الأحد، 29 يونيو 2014

امتياز 37: انا اتعضيت

"تدخل مريضة على كرسى متحرك بصحبتها ابنها دافعا الكرسى"

-دينا: خير يا استاذى؟ الحاجة بتشتكى من ايه؟

-ابن المريضة: تعبانة يا دكتورة

-دينا: "فى ارهاق" ما انا عارفه انها تعبانة , ايوه تعبانه من ايه تحديدا؟

-ابن المريضة: اصل..اممم...بس..اصلها مش بتاكل ..و ...و

-دينا: "تغير الاتجاه لتكلم المريضة" قول لى انت يا امى , مالك؟

-المريضة: تعبانة يا بنتى

-صوت داخلى 1: لا حول ولا قوه الا بالله , ما احنا عارفين انك تعبانة امال جايه المستشفى فسحه مثلا؟! هو لازم المقدمة دى كل مره؟ دينا تقول مالك فتقولى تعبانة و بعدين تعبانه مالك و ساعتها يبدأ الكلام , مينفعش من اول مره و نوفر وقت بعض؟!

-دينا: "فى ارهاق" تعبانة مالك يا ماما؟

-المريضة:اممم مش عارفه

-صوت داخلى 1:"يصرخ" و انا اللى هاعرف؟!

-دينا: ركزى معايا عشان اعرف اساعدك

-المريضة: اممم مش مظبطه بقالى كام يوم , نفسى مصدوده و مش جاى لى نوم , و زهقانة من نفسى

-دينا: زهقانة؟! اممم ماشى عموما هنقيس ضغط و سكر و نطمئن عليكى

-صوت داخلى 1: انتى لسه هتتطمنى؟! سكر اييييه و ضغط اييييه؟ بتقول لك زهقانه و مصدود نفسها لا و جايه على كرسى متحرك كمان ؟! دى على الرعاية المركزة على طول طبعا دى مش حاله طوارئ .... ارحمنا يااااا رب ما هى تذكرة الطوارئ ام ببلاش دى لمت علينا الناس

"يدخل مريض اخر , عصبى و قلق"

-المريض: الحقينى يا دكتورة , انا فى حاجه عضتنى

-دينا: ايه اللى عضك يا استاذى؟

-المريض: ما اعرفش

-صوت داخلى 1: روحى يا دينا هاتى الودع نضربه

-دينا: نعم؟

-المريض: اصل انا كنت نايم لوحدى و صحيت بعد ما اتعضيت

-دينا: طيب المكان اللى فيه ده فيه فيران ولا تعابين ولا عقارب؟

-المريض: فيه كله

-صوت داخلى 1: امممم يمكن سواريز هو اللى عضه

-دينا: بص هو مصل الكلب اللى بيتاخد مع عض الفار موجود و مصل العقارب و التعبان موجود برضه بس انا هاجيب حد اكبر يمكن يعرف من شكل دراعك دى عضه ايه

-المريض: طيب معندكيش حقن توقف وصول السم للكبد بسرعه

-دينا: ها؟!... طيب انت حاسس بايه دلوقتى؟

-المريض: حاسس انى مش مظبط

امتياز 36: طيب

-دينا: "بضيق" بقولك يا ماما , فى المستشفى غيروا جدول النبطشيات بتاعى

-ماما: ها بقى ايه؟

-دينا: بصى يا ستى خريطة الطريق دى عشان هتقعد معانا شوية , يوم الجمعة عندى شيفت 24 ساعة

-ماما: 24 ساعه دى يعنى؟

-دينا: يعنى الشيفت اليوم كله يا ماما حتى بالليل , هابت يومها بره

-ماما: اممم ماشى

-دينا: يوم السبت بقى فعندى شيفت 12 ساعة , فبفكر بدل ما اروح ابات فى المستشفى سواد الليل ده و خلاص

