الخميس، 31 مايو 2012

ان تكتشف !!!!!!!!!!!




ان تقرر ان زيد "اسلامى"...بينما عبيد مجرد "مسلم" !



ان تكتشف ان اليوم 24 ساعه اذا تجنبت الفيس بوك و التويتر لمده اسبوع !



ان تعرف ان وزير الداخليه اللى ارتكبت فى عصره احداث مجلس الوزراء و محمد محمود و العباسيه و مذبحه بورسعيد ....مش بس محدش بيحقق معاه لكن كمان هو وزير حالى !



ان يسلبك المجتمع حقك الدستورى فى عدم الانتخاب.... الضغط الشعبى عليا بيخلينى اتخيل ان مليونيه بكره دى ضدى انا شخصيا !



ان يرسل لك الجميع طلبات المزرعه السعيده مع انك حتى لا تعلم كيف تلعب او فكرت فيها يوما !



ان تكتشف ان اصدقاء فى الواقع و بعيدا عن وهم النت لا يزيد عن اصابع اليد !



ان تكتشف ان الرئيس التوافيقى و من اعطاه الجميع الاصوات لانه "سينجح"..ليس فقط لم ينجح بل انه لم يكن حتى قريبا !



ان تكتشف -على حين غره- بان الديموقراطيه نظام فاشل لا يستحق كل تلك الضجه !



ان تكتشف ان جمله امل دنقل "و الناس سواسية ــ فى الذل ــ كأسنان المشط" ....هى الجمله الوحيده المعبره عن مجتمعك !!!








الأربعاء، 30 مايو 2012

لـو الاتنيـن دول نفعوكـم ابقـوا تفـوا فى وشـنا


اااااااه اااااااه شعب اختـار مرسـى وشفيـق
 واحـنا لبسنـا الخوازيـق
ماكنـا قولنـا الشعـب فـاق
 أتـارى بيضـرب صنـف هبـاب
رضيـوا يبقـوا مـن العبيـد
 والطـابـع دايمـا غـلـاب

 ااااااااه ااااااااه ضربـوا شفيـق
 هزقـوه , بهدلـوه فـى كـل مكـان
قالـوا ع التانـى جـه فـى الزحمـه
وسمـوه استبـن كمـان
 عملنـا ثـوره وشيلنـا نظـام
رحعتـوه ومعـاه اخـوان
مـره تاجـرو يـانـاس بالديـن
ودلوقتـى بالثـوره كمـان

ااااااااه ااااااااااه ازاى رئيسنـا يبقـى استبـن
 ولـا يكـون مضـروب بالجـزمـه
ليـه ياشعـب بعـت نفسـك
 ااااه ياشعـب مالكـش لزمـه

والمسـامـح بردوا كريـم
والشهـداء خـلـاص ف الجنـه
مـاتجيبـوا حسنـى وتريحـونـا مـاهـو زى أبونـا يااخونــا :P

 اااااااااه ااااااااه اسفيـن ياريـس
 كنـا بنضحـك واللـى ماتـوا دول فوتوشـوب
هـى ثـوره خلـاص وعـدت
 ويـلـا كورسـى فـى الكلـوب

ونقولكـم مـن قلبنـا 
ياشعـب ياشعبنـا لـو الاتنيـن دول نفعوكـم 
ابقـوا تفـوا فى وشـنا

لا القط ولا الفار...



لا للقِط ولا للفارْ
الإثنانِ طويلا الذيلِ
من أمكرِ أبناء الليلِ
الأول يدعو بالويل
والثاني وغد فرّار
لا للقِط ولا للفار 
الاولُ فيه ما فيه
من غدرِ اسوَدَ يخفيه
والثاني تبرزُ من فيهِ
أسنانٌ مثل المنشار
لا للقِط ولا للفار 
لا يجدي الفكر الإنساني
أن يعلمَ أيهما الجاني
في رأي الأول والثاني
أن الحق مع الأظفار
لا للقط ولا للفار 
في رأي الثاني والأول
أن الدنيا لا تتبدل
إما أن تأكلَ أو تؤكل
هل للعاقلِ أن يختار؟

فؤاد حداد

الاثنين، 28 مايو 2012

مقاطعون مقاطعون فليحترقووون



مقاطعون مقاطعون فليحترقووون....هكذا اعلنتها بعد ان صحوت من صدمتى العميقه فى اختيارات شعب اقل ما يوصف به انه لا يريد حريته....


