الجمعة، 17 أبريل 2015

الست ١٦

بتعلمنا السيدة التى اذا اضيفت لها اداة التعريف صارت الست ان فى نوعين من السعادة , نوعين مختلفين من البهجة

النوع الاول نابع من الوصال , من الرفيق , من الحبيب ... تقدر تاخد فيها نموذج اجمل اغانى الست القصيرة اجمالا الا وهى "افرح يا قلبى" و دى طقطوقة منمنمة مكتملة الاركان بكلمات المحب الوحيد احمد رامى و لحن اعجازى تتخض لما تعرف انه اتعمل سنه 1937 ! صنعته ايد القصبجى .. كل التطور و الحركة و الجمال اللحنى و التنقل الرشيق بين المقامات اتعمل سنه 37 ! ... الست فى الاغنية دى مش بس بتضرب لنا مثال فى قوة الصوت خاصة لما تفتح صوتها على اخره و تقول لك ك سميع مستسلم للجمال ده مخاطبه قلبها :

"غنى له الحان الغرام واحكي له اسباب الهيام
وافرح يا قلبي بالمرام وابلغ مناك ويا الحبيب"

الست هنا بتمنح قلبها الاذن للفرح , صوتها منطق فى "افرح يا قلبى" و كأن قلبها ده مشفش فرحة قبل كده و اخيرا اتحيت له الفرصة ينطلق ... كأن قلبها كان فى انتظار الاذن ده متحفز

زى ما قلنا ده النوع الاول من السعادة و يتجسد المعنى ده فى تعبير رامى: "اقطف معاه زهر الحياة مدام هواك وافق هواه"

و هو المعنى اللى جه صلاج جاهين بعدها بسنيين حطه فى برواز " احسن ما فيها العشق و المعشقـة" و لجمال لفظ "المعشقة" البرنس ده مجال اخر
**********
و فى النوع التانى تقدر تقول انه اللى حطه ابراهيم عبد المجيد فى تعبير "عتبات البهجة" و فن البهجة ده سر لا يعلمه الا البرنسات ... اى كيف تجعل من نفسك شخص مبتهج بغض النظر عن الاخر

و دى الهادى ادم عملها فى اغدا القاك فى تعبير:

"أنا أحيا في غدي الآن بأحلام اللقاء
فأت، أو لا تأت أو فافعل بقلبي ما تشاء"

الست هنا مبسوطة قبل اللقاء , الست وصلت ان المتعه اللى بقت فيها ممكن تغنيها عن جمال الوصال ذاته

الفكرة تكمن ان القدر يمنحك النوع الاول فى اوقات قليلة و بالتالى وجبك ك برنس تجاه نفسك انك تملا الفراغات دى بالنوع التانى

الست ١٥: يا قلبى اه

الست بتقول: "يا قلبي آه" و بتتنهد طربا... تتنهد الهانم اللى قاعدة فى الصف التالت اعجابا... اتنهد استمتاعا... الست بتكرر الاهة ... تتكرر تنهيدة الهانم ... و تطلع تنهيدتى اعلى ... الست تكرر تالت بلوعة اكبر و بتغيير فى ملامحها .. و كأن مشعل نور فجأة ... تتهند الهانم و كأن مخزون ذكرياتها انفتح فجأة  ... تطلع لى فكرة منسية من دولابى المهمل ... اتفاجئ بصوت تنهيدتى

الست بتقول: "يا قلبي آه ,الحب وراه" ... تغمض الهانم عينها ... اغمض عينى لوهلة .. الست تقول "اشجان و الم , و اندم واتوب" ... الهانم تعمل علامه خمسة و خميسة خوف على الست من الحسد ... ادوب كلام بيرم التونسى فى دماغى ببطئ ... اتخيل كل القصص اللى ممكن تطلع من "اندم و اتوب" دى ... حالة البندول اللى بندخل فيها

