الجمعة، 31 يناير، 2014

حوليات215:استفتاء 4

حد من اصدقائى اللى مش اخوان بس اخوان و هو مش عارف "و هم كثر" قال ان الدستور مزور و المفروض منعترفش بالنتيجة؟؟ ليه يا صديقى هل كان فى تسويد للبطاقات مثلا؟ رموا البطاقات فى النيل و حطوا غيرهم؟ .....لا عشان كانوا مشغلين بره اللجنه تسلم الايادى

اممممم طب خد حته النوستالجيا دى بقى

فى 2011 فى انتخابات مجلس الشعب الاولى دخلت انتخب و انا جوه اللجنه -جواها حرفيا- لقيت حد من مندوبين الاخوان بيقول لى : الميزان يا انسه

بصت له بصه حاولت اجمع فيها كل معانى الاحتقار ما اظنش انه استقبلها كامله , ولانى نسبيا كنت جديده على العمليه الديموقراطية ما عملتش شكوى و بعد ما مشيت شويه ببص ورايا لقيته بيقول نفس الجمله للى بعدى , بص بغض النظر انه غير قانونى التوجيه جوه اللجنه و قدام الصندوق ذاته و فى ظل سكوت من الاشراف -الاخوان كانوا على الحجر وقتها- انا اتفقعت انه بيقول لى الرمز كأنى مش بعرف اقرا و اكتب

طيب بحكى الحكاية دى ليه؟؟ عشان بالرغم من ده انا اعترفت بشرعية الانتخابات و ملقتش ان ده يستحق عدم الاعتراف بالنتيجة و لان الراجل لو ادن على مدنه بشعار الميزان 100 سنه مكنتش هادى صوتى له برضه

الخميس، 30 يناير، 2014

حوليات214:العوام 5

حته على جنب كده: هى الناس مفقوعه قوى كده ليه ان الناس سعيده و بتغنى فى الشارع؟؟ امممم انا لما لقيت نفسى متضايقه كده قلت لنفسى لو الناس كانت شايله صور البوب -فى عالم موازى بقى- و بتهتف باسمه مكنتش هازعل بالعكس كنت يمكن هتفت معاهم لكن عشان بيهتفوا باسم حد انا مش بطيقه فى الطريق ماشى انا متضايقه , و مكنتش هاقول عليهم عبيد البرادعى ..اممممم حتى الكلمه مش راكبه على بعضها

و لو شفت ان فى فرنسا الستات بيشغلوا موسيقى و يغنوا و يصقفوا و يمكن بيرقصوا مع الانتخاب كنت قلت ياااه شفت البلد السعيده اللى بيسعد فيها اهلها انما لما يحصل فى امبابه يبقى شئ يع و زباله !!

من حقك تكون كئيب بس مش من حقك تمنع الناس من الفرحة , ربنا يرزقنى بيها

#انا_هاخرج_من_طائفة_المثقفين_من_قبل_ما_ادخل_فيها #المجد_للعوام

الأربعاء، 29 يناير، 2014

حوليات213:العوام 4


اهى دى جديدة بقى....فى احد الريفيوهات كتبت 

"شىء في شىء يأخذك معه إلى عالم مختلف خاصةً بعد حدوث الفعل الرئيسي في الروايه ، ليُدخِلك إلى عالم مليئ بالأحتمالات

لن تستطيع ان تصنف هذا العمل إذا كان عبثياً ، او سودوياً ، او ينتمي إلى المدرسه الكلاسيكيه ، ربما هو خليط من كل ذلك ! لكنه بالتأكيد يستحق القراءه والتمعن وعدم الأكتفاء بالقشور"

يقوم يرد عليا و يقولى : ان لم تكتشفى ذلك فلا تحكمى على مجهودات الاخريين من فضلك فلا يوجد عمل مجهول الهوية كما لا يوجد انسان كذلك والحاجات ديه عاوزلة ناس متخصصه مش مجرد قراء عاديين 
************************************
#ما_انا_قارئ_عادى
#انت_من_العوام_على
#كان_مالى_و_مال_النقد؟
#قالك_من_فضلك

الثلاثاء، 28 يناير، 2014

حوليات212:العوام 3


المصريين اتحطوا فى الستينات بين طرفين الاول بيقول : الشعب هو القائد والمعلم , و التانى بيقول انتو مش بتفهموا احنا هنفكر لكوا

و اهو اتحط فيه تانى و ما اظنش الاختيار هيختلف

نفس المعضله دى قابلت يسارين التستينات : هل نمشى قدام الشعب و نوجهه على مزاجنا ؟ ولا نمشى وراه و ننفذ له رغباته؟ بس الشعب عايز عبد الناصر و اليسارين مش عايزينه فاختاروا الحل الاول على اساس ان العوام دول مش بيعرفوا يفكروا و هما هيفكروا لهم سلف و كانت النتيجة ايه؟ فشخ ناصرى بامتياز بمباركة شعبيه
********************

النهاردة و امبارح فهمت شويه حاجات كانت واقفه فى زورى , كنت بسأل نفسى انا كنت فى 30 يونيو جوه الميدان و كان هو و كل الشوارع اللى مشيت فيها مليانه ناس غلابا قرروا يعملوا ثورة من نوع كنباوى ,

مش ثورة قوى و لا عندهم ادنى استعداد يقفوا لو حد ضرب رصاص و لو فى الهوا , مش بياخدوا معاهم اقنعه ولا بانر ولا استعدادت لمواجهه الغاز , بيحبوا علم مصر المصنع فى الصين الرخيص , بيحبوا عبد الناصر و بيتشعلقوا باى حد له شبه منه , مش بيعرفوا يدافعوا عن روحهم غير بان عددهم كبير اللى عارفين ان قوتهم فى عددهم مش فى اى حاجه تانيه...كنت متأكده انهم كتير و كتير قوى و عارفه انهم غلابا و غلابا قوى 

يومها قلت لنفسى اى كان اللى عايزه الناس يبقى هو اللى صح بغض النظر عن رأيى , و كنت بسأل نفسى هما اصدقائى المنظرين اتعموا فى عينهم؟ مش شايفين؟ استهبال يعنى عن الاعداد دى و الارادة الجمعية دى؟

و امبارح بس فهمت...هما معترفين بالعدد لكن عندهم قناعه انهم زباله و مش مهمين اصلا و مش لازم يكون ليهم رأى , احرار و عبيد بقى و لحسى بياده و كنبه و جيل عبد ناصر اللى اتضرب على قفاه او ابن م***** و نجس على حسب وصف وائل عباس او اوصاف اكثر ادبا من رفاقه

امال "الشعب يريد" دى ايه؟! اكليشيه منظر كده ؟! , هما العوام و احنا النخبه؟! و "احنا" ليه ما انا عوام برضه يعنى انا اللى ناشطة قوى؟!

#حوار_مع_النفس
#الان_فقط_فهمت
#اعاده_تقييم_للموقف
#طب_ما_انا_عوام
#وهلا_لوين

الاثنين، 27 يناير، 2014

حوليات211:العوام 2


الخلاصه: احنا اتحطينا او اتحط علينا ايهما اقرب

بين اسلام راديكالى سياسى اللى مش معاه ملحد و كاره للاسلام و بيحب الجنس الحرام على حسب وصف علاء صادق

و بين مؤسسة عسكرية بتشتغل سياسة اى حد من مش معاها خاين و عميل و قابض من بلاد الدنيا كلهم

و بين شباب ثورى يعتبر اى حد مختلف معاهم و لو فى الآلية يبقى م**** و ابن م***** على رأى وائل عباس

#الحقيقة_المره_لان_السكر_غلى_بعيد_عنك

الأحد، 26 يناير، 2014

حوليات210:العوام 1

متقرفش من الناس , انزل وسطهم و بلاش تعاملهم ككائنات فضائية...انا وسطهم لقيت ايمانى بالله اولا و امل فى مستقبل اقل سوءا من اللى فات ثانيا, ملقتش الايمان ولا الامل فى قعده المثقفين لسه

 تعاسه و امل فى نفس ذات البوست كالعادة

عارف المنظر بتاع اللمه اللى حوالين البنت اللى لبست حجاب جديد على كبر؟ لما البنات تتلف حواليها تهنى و تبارك و تدعى لها ؟ اهو ده المنظر بالظبط اللى شفته من الستات لما بيلاقوا واحدة منقبه هتقول نعم فى الاستفتاء قدام اللجنه , حفله تكريم يا ابنى!


