السبت، 31 أغسطس، 2013

حوليات62: أيام الفزع في الجزائر

أيام الفزع في الجزائر

أيام الفزع في الجزائر ل

 



بعيدا على اى حاجة:
المصريين كانوا بيقولوا على مصر عموما و على القاهرة خصوصا انها "مصر المحروسة" ...مصر اللى ياماااا مرت عليها بلاوى و ايام سودا و طين و غبره من بره و من جوه ...مصر اللى شافت اللى يشيب شهر الوليد لو شافه..مصر اللى شتمناها و شتمتنا و ضربتنا و ضربناها و ولعت فينا و وولعنا فيها...مصر اللى مر عليها عسكر و مماليك و و حاكمها فى يوم عبد اسود مخصى مشقوق الشفتين ...مصر فى وسط كل ده برضه محروسه

محروسه غصب عنك و غصب عنى و غصب عن عين اللى عايزين يحرقوها....مصر اللى صلاح جاهين قال عليهم فى قلب حزنه "محروسة من الانس و من الجان يا حلوة يا ام التوب الاخضر"

مصر اللى مر علينا ايام الثمانينات و التسعينات ارهاب رسمى نظمى بسلاح تقيل مش هاخاف عليها من خرطوش و مولوتوف

مش خايفه على مصر...خايفه علينا منها
*********************************
كيف ابرر ذاك التشابه الكامل بين احداث بعيدة فى الزمان و المكان و بين ما اراه بأم عينى...كيف ابرر هذا التطابق فى الطرق بين ما قرأنا عنه يوما و بين ما نعيشه يوميا

كيف ابرر تشابه احداث اضراب يونيو 1991 الشهير برابعه العدوية باستثناء انه لم يكن "العديد من الضحايا فقط" بل عدد اضخم و جرح نازف اكثر فأكثر

هو هو فقط مبدأ التاريخ يعيد نفسه...ام ابعد من ذلك و اعمق؟
 
**********************************
 هذه الأرض التي ما وعد الله بها
 من خرجوا من صلبها
وانغرسوا في تربهاوانطرحوا
وانطرحوا في حبها مستشهدين
 فادخلوها بسلام آمنين
 ادخلوها بسلام آمنين


أمل دنقل

الجمعة، 30 أغسطس، 2013

حوليات61: بينما ينام العالم


بينما ينام العالم

بينما ينام العالم ل سوزان أبو الهوى...471 صفحة..اصدار دار بلومزبري - مؤسسة قطر للنشر

********************************

بينما ينام العالم...قامت دولة اسرائيل على جثة أهل فلسطين

بينما ينام العالم...كان الشتات الاعظم بين لبنان و و مصر و تونس و اوروبا

بينما ينام العالم...كان شارون -على حين غرة- رجل السلام الاول عند بوش

بينما ينام العالم...ظل حنظلة رافضا ان يجعلنا نلمح وجهه

بينما ينام العالم...كانت غربة "أمال" بالف الممدوده اى كل الأمل
*****************************
اذكر صديقى متحدثا بغلظة و ترفع موجه لى سؤال أبدى اسمعه منذ كنت فى الثامنه من عمرى: و انتى بتستفيدى ايه لما تقرى الروايات بقى؟؟

هناك بضعه من الاعمال الادبية تساعدنى فى الاجابة لعل "بينما ينام العالم" انضمت حديثا لقائمتى القصيرة فى الاعمال الادبية الاكثر فائدة من كتب التاريخ نفسها
*****************************
لكنى فقط لم استطع الفصل بين الطنطورية و بينما ينام العالم...و لم استطع التوقف عن المقارنه بين رقية و امال...و لسبب ما بدت الطنطورية حالمة اكثر و رقية قريبة من القلب اكثر

و كان تشابه مع "عائد الى حيفا" ل غسان كنفانى عامل سلبى اولا لان اى تشابه اصلا غلط و ثانيا لانى حسيت ان فى العمليين فيهم لمحات من الافلام الهندى و اضافة اثارة رخيصة لقصه لا تحتاج سوى الا الحقيقة

ده بالاضافة ان الاستعانه المباشرة بالكتب و القصائد ضايقنى قليلا
****************************
عموما و بغض النظر عن التفاصيل التقنية..استمتعت جدا بكتاب بنكهة فلسطين

الخميس، 29 أغسطس، 2013

حوليات60:عزيزى صبرى محمد

عزيزى صبرى محمد:

ابعث اليك بخطابى هذا عبر الانترنت بعد ان فشلت فى ايجادك فى الواقع...انا و انت منعرفش بعض غير اننا احنا ال2 مشتركين فى مكتبة عامة واحدة و بنستعير الكتب منها
جدير بالذكر انى استعرت مره كتاب من المكتبة سياسى اقتصادى و فؤجئت بالمستعير السابق معلم بقلم حبر "احمر" تحت الجمل اللى عجبته او اللى شايف انها مهمه....شفت على السجل اسماء اللى استعاروه و كان شخص واحد اسمه "صبرى محمد استعاره فى 2007"

استعرت بعده رواية "الهارب" لقيت نفس الخطوط تحت بعض الجمل "بالمناسبة كانت جمل غبية لا تحمل اى عمق" ...و برضه فى السجل "صبرى محمد استعارة فى 2008"

و تكررت المأساة فى 12 كتاب...بنفس الاسم و تواريخ مختلفة

و تكمن المشكلة انك يا صديقى اللدود "صبرى محمد" ده تنطبق اختياراتك  فى الكتب مع اختيارتى بالظبط و ذوقك الادبى زيى

لكن فى كتاب مميز جدا كان اول الصفحات معلم بالقلم الحبر الاحمر و فى نص الكتاب كده ابتدت الخطوط بالقلم الاسود...و قريت بعد كده كذا كتاب متعلم بالاسود...انه الكتاب التاريخى اللى قلم الحبر المعفن ده حبره خلص

 اخبرنى بعض الاصدقاء انك قد تكون شبح او انك انا فى عالم موازى او ان الكارما جعلتنى ذلك ال"صبرى محمد" يوما قبل ان اتحول لدينا نبيل...لكنى استبعد هذا الاختيار لسبب بسيط انى عمرى ما اجرؤ انى امسك قلم  و اعلم فى كتاب للمطالعة عموما و كتاب فى مكتبة عامة خصووووصا

عزيزى صبرى محمد الذى لا اعرفه...فلتتوقف عن التخطيط فى كتب الناس او لتعطينى عنوانك لاجعلك تدفع ثمنها 

كل الحب و التحية لحضرتك
دينا نبيل

الثلاثاء، 27 أغسطس، 2013

حوليات59: عن السرسجية


  • بالمناسبه بقى: انا نفسى اعرف مين ابن الكلب اللى بعد كل كارثة بنقع فيها و يموت فيها ناس بيقعد ينقى صور الناس "النضيفة" اللى هتتوزع كمثال لشهداء الموقعه دى؟!