مقدرش اختار بين اللى ضيع عين حراره الشمال فى معركه الجمل و بين اللى اتفرج عليه و عينه اليمين بتضيع فى محمد محمود...و اذا كان حراره مقاطع فانا معه ...



عايز تعرف المرار اللى جوايا من الاخوان منين؟؟...عايز تعرف ليه مقررتش ببساطه اساند عضو الثوره القديم؟؟...تقدر تقول انى معقده...ايوه عقد و كلاكيع و كده......


17 ديسمبر 2012...فاكر التاريخ ده؟؟؟ ده عز احداث مجلس الوزراء و يوم مقتل و استشهاد علاء عبد الهادى الله يرحمه....و فى عز دموعى دى قعدت يومها عالفيس اتطلع غضبى فواجهنى هذا الفيديو المسجل فى اليوم نفسه فى احد اللجان الفرعيه ....تخيل و انت بتتقطع على الشباب و الاخوان بيغنوا يا صلاه الزين؟؟؟!!!!!!!............يلعن ابو اللى خان دم اللى راح عشان الكراسى


مرسى و شفيق الاتنين ولاد كلب...بس الفرق ان واحد منهم عارف و التانى عامل نفسه من شعب الله المختار...شفت السهوله؟...بالنوسبه للناس اللى مشاعرها بتتجرح من لفظ "ابن كلب"...على فكره لفظ "ولاد كلب" ده مش شتيمه دى ايدلوجيه معروفه....لما حد يسيب ناس تتقتل بدم بارد و هو رئيس حكومه من غير ما يدخل و ينقذهم....او لما لما حد يسيب الناس تتقتل و تنتش فى عينها بالخرطوش فى محمد محمود و هو زعيم اغلبيه فى البرلمان.........يبقى اقل وصف ليهم انهم "ولاد كلب" غير طبعا قتله و امثالها من المشتقات....


انا بقى عايزه اشوف حد هيدى مرسى و اعمل عليه دراسه نفسيه: ايه اللى عجبك فى شخصيته عشان تنتخبه ولا انت عارف انه قرطاس و مبسوط؟؟


اللى اختشوا...ماتوا فى موقعه الجمل و اتخرمت عينهم فى محمد محمود و اتعروا فى مجلس الوزراء ....دول اللى اختشوا


ايام الحزب الوطنى vs الاخوان....مكنتش بنزل ...كنت بحس ان الموضوع ميخصنيش اصلا... و هو نفس الحال اليوم


فقعونى بحجه انقاذ الثوره....ده اساس ان لو الاخوان كسبوا يبقى الثوره نجحت؟؟؟؟!!!!!!!!!!!!!!....قول و المصحف....ما هما اللى قالوا لى....شعار المرحله مع الريس مووووووووورسى



فعليا دى اخر انتخابات واقعيه ليك: بعد كده اتوماتك هتتحول من مرسى لبديع لعصام العريان للبلتاجى و هكذا....
او
من احمد شفيق ل جمال احمد شفيق ل شفيق جمال احمد شفيق و هكذا....اتفوووووو على دى اختيارات



تحب تعدم كبلطجى و خارج عن القانون ولا يتطبق عليك حد الحرابا لانك كافر و ملحد و مفسد فى الارض؟


و يقولك  يالا نتحد ضد الفلول و لو هيعيد ضد مرشح ثوري هيقولك يالا نتحد ضد العلمانيين الكفرة...