-ماما: "فى تقبل" طيب

-دينا: يوم الاحد بقى عندى شيفت 24 ساعه برضة

-ماما: اها

-دينا: انما يوم الاتنين فعندى الصبح عمليات و بعد الضهر شيفت 12 ساعه لحد بالليل

-ماما: فى حاجة تانى؟

-دينا: اه يوم الخميس هانزل العيادة كمان

-ماما: طيب ربنا معاكى

-دينا:  ايه يا ماما رد الفعل ده؟ انتى مالك مش مضايقه ليه؟ ده انا هاموت من الغيظ , هو فى حد يشتغل 72 ساعه غير العيادة؟! ليه يعنى اشترونى؟ ده اليوم ب8 جنية و بنقبض مره كل 100 سنه كمان

-ماما: اهو شغلك , تدريب برضه ينفعك , هتقعد فى البيت تعملى ايه؟

-دينا: يا ستى اكل انام اقرا اعمل اى حاجة مالكوش دعوه بوقتى , انما انا ابات بره البيت 3 ايام متواصل ليه يعنى؟

-ماما: ما كفاية عليكى قرايه و اكل و نوم , و بعدين ما انتى بايته فى المستشفى هو انتى فى الشارع؟ بطلى دلع

-دينا: انتى معايا ولا معاهم؟! كانت مستشفى ناصر دى بنتك الكبيرة و انا مش واخدة بالى؟!

امتياز 36: طيب

-دينا: "بضيق" بقولك يا ماما , فى المستشفى غيروا جدول النبطشيات بتاعى

-ماما: ها بقى ايه؟

-دينا: بصى يا ستى خريطة الطريق دى عشان هتقعد معانا شوية , يوم الجمعة عندى شيفت 24 ساعة

-ماما: 24 ساعه دى يعنى؟

-دينا: يعنى الشيفت اليوم كله يا ماما حتى بالليل , هابت يومها بره

-ماما: اممم ماشى

-دينا: يوم السبت بقى فعندى شيفت 12 ساعة , فبفكر بدل ما اروح ابات فى المستشفى سواد الليل ده و خلاص

-ماما: "فى تقبل" طيب

-دينا: يوم الاحد بقى عندى شيفت 24 ساعه برضة

-ماما: اها

-دينا: انما يوم الاتنين فعندى الصبح عمليات و بعد الضهر شيفت 12 ساعه لحد بالليل

-ماما: فى حاجة تانى؟

-دينا: اه يوم الخميس هانزل العيادة كمان

-ماما: طيب ربنا معاكى

-دينا:  ايه يا ماما رد الفعل ده؟ انتى مالك مش مضايقه ليه؟ ده انا هاموت من الغيظ , هو فى حد يشتغل 72 ساعه غير العيادة؟! ليه يعنى اشترونى؟ ده اليوم ب8 جنية و بنقبض مره كل 100 سنه كمان

-ماما: اهو شغلك , تدريب برضه ينفعك , هتقعد فى البيت تعملى ايه؟

-دينا: يا ستى اكل انام اقرا اعمل اى حاجة مالكوش دعوه بوقتى , انما انا ابات بره البيت 3 ايام متواصل ليه يعنى؟

-ماما: ما كفاية عليكى قرايه و اكل و نوم , و بعدين ما انتى بايته فى المستشفى هو انتى فى الشارع؟ بطلى دلع

-دينا: انتى معايا ولا معاهم؟! كانت مستشفى ناصر دى بنتك الكبيرة و انا مش واخدة بالى؟!

الخميس، 26 يونيو 2014

امتياز35: قال كده امبارح

"تدخل دينا الى سوبر ماركت مجاور للمستشفى , دينا ترتدى البالطو الابيض و السماعة الطبية على رقبتها"

-صوت داخلى 1: يااااه اخير هربنا ولو 5 دقايق من صداع اللى بيدلع و اللى بيستعبط و اللى بتوجع و نخطف حاجه ناكلها فى السريع بدل ام الحر ده

