الثلاثاء، 30 أغسطس، 2011

توزيع جوائز الرفايع جلوب لرمضان 2011



بعد متابعه جاده لمعظم اعمال شهر رمضان من مسلسلات و برامج و اعلانات فقد قررت انشاء جائزه "االرفايع جلوب" و ايوه دى غير الجولدن جلوب بتاعه الفرنجه الامريكان باعمالهم التليفزيونيه اللى اعمالنا تضربها بالجزمه طبعا ...

كل الاتى ده من رأيى الشخصى و متابعتى و للاعلم فانا لم اتابع مسلسلات: مسيو رمضان , الحسن و الحسين و مشرفه رجل من هذا الزمان....بينما شاهدت الدالى كاملا و لم استطع اعطاه اى جائزه  


- جائزه الرفايع جلوب لاحسن مسلسل : الريان

- لاحسن مسلسل كوميدى : الكبير الجزء الثانى 

- لاحسن ممثل : باسم السمره "عن دوره فى مسلسل الريان"

و قد نافس "خالد الصاوى" بقوه على هذه الجائزه الا ان باسم السمره حسمها باداء ممتاز خاصه فى مشاهد الشلل و الادمان ..بينما تراجعت حظوظ خالد الصاوى بسبب مبالغته فى الاداء فى بعض المشاهد... 

- لاحسن ممثل صاعد : احمد صفوت  "عن مجموع ادواره هذا العام "

- لاحسن ممثله : حجبت

لم تستطع : ليلى علوى , فيفى عبده, سميه الخشاب, صابرين , غاده عبد الرازق, دره , علا غانم ...او اى ممثله فى دور اساسى حسم هذه الجائزه هذا العام 

- لاحسن ممثله صاعده :

مناصفه بين :  حوريه فرغلى "عن دورها فى مسلسل : دوران شبرا و مسلسل: الشوارع الخلفيه"

و دينا الشربينى عن دورها "المواطن اكس" 

- لاحسن ممثل اعاد اكتشاف نفسه : هيثم احمد ذكى اللى اعاد اكتشاف نفسه فى "دوران شبرا" فخرج عن جلباب احمد ذكى و يقدم اوراق اعتماده كممثل ممتاز...

لاحسن ممثله اعادت اكتشاف نفسها : ريهام عبد الغفور عن دور "بدريه" فى "الريان" اللى عملت دور رائع معلمتوش قبل كده و خرجت عن طريقه ادائها المعتاده و طريقه تمثيل ولدها ...دور بيخاف منه ممثلات كتير 

- احسن اخراج : مخرجى مسلسل "المواطن اكس" على ابداعهم فى انتاج صوره مختلفه بالاضافه لصعوبه التعاون بين 2 مخرجين   عثمان أبو لبن ومحمد بكير

- احسن مؤلف :  عمرو الدالى  مؤلف مسلسل "دوران شبرا" ذلك الشاب اللى متخرج فى 2002 !! و قدم دراما اقل ما يقال عنها انها ممتازه بلا تصنع او تكلف ... 

- لاحسن اعلان : حمله فودافون "ذكى و السلعوه"
على الرغم من ان ناس كتير مخدتش بالها من الحمله دى فى وسط حملات بيبسى و كوكاكولا و كيمو كونو الا انها استخرجت منه ضحكه لم يستطع استخلاصها منى احد هذا العام... 

- لاحسن برنامج دينى : برنامج "فتنه" تقديم المرأه المثاليه لهذا العام دينا فاروق من قناة دريم


- لاحسن  برنامج جاد : حلاوه شمسنا للرائع ماجد الكدوانى و اعداده الرائع

-لاحسن برنامج كوميدى : برنامج "البرنامج" لمذيعه المتألق باسم يوسف

-لاسوء برنامج : رامز قلب الاسد 

- جائزه خاصه لافضل انتاج و اغناه و اسوء مستوى درامى : سماره 

-جائزه اسوء مسلسل : مناصفه بين "نونه المأذونه" و " الزناتى مجاهد"



-لاحسن تتر مسلسل :
مناصفه بين : نهايه مسلسل "الشوارع الخلفيه" غناء / لؤى "اكثر من ممتازه"

 سريّحة وبييّعة وتلامذة في مدارس, وصبايا أحلامها في العشق وفي الفارس, وبلدنا بيحرسها الحافظ والحارس, أسسها وهندسها يزوروها امنيين

 و 

مقدمه مسلسل "وادى الملوك" غناء/ على الحجار

يـا خـلـق تـكـره كـل شـي جـمـيـل .. يـا عـبـاد تـبـات عـقـلا تـقـوم مـخـابـيـل .. كـيـف خـّي عـز عـلـيـه وجـود خـيـّه .. وكـيـف قـابـيـل اشـتـاق لـدم هـابـيـل !





- لاسوء تتر مسلسل : 
مناصفه بين  : بدايه مسلسل "شارع عبد العزيز"

كفك يا دنيا علم ع الجته وع القفه
اشوف حالك ابلم واتشحتف شحتفه
ليه تمشي معايا سلبا وتحلبيني حلبا
امتى ادوقك يا ملبا ع الفستق اتبرم
 


- تتر نهايه "كيد النسا" وائل جسار
 قالو الست فالخديعه ضليعه من بره هل هلا من جواا ينهار اخبر 




- احسن موسيقى تصويريه :
مسلسل ادم بابداع ياسر عبد الرحمن "و هى تقريبا الحاجه الوحيده فى العمل كله على بعضه " فحتى تتر البدايه اللى من تلحينه لم يبدع فيها تامر فجاء صوته مخنوق و كان اللحن عبء عليه...


و زى ما قلت ده مجرد رأى شخصى اخد فى تكوينه 29 يوم...و مشاهده 30 حلقه

يا ليله العيد فجأتينا !!



و كأن محدش كان عارف ان فى عيد هيجى السنه دى ....اندهش الكل و اتفاجئوا بليله العيد اللى جت على غفله ..عملتها فينا الرؤيه و غلبت كل التوقعات الفلكيه ... ياااه بقالنا سنين محسناش بمفاجأه ليله العيد بعيدا عن النتيجه و المواعيد المسبقه...سيبك انت كل سنه و انت طيب
  

الجمعة، 26 أغسطس، 2011

لحد ما تتأكد ان الست مش زى الجزمه !!!