    من وسط كل اللى ماتوا فى جمعه الغضب اختار صورة "سالى" عشان بنت شكلها جميل و ابتسامتها تفتح القلب و حذف كل السرسجية و العمال و غلابا شبرا اللى ماتوا برصاص الامن المركزى و اشياؤه الاخرى

    و فى وسط احداث مجلس الوزراء اختار "الشيخ عماد" و "علاء عبد الهادى" الاول شيخ ازهرى يثير فينا الشجن و التانى شاب طبيب غير متحزب...و كالعادة حذف كل الوشوش التانيه و اتبلعت فى افه حارتنا

    و قيس بقى على كووووووول اللى مرينا بيه انتهاءا الى رابعه و اختيار "اسماء" ايقونة ليها

    عم صاحبتى راجل خمسينى العمر , اصلع بكرش و بدقن مات يومها فى نفس الميدان بس محدش هيشيل صوره لان محدش هيمصمص شفايفه و يقول يا عينى يا ليلى
    *************************
    و يا ترى لو مت انا شخصيا فى اى حادثة جايه "و البلاوى فى مصرنا كثر" يا ترى صورتى هتعجب ابن الكلب ده و ابقى ايقونه انا كمان؟؟ ولا مش هتعجبه صورتى و انضم للسرسجية ؟؟

حوليات58:رميا بالبلغ

اعقد المقارنة بين قيادات الاخوان المقبوض عليهم و بين زمايلى فى الكلية المقبوض عليهم:

مقارنة بسيطة بين الغلابا اللى بندور لهم على محامى و نفسنا نطلعهم قبل ما مستقبلهم يضيع ...و بين بهوات الاخوان اللى اتقبض عليه مكللا بزجاجات المياة و "عصير كابى" مزود بقطع المانجة السخيفة و ابتسامة باهته للكاميرا فى حاله "بديع" ...او فى المطار الى ايطاليا حليق اللحية ك "مراد على" ثم سارع بعدها باشارة ال4 عند التصوير...او ثانية حليق اللحية مع اسامه ياسين مبتسما بلا مبرر...او بسكسوكه دوجلاس و ملابس بدويه فى طريقه ل ليبيا و متنكرا لكل شئ "اذا صدقت التسجيل بالطبع....و اخيرااا البلتاجى بدون "شنبه" المقدس معلنا الجهاد عبر الجزيرة

الفرق ان هؤلاء ال"غلابا" لم يملكوا قط رفاهية السفر او التخفى او ان يحارب الاخريين بالنيابة عندهم

الجيل الكبير ده كله "و منهم الليبرالين و اولهم المعفن اللى اسمه ايمن نور" المفروض يعدموا رميا بالبلغ

الاثنين، 26 أغسطس، 2013

حوليات57: حوار مع دينا

التالى هو حوار داخلى بينى و بين نفسى:

-دينا 1: انا حاسه اننا ظالمنا سيد قطب
-دينا 2: اشمعنى يعنى؟
-دينا 1: احنا حكمنا على فكره من 3 كتب بس و ده غلك
-دينا 2: ما هو انا مش مطلوب منى اقرا كل ما كتب او كتب عنه
-دينا 1: تؤ بس احنا ظالمناه برضه
-دينا 2: طيب ايه رأيك ندور فى جودريدز عن كتاب اتكتب عنه؟
-دينا 1: موافقة...بصى كده الكتاب ده شكلة حلو " عملاق الفكر الإسلامي الشهيد سيد قطب" للمؤلف عبد الله عزام
-دنيا 2: اممممم انا سمعت اسم المؤلف ده قبل كده
-دينا 1: اممم و انا كمان اظن كان فى كتاب برتقانى كده من المكتبة
-دينا 2: اوعى يكون اللى فى دماغى؟؟؟ مش ده استاذ اسامه بن لادن؟؟!!!
-دينا 1: اصل...بلاش الستيرو تيب ده يا دينا 2
-دينا 2: مش ده صاحب الفيديو الشهير بتاع :نحن إرهابيون و الإرهاب فريضة ، ليعلم الغرب و الشرق اننا إرهابيون ، واننا مرعبون ... الخيل ترهبون به عدو الله وعدوكم } ، فالإرهاب فريضة في دين الله )" ؟؟؟
-دينا 1:امممممممم 
-دينا 2: انتى لسه هتفكرى؟؟ ما شاء الله بقى انا شخصيتى التانية ارهابية !!!!!....خشى بقى و ابعت لى دينا 3 احسن

السبت، 24 أغسطس، 2013

حوليات56:بنعمل معجزات

كان فى اعلان غلس كده شعاره "الستات بتعمل معجزات" كانت بقول عليه شعار مضلل...كان ايامها عندى احباط و شعور ان كونى XX فى جيناتى ده فى حد ذاته يحد من فرصى...و كونى بنت حاليا و ست فى المستقبل القريب يقوض من افاق حياتى الجايه

لكن بعد تفكير شوية قررت انى احط فى ربنا و فى نفسى أمل اكثر من كده
***********************************

طيب انا عايزة ارشح جميلة اسماعيل رئيسة جمهورية بقى..منها نفقع السلفيين عشان هى ست...و منها نفقع الاخوان عشان هى ليبرالية...و منها نفقع ايمن نور عشان هى طليقته و انه اضاع حلمه بانه يكون قرين الريسة و رجل مصر الاول ...و منها تمهد لى الطريق عشان ارشح نفسى فى المستقبل...و بكده اكون تانى رئيسة جمهورية لبلدى "بعد جميلة" 


مصر بالستات اكيد أجمل


******************************


شوفت كتير رقصة "المولوية" بشباب و عواجيز , مصريين و اتراك "قبل ما اتخنق منهم بسبب عمو اردوغان" , حتى النسخ الاكثر شعبية على طريقة ابو الغيظ المصرية...بل انى شفتها مرة فى السيرك فى الضلمة و التنورة عليها كهربا و فوسفور


لكن اول مرة اشوف رقصة شبه "المولوية" على ست...بفستان احمر و شعر اسود طويل..

 و فى نص الرقصة كده الست اندمجت جدا و انا اندمجت معاها ...و فى طرف فساتنها الاحمر سرحت و لوهله تخيلت انه شعلة نار ...و بعد ما فقت من الاندماج سألت نفسى سؤال: يا ترى هى كانت فى وقت النشوة ده بتفكر فى ايه؟؟ هل ده مجرد اداء فنى ولا وصلت للمستوى الاعلى؟؟ هل لمس قلبها السما ولا كانت مجرد حركة ارضية؟


****************************************
اممممم يمكن فعلا نقدر كل حاجة...لو كان ده جنان اتجنن

http://suchasmallaffairs.blogspot.com/2013/05/pdf_16.html
:)

حوليات55: دوامات التدين


قليلة هى تلك الكتب التى تشعر باغلاقك لغلافها انك صرت مثقف اكثر...نادر هو ذلك الكتاب الذى يحوى عصير عشرات الكتب و يجعلك كالصبى بين يدى شيخه ليفتح لك ابواب التاريخ لعلك تفهم ألغاز الحاضر المعقدة

اذا ليكون شعار الكتاب هو ببساطة: يوسف زيدان يقرأ لك
****************************
الدُّوَّامة من البحر أَو النهر : وسطه الذي تدوم عليه الأمواج بسرعة وبشدّة ، وهي مستديرة وأَعلاها متسع وأَسفلها ضيق.....و هى حركة لولبيّة لسائل ضمن منطقة محدودة خاصّة كمِّيّة من الماء أو الهواء وتبتلع كلّ ما هو قريب منها نحو المركز ...و هى قوّة مغنطيسيّة تجذب الفرد إليها بقوّة...و فلانٌ يعيش في دوَّامة : تنتابه مشكلات تسبِّب له قلقًا واضطرابًا
****************************
زمان و انا صغيرة يمكن فى سن ال11 كنت بستنى فقرة جمال بدوى على صباح الخير يا مصر و كنت باصحى الصبح مخصوص و استنى غلاسة مذيعات التليفزيون المصرى و جهلهن التام فقط لاصل الى فقرة دكتور جمال ليفتح لى كتب التاريخ و ليقرأ لى و لو مرة لاستقبل المعلومة ملخصة مجهزة ممتعه و تجهزنى انا فيما بعد للبحث بين طيات الكتب الجديدة و اجد عشرات الترشيحات للكتب التالية و ها انا فى تلك السلسلة حتى الان