-دينا: انا اخدت كانز فيروز و كيس مولتو , كده يبقى كام يا عم؟

-صوت داخلى 1: كانز؟! كانز يا دينا؟ اسمها كان يا ساقطة

-صوت داخلى 2: يا عم مشيها كانز دى اللغة الرسمية خلاص

-صاحب الكشك: انتى دكتورة الطوارئ يا دكتورة صح؟

-دينا: اه يا حاج انا امتياز و بقف فى الطوارئ

-صاحب الكشك: طب و النبى يا بنتى نص وشى منمل من امبارح

-دينا: اممم طيب غمض عينك جامد كده , و ابتسم ابتسامة واسعة

-صاحب الكشك: "يحاول" الناحية المنملة مش بتقف و الله , و بقى ناحيته مش بتحرك

-دينا: اه يبقى العصب السابع يا حاج

-صاحب الكشك: اه ما هو الدكتور قال لى كده امبارح برضه , طب ده بيجى منين؟

-دينا: حالة شائعة يا حاج , بتحصل كتير متخافش بتجى احيانا مع البرد لان العصب بيكون ماشى فى ال...

-صاحب الكشك: بيكون ماشى فى الودان صح؟

-دينا: ايوه فى الاذن

-صاحب الكشك: ما هو الدكتور قال لى كده امبارح , طيب و فى حاجة اعملها غير الادويا اللى كتبها لى؟

-دينا: بتعوز جلسات كهربا على العضلات عشان لما العصب يتصلح ...

-صاحب الكشك: "مكملا" لما العصب يتصلح تكون العضلات سليمة , طب و عينى؟

-دينا: "تأفف بعض الشئ" هتحط لها قطرة و مرهم و هتحافظ عليها يا حاج دى اهم حاجة عشان عقبال ما العصب يتصلح تكون عينك مفهاش قرح ولا حاجة

-صاحب الكشك: ما هو الدكتور كتبها لى امبارح برضة ... 

-دينا: طيب و الكانز و المولتو؟

-صاحب الكشك: هو 4 جنية بس خليها علينا بقى

-دينا: "تضع المال" تخليها ليه هو انا قلت حاجه؟ ده حضرتك ما شاء الله اخصائى انف و اذن و اعصاب مع بعض 

امتياز34: تشربى؟

"تدخل دينا لتجد شاب مجروح فى يده و يصحبه 3 من العائلة"

-دينا: "ترتدى القفاز المطاطى" امممم 2 جرح قطعى الاول فى راحة اليد و التانى الذراع , طول الواحد حوالى 5 سم .... اتعورت ازاى يا بنى؟

-رفيق المريض 1: اصل احنا بنشتغل فى دبح الفراخ و الواد لسه جديد فاتعور 

-دينا: اها , مدام الجرح له علاقه بالحيوانات يبقى لازم ياخد تطعيم التتانوس كمان , "تشير للممرضة" هاتى لى امبول تتانوس لو سمحتى و اعملى له الاختبار عقبال ما نخلص الخياطة 

-الممرضة: فى نقص فى التتانوس

-دينا: يعنى ايه فى نقص؟ يعنى اسيبه تحصل له مصيبة؟! لو سمحتى دورى و انت هتلاقى

-الممرضة: "تخرج ثم تأتى" خلاص يا دكتورة لقيت علبه , عملت له الاختبار كمان

-صوت داخلى 1: "تبدأ فى تعقيم الجرح" الجرح ده غريب شوية, ازاى حد يعور نفس جرحين اتنين فى نفس الوقت؟! , الواد ده كداب

-دينا: "تعقم الجرح" بقى بذمتك اتعورت من سكينة فراخ؟ ولا مطواه؟ قول و متخافش

-صديق المريض 2: ما احنا مش عايزين نعمل مشاكل , اللى ضربوه جيران

-دينا: "تبدأ فى الخياطة" و ليه الكدب يا استاذى؟ خليت الولد ياخد تطعيم مش محتاجه و اتكلف هو شكه على الفاضى و ضيع التطعيم على حد تانى محتاجه اكتر , و بعدين هو الدكتور اللى واقف عبيط؟ ما هو هيعرف من شكل الجرح ... معلش خلينى مطفلة شوية هو الجيران عوروه ليه؟