عايز تدى الاخوان و بعت روحك ليهم ...متشتغلش بقى انك ثورى و بتضحى بنفسك
عايز تدى شفيق و بعت روحك لنظام زفت...متشتغلش بقى انك مدنى و خايف عالبلد


و فى الحالتين متزهقش اللى مقاطع و قرفان من انه يحط ايده فى بلاعه
مات الكلام





الأربعاء، 23 مايو 2012

دينا تنتخب الرئيس


شهادتى عن اليوم الاول من الانتخابات: 


اظن انى اسهل حد فى التاريخ انتخب النهارده...رحت لاقيت المدرسه اللى جنب مدرستى زحمه جدا بصراحه اتشائمت...لكن لما رحت مدرستى كااانت فاااااضيه جدا و شباب الجيش بصراحه كانوا متعاونين.....دخلت فى دقيقين و انتخبت "حمدين" طبعا :)) و خرجت .....مكنش فى دعايه فى محيط اللجنه او اى رخامه من اى مندوب زى ايام البرلمانيه بصراحه...مردتش اوجه حد لاى مرشح ده اختيار الشعب و هو حر بقى اذا كان عايز يجيب لنفسه مصيبه يبقى يستاهل...اتبسطت عموما من الاجواء و ربنا يكملها على خير :))


حمدين كسب خير...ابو الفتوح كسب و ماله...غير كده ربنا يستر بقى

الجمعة، 18 مايو 2012

ماذا علمتنى الحياه جلال امين

بينما كنت سائره بين رفوف الكتب باحثه عن رفيق جديد...لمحت كتاب منمق على الرف يدعى "ماذا علمتنى الحياه" تعجبت من الاسم و اعجبت به فى ان واحد  قررت بلا تفكير ان استعيره..."ماذا علمتنى الحياه" فمن الممتع دائما ان تقرأ كتاب يحمل هذا الاسم ...ان يلخص كاتب كل ما عملته الحياه فى بين طيات كتاب

و بينما تستغرق الموظفه فى الاجراءات الروتنيه وجدها تدون اسم الكتاب "ماذا علمتنى الحياه؟" لمحت تلك الاشاره بجانب العنوان...تساءلت عن سبب وضع علامه الاستفهام و اذا ما كانت خطأ املائى و بينما اتأمل الكتاب وجدت ان العلامه موجوده بالفعل ....اذا فجلال امين لا يخبرنى ماذا علمته الحياه بل يتساءل اذا ما كانت الحياه علمته شيئا اصلا طوال العمر

هنا تتضاعفت رغبتى فى القراءه عشرات المرات...و بدأت فى استكشاف تلك الرحله العجيبه...و بالفعل لم يخب ظنى فى قدره جلال امين على امتاعى برؤيه مختلفه عن حياته و حياه المصريين خلال فتره من اهم ما مرت بها مصر خلال تاريخها بل تقلبتها و اراءه الصريحه القاطعه الى حد زائد احيانا....

بينما جاءت المقدمه و التمهيد يوحى بان جلال امين س"يلطف" من ارائه او انه سيتحسس موضع كلامه...الا ان الكتاب نفسه كان يخلو من تلك الحلول الوسط فجاء نقد شديد و مباشر  لهيكل و احمد بهاء الدين  و رفعت المحجوب و امثالهم من رجال هذا الزمان و جاء رأيه فى مبارك واقعى و صادم و جرئ للغايه على الرغم من صدور الكتاب حوالى 2005

كتاب يكشف ازمه المثقفين فى زمن كره الثقافه و المثقفين و باع روحه للنفاق عقود و عقود ليتولى السلطه دائما اهل الثقه و ليس اهل الخبره...

جاء جزء فتره اقامته فى الكويت مؤثرا لى جدا و مشابه للاحساسيس قرأتها قبل ذلك لدى مثقفين ذاك الزمان امثال علاء الديب فى ثلاثيته الشهيره "اطفال بلا دموع" و "قمر على المستنقع" و "عيون البنفسج" لكن رأيت الفارق الاساسى ان جلال امين فقد ذاته لعامين فقط و استطاع ان يخرج من خيوط العنكبوب قبل ان تقتل روحه للابد كأبطال تلك الثلاثيه

لكنى اعيب على الكتاب كثره تفاصيله الشخصيه بشكل ضايقنى بعض الشئ و جعلنى ازيد من سرعه قراءتى فى بعض المواضع...

