احصائية بتقول ان 90 فى المية من ستات مصر اتعرضوا للتحرش فى الاماكن العامة , الحقيقة انى بشك بنسبه عالية جدا فى الرقم ده , انا رأيى اننا لو اتكلمنا عن التحرش بمعناه الواسع مش اقل من 99% و صدقنى الواحد فى المية دى على سبيل تجنب التعميم مش اكتر 

عارف اسوء ما فى الامر ايه؟ ان الستات و البناتيت مقتنعين ان هما الغلطانين و بيدافعوا عن كده بشكل مبالغ فيه , البنوته اما بتلوم نفسها او كجزء من الكورال اللى فى الشارع بتلوم الضحية 

صديقى قال لى انه حاسس ان محدش بيتكلم عن الموضوع ده كفاية , و انا رأيى اننا بتكلم كتير بس محدش بيسمع

حوليات166:خرج ولم يعد

فيلم "خرج ولم يعد" ده فيلم مش ناس كتير عارفه قيمته هو صحيح الى حد ما اخد حقه فى الجوائز لكن انا بتكلم عن مستوى المشاهد...فكرة ابن المدينة اللى بيسيب المدنية و "عدوية" و علب التوته المحفوظة و يروح الريف الواسع النقى البدائى اللى فيه ليلى علوى بتحمى الحمار و فريد شوقى بينقزقز فى سباطه موز و الفطار بكرتونه بيض و بدل عدوية فى بس صوت العصافير و الحمير فى الفجر "و الموسيقى التصويرية الممتعه فى الفيلم"

من مرتب الوظيفة اللى بيعاند عشان يقضى طول الشهر لوسع الغيطان و بيع محصول الجنانين بتاع السنه اللى بعد بعدها ...الفيلم ده بكل ما فيه تحس انه عالمى

يذكر انه فيه مشهد بيعجبنى لما الفخرانى راح لقى عائلة فريد شوقى بيتفرجوا على الافلام الاجنبى و الصوت واطى , لانه -حسب تفسيرهم- هيعملوا ايه بالصوت مدام مش بيعرفوا انجليزى؟ 

الجمعة، 13 ديسمبر 2013

حوليات165: 12Angry Men


و اذا كان فى فيلم "يستحق" اننا نقول عليه غير حياتى اعتقد انه هيكون 12Angry Men 

ايشمعنى؟؟ مش بس لانه فيلم عبقرى على المستوى السينمائى و قدر يطلع من 12 شخصية فى اوضه مقفوله فيها شباك واحد و من غير اى نوع من التسهيلات و باخراج ابيض و اسود و عدم وجود اى شئ غير سيناريو مكتوب كويس و قدرات ممثلين , فيلم ممتع على اى صعيد تختاره و يخليك كمشاهد متقدرش تغمض عينيك من قبل روتانا ما تتوجد على وجه البسيطة 

لكن كمان و بالاضافه لما سبق بيكسبك مهارة نقد نفسك و امكانية تغيير وجه نظرك لو استجد من الامر امر , الفيلم فيه فضيلة ان محدش صح قوى ولا غلط قوى

الخميس، 12 ديسمبر 2013

حوليات164:كلام يزعل 2

كلام يزعل 2:

 بما انى اعتزلت العمل الميدانى من فتره فلازم انظّر عليكوا طبعا ...فخدوا بقى الكلمتين دول اللى على رأى عم نجم يمكن يبقوا آخر كلمتين, فى كتب فى علم النفس كتير دورت فى سيكولوجية الثائر و المحتج و لسبب ما مفيش ولا واحد فيهم مدح فيها او وصف الثائر بالشخص ال"سوى" ده لو اعتبرنا النفسية السوية دى موجوده من اصله