-صديق المريض 1: اصلهم بيتهموه انه بيتحرش ببنتهم

-صوت داخلى 1: يمكن الواد مظلوم , ده العيله كلها بدقن ما اظنش عملها , تلاقى اهل البت بيبالغوا

-دينا: تحرش؟! "تضحك" ده السيسى هيطلع عينك 

-صديق المريض 3: تشربى ميه ساقعه يا دكتورة؟

-دينا: لا شكرا الجوانتى فيه دم , هو انا عايزة اشرب بس لما اخلص و اغسل ايدى

-صديق المريض 3: نشربك احنا

-دينا: متشكره هاشرب لما اخلص

-صديق المريض 3: "يقرب من دينا مقربا الزجاجه منها" طب و الله لاشربك

-دينا: "تنظر له شزرا" انت عارف لو مطلعتش بره دلوقتى هاعمل ايه؟!

-صديق المريض 3: "يخرج مضطربا"

-صوت داخلى 2: دى عايلة وسخة يا دينا , وضحت الرؤيا

-صديق المريض 1: هو انتى بتصدقى؟ البنت بتاعه التحرير دى تخطيط المخابرات , هو انتى مشفتيش فيلم المندس؟ زى ما زقوا حمادة صابر ايام مرسى , ايام جبهة الخراب و 6 ابليس

-دينا: 6 ابليس؟! ياااه ههههههه يا لهوى هو انتوا لسه عايشين؟!  البيه اخوان؟!

-صديق المريض 1: انا مش اخوان بس ليا الشرف انى مؤيد ليهم

-دينا: و هو التحرش و الكدب مش حرام برضه يا مولانا ؟!

امتياز 33: فخرست

"نهار داخلى , امام حجرة العمليات المصغرة"

-الجراح: انزلى يا دينا هاتى لى ال"جيفت" من العيادة

-دينا: ها؟ مين ده اللى ينزل؟!

-صوت داخلى 1: قولى له ان ده مش شغلك , قولى له ان دى حتى مش شغل تمريض , ده شغل عمال و مش عمال النضافه كمان عشان عندهم حاجات اهم يعملوها 

-صوت داخلى 2: معلش يا دينا خليها عليكى و ريحى دماغك

-الجراح: يوووه ما تنزلى تجيبه عشان نشتغل

-صوت داخلى 1: قولى له انك -لا مؤاخدة يعنى- دكتورة , قولى له انك جايه تتعلمى مش جايه تتمرنى على شكل السلم , قولى له انك بتجى كل يوم المستشفى و مش بتتعلمى حاجة تستاهل المرمطة دى

-امل دنقل الداخلى: كلُّ هذا البياضِ يذكِّرني بالكَفَنْ! , فلماذا إذا متُّ , يأتي المعزونَ مُتَّشِحينَ , بشاراتِ لونِ الحِدادْ , هل لأنَّ السوادْ , هو لونُ النجاة من الموتِ, لونُ التميمةِ ضدّ.. الزمنْ

-دينا: "تتنهد" ننزل نجيبه , و ماله

"نهار داخلى , العيادة"

-دينا: الدكتور عايز الجيفت 

-الممرضة: "ببطئ" الاوضة ممسوحه و هتتبهدل , نستنى لما تنشف

-امل دنقل الداخلى: تكلمي .. باللهِ .. باللعنةِ .. بالشيطانْ !

-دينا: اوعدك مش هنبهدلها 

-الممرضة: طيب ادخلى هاتيه انتى بس على طراطيف صوابعك بقى

-دينا:  "بعد لحظات من التردد تبدأ دينا فى رقصتها روسية الطباع على اطراف الاصابع لتصل الى الدرج"

"نهار داخلى , على السلم الفاصل بين العيادة و غرفه العمليات"

-صديق مريض: مش انتى اللى كنتى مع الجراح؟ هو هيبدأ امتى ...و النبى يا ابلة 

-دينا: "تصرخ" انا مش أبلة 

-امل دنقل الداخلى: 