السبت، 25 يناير، 2014

حوليات209:استفتاء 3


نكمل مغامرات ماما , جه حظها فى لجنه كبار السن و طبعا 80 فى الميه منهم اما عمى او جهلة , نحكى بقى قصه واحده منهم:

-سيدة 2:"تهلل فى دخولها" ربنا يحميكوا و يحمى البلد يا رب

-ماما: امين يا ماما , ادى بطاقتك للمستشارة

-سيدة 2: انا مش شايفه حاجه تعالى ساعدينى يا بنتى

-ماما: "تنظر للمستشارة"

-المستشارة: خليكى معاها يا مدام لحد ما تخلص

-ماما:طب يا ستى عايزة ايه؟

-سيدة 2: انا عايزة السيسى

-ماما:"فى ضحك" بس النهاردة مفيش سيسى يا حاجه النهاردة نعم و لا للدستور

-سيدة 2: يبقى نعم للسيسى

-ماما: و الله ما فى سيسى النهاردة , لسه يا حاجة مش دلوقتى..النهاردة دستور

-سيدة 2: يبقى نعم

-ماما: اعملى علامه على الخانه الزرقا 

-سيدة 2: انا لا شايفه ازرق ولا اصفر

-ماما: ما هو مينفعش اعلم لك يا حاجة

-سيدة 2: طب شمال ولا يمين

-ماما: "فى فراغ صبر" اليمين ربنا يجعلك من اهله

-سيدة 2: "تعلم" اهو علامه كبيرة نعم "تزغرد فى علو و تخرج"

-ماما: جت لك الصحة دلوقتى؟!

#ماما_و_الاستفتاء

الجمعة، 24 يناير، 2014

حوليات208:استفتاء 2


لسه لك مزاج تهرى فى الدستور؟ اصل انا لسه بصراحة , و بما ان ماما لسه داخله البيت من شوية من الاشراف فى لجنه الاستفتاء عندنا فى شبرا الخيمة فاحكى لكم مواقف حصريه كانت ماما جزء منها 

موقف 1:
اللجنه لسه فاتحه و الساعه يدوبك 9 , بعد ما الموظفين صوتوا و عملوا محضر بكده و لسه اول واحده داخله على المستشارة , الست كلمت القاضى و صوتت و هى 5 دقائق و الست جت تصرخ و تهلل 

-سيدة: يا لهوووووى انتوا بتتضحكوا عليا؟ انا هوديكوا فى 60 داهيه

-ماما: ايه يا ست الكل زعلانه ليه؟

-سيده: الست دى "و تشير الى المستشارة" سألتها نعم ازرق ولا احمر و قالت لى احمر , طلعت بره بقول لابنى قالى كده تبقى قولتى لا

-الجميع: "ينظر الى المستشارة بمزيج من الاحتقار و الغضب"

-المستشارة: "فى لهفه" و الله ما كنت اقصد انا مشفتش الورقه اصلا و افتكرت ان نعم احمر فعلا

-سيدة: ايوه يا اختى يعملوها و يخيلوا انتى شكلك اخوان اصلا قولى قولتى لكام واحد كده عشان يطلع الاستفتاء لا

-ماما: و الله انتى كنتى اول واحده يا حاجة

-سيدة: ايوه ما هو انا لو ما اخدتش بالى كان زمانها بتعمل كده طول النهاااار
*************************
بس يا سيدى و راحت الست عملت محضر فى المستشارة , و نص ساعه و كان الاشراف القضائى و المفتشين و لجان حقوق الانسان و المراقبين وصلوا و المستشارة قاعده مرعوبه و عامله زى الارنب -ماما مش قادرة تحدد هل هى عملت كده عن قصد ولا حادثة- و بما ان الست دى بقت شبهه بقت اللجنه كلها مرقباها طول اليوم و كميه التليفونات اللى جت لها شتيمة من اللى المشرفين غير طبيعية

#ماما_و_الاستفتاء

الخميس، 23 يناير، 2014

حوليات207:استفتاء 1


زى ما توقعت, رحت اللجنه الساعه 12 كده لقيت -كالعاده- امة لا اله الا الله مشفتش حاجه مختلفه عن اى استحقاق انتخابى سابق هى هى نفس الطوابير و هى هى نفس الزحمه ...و الصورة المرفقة دى صوره اللجنه اللى جنبى لان اللجنه بتاعتى كانت زحمه و معرفتش اتصور حاجه ولا اصور حاجه 

الجزيرة الصبح قالت ان الصور قديمة من الدستور اللى فات بدليل ان الناس لابسه صيفى فقررت بلاش تيشرت و برولو و خليها صوف مع ان الدنيا حر بس عشان الجزيره تتبسط

السن اللى شفته كان معظمه فوق الاربعين , ستات غلابا بخمار طويل و نضارات طبيه بسيطة , و ستات عواجيز بيسندوها -كالعاده- عساكر الجيش فى مشهد مكرر للغايه مرضتش اصوره لان الصوره دى اشهر من اللازم و لعلها بقت اكليشه فى حد ذاتها

انا لحد و انا واقفه فى الطابور مكنتش حسمت هاقول نعم زى ما قريت الدستور ولا هاغلس على مصر و اقول لا تناحه كده و خلاص , و فى الانتظار يدور الحوار التالى بين سيدتين كلاهما فوق ال40 و بين صوت الستات اللى بره اللجنه اللى بتهتف كتسلية بما ان الطابور طويل و بين صوتى الداخلى اللى احتفظت بيه لنفسى:

سيدة 1: امال قعدوا يقولوا محدش هينزل ما الزحمه اهى 

سيده 2: اللى مش هينزلوا دول قله

انا: "ما شاء الله "قله" و فصحى كمان يا شعب مصر ؟ "

حشود: يا ابو نسر يا ابو ضبورة

سيدة 1: الواد قاعد فى البيت يقولى السيسى عمل ايه و انا اشتم فيه

حشود: مصر هتفضل منصورة

سيدة 2: قولى له مبقناش سوريا ولا ليبيا ولا اليمن

انا: "ايه يا اخويا الثقافه اللى نزلت عالطابور النهارده؟"

حشود: تسلم الايادى

سيدة 1: الواد عامل يقولى مرسى مرسى , قلت له ما انت يا خايب متخرج من الحقوق بقالك 3 سنين كان عملك ايه مرسى؟

انا: "اسمعى كلامى انا يا ست ولا السيسى هيعمل له حاجه"

حشود: تسلم يا جيش بلادى

سيدة 2: انا مش عارفه مين الرخم اللى هينزل يقول لا ده

انا: "بصى يا حاجه انا كنت هارخم بس يلا انا هاصوت عشانك بذات"

الظابط: يلا يا جماعه عايزين 5 من لجنه 150

انا: ايوه انا

سيدة 1: ربنا يحميكوا و يخليكوا يا ابنى لعيالكوا و للبلد

انا: "يا وليه بطلى ارحمى روحك بقى"