الست تقول : "وعلى المكتوب..ما يفدش ندم" ... الهانم تشاور بمنديلها للست ... اقول بينى و بين روحى يا سلام ... احس بنبض فى عروق ايدى ...  و يدخل على الخط الصوت العشوائى فى دماغ يقول لى ان الجملة دى تنفع مثل شعبى او جمله على توكتوك... اهش العشوائية و ارجع للمود

الست تقول بصوت هادى : "ياريت انا اقدر اختار ,ولا كنت اعيش بين جنة ونار ,نهاري ليل وليلي نهار" ... الهانم تبص بعيد و تسرح للحظة ... افكر فى ان الشيخ زكريا بينزل باللحن فى الحته دى بالذات كأنه بيجهز لنا مفاجأة ... تنط فى دماغى كل اللى قريته عن حرية الاختيار و فولتير و روسو و ابن رشد ... اهش الافكار التقدمية ... و ارجع للست

الست تعلى بالصوت و باللحن فجأة : "اهل الهوى وصفوا لي دواه , لقيت دواه زود في اساه" ... الهانم فى الصاله تقول "الله" ... تنطلق منى "الله" ... اتفاجئ مع انى عارفه المفاجأة من سنين ... امدح فى دماغى زكريا احمد ... ادعى ربنا ان الست تعيد الحته دى تانى عشان اتفاجئ تانى

افتكر كلام ناقد عن "هو صحيح الهوى غلاب" لما قال ان الاغنية دى "طرب يصل إلى حدود الفجيعة" .... احمد ربنا على نعمه صوت الست و دماغ زكريا احمد و صفاء بيرم و اللى سجل الاغنية و اللى حفظ التسجيل و الهانم اللى اتيحت لها الظروف انها تحضر

صليب دهب

سيدة مسيحية كانت قاعدة جنبى فى الميكروباص .... صليبها الدهبى الصغير لفت انتباهى .... اللى عجبنى فيه انه بيلمع .... بيلمع زى ما يكون لسه جديد .... او زى ما تكون بتلمعه هى يوميا... بتتكلم فى التليفون و هى متعصبة... واضح من كلامها انها بتتخانق ... فى وسط الكلام قالت للى بتكلمه: انا هاجى افضحه و افرج عليه امة لا اله الا الله محمد رسول الله.... وقفت فى كلامها فجأة ... حسيت انها استغربت من كلامها ... ضحكت ... هديت و صالحت اللى بتكلمه

انا بحب تركيبة مصر و المصريين

همسات نادرة

طيب فى تلك اللحظة النادرة من الروقان التدوين فيها ضرورة حتمية... قاعدة على اللاب توب بقرا رواية لكاتب نرويجى و باكل اندومى اصلها اسيوى و بسمع فى الراديو محرم فؤاد

و بالتالى فقليل من الشكر للكاتب اللى كتب الرواية الرايقة دى و للى ترجمها و للى طبعها و للى رفعها لنا عالنت نقراها ببلاش و تنوسنا فى ليالينا الطويلة ...و الشكر موصول للى زرع القمح و للى طحنه و للى اخترع النودلز و للى عملها بجنية و نص عشان تبقى تسد جوعنا فى الليل .... و لاذاعه الاغانى اللى بتذيع اغانى حلوة ببلاش منها تسجل لنا ناس ماتوا عمرنا ما كنا هنسمعهم و منها نسمعها فى روقانا... و لبليغ حمدى انه بيعمل الحان حلوة عموما و ل محرم فؤاد بالذات ..  و لابويا اللى علمنى قرايه الكلام و لامى انها حببتنى فى الكتب ...و للقدر اللى ساب لى 3 ساعات رايقة اعمل فيهم حاجات مفهاش قلق ... و اخيرا و اولا و قبل و بعد كل شئ , الحمد لله

عمى يقابل نجوم الضهر

جورج وسوف: "يغنى" و انا و انا و انا ... انا قاعد اعد نجوم الضهر

"جرس الباب يصدر رنين عالى"