لا تسكتي .. فقد سَكَتُّ سَنَةً فَسَنَةً ..
لكي أنال فضلة الأمانْ
قيل ليَ "اخرسْ .."
فخرستُ .. وعميت .. وائتممتُ بالخصيان !
ظللتُ في عبيد ( عبسِ ) أحرس القطعان
أجتزُّ صوفَها ..
أردُّ نوقها ..
أنام في حظائر النسيان

الأربعاء، 11 يونيو 2014

لما صوتى اتنبح

اوصيك يا ابنى بتقوى الله , و سماع اغانى الشيخ امام و زياد الرحبانى و عبد المطلب اوعى تقول عليهم صوتهم وحش يا ابنى , اوعى تستسخف صوت اجش مدام طالع من القلب جروحه زى الشمس حمرا 

اقرا يا ابنى لمحمد الماغوط و امل دنقل و نجيب سرور اوعى تقول عليهم ناس كئيبة , اوعى تسيب حد بيكتب بدمه عشان حد اكتر حاجة بيدفعها فى الكتابة تمن الحبر ولا شحن اللاب توب

اه و اشترى يا ابنى ميه بدل الحاجة الساقعة , و كل مولتو بدل الشبسى

#ولدى_نصحتك_لما_صوتى_اتنبح

https://www.facebook.com/dina.nabil.712/posts/696746203726396

امتياز32: صيام عصير التفاح

"الساعة 10:40 مساء , تدخل فتاة حوالى 17 سنة بصحبتها 4 صديقات و امها , الفتاة ترتدى اسود , حزينة لكن تبدو بصحة جيدة"

-دينا: "فى ارهاق" مين فيكوا اللى تعبان يا جماعه؟

-صديقة 1: "تشير الى الفتاة" هى يا دكتورة , بصى تعبانة ازاى؟

-دينا: ولا تعبانة ولا حاجة , البنت شكلها كويس اهو الحمد لله , عموما نقيس لها الضغط برضه و نفحص

"بعد الفحص"

-دينا: زى ما قلت البنت كويسة و زى الفل

-ام المريضة: دى مكلتش بقالها اسبوع يا دكتورة

-دينا: اسبوع؟! و مش بتاكلى ليه؟ فى قئ او بطنك بتوجعك او اسهال؟

-الفتاة: "فى رقة" اصل ماليش نفس

-صوت داخلى 1: يا بختك , ده دينا من صباحية ربنا لا كلت ولا داقت الزاد فى المستشفى المهببة دى و هتموت من الجوع يا عينى

-ام المريضة: قاطعة الاكل بقالها اسبوع يا عينى , قلنا نجى نعلق لها محاليل

-دينا: بتشرب سوايل يا ماما؟

-صديقة 2: بتشرب عصير التفاح بالعافية

-صوت داخلى 1: يا بختتتك , ده دينا بقالها 11 ساعات هتموت على بق ميه حتى مش عصير و حتى مش لاقيه وقت تروح تشترى ازازة مية بدل ريقها الناشف ده

-ام المريضة: هتعلقى لها محلول صح؟ "تخفض صوتها" اصلها مخانقة مع خطيبها عشان كده صايمه

-صوت داخلى 1: يا بنت المحظوظة و كمان عندك خطيب؟! ده دينا المسكينة بقى عندها 24 سنه و لسه عزباء و شكلها هتفضل كده حتى الموت

-دينا: "تحاول تجاهل الصوت الداخلى" البنت حالتها العامة كويسة يا ماما , المحلول ده مش اكل ده ميه و ملح لتعويض السوائل مش اكتر

-ام المريضة: بس البت مش بتاكل

-دينا: المحلول مفهوش فراخ يا ماما , انا ممكن اريح دماغى و اعمل لك اللى انتى عايزاه بس مش هينفعها فى حاجة...شطارتك انك تقنعيها تاكل و تصلحى لها حالتها النفسية

