الأربعاء، 19 نوفمبر 2014

كتاب الرسم و الخط ل سارامجو

رواية: كتاب الرسم و الخط
تأليف: جوزية سارامجو
عدد الصفحات: ٣٧٢ صفحة
اصدارات سلسلة الجوائز
التقييم: ٥/٢

دون ان اعلم سبب بعينه ربط ذهنى بين تلك الرواية و بين رواية "صهاريح اللؤلؤ" ل خيرى شلبى ، من قرأ العملين يدرك -بكل بساطة- انه لا رابط بينها تقريبا على الاطلاق....لكنى لمحت وجها للتناظر يبدو غريب....كلا العملين "فاشلا" فى ولوج عالم خاص له مشاكله و حياته ، فى "صهاريج اللؤلؤ" لم يدمجنى خيرى شلبى فى عالم الموسيقى و الموسيقيين رغم انه حاول فظل غريب عنهم ، و هنا فى "كتاب الرسم و الخط" عجز سارامجو عن ادخال بطله "اتش" و نحن معه فى عوالم الرسامين
***********
ترى فى بدايات "كتاب الرسم و الخط" لمحة من حبكة سارامجو المفضلة ، حياة مملة هادئة ترتبك...بركة من الماء الاسن الراكد المستمتع باستقراره يلقى به حجر يولد موجات صغيرة لا تزال تتسع باضطراد حتى تغير الوضع كله

ترى فى قرار "اتش" برسم لوحتين ل "اس" صورة ل تلك ال"لا" التى وضعها بطل قصة حصار لشبونة ، و هذا القرار الذى اتخذه صاحب "كل الاسماء" حين قرر متابعه الاسم على شهادات السجل المدنى ، و خطوة بطل "الاخر مثلى" فى تأجير شريط الفيديو الذى سيغير كل شئ

ترى فيه هوس بالسيد "اس" ، هوس غير مبرر و يميل الى المرضى ، يذكرك باصرار و مثابرة "فلان" فى رائعته "كل الاسماء"
**************
يستخدم هنا سارامجو تكنيك مغاير قليلا عن اساليبه التقليدية ، طريقة "المذاكرات" التى افقدتنا بريق طريقة سارامجو الساحرة المعتادة فى اسلوب "الصوت الثالث" فها هنا لا نرى تعليقات المؤلف/الراوى الذكية الساخرة التى عشقها قراء البرتغالى المجنون
*************
هل سهل "المترجمان" المهمة علينا؟...!لا
هل سهل سارامجو المهمة على المترجمان؟....كعادته، لا

٨ نوفمبر ٢٠١٤

السيدة صاحب الكلب و قصص اخرى ل انطوان تشيخوف

اسم المجموعة القصصية: السيدة صاحب الكلب و قصص اخرى
تأليف: انطوان تشيخوف
عدد الصفحات: ٤٢٧ صفحة
التقييم: ٥/٤

فى نسخة راقية بورق عنبرى سميك كانت رحلتى مع "السيدة صاحبة الكلب..و قصص أخرى"  ، ترجمة ابو بكر يوسف فى اصدار مشترك بين دار الشروق و بنجوين

مجموعة قصصية معبرة عن اتجاهات تشيخوف الادبية ، دسته كاملة من القصص متفاوته الطول بين ال٣ صفحات و بين ما يزيد عن ال٨٠ صفحة ، ربما لا تتفاوت بنفس المقدار فى المستوى فكل قصص تشيخوف-و ان كانت مغمورة- بها صدق و ابداع و تميز يجعلها محط اهتمام
***************
وفاة موظف ذات ال٥ صفحات كانت على صغرها -فى رأيى- الاهم ، هى القراءة رقم ١٤ لى معاها ...

اول مره قريتها مفهمتهاش ....و كل مرة اقراها اشوفها بزاوية مختلفة , برؤيا جديدة عن اللى قبلها ....كل مرة اسأل نفسى هو تشيخوف كان يقصد ايه؟؟

كان يقصد ان الذل هو اللى قتله؟...ان الاحراج قتله؟...ان اتعود على الاعتذار لدرجة ان عدم قبوله يمنع وجوده على وجه الارض؟ ...ليه قصه قصيرة مركزة زى دى شدتنى كده؟ انا عاده مش بقرا الحاجة اكتر من مرة .... و كانت وفاة موظف استثناء جميل
****************
السيدة صاحبة الكلب تتوسط ب٢٨ صفحة ، يخلق فيها تشيخوف جحيمه الخاص ... ان كان سارتر يصمم هذا الجحيم  بغرفة مغلقة تضم اخريين يدمروا اعصابك ببطئ ، و ان كان دانتى صاحب رؤية "كلاسيكية" اكثر بجحيم الوحل و النيران و القيود الحديدية ، فان تشيخوف صاحب القلب الرقيق و الذهن المنير فالجحيم فى نظره هو "الحياة العادية الروتينية" التى تستهلك عمرنا و قوتنا بلا طائل او مبرر

و فى نهاية هادئة وديعه تشعرك بانها اقرب للرواية التى كثفت و ركزت و طواها لنا ذو القلب الرقيق فى صفحات معدودة
*****************
تتصدر "عنبر رقم ٦" الحجم ب٨٦ صفحة كاملة ، مساحة تبدو عادية لكاتب تقليدى لكنها تمثل الدنيا و ما عليها لرقيق القلب الروسى تشيخوف....فيصنع بها عالم كامل الملامح بشخصيات ثلاثية الابعاد تملك مشاكلها و احلامها و عاداتها ، عالم مستشفى المجانين الخاص و مناقشة لنظرية "ليس مهم" و خواطر طبيب لا يعلم الالم الا نظريا