دينا: قال يا قاعدين يكفيكوا شر الجايين

عمى السلفى: "عابسا"  السلام عليكم

صوت داخلى ١: احيييه ليكون عرف انى بكتب عنه فى الفيس

عمى السلفى: و بعدين بقى فى السيسى اللى مش نافع فى حاجة ده

صوت داخلى ٢: قشطااات يبقى معرفش ...بس ما شاء الله بيشتم فى السيسى قبل ما يسلم علينا حتى

ماما: اهلا اهلا ، شاى يا دينا .... اقفلى المزيكا

عمى السلفى: بيقولوا ان ابراج الكهربا بتاعه مدينة الفجر الاعلامى ...و المذيع الشامل احمد نصر قعد يضحك عليه

ماما: اهو عشان تستريحوا

عمى السلفى: احنا هنسريح اه بس المخابرات هى اللى عملتها طبعا

دينا: ها؟! طب ليه و ازاى و بكام يعنى؟...و بعدين ايه المذيع الشامل ده؟ ده زى شهريان بيغنى و بيرقص و بيذيع يعنى؟

عمى السلفى: ما هو عبد الناصر كان بيعمل حاجات من دى ... الكرسى واسع عليه

ماما: بقى المخابرات هى اللى ضلمت الاعلام؟ عارف احنا بنتقرب لربنا اننا نطلع عينيكوا

عمى السلفى: ما هم الستات كده ، سيدنا على كان بيقول انه لو كلم عالم يهزمه  و لو كلم جاهل يغلبه

ماما: يعنى انا جاهلة؟!

عمى السلفى: ده سيدنا على اللى بيقول ، اعترضوا على الدين بقى ... المفروض نبيل يبقى له كلام

ماما: و ايه علاقة جوزى برأيى فى السياسة و بافكارى اصلا؟! و ايه علاقة اى حد بافكارى و معتقداتى؟!

دينا: احم الشاى يا جماعه ، استهدوا بالله

عمى السلفى: ايه ده الشاى ده تقيل؟

ماما: كويس...اشربه عشان ضغطك يعلى شوية

عمى السلفى: و السيسى عايز يعمل لهم كاتدرائية يعبدوا فيها الشيطان زى ما عمل عبد الناصر

دينا: اشرب يا عمى الشاى احسن ما اجيب لك مريندا

كبسولات ايران

تاريخ ايران الحديث فى عدة كبسولات متنوعة ...

http://www.4shared.com/office/uqzggf3lba/______________409__2014.html?locale=ar

http://studies.aljazeera.net/bookrevision/2014/05/20145491349486409.htm
*********

http://www.4shared.com/office/yCJgwLblba/______.html

http://www.4shared.com/office/LZ9MQVN5/_____.html

http://www.4shared.com/document/o8mdnOyc/___--___.htm

http://www.4shared.com/office/nWAV7YdIce/_______.html

@[1110460045637231:https://m.facebook.com/maktaba.amma/photos/pb.434973729852536.-2207520000.1429104840./1110460045637231/?type=1&source=42]

مديح الامل

كان بودى اقولكم ان مفيش امل ولا فى انسانية فاضلة فى العالم و فى البلد ... بس اللى شفته النهاردة للاسف مش كده ....شفت مستشفى حكومى بتاخد ست من شرق اسيا لا معاها فلوس ولا معاها باسبور و فى ظرف٣ ساعات  تكون اتكشف عليها و اتحجزت و لبست لبس العمليات و اتخدرت و عملت العملية و فاقت ....و اتعمل لها اللى مفيش برايفت ممكن يعمله لها.....ادفع لها فى الهيصة دى كلها ١٢٠ جنية من اهل الخير اللى لا يعرفوها ولا عمرهم قابلوها ... شفت ولاد الحلال بيساعدوا ست فى بلد غريب عنها ...و شفت ناس بتهتم بيها و ترجم لها مع انهم ميعرفوش بلدها فين على الخريطة...شفت ناس بتدعى لها ربها ان يقومها بالسلامة رغم انها بوذية و اشك انهم يعرفوا مين بوذا ده اصلا...شفت سفاراتها جاية بتتمخطر بعد ما كل حاجة خلصت و المصريين قاموا بالواجب. ..كان نفسى اقولك مفيش امل و انسانية بس العجيب العجاب ان طلع فى !