"انت عامل زى الراجل اللى اشترى جزمه و عجبته  و بعد كده اكتشف ان فى حد قلّب فيها قبله فكرهها و سابها , و لحد تتاكد ان الست مش زى الجزمه ابقى فكر فى كلامى " ...الجمله دى قالها عمرو الحريرى ليحيى شاهين فى فيلم "هذا هو الحب" لما طلق مراته لانه اكتشف انها عرفت واحد قبل الجواز ...بالمناسبه الفيلم ده رائع و فيه معانى كبيره و مبادئ محترمه لكننا طبعا اختذلناه لمشهد مارى منيب و هى بتعاين العروسه و تشد شعرها ...

ايه علاقه المقدمه السينمائيه دى كلها بموضوعى النهارده..تقريبا ولا حاجه الا شئ واحد : جمله " لحد ما تتأكد ان الست مش زى الجزمه" ...كل يوم و التانى يطلع كاركتير يهد الدنيا و يعصب الناس المره اللى فاتت فى بوست  العبوا مع بعض!!   كانت الخناقه عالفيس و قطعوا بعض "افتراضيا طبعا" عالفيس  بين الليبرالين و السلفيين ...


المره دى الخناقه كانت عالتويتر  ..و لو لفظ خناقه ده لفظ خاطئ لانه كان هجوم من طرف واحد اللى هو التويتيه "لذيذ اللفظ ده" ضد جريده الشروق ..و بما انى جديده عالتويتر ففضلت ربع ساعه احاول افتح اللينك  لان تويتات الناس كان كلها  هجوم ضد الكاركتير و تصفه بالتحريض ضد المرأه ...و لان حب الاستطلاع   قتلنى و بعد صعوبه و معاناه قدرت افتحه و كان هذا هو ما رأيته :




فى البدايه قريت و ضحكت و قلت عادى يعنى مش خطير ...لكن بعد لحظات تيقنت الامر و ظهر جليا فى ذهنى زى ما بيقولوا ...صغائر الاشياء هى فعلا اللى بتأثر و تولع المصايب ...

بقى احنا بنحارب  بقالنا سنين و سنين عشان نمحى فكره استباحه  التحرش و نلغى الصوره المقرفه عن ان البنات هما اللى عايزين كده و يجى رسام عايز  "يستظرف" يدمر اللى بيناه كل السنين دى .....دا احنا كمان مش بنبدأ التحرش الجنسى لا كمان بنشحته !!!

.باى داعى نبحث عن اعذار للمتحرش ؟؟ ليه بندور بأبره على اعذار تمسح لهم بانتهاك حرمه الناس ؟؟.. سيبك من المعاكسات انا بتكلم على التحرشات و ما ادراك و انا بكلمك بصراحه ان 98% من نساء مصر تعرضوا لتحرش جسدى على الاقل مره قد ينكر البعض لكن تتضح النسبه فى الغرف المغلقه...

انا بطالب بحريه انى امشى بحريه فى الشارع على الاقل اعرف امشى فى الشارع ..مش بطالب بمشاريع قوميه ولا حتى عايزه شغل و لا تنميه اقتصاديه ...مشمعنى احنا اللى منعرفش نمشى فى الشارع ؟؟ اظنها ابسط حقوق الانسان الا ينتهك احد حرمتك ..

طبقها بروح القانون ...او بروح غض البصر الشرعى..اى طريقه تمشينا فى الشارع من غير ما اتلفت ورايا..

حتى هؤلاء المتحررات  انا بدافع عنهم لان ببساطه مش من حق حد ينتهك حريه و كرامه امرأه اى كان.. اسفه على التطويل بس حضرتك تعرف ان القانون المصرى و الدولى بينص على تجريم "اغتصاب العاهره او المجنونه رغم ارادتها" ...و صدقنى نفسيا هى هى


البنات مش عايزين كرامتهم تتهان , مش عايزين يتلمسوا غصب عنهم , مش عايزين يتبص لهم زى الحيوانات من حيوانات , البنات مش بيدورا على متع رخيصه من فعل رخيص , البنات مش عواهر دول بنات ناس محترمه اتربوا و اتعلموا و اهلهم صرفوا عليهم دم قلبهم عشان يبقوا حاجه ترفع الراس ....و الاكيد و الاهم من ده كله ان البنات مش جزم ....و لحد ما تتأكد ان الست مش زى الجزمه فكر فى كلامى ده :(.....


الخميس، 25 أغسطس، 2011

برامج رمضان "2" سياسه و اشياء اخرى




المره اللى فاتت اتكلمت عن برامج الخفه المره دى برامج السياسه مع برامج التوك شو و منوعات اخرى مما شاهدت : 

كش ملك "هبه الاباصيرى"
برنامج كش ملك مع المتألقه هبه الاباصيرى ...هههههه ضحكت عليك و تخيلت و لو للحظه ان برنامج بالسخافه دى ممكن يدخل فى ذمتى بشلن ...ها هى هبه الاباصيرى تقعد و لا تحترك عضلات وجهه خوفا مع انزال ميكاجها الاوفر و بتطرح اسئله معاده مكرره تكاد تتوقع الاجابه...و بالمناسبه هما هما الضيوف اللى فى برنامج رامز واضح ان قناه الحياه بتتعاقد معاهم جمله بدل القطاعى...نفسى اعرف اصرارها على ان تفاجئنى بجمله كش ملك و كأنها بتخضك .... 

برنامج العصابه

برنامج تافه و مزيف..فكرته مش جديده و كل اللى معتمدين عليه هو الديكور و طريقه التصوير و الفكره الفكسانه اخر تلت اربع حاجات...اما حلقه عمرو مصطفى ففرجه لوحدها...المذيعه دمها يلطش   

بنى ادم شو تركيا 
 بصوا بقى ...انا متغاظه من قناه الحياه السنه دى فهى كعاده الناجحين لما يعرفوا انهم كويسين فيكسلوا و يفشلوا او زى الزمالك لما يكون كسبان اتنين صفر فيكسل و ينتهى الماتش مغلوب 3-2 ....بنى ادم شو تركيا هو اعاده لمواسم سابقه لاحمد ادم ...و بما ان احمد ادم زار تركيا و عجبته فقرر ان يشاهد المشاهد معه 30 حلقه تركيا دون ان يحق لك ابداء مللك...احمد ادم منبهر باى حاجه و كل حاجه : لو لاقى الشارع نضيف منبهر , لو لاقى فى تكنولوجيا ينبهر , لو لاقى موائد رحمن ينبهر ....هى صحيح تركيا حلوه بس كل بلاد العالم المحترمه كده ...عادى يعنى

اه ملحوظه كمان : احمد ادم  بيعمل دعايه غير مباشره للسياحه فى تركيا من مصر اللى هى اصلا كتير ...ارحمنا يا احمد احنا عايزين نجيب مش نودى