الخميس، 17 مايو 2012

ماما هو انتوا جيل اهبل؟؟؟



الزمن:زى النهارده سنه 2022 ...المكان:مصر كعادتها قديمه جديده...الشخصيات : انا المستقبل و ابنى الحبيب (اللى يارب اقابل ابوه قريب :)



جلس ذلك الطفل الصغير بجوارى ...جلس كجلسه الكبار بعد دراستها لدرس التاريخ الصعب و بعد ان اسهب مدرسه شرحا و تفصيلا...جلس الى امه ليسألها عما قرأته فى الكتب و عاصرته هى يوما بيوم و ضاع اصدقائها واحد وراء واحد فى احداثه


الصبى: ماما هو انتوا جيل اهبل؟؟؟


الام: ايه قله الادب دى يا حماده ...انت جبت الكلام ده منين اوعى يكون مدرس التاريخ هو اللى قالك ؟؟


الصبى:لا يا ماما دى رأى الخاص 


الام: رأيك الخاص ايه يا ابو رأى...الله يخرب بيت الديموقراطيه اللى تخليك تاخد على امك كده...ايا كان رأيك ده فالح كونته منين؟؟ 


الصبى:طب هسألك اسئله و تجاوبى من غير ما تزعلى؟؟


الام: ماشى يا لمض


الصبى: هو بعد ال18 يوم بتوع ميدان التحرير و بعد ما مبارك مشى صحابك روحتوا من الميدان ليه؟؟


الام: انت عارف انى مكنتش لسه انضميت للثوره فى الفتره دى...


الصبى: طب خلينى اغير صياغته..صاحبك مشيوا من الميدان ليه؟؟


الام: امممممم دى كانت ظروف خاصه...يعنى كان وقتها المجلس العسكرى حبيب و رفيق ثوره 


الصبى: اه صحيح مش كانوا بيقولوا "الشعب و الجيش ايد واحده" و بعدين تحول ل "الجيش و الشعب ايد واحده"..صح؟


الام: هو اه ..بس دى كانت فتره قليله عقبال ما فهمنا انهم ضحكوا علينا ...فتره قصيره من 11 فبراير لشهر مارس وقت الاستفتاء


الصبى: ماما هو انتوا قلتوا نعم للتعديلات الدستوريه ليه؟؟


الام: اممممم الحقيقه يا حماده ان الموضوع من سهل زى ما انت متخيل ...كان ايامها التيارات الدينيه اقنعت الناس بان  احممم اللى هيقول نعم هيدخل الجنه و اللى هيقول لا هيدخل النار


الصبى:يعنى عرفتوا ان نعم دى كانت غلط؟؟


الام: اه طبعا احنا بنتعلم من اخطائنا يا حماده مش لعب عيال


الصبى:مش حضرتك قولتى ان الاخوان و التيارات الدينيه ضحكوا عليكوا فى استفتاء مارس؟؟ امال انتخبتوهم فى شهر تسعه ليه و خدوا اغلبيه؟؟


الام: احمممم..اصل يا حماده الموضوع كان معقد وقتها و الناس كانت مقتنعه ان انتخابهم واجب شرعى -حاولت رسم ابتسامه بلهاء على وجهها لعله يصمت لو قليلا


الصبى:هو مش الاخوان كانوا زملاء ثوره؟؟


الام:طبعا يا حبيبى شباب الاخوان كانو جزء اساسى من الميدان


الصبى:امال ايه اللى حصل يوم 25 يناير 2012 فى اليوم اللى بيوصفه التاريخ بانها كانت هتصبح ثوره تانيه و فرصه لقلب حكم العسكر؟؟


الام:انت مالك مذاكر قوى كده ليه ده انا نسيت الايام دى ,اصل الاخوان ايامها يا حبيبى كانوا سمن على عسل مع المجلس و قبل ما ترد احب اقولك سبحان مغير الاحوال


الصبى:ماما ...هو مش حضرتك ليكى اتنين زمايلك اتقتلوا على ايد المجلس العسكرى؟


الام: اه يا حبيبى و امك كان ليها الشرف بانها طلعت مظاهرات و وقفات احتاجيه كتير للمدافعه عن حقوقهم