-عمو جوستاف لوبون قال انه الانسان بمجرد تواجده مع عدد كبير من البشر فبيفقد عقله و يصبح العقل الجمعى هو المتحدث الاول , و يصير الانسان اتوماتيكى جزء من "الرعاع" على حد تعبيره يعنى و المثل الاول فى كده هى الثورة الفرنسية , و بيعتبر ان ارتكاب الجريمة كجمع بيضيع العقوبة ,مش مهم المستوى العقلى للانسان و ان كان واخد دكتوراة و 2 نوبل لكن وجوده فى الجمع يخلي اى سباك يقود الفكر الجماعى -هو مقلش سباك انا بوضح بس- قول يمكن عمو لوبون ده راجل فلول ولا حاجة

-تلاقى اونكل فرويد و الراجل كتب كتاب طويل عريض يشتم فيه لوبون و طريقة تفكيره لكن اوعى تفتكر انه عشان بيكره لوبون هيتحيز للثائر...تؤ تؤ هو وصل برضه ان الانسان بيفقد عقله فى المجموع و انه برضه بيكون رعاع بس اختلف فى التفسير و الطريقة و -كعادته- قال ان السبب اللبيدو و العوامل الجنسية المكبوته و حاجات غريبة كده ...قول سيبك من فرويد ده راجل دماغه شمال اصلا

-تروح للرفيق اريك هوفر و هو بيوصف الثائر او المحتج او زى ما بيحب يسميهم "المؤمن الصادق" هتلاقيه بيعكها اكتر و بيقول ان عشان تكون ثائر اصلا لازم تكون ذو عقل محبط -على حسب تعبيره- اى عاده الشخص الناجح السعيد فى حياته مش ممكن هيخاطر بروحه او مستقبله و ان عاده المحتج بيكون فقير او بائس من المستقبل و عايز يصهر روحه فى تكوين راديكالى جديد يديه قوه , شخص بيعمل اسقاط على فشلة الشخصى على المجتمع

يجى حد يسألنى و يقول لى ايوه يعنى عايزه ايه؟؟ اقول له ولا حاجة ...انا زى ما قلت اول سطر بنظّر كنوع من الفراغ وسط الكتب

المهم اللى عايز يزود فى الافكار دى انصحه ب:
علم نفس الجماهير وتحليل الأنا ل فرويد
المؤمن الصادق ل اريك هوفر ترجمة غازي القصيبي
سيكولوجية الجماهير ل جوستاف لوبون 

الأربعاء، 11 ديسمبر 2013

حوليات163:كلام يزعل 1

نفسى فى يوم اكتب كتاب اسميه "كلام يزعل" اصطدم ام المجتمع ده فى كل احلامه و افكاره و قناعاته القديمة و اخبطهم فى وشهم من المفاجأة و الصدمة , هو صحيح غالبا هيحرقونى زى ساحرات القرون الوسطى بس هاكون سعيدة و انا بتحرق 

طب نقول شوية كلام يزعل بقى : عايز تعرف ايه هى الثورة المضادة؟؟ يعنى مبارك يتنحى 11 فبراير و الشعب يينزل يقرر انه يقوم "نعم" على تعديلات دستورية رفضتها تقريبا كل قوى الثورة و امتى؟ 19 مارس يعنى بعدها بشهر و كسور !!

متقولش هى الناس قلبت عالثورة ليه؟...قول هى الناس كانت مع الثورة امتى اصلا؟

الثلاثاء، 10 ديسمبر 2013

حوليات162:براجماتى

-هو يعنى ايه براجماتية؟
-يعنى تبقى براجماتى 
-ايوه يعنى حاجة حلوة و لا وحشة
-على حسب
-حسب ايه؟
-لو انت براجماتى تبقى حاجة وحشة
-و لو انتى اللى براجماتية؟
-تبقى حاجة رائعة طبعا 

الاثنين، 9 ديسمبر 2013

حوليات161: حقوق المرأة

حته على جنب كده: بحترم "جدااا" الرجالة اللى بتحترم حقوق المرأة او بتدافع عنها و بينزل من نظرى برضه "جدااا" الراجل اللى بيقيدها او بيستخف بيها و ده كان كافى انى "اتقفل" من مصطفى محمود و المسيرى , 