برنامج الشعب يريد "طونى خليفه" 
 طونى خليفه مستفز .. هو ده المبدأ اللى بيبنى عليه طونى شغله كل سنه بدايه من برنامج "ساعه بقرب الحبيب" ثم برنامج "لمن يجرؤ فقط" على ال بى سى ثم برنامج "من غير ميعاد" ثم برنامج "تايكت او ليف ات" على كان بيجى على قناه دبى ثم برنامج "للنشر" على قناه الجديد ثم السنه اللى فاتت برنامج  "لماذا" على الحياه و الناس و اخيرا برنامج "الشعب يريد"    .....نستمتع لما بنشوف طونى بيعصب الناس و ينرفزهم اونطه على فكره هتلاقيهم هما هما كل سنه باختلاف طفيف يعنى مثلا ايناس الدغيدى بتجى كل سنه بكافه الاشكال .....مكرر بشكل مستفز 

كل رجال الرئيس "عادل حموده" 
 ها هو عادل حموده يرتدى زى الثوره و الثوريين يلا يعنى هو ملوش نفس , اسم البرنامج نفسه اسم لفيلم مشهور جدا طبعا لروبرت ريدفورد و داستن هوفمن اللى بوستره فوق و كتاب اشهر اكيد.. 

بغض النظر عن الاسم اصلا ...البرنامج عباره عن ان عادل حموده "بيقطع" فى مبارك و اللى حواليه بداعى و بدون داعى ...باثبات و من غير اثبات ...مش بقول انهم كانوا ملائكه بس عندى احساس ان عادل حموده بيتكلم ب "غل" و كأن فى ثأر شخصى ...مش عارفه ليه بس ده احساسى اللى جالى , حسيته وهو بيتكلم كانه بياخد حقه الشخصى ...بدليل انه ما اتكلمش عن "حد من الجيش" مع انهم كانوا حوالين الريس برضه و ده اسمه "كل رجال الرئيس" مش "شويه من رجال الرئيس" او "كل رجال الرئيس ما عدا المجلس العسكرى" و  ربنا يجعل كلامى خفيف عليهم لان البورش و السجن حر اليومين دول و انا عندى مصيف و معنديش نفس اتسجن السنه دى ...

نصف الحقيقه "لميس الحديدى" 
تانى تانى تانى هنعود للحيره تانى و النار و العذاب من تانى ...ده شعار برامج رمضان السنه دى فنفس الفكره تعود مره وراء مره باسماء مختلفه و قنوات جديده ..قدمت لميس قبل كده برامج مشابهه :برنامج "إتكلم" على القناة الأولى ثم برنامج "مانع وممنوع" في رمضان 2007، وبرنامج الاختيار الصعب في رمضان 2008، و في رمضان (2009) برنامج فيش وتشبيه. و تفاجنا فى 2011 مع ان مفيش حاجه تفاجئ فى كده بنفس الفكره باسم اخر على cbcو هو "1/2 الحقيقه" بضيوف مكررين و اسئله مكرره تحصل منها فعلا على 1/2 الحقيقه...اسم على مسمى...

برنامج من انتم؟ "بسمه" 
تعود بسمه كمذيعه مره اخرى ...لكن المره دى ببرنامج سياسى و ها هى تتحدث باسم الثوره يلا يعنى هى ملهاش نفس ....من انتم برنامج بيجيب اتنين رأيهم غير بعض يخبطوا فى بعض و دخول فى مناقشات عقيمه لا فائده منها لان لا ده و لا ده هيغير رأيه ببساطه....مع العلم بان المناقشه لا تكون واحد- لواحد زى ما انت متخيل لاااا يا راجل يا طيب ..فالمناقشه تكون دائما 2-1 نظرا لان بسمه دائما ما تتحيز لجانب من الجانبين ...فاذا كان ثورى امام فل من فلول او هكذا سموهم فانحازت بسمه للاول , و اذا كان اسلامى امام ليبرالى انحازت للثانى ...بص انا عاده موقفى بيبقى متطابق مع رأى الشخص اللى بتتحيز له بسمه لكن فكره عدم الحياديه و الانحياز اللى متنفعش لمذيعه و لو حتى لكسب ارض عند الجمهور ...

ملحوظه : الحلقه اللى كان فيها عمرو حمزاوى ...قلت لماما : و الله شكلهم لايق على بعض ..و الغريبه ان طلع فى حاجه فعلا ...على فكره انا معجبه بال couple ده قوى ربنا يوفقهم

ثوره على النفس "معتز مسعود" 

 البرنامج الدينى تقريبا الوحيد اللى بشوفه للدعاه الجدد نظرا لانى بميل اكتر للقدام و كبار السن مش عارفه ليه ...فكره البرنامج-بغض النظر انه المحتوى الدينى طبعا-  حلوه جدا بمعنى فكره انك تستعرض مشاكل حقيقيه واقعيه بتحصل لنا و محاوله ايجاد حلول منطقيه لها بعيدا عن الانشاء او التأنيب و الرعب ...اللى مش عاجبنى فى البرنامج هو الحاجه اللى الناس كلها معجبه بيه وهو طريقه التصوير السينمائيه , فعلى الرغم من انه مفترض انها تكون ميزه الا انى اراها فذلكه غير مناسبه لبرنامج دينى...

ملحوظه : مش فاهمه العسيلى ايه دوره فى البرنامج بالظبط فلا اراه ذا معنى او دور للداعيه على ما اظن...

حلاوه شمسنا "ماجد الكدوانى"
من اكتر البرامج اللى عجبتنى السنه دى :) ...فكره لطيفه ممتعه حقيقيه بيستضيف فيها ماجد الكدوانى ناس طبيعيه زينا و زى اللى بنشوفهم كل يوم , ناس طيبه تحبهم مع الكلام و تعجب ببساطهم ...هو المقابل و العكس لاولاد احمد حلمى الشيك بتوع المدارس الاجنبى....اجمل حاجه ان ماجد الكدوانى "المسيحى" بيعتبر رمضان مناسبه مميزه مختلفه عن باقى السنه فعلا هى دى مصر اللى بحبها ...برنامج مصرى لمذيع مصرى بضيوف مصريين..

شكرا "شريف منير" 
 بغض النظر عن كونه برنامج اعلانى فى المقام الاول الا انه برنامج جميل , يديك طاقه ايجابيه و الناس اللى بيجبهم هما اللى قال عليهم ربنا "" للفقراء الذين أحصروا في سبيل الله لا يستطيعون ضرباً في الأرض يحسبهم الجاهل أغنياء من التعفف تعرفهم بسيماهم لا يسألون الناس إلحافاً وما تنفقوا من خير فإن الله به عليم " [ البقرة ] ...ناس غلبانه لكن شقيانه لا تطلب الحسنه ولا العون و لا محترفين شحاته و  لا بطلجيه بيسرقوا بدافع الفقر...ربنا يكثر منهم , شريف منير شكله عجوز شويه بس انا سعيده بكده لانه مش مزيف ولا بيحول يصغر نفسه...