-صوت داخلى 1: و دينا مين يصلح لها حالتها النفسية؟ 

-صوت داخلى 2: "يتدخل اخيرا" يا اخى نكدت على البنت , سيبها تشوف شغلها

الثلاثاء، 10 يونيو 2014

عزيزى سيد حجاب

عزيزى سيد حجاب, تحية طيبة و بعد 

انت متعرفنيش شخصيا و انا علاقتى بيك هى اشعارك و اغانيك مش اكتر لكنك ليا عندى واجب و مش بس عندى عند كل العيانين اللى بشوفهم طول النهار 

انا بجى فى لحظات يا استاذ سيد بحس انى عايزة اقتل العيانين , اه و الله بيبقى نفسى اطلع رشاش و اهى كلها كام رصاصه و اخلص من صداعهم و شكوتهم المستمرة و زحمتهم و تذمرهم و ان كلمات زى : الحمد لله , شكرا , لو سمحت مش موجوده فى قوموسهم اصلا , بيبقى نفسى اخنق العيال اللى بتعيط و انا حاطه السماعه على صدرهم و ودنى تتخرم من الصراخ , بيبقى نفسى اطرد امهات العيال اللى مصرين انى ادلهم دوا ببلاش مع ان لا العيال محتاجاه ولا الاستقبال فيه ادويا من اصله

بحارب شبح خوفى انى هافضل عمرى كله فى استقبال وزارة الصحة اعالج اسهال و برد و نزلة معوية , و انى مش هتعلم الطب اللى بجد و اخد خطوات لقدام تخلينى اكسر اسطورة الدكاترة الستات اللى بتخصص تخصصات سهلة عشان تروح بدرى تطبخ الغدا

فى لحظات الوان الطيف زى دى بلاقى كلمات بسيطة كتبها فى ساعه صفا بتجى فى دماغى و تخلي الدنيا تهدى و تبقى ابسط و نفسيتى اروق و تخلينى اتقبل فكرة ان الناس المزعجة دى ناس غلابا برضه يستحقوا اننا نهتم بيهم و نضحك فى وشهم , كلمات بتخلينى احس ان -يمكن- فى شوية أمل:

و مين نكون ان بعنا يومنا و ماضينا
و ليه نعيش اذا كانش بكرة يراضينا 
و ازاي ننام من غير ما نحلم ببكرة 
و بكرة ده منين ييجي الا بايدينا

فلك عندى يا عزيزى سيد حجاب واحدة

امتياز31: طباين

"يدخل رجل فى الخمسين من عمره مصاب بجرح عميق فى الوجه و ينزف بغزارة"

-دينا: "تكشف عن الضمادة" امممم لا الجرح ده كبير و عايز جراح يبص عليه الاول , انا هابعت له حالا , بس لو سمحتوا عايزة اعرف هو اتعور ازاى؟ و عنده سكر او ضغط او بياخد اى ادوية؟ بياخد اسبرين او اى ادوية ليها علاقة بسيولة الدم؟

-صديق المريض: هو عنده ضغط و معندوش سكر , و مش بياخد اسبرين ولا عنده سيولة

-دينا: جميل , فاضل بس اعرف اتعور ازاى لو سمحت؟

-صديق المريض: الطباين فيها اكليشهات قشطت وشه

-صوت داخلى 1: انا كل اللى فهمته كلمه "وشه"

-دينا: ها؟!

-صديق المريض: الطباين فيها اكليشهات قشطته

-دينا: انا سمعت من الاول بس اسفه مش فاهمه حاجة, فهمنى اكتر لو سمحت

-صديق المريض: الطباين فيها اكليشهات قشطته يا دكتورة

-دينا: "تفقد الامل" طيب ماشى

-الجراح: "يدخل" اه الجرح كبير فعلا , هو اتعور ازاى يا دينا؟

-دينا: اممممم مش قادرة احدد بصراحة

-الجراح: "فى عصبية" انا علمتك ان اول حاجة تسألنى عنها الجرح بانهى أله و جه ازاى

-دينا: امممم اقولك ايه بس, طيب نسأله مع بعض

-الجراح: اتعور ازاى يا بنى؟

صديق المريض: الطباين فيها اكليشهات قشطته

-الجراح: اهااا , ماشى

-دينا: هو اتعور ازاى يا دكتور؟

-الجراح: بالاكليشهات اللى فى الطباين طبعا

-دينا: و ماله 

#اربط_الاكليشه_مطرح_ما_يقول_الدكتور
#طباين_طباين_بس_نعيش

الأحد، 8 يونيو 2014

امتياز30: النحل

"تدخل ام فى الاربعينات و بصحبتها طفلة فى السادسة"

