السبت، 20 أغسطس، 2011

Talk To Her 2002



عمرك ما حد حكى لك على فيلم و قالك انه فيلم رائع ...و عشان تتطمن روحت دورت على تقييمه  على المواقع السينمائيه الشهيره و طلع ترتيبه ممتاز فتشجعت و حملته او روحته سينما بروح عاليه و صدر رحب ثم فؤجت بان الفيلم معجبكش ؟!!




حصل معايا الموقف ده كذا مره طبعا ...لكن فى فيلم النهارده بذات الصدمه كانت قويه , فيلم المره دى هو Hable con ella او بالانجليزى talk to her او بالعربى "كلمها"...سمعت عن الفيلم سماع خير جدا بانه احد اقوى افلام السينما و كزياده فى التحقق روحت ادور فى مواقع الثقه السينمائيه فوجدت ان تقييمه فى imdb تقييم ممتاز 8.1 و خد واحده اوسكار ..فى موقع rottentomatoes تقييمه 92% غير المدح و رائع الحديث...


و بالفعل شفته بشغف و احساس بالقبول ...فؤجئت ببدايه ممله بعض الشئ فقلت عادى بتحصل ..تلى ذلك احداث غريبه بعض الشئ فقلت و ماله...ثم نهايه كرهتها ...ها هو الفيلم انتهى و انا فى حاله انكار لحدوث ما لم اتوقعه ..الفيلم انتهى و لم احبه !! ...هل العيب فيا ولا فى الفيلم ؟؟..سألت نفسى  و مفيش اجابه فعلى الرغم من ان الجميع معجب بيه فانا اراه فيلم سخيف بفكره مفتعله لا معنى لها ...

التالى مجرد عرض لبدايات احداث الفيلم ...مفيش حرق للقصه اطمئن 




القصه بتبدأ بماركو الصحفى اللى بيقابل ليديا المشهوره جدا و المميزه بكونها بتصارع الثيران و بما انها ست فده بيمنحها شهره و الكل يرغب فى اجراء نقاش صحفى معاها ...لكن الصدفه هو اللى بيجمعهم ليست الصحافه فببساطه "ماركو" مكنش يعرف انها مشهوره فيتم المقابله صدفه قدام بيتها بينما هى بتصرخ لوجود ثعبان فى البيت و بينما الثور ميهمهاش فالتعابين بتموتها من الخوف و كاى ذكر بيطوع و يدخل يقتل لها التعبان و بحركه مفاجاه تقرر انها مستحيل تدخل البيت ده تانى و تقرر المبيت فى فندق و ينتهى الامر بيهم فى السرير !!



على الجانب الاخر و كخط درامى منفصل بنبدأ مع بينيجو الممرض اللى كان بيرعى امه المريضه لفتره طويله ..و بيقع فى غرام بيت بيشوفها بتتمرن على الرقص ...بيحاول يتعرف عليها باى شكل و بيزور ابوها الدكتور النفسى كمريض لمحاوله رؤيتها ...لكن فى حادث مؤسف بتعمل حادثه و بتدخل فى غيوبه كامله ...ولانه مهووس بيها بشتغل لها ممرض مخصوص فى نفس المستشفى عشان يراعها و يعاملها كحبيبته  و كأنها واعيه تماما .....




يلتقى الخطان الدراميين بليديا "مصارعه الثيران" فى غيبوبه بعد حادثه اثناء العرض ...و تدخل نفس المستشفى لتتكون صداقه فريبه نظر لتشابه الظروف بين ماركو و بينيجو فكلاهما حبيبته  فى غيوبه و مازال الحب موجود ...و تتطور الاحداث كثيرا 


- زى ما انت شايف كده القصه مش وحشه لكنى بصراحه محبتش الفيلم ده ابدا يمكن بسبب الاكثار من المشاهد الخارجه خاصه الكليب الطويل اللى فى نص الفيلم و اللى خلانى كرهت الفيلم فعلا...


طبعا طبعا ظز فى رأيى و ممكن و بالفعل الفيلم عجب ناس كتير...لكن بما انى فى بيتى و مدونتى فاسمحولى اعوم ضد التيار و لو قليلا...



http://www.imdb.com/title/tt0287467/

http://www.rottentomatoes.com/m/talk_to_her/

للتحميل "الفيلم ده صعب الحصول عليه لكنى دورت على النسخه بالظبط اللى حملتها "

http://www.megaupload.com/?d=5EYU0IF1 


4 التعليقات:

مارك جمال يقول...

تقدري تقولي إن مخرج الفيلم المودوبار هو يوسف شاهين أسبانيا.. اتفرجت على معظم أفلامه وكلها أغرب من بعض.
على فكرة ليه أفلام أغرب من Habla con ella بكتيييير

بس ليه حاجات برضه ظريفة.. بس لا تخلو من الغرابة والجنان.. زي مثلا Mujeres al borde de un ataque nervioso بالانجليزي Women on the Verge of a Nervous Breakdown

أظن قيمة المودوبار هي إنه بيمثل تيار السينما الحديث في أسبانيا.. بس كعادة المخرجين الناجحين بيبقوا لاسعين حبتين :)

غير معرف يقول...

هو انا من أشد معجبي الفيلم ...
لأنك لو قلبتيه ع الناحيه التانيه حتلاقيه بيطرح سؤال خطير ...او محرج حبتين
الناس اللي ميته موت أكلينيكي (او مصابه بموت جزع المخ) اللي ما تقدريش تأكدي ان كانوا اجساد ميته ولا حيه ...ما هي حقوقهم ..!
هل لأجسادهم حرمه ...وان كان كذلك أزاي بنسمح لنفسنا نتناقش ان كان ممكن ننتزع منهم قرنيه او نأخذ كلى او قلب ...!
أزاي يكون الموت الرحيم أصلا خيار ...!

هل نمتلك القدرة ع مشاهدة فيلم نهايته تختلف مع امنياتنا ..توقعاتنا ...!

انها الصدفه التي تقوم عليها احداث الفيلم جميعا ...وانه لا يوجد شئ اسمه غالبا او متوقع في عالم البشر ...!

وع فكره الفيلم ليس اغرب ما اخرج مودوبار ده حتى يعتبر من افلامه المتزنه للغايه

غير معرف يقول...

فيلم talk to her قصة يمكن ان تكون مملة عند البعض الا انها تحمل الكثير من الالغاز التي لا يمكن ان نفهمها الا بعد مشاهدة الفيلم اكثر من مرة و في كل مرة سيعاد الفيلم سترى اشياء لم تقدر على رأيتها من المرة الاولى

غير معرف يقول...

الفيلم يطرح العديد من القضايا في قضيتين هما قضية ماركو و ليديا و بينيجو و اليسيا و لكن النهاية تطرح بداية جديدة يمكن ان نتخيلها و نشكلها كما نحب
و لكل انسان رايه لكن فيم talk to her من اروع ما شاهدت

إرسال تعليق

حلو؟؟ وحش؟؟ طب ساكت ليه ما تقول....