 

الأربعاء، 24 أغسطس، 2011

برامج رمضان "1" الخفه



لاحظت ان المدونات و المدونين - اعزهم الله و اكثر من عددهم- ابتدوا يعملوا تقييمات شامله لاعمال رمضان ...كما انى لاحظت ان الاهتمام منصب على الاعلانات و المسلسلات ...و بما انى فاضيه فى رمضان و النت كان قاطع فتره طويله فانا تقريبا بتفرج على معظم الحاجات ...

قال يعنى مش كفايه علينا المسلسلات و الاعلانات فاتانا الله و ابتلانا بالبرامج كمان ...المهم خلونى ابعبع اللى شاليه فى قلبى طول السنه :

اولا : برامج الخفه :

برنامج رامز قلب الاسد
اسوء برامج رمضان 2011 بكل تأكيد و يمكن كمان يكون اسوء برنامج فى اخر 5 سنين ....اسنخفاف و استظراف و بواخه ليس لها حدود...نفس المقلب اللى ابتدى سخيف ثم تحول الى ملل كل يوم بنفس التكنيك و بنفس الزيف ....عندى احساس اصيل لا شك فيه ان الممثلين بيكونوا عارفين بدليل ان فى بعضهم متخصص  برامج مقالب فقط يعنى عمره ما جه فى حوار حقيقى فلما بيكون خارج من بيتهم بيبقى عارف و بيبان انه بيمثل ....اللى يغيظ ان الناس معجبه اعجاب بلا حدود بالهطل ده....

 برنامج الأسانسير

نفس فكره البرنامج بتاع رامز بكم اعلى من النخلف و  السماجه بس بدل على مشاهير بيستعبط على خلق الله ...و لو انى برضه حستهم بيستهبلوا....

برنامج اوعى وشك
 
برضه على قناه الحياه اللى بمناسبه مستواها انحدر بشده  السنه دى ....مقالب فى الشارع على طريقه الكاميرا الخفيه نادرا تلاقى نفسك بتضحك لكن غالبا بتتأسف على البهدله اللى بيبهدولها لسئ الحظ...فاكرين الكاميرا الخفيه بتاعه زمان كان مسليه ازاى بدون اهانه ...اه ايام

برنامج ماتيجى أقولك
 ميستحقش كلام كتير...مجرد تكرار ممل لبرامج سابقه لحسين الامام و كانت البرامج السابقه فى حد ذاتها مش ناجحه للدرجه انها تتكرار كل هذا العدد من المرات خاصه انهم فى الاول و الاخر تقريبا نفس الممثلين....

برنامج  كاستينج وبس
بص انا عاده مبحبش برامج المقالب ...لكنى بعترف انى حبيت البرنامج ده ...ضحكت عليه لما شبعت بذات فى حلقات معينه ....الكل عايز يمثل و خلاص...

برامج الطياره الشقيه
  التليفزيون المصرى مصر على التفاهه و الخيابه ...حتى الاسم تافه ...ميستحقش التعليق خاصه مع التقليد المكرر للشخصيات...

 ارجوك متفتيش 2 
 +
 توك شو زى العسل

 + 
حبشتكنات 2 
=
ال3 برامج نفس الفكره و نفس المستوى تقريبا ....و كمان نفس الانتقاد : اهانه لبساطه المصريين و اختبار لطيبتهم و احيانا سذاجتهم ... 


 توك شو تكنو قراط
 بنفس كاست موجه كوميدى المعتاد اللى حبيته و نجح قبل كده على الرغم من انتقاد بعض الناس....اما المره دى فعلى الرغم من اختلاف الموضوع بعد الثوره الا ان للاسف جاء البرنامج اقل من مستواهم فهم "عادم" كأنه ناقص ملح ....

شويه عيال "احمد حلمى" 
و يرجع احمد حلمى ببدايته مره تانيه مع حوارته اللطيفه مع الاطفال , البرنامج اللى صعده و حبب الناس فيه , البرنامج اللى كان بيتذاع على الفضائيه التانيه (ايام ما كان فى فضائيه تانيه) مع اطفال لذيذه يكلمهم احمد بطريقته المميزه...و نجح جدا البرنامج و لما ظهر احمد حلمى كممثل و نجم رجع عمله تانى مع نسخه"من سيربح البونبون" ..و اكثر من نسخه تلا ذلك...و انتهى الامر بنسخه "شويه عيال" على السى بى سى ...اعترف انى تبعته بشغف و حبيته لكن فى حاجتين هما اللى ماضيقنى غير كده كان يبقى ممتاز : 
 اولا : ان خطوات البرنامج محفوظه بمعنى ان فيه فقرات تعاد كل يوم -ده بالاضافه لاعاده فكره البرنامج نفسها- و العيب ده مكنش موجود فى النسخ السابقه خاصه الاولى لما كان الحوار فرى بلا قيود و كان بيطلع منه حاجات تحفه
ثانيا : ان اعداد البرنامج مصر على نوعيه الاطفال الكلاس اولاد رجال الاعمال اللى بيرحوا مدارس فرنساوى و امريكانى و عنده البرتقاله اسمها"اورنج" و الشيكولا و ميعرفش عربى...كان نفسى اشوف طفل طبقه متوسطه شويه   

 المعجبين وعمايلهم 
 الى حدا ما يعتبر برنامج جيد..ايقاع خفيف و ممثلين متنوعين و مواقف بتضحك احيانا ...اعيب عليه انها هى هى نفس الفكره كل يوم كما اعيب عليه ان ممثلينه الى حدا ما ممثلين صف تانى....الغريبه ان المذيعه اخف بكتير من تمثيلها البارد اللى فى مسلسل "خاتم سليمان"...  

 حلمنتيشى تقديم عمرو قطامش
اهو عمر قطامش فى حد ذاته تمثيل لمدونه "اسئله اعتلاها التراب" فلنعترف ان مصر و اهلها بينسوا بسرعه ..فبعد ان تحمس الجميع لقطامش و امتلئ شعره الفيس و التويتر و اى حاجه اختفى و راح فى غياهب النسيان و لما رجع للاسف مرجعش بنفس القوه و ده فى رأيى لانه مصر على الاعتماد على نفسه زياده عن اللزوم فهو اللى بيألف و يمثل و ناقص بس انه ينضف البلاتوه بعد العرض ...جاء البرنامج مكرر لشئ لم يفعل اصلا و السبب انه متوقع زياده عن اللزوم مفهوش مفاجأت ....