الأربعاء، 22 يناير، 2014

حوليات206: تسلم

"حدث منذ دقائق , الباب بيخبط"

المحصل: فاتورة المية

انا: كام لو سمحت؟

المحصل: 79 جنيه

انا: "تسحب من المحفظة" اتفضل , ايه الاغنية الشغاله دى؟

الجارة: دى تسلم الايادى

انا: حسبى الله و نعم الوكيل فى دى اغنيه هى ايه بتجرى ورايا؟

المحصل: "ينظر فى استغراب"

الجارة: "تنظر فى استغراب"

انا: لا انا مش اخوان و النيعمة

المحصل: "ينظر فى استغراب"

انا: اه قصدك على استيكر السيسى اللى عالباب؟ احم لا ده قهر من الوالدة كده

الجارة: غريبة مع ان والدتك اقنعت العمارة كلها بانهم ينزلوا الدستور

انا: ماشاء الله امى بقت ناشط سياسى و هينزل لها تسريبات امتى 

المحصل: امال بتكرهى الاغنيه ليه؟

انا: "محصل ده ولا امن دولة" المعنى حلو يا سلام عليه و ماله انما مصطفى كامل ده لا خالص

الجميع: "ينظر فى استغراب"

الثلاثاء، 21 يناير، 2014

حوليات205:حلاوة

و يلاقى الناس مبسوطه و بتقول لبعض كل سنه و انت طيب و امه راحت تشترى الحلاوه و تنقى الحتت الطريه لابوه عشان سنانه متوجعوش و تحوش الحتت المقرمشه لاخته الصغيره عشان بيحبها و لاخوها الحمصيه عشان بيستناها من السنه للسنه

فيقعد بينه و بين نفسه و يقول ايه ده؟ هى مال الناس مبسوطه كده ليه؟ لما اخش ابيض عليهم شويه فيقعد على اسلام ويب يدور على اى بتدجان ان الاحتفال بمولد النبى بدعه الى اخر الحديث و عموما انت لو دورت على اسلام ويب على اى حاجه هتلاقيها حرام حتى الشيكولاته بالفستق باعتبار انها خلوه غير شرعيه

يعمل بوست طويل كله رعب للناس الغلابا اللى بتحبى النبى اولا و ببساطة بتحب الحلاوه و بتستناها على الاقل من باب ربنا ما يقطع لك عاده يا ابنى , و مليان لينكات ...حاااا اتبسطت؟؟ لا طبعا ما هو اصل دم اهلك يلطش و ميكملش عندك غير 6 فريند هما اللى طايقنك و يمكن نصهم عامل لك hide update 

فياخد البوست كوبى و يرزعه على جروب الدفعه و على الوول المايل بتاع دينا نبيل 

#سيبك_انت_كل_سنه_و_انت_طيب

الاثنين، 20 يناير، 2014

حوليات204:جدتى

فى يوم جدى حس انه كبر فى السن "77 سنه" و خاف على جدتى "72 سنه" من الزمن و من انها تعيش لوحدها بعد ما يموت , خاف من انها ست مش متعلمة و ميضمنش ولاده هيعملوا باصلهم ولا لا

جدتى كانت -يالعجب- مبتعرفش تقرا و تكتب على الرغم من اللى كان بيقعد معاها كان بيحسها مثقفه , و زود على كل ده انها مكنش معاها بطاقة؟! اممم حاجه عجيبه اصلا ان حد يوصل للسن ده من غير اثبات شخصيه و ده ان دل على شئ فيدل اننا بلد صايعه قول فكك من السياسه و نكمل

خلاها تسافر الصعيد مخصوص عشان تعمل بطاقه مع انها مكنتش راحت هناك عند العائلة الاصليه من 50 سنه , راحت و قابلت قرايبها اللى كانت تعرفهم بالاسم بس و رجعت بكم هائل من المش و الفطير ...راح هو المعاشات و ظبط كل حاجه عشان متلفش هى و تتعب بعد ما يموت , و حضر لها الورق فى الدولاب و حفظها حتى المكان و تعمل ايه بالخطوات 

بعدها بشهرين جت لماما تليفون و عينها دمعت و لبست اسود و راحت بيت العائلة الكبير ...جدتى ماتت

 listening to we`ll be together again - frank sinatra.

الأحد، 19 يناير، 2014

حوليات203: الابنودى

خلصنا كلام , نهرى بقى: فى "رأيى" ان نجاح او فشل الاحتجاجات مش دايما مبنى على نبل قضيتك و لا حتى مدى اقتناعك بيها لكن فى كثير من الاحوال بتكون من مدى نجاحك فى استقطاب عناصر مؤيدة جديدة لتيارك

و اكبر مثال على كده فى رأيى برضه هو تحول "الابنودى" ايام طنطاوى لدرجة انه يشتم الجيش , و مش بس كده لا و يعمل عليهم قصيدة ممتعه و اغنية امتع "حرية المساجين 2" : الشرّ فى طرْف الميدان يِسكر, والفجر يطلع, تحجبُه العسكر 

ناس كتير ما ادركتش التحول "النوعى" ده , ان الابنودى كبير السن اللى اكيد بحكم خبرته بقى تيار محافظ يوصل حماسه انه يقول لفظ "عسكر" اصلا فهذا تحول لو تعلمون كبير , و محدش يقدر يقول انه كان بينافق لان فى الوقت ده الشباب كانوا تحت مدرعات ماسبيرو و كنت من المستضعفين فى الارض و كان انه يقف جنبك حدث فى حد ذاته جابت معاك اعداد اضافية و وصل المصريين "لاول مره" لدرجة من الضيق من المؤسسة الاثيرة على قلبهم الجيش لكن بما ان الشارع حركته تقيله و يحب المحافظه فلجأوا للطريق الامن -مش طريق الثورة وقتها بتاع الان يعنى الان- انهم يستعجلوا الانتخابات للتخلص منهم

استغليت الحشد ده ازاى وقتها؟؟ عصرت على امه لمونه و اديتهم اصوات لمرسى  , عموما بلاش نقلب فى الماضى الاسود خلينا فى الحاضر

الابنودى -زى غيره- رجع لعادته القديمة و غفروا بلاوى المؤسسة الميرى يمكن خوفا من الاخوان او خوفا عالبلد الله اعلم , و دايسين فى الدستور

كل ده ليه؟؟ دى مقدمه عشان اقول لك: الابنودى عامل قصيدة بعنوان "نعم" مخصصه لدعم الدستور 

السبت، 18 يناير، 2014

حوليات202: بارومة


و يجى حد يقول لى لماذا لم تنهض مسر بعد السورة ؟؟؟

اقول له عشان احبطوا ابن بلطشيم البار اشرف بارومه اللى وعد محبيه و عاشقيه بانتهاء الفئر فى 228 يوم فقط لا غير , احبطوا الراجل لدرجة انه انسحب من السباق الرئاسى يا ظلمه يا كفره 

كل يوم اعدى تحت كوبرى غمره و انا فى اتجاهى لميكروباص غمرة/الشارع الجديد و انا بحضر الجنيه و نص الاجره و اشوف دعايا برومه و اقول يا ريتنى كنت انتخبته و دفعت الاجره جنيه و ربع بس يا مسر , كده برضه يا مسر؟!ّ

اشرف بارومه سنظل اوفياء و النعيمة

الجمعة، 17 يناير، 2014

حوليات201:اراء المفكرين

البوست ده طويل فهواه البوستات التليغرافية بلاش  تنويه اهو

فى اى موقع يحتوى مقالات هتلاقى اى مقال عنوانه فيه "السيسى" الاكثر مشاهده و قراءة , منطقى برضه خاصه انه عموما اكثر الشخصيات تأثيرا فى مصر ايجابيا و سلبيا حسب الزاوية اللى بتبص لها , ناخد بقى عينه عشوائية من 3 كتاب كبار ب3 مواقف متباينه على الرغم من كون الجميع يكتب فى نفس الجريدة:

