الجمعة، 2 أغسطس، 2013

حوليات33: مدفوع بالأبواب

فى جمل كده نفسى اعملها تصميم شيك و اطبعها على بوستر كبير و اعلقها فى اوضتى منها منولوج "الكلمة" من الحسين ثائرا عبد الرحمن الشرقاوى , و منها بعض الجمل من "مأساة الحلاج" لصلاح عبد الصبور ,  و منها اجزاء من كتب صوفية , و منها ابيات من قصائد ام كلثوم , و منها حتت من اغانى زياد رحبانى

و الاهم من ده كله منها احد اقرب الاحاديث:"رُب أشعث أغبر مدفوع بالأبواب، لو أقسم على الله لأبره"
 مش عارفه انا متعلقة دايما بالحديث ده؟...يمكن لانى بحس ان النبى فيه بيكسر حدود المجتمع الراكده فى حديث "ثورى" زى ده...حديث من النبى اللى ثار على قواعد مجتمع سيطر فيه الفلوس و المظاهر على الجوهر

بفتكر الحديث ده دايما لما بشوف المواكب اللى بيتعمل للشيوخ بتوع اليومين دول...و الرجاله اللى بتوطى تبوس على ايدهم...و الرجاله اللى بشنبات و وطت تلبس المرشد الجزمة...بفكر و اقول طب ما هو اى واحد من الناس دى يمكن عن ربها احسن من دول كلهم
بفتكر الحديث ده لما تلاقى الواحد منهم بيتكبر بايمانه!! مع ان محدش عارف كل ده هيتقبل او لا...محدش عارف مين احسن عند اللى خلقنا
بفتكر الحديث ده و احاديث اخرى من نوع : "[سَبقَ دِرهَمٌ مائةَ ألفِ دِرهَم]، قيلَ وكيفَ ذلكَ يا رسولَ اللهِ؟ فقال [رَجلٌ لهُ دِرهمَانِ] أي لا يملِكُ غَيرَهُما [فتَصدّقَ بأَحدِهمَا ورَجُلٌ تَصدَّقَ بمائةِ أَلفٍ مِن عُرضِ مَالِهِ]"

0 التعليقات:

إرسال تعليق

حلو؟؟ وحش؟؟ طب ساكت ليه ما تقول....