 عمو المسيرى كان بيقول ان الحركات النسوية دى ذراع امبريالى و له كتاب عن علاقه حركات حقوق المرأة بالصهيونية ... و اونكل مصطفى محمود قال ان الضرب المذكور فى القران للمرأة بيحل مشاكلها النفسية 

و يترفع فى نظرى جدا الغزالى و ابن رشد و سلامة موسى و طبعا ابو حنيفه النعمان اللى من اوائل الناس اللى قالت ان الشرع لا يتناقض مع كون المرأة المسلمة على منصه القضاء

الأحد، 8 ديسمبر 2013

حوليات160:الجدال

من الأئمة المفضلين عندى -ده لو ينفع يبقى ليك حد مفضل يعنى- هو الامام مالك , ليه بقى؟

لانه كان بتبنى وجه نظرى فى ان الجدال ده شئ عقيم ...فى عصره كان فى ناس كل همها انها تسافر ورا الناس اللى بتجادل احسن من بلد لبلد و يتفرجوا فقال لهم: "جادلوا و كلما جاء رجل اجدل من رجل تركنا ما نزل به جبريل و غير الانسان دينه"

و مرة كان هارون الرشيد بيتسلى -تسلية فكرية يعنى- فكان بيجيب العلماء يتجادلوا قدامه و يتناظروا و مره دعى مالك للحلقات دى فقال له: "ان العلم ليس كالتحريش بين البهائم و الديكه"

اه و للناس اللى عايزة تزود عن حياة مالك و اخريين فانصح بكتاب أئمة الفقه التسعة ل عمنا عبد الرحمن الشرقاوي

السبت، 7 ديسمبر 2013

حوليات159:حزب النور

-ماما: هو حزب النور ده بيتشرط على ايه؟ هو ماسك علينا ذله؟

-انا: على فكرة انا بحترم ممثل حزب النور ده جدا

-ماما: !!! ليه بقى ان شاء الله؟

-انا: لو الاوضه دى فيها 49 واحد اخوان رسمى و انتى العضو ال50 تقدرى تقعدى معاهم شهر كامل فى نقاش و كلام؟

-ماما: ولا خمس دقايق حتى...هو انا لاقيه مرارتى؟

-انا: ايوووه اهو هو ده...اهو الراجل ده كده فجأة لاقى نفسه فى لجنة فيها 49 واحد دماغهم غير دماغه , فيهم ستات -و هما بيخافوا منهم- و منهم غير محجبات كمان , و منهم خالد يوسف عدوه الدود و منهم اللى بيقول نفتح حتى للاديان غير السماوية و معظمهم ان مكنش كلهم مش طيقونه و مع ذلك قدر يكمل و يقعد و يناقش و يمكن يغير بعض الافكار كمان

-ماما: انتى بتجيبى الافكار دى منين؟؟ يخرب بيت الطب و سنينه اللى بوظ دماغك

-انا:و النعمه ده راجل عسلية و مرارته استانليس ستيل و عجبنى جدا

الجمعة، 6 ديسمبر 2013

حوليات158:كوكب عنبر ل محمد ربيع

كوكب عنبر تأليف محمد ربيع
168 صفحة
نشر: الكتب خان
فازت رواية كوكب عنبر بجائزة ساويرس الثقافية، أفضل عمل روائي لشباب الكتّاب، لعام 2011
كوكب عنبر

 قالوا قديما ان اروع الكتب هى من تتحدث عن الكتب ذاتها , فى موقفنا اليوم فليس مجرد كتاب اخر عن الكتب بل رواية مفعمة بالخيال و الابتكار و موضوعها ببساطة هو الكتب

