الأحد، 4 أغسطس، 2013

حوليات35:اطفال و اكفان

 بقالى 3 ايام بحاول استجمع شجاعتى انى اكتب عن الاطفال اللى شايلين كفنهم فى رابعه العدوية...و كل ما اجى احاول الاقى نفسى عايزة اعيط و حالتى المعنويه تبوظ 

بحاول اتخيل الاثر النفسى لطفل عنده 7 سنين شايل فى ايده قطعه قماش بيضا اكيد مش فاهم حتى هى ايه...و الاهم بحاول اتخيل امه اللى بدل ما تنزل تشترى له هدوم العيد تمسك ابنها كفنه !!!! الهى ربنا ينتقم منك يا شيخة , منك لله على اللى بتعمليه سواء بجهل او بعلم

و بحاول اتخيل القيادات اللى بتدعى الايمان و هى مبسوطة قوى و بتضحك "اتخيل الان وجه البلتاجى" و هو شايف اطفال ماسكين كفنهم فى دعوه لعوده مرسى !!

و يبدو ان اى كم من علامات التعجب لن يكفى اليوم ...

لن يهمنى ماذا سيرى قارئ المقال اذا كان "تربية اسلامية للطفل" او "اظهار للسلمية" انا ببساطة لا اراه سوى استغلال قذر للاطفال و تدمير لنفسية زهرة بريئة
*******************************************
ابنى و ابن اختى و اولاد اللى احبهم نفسى يقعدوا يتفرجوا على كارتون و يلعبوا و يعوروا بعض و يرجعوا يتصالحوا و يضحكوا...مش عايزاه يمشى فى مظاهرات لحاجة هو مش فاهم حتى هى ايه

ابنى احبه احكى له قصص "الامير الصغير" و "الف ليلة و ليلة" و اغنى له بالليل لحد ما ينام...مش يبات فى الشارع فى البرد فى مطالبه لعودة رجل لم يعرفه ختى

ابنى احب اشترى له هدوم العيد من اغلى محل اقدر على سعره و بلاش كحك السنه دى بس ميزعلش..مش انى البسه كفن ابيض و احطه فى مواجهه احتمال عنف

ابنى وقت الضرب احطه ورا ضهرى احميه بجسمى ...مش اقف انا وراه و لما يموت اقعد اصوت و اتصور جنبه

*****************************************
مفيش اطفال ماتت سياسيا فى مصر و الحمد لله و حلمى انه عمره ما يحصل ...لكن اللى بيحصل ده تعريض لحياة الاطفال للخطر و الاهم انه تدمير لصحتهم النفسية و انتمائهم للبلد و المجتمع , مفيش شرع ولا دين ولا مله ولا قانون يقبلوا باللى بيحصل ده

و اللى بيتفرج على افلام امريكانى يعرف لو حركة زى دى اتعملت بره بيحصل ايه...بيتاخد الطفل من اهله فورا و يتحط فى حماية الحكومه فاذا كانوا اهله مضحيين بيه فالدوله مش مضحيه بجزء من كبدها

اما بقى لو الاشاعات اللى سمعناها حصلت و ان الاطفال دول اطفال ملاجئ فدى ليها حسابها لوحدها و ان كنت اعتقد انهم فعلا ولاد الاخوان

بالنسبة للناس الكبار سواء ستات او رجاله فهما احرار و هى عموما حركة رمزية مش مشكلة فى حد ذاتها لكن فى الاطفال تعتبر فى رأيى وساخة "لا مؤاخذة فى اللفظ"

و تذكر اننا عمرنا فى مظاهراتنا سوء ضد مبارك او ضد المجلس العسكرى ما استخدمنا الاطفال ابدااا ...و لما كنا كبنات بننزل مظاهرات كنا دايما فى قلب المسيرات و حوالينا شباب مشبكين ايديهم بيحمونا لو حصل قلق مش بنمشى احنا قدام كدروع بشريه !
************************************
اتقوا الله ...اتقوا الله...اتقوا الله
ادينى فى الانجليزى كمان وكمان

0 التعليقات:

إرسال تعليق

حلو؟؟ وحش؟؟ طب ساكت ليه ما تقول....