-الام: و النبى يا دكتورة الحقى البت , جسمها محمر و مورم و شفافيها كبرت و احمرت 

-دينا: بنتك عندها حساسية يا ماما؟

-الام: لا معندهاش حاجة , النهاردة بس حصل لها كده بعد الجلسة

-دينا: جلسة ايه؟ جلسه تنفس؟

-الام: لا جلسة قرص النحل

-دينا: نحل ؟!!!!

-الام: اصل البنت عندها انيميا و قالوا لى قرص النحل بيعالجها

-دينا: "تكتب" ادى يا ماما الورقة دى للتمريض هيدوها حقن و هتقعدى لى بيها فى اوضه الملاخظة عشان ارجع ابص عليها عشان لو حصل له مشاكل فى التنفس نبقى جاهزين و ان شاء الله ميحصلش حاجة

-الام: "تنظر فى الروشتة" هى ايه الحقن دى؟

-دينا: ده مضاد للحساسية و حقنة كورتيزون عشان يقلل التورم

-الام: لا يا دكتورة بلاش كورتيزون بسمع عنه انه مضر

-دينا: دى حقنة هتاخدها مره واحدة بس يا ماما الكورتيزون وحش لما بيتاخد كتير

-الام: "تمصمص الشفتين فى برود"

-دينا: خدى البنت يا ماما بسرعه عشان تاخد الحقن , و بعدين الكورتيزون وحش و النحل هو اللى حلو ؟!

امتياز29: انا مش عارفنى

-صوت داخلى 1: عجبك كده يا ست دينا؟ حضرتك المفروض معاكى 4 دكاترة , واحدة منهم عاملة اجازة مفتوحه عشان بتفكر تغير تخصصها و التانى قرر ما يجيش النهاردة و واحد راح مع عربية الاسعاف مع الحالة الخطر اللى جت من ساعه و اللى فاضل شايل على دماغه شغل ال3 و اديكى ادبستى تشيلى معاه و اهو كمان استئذن يطلع القسم 5 دقايق يتابع حاله و طبعا عمرك ما تقدرى تقولى لحد تعبان كده متطلعش , اديكى مرزوعه لوحدك و ممكن اى مصيبة تحصل

-صوت داخلى 2: يعنى عايزها تعمل ايه؟ تروح تقدم شكاوى فى الدكاترة الاكبر منها عشان تستريح؟! و عموما كله بالعقل يعدى و ان شاء الله مش هتحتاجى حاجة

"يدخل شاب مترنح من باب المكتب , عيون واسعة حمراء و خطوات متعثرة"

الشاب: صبااااح الخييير يا ضكتورة

صوت داخلى 1: يا لهوووووى ادينى لبسنا فى الحيطة عشان تتبسطى

-صوت داخلى 2: الواد ده شارب مخدرات لحد ما اتعمى, الساعه 7 المغرب و بيقولك صباح الخير

-صوت داخلى 3:المهنية يا يسرى

دينا: صباح النور , بتشتكى من ايه يا استاذ؟

-الشاب: "متعثر فى كلماته" انا نفسى ابقى احمد يا ضكتورة

-دينا: هو حضرتك اسمك ايه؟

-الشاب: انا اسمى احمد بس نفسى ابقى احمد بقى 

-صوت داخلى 1: حلها بالعقل يا عم 2, البت مرمية لوحدها مع عيل شمام فى استقبال مستشفى على شمال السما , خلى العقل ينفعكوا بقى 