ربنا يوقف لك ولاد الحلال و يوقفك فى سكة الغلابا

شم نسيم ٢٠١٥

النهاردة قضيت يوم رايق ... طفيت الموبايل و النت رحمنا من روحه و قطع ... قضيت يوم من اخواتى و ولاد اختى ..اتحججنا بالعيال عشان نلون البيض و ساعه الجد لونا احنا و منعنا العيال يلمسوا الالوان... ناكل رنجة و بصل  لما نهيس و نحاول نجرب الفسيخ و نفشل زى كل سنه ... و اتفرجت على "الدنيا ربيع و الجو بديع" و "حلاوة شمسنا" و "ادى الربيع" و "يا حلاوة الورد يت جمال الورد"...ابدينا احترامنا للفراعنة الرايقين ... و ضحكنا و لعبنا كوتشينة و اخترعنا العاب جديد...و سمعنا الست... و لما النت جة لقيت  دخلت لقيت اللى بتريق على الفسيخ و اللى بيقولك حرام و اللى بيقول "هو انا الوحيد اللى مش بحتفل بشم النسيم" و اللى بيقول "عيد باى حال عدت يا عيد" ...ايه الكآبة اللى انتوا فيها دى يا جدعان؟! و ليه مصرين ان تخلوا البعد عنكوا غنيمة؟!

الكتاب السادس

اخلص اخر صفحة فى كتاب يوسف زيدان الجديد المسرب على التابلت ...وشى يمعتض لا اراديا...افكر انى لازم اكتب ريفيو طويل مفصل...المجموعة وحشة فى عمومها اه بس فيها قصص متألقة بتلمع و ده يستحق التوقف....اروح اسجل اسم المجموعة فى ملاحظات قراءة شهر ابريل...بقوا ٥ كتب و مكتبش ولا ريفيو...احاول اخد نفس و اكتب على التابلت...مفيش فايدة دماغى واقفة...اقرر ان صعوبه الكتابة على التاتش هو السبب الاوحد....اسيب التابلت و اقعد قدام الكمبيوتر الكبير...الاقى فيه لعبة المزرعة اللى بحبها...افتحها...اسقى البط و احط برسيم للخروف و افتح مصنع مربى جديد .... اشترى مزرعة عيش غراب بالفلوس الدهب...ابص للساعه اكتشفت ان عدى ساعتين....اقفل الكمبيوتر

اقنع نفسى ان مفيش حل غير انى اقعد قدام لاب توبى العزيز....افتكر انه بايظ من شهر و نص ... استلف من ابن خالتى نسخة ويندوز مسروقة ... اصطب فيها.. تعدى ساعة...يفتح اخيرا...ابدأ اصطب برامج القراية و الكتابة و الاغانى و متصفحات النت....تعدى ساعه كمان....افتح ملفات الكتب...افكر نفسى انى اقرا لعزت القمحاوى....اقرر انى مش هاعرف اكتب غير لما اسمع ايديت بياف ... ادوس بالماوس على الاغنية ...تتطلع رسالة خطأ ....كارت الصوت محتاج تعريف....افتح النت ادور عليه...احمله....السرعة بطيئة لان اختى بتحمل الحلقات المسربة من مسلسلها الاجنبى المفضل...ال٢٠ ميجا يخدوا ساعه .... ابدأ اكتب .....دماغى صفحة بيضا

اقفل ده كله و افتح كتاب.....سادس

صورتين و بس

لما تروح حفلة/معبد/مسجد اثرى/ متحف/جنينة ، ممكن لو سمحت تتصور مرتين بس؟ مرة فى فى الاول لوحدك و مرة فى الاخر مع صحابك و كفاية....جرب تستمتع بالخروجة نفسها بعينك مش من ورا العدسة خاصة انك مش فوتوجرافر يعنى .... بلاش عشان نفسك خليها عشان الغلابا اللى عايزين يتسمتعوا و يتفرجوا على الشئ المعروض مش شاشة تليفونك و فلاشك ....لو سمحتوا يعنى

عيب انك تبقى فى وادى الملوك فى الاقصر و نازل دورين بسلالم خشب عشان توصل للمقبرة اللى فيها اجمل حيطان و احلى سقف فى الكون و بدل ما تدى نفسك لحظة تنبهر تطلع ام موبايلك .....ادينى لعينيك متعة

ملحوظة:  لما تروح تطبع الصورتين دول كممثل عن الخروجة فى البومك ، صورتين ابرك من ١٠٠ و الله ...