1-علاء الاسوانى: و ده موقفه "كالعاده" متأرجح و متدرج زى رأيه ايام طنطاوى , بيكون مؤيد على مضض فى الاول و مع كل موقف سئ بيتحول لمعارض و فى مقاله "هل يحب السيسى الشعر؟" اشعر بتحول فى موقف علاء للاتجاه المعارض الذى جاء فيه

"كان الكاتب الفرنسى الكبير جون بول سارتر يحرض الطلاب ويوزع بنفسه المنشورات ضد النظام، عندئذ اقترح وزير الداخلية الفرنسى على الرئيس ديجول أن يتم اعتقال سارتر لفترة قصيرة حتى تتم السيطرة على الأوضاع.. عندئذ رد ديجول قائلا بغضب:
- «يستحيل أن أعتقل كاتبا بسبب آرائه، فرنسا يستحيل أن تعتقل فولتير...».
هل يحب الفريق السيسى الشعر؟ إذا كان يحب الشعر فهو بالتأكيد سينحاز إلى الحرية ويدافع عنها، وسيدرك بالتأكيد أن المصريين قاموا بالثورة حتى تتم معاملتهم باحترام، فلا يعتدى ضابط عليهم ولا يلفق لهم التهم ولا يقمعهم. إذا كان الفريق السيسى يحب الشعر فلن يسمح لفلول نظام مبارك الفاسدين بالعودة للسلطة، ولن يسمح بقمع الأبرياء، ولن يسمح بإهدار كرامة مصرى واحد، وسوف يعمل على إقامة دولة القانون التى يتمتع فى ظلها المصريون بحقوقهم الإنسانية."
***********************************
2- عز الدين شكرى فشير: موقفه "متحفظ" نسبيا , هو عموما معول على المستقبل اكتر من الحاضر نفسه , و واضح انه مش عايز يتسرع فى قرارات و فى مرحلة تفكير و مقارنه , و بعد ثبات فشل التيار الثورى/مدنى فى الاتفاق على الاتفاق حتى فقرر ان يلصق بهم لقب: عائلة الشتاتى لأنهم مشتتون وبـ«خمسين رأى ورأس» , و رفضه للاخوان مش محتاج يتكلم فيه حتى و موقف "حيادى" من الادارة الحاليه للبلاد...و فى مقاله "مصاهره السيسى" جاء فيه:

"قرار صعب يواجه عائلة السيسى. مصاهرة الفلول لن تعيد الأمن ولا النظام إلا لفترة محدودة، بعدها ستنهار الأمور مرة أخرى. فعائلة الفلول لا تعرف سوى السلب والنهب، وخبرتهم كلها مركزة فى تخويف الناس والتظاهر بأن كل شىء على ما يرام. والسيسى وعائلته يعلمون لأى حد انهار البلد نتيجة سيطرة هؤلاء القتلة واللصوص، حتى لم يعد هناك ما يمكن سرقته من فرط ما نهبوا. لكن فى الوقت نفسه، فإن مصاهرة الشتاتيين غير مأمونة العواقب وهم على ما هم عليه من فوضى وتفتت. صحيح أنهم أهل المعارف والمتصلون بالعالم الحديث، وكثير من أبنائهم لديه أفكار ورؤى تعين على انتشال البلد من عثرته، إلا أن تصرفاتهم وطباعهم تصدم عائلة السيسى المحافظة، وكثير من المناسبات التى جمعت العائلتين خلال الأعوام الثلاثة الماضية انتهت بخلافات حادة بل مشاجرات وقتلى.
قرار صعب أمام عائلة السيسى سيحدد شكل الحياة فى البلد خلال الأعوام الأربعة القادمة. "
************************************
3-محمد المخزنجى: كان مؤيد مطلق من اليوم الاول ل30 يونيو و من الناس اللى بعتبروا الاخوان صانعى ظلام مش اكتر , بعد رابعه و خلافه كان توقف عن الكتابه و ابتدى يشك فى قرارته و صرح بانه قرر انه هيسكت شويه لان "الوضع ملتبس" كما وصفها

رجع لنا مؤخرا و واضح انه حسم رأيه و ريح دماغه و دماغنا , و عموما الواضحين مع نفسهم احسن من اى تردد , و فى مقاله "تحيا الحياة" يحسم لنا الامر و موقفه:

"تحيا الحياة، ويحيا ذكاء العقول والقلوب، أهتف بهما للم شمل الأمة على أسس عادلة وفاصلة وجديدة بالضرورة، ولا أرى أى تناقض معهما فى الإعلان عن أننى سأقول للدستور «نعم»، و«نعم» بلا تردد للسيسى رئيسا إن ترشَّح، ليس فقط لأنه رجل ذكى وقوى وشجاع وقادم من تجربة قيادية وإدارية ومعرفية كبرى لمؤسسة الجيش المصرىالمتطورة والمنضبطة والمُنجزة، ولكن أيضاً لأن هذا الرجل القوى والذكى والشجاع فى قلبه عاطفة ورحمة أكثر من سابقيه ومن كل من سنراهم يتدافعون نحو كرسى الرئاسة، وسيكون عادلا، حتى مع الإخوان"
****************************************
تبقى لنا لينكات المقالات لمن رغب فى المزيد:

http://www.almasryalyoum.com/News/Details/371724
http://www.almasryalyoum.com/News/Details/359158
http://www.almasryalyoum.com/news/details/372162#

الخميس، 16 يناير، 2014

حوليات200:بروم


و قفلوا النور فى البروم و هدوا الموسيقى و الارض نورت و بقت بتشع كده , و العن المذيع الداخلى: دلوقتى يا جماعه dance floor

//"حوار نفسى": يلا بقى لحظات رومانسية اخيرا حاجة راقية كده و شيك مناسبه لفستاين و بدل جديدة , زى البروم الامركانى و الناس ترقص slow ولا تويست ولا حتى جانجم استايل , و لو العمليه لازم couples مش مشكلة ممكن نرقص مع اى زميل انا موافقه و ماله ما هى فرحه عالكل , ممكن اتكعبل فى الفستان بس و ماله هنتصرف... مفيش حد اتقدم ليه؟؟ طب ما الدفعه مليانه مخطوبين ...هو مال مفيش حد بيطلع ليه؟؟ الاغنيه قربت تخلص//

بس يا سيدى و الاغنيه خلصت و مشفناش حاجة ولا dance floor ولا بتدجان

و حصل المتوقع: شغلوا اغنية الليثى "سوق البنات" و اتملت الارض اللى كانت بتنش شباب بيرقصوا بلدى و مكنش ناقص غير مطواه و اسبراى نولع فيه , حسيت بالاحباط؟؟ اه طبعا...عملت ايه؟؟ قمت اصقف و احاول ازغرد طبعا 

#قال_لك_بروم #قالها_سعد_زغلول #قال_لك_dance_floor

الأربعاء، 15 يناير، 2014

حوليات199:لازم مجلس؟!

