الجمعة، 9 أغسطس، 2013

حوليات40: أغانى أغانى

و فى خضم اللخبطة اللى احنا فيها دى بلاقى نفسى بفكر فى حاجات ملهاش اى 30 لازمة ...بس و لسبب ما انا النهاردة طول النهار بغنى اغانى وطنية

*************************************
انا لسه عيله جدا و مشاعرى بتتأثر لما بغنى اغنية محمد ثروث اللى بالمناسبه مش بحب اى اغانى تانيه له

 "هي صورة ماضينا, هي  الحاضر لينا,هي الباقية بعدينا,هي هي هي هي مصر هي"

 بكلمات عبد الوهاب محمد و الحان العبقرى محمد عبد الوهاب لسه الاغنية دى بتصحى حاجة "ما اعرفش ايه هى" كل ما بسمعها...احساس غريب و غير واقعى على الاطلاق بالفخر بالبلد دى اللى عذبتنا معاها وطلعت عين اللى جابونا...

لسه كلمات زى " امة واحدة شعب واحد, همة واحدة قلب واحد, كلمة واحدة رب واحد, قلب واحد, شعب واحد رب واحد, يحميكي يا مصر" لسه و على الرغم من ان كلمة ايد واحدة دى لبستنا فى الحيط بدل المرة 1000 لكن لسه بتلمس جوايا وتر ...لسه بسمع لحن عبد الوهاب بيحسسنى انى فى موكب فخر مش مجرد بلد عالم تالت مسنود اقتصاديا من الخليج و سياسيا من امريكا , مش مجرد بلد متخبط فى لخبطة العسكر و الاخوان و المصلجية و بتوع اللمون , بحس لسه ان لسبب ما فى أمل
************************************
و برضه فى الحان محمد عبد الوهاب لسه بسمع كلمات اوبريت صوت الجماهير

" فى تاريخ كل نضال
على مر الاجيال
يبتدى من همسات بترج آهات الظلم فى كل ضمير
وانتصرت خطوات
وانطلقت صيحات
تفضل تكبر تفضل تعلا لحد ما تبقى صوت الجماهير
صوت الجماهير صوت الجماهير"


لسه بعتبر الكلمات دى افيد و اهم من اى كتاب مصطلحات سياسية , مش مهم الاسم بقى انكيلاب ولا ثورة ولا انتفاضة ولا هوجه ...المهم انها همسات واطية لناس مظلومة و مخنوقة و خايفه و دايما محدش بيتخيل ان الهمهمات دى بتتحول لصيحات تطيح باللى كان فاكر نفسه اله يعبد من دون الله

على الرغم من كل التجارب السياسية اللى مرينا بيها فى ال3 سنين دول و احنا اخدنا كورس مكثف قوووووى بصراحة و على الرغم من كل كتب السياسة اللى قريتها الا ان نموذج "صوت الجماهير" يظل الاهم و الاكثر تعبيرا عن مصر و جيران عانوا زينا و يمكن اكتر 
***************************
كلمات صلاح جاهين و لحن كمال الطويل و صوت عبد الحليم بيغنى فى صدق غريب احترت فى كونه نفاق ام حب منطلق من قلب متحمس؟
 
 "فى صلاة العيد
 عيد الثورة واناجيك يارب
اللهم انصر بلدى وايدها
سدد خطوتها وخد ايدها
يارب اجعلنا نحقق كل خيال
اجعل يومنا الواحد بكفاح أجيال
فجّر ينابيع الخير تحت اقدامنا
المستقبل خليه نور قدامنا
اللهم انظر لعملنا
بارك فى جهادنا ونضالنا"

و على الرغم من كم الضحك و التريقة اللى فضلت فترة اغيظ بيها امى و انا بطنطط و اقول لها "و بالصلاة عالنبى كده صلاة عيد الثورة دى كام ركعه؟؟" او الرخامه اللى كنت برخم بيها على بابا ان "بالاحضان" دى اصلا اغنية تلميع و نفاق فى عبد الناصر مش اكتر

الا انى لسه بسمع و لا شعوريا بلاقى نفسى بردد ورا عبد الحليم "أمين" ...لسه بدعى ورا حليم ان شغل اليوم الواحد يتحول لكفاح اجيال, لسه بحلم ان ربنا يفجر لنا الينابيع تحت اقدامنا , و لسه بضحك و ابتسم لما اقارن بين حال ناصر و جيل حليم اللى كانوا بيدعوا و يبنوا مصانع و بين حال مرسى و عبمقصود لما دعوا علينا عالهوا و افتتحوا مصنع المكرونه نفسه للمرة الثالثة  
*******************************
أغانى أغانى أغانى وحشانى كتير وحشانى..على رأى داليدا :D

0 التعليقات:

إرسال تعليق

حلو؟؟ وحش؟؟ طب ساكت ليه ما تقول....