الضوء

"لو ان الضوء سرى من المركز الى كل الاطراف لما امكن رؤيته او الابصار به ، او معرفة الظل من نقيضه ، فالنور لا يعرف بالنور و انما بالعتمة . هكذا...لا يمكن ادراك القوة الا من خلال الوهن ، و السطوع عبر الخفوت ، كلاهما لازم "

جمال الغيطانى - خلسات الكرى

*********************
"ربما لو لم يكن هذا الجدار ما عرفنا قيمة الضوء الطليق"

أمل دنقل

عمى يقابل ابقراط

عمى السلفى: ايه اللى بتتفرجوا عليه ده؟

دينا: عادى فيلم اجنبى ... بس شفته قبل كده لو عايز تغير غير

عمى السلفى: عندكم قناة الشرق؟

دينا: قلت لك قبل كده يا عمو ملناش فى القنوات دى

عمى السلفى: الاعلام باظ خلاص ، عندك احمد جاموسة اللى على صدى البلد و الهبل اللى بيقوله

صوت داخلى ١: "جاموسة" ؟! على اساس انه قلش و نضحك و كده؟!

دينا: انا كمان مش بحبه...بيقول حاجات متقالش على تليفزيون

عمى السلفى: ولا ابو حمالات التانى اللى ابوه مات و هيحصله هو على جهنم

دينا: "صمت"

عمى السلفى: هههههه انما مذيع الشرق بقى طلع على الهوا و قال "يا سيسى يا ابن الكلب يا حرامى" هههه تخيلى ... شجاع

دينا: اه هو ده الاعلام الحقيقى فعلا -_-

عمى السلفى: انا جايب لك هدية من الحرم بقى ، بركة..."يناولها كيس مغلق"

دينا: "تفتح الكيس" امممم سبحة؟ كويس ... ازازة برفان صغير "تفتحها" افففف يا ساتر ... ايه ده و كتابين؟ .... "تضع الشنطة بجوارها" هدية مقبولة يا عمو

"بعد اسبوع"

دينا: مشفتيش الحاجات اللى عمى جابها لى هدية؟

ماما: متقريش الكتب دى يا دينا ، بقى دى حاجات تتقرى؟ .. جايب لك كتب فى السحر؟!

دينا: تصدقى نسيت اقراهم فعلا؟ هافتحه ابص فيه .. "تفتح الكتاب فتنفجر فى الضحك" يا نهار الوان الطيف؟ ايه المسخرة دى؟!

ماما: قلت لك بلاش

دينا: هاقرا لك حته تخصنا كدكتورة اسمعى يا ستى

"قال ابن القيم ان الصرع صرعين : صرع من الارواح الخبيثة الارضية و صرع من الاخلاط الرديئة و الثانى هو الذى يتكلم فيه الاطباء فى سببه و علاجه

و قد نص ابقراط فى بعض كتبه فذكر بعض علاج الصرع و قال: هذا و انما ينفع من الصرع الذى سببه الاخلاط و المادة و اما الصرع الذى يكون من الارواح فلا ينفع فيه هذا العلاج

و اما جهلة الاطباء و سقطهم و سفلتهم و من يعتقد فى الزنادقة فضيلة فاولئك ينكرون صرع الارواح ، و لا يقرون بانها تؤثر فى صرع المصروع و ليس ذلك الا جهل منهم ...و من له عقل يضحك من جهل هؤلاء و ضعف عقولهم"