هو احنا ليه لازم نجيب مجلس شعب؟  هو لازم يعنى ؟ اصل انا شايفه انه زى مجلس الشورى او زى الايد الشمال او الزائدة الدودية -او زى العقل عند بعض الناس- حاجه ملهاش لازمه و يمكن استئصالها بدون اثار جانبيه ولا هتحس بعدم وجوده 

طب ما احنا عايشين من غيره بقالنا سنه اهو و زى الفل ولا اى اندهاشه , ثم انى بتخنق من جو الرغى و المصطبه ده و يجى الكتتانى يوزع هولز و يجى فتحى سرور يستخف دم امه علينا فبلاش وجع دماغ احنا قشطة كده

الثلاثاء، 14 يناير، 2014

حوليات198:قداس

"على التليفزيون قداس عيد الميلاد و بنسمع الترانيم" 

-بابا: ايه الحاجات الغريبة دى؟

-انا:  عادى على فكرة

-بابا: ايه طريقة الغنا دى مالها ملتوية كده 

-انا : برضه عادى اى حد بره عقيدة بعينها بيشوف الممارسات بيستغرب , لما تتفرج على اليهود بيخبطوا راسهم فى الحيط بتقول ايه الهبل ده

-بابا: مش تعصب و الله يا دينا بس الطريقة مش طبيعيه

-انا: "تكمل فى تجاهل" و الغير مسلمين لما بيشوفوا الحجاج بيلفوا حوالين حجر بيقولوا ايه الحاجات الغريبه دى , و الهندوس مع البق..

-بابا: "مقاطعا" هو انتى كله جملة فيها موال كده؟ مكنتش كلمه...قومى اعمل شاى

-انا: "فى اتجاهى للمطبخ" انا هاستقيل من البيت ده

الاثنين، 13 يناير، 2014

حوليات197:فوازير 3

كان معاهم السلطة و ضاعت من بين ايديهم

اتجهوا للعمل السرى و الكل بقى مش هما بس بيحترمهم

اخترعوا كل سبل النفاق و التقية عشان يظهروا غير اللى قلبهم

و اللى فى قلبهم معروف كراهية للكل 

فى جلستهم الخاصة بيشتموا كل اللى عارضهم و ضيع سلطاتهم 

حلمهم الابدى انهم يرجعوا للسلطة تانى عشان ينتقموا من الكل

اوعى يغرك المسكنه و الطيبة اللى لمت حواليهم التعاطف , ده قناع مش اكتر

و برضه مش هيرجعوا 

س/مين؟
ج/ الشيعة 

حوليات205:حلاوة

و يلاقى الناس مبسوطه و بتقول لبعض كل سنه و انت طيب و امه راحت تشترى الحلاوه و تنقى الحتت الطريه لابوه عشان سنانه متوجعوش و تحوش الحتت المقرمشه لاخته الصغيره عشان بيحبها و لاخوها الحمصيه عشان بيستناها من السنه للسنه

فيقعد بينه و بين نفسه و يقول ايه ده؟ هى مال الناس مبسوطه كده ليه؟ لما اخش ابيض عليهم شويه فيقعد على اسلام ويب يدور على اى بتدجان ان الاحتفال بمولد النبى بدعه الى اخر الحديث و عموما انت لو دورت على اسلام ويب على اى حاجه هتلاقيها حرام حتى الشيكولاته بالفستق باعتبار انها خلوه غير شرعيه

يعمل بوست طويل كله رعب للناس الغلابا اللى بتحبى النبى اولا و ببساطة بتحب الحلاوه و بتستناها على الاقل من باب ربنا ما يقطع لك عاده يا ابنى , و مليان لينكات ...حاااا اتبسطت؟؟ لا طبعا ما هو اصل دم اهلك يلطش و ميكملش عندك غير 6 فريند هما اللى طايقنك و يمكن نصهم عامل لك hide update 

فياخد البوست كوبى و يرزعه على جروب الدفعه و على الوول المايل بتاع دينا نبيل 

#سيبك_انت_كل_سنه_و_انت_طيب

حوليات205:حلاوة

و يلاقى الناس مبسوطه و بتقول لبعض كل سنه و انت طيب و امه راحت تشترى الحلاوه و تنقى الحتت الطريه لابوه عشان سنانه متوجعوش و تحوش الحتت المقرمشه لاخته الصغيره عشان بيحبها و لاخوها الحمصيه عشان بيستناها من السنه للسنه

فيقعد بينه و بين نفسه و يقول ايه ده؟ هى مال الناس مبسوطه كده ليه؟ لما اخش ابيض عليهم شويه فيقعد على اسلام ويب يدور على اى بتدجان ان الاحتفال بمولد النبى بدعه الى اخر الحديث و عموما انت لو دورت على اسلام ويب على اى حاجه هتلاقيها حرام حتى الشيكولاته بالفستق باعتبار انها خلوه غير شرعيه

يعمل بوست طويل كله رعب للناس الغلابا اللى بتحبى النبى اولا و ببساطة بتحب الحلاوه و بتستناها على الاقل من باب ربنا ما يقطع لك عاده يا ابنى , و مليان لينكات ...حاااا اتبسطت؟؟ لا طبعا ما هو اصل دم اهلك يلطش و ميكملش عندك غير 6 فريند هما اللى طايقنك و يمكن نصهم عامل لك hide update 

فياخد البوست كوبى و يرزعه على جروب الدفعه و على الوول المايل بتاع دينا نبيل 

#سيبك_انت_كل_سنه_و_انت_طيب

الأحد، 12 يناير، 2014

حوليات196:فوازير 2

ثائرين على اى حاجه و كل حاجة , اى رأس للدولة عندهم مرفوض و لازم يتخلع

جاهزين بالعتاد او لا مش مهم , العدد كافى او لا مش مهم , معاك دعم شعبى او لا مش مهم

كل ما يجى مسؤول جديد اول حاجه يعملها يقتلهم و يسجن فيهم 

عندك بديل منكوا يمسك الحكم؟ لا , احنا عايزين الافضل هو اللى يمسك

طب من الافضل ده فى رأيك و نجيبه منين؟ مفيش رد

عندهم قناعه انهم الحق الوحيد المطلق و كل الناس باطل 

شجعان فى قضيتهم , مستعدين يبذلوا حياتهم كلها عشانها من غير تردد

س/ميين؟
ج/ الخوارج 

السبت، 11 يناير، 2014

حوليات195:فوازير 1


وصلوا للسلطة اعتمادا على غباء الاخريين اكتر من ذكائهم هما

وصلوا بان الناس كرهت السابقين و طهقوا من غطرستهم و تفضليهم لروحهم بس

تحالفوا مع اللى هيموتوا عالسلطة زيهم 

لكن من باب تجى تصيدوا يصيدك "ركبوا" هما و رموا الحلفاء فى السجن 

السلاح يأمن الشرعية الوليدة , لا فكر ولا اسلوب مختلف

ميفرقوش كتير عن اللى قبلهم غير فى الشكل

لكن الناس قررت انها مش هتثور عليهم عشان تعبوا

اللى بيثور كل مره و على احد اتعمل فيه المعتاد لا ازيد ولا اقل
.
.
س: مين؟!!
الاجابة: العباسيين 

الجمعة، 10 يناير، 2014

حوليات194:بوتين

كلاكيت تانى مره:

دى ارهاصات و افكار متفرقة او بالاحرى نواه لمقال اكبر نبقى نكتبه لما الكتاب اللى فى ايدى يخلص:

اللى لاحظته ان فى نماذج اخرى للديموقراطية غير النموذج الامريكى الكامل , فى انواع انصاف تقدر تسميها "ملكية منتخبة" او اى مصطلح نفكر فيه سوى لكن عاده هتلاقيه بيضم كلمتين عكس بعض

و من اهم النماذج دى "روسيا" اللى الانتخابات فيها مش شعبوية صرفه ولا سلطوية جافه 

يلتسين مثلا لما كبر و عجز و ضعف سلم السلطة "كالعادة" للدائرة الاضيق حواليه اللى كانت بنته و الواد اللى ماشية معاه و طبعا اصدقائهم و الشلة اياه اللى موجوده فى كل عصر و زمان , و الكل عرف ان المنظر ده مش هيستمر للابد و ان فى يوم يلتسين المسنود بالحقن و الدكاتره هيموت و لو جه ريس جديد خالص , الشلة هتتقلش للابد