الصبى: طب جربتوا تاخدوا حقوقهم بالقانون؟؟


الام:احمممم اه طبعا رفعنا كذا قضيه و العميد شخصيا اشرف عليها و على المحاميين


الصبى:و وصلت لايه؟؟


الام: ولا حاجه تقريبا


الصبى:ليه يا ماما؟؟


الام:اللى حصل يا حماده اللى بعده


الصبى:هو انتوا ليه رشحتوا المرشح ده بذات؟؟


الام: كانت برضه ظروف خاصه شويه كده بين الفلول و الاسلاميين و الثوريين كسب فى الزحمه


الصبى:بس ده كان اول انجازاته انه قبض على نص الثوار بعد كل الوعود دى 


الام: معلش يا حبيبى اصلنا جيل اهبل

الثلاثاء، 8 مايو 2012

مذاكرات طالبه قررت يوما ان تذاكر




تقرر كعادتها ان تذاكر....على الرغم من ان كل البرنشات متوفره تقرر البدء ببرانش اخر لا تملك كتابه فتسوف الامر للغد و تكرر غدا يوما اخر


برانش لمن لا يعلم هو لفظ متداول بين الطلبه على كلمه branch اى فرع ...و هو كتاب منفصل لكنه جزء من ماده اكبر


تذهب فى اليوم التالى لشراء الكتاب و تجده بالفعل و تضيف ساخره "للاسف" فعدم وجود الكتاب يريح ضميرها لعدم المذاكره اكثر...


تجلس لمذاكره هذا البرنش الملعون...فجاءه تقرر صعوبه فهمه وحدها و تصرح : سماع حصص الدرس واجبه فى برنش كهذا....تبحث فى ملفاتها الاليكترونيه فلا تجدها....ترسم ابتسامه خبيثه على وجهها بان الله لم يشاء بعد...


كنوع من اراحه الضمير تبحث فى ادغال النت عن التسجيلات...تجدها بسهوله ارهقت اعصابها ...تضيف : لما تتسهل الامور اليوم بالذات؟؟مع انها صعبه مرهقه يوميا ...فكيف تجد تسجيلات دروس بسرعه هكذا مع انها ظلت تبحث عن البوم منير الجديد 3 ايام حتى وجدته


تحمل الملفات و تتأمل نسبه التحميل تزداد شئ فشئ....تشعر بالارهاق فتقرر مكافاه نفسها على نيه المذاكره بقطعه كيكه ممتعه التى تصنعها بيدها و تحفظها عن الحر و الايدى فى بروده الثلاجه....تترك اللاب توب على الكنبه و تنهض لاحضار قطعه من النعيم مزين بالشيكولاته البارده....حين رجعت لاعقه اصابعها من النعيم المثلج تأملت ذلك الخيط الاخضر  متزايد فى ثبات...تتعجب لما لم ينخلع سلك الانترنت حينما وضعت اللاب توب على الكنبه مثلما يفعل دائما ...هل يعرف سلك النت ما يحمل لذا يحافظ على نفسه ام انها مصادفه اخرى سعيده لتجبرها على مواجهه ما لا تريد مواجهته؟؟؟ فان كان برئ فلما لم يحافظ على ذاته حين كان تنزل من النت ذلك الفيلم الالمانى الممتع ليله البارحه؟؟ تشعر بكونه متواطؤ اخر 


ها هو التحميل انتهى...لماذا لم تنتهى بطاريه اللاب توب كعادته؟؟ لما لا تنقطع الكهرباء مثلما كانت تنقطع ايام حكومه نظيف ؟؟ هل انجازات حكومه الجنزورى اصبحت فجاءه بارزه؟؟؟...لكنها لا تيأس فها هى تترك الكتاب الجديد و الملف الاليكترونى و تتدون مذاكرات طالبه قررت يوما ان تذاكر....