و دائما يسلمك الكتاب الاول للكتاب التالى فى سلاسة و يسر....و يرجع الفضل لذلك الذى اوصى بالكتاب الاول و اطلعك على صفحات التاريخ التى لا يعلم عنها مدرس تاريخ مدارس الحكومة

حسنا لماذا اتذكر تلك المرحلة الان؟؟ ربما كل شئ او بعض الشئ او اللاشى على الاطلاق...لكن اشعر بدوامات التدين يدخلنى فى جولة جديدة من كتب التاريخ
****************************
هى مقالات مجمعه انا اعلم...و اشكر الله انى لم اقرأها مجزئة و استمتعت بيها دفعه واحدة

عموما لا اعتقد على الاطلاق انه كتاب واحد بل على الاقل 5 كتب ...و انصح به بقوة لمحبى التاريخ عموما و محبى يوسف زيدان خصوصا...لكن تذكر دائما ان الاستاذ احيانا يكون مقنع "زيادة عن اللزوم" فيجب كبح سيل الافتتان و لنحكم نحن و لو مرة...و لكنى اشكره على الاستعانه باكثر من رواية لنفس الحدث قى كثير من الاوقات

و عموما التاريخ يكتبه المنتصرون الا قليلا



يبدأ دكتور يوسف بما اسماه المزيج السكندرى البديع ...وهو ك"عزازيل" يضم مجتمع اسكندرية الممتع من عبادات الوثنية القديمة المستمده من تراثنا الفرعونى طويل الامد و تجاورها المسيحية الوليدة ...و ما يموج فى ذلك المجتمع المتوازن من تجاور ليس فقط للاديان بل و تجاوز بين العلم و الفلسفة و النهضة "ليس الفانكوش" ...فى ظل هذا التجاور نجد ان فى دستور اسكندرية الغير مكتوب ما يفوق من الحريات ما نجده فيما دونت ايدينا لتقييد حريتنا

كما نشاهد ذلك المزيج المصرى فى مسيحية مميزة عن اى دولة فى العالم...و نتتبع ذلك التدهور حين يلعن كل طرف انه الاقوى و الاكثر مما يتيح له  ليس فقط الانفراد بالرأى بل و احتكار الحق له و له فقط

و بين الافلاطونية الجديدة و مدارس فيثاغورث و الهرمسية نستمتع بالرحلة
*****************************

و فى الفصل الثانى كما يقول التقسيم الرسمى او فى الكتاب التانى كما قررت انا ان اسميه يأخذك المؤلف الى قلب اليهودية النابض

اتذكر صدمة أمى حين شاهدتنى اقلب فى "العهد القديم" الذى كنت اشتريته خصيصا...اتذكر تلك الصفرة اللى علت وجهها...كما اتذكر علو ضحكاتى على رد فعلها...لذا قررت الا اخبرها بان يوسف زيدان قد اعطى لى ملخص رائع للتلمود ربما تجنبا ليس فقط لمزيد من الصفرة فى وجهها الناضر بل لتجاوز شرح طويل بين التلمود و العهد القديم

اعتقد ان قله فعلا من قاموا بقراءة التلمود ليس فقط لندرة ترجمته بل لعدم رغبه على ما اعتقد فى فهم الاخر كما ندعى طيله الوقت...و فى هذا الفصل الشيق يلخص لك يوسف زيدان و يشرح لك اعماق هذا الكتاب الغريب على أذهاننا و يعطى لك بعض اللمحات عن اليهودية عموما و تلك العادات التى لم نفهمها قط

لكنى رأيت ايضا وسط عجب العجاب لمحات لدين عادى ينصح بالمعروف و الالتزام و حب الاخر لكن الكارثة هى ندرة تلك اللمحات على ما اعتقد...و عموما اى نص دينى يحمل دائما اشارات للتشدد و اخرى للتسامح و يقف الامر على من يقرأ و يختار
***************************


اما فى "الكتاب" الثالث البديع...فيخفف عندى يوسف زيدان قليلا ما صدمت فيه فى الحاضر و يحضر لنا دواء الماضى ليشهدنا على اننا: لسنا وحدنا

فى فصل خاص يوضح لك يوسف زيدان تاريخ "التكفير" فى التاريخ الاسلامى و العربى...عندما ترى هامات الرجال تنحنى امام عصف الحسبة لتحاسب حتى على افكارك

عندما تسمع البخارى يدعو الله "اللهم انى قد ضاقت على الارض بما رحبت فأقبضنى اليك" و تشاهد موته كمدا على من كفروه و الاذى بالباطل من دهماء الناس...و عندما ترى ان الامام "مسلم" قد لحق بيه يوما...و من قبله محنه ابن حنبل الذى اجتمع عليه فقهاء السلطان ليقضى عمره مريض مذموم من مجتمع جاهل...و لترى عجائب القدر حين يأتى تلاميذ ابن حنبل المظلوم ليقيموا ظلم اخر على شيخ جليل اخر هو الطبرى...ثم تقفز عصور لترى ماذا حاق بطه حسين عميد الادب العربى

لا نتعجب من اضطهاد نصر حامد ابو زيد...و قتل فرج فودة فى عصرنا الحديث

و لا تتعجب حين تضطهد انت نفسك من صديق يتخيل انه يقيم دعائم الاسلام
***********************

نخجل عندما نكتشف ان معلوماتنا عن "الشيعة" لا تزيد قيراط عن معلوماتنا عن اليهود...نكتفى بتكفيرهم او قراءة كتب مشايخ السنه فى الرد عن ما لم نقرأه اصلا

و يفوق جهلنا عن "الاختلافات الفقهية" جهلنا عن تاريخ الشيعة و طوائفهم الذى يمثل جزء ضخم من تاريخ مصر السنية نفسها قبل غيرها

و فى هذا القسم يفتح لى يوسف زيدان باب قديم جديد لاعيد قراءة ما اطلعت عليه فى صغر سنى....لكنى ارشح هذا الفصل بقوة لمن يجهل تاريخ هؤلاء و اقسامهم و يود كتاب يفتح له المجال ليستكشف

فى فصل شديد الامتاع نتجول بين: النيصرية و القرامطة و الاسماعيلية و الاثنى عشرية و اليزيدية و الزيدية و الفاطميين و الحشاشون و المستعلية و الحافظية و النزاريون و الدورز
************************


و يختم يوسف زيدان دوامته بثلاث فصول متتالية عن التصوف و الصوفية او أهل الحب كما ان احب ان ادعوهم...و فيه يروى شذرات عن ذلك العالم الذى يفوق ذهنى بالتأكيد و يحكى لك عن احوال اهل الحب من المشهورين و كتبهم و هو شرح و تكثيف لحلقات "الاولياء" الذى انبهرت به رمضان السابق

و يمد الخط على استقامته ليضم لاهل الحب من يرسم و من عبر بحبه فى الكلمات و من حارب من أجل القضية و من ذاب فى عشق بلا سبب

و هو جزء من كثرة تأثرى به فشلت فى كتابه حرف واحد عنه...فليعذرنى القارئ
**********************
عموما دوامات التدين كتاب ابهرنى و جاء فى موعده الصحيح بلا ادنى شك