برنامج حدوتة بعد النوم 
 نفس كلام اللى قلته على قطامش يمشى على ابو حفيظه الا ان فى حاله قطامش فالموضوع مكنش محروق و لكنه متوقع اكثر من الازم اما فى حاله سيد ابو حفيظه فهو حرق حقيقى جدا , 3 او 4 مواسم من نفس الشخصيه باسامى مختلفه و قنوات مختلفه ...حاول انه يجدد بمواضيع الثوره فزاد الطين بله....بجد كفايه يا سيد يا ابو حفيظه

 برنامج حكومه شو
البرنامج ده ميزته تكاد تكون الوحيده فكره انه اتعمل قبل الثوره و الا لفقد تسعه اعشار معناه...تقليد ممتع من عزب , استمتعت بيه عموما و عجبنى انه كان بيناقش قضايا كانت مثيره ساعتها و اتنست كالعاده زى مثلا موضوع القمح المسوس و التوك توك و الحاجات اللى كانت كوارث و انتهى الامر لتحولها لجزء طبيعى من حياتنا اليوميه....لطيف ظريف دمه خفيف

برنامج حمار سواقة 

عارفه انه ميعتبرش برنامج قوى كونه كارتون...لكن اعذرنى فانا حتى متردده فى وضعه فى لائحه الكوميدى من كتر ما دمه تقيل..برنامج لزج سمج لا طعم و لا لون ولا ريحه ولا فكره .... 

برنامج "برنامج اية"
 برنامج بيتكلم عن مرشحى الرئاسه "الخيالين" مع تقديم برامج انتخابيه "خياليه" من الاخر اعاده تقليد لشخصيات اتقلدت قبل كده...مجرد اهدار لموارد قناه النيل كوميدى و بالتالى مال الدوله...


كانت تلك مجموعه مما شاهدت فى برامج الخفه و طبعا فى برامج فى النوعيه دى تانيه لكنى مشفتهاش ....انتظرونا فى برامج البلوتيكا .... 

الأحد، 21 أغسطس، 2011

العبوا مع بعض !!!





من يومين -قبل احداث سيناء- لاقيت الفيس مولع ...خناقات و مناقشات و مشادات اخلاقيه و لا اخلاقيه ...اتهامات بالالحاد مقابله لاتهامات بالوهابيه ... شد شهر بين طرفين احدهما حامل لواء الديموقراطيه  و حامى حماته و الاخر حامل لواء الاسلام و المدافع الوحيد عنه ...اللى يضحك بجد ان الطرفين كانوا already مسلمين فاذا بى اشاهد المعركه دون فهم السبب....


و زى اى خناقه لما الاطراف بتسخن و فى وسط النقاشات ينسى الجميع او يتناسى السبب وراء ده كله ...و ببلاهه الاطفال سألت احدهم السؤال الابدى : هو فى ايه؟؟ ....

و اكتشفت ببساطه - على الرغم من ان الموضوع مش بسيط - ان الكاركتير هو المحفز الاساسى لتلك المعادله المشتعله ...


بديت القصه باول شتا لا سورى ...تبدأت القصه بكاركتير فى جريده الدستور اعتبره السلفيين اهانه ...اعذرونى لاعاده نشره لكن انا من انصار ان الحقيقه مش هتستخبى و عموما ده اتنشر فى جريده يعنى معروف و الناس شافته : 

بصراحه الكاركتير يغيظ نسبيا ....خاصه ان لو السلفيين مسكوا الحكم منفردين - وربنا ما يكتبه علينا - مش هيطبقوا الشريعه بالمنظر ده -او هكذا اتمنى - ...هو اللى يفقع فعلا و ضايقنى حقيقى هو الجمله المكتوبه فى البوكس الرمادى الخاص بالانفصال لانى باعتبره فعلا اهانه اكتر من اى جمله مذكوره فى الكاركتير لانه اتهام بانهم هيخربوا مصر و يفتتوتها و ده مش حقيقى و ظالم ...


و لكن متتخيلوش ان السلفيين غلابا يعنى لا دول بيخدوا حقهم و بيخدوه بزياده كمان و تم الرد سريعا و موجعا و كان هذا الكاركتير :


فاذا كان الكاركتير السابق قليل الذوق قراط فهذا الكاركتير قليل الذوق تلات اربع قراريط ....و رأيى هذا مبنى على ان الاهانه فيه شخصيه لشخص ابراهيم عيسى فحتى اذا كان على اختلاف مع السلفيين فهذا لا يعنى ابدا انه غير متدين او ان على راسه "اريال" فابراهيم عيسى على الرغم من اختلافى معاه فى دسته مواضيع الا انه بالتاكيد شخصيه معتدله و كان عامل برنامج دينى تاريخى فلا اظنه يستحق هذا ابدا ....العلمانيه لا تعنى كل هذا الكم من الاباحيه و قله الادب ...و الاكيد ان العلمانيه لا تشجع المذاهب الشيعيه ...


ده وقته ؟؟ هنمسك فى بعض تانى و نقطع فى بعض تانى ...من الاخر العبوا مع بعض

السبت، 20 أغسطس، 2011

شباب الثوره و الكلام اللى يودى فى داهيه !!





لو لاحظتوا انى مكتبتش عن موضوع اسماء محفوظ خالص فى وقت الكلام ...وقت ما كانت كل المدونات بتتكلم فى الموضوع ده بالسلب او بالايجاب ..مرضتش اكتب لان رأيى صادم عاده و مبيعجبش ناس كتير فى العادى فانا للاسف لست ثوريه يمكن بحب الصح  لكن بكره الصوت العالى عموما و فى السياسه خصوصا ....


تعالو نرجع لوراء نجيب اول الموضوع :


لو مكنتش بتعرف متتكلمش ....فلتقل خيرا او لتصمت ...جمله اتمنى ان يعيها شباب الثوره المتحمسين ....انا ضد المحاكمات العسكريه للمدنين عموما و باعتبرها تجاوز للحريات و لكن كنت اتمنى تحويلها لمحاكمه مدنيه عاديه لتحاسب على اقوالها و ما نتج عنها ....