فى اعماله الاولى يبدع محمد ربيع فى خلق عالم واقعى/خيالى فى نفس الوقت , يملك اى قارئ ذلك الاحساس بالعالم الموازى حين تطأ قدميه مكتبة عامة و كأنك بمجرد دخولها تولج قوقعة خاصه منفصلة تماما عن ضوضاء الشارع و مشاكل حياتك اليومية , ربما هى قدرة خاصه للمطبوعات فهى تتحدث حتى فى صمتها

و لكن "كوكب عنبر" ليست كأى مكتبة عامة عادية بل تمتلك ذاك السر الذى يجعل منها مقصد مغناطيسى لكل زائر ليدور فى فلكها ربما الى الابد و لن يستطيع التحرر من متعه العشوائية و اللا نظام المطلق

لكن ما خفض التقييم قليلا انها اولا اقصر من اللازم و ثانيا ان الاستفاضة فى بعض الاجزاء و التعجل فى البعض الاخر افسد جزء من الحالة العامة

ربما هى الظروف "الغير تقليدية" لقراءتى لها لكن متعتى بالرواية عظيمة
قريت جزء كبير منها فى "الجيم" و انا بلعب

بغض النظر ان 90% من الناس اللى كانت فى الجيم سابت اللى فى ايدها و راحت تتفرج على الكائن العجيب اللى بيقرا كتاب ورق و هو على العجلة....لكن ممتعه و مستواها احسن مما تخيلت و تعدت توقعاتى "المنخفضة" عن ابداعات الشباب الأدبية 

الخميس، 5 ديسمبر 2013

حوليات157: الرئيس ل محمد العدوى

الرئيس
 الواقع انه مش كتاب واحد ابدا...دول كتابين منفصلين تمام الانفصال و اعتقد ان الروابط بينهم ميكروسكوبية فى احسن الاحوال

الكتاب الاول هو بمثابه أدب رحلات للشخصية المؤلف , قد تعتبرها مقدمة للكتاب او تهيئة للقصه الاصلية لكن المقدمة تطول و تطول ولا تنتهى بل ولا تصل لشئ ما , تتقدم فى القراءة و تتمنى ان يدخل المؤلف اخيرا فى هدف القصه الاصلى و هو ابن سينا و حياته لكنك لا تجد جواب 

و تدور فى حلقات التساؤل و الاستغراب فاذا 192 صفحة تنتهى دون ان تبدأ الرواية

و فجأة , و على حين غره

عندما تقلب الصفحة رقم 193 تجد نفسك فى الفصل الاول من رواية الرئيس
! ! !

اذا هما كتابين...اتفقنا؟ نقييم بقى الكتابين و التوأم غير المتماثل كل على حدا فقد يجمعهم غلاف الكتاب لكن لا يجمعهم رابط فكرى او ادبى
****************************

الكتاب الاول : كما اشرت من قبل هو اميل ل أدب الرحلات , لكن عموما هو كتاب جيد و خاصه ان "ايران" هى الموضوع و ده هى يندر ذكر قصه شاب سنى مسلم فيها و رحلته الفكرية و التاريخية

طويل بعض الشئ و ممل فى بعض الاجزاء لكنها تجربه جديدة و ممتعه فى اجمالها خاصه الاجزاء الاولى

****************************

بالنسبة للرواية بقى فهى ظاهريا و تنقنيا رواية متقنعه الصنع بمؤلف مطلع تاريخيا على موضوع بحثه و لغة راقية , رواية تاريخية تتداول جزء غامض من التاريخ الاسلامى كروايات : قواعد العشق الاربعون , آلموت , سمرقند , ثلاثية غرناطة 

و هى جميعا من رواياتى المفضلة و عموما ده نوعى المفضل من الروايات 

لكن

تحت هذا الظاهر التقنى تفتقد "الرئيس" شئ ما !! شئ روحانى يمكن امممم العامل اكس , فهى تبدو تقنية و مصنوعه زيادة عن اللزوم ...كما انها بالتاكيد اقصر من اللازم 