فتم تحضير الوريث اللى اتلف حواليه الكل , ليبرالين و شيوعين و شلة يلتسين الفاسدة فى حاله من التوافق النادر لعل الكل كان زهق من حالة التفكك و الضعف اللى كانت فى روسيا بسبب عجز الرئيس عن الادارة ...و كان الفتى الذهبى اللى وعد الكل هو ابن المخابرات الروسية البار "اللى تاريخه مريب شوية" : بوتين

اتعين الفتى الذهبى رئيس وزراء فى عهد يلتسن و لمجرد انه فى اربعينات عمره و بالمقارنه مع الرئيس الحالى اللى كان فى اوخر الثمانيات كان وجه مقبول للناس ...هتقول لى طيب كويس نحكم عليه كرئيس وزراء ...اقولك الشلة خافت انه يشتغل بجد فالشعبوية دى تروح قبل ما الانتخابات فى شهر يونيو , و بالتالى قرروا اخد خطوة استبقاية و هو فى المضمون كده: استقال يلتسين فى يناير ! تارك الساحة متخلطبة و الكل مش جاهز غير الوريث المجهز

زى ما انت شايف الوريث جاهز ولا كأن فى شعب حد ياخد رأيه و التربيط و الشللية هى الحل, و فى ظل غياب منافسة جادة كان الموضوع اسهل مما يبدو

اوعى تفتكر ان الشعب كان اهبل ولا مش عارف اللى بيحصل , بعد الانتخابات على طول اجرى استطلاع للرأى:
54 % من الشعب الروسى كان مقتنع ان حملة بوتن كانت مضلله , و 72 % رأيهم ان فى غش حصل فى عد الاصوات

كان شعب مرهق و زهقان و عايز استقرار و راحة , لكن و حط كام خط تحت لكن دى فى ظل غياب مؤسسات عفية لجأ الكل لفكرة الرئيس القوى و فى قياس للرأى اخر كان رأى الشعب فى اللى روسيا محتاجاه:

71 % زعيم قوى , 59% دولة قوية , بينما اختار اختيار "المؤسسات الديموقراطية" 13% بس!

هتقول لى و ماله؟ ولو جاهز او متحضر الحكم يكون على برنامجه...اقول لك ما هو ده قلب "الملكية المنتخبة" لما اتسأل بوتين فى مؤتمر صحفى عن برنامجه الانتخابى كان رده صادم للمجتمع الغربى لكن لسبب ما مصدمش المجتمع الروسى , كان رده ببساطة: "لن افصح عنه"

اخر حاجة: ايه تانى جذب الروسيين فى الشاب بوتين "فى بداية على الاقل"؟ غير السن و الشباب كان حماسته لحرب الشيشان و "القضاء على الارهاب" فى حرب الشيشان الاولى كان تأييد الروس ليها حوالى 30% انما مع حرب الشيشان الثانية "اللى كان الدافع وراها بوتين كرئيس وزراء" كانت نسب التأيد فى ال70% , و ضيف على كل ده استعماله للالفاظ العامية كتصريحه: انه هيسمح بالارهاب الشيشانى المرحاض ! 

مش بيفكرك بحاجة؟! 

الخميس، 9 يناير، 2014

حوليات193:التحالفات

اعتبروا دى ارهاصات برضه او نواه لمقال اكبر نكتبه لما الكتاب اللى بقراه يخلص 

عمنا التاريخ اللى بتخيله بدقن بيضا و شبه جندلف من مملكة الخواتم يؤكد لنا ان التحالفات عمرها قصير و يمكن قصير جدا و ان الالم الناتج عن ما بعد التحالف اقوى و اعظم من الوجع الاصلى , عادى على الاقل من باب ( إلا يا ناس جرح الحبيب ما يتنسيش بعده خلاص ما ليش حبيب علشان اعيش) على رأى طنط ديانا حداد , او زى عم ادهم الشرقاوى اللى خايف يكون ده اخر عشا

مثال على التحالفات دى هو تحالف الشيعة مع العباسيين لاسقاط الدولة الاموية , الدولة الاموية عموما كانت زى نظام بتقدم مصلحتها كنظام عن اى شئ اخر , يبدو ان الاديان وقت السلطة بتاخد المكانه الاقل و السياسة نجاسة و ربنا حليم ستار 

الامويين كانوا بيضطهدوا الشيعه اشد اضطهاد و ده مش من فراغ لان حرب على/معاوية و من بعدها الحسين/يزيد كانت اكبر مما تبدو و تحولت -كالعادة- الخلافات لخلاف فى الدين و اتكتب الاحاديث افتراء على النبى لتأيد افكار الطرفين و كتب الشيعه مليانه احاديث فى مدح ال البيت و كأن الاسلام نزل عشانهم بس , و احاديث من الطرف التانى و بلاش نخوض فى الموضوع ده و ربنا حليم ستار

الاضطهاد مكنش فكرى بس , لكن كان عنف و قتل و تحريق منها مثلا حادث قتل زيد "احد احفاد الحسين اللى قرر ياخد البيعه لنفسه" فاتضرب بالسهم فلما مات اتبعت رأسه للخليفه فثبتت على باب دمشق ثم ارسلت للمدينه و مكث البدن مصلوب لحد ما الخليفه نفسه هو اللى مات فجه الخليفه اللى بعده فانزله و حرقه ! , و ممكن تدور على طريقه قتل ابنه يحيى ابن زيد بنفسك لان الموضوع مؤلم لدرجة مش هاعرف اكتبها 

مكنش زيد اول او اخر المقتولين و بالتالى تم التحالف مع العباسين اللى مكنوش مكشوفين للامويين قوى فساعدهم ده فى العمل فى الخفاء لحد ما قدر التحالف قتل الخليفه الاموى الاخير و تأسست الدولة الجديدة

و زى ما عمو التاريخ بيقول حصل اللى حصل و قلب العباسيين على الشيعه لانهم خافوا على الدولة الوليدة اكثر من الامويين و اتملت السجون بشر , خافت الناس تسمى "على و الحسين" حتى مخافه الرعب , ساعد العباسيين فى ده ان الشيعه كانوا بيشتغلوا تحت الارض و ده كان خافى عن الدولة الاقدم انما الحلفاء السابقين فعارفين الخفايا فكان البطش اقوى و اسوء لحد ما قال شعراء الشيعه القصيدة الشهيرة :

يا ليت جور بنى مروان عاد لنا يا ليت عدل بنى العباس فى النار

ده غير ان حجه الشيعه فى المطالبه بالحكم تقريبا راحت , الشيعه كانوا بيقولوا احنا من نسل النبى و على و الحسين و انتوا من نسل بن سفيان و معاوية و هند و يزيد , فلما جه العباسين ردوا انتوا قرايب للنبى من ابن العم و احنا ابناء ابن العباس و العم اقرب للدم من ابن العم

مش بيفكرك بحاجة؟ 

‫#‏لفينى_بينا_يا_دنيا‬

الأربعاء، 8 يناير، 2014

حوليات192:فرج فودة

على صعيد اخر تماما: بحاول اتخيل فرج فودة لو كان نجا من اغتيال و عاش و شاف النخبة الثقافية بتاعتنا و هى بتسلم السلطة للاخوان عشان هما رمز الثورة و كده , و متخيله و هو بيجرى وراهم بالجزمة و بيقول: هتضيعوا البلاد يا ولاد ال*** ,فالمثقفين بتوعتنا يشتموه و يقولوا له يا فلول

و يحصل اللى حصل فيقعد على كرسى جلد فى اوضه اضاءتها خفيفة كده و يقف المثقفين طابور و يبوسوا الخاتم زى فيلم Godfather