و بعد قراءتى له بى دى اف قررت ان اشترى النسخة الورقية لاعود اليه مجددا بالتأكيد
</B>

للتحميل بأكثر من لينك
http://suchasmallaffairs.blogspot.com/2013/05/pdf_16.html
:)

الخميس، 22 أغسطس، 2013

حوليات54:حوارات فى زمن الحظر

ماما: عارفه الكشك اللى فى اخر الشارع؟

أنا  : انهى واحد؟

ماما: اللى بابا بيشترى منه السجاير السوبر

أنا  : اااه الراجل الغلس ده؟؟...ماله؟

ماما: عمو "فلان" اشترى من عنده سلاح

أنا  : نعم يا اختى؟؟؟

ماما: اختى ايه؟ ما تحترمى نفسك


أنا  : مش وقته...بتقولى سلاح؟؟ سلاح ازاى يعنى؟

ماما: اكتشف انه هو مصدر السلاح فى المنطقة اى حد عايز يشترى سلاح بيجبوهلوا خرطوش بقى او ميرى زى ما انت عايز و بيقولوا اسعاره كويسه

أنا  : !!!!! ما شاء الله...و ده تبع مين بقى؟

ماما: اللى وصل لى انه بيدى سلاح للى عايز ملوش دعوه بالاتجاهات السياسيه و لما عمك سألوا قال له انه "اعرابى بدوى" ملوش دعوه بحاجه

أنا: طيب ما تنسيش تجيب لنا لما تنزلى 4 بيضات و فرد خرطوش و انتى راجعه !!!



-أنا: مش انا شفت "كافر" للايباد على صورة السيسى زى بتاع صور ميسى كده

-ماما: تعرفى طنط فلانه؟

-أنا: اه مالها؟

-ماما: يوم العيد جم اخواتها ال3 و مراتتهم و عيالهم و كانوا اخوان لقوها حطاها صورة السيسى على الباب اتخانقوا معاها

-أنا: اتخنقوا معاها ازاى يعنى؟ و فى العيد؟

-ماما: اه كانوا عايزين يشيلوا الصورة من على بابها راحت قالت لهم اللى مش عجبه الصورة يروح انا يا اما رحت عندكم و صورة مرسى فى الاوضه و ما اتكلمتش...شتموها و قالوا عليها هى و عيالها كفار

-انا: يا لهوى...و فى الاخر روحوا و مدخلوش؟

-ماما: اه و حياتك اتخنقوا و روحوا من غير ما يدخلوا البيت حتى...مع انها حافظة قرآن و لابسه خمار لحد ركبتها

- أنا : يلا دعى الخلق للخالق :D

حوليات53:يسقط الانيكلاب

تكررت مسيرة الاخوان النسائية عندنا فى شبرا الخيمة "حوالى 40 ست كدة" بهتافات: يسقط يسقط الانيكلاب..و صور مووسى و "اى حاجة و الشرعية" و الحوار الهابط بتاع كل مرة...و طبعا كان بعد صلاة العشا و غالبا طالعين من جامع
عادة بيروحوا لاول الشارع, شوية كده و يرجعوا فى الاتجاة العكسى , و بعدين يروحوا تانى و بعدين يرجعوا تالت و هكذا عشان يحسسوك انهم كتير و بتاع

فى اليوم التالت راحت المسيرة و قعدت فى الشباك مستنيه عودة المسيرة طبقا لنظرية المسيرة الدوارة اللى بيستخدموها الاخوات من فتره...و استنيت استنيت و المسيرة ما رجعش

أنا: هو مسيرة الاخوات راحت فين؟
ماما: دخلت المساكن
أنا: يا لهوى..دخلوا المساكن!!
ماما: اه
أنا: ده الحته دى فيها كل اسبوع قتيل يلا ربنا يستر..هو معاهم رجاله؟
ماما: معاهم نائب الاخوان فى البرلمان القديم
أنا: كده ربنا يستر فعلا
*****************************
و بعدها بيومين
*****************************
ماما: عرفتى اللى حصل فى مسيرة الاخوان؟
أنا: لا هو ايه اللى حصل انا مشفهمش طلعوا من المساكن
ماما: السكان هناك اتخنقوا منهم فنزلوا ستات البيوت بتوعهم و اول ما الاخوان جم بهدولهم فى الشارع و شبعوا فيهم شتيمة و اللى كانت بترد بتضرب
انا: يا لهوى كل ده؟؟ طب و الراجل اللى كان معاهم؟
ماما: جرى طبعا
 
 

الأربعاء، 21 أغسطس، 2013

حوليات52:تاكسى المخابرات

الاحداث تجرى فى تاكسى من شبرا الى شبرا برضه "بس حته بعيدة منها P: " .....الخلفية: اغنية الراديو لمنير و انوشكا "ده انتى بلاد طيية" 


-سواق التاكسى: ما احنا مع بعض و زى الفل اهو ...شعب قدام جماعه هو فى اتحاد احلى من كده

-ماما: !!!!


-سواق التاكسى: عارفة يا مدام انا كنت قاعد مع حد من كبارات الاخوان دول قوى...حد من مكتب الارشاد نفسه


-ماما: بقى من مكتب الارشاد نفسه؟!!

 
-سواق التاكسى: اه زى ما بقول لك كده...عملت معاه زى ما السيسى قال لنا لما قال عقلوا جيرانكو ...قلت له كده مينفعش لموا الدور و خافوا عالبلد ...و جه عيل اخوان كده يتدخل قلت له انا بكلم الراجل الكبير مش انت يا كابتن...انتى عارفه الراجل ده اخوه بقى كان حزب وطنى عتيق ...بيقول لى ده حسنى كان بيجى ب5 الالف صوت..رديت عليه قلت له ما هو انتوا خليتوا ال5 الالف صوت دول 70 مليون
-ماما: تقصد رجعوا حببوا الناس فى مبارك؟


-سواق التاكسى: لا...اقصد ان اخوه كان بيزور الاصوات فى الانتخابات...انا كنت بنزل اقول لحسنى لا و الاقيهم ملوا الصناديق له


-ماما : "فى محاولة لاسكاته" بكره تروق و تحلى


-سواق التاكسى: "فى عناد" ما هى رايقه و حلوة اهى

***************************
هنا نستنتج ان ان تقريبا كل سواقين التاكسى مخابرات او عندهم قدر هااااائل من الهرى

الثلاثاء، 20 أغسطس، 2013

حوليات51:ضهرهم للرصاص

و أول ما سمعت ان 25 اتقتلوا سألت سؤال: كام واحد اتصاب؟؟ ايه 3 بس اللى اتصابوا؟؟؟ يبقى كان اعدام جماعى مش اشتباك ...حسبى الله "مش هاحط الصور طبعا اولا لان قلبى ضعيف ثانيا لحرمة الموت"

 قتلتوا ال25 غلبان فى الصحرا لوحدهم؟؟...خلاص الاسلام تم له النصر ولا لسه؟...و خلصتوا على 36 غلبان فى السجن عزل؟....خلاص الوطنية انتصرت ولا لسه؟

 ربما يجب ان نفهم الان العلاقة بين جماعات سينا و الاخوان...فاما ان تتبرئ الاخوان منهم نهائيا لاغلاق هذا الباب للابد او يستمر الصمت الاخوان ليتحملوا تبعات اللى هيحصل و سيكون مروع...الشعب ميقدرش يطول "جماعات سينا" من رقبتهم لكن يقدروا "يستقووا" جدا على الاخوان القاهريين...و مثله قوات الشرطة