شباب الثوره خرج من دائره الثوره و الشارع لمجال السياسه و تأثر الناس باقوالهم و افعالهم و لذلك راعوا الله فيما تقولون و بلاش الحماس اللى يودى فى داهيه ده ...فماذا اذا تحمس احدهم لجمله اسماء و شاف البلد مبقاش فيها عدل و قرر انه يقوم ب "سللسه" الاغتيالات دى هيكون ذنبه هو و اللى قتله فى رقبه مين ؟؟.....


و بعد ان تنفست الصعداء بعد انتهاء القضيه بالتنازل عن القضيه (و ده مش نفاق للمجلس العسكرى اللى اقل صفه اصفه بها انه فاشل فى الاداره ) ....ابتدى موضوع سيناء و اسرائيل و الجو الجديد ده....


و كما توقعت قرر شباب الثوره الصيد فى الماء العكر و ابداء البطوله و الشجاعه بتاعه كل مره ....دخلت على التويتر فوجدته متخم بدعوات الزحف على سيناء و اكل اسرائيل باسناننا !!! ...






تانى نرجع للكلام المتحمس ...حلو الكلام حلو و احلى من المره اللى فاتت يا اسماء ...نبنى مشاريع و ندعم و كل الكلام الخيالى البمبى ده !!!! ربنا يهديكى يا اسماء ...


*****************************************




معظمنا او كلنا مشتركين فى مدونه " جبهه التهييس الشعبيه " هى مدونه قديمه و شغاله من زمان من قبل الثوره و ليها مواقف شجاعه و متحمسه كتير لكن موقفها الاخير بصراحه لم يعجبنى بل و مستفز ....


عنوان المقاله " حي على الجهاد.. كل ينزل، واللي قاعد في بيته من غير عذر ندل"
http://tahyyes.blogspot.com/2011/08/blog-post_20.html




مقال يعصب و ينرفز و مرفوض حتى لو من باب الحماس فمبدأ من ليس معى فهو ضدى هو مبدأ نازى ديكاتورى معروف قطعا ...
دى بعض جمل من خلت الدم يطلع من نافوخى :


" نزولنا قدام السفارة واجب وطني المقصر فيه مجرم"

"انا شخصيا مش باحب افرق ما بين الجيش والمجلس لانهم كلهم دماغ واحدة فعلا، بس في موضوع اسرائيل ده بالذات الجيش موقفه مش زي المجلس، يعني اغلبية الجيش فعلا مقتنعين اننا خربنا البلد والكلام الفارغ ده، بس في موضوع اسرائيل الجيش كله معانا، ولو عملنا ايه الجيش كله معانا... كله كله كله
خلاص خلصنا كده؟"
 

"حي على الجهاد.. ده جهاد اصلي
انزلوا قدام السفارة
يا سيدي لو مش قادر تنزل قبل الفطار انا مسامحاك تنزل بعد الفطار تصلي التروايح هناك وتتسحر وتفضل قاعد لحد ما النور يشقشق
قلت ايه؟
بس غير كده مش مسامحاك
مش مسامحاك وحسبي الله ونعم الوكيل فيك، واي حاجة حتتعمل تئذي البلد دي من تحت راس كسلك وتأخرك عنها انا مش مسامحاك، وحسبي الله ونعم الوكيل فيك.. حسبي الله ونعم الوكيل فيك.. حسبي الله ونعم الوكيل فيك ياللي ما نزلتش قدام السفارة ومالكش اعذار
حسبي الله ونعم الوكيل فيك"


شباب الثوره راعو الله فى البلد ....اللى حصل ده تقدر تستفيد منه سياسيا بدل ما نفرح الناس فينا و نقع فى الفخ ...

و ارجع و اقول رد الفعل المفروض انه سياسى من الحكومه السلحفاه شديده البطء ...مطلوب موقف جاد قوى من الحكومه حتى لا يضطر ان ينزل الشباب الشارع ليحدث ما يحصل  عقباه ..منك لله يا شرف..ربنا يستر 


بالنسبة للشباب اللى هيحارب إسرائيل ع الفيسبوك .. طبعاً كلّنا عارفين :

...Space = Fire
Ctrl = Jump
Q = 2ermy Qombela
R = Reload
P = Pause

ولو حد تعب أو فَرهد لازم يدوس (Esc) !! دى حرب يا جدعان مش هزار !!


"الذ بيرسونال قريته اليومين دول " 

Talk To Her 2002



عمرك ما حد حكى لك على فيلم و قالك انه فيلم رائع ...و عشان تتطمن روحت دورت على تقييمه  على المواقع السينمائيه الشهيره و طلع ترتيبه ممتاز فتشجعت و حملته او روحته سينما بروح عاليه و صدر رحب ثم فؤجت بان الفيلم معجبكش ؟!!




حصل معايا الموقف ده كذا مره طبعا ...لكن فى فيلم النهارده بذات الصدمه كانت قويه , فيلم المره دى هو Hable con ella او بالانجليزى talk to her او بالعربى "كلمها"...سمعت عن الفيلم سماع خير جدا بانه احد اقوى افلام السينما و كزياده فى التحقق روحت ادور فى مواقع الثقه السينمائيه فوجدت ان تقييمه فى imdb تقييم ممتاز 8.1 و خد واحده اوسكار ..فى موقع rottentomatoes تقييمه 92% غير المدح و رائع الحديث...


و بالفعل شفته بشغف و احساس بالقبول ...فؤجئت ببدايه ممله بعض الشئ فقلت عادى بتحصل ..تلى ذلك احداث غريبه بعض الشئ فقلت و ماله...ثم نهايه كرهتها ...ها هو الفيلم انتهى و انا فى حاله انكار لحدوث ما لم اتوقعه ..الفيلم انتهى و لم احبه !! ...هل العيب فيا ولا فى الفيلم ؟؟..سألت نفسى  و مفيش اجابه فعلى الرغم من ان الجميع معجب بيه فانا اراه فيلم سخيف بفكره مفتعله لا معنى لها ...

التالى مجرد عرض لبدايات احداث الفيلم ...مفيش حرق للقصه اطمئن 




القصه بتبدأ بماركو الصحفى اللى بيقابل ليديا المشهوره جدا و المميزه بكونها بتصارع الثيران و بما انها ست فده بيمنحها شهره و الكل يرغب فى اجراء نقاش صحفى معاها ...لكن الصدفه هو اللى بيجمعهم ليست الصحافه فببساطه "ماركو" مكنش يعرف انها مشهوره فيتم المقابله صدفه قدام بيتها بينما هى بتصرخ لوجود ثعبان فى البيت و بينما الثور ميهمهاش فالتعابين بتموتها من الخوف و كاى ذكر بيطوع و يدخل يقتل لها التعبان و بحركه مفاجاه تقرر انها مستحيل تدخل البيت ده تانى و تقرر المبيت فى فندق و ينتهى الامر بيهم فى السرير !!