-صوت داخلى 2: اممممم مشى امورك يا دينا و سلكى نفسك لحد ما ننده حد من التمريض يقف معاكى

-دينا: "تكتب" طب حضرتك تاخد الحقن دى بره و بعدين نتكلم

-الشاب: "متلعثما" بس أ أ أنا بشششرب حشيش 

-دينا: لا عادى ملهاش دعوة , خد بس الحقن

-الشاب: "يخرج"

-الدكتور: "يدخل" متأسف انى اتأخرت عليكى

-دينا: لا عادى يا دكتور بس ابقى سيب لى الحقن اللى بتخلى الناس تبقى أحمد 

امتياز28: شعب متدين بطبعه

تحذير : تحوى اليوميات اليوم الفاظ قد يراها البعض خارجة , لكن فلتشهد ببراءة كاتبة البوست من "ازدراء الاديان" فهى مجرد ناقل بائس لحوارات مجتمع اكثر بؤسا 
*************************
"تقف دينا بجوار الممرضة , الممرضة تشعر ببعض الدوار"

-دينا: طب ما انتى عندك السكر و دايخة و الجهاز موجود فرصه اعملى تحليل و نطمئن 

-الممرضة: طيب اعمليه ليا عشان ايدى بتترعش

-دينا: "توخرها بالابرة و تدخل نقطة الدم الى الجهاز" اممممم النتيجة كويسة الحمد لله السكر مش واطى , حطى بس قطنة و بلاستر على صباعك عشان الدم

-الممرضة: حطيت اهو , هادى بس الحقنة للعيانة و اقعد استريح

-المريضة: انتى ازاى تتشكى بالابرة و بعدين تديهانى؟

-الممرضة: يا ماما انا اتشكيت بابرة معقمة عشان تحليل سكر ليا مش بالابرة بتاعك طبعا

-الممرضة: "تصرخ" لااااااااااا انتى اتشكيتى بابرتى و عايزة تعدينى , ديك ام دى مستشفى و دينك انتى و الدكتورة بتاعتك انا هاعمل فيكوا محضر

-دينا: .....
*************************
"حجرة الكشف مزدحمة و دينا تقف بمفردها"

-مريضة 2: انا الحته دى بتوجعنى من نص ساعه "و تشير الى اعلى رقبتها"

-دينا: طيب بيزيد او بيقل مع البلع

-مريضة 3: "تقاطع" لا يا دكتورة شوفينى الاول , انا دايخة من امبارح

-دينا: ثوانى يا ماما , اخلص مع الانسة و انا مع حضرتك

-مريضة 3: "تصرخ" بقولك دايخة من امبااااارح , سايبانى و رايحة فين؟

-مريض: "يقبض على يد دينا" انا صدرى بيوجعنى بقالى 4 ايام

-دينا: "تحاول تخليص يدها" لو سمحت

-مريضة 3: يلعن دين دى مستشفى و ديكك يا شيخة يعنى نموت عشان ترتحوا ؟ "تخرج"

-دينا: ......
*************************
"يدخل زوج المريضة صارخا فى وجه الجميع"

-زوج المريضة: الدكاترة فييييييييييييييييييييييين؟ 

-دينا: هى المريضة فين اصلا؟

-زوج المريضة: بتنزل من التاكسى 

-دينا: "تنهض من المكتب" طيب حضرتك هاتها من التاكسى و نايمها على السرير و نكشف عليها اطمئن بسيطة ان شاء الله 

-زوج المريضة: انتى لسه هتستنى لما تطلع من التاكسى؟

-دينا: ما انا ما اقدرش اعمل لها حاجة فى التاكس يا استاذى و بعدين انا بممارس جوه المستشفى بس 

-زوج المريضة: يلعن ديك دى مستشفى , دكاترة ولاد ديك كلب

-دينا: ......

#انا_اتسب_لى_الدين_اكثر_ما_شربت_ميه_النهاردة
#اليوم_العالمى_للسب
#شعب_متدين_بطبع_امه