من الاخر اخاف على الاخوان العاديين من عمليات انتقامية منهم نتيجة لتصريح البلتاجى الاهبل -و هنا اقصد الشخص و التصريح- اللى لبس نفسه و جماعته كارثة لا يستطيع حملها ..و تبريرات "الداخلية هى اللى قتلت جنودها" مش هتنفع حد ساعتها

*********************
 سيبك انت احنا بلد مجانين: الشعب اللى مازال مصرا ان الداخليه اللى قتلت ال25 غلبان اللى راحوا فى سينا عزل من غير سلاح, و ان الجيش هو اللى قتل غلابا رفح اللى اتقتلوا و هما بيشقوا صيامهم , و ان المسحيين هما اللى ولعوا فى الكنايس, و ان الحكومه هى اللى ضربت نار على الاقسام و اقتحموا المحافظات , و ان الاخوان هما اللى ضربوا نفسهم عند المنصه و رابعه و الحرس الجمهورى...كلكم توفيق عكاشة مهما حاولتوا تنفوا ده

 و فى الاخر  فهمت.. ليه الاخوان شغالين على نغمة "الجيش هو اللى قتل "غلابا" رفح" دى جت من فوق...من اونكل بلتاجى شخصيا..البلتاجى مكس لكل حاجه و العكس:

-الضرب اللى فى سينا يخلص لو مرسى رجع
-الجيش هو اللى قتل ولاده




 الحقيقة ان الحيوان اللى بيقول ان الجنود قتلهم الجيش ...ميقلش وساخة عن الحيوان اللى قال ان الاخوان بيضربوا بعض فى الضهر يوم الحرس الجمهورى...و لا يقل الاتنين نجاسه عن الحمار اللى قال ان المسحيين هما اللى ولعوا فى الكنايس #‏كفاية_بقر_بقى

 يااااااااااااااااااااااااااااااااااااه عالدم اللى شربته ترابك يا سينا !

الأحد، 18 أغسطس، 2013

حوليات50: استفتاء او لا استفتاء؟

و يقف هاملت محملقا فى جمجمة الهيكل العظمى هاتفا بكل روحه: أكون او لا أكون؟ هذه هى المشكلة

فى مصر بقى يقف الملايين: مرسى او لا مرسى...و ملايين اخرى: سيسى او لا سيسى...و تقف بضعه ناس تهلل: الاستفتاء هو الحل

و اليوم ارد على الطرف التالت كما يقولون على انفسهم:

اولا: محدش بيعمل استفتاء على ثورة ...و لو كنت عملت استفتاء على تنحى حسنى يوم 30 يناير كان الشعب -حتى بالانتخابات حرة- قال لا عايزين حسنى

ثانيا: لو انه انقلاب...محدش بيعمل استفتاء على انقلاب يا خفيف...يعنى لو الاستفتاء طلع "لا" يبقى مرسى يرجع و بالنوسبه لاونكل سيسى هيتعمل فيه ايه؟؟ ما هو لو مرسى رجع يبقى السيسى عمل انكلاب و دى فيها اعدام يا حبيبى...حد يعمل استفتاء على انه يتعدم او لا !!

ثالثا: زى ما قلت فى بوست امبارح مينفعش اى اجراء ديموقراطى "سواء استفتاء او انتخابات" و وضع المساجد على حاله الحالى...كان هيتقلب نعم ولا لا للدين و هندخل فى 19 مارس جديد
 ***************************************
هتقول لى طب نعمل ايه؟ هاقول لك هو انا لو اعرف كان زمان حالى كده؟ :D

السبت، 17 أغسطس، 2013

حوليات49:الكنبة زهقت

حديثى النهاردة عن حزب الكنبة...الاغلبية اللى مش دايما صامتة...عن الناس اللى ليهم طينة خاصه جدا مش ناس كتير بتفهمها
 **************************
المشكلة مببقتش الجيش بس..المشكلة فى الاهالى كمان...احنا ايام مظاهرات العسكر كنا بنخرج بالمظاهرة "سيلنت" صامته لحد ما نخرج من العباسيه لان اهلها كانوا بيضربوا بجد

كل المناطق تحولت زى العباسيه...و محدش عنده استعداد يتعمل فى منطقته اعتصام زى رابعه ...و لان اهل مدينه نصر كانوا كيوت و ولاد ناس منطقتهم اتبهدلت 6 اسابيع مكنوش بيعرفوا يفتحوا شباك حتى...محدش عنده استعداد يقعدهم عنده

و راجع سيناريو "الف مسكن"...و عاده "المواطنين الشرفاء" دول مش سلميين خالص
*************************************** 
 بص الجزء ده لتوضيح وجه نظر :
عشان تفهم ليه الناس كانت عندها "غل" قدام جامع الفتح كده...ممكن جدا يكون منهم بلطجيه او عساكر لابسه مدنى لكن كتير منهم اهالى مهما حاولنا رفض كده

فاكرين الست المنتقبه اللى لما خرجت من الجامع "فى حمى الجيش" الناس اتلمت عليها و كانوا هيضربوها؟؟ انا كان رد فعلى الاول : ايه الهمجية دى!! اه يا شعب ولاد تيت و كده يعنى

لكن فؤجئت بأمى "و هى عادة شخص مهذب" بتزعق بأقذع الشتايم فى حق الست دى ...طبعا انا صعقت

لكن فى التبرير تفسير: الست دى كانت طول الليل على الجزيرة بتدعى علي الشعب المصرى و قال بشبه النص "انتوا قاعدين فى بيوتكوا بتاكلوا و تخلفوا و سايبنا هنا ندافع عن الدين" و لما امى تفضل تتفرج على الست دى طول الليل و هى بتشتم فيها طبيعى يكون ده رد فعلها لما تشوفها متحاميه فى الجيش اللى شبعت شتيمة فيه طول الليل

و ده ببساطة نموذج مصغر لطريقه خطاب "منصة رابعه" لو تذكرون

الجمعة، 16 أغسطس، 2013

حوليات48: السعودية

"ليعلم كل من تدخل في شؤونها الداخلية (مصر) بأنهم بذلك يوقدون نار الفتنة، ويؤيدون الإرهاب الذي يدعون محاربته، آملاً منهم أن يعودوا إلى رشدهم قبل فوات الأوان.. فمصر الإسلام، والعروبة، والتاريخ المجيد، لن يغيرها قول أو موقف هذا أو ذاك...مصر قادرة على العبور إلى بر الأمان"

العاهل السعودى فى خطابه عن مصر
************************
تاريخيا كانت دايما العلاقة بين السعوديه و الاخوان حرب باردة ....النهاردة يوم تاريخى لانه و لاول مره 16 أغسطس 2013 تتحول الى حرب واضحة المعالم فعلا

لما تلاقى السعودية "اللى دولة تقريبا ثيوقراطية اصلا" و مانعين السواقة للحريم بيتخانقوا مع الاخوان حامى حماه الاسلام....تعرف ان الاسلام اصلا ملوش دعوه بالاتنين


اللذيذ كمان ان موقف السلفيين مال على موقف السعودية على طول و ابتدينا نسمع كلام عن "المصالحة الاسلامية" و ضرورة الدفاع عن الجيش و ووحدته من عمو البراهمى و اناكل السلفيين نفر نفر