#الواقع_فشر_الخيال
#مشيها_فشر_عشان_خاطرى
#زمانه_بيتف_عليهم_من_قبره

الثلاثاء، 7 يناير، 2014

حوليات191:Facts that Will Scare

1001
 Facts that Will Scare the S#*t Out of You

by Cary McNeal
1,001 Facts that Will Scare the S#*t Out of You: The Ultimate Bathroom Reader
كتاب تجارى فى الدرجة الاولى , بيحاول يلم حاجات تفاجئك او تقرفك , الجزء الطبى فيه تقريبا مكنش مفاجئ ليا خالص و ده يخلينى اجزم ان المتخصص فى اى جزء او فصل مش هيحس انها مفاجأت...غالبا الكتاب موجه للمواطن العادى اللى عايز يتخض

مفيد؟؟ مش قوى...مسلى؟؟ الى حد ما...تجارى؟؟ جدااا

للتحميل
http://www.4shared.com/office/j9NiU3IS/1001_facts_that_will_scare_the.html

الاثنين، 6 يناير، 2014

حوليات190:النذير

النذير ل فرج فودة

النذير

خلينا نقيم الكتاب بعيدا عن المنولوج الاشهر "سيصرخون ضد الغناء و يغني الشعب...الخ" الذى يعد مع مونولوج "الكلمة" ل عبد الرحمن الشرقاوى فى الحسين ثائرا اهم اجزاء الكتب بالنسبه لى و فى يوم هاطبعهم على تيشيرتات و بوسترات و دبابيس و امشى اوزعهم عالناس يمكن يفتكروا ان مصر كان فيها مفكرين و مبدعين بيكتبوا ابداعات فنية

بعد ما جنبنا المنولوج-بما انه اسثنائى سياسيا و فنيا- خلينا نتكلم عن الكتاب ذاته

هل تغيرت بعض الامور؟ قطعا , فلم يعد التيار الاسلامى السياسى يعتمد على شرعية القرآن و السنه -سوى وقت الشدة حين ينسون القناع و تظهر النوايا الحقيقية- بل صارت الشرعية القانونية و الدستورية هى الحل , لم تعد كأيام استاذنا فرج فودة بل تطور اسلوب الحرباء و صار الدستور مقبولا و القانون الوضعى وسيلة للوصول لنفس الهدف القديم ....انها معضلة الغاية و الوسيلة التاريخية

تخلت الدولة عن دورها الطبيعى كدولة تاركة مجالات الصحة و التعليم و الدعوة بل و الخبز ذاته للدولة البديلة و كما توقع فرج فوده انهارت الدولة الاصلية فى بعض سنين من كتابه الكتاب

كان فرج فودة واضح و صريح مع نفسه اولا قبل ان يكون مع القارئ فلن يدعى الثورية بل كان اصلاحيا خالصا , احم ربما تعلم الدرس مبكرا بدلا من ان يتعلمه بالطريقة الاصعب كجيلنا المسكين 

هل كان الحزب الوطنى "قادرا" على تنفيذ وصايا عم فرج؟! بالطبع لا ولا اظن انه كان يضع امل كبير عليهم ربما لانهم سبب فى تفاقم الازمه من الاصل , الحزب الوطنى كان مفتقد للايدلوجيه عموما و كان بأس الممثل عن المدنية , اذا لماذا خاطبه فرج فوده؟ السبب واضح لانه لم يجد بديل مناسب و لانه كما ذكرنا كان صريح الاصلاحية فتقبل الوضع بدون كثير من التشكك

نقطة اخرى مهمه الكتاب سنه 1988 فلو سمحت لا تحمل فرج فودة خطايا 1988-2011 فى الحزب الوطنى فحتى هذا العصر لم يكن قد بدء عصر رجال الاعمال و لم تكن رائحة الفساد العفنة ظهرت على الساحة الا فى القليل , بمعنى اخر لم يكن هناك احمد عز بعد

كان شئ "غريب" انى اسمع عن خناقات و سب متبادل بين القرضاوى و صلاح ابو اسماعيل "ابو حازم" من جهه و فرج فودة من جهه , و تردد فى نفسى : و الله زمان و بعوده

الأحد، 5 يناير، 2014

حوليات189:وردة

وردة
اسم الرواية: وردة ل صنع الله ابراهيم

 يعطى لنا صنع الله ابراهيم تعريف غير مقصود عن ثقافة اليسار و يوضح كثير من معانيها الملتبسة للقارئ العادى , امممم "غير مقصود" فعلا هل عفوى فى سياق القصة؟؟ ام "تبشير" مقصود ؟! ربما لا املك الاجابة القاطعة لكن المؤكد الوحيد هنا ان ورد ليست مجرد قصة او حدوته

هل هو عرض لتاريخ حركات اليسار فى الوطن العربى من المغرب الى البحرين؟ ام محاولة للتوثيق و التأريخ فى عمل روائى يعيش فى قلوب و ذاكرة الناس بعيدا عن كتب التاريخ المكسوة بالتراب؟ ربما لا املك الاجابة مره اخرى لكنها رواية تشعر فى سطر منها بان صنع الله بحث طويلا و قرأ اكثر ليكون تلك القصة المحبوكة بتفاصيل تاريخنا المنسى

رصد لتصنيع الناصرية بمفاهيم اشتراكية بدون شيوعية , حالة من البحث عن معضلة ارقت مثقفينا فى عصر كثر فيه التفكير: هل يجب البحث عن طريق عربى للاشتراكية ام تكوين الاشتراكية العربية من الاصل؟ 

رصد ايضا عن معضلة اخرى: هل يجب قيادة الشعب من الخلف فاذا غيرت الجماهير فكرها وجب الانصياع و التطبع ام من الامام فاذا غير رأيه او اختلف مع قواعد القيادة وجب التنوية و التوعية , بقول اخر : هل تقود السياسة الشعب ام فقط تتبع رغباته؟

بالمناسبة الكتاب هو مصدر رائع للكتب و الروايات فى الاتجاه اليسارى , ان كنت منبها قليلا ستجمع قائمة لا بأس بها عند انتهائك من الكتاب قد تساعدك فى رحلتك الشخصية لاكتشاف تيار سياسى أثر ليس فقط فى وطنك بل فى العالم

السبت، 4 يناير، 2014

حوليات188:Stories For Parents

Stories For Parents, Children And Grandchildren Volume 1
by Paulo Coelho 
Stories For Parents, Children And Grandchildren   Volume 1

كتاب كلاسيكى باولو كويلو , مجموعه كبيرة من القصص القصيرة جدا اللى عاده محتواها صوفى او اخلاقى و احيانا قلبى صرف

يشبه الى حد ما كتاب "مكتوب" اللى فيه نفس الطريقة

كتاب صغير و ممتع , لكن معظمها مش النوع اللى اسم الكتاب موجه له ببساطة لا اعتقد انه ينفع للاطفال

دى القصص اللى حبتها اكتر

Saadi of Shiraz used to tell the following story: 'When I was a child, I used to pray with my father, my uncles and my cousins. Every night we would gather together to listen to a passage from the Koran. On one such night, while my uncle was reading a passage out loud, I noticed that most of the people were asleep. I said to my father: "Not one of these dozy people is listening to the words of the Prophet. They'll never reach God." And my father replied: "My dear son, look for your own path with faith and let others take care of themselves. Who knows, perhaps they are talking to God in their dreams. Believe me, I would much prefer you to be sleeping alongside them than to hear your harsh words of judgement and condemnation

*****************

Nasrudin was talking to a friend, who asked him: 'Have you never considered getting married, Mullah?' 'I have,' replied Nasrudin. 'In my youth, I resolved to find the perfect woman. I crossed the desert and reached Damascus, and I met a lovely, very spiritual woman, but she knew nothing of the world. I continued my journey and went to Isfahan; there I met a woman who knew both the spiritual and the material world, but she was not pretty. Then I decided to go to Cairo, where I dined in the house of a beautiful woman, who was both religious and a connoisseur of material reality.' 'Why didn't you marry her, then?' 'Alas, my friend, she was looking for the perfect man.


