الخميس، 8 أغسطس، 2013

حوليات39:اكليشيهات العيد

زى ما بوستات فرحة العيد بقت ممله , و زى ما التاج فى صور الكحك بقى اكليشية , بوستات "عدم الفرحة" بالعيد و عدم الاحساس بيه برضه بقى اكليشية كبير و انا كحد بيكره الاكليشهيات اعمل ايه؟؟...ثم ان العيد بيجى كل سنه و ده فى حد ذاته بقى ممل

انا بقول نحتفل بيه مرة كل 4 سنين زى كأس العالم يمكن نشتاق له شوية

*****************************
 زمان كان العيد واضح المعالم لانى طول السنه مكنش معايا فلوس و يجى العيد فامسك كم هائل منه مره واحدة "قبل ما ماما ترجع تلم العيديات"

و كان طول السنه مش بشترى هدوم جديدة و قبل العيد تهل عيالنا اشكال و انواع ملابس من كل لون و مقاس

و كان طول السنه يا اما بذاكر او قاعدة بقرا كتب فى البيت و يوم العيد بخرج بقى و اشوف الدنيا
المشكلة ان دلوقتى انا تقريبا فى عيد طول السنه...دايما بشترى هدوم و الحمد لله دايما محفظتى مليانه و الخروج بقى جزء عادى من الروتين... ربنا يدميها نعمه

**************************

بمناسبة الاعياد بقى:

-فى الفالنتين مهمتى الاولى انى اقعد اقر و احسد الجماعه الهيمانين و حاملى الكروت الحمراء و الدباديب

-فى راس السنه بتفرج على افلام و اغانى سانتا كلوز بذات حلقات "glee" و بحتفل كمان بعيد جواز بابا و ماما اللى فى 1 يناير

-فى العيد الكبير بقعد اقرف من ريحة الدم و ابعد عن اللحمة و يصعب عليا الدبايح

-فى العيد الصغير بقعد اقزقز فى الكحك الحلو و بعدها اديها ترمس مالح

-فى شم النسيم بقعد الون البيض شوية و اكمل اليوم شتيمة فى البشر اللى بتاكل سى "فسيخ" ده..و امدح الدور الوطنى للرنجة فى مواجهه مثل هذا الغزو

-فى عيد الام بقعد افكر هاجيب ايه لماما و فى الاخر ازهق و اقرر انى هابقى اجيب لها فى عيد ميلادها اللى فى مايو و خلاص
*****************
الاعياد باظت ياض يا حدوته
**************************
 سيبك انت كل سنه و انت طيب

2 التعليقات:

الكاتبة والإعلامية فاطمة العبيدي يقول...

ههههههههههههه عسل يا دودي بوست جامد وخصوصا فقرة الفسيخ والرنجة عجبتني اوي

تحياتي

amina fathy يقول...

عارفة أحلي حاجة في كلامك انه بسيط يدخل القلب علي طول
و عندك حق التهئنة بالعيد بقيت حاجة مكرره
حتي ان الواحد يبين حزنه
انتي حسستيني اني مكرره نسخة من أشخاص تانين
بس سيبك انتي
كل سنه و انتي طيبة :)

إرسال تعليق

حلو؟؟ وحش؟؟ طب ساكت ليه ما تقول....