معاك انها حاجه جيدة ان الدول العربية عامل دعم لوجستى لمصر فى مواجهه استقواء الاخوان بالخارج و بمجلس الامن بشكل مقزز و مقرف جداا اظن حتى للاسلاميين نفسهم...سيبك انت كون الاخوان بيستنجدوا بالشيطان الاعظم شئ مضحك و مسخرة فى حد ذاته 

بس السعودية دولة ظالمة و باطشة برضه و مش من الدول اللى كنت احبها تأيدنا فى حاجة

يلا ربنا يستر


حوليات47:المحروسة

 بعيدا على اى حاجة:
المصريين كانوا بيقولوا على مصر عموما و على القاهرة خصوصا انها "مصر المحروسة" ...مصر اللى ياماااا مرت عليها بلاوى و ايام سودا و طين و غبره من بره و من جوه ...مصر اللى شافت اللى يشيب شهر الوليد لو شافه..مصر اللى شتمناها و شتمتنا و ضربتنا و ضربناها و ولعت فينا و وولعنا فيها...مصر اللى مر عليها عسكر و مماليك و و حاكمها فى يوم عبد اسود مخصى مشقوق الشفتين ...مصر فى وسط كل ده برضه محروسه

محروسه غصب عنك و غصب عنى و غصب عن عين اللى عايزين يحرقوها....مصر اللى صلاح جاهين قال عليهم فى قلب حزنه "محروسة من الانس و من الجان يا حلوة يا ام التوب الاخضر"

مصر اللى مر علينا ايام الثمانينات و التسعينات ارهاب رسمى نظمى بسلاح تقيل مش هاخاف عليها من خرطوش و مولوتوف

مش خايفه على مصر...خايفه علينا منها
*******************************

اللى بنى مصر كان حلوانى يا ولداه حلوانى
اسمه على بوابتها لا زال و لا زايل
ساعة الهوايل يقوم قايل
يابلداه
و ييجى شايل
هيلا هوب شايل .. حمولها و يعدل المايل
و عشان كده مصر يا ولاد حلوة الحلوات


سيد حجاب

*********************************
 من يقول عن مصر انها أمة كافرة ؟ إذا فمن المسلمون ؟
مصر التي صدرت علم الاسلام الى الدنيا كلها
 صدرته حتي الى البلد الذي نزل فيه الاسلام
هي التى صدرت لعلماء الدنيا كلها علم الاسلام 

 أنقول عنها ذلك ؟
ذلك هو تحقيق العلم فى أزهرها الشريف .
واما دفاعا عن الاسلام فانظروا الى التاريخ
من الذي رد همجية التتار عنه ؟
انها مصر وستظل مصر دائما رغم انف كل حاقد
أو مستغل أو مُستغل أو مدفوع من خصوم الاسلام
هنا او خارج هنا .. إنها مصر ستظل دائما


الشيخ الشعراوى




 

الخميس، 15 أغسطس، 2013

حوليات46: البوب

موقفى من البرادعى كان دايما متأرجح -انا شخص بيغير رأيه كتير للاسف- لكن عموما كان دايما بيمثل لى أمل نضيف لبكرة

يوم ما انسحب من الانتخابات حزنت جدا و فقدت الامل فى رئيس محترم...و عموما تحققت النبوءة و جالنا احد اسوء الاشخاض اللى اتوجدوا على ظهر البسيطة اصلا سى موورسى "يلا الله يرحمه" ...و يومها كتبت مقال "مع انسحاب البرادعى" 

"مع انسحاب البرادعى اصبح من المؤكد ان الرئيس القادم لن يمثل الثوره, مع انسحاب البرادعى اصبح الواضح ان الاسلاميين لن يكتفوا بالمجلس و الحكومه و تتعالى الامال فى منصب الرئيس, مع انسحاب البرادعى قد يطمع السلفيين فى "الامامه العظمى" و قد تفاجئ بابو اسماعيل يفتتح الجلسه ....مش بعيد تصبح قناه الناس هى القناه الرسميه للدوله, مع انسحاب البرادعى يجد شباب الثوره "ضهرهم للحيط" من برلمان اسلامى ...و وزاره جنزوريه ...و رئيس بيعتبرهم اما مخربين او مارقين"

http://suchasmallaffairs.blogspot.com/2012/01/blog-post_14.html
***************************************
الكلام ده كان يوم 14 يناير 2013...و مكنتش اتخيل انى هارجع اكتب مقال مشابه تماما فى 15 اغسطس 2013 !!!

يبدو ان جملة صديقتى الخالدة تتحقق على الارض "آفة البرادعى الانسحاب"....بحاول افسر

 هل لانه راجل نضيف زيادة عن اللزوم و السياسة نجاسة؟
لان لانها "طرى" و مش هيعرف يمسك منصب سياسى ابدا؟
لانه بيحلم بيوتوبيا و احنا فى اوسخ ديستوبيا فى المنطقة؟
هل لو مكنش استقال دلوقتى كان هيتلكك و يستقيل على اى حاجة تانية؟
هل هو باختصار كده راجل "أماص"؟؟
هل لانه بيتخنق بسرعه و مش بيحب النقد؟
هل احنا بلد قذرة و منستلهش حد زيه؟
هل لانه شبه ابو تريكه لما انسحب من ماتش السوبر؟

بس مننساش ابو تريكة لما انسحب من ماتش السوبر عشان "صعب عليه اهالى الشهداء" الفرقه كرفته و الجمهور اتفقع منه , اه الالتراس رحبوا بيه و عملوه بطل ...بس متنساش ان الاهلى لعب من غيره و كسب برضه...و اذا كان الاهلى مش بيقف على لاعيب  لانه عنده 35 فمصر مش هتقف على حد لان عندها 20 مليون نختار منهم

كان نفسى تكمل معانا و تبقى ضمان لينا...كان نفسى الحمائم تنتصر -ولو لمرة على سبيل التغيير- على الصقور
***************************
 اخدت فرصتك , حاولت و ليك اجرك....روح و ربنا معاك و معانا

 بس متنساش يا اوكل برادعى انهم ادوك وقت للتفاوض و فتحت البلد للرايح و الجاى من بلاد كنا بنقرف نسلم عليهم حتى و حطيت انا جزمه فى بقى و قلت ., و ماله هو بيفهم و ماله لما نضحى بشوية كرامة مقابل ان محدش يموت , و ماله لما نستعين بوسطاء من بره الصلح خير تيجوا نتصالح.....و المساعى دى فشلت اى كانت الاسباب

محدش يشتم "البوب" انا كنت عارفه انه هيعمل الخطوة دى مع انى مش موافقه عليها ..و متخلوش "الزبالة" تشتمت فيه و اولهم مصطفى بكرى و الشلة بتاعته....سبوه فى حاله و ربنا معاه و معانا

 متشتموش البرادعى ...ادعوا له و ادعوا لنا

محدش يشتم "البوب" انا كنت عارفه انه هيعمل الخطوة دى مع انى مش موافقه عليها ...سبوه فى حاله و ربنا معاه و معانا


عزيزى البوب ارحل "مأسوف" عليك


الأربعاء، 14 أغسطس، 2013

حوليات45: 14 أغسطس الشهير

النهاردة 14 اغسطس ....يوم اصبح -فجأة- مهم ...النهاردة اتفض اعتصام رابعه و النهضة بعد اسابيع طويله من الترقب...و عشان النهاردة يوم مهم قررت ادون كل ملاحظاتى على طول النهار للذكرى يمكن نضطر نرجع لها:

انا فى حاجه مش فاهماها بجد "كحد كنباوى بحت النهاردة":
الاخوان اتقتل و اتصاب ليهم عشرات "و يمكن جاوز المئة" النهاردة ...و مع ذلك تلاقيهم بيلفقوا اخبار عن موت اخريين زى الخبر المضروب بتاع بنت خيرت

هو يعنى كل الشباب اللى ماتوا دول مش كفايه!!