الاثنين، 7 مايو 2012

ايه اللى وداهم هناك؟؟؟




ايه اللى وداهم هناك؟؟؟...اوعى تتضايق لما تسمع الجمله دى عشان هما عندهم حق فعلا هو ايه اللى وداهم هناك عشان يدافعوا عن الناس دى؟؟ ...لما تهدى الجمبرى لحد طول عمره ياكل فول مش هيفهمه ولا هيعجبه و ده ينطبق على الحريه و الكرامه بعد الاستعباد و الذل..العيب مش فى الجمبرى العيب على اللى عود الناس عالفول
من عينه الاعلام المقصود


اوعى تتعب نفسك و تحلل نفسيتهم من باب عقده ستوكهولم و عشق الجلاد....ولا تتعصب و توصف بنات المظاهرات بانهم ارجل منه 100 مره ....ولا تشرح لهم سبب المظاهره و ابعادها السياسيه و مطالبها....برضه اوعى تدخل نفسك فى متاهات الشرح القانونى لحقك الدستورى فى الاعتراض السلمى على الباطل .....


كنت كده فى يوم من الايام و المدونه دى تشهد لكن بعد قتل اصحابى اتغيرت....و لما اتقبض على زملائى انفجرت....و بعد فتره تيقنت ان من لم له الموت واعظ فلا واعظ له


دول ناس مخها باظ خلاص توفيق عكاشه من ناحيه و لميس الحديدى من ناحيه و صفحه المجلس العسكرى عالفيس من ناحيه....و اخر الليل يستقبلهم مدحت شلبى بالسم كالمعتاد


عقاب الناس دى الوحيد انهم يفضلوا طول عمرهم ياكلوا فول و يعيشوا فى الذل اللى عاجبهم ...يفضلوا طول عمرهم قاعدين على الكنب مبسوطين بيتضحكوا....يقلبوا من قناه لقناه وهما بيقزقزوا لب.....المره الجايه اللى حد يقولك فيها "ايه اللى وداهم هناك" قله : فعلا هما اللى غلط و اسكت...



الأحد، 6 مايو 2012

صباح الخير يا وطن



لم اتصور ان هذا الكتاب ذو الغلاف سئ التصميم و الاسم الحالم و كاتبه اللى مقرتلوش قبل كده و صفحاته الصفراء سيترك فى كل هذا الاثر


عارف لما تبدأ فى كتاب لمجرد قتل الوقت فتفاجئ بانه يقلب مفاهيمك الراسخه و يؤثر فى مشاعرك لفتره ليست بالقليله


الكتاب بيتكلم عن تجربه الكاتب الشخصيه فى احداث ضرب لبنان الغربيه من قوات اسرائيل الجويه لاخراج المقاومه الفلسطينيه منها كما ادعوا ....يروى الكاتب بذاتيه كبيره ذكريات الحدث كيف خان الجميع لبنان الغربيه ,الجميع من بينهم كل العرب و الكتائب و حركه امل و حتى بيروت الشرقيه و رئيس الجمهوريه اللبنانى


اجمل ما فى الكتاب ذاتيته الواضحه و كونه شخصيا لشخص كاد ان يموت عدد لا يحصى من المرات....ممتع


ملحوظه :اذا كنت قرأت "الطنطوريه"لرضوى عاشور ستقرأ هذا الكتاب باستمتاع اكبر فهو تفاصيل ما حدث فى الروايه فى فصل واحد


من اجمل مقاطع الكتاب :

السبت، 5 مايو 2012

28 حرف..احمد حلمى

كان لى صديق فيلسوف باحوال الكتاب شغوف قال لى يوما : ده كتاب ميتقريش...فأجبت ساخره: امال بيتاكل؟؟....و كعقاب لى على ال "الالش" السخيف جاء هذا الكتاب....


كان بودى اقول اكلاشيهات امثال ان هذا الكتاب عرفنى على الوجه الانسانى للممثل الرائع احمد حلمى....لكن هذا لم يحدث للاسف


الكتاب مجرد تجميعه لمقالات سابقه تم نشرها ...مقالات عاديه من النوع اللى بيتنشر فى المدونات و مفيش حد يقراها...مقالات مش وحشه فى حد ذاتها لكن ان نزعت عنها اسم و بريق احمد حلمى صارت صندوق ذكريات او دردشه على القهوه


اجمل ما فى الكتاب انه بيثبت مجددا ان مش معنى ان الشخص مشهور انه شخص يفهم اكثر من المتوقع ....