الأربعاء، 4 ديسمبر 2013

حوليات156:الحسين ابو الشهداء

أبو الشهداء الحسين بن علي ل العقاد
133 صفحة
 أبو الشهداء الحسين بن علي

يقول مولانا أمل دنقل فى احد اعظم قصائده على لسان ابن نواس

كنتُ في كَرْبلاءْ
قال لي الشيخُ إن الحُسينْ
ماتَ من أجلِ جرعةِ ماءْ
وتساءلتُ
كيف السيوفُ استباحتْ بني الأكرمينْ
فأجابَ الذي بصَّرتْه السَّماءْ
إنه الذَّهبُ المتلألىءُ: في كلِّ عينْ
إن تكُن كلماتُ الحسينْ
وسُيوفُ الحُسينْ
وجَلالُ الحُسينْ
سَقَطَتْ دون أن تُنقذ الحقَّ من ذهبِ الأمراءْ
أفتقدرُ أن تنقذ الحقَّ ثرثرةُ الشُّعراء?
والفراتُ لسانٌ من الدمِ لا يجدُ الشَّفتينْ

ماتَ من أجل جرعة ماءْ!
فاسقني يا غُلام.. صباحَ مساء
اسقِني يا غُلام
علَّني بالمُدام
أتناسى الدّماءْ
*******************************
حسنا انها اذا المأساة الابدية , كربلاء المعركة الخالدة بين الحق المطلق و الباطل المطلق , معركة بين الحسين و يزيد 

تتميز كربلاء انها واضحة معالم على خلاف ما باقى احداث الفتنة الكبرى من خلافات مقتل عثمان و معارك الجمل و صفين و خلافه , قد يتحسس الناس من خلاف طرفيه على و معاوية او على و عائشة ... لكنى لم اجد بعد من يتجرأ و يدافع عن يزيد او يسب الحسين و ان كان من اجل المال و السلطة

كربلاء و ما قبلها و ما بعدها تأثير لا يمكن وصفه بالكلمات فى التاريخ الاسلامى و فرق و شيع المسلمين لقرون و قرون
********************************
كان ذلك حديث كربلاء و سيد الشهداء عموما....اما عن كتاب العقاد فذلك حوار اخر 

الكتاب فى رأيى ناقص و منقوص و بكل الاحترام للعقاد 

الكتاب مركز بشكل معيب -فى رأيى- على كربلاء و كربلاء فقط...فمثلا لم نحظ باى تفاصيل عن حياة الحسين ابان حرب على-معاوية الشهيره

كما انه لسبب ما لم يضيف لى الكثير , ربما لاعتماده على الروايات المتداولة باستثناء رأيى العقاد ان معاوية لم يكن كاتب للوحى و انما كاتب لاحوال اهل الدنيا عن النبى

الكتاب اقصر من اللازم

الثلاثاء، 3 ديسمبر 2013

حوليات155:Fifty Shades of Grey

Fifty Shades of Grey (Fifty Shades, #1)

خبر عاجل: السبكى يصل الى امريكا

قصه تجارية تجارية تجارية و اظن انى لو قلت "تجارية" لحد بعد بكره العصر مش هيكون كفاية , لا و لاحظ انى بقول "قصة" مش رواية هى صحيح 500 صفحة بس المحتوى الفعلى لا يزيد عن قصه و يمكن قصه قصيرة كمان بس هو التكرار و اللت و العجن و الهرى

انا بقرا الرواية و كأنى بتفرج على فيلم للسبكى الصراحة مكنش ناقص غير دينا تطلع ترقص و صافينار تدخل بالمره

الرواية جنسية بحته , هدفها معروف و معموله عشان تبيع نسخ و يمكن تتعمل افلام تنجح عشان الشباب المراهق الامريكانى تنبسط