***************************************
 مسيرة عسولة زغنطوطه كده يجى 30 واحد ماشيين تحت بيتنا ماشاء الله كلهم دقون و نقاب "مع الاحترام للكل طبعا" ...شغالين بقى "اسلامية اسلامية رغم انف الليبراليه"  يااااااه يا عبد الصمد اخيرا الاسلام وصل شبرا الخيمة ..و النبى انتوا منطقة عسلية

و بعدها بشوية كده طلع شيخ الجامع اللى جنبنا يدعى على اهل المنطقة تانى :D
**************************************
بطريقة فنية بحته اعتقد ان الصورة دى صورة اليوم

****************************************************
 و تفائلت الصبح بفض اعتصام النهضة "بشئ من الهدوء" و منظر الجرافات و هى بتشيل الخيم و تنضف كان حاجة...و العك اللى حصل فى رابعه ده حاجة

كنا اكتفينا بالنهضة النهاردة افضل:/

 ***************************************************
 عايز اعلام حيادى؟؟ اعمل الخلطة اللى انا بستخدمها:

-اتفرج على الجزيرة مباشر و اقسم اللى شفته على 4

-اتفرج على اون تى فى و اضرب اللى شفته فى 2

-اتفرج على التلفزيون المصرى و اضرب فى 4

-و اتفرج على سى ان ان بس قعد معاك مترجم

**********************************
 هييييييييييييييييه الطوارئ جت...."و ها انا افعل استايل"....السؤال بقى: هيبقى طوارئ بجد ؟ ولا زى بتاع كل مرة؟....و من موقعى هذا احى عدلى منصور على انه فرض الطوارئ فى بيان على طول من غير خطاب من عينه "و ها انا افعل" و وفر علينا الصداع...و عموما الطوارئ مذكور فى القرآن و ارجع لتصريحات وزير العدل فى عهد اونكل مرسى :D
********************************
 و النبى يا شباب لو مت فى اى عك من اللى بيحصل فى البلد -و هم كثر- لا حد يقعد يشير بوستاتى القديمة ولا تقعدوا فى الوول تنقوا الصور الحلوة مش بحب الجو المبتذل ده ...لو مت سبونى اموت فى هدووووء
 *****************************
 و الرغم من كل الدم اللى سال اللى اغلى من كل ورق الدنيا...و على الرغم من انى كنت بتريق على الاخوان لما قالوا ان المجمع العلمى اهم من ضحايا مجلس الوزراء...و على الرغم من انى حاسه انه حاليا شبه بديع فى "ما ذنب النباتات"

لكن ما اقدرش انكر ان قلبى "اترعش" لما عرفت ان فى ضرب و محاولات اختراق لمكتبة اسكندرية #غصب عنى

*****************************
 
الشعب المصرى خاصه اصدقاء الكنبة حياتهم تتلخص فى التلفزيون...الناس اللى نزلت بالملايين دى فى 30 يونيو و جمعه التفويض -و لو مش شايف انهم ملايين تبقى اخوان رسمى او عينيك بتوجعك - نزلوا لانهم وصلوا لمرحلة فقع حقيقية من غطرسة الاخوان الاعلامية

زهقوا من القعدة الشهيرة للتوك شو بوجود واحد اخوان و واحد مش اخوان و صديقنا التانى يشرح و يتكلم و يولول بينما يجلس الاخوانى -اللى كان فى مرحلة حلمى الجزار و فى مرحلة اخرى البلتاجى نفسه- و هو مبتسم ابتسامة صفراااا يعلمها المصريين تماما لانهم ببساطة شبعوا منها ايام احمد عز

زهقوا من "الأنعرة" و السماجة و الرخامه و التخوين و التكفير و الجبنه النستو يا معفنين و "التوبس" اللى فى الخيم و خطابات مرسى السخيفه و دعاء صفوت حجازى علينا ليل نهار
 

 و بعد نجاح المظاهرات -لو شايفاها انقلاب تبقى مش لازم اخوان عادى ممكن تكون بشرطة- فرح المصريين بالتخلص من كل ده

ثم فوجئ المصريين بدويله صغيرة مذاعه على الهوا ليل و نهار بنفس الوجوه و نفس النمط و "و نفس الاغانى" و نفس ذات الدعاء علينا ليل و نهار

و صدقنى المصريين عندهم استعداد يبقى دمويين جداا فى لحظات كتلك...و ممكن يغض النظر عن اى دم او تجاوزات انسانيه فى مقابل ان محدش يدعى عليه ليل و نهار ...و لما بيلوح لهم ب"ضياع البلد" و ان كان مزعوم فيدق جرس ما فى نفس المصرى تجعله يتقبل ما لا نتخيل
0 التعليقات

الثلاثاء، 13 أغسطس، 2013

حوليات44:يسقط الرئيس القادم

نصيحتى للريس الجاى:

-قلل خطاباتك خااالص عشان محدش يتريق عليك "خاصه باسم" ولا اقول لك؟؟ بلاش خطابات خالص احسن عموما اونكل مرسى خطب له و للزمن

-قلل قراراتك خالص و سمع كلام موظف قدييم "اشتغل كتير تغلط كتير , اشتغل قليل تغلط قليل" ...ولا اقول لك بلاش قرارات خالص احسن لك بلا وجع دماغ يا راجل

-اوعى تستجيب لمطالب الفئويات كتير لاحسن تفتح على روحك و على البلد فتوحه..و اوعى برضه ما تسجبش لانك هتتشتم لما تشبع و هتولع البلد....اقول لك حاول ما يطلعش ضدك فئويات خالص احسن

-فى الانتخابات بلاش وعود اووفر و خطه 100 يوم و بتاع لانك مش هتعمل منها حاجه و شكلك هيبقى وحش قوووى يا كابتشن

-اوعى ترشح نفسك قدام اخوان او فلول لان الاتنين لسانهم طوويل و فلوسهم كتير و هيزهقوك فى عيشتك و مش بعيد يلبسوك انك سبب سقوط الاندلس

-عايز نصيحة اخت ؟؟ بلاش تترشح احسن و حافظ على كرامتك
 
0 التعليقات

الاثنين، 12 أغسطس، 2013

حوليات43:أسئلة اعتلاها التراب تانى

بعد الثورة ب7 شهور كده كتبت مقال كان اسمه أسئلة اعتلاها التراب كنت بتكلم فيه عن المواضيع اللى كان مهمه قووووى و فجأة اختفت من غير مقدمات...