على الجانب الاخر و كخط درامى منفصل بنبدأ مع بينيجو الممرض اللى كان بيرعى امه المريضه لفتره طويله ..و بيقع فى غرام بيت بيشوفها بتتمرن على الرقص ...بيحاول يتعرف عليها باى شكل و بيزور ابوها الدكتور النفسى كمريض لمحاوله رؤيتها ...لكن فى حادث مؤسف بتعمل حادثه و بتدخل فى غيوبه كامله ...ولانه مهووس بيها بشتغل لها ممرض مخصوص فى نفس المستشفى عشان يراعها و يعاملها كحبيبته  و كأنها واعيه تماما .....




يلتقى الخطان الدراميين بليديا "مصارعه الثيران" فى غيبوبه بعد حادثه اثناء العرض ...و تدخل نفس المستشفى لتتكون صداقه فريبه نظر لتشابه الظروف بين ماركو و بينيجو فكلاهما حبيبته  فى غيوبه و مازال الحب موجود ...و تتطور الاحداث كثيرا 


- زى ما انت شايف كده القصه مش وحشه لكنى بصراحه محبتش الفيلم ده ابدا يمكن بسبب الاكثار من المشاهد الخارجه خاصه الكليب الطويل اللى فى نص الفيلم و اللى خلانى كرهت الفيلم فعلا...


طبعا طبعا ظز فى رأيى و ممكن و بالفعل الفيلم عجب ناس كتير...لكن بما انى فى بيتى و مدونتى فاسمحولى اعوم ضد التيار و لو قليلا...



http://www.imdb.com/title/tt0287467/

http://www.rottentomatoes.com/m/talk_to_her/

للتحميل "الفيلم ده صعب الحصول عليه لكنى دورت على النسخه بالظبط اللى حملتها "

http://www.megaupload.com/?d=5EYU0IF1 


الأربعاء، 17 أغسطس، 2011

Mary and Max 2009







ايه اللى يثبت "مارى دازى دينكل" اللى من استراليا ذات ال 8 سنوات مع "ماكس هوروتس" ذو ال 50 عام ذلك المريض النفسى الغير سوى العازب من نيويورك امريكا ؟؟ ...الاجابه ببساطه هى الطيبه و الوحده و الشيكولاته !! 

يقدم لنا المخرج الرائع ادم اليوت الحاصل على الاوسكار عن فيلمه الممتع  Harvie Krumpet فيلم اخر ممتع ...
 
فى الفيلم الممتع "مارى اند ماكس" انتاج 2009 , الفيلم الكارتون غريب الاطوار جميل المحتوى نرجع لسحر الصداقه ...الصداقه اللى هى كلمه تقريبا نسينا معناها فى الواقع و فى السينما .....عارفين اجمل حاجه فى الفيلم ده كان ايه ؟؟ اجمل حاجه فيه انه مبنى على قصه حقيقيه ...حاجه حلوه قوى اننا نرجع تانى نصدق ان الدنيا فيها صداقه مجرده من غير طلب او مصلحه , عارفه انه معنى طفولى و يمكن ساذج لكن الطيبه حلوه برضه على الاقل احيانا ...

تبدأ القصه بمارى الطفله فى استراليا اللى حياتها سيئه لحد كبير باسره غريبه و وحده قاتله ...


هى دى مارى ...طبعا اكيد خدت بالك من غرابه شكل الكارتون لكن بعد فتره بتتعود على شكله و هتحسه معبر اكتر من جو الثرى دى او الجرافيك ...


هى دى والده مارى و هى زى ما انت شايف كده سبب تعاسه بنتها فى رأيى ...والده مارى سكيره طول الوقت , بتدخن طول الوقت, بتنام كل الوقت, و فوق كل ده و ده بتسرق من المحلات كمان و لها عاده بسماع الماتشات فى الراديو  و بتعرض مارى بطفولتها ان والدتها "بتستلف " من المحلات  و انها بتدوق "الشيرى" ...

شخصيه الام محوريه فى بدايه القصه لما بتقول لمارى ان الاطفال بيجوا الدنيا فى قاع كوبايات البيره و بالتالى تتساءل مارى طيب فى امريكا بيلاقوا الاطفال فين ؟؟ و بما ان امريكا بتشرب كانزات كوكاكولا فبتفكر مارى انهم بيلاقوا الاطفال فى قاع الكانز!! فتقرر الاتصال برقم عشوائى من امريكا لسؤاله....و يقع الحظ و الاختيار على صاحبنا ماكس من نيويورك...

و ده ماكس ذلك العازب التعس من نيويورك , ماكس بيتجاوب ببساطه و طفوليه مع طلب مارى ....و بالتالى تتكون تلك الصداقه الممتعه الرائعه بين طرفين ..... 

من الاخر فيلم ممتع ...بسيط...مسلى ...متقلب الاحوال كثير الاحداث

الفيلم بتقييم 8.2 على الموقع الشهير imdb ...يحتل المرتبه 194 من افضل 250 فيلم فى تاريخ السينما ...تقييم 94% على موقع rottentomatoes


http://www.rottentomatoes.com/m/1209767-mary_and_max/


http://www.imdb.com/title/tt0978762/


ملحوظه : لا تنسى ان الفيلم قصه حقيقيه

للتحميل 
http://www.arbcinema.com/pen/showthread.php?t=14462

الأحد، 14 أغسطس، 2011

اسئله اعتلاها التراب!!



الذ حاجه فى بلدنا الحبيب مصر او عشان نكون منصفين هى موجوده فى  بلاد العالم اجمع لكنها فى مصر متوفره وفره السمك فى المحيط ....اما ايه هى الحاجه دى فهى ببساطه كوننا نتحمس للاشياء بقوه او نختلف و نتناقش عليها بقوه ثم ينتهى الموضوع بل و يقتل و يدفن فى مقبره النسيان ...و يظهر على السطح موضوع اخر و تتكرر المأساه بلا نهايه و لا متابعه ....و لذلك قررت ان انبش القبور و ازيل التراب عن قديم الاخبار ...اسفه ان كنت بوجع دماغك بمواضيع قديمه لكن لا تنخدع فمعنى انها قديمه لا يعنى انها غير هامه او انها انتهت بل هى ببساطه غير مهمه بعد الان...