ماما: عجبك كده؟

دينا: اشرح حاجة من الكلام ولا واضح؟ ... عموما انا من الزنادقة الجهلة السفلة دول يا مامى فى رأى عمو...لما يلف و يجى لى بقى

اخطاءها

عارفين لما بلاتر قال ان جمال الكورة فى اخطاءها؟ و ان غلطات الحكام جزء من اللعبة؟    اهى الكتب كده ، جمالها فى اخطاء مترجمينها .... صفحات ناقصة فى النسخة اللى فى ايدك و انك تقعد تحزر ايه اللى حصل فى الصفحة دى ... التحيز شوية من مؤلف فى كتاب تاريخ ...تشبيه مكرر من روائى تكون قريته فى كتاب اقدم ... غلاف كتاب ملوش دعوة بالمحتوى ... بياع يبيع لك كتاب مهم من غير ما يكون عارف قيمته ... الناشر اللى بيكتب مقدمة للكتاب غلاسة كده...نسخة بى دى اف متصورة صفحتين قدام بعض

القراءة منظومة متكاملة ... بحب ديفوهاتها

عاملة ايه؟

-عاملة ايه؟

-هو انا مش اللى عاملة ، ماما اللى عاملة رز و بسلة هو انا صحيح بقول لها تجيب بسلة خضرا بدل المجمدة دى عشان طعمها بيفرق و صحيح هى بتنكر و تقول انها خضرة بس لسه فيها خلاف ....رجلى دخل فيها جسم غريب مش عارفة ازاز ولا شوك بس بتوجعنى و حطيت عليها مرهم و ربطتها ....اه و النهاردة و انا فى نص الشارع قدام المجمع فى التحرير بعدى الشارع دخت و الارض لفت بيا و زى ما يكون السواقين بيلعبوا نيد فور سبيد و بيزودوا السرعه ما انقذنيش غير رحمه ربنا ... لسه بقرا فى المجلد ال٢٤ من قصة الحضارة و مطول معايا شوية ... خلصت كتابين و نفسى مسدودة انى اكتب لهم ريفيو ....ماما عايزانى اشترى جزمة و انا بقول له مش لازم....ابويا عنده زغطة من امبارح....اللاب توب بايظ بقاله شهر ... عندى حالة صفاء ذهنى و روقان غير مبررة اطلاقا مؤخرا ....و متضايقة شوية ان برنامج شوبير بقى الساعه ١١ و مبقتش اعرف اسمع حفلة الست فى الراديو....اتأخرت فى رجوع الكتب فى المكتبة و تلاقى عليا غرامة .... بسمع سعاد محمد كتير اليومين دول...

- "صمت"

-اه ...و الحمد لله

-طب كويس ...كنت عايزك فى خدمة

يوم يصمت المنبه

فى يوم هاكتب روايتى ، هتبقى اطول من الجبل السحرى و الدون الهادئ و البؤساء و سيرة ابو زيد الهلالى و الشاهنامة مجتمعين ... محدش هيطيق يقراها صحيح...بس انا هاكون استريحت ، و هاقدر انام و يومها مش هاظبط منبه

خمسة قرون بعد الميلاد

مرة كنت عايزة اقرا عن تاريخ روسيا ...كل ما اشترى كتاب يبدأ بسنه ٥٠٩ ميلادى ، اتعجبت ... ٥ قرون بعد الميلاد؟! امال كانوا عايشين ازاى؟ تاريخ يبدأ متأخر كده ازاى؟ ...طيب امريكا كانت مخفية عن العالم المتحضر انما روسيا دى موجوده فى قلب العالم عادى

فضلت كده كتير لحد ما بدأت و استمريت مجلد بعد مجلد فى قصة الحضارة...  عرفت وقتها يعنى ايه ان انجلترا كانت مستنية فتوحات روما ليها عشان تبقى بلد ، يعنى ايه فرنسا مكنتش موجودة اصلا لغاية ما يوليوس قيصر قدر يغلبهم ...مكنتش متصورة ان الحضارة الرومانية اللى وصلت مصر بعد ما كانت شبعت حضارة ممكن تأثر فى العالم كده

الشرق الاوسط ده حاجة كبيرة...مصر و سوريا و العراق و ايران حاجة كبيرة ... حاجة محدش يفهمها غير بلد تاريخها ابتدى "بعد" الميلاد ب٥ قرون !