و النهاردة و بعد المقال ده بسنتين نشأت لنا اسئلة جديدة اتنست كالعادة...و لانى عارفه ان كله بيروح و يبقى وجه ربك ذو الجلال و الاكرام فقررت كنوع من التخليد -و زى الفراعنه ما كانوا بنقشوا فى الحجر- انى ادون الاسئلة الجديدة يمكن افه حارتنا ما توصلش لها...بس المرة دى قررت احط لها اجابات محتملة و نعتبره امتحان و ماله؟

- فين استمارات تجرد؟
(عند عاصم عبد الماجد - موجودين بالحفظ و الصون - هنعملهم قراطيس لب - تعالى و انا اقول لك فين)

- فين الفلوس اللي لمها حسان ؟ 
(يعنى هى فلوس خيرى رمضان فين؟ - راحت فى اعتصام رابعه - تعالى و انا اقول لك فين)

- أين البرلمان؟
(اسألوا عصام العريان - عاملين الجلسه عالقهوه - تعالى و انا اقول لك فين)

- القرداتى لما القرد بيموت بيشتغل ايه؟
( بيشتغل مرشد - بيشتعل ريس -بيطلع على الcnn  - تعالى و انا اقول لك ايه )

ما ذنب النباتات ؟
(زى ذنب حديقة الاورمان بالظبط - مالهاش ذنب يا عينى - تعالى و انا اقول لم ما )

2 التعليقات

الأحد، 11 أغسطس، 2013

حوليات42:الازازة فى الثقب

ماما : الازازة اللى كنت بشرب منها اختفت يا دينا

أنا : تلاقيها وقعت فى ثقب اسود ولا حاجة

ماما : ازاى يعنى؟

أنا : بصى يا ستى اينشتاين قال ان فى حاجة اسمها "الثقب الاسود" لما حاجة تقع فيها بتنقل لبعد تانى

ماما : يا بت قومى دورى على الازازة و بلاش فذلكة

أنا : بقولك راحت فى الثقب الاسود مش عاجبك خلى اينشتاين يدور لك عليها

ماما : انتى كسلانه تقومى ...يا بت فكى رجليكى و شوفيها يمكن وقعت تحت الكنبة

أنا : امال انتى فاكرة فرد الشربات و غطيان الازايز دى بتروح فين و عمرنا ما بنلاقيها ما هى بتقع فى الخرم ده بقى و تتنقل لزمن تانى او مكان تانى

ماما : تلاقيهم واقعين ورا الغسالة بس انتى اللى مكسلة تبصى بس
#‏ماما_و_أنا_و_اينشتاين

السبت، 10 أغسطس، 2013

حوليات41: على قد نيتنا

الزمان: 2007 
موقع الاحداث: قدام مكتبى و انا بذاكر ثانوية عامة

انا : "منهمكة فى المذاكرة" و النبى ادعى لى يا ماما

ماما : يا رب يديكى على قد تعبك يا دينا 

انا : "فى انفعال" نعم؟؟؟ طب ما ربنا بيدى كل الناس على قد تعبهم امال انتى فين تعبك كأم بتدعى؟ مش لازم استغلك يعنى؟ يعنى انت ام و دعوتك مستجابه باى حاجة هتقوليها فيبقى هو ده طموحك فى الدعا؟

ماما : امال عايزة تجبى مجموع من غير ما تذاكرى؟

انا : زى ما طنط ياسمين الخيام بتغنى "يا رب كتر افراحنا و على قد نيتنا ادينا" عشان كده حالنا دايما طين لان نيتنا عموما مش كويسة

 

الجمعة، 9 أغسطس، 2013

حوليات40: أغانى أغانى

و فى خضم اللخبطة اللى احنا فيها دى بلاقى نفسى بفكر فى حاجات ملهاش اى 30 لازمة ...بس و لسبب ما انا النهاردة طول النهار بغنى اغانى وطنية

*************************************
انا لسه عيله جدا و مشاعرى بتتأثر لما بغنى اغنية محمد ثروث اللى بالمناسبه مش بحب اى اغانى تانيه له

 "هي صورة ماضينا, هي  الحاضر لينا,هي الباقية بعدينا,هي هي هي هي مصر هي"

 بكلمات عبد الوهاب محمد و الحان العبقرى محمد عبد الوهاب لسه الاغنية دى بتصحى حاجة "ما اعرفش ايه هى" كل ما بسمعها...احساس غريب و غير واقعى على الاطلاق بالفخر بالبلد دى اللى عذبتنا معاها وطلعت عين اللى جابونا...

لسه كلمات زى " امة واحدة شعب واحد, همة واحدة قلب واحد, كلمة واحدة رب واحد, قلب واحد, شعب واحد رب واحد, يحميكي يا مصر" لسه و على الرغم من ان كلمة ايد واحدة دى لبستنا فى الحيط بدل المرة 1000 لكن لسه بتلمس جوايا وتر ...لسه بسمع لحن عبد الوهاب بيحسسنى انى فى موكب فخر مش مجرد بلد عالم تالت مسنود اقتصاديا من الخليج و سياسيا من امريكا , مش مجرد بلد متخبط فى لخبطة العسكر و الاخوان و المصلجية و بتوع اللمون , بحس لسه ان لسبب ما فى أمل
************************************
و برضه فى الحان محمد عبد الوهاب لسه بسمع كلمات اوبريت صوت الجماهير

" فى تاريخ كل نضال
على مر الاجيال
يبتدى من همسات بترج آهات الظلم فى كل ضمير
وانتصرت خطوات
وانطلقت صيحات
تفضل تكبر تفضل تعلا لحد ما تبقى صوت الجماهير
صوت الجماهير صوت الجماهير"


لسه بعتبر الكلمات دى افيد و اهم من اى كتاب مصطلحات سياسية , مش مهم الاسم بقى انكيلاب ولا ثورة ولا انتفاضة ولا هوجه ...المهم انها همسات واطية لناس مظلومة و مخنوقة و خايفه و دايما محدش بيتخيل ان الهمهمات دى بتتحول لصيحات تطيح باللى كان فاكر نفسه اله يعبد من دون الله

على الرغم من كل التجارب السياسية اللى مرينا بيها فى ال3 سنين دول و احنا اخدنا كورس مكثف قوووووى بصراحة و على الرغم من كل كتب السياسة اللى قريتها الا ان نموذج "صوت الجماهير" يظل الاهم و الاكثر تعبيرا عن مصر و جيران عانوا زينا و يمكن اكتر 
***************************
كلمات صلاح جاهين و لحن كمال الطويل و صوت عبد الحليم بيغنى فى صدق غريب احترت فى كونه نفاق ام حب منطلق من قلب متحمس؟
 
 "فى صلاة العيد
 عيد الثورة واناجيك يارب
اللهم انصر بلدى وايدها
سدد خطوتها وخد ايدها
يارب اجعلنا نحقق كل خيال
اجعل يومنا الواحد بكفاح أجيال
فجّر ينابيع الخير تحت اقدامنا
المستقبل خليه نور قدامنا
اللهم انظر لعملنا
بارك فى جهادنا ونضالنا"

و على الرغم من كم الضحك و التريقة اللى فضلت فترة اغيظ بيها امى و انا بطنطط و اقول لها "و بالصلاة عالنبى كده صلاة عيد الثورة دى كام ركعه؟؟" او الرخامه اللى كنت برخم بيها على بابا ان "بالاحضان" دى اصلا اغنية تلميع و نفاق فى عبد الناصر مش اكتر

الا انى لسه بسمع و لا شعوريا بلاقى نفسى بردد ورا عبد الحليم "أمين" ...لسه بدعى ورا حليم ان شغل اليوم الواحد يتحول لكفاح اجيال, لسه بحلم ان ربنا يفجر لنا الينابيع تحت اقدامنا , و لسه بضحك و ابتسم لما اقارن بين حال ناصر و جيل حليم اللى كانوا بيدعوا و يبنوا مصانع و بين حال مرسى و عبمقصود لما دعوا علينا عالهوا و افتتحوا مصنع المكرونه نفسه للمرة الثالثة  
*******************************
أغانى أغانى أغانى وحشانى كتير وحشانى..على رأى داليدا :D
رسائل أحدث رسائل أقدم الصفحة الرئيسية