- فاكر موضوع الجاسوس الاسرائيلى ؟؟؟....ايوه ايوه حكايه الجاسوس الاهبل الاسرائيلى اللى ضحكتنا عليه لما شبعنا و اشتغلنا عليه  تويتر و الفيس بوك و بلوجر و ياهو و هوت ميل و ماى سبيس و كل الاكونتات من كل الانواع ...من ضحك لتريقه او شتيمه لاسرائيل او مدح فى المجلس العسكرى او ذم فيه باعتباره مزور الموضوع كلا حسب اتجاهه و كلنا ادلينا بدلونا -حتى انا- اما جدا او هزلا ...لذا فالسؤال هو :


هى القضيه دى حصل فيها ايه؟؟؟...طلع براءه؟؟ طلع مدان؟؟...السفاره طلعتوه؟؟..باختصار هو ايه اللى حصل فى الموضوع ده؟؟؟....




- فاكر الحناقه الشهيره اللى كانت بين "طلعت السادات" و "مصطفى بكرى"...ايوه الخناقه  و الشتيمه و الاتهامات المتبادله بالرشوه و استغلال النفوذ و السرقه و الفساد ؟؟...اصر كلا الطرفين على الاستضافه وحيدا دون مواجهه بين الطرفين و كالعاده لفوا كعب داير على القنوات من بتاعه التوك شو "دريم - الحياه- اليوم مع عمرو اديب - المحور - و كله كله ...و كانت الاتهامات بشعه بصراحه و على الهواء و انتهى اخر ما سمعت فى هذا الموضوع بجمله طلعت السادات مع عمرو اديب بان "اللى هيجيلك المره الجايه و مش هيكون فى السجن هيكون هو الصادق" و الغريب هو ان عمرو استضاف الراجل ده مرتين بعد كده من غير ما يقولوا لنا هما عملوا ايه ...لو كانوا اتصلحوا يبقوا الطرفين غير محترمين لان الذمه الماليه كالثوب الابيض و اى دنس يؤثر فيه


ارجع افتكر على اليوتيوب
...لذا فالسؤال :


هو الموضوع اتقفل ولا اتقفل عليه؟؟؟




- فاكرين اختراع كده بين التنين و الديناصور و انثى الحمام كانوا طلعوا لنا بيه و كان يسمى "الحوار الوطنى" او كما سميته وقتها "الحمار الوطنى" و كتبنا  و غنينا و انتقدنا و راحوا اتناقشوا و اتخنقوا و ضربوا بعض يومها و رفضوا ناس و مشوا ناس و ناس انسحبت و ناس صوتت و مكنش ناقص يومها غير انهم يرفعوا على بعض سنج و مطاوى ...و كل ده ادى ايحاء بانه اهم و اقوى حاجه فى مصر و اللى مش هيدخل فيه هيخرج بره اللعبه السياسيه برمتها....و مر شهر اتنين ثلاثه و اكتشفنا انه عادى جداا انك تكون بره الحوار الوطنى و الوفاق القومى و اى حاجه على وزن الفلان الفلانى و مع ذلك تفضل موجود و متواجد يمكن بقوه اكبر و ما فى دليل اكبر من كون الاخوان المسلمين و حركه 6 ابريل بره الحوار الوطنى و اظنهم اقوى من ناس كتير جوه...و لذا فالسؤال الذى اعتلاه التراب :

هو الحوار الوطنى بقى مين اطرافه؟؟عملوا ايه؟؟ قدموا لنا ايه؟؟


- فاكرين الخناقه اللى كانت بين "اعاده توزيع السكان " و بين "ممر التنميه" او بمعنى ادق الاشتباكات اللفظيه و الكلاميه بين المهندس ممدوح حمزه و العالم فاروق الباز ؟؟...القصه كانت ان كلا منهم لديه مشروع مليارى ضخم لاعاده تشكيل مصر و بدل من التعاون المشترك بين كبار العلماء فى وطننا الحبيب انتهى الامر عند اتهم كلا منها للاخر بالجهل بل و تسخيف المشروع الاخر ووصفه بانه "غير قابل للتنفيذ"....و انتهى الامر باحاله الامر للجنه مختصه لتحديد اى المشروعين سيكون انجح و اكثر فاعليه لتكوين مستقبل مشرق لمصرنا الحبيبه مصر .لذا فالسؤال الذى اعتلاه التراب نظرا لان الناس نسيت كالعاده نظرا للمثل المصرى القديم "اذا اردت قتل موضوع , حيله الى لجنه" :

هو ممر التنميه هيتنفذ ؟؟ هل مشروع "اعاده توزيع السكان" هيتم؟؟ هل تم التصالح بين الناس المحترمه دى؟؟ هل الخلاف ده ادى لفشل المشروعين او على الاقل احدها؟؟؟



- فاكرين اعاده هيكله مشاريع العهد البائد بعد صرف ملايين المليارات فيها و صلاحيه اكثرها للانتاج و الافاده منها و بالتحديد توشكى و شرق العونيات و المفاعل النووى اللى فى الضبعه ؟؟....اهو الكلمتين دول كانوا عنوان رئيسى فى كل جرائد مصر على لسان حد مهم قوى فى حكوماتنا الموقره - وان كنت مش فاكره ده كان فى انهى تعديل وزارى - لا تم هيكله ولا تم النظر فى المشاريع دى اصلا و كأننا لاقيين الفلوس فى الشارع  او ان فلوسنا دى حرام و يجب حرقها...و بعدين هما مش قالوا هنسحب الارض من طلال و نديها لشباب او هنزرعها قمح كنوع من الامن الغذائى..لذا فالسؤال اللى اعتلاه التراب :

فين توشكى؟؟ فين الضبعه؟؟ فين شرق العونيات؟؟ 


- فاكرين الفلوس؟؟ اه الفلوس فاكرين ال 700 مليار بتوع حسنى و 50 مليار بتوع سوزان و 140 مليار بتوع عز و الارقام الاوفر اللى سمعناها على صفحات جرائد المفروض انها محترمه و قوميه ؟؟!!!...فاكرين الجمعيات اللى اقيمت لرد اموال مصر المنهوبه فى بنوك بره ..و الاخصائيين اللى جابوهم فى البرامج فى كيفيه كشف الارصده الخفيه و طريقه استردادها ...فاكرين الشنطه اللى حضرها كل صاحب اسره فى مصر للملمه فلوس المنحه اللى هتجى من السما ..و بنفس منهج المثل المصرى الشهير فاكرين "لجنة استرداد أموال مصر "؟؟..باختصار ازيل التراب عن احد احلى الاسئله :

فين الفلوس؟؟؟؟ ....

عندى من العينه دى كتير و كتير لكن على طريقه التحرير و طريقه تونى خليفه : "الشعب يريد ان تكشف التراب".....اه يا بلد