انا عماله اقرا عن قبائل رايحه و قبائل جايه ، ايشى صقالبة على الهون على قبائل ايرانية على فنلندين على فيرنجار...حاجة اخر لخبطة

امى ، المؤمنة بالقدر

ديدرو كتب زمان رواية عبقرية اسمها "جاك المؤمن بالقدر" و الرواية الحلوة جدا دى ملهاش اى علاقة باللى هاكتبه ... اقدر اكتب كتاب اسمه ماما المؤمنة بالقدر

حكت لى مره فى ساعه صفا عن حادثة حصلت لها و هى فى ثانوى بتعتبر انها نقطة تحول ... البيوت زمان كانت قريبه من بعض و كل الجيران اهل ، و فى ليلة صيفية طلبت جارة من امى -لانها المتعلمة الوحيدة المتوفرة- انها تقرا لها كتالوج مكواة جايه لها من بره و تركبها ليها

جدتى لسبب لا يعلمه احد زقت امى فى الاوضة و قالت لها مالكيش دعوه ادخلى انتى مع انها صديقة صدوقة للجارة دى ، و هما بيتكلموا بالصدفه يمر جار تالت ليهم بيشتغل كهربائى .. يضحك و يقول لهم بقى جايبين العيلة دى تقرا و انا موجود؟!  ركب الفيشة فى الكوبس.....اتكهرب....مات

السبت، 4 أبريل 2015

الهند ام العجايب

نصائح تلخص يوم طويل :

١- متروحش ايفنت الاكل الهندى اللى فى الاوبرا او فى الازهر بارك ، التنظيم زفت ، الاكل غالى ، و مش يكفى الاعداد ابدا ، و مفيش قعدة محترمه

٢- فى مسرحية حلوة اسمها "بدلة البرق و الصقيع" بتتعرض فى مسرح الهناجر جميلة و شغل الاضاءة و الديكور فيها مميز ...حاول تروحها

٣-متصدقش امك لما تقولك متاكلش بره هاعمل لك محشى ... هتقضيها جبنة هى اصلا ما بتصدق تخلص من قرفك و اكلك

٤-فى حالة اصرارك على تجاهل النصيحة الاولى ، اعمل حسابك على ادوية تسمم و مضادات للقئ  و فضى نفسك يومين تمرض فيهم براحتك

٥- الروايات و كتب التاريخ صديق جيد عموما و فى ايام المرض بذات ... جرب ٤٥١ فهرنايت لو مقرتهاش

٦- بلاش رمرمة

العمى

يحكى ان فى العصور الوسطى التى سميت اصطلاحا بالعصور المظلمة كان فى امبراطور بيزنطى اسمه "باسيل الثانى" كان بيحارب البلغار ... و الحرب طالت اكتر من ٣٠ سنة ، و اخيرا سنه ١٠١٤ انتصر عليهم نصر كبير

باسيل التانى حب بيبعت رسالة تهديد و اذلال لقيصر البلغار صامويل ..عمل ايه؟

فى الحرب وقع فى ايده ١٥ الف اسير فقرر انه "يسمل عينيهم" و خلى لكل ١٠٠ اسير واحد بس اعور ، بحيث تقود العين الواحدة دى ال١٠٠ جندى اعمى فى رحلة طويلة كئيبة لطريق العودة للقيصر صامويل

سارامجو بكل اللى عمله فى روايته "العمى" مش هيوصل ل١٠٪ من اللى وصلت له حقارة البشر

الست ١٤

لما تجى تتكلم عن "الحب من طرف واحد" تلاقى قدامك طريقين ، طريق السيدة التى اذا اضيفت لها ال صارت الست ام كلثوم و طريق السيدة التى اذا تذكرنا القمر صارت فيروز