المقال اللى لفت انتباهى كان عن راجل جزماتى ذو عين ثاقبه و ده جزء منه:

المهم....لتحميل كتاب 28 حرف ل احمد حلمى pdf على رابط ميديا فاير mediafire 

الخميس، 3 مايو 2012

ثلاثيه مباريات الجوع pdf

تحميل اجزاء ثلاثية مباريات الجوع كاملة على الفورشير

رابط الجزء الاول "مباريات الجوع"
http://www.4shared.com/office/SZ28INoY/__-__.html

الجزء الثانى "السنه اللهب
http://www.4shared.com/get/m08vXOHX/__online.html

الجزء الثالث "الطائر المقلد"
http://www.4shared.com/office/gPh7kc7h/__online.html

******************************


الجزء الاول

لم اكن اتخيل انى سأنهى على ما يفوق ال400 صفحه فى ثلاث جلسات متعاقبه هذا ما احب ان ادعوه
page-turner
و الاهم انى لم اتخيل انى سأستمتع بتلك الروايه المترجمه "التجاريه الى حدا ما" كل هذا الاستمتاع
اجتاحتنى رغبه فى ان اقرأ الروايه اولا ثم مشاهده الفيلم و حسن فعلت فتلك المتعه المطوله كدت ان افسدها فى ضغطها فى ساعتين فقط على الشاشه الفضيه

تأخذك "مباريات الجوع" الى عالم افتراضى من صنع المؤلفه بالكامل فتختلف التفاصيل و ترتيب الاولويات ففى المقاطعه 12 و اى مقاطعه اخرى اهم شئ هو الطعام اولا و اخيرا و فى المنتصف...و اذا كان الطعام هو الوسيله فالغايه الكبرى هى ان تحافظ على حياتك و لا تموت جوعا او اعداما لكنك مجبر فى النهايه على الموت كمدا

ما ان تدخل داخل فعاليات المباريات حتى تجد ذاتك مستمتعا بالتفاصيل و كأنك تشاهد ما تقرأه رؤيا العيان ترى بيتا و رو و كاتو و الفتاه وجه الثعلب ...تعطش و تشقق الشفاه و اعراض الجفاف و الدوخه ...تجوع و تقرص معدتك بينما تتخيل صعوبه الحصول على القوت الضرورى

امتعتنى المفأجات المتتاليه الصغيره و تقلبات المشاعر و الاحداث و شوقنى الى قراءه جزائها الثانى و مشاهده الفيلم
*********************
الجزء الثانى
مشكله الثلاثيات عموما انها تجبرك على ان "تقارن" او كما اقول "ولكن افه الثلاثيات المقارنه" ...مع الاعتذار للجمله الاصليه طبعا

فعلى عكس الجزء الاول اجبر نفسى على القراءه بدلا من ان تجرنى الروايه لقراءتها...بالفعل فاول 180 صفحه من الروايه لا تحتوى على اى مضمون فعلى فمعظمها تفاصيل مفصله فى صغائر الاشياء نوعا مثلا نوع الطعام و لون الملابس و احساس البطله تجاه اى شئ تقريبا

و من الصفحه 180 الى الصفحه 380 اى ما يقارب من 200 صفحه كان احساسى و كأنى اقرأ الجزء الاول بنفس شكله و شعرت و قتها بانها محاوله تقليد للنجاح الجزء الاول و لكن الانطباع الاول يدوم

ربما جاء الفرج مع النهايه المفاجئه نوعا التى تجذبك بقراءه جزئها الثالث

ارى ان الثلاثيه ممطوطه نوعا و كان ممكن ضغطها فى جزئين فقط اذا ازلنا التفاصيل الممله فى مناطق كثيره منها

لكن تحتفظ السنه اللهب بمفاجأت صغيرك تعطيك الحماس لتكملها فى 3 ايام كما فعلت و تستطيع تلك المفاجأت ان تجعلك ان تغض الطرف نوعا عن اى عيوب اخرى
***********************
الجزء الثالث

بدايه بطيئه...وسط ملئ بالتفاصيل...و نهايه رائعه حاسمه حزينه لكنها تضع نهايات لكل الملفات المفتوحه...هكذا كانت الروايه الثالثه و الاخيره من مباريات الجوع