و اذا كان الجزء الاول كده امال باقى الثلاثية ايه؟

كفاية قوى كده عليها

الاثنين، 2 ديسمبر 2013

حوليات154:Too Much Happiness

Too Much Happiness
هى مجموعه قصصية لاليس مونرو حائزة النوبل الشهيرة
Too Much Happiness
احد الاعمال الادبية القليلة اللى قريتها بالانجليزى , لكن عبر حواجز اللغة وصل لى احساس و تقنية اليس مونرو الرائعة فى القصة القصيرة....و كانت كل قصة منهم حاله متكاملة من الابداع

اطلقوا عليه "تشيخوف كندا" و الحقيقة انى اختلف شوية مع التسمية هى صحيح بتكتب قصص قصيرة و قصص رائعه كمان لكن مفهاش عنصر التكثيف اللى حببنا فى تشيخوف , على العكس مونرو بتكتب شئ اقرب للرواية القصيرة بتحكى فيها احداث سنين و سنين فى شكل يشدك و تهديك دائما نهاية غير متوقعه او عنصر مفاجأة 

معظم القصص بطولة نسائية خالصة , بمشاعر امرأة بكل التداخل و الصعوبات اللى فيها ...و معظمها عن مفهوم "الخسارة" خسارة الابن او الابناء او الزوج او المجتمع ....مفهوم الوحدة فيما بعد الخسارة

مشاعر دقيقة و رقيقة جدا بتتعامل معاها اليس ببساطة و سهولة و حاله من التقبل عند الشخصيات تخليك تتعجب ازاى الانسان احيانا بيستحمل كل ده؟ ازاى الستات عندهم حاله التحمل و الصبر دى كلها , مش من باب الايمان و الاحتساب زى ستات مصر او البلاد الاسلاميه من باب القدر اللى بيخليك تتقبل من غير سبب

اليس مونرو "ست" بتكتب عن "ستات" و محدش يقراها و يوصل لعمقها غير قارئ نظرته الفنية جيدة و يقدر يشوف المجهود الموجود فى كل جمله حوارية و كل قصة قصيره فى كل مجموعة

اظن ان قصه
deep holes
هى القصة المفضلة ليا
*************************************
لينك لمعظم اعمال مونرو و منهم "تو ماتش هابنس" بصيغه
epub
هى اريح كتير للعين
http://www.4shared.com/rar/4RaJiT5w/Munro_Alice.html

لاصحاب الاندرويد ده اجمل برنامج يقراه
http://www.4shared.com/mobile/8fmlI9VK/aldiko_book_reader_premium_v22.html

و لاصحاب الويندوز ده موقع يحولها لصيغه ال
pdf
http://ebook.online-convert.com/convert-to-pdb

الأحد، 1 ديسمبر 2013

حوليات153:دم لفطيرة صهيون

دم لفطير صهيون
 بعتبر نفسى خبيرة فى الروايات السيئة قريت منهم كتير و الحمد لله ...لكن خلينى اقول ان "دم لفطير صهيون" كانت مفاجأة , الحقيقة انها كانت سيئة بامتياز 

النمطية بتقتل الفن ...و نجيب الكيلانى قرر ان يخلق نموذج نمطى و مكرر و عادى بلا مفاجأت , تابوه جامد لشخصية اليهودى الممله .....الشخصيه الشريرة الحاقدة الحاسدة البخيلة الظالمة ...اطلعوا من ام النمطية دى بقى ارحموا الادب العربى

مع البدايات بتحس بالملل خاصه ان المؤلف قرر انه يحكى للقارئ الاجواء و قلل من الحوارات بين الشخصيات اللى اصلا كانت سطحية بما فيه الكفاية

لكن كله كووووم و المشهد اللى "أسلم" فيه الحاخام ده كوم تانى خاااالص

حاجة كده لا لون ولا طعم و لا ريحة...شبه القصص اللى كان شيوخ الميكروباصات 
بيقولها بالناس اللى بتسلم فى 5 دقايق دول