فيروز فى كلمات الواضح القاطع زياد عمل فى اغنيه ٤ دقايق فى اجواء لا تقل غرابه عن روايات "ميلان كونديرا"  زى الهوية  و الجهل و المزحة و غراميات مرحة ... بكلمات ساخرة واضحة قاطعه تستنكر فيروز حالة الاضطراب و التذبذب و تقول " شو هالمزحه هي؟!" مع اضافه صوتيه لعشرات علامات الاستفهام و التعجب .... و تزيد جارة القمر فى استنكارها و تتسأل :

"ما بعرف كيف بتحس و ما بتعرف شو عم بتحس؟!
ما بعرف كيف بتحب و ما بتعرف اذا عم بتحب؟! "

فيروز هنا قاطعة ... عايزة اعتراف نهائى يقطع فترات الشك المشهور بيها حالات الحب من طرف واحد ، كمان عزيزتى و رافعه الهم من على قلبى ميهمهاش الحب فى حد ذاته و مفيش مشكلة مع انهاء الموقف كله بس بحسم....و بعدين تطلق رصاصة الرحمه على العلاقة كلها بنداء "حبنى بس حبنى"
                           **************************
طريق اخر اكثر التواء و صعوبه و متاعب و كثير من اللف و الدوران تاخد ام كلثوم بكلمات احمد رامى فى "حيرت قلبى معاك"

احمد رامى المحب الولهان اللى كل البشر فى المعمورة يعرفوا انه بيحب ام كلثوم يصب كل المشاعر فى كلمات اجمل ما اتغنى عن الحب من طرف واحد

بيعبر عن اهم علامات النوع المنيل ده من الحب الا و هو "التذبذب" بجملة:

"خاصمتك بيني وبين روحي.. وصالحتك وخاصمتك تاني"

فى اكثر مواقف المحب الوحيد بؤسا ، الست قاعدة مع نفسها بتقعد الصلح و الخصام ... يوم تاخد قرار بقطع خيط العلاقة البائسة دى و يوم ترجع فى قرارها لا لشئ الا اضطرابها هى فى انفصال تام عن الطرف التانى فى العلاقة اصلا

و تأمل معى رحمك و رحمنى الله احمد رامى معبرا عن ملمح تانى مهم فى النوع ده من العلاقات ... لما المحب الوحيد بيطالب الطرف التانى بالتقاط الاشارات

"وأقول ماشافشي الحيرة.. على لما با سلم؟!
ولاشافش يوم الشوق.. في عيني راح يتكلم؟! "

اغنية كتبها محب وحيد للست اللى بكل قسوة الدنيا بتغنيها فى احد اجمل الحان السنباطى ، الامر اللى بتطلب بالضرورة مستمع اكثر قسوة بياخد ده كله و يتمتع بيه ...فى حالة لم تتكرر الا فى اعجاز اخر اسماه الجميع "انت الحب "

الأربعاء، 1 أبريل 2015

الست 14

بعد الشغل رحت المقلة اشترى لب و حمص , لقيت صاحب المقلة نفسه كان مريض عندى و طبعا بعد ما قعد يشكرنى و انا اطمنت ان الدوا شغال و ان محصلش اثار جانبيه و قعدت اتحايل عليه عشان ياخد الفلوس , القصه مش هنا بقى

القصه ان الراجل كان مشغل "بعيد عنك" و انا الاغنيه دى عندى حاجه كده وضع خاص تتحط فى فترينه و تتعرض فى متحف الفن , و صحت فيا الست الاغنية دى يااه يا ست , يا سلام على الست و هى قويه لما تنزل و تفتح قلبها و تبين اللى عاده مستخبى و هى بتقول:

"عيون كانت بتحسدني على حبي .. ودلوقتي بتبكي عليا من غلبي"

و بعد ما اخدت اللب استغليت جزء فاضى من الشارع و قعدت ادندن , وقفت فى نص السكه انهج , الاغنية صعبه قوى و انا مش بنظم نفسى مع المشى بسرعه , امال الست بتغنيها كانها حاجه بسيطة

#الست