ارتكبت المؤلفه جريمه ادبيه فى اول 150 صفحه من الملل الممل و التفاصيل التى لا فائده منها سوى حشو الكتاب..و قررت عقاب الكتاب و الكتابه بتوقف عن قراءتها قرابه ال10 ايام كعقاب ادبى...لكنها استطاعت بطريقه ما-بعد قضاء مده العقاب طبعا- ان تجبرنى على العوده اليها و اقناعى بضروره ان انهييها باى ثمن و بالفعل استطاعت ان تجعلك تلهث ورائها من سرعه و قوه و تقلب الاحداث فى الثلث الاخير منها و خاصه ال50 صفحه الاخيره

يقولون دائما العبره بالخواتيم و يالها من خاتمه حاسمه نهائيه و كان كل خوفى ان التقى بنهايه مفتوحه تحطم اعصابى...فهل انتصر الكابيتول ام الثوار؟؟ماذا كان مصير الام و بريم؟؟ و الاهم : من اختارت بيتا ام جايل؟؟ كلها اجابات اجيب عليها بوضوح و قسوه

استمتعت بالثلاثيه عموما بمجموع صفحات يزيد عن 1300 صفحه مليئه بالتفاصيل و الخيال و اكيد المتعه....لكنى مصره ان اختصارها فى جزئين كان اكثر من كافى بدلا من اهدار الوقت و المجهود و الورق

الأربعاء، 2 مايو 2012

ابو الحسن مات و صرخه تانى!!



المأساه و الملهاه و مسخره المساخر تتحقق حين اسمع بمقتل او لنقل استشهاد زميل فى كليتنا و يكون رد فعلى الوحيد: شهقه عميقه و صرخه بكلمه : تااااااااااااااانى.......


المره دى الشهيد: ابو الحسن ابراهيم طالب بالفرقه الثالثه بكليه الطب جامعه عين شمس....."المره دى" هى وصلت لكده؟؟؟؟


هنسمع كل الكلام بتاع كل مره ....ايه اللى وداه هناك؟؟ فين اهله؟؟ اه هو من 6 ابريل؟؟ و سلسله طويله من الاسئله الا سؤال واحد : من قتل تلك الزهره و باى حق؟؟....


يلا نحارب زى كل مره ...نغير صوره البروفيل باسمه و نعمل بيدج كلنا ابو الحسن و نشتغل صوره فوتوشوب و يمكن نعمل وقفه احتاجيه قدام الكليه ولا حتى جواها......لما اموت برضه هتعملوا كده


يلا نحارب زى كل مره....نجيب صوره لوالدته و هى بتعيط و بتحضن سماعته و البالطو....ندور على اخواته و نعزيهم....نعمل له نصب تذكارى فى الكليه....ندور على اخر كلماته على التويتر و الفيس و نعيط قوى و نقول الله يرحمه


يلا نحارب زى مره...يجتمع بينا العميد و يحلف بكل قسم انه هيجيب حقه ...نجمع من بعض تبرعات عشان نعمل سبيل باسمه...نألف اغانى و شعر تأبين و تعيط قوى


هنقول الله يرحمه و اللهم ما اسكنه فسيح جناتك ....هندعى كالعاده بس ساعه ما هنجى نقول "يسقط يسقط حكم العسكر" هتلاقى الف من يكمم بوقك و يقلك لا ....لما يجى تنزل تجيب حقه هتلاقى الف من يمسك فيك و يقولك لا


المره دى مفيش دموع زى يوم علاء....هل الدموع خلصت؟؟ هل ثبتت فى العين تستنى القصاص بدل ما تنزل و تضيع فى المناديل زى كل مره؟؟؟ هل حل مكانها الغضب و احساس القهر و العجز و شوف مذكرتك و ملكش دعوه؟؟؟ مئات الاسباب الا ان تكون اعتادت الموت ....




كام ألف كلمة (مات) / على شاب من سنّك ؟ و انت و إكمنّك  إعتدت ع الأشلاء مابقيتش تتفاجئ ؟؟! - مايكل عادل


اقرأ ايضا
علاء مات!!