الجمعة، 3 يناير، 2014

حوليات187:تأملات


استكمال بقى لتأملات مسيرة الاخوان النهاردة : على الاقل الاخوان عارفين هما عايزين ايه و ده واضح من هتافتهم على الاقل اللى قالوها النهاردة

"رابعه مش فى مدينه نصر , رابعه فى كل شوارع مصر" و ده مطلب واضح و مطلوب , اننا نعمل ماكيت لشكل اشارة رابعه و نحطها فى كل شارع 

"الله اكبر الله اكبر , قول يا سيسى الله اكبر" امممم مش عارفه الهتاف ده عايز ايه او هيؤدى لا بس سهله و الله , نخلى السيسى يطلع يقول الله اكبر اهو يبقى مطلب اتعمل و خلاص

"ارحل يا سيسى مرسى رئيسى" امممم طيب يرحل قبل ولا بعد ما يقول الله اكبر ؟؟ سؤال وجودى و الله 
*************************
الا ان على الاقل دول فاهمين نفسهم , كلامهم صريح انما انا ايه؟؟

نفسى السيسى يطلع فى البلكونه فتقع بيه و يكون مرسى واقف بالصدفة تحت فنخلص من الاتنين , يجى ابو الفتوح يروح العزاء تقوم تنزل صاعقه تريحنى منه!

طب هما اغنيتهم "ثورة دى ولا انيكلاب" و انا بكره "تسلم الايادى" امممم ما هو مش معقول ان اغنيتى السياسية تبقى "فى امل" !

طيب هما "مورسويه" طب و انا؟! ابقى ايه بقى؟! برادعويه بس منشف ريقى؟ أؤيد حمدين بس مستنياه يسترجل؟!

يا مرارك يا دينا

الخميس، 2 يناير، 2014

حوليات186:يا جارحة القلب

من نص ساعه كنت فى الشارع تحت بيتنا فى طريقى لدكتور العيون عشان استلم العدسات الجديدة فى خطوة للتخلص الابدى من النضارات , وقفت عالمحطة اطمنت ان معايا الفكة اللازمه للميكروباص و هى 75 قرش مينقصوش قرش مع انها قبل مرسى كانت ب50 قرش لكن و ماله مش كتير ربع جنيه فى داهية , لقيت ميكروباص كبير كده فاضى قلت فرصه ركبت

لقيت التباع و السواق بيرفعوا علامة رابعه! ....امممم طيب ليه يعنى؟! ده حتى مش عاده عند اهل الميكروباصات انهم يكونوا اخوان يعنى!! , و مال الدنيا زحمة كده ليه على غير المتوقع؟!

اااه اتارى الاخوان عاملين وقفة او مسيرة او whatever و قاطعين الطريق بحاجات مولعة كده و صوت الطبل و الزمر عالى , مع ان عددهم مش كبير بس عاملين دوشة و مصرين الناس تبص لهم 

و فجأة يا ابنى لقيت تخبيط فظييع على الميكروباص تقريبا المسيرة كلها بتخبط بكل عزمها ...انا اترعبت و اشباح حادثة المنصورة نطت فى دماغى و تخيلت السواق مقتول و انا مضروبة و شكل صفحات "كلنا دينا نبيل" و "المجد ل دينا نبيل" و "دينا نبيل ضحية الارهاب الاسود فى فوشيا"

المهم اكتشفنا انهم بيخبطوا كده عشان السواق يقف و يركبوا في الميكروباص "الاخوات" و فى ثوانى يا ابنى ملوا الميكروباص و عندها بس فتحوا الطريق و سمحوا لنا نمشى

قعدوا جنبى و قدامى و ورايا و حواليا , و لك انت تتصور ان سارتر تخيل الجحيم بغرفة مغلقة فيها راجل و 2 ستات للابد و انى تصورى عن الجحيم انا و حد من الاخوان 3 ساعات , فتخيل بقى احساسى ...السواق مشغل محمد فوزى اللى مش ماشى ابدا مع الحماس اللى فى الاجواء و ده كان حوار 2 من الحرائر مصوبا بمحمد فوزى كما سمعته و خواطر فى ذهنى لم اجرؤ على البوح بيها:

اخت1: على فكرة "فلانه" دى مزقوقة علينا

محمد فوزى:يا جارحة القلب بعيونك 

اخت 2: و الله و انا كمان كنت شاكه فيها...بس عرفتى ازاى؟

محمد فوزى: يصونها المولى ويصونك , اه يصونها المولى و

اخت 1: اخوها امين شرطة و جاية تنزل معانا مظاهرات

اخت 2: و عرفتى ان اخوها امين شرطة؟

محمد فوزى: يصونك

اخت 1: اهو عرفت و خلاص , عرفت بطريقتى

انا: "ما شاء الله الاخت مخابرات تقريبا"

محمد فوزى: عيونك كاس يدور ع الناس يسكرهم..وفيها جمال وفيها دلال يحيرهم 

اخت 2:بس ده فى فرح اخوها التانى كان فى علامات رابعه مرفوعه و ما اقدرش يفتح بقه, ثم ان اخوها امين شرطة فى المطار اصلا ملوش فى الداخلية يعنى

انا: "يعنى بوظتوا فرح الواد كمان!"

اخت1: "فى عصبية" فى المطار مش فى المطار اهو منهم و خلاص...تلاقيه بدبلوم

انا: "هى دى مش نميمة؟! و اكل لحم اخيك ميتا"

اخت2: لا ب50 % هههه

محمد فوزى: دي نظرة من عيون الحور ,سوادها في عيونها نور ,هواها ع القلوب مقدور ,يا ساحرة الدنيا بعيونك

اخت1: لا ابو 50% ده اللواء هيهيهيه

راجل 1: "متدخلا بلا مبرر" امين الشرطة ده تلاقيه فى ابتدائى

محمد فوزى: يصونها المولى ويصونك اه يصونك

الجميع: "يضحك ضحك جماعى"

-انا: على جنب يا اسطى و النبى "هاخدها مشى ارحم"

الأربعاء، 1 يناير، 2014

حوليات185:اخر يوم من 2013

ملاحظات عشوائية:

1- عيد جواز ماما و بابا -و دى مناسبة مقدسة عندنا- يوم 1 يناير فكل سنه بنحتفل عند منتصف ليل 31 ديسمبر بجاتوه و كباب و جمبرى الثلاثية المقدسة اللى بقت عاده سنويا فى عائلتنا

2- قضيت يومى الاخير من 2013 و انا بقرا عن المعتزلة و فى افكارهم و معتقداتهم و تاريخهم و قعدت اشرحها لماما -اللى مكنتش مهتمه الصراحة بس سمعت عشان متزعلنيش- و بعمل مقارنه فكرية حاليا بينهم و بين الخوارج و بين الشيعة

3- اول مره اعرف ان كان فى فئة اسمها "الدهرية" و دول كانوا ملحدين العصر الاسلامى و ذاع الصيت ابان العصر العباسى , الالحاد قديم فى بلاد العرب يا جودعان

4-قررت انه من هنا و طالع و خاصه فى 2014 ان اللى هيقول لى كلام يضايقنى او يعصبنى سواء عالفيس او الواقع انى مش هارد عليه , مش هادخل خناقات خايبة تانى يا منى