بتطورات احداث ثورية و مفاجأت و نهاية صادمة كانت القصة التى قدمها لنا تشيخوف بعد رحلته الواقعية ل ٩ شهور فى سجون جزيرة سخالين البائسة
***************
و تظل مفضلتى هى قصة "المزحة" ذات ال٨ صفحات التى تحمل هيكل كلاسيكى لقصة تدخلك سريعا فى متن القصة فى البداية ، وسط مكثف ....و نهاية مفاجئة صادمة تجعلك تتأمل كثيرا

دينا نبيل
١٥ نوفمبر ٢٠١٤

شهرزاد ل هاروكى موركامى

قصة: شهرزاد
تأليف: هاروكى موركامى
نقلها الى الانجليزية: تيد جوسن
نقلها الى العربية: أمانى لازر
عدد الصفحات: غير محدد
منشورة ضمن جريدة النيوركر

مرة اخرى تهدينا النيوركر قصة قصيرة طازجة ل هاروكى ، قصة مكثفة هادئة لكنها كلاسيكية للغاية بالنسبة لليابانى المبدع

مرة أخرى يقدم لنا نموذج البطل متوسط العمر ذو العلاقة الجنسية الخالصة مع امرأة متزوجة اكبر سنا ذات ابناء كبديل عن علاقات الاهتمام المتبادل مع من بنفس عمره بمشاكلها الواسعه و صعوبتها....نموذج معتاد له مثل رواية 1Q84 و ك بطل روايته سبوتنيك الحبيبة و غيرها

لكنه تلك المرة يبحر بنا الى اعماق النفس البشرية و ال"هوس" و التتبع بدلا من رحلته التقليدية الى الميتافزيقا و العجائب، هاروكى يقدم لنا الجانب الانسانى الخالص به

قصة تبدو انيقة بالانجليزية بحروف "كابيتال" فى بداية الفقرة و بجو النيوركر، لكنها تبدو قريبة اكثر بالعربية ..سهلة المفردات تدفعك دفعا الى قراءتها بترجمة انسيابية ل امانى لازر  متوفرة للقارئ العربى على الرغم من حداثة صدورها لنبقى up to date و لو لمرات قليلة

القصة بالانجليزية
http://www.newyorker.com/magazine/2014/10/13/scheherazade-3

القصة بالعربية
https://sunofamani.wordpress.com/2014/10/11/%D8%B4%D9%87%D8%B1%D8%B2%D8%A7%D8%AF-%D9%87%D8%A7%D8%B1%D9%88%D9%83%D9%8A-%D9%85%D9%88%D8%B1%D8%A7%D9%83%D8%A7%D9%85%D9%8A/

دينا نبيل
١٦ نوفمبر ٢٠١٤

رسالة فى الصبابة و الوجد ل الغيطانى

اسم الكتاب: رسالة فى الصبابة و الوجد
تأليف: جمال الغيطانى
عدد الصفحات: ١٣٩ صفحة
اصدارات دار الشروق
التقييم: ٥/٣

يعطى لنا الغيطانى درسا -مرة اخرى- عن اهمية اللغة فى العمل الدرامى ، دور لا يقل اهمية عن الحبكة، القالب و المغزى، لغة تحول قصة بسيطة الى عمل يخطف الابصار

قلنا و نصحنا بان اللغة هى وسيلة نقل حلمك كمؤلف للقارئ و انها  ربما وحدها تستطيع تخليق عمل باهر و لا يوجد مثال اكثر من رسالة فى الصبابة و الوجد فى قالب الرسائل العتيق المنسى الذى قارب على الاندثار

قصة العاشق العربى الذى احب غادة الغرب "ليلى العربية" فى اجواء سمرقند الخيالية ، التى تبدو تقليدية تتحول بفعل تراب الغيطانى السحرى الى نفخه بها الى ما استمتعت به

كالتلميذ وراء شيخه ، يهفو العاشق الى المحبوب و "هل يدرك الكوكب انجذاب توابعه الى فلكه؟" كما عبر الغيطانى

هذا المقال الذى جاء اقصر مما اردت ببساطة فى مديح احساسك عند طوى الصفحة الاخيرة من رسالة الصبابة ذات التغريبة تلك

دينا نبيل
١٦ نوفمبر ٢٠١٤

حلمك يا شيخة دينا

حلمت امبارح حلم طويل عريض فيه رجوعى لثانوى -كلاكيت عشروميت مره- و ان مدرس الفرنساوى بتاعى بيساعدنى فى انه اجيب تقديرات فى كلية الطب و حاجات عن دكتور اوز و عن فوايد الصنوبر و مزيكا الناى السحرى...و عن كتاب كتبته و طول الحلم بفكر فى الاهداء

يمكن تفاصيل الحلم طارت من دماغى بس فاكرة الاهداء اللى استقريت عليه :

الى ماركيز ، يوسا ، سارامجو و كل من علمونى ان حتى الواقع يمكن ان يكون سحريا

كارل ماركس محمد

"نهار داخلى ، استقبال مستشفى الاطفال"

النايب: عايزين نعمل تحليل للطفل ده ، ادى عينه دمه اهى و تمن التحليل

دينا: طب اسمه ايه عشان بيحتاجوا يكتبوا اسمه على الورق

النايب: الواد عنده ٣ ساعات يا دينا ، محدش لسه سماه ..بس ابوه اسمه محمد

"نهار داخلى برضه ، المعمل"

دكتور التحليل: اسم العيان ايه؟

صوت داخلى ١: احيه ، و هنعمل ايه دلوقتى؟

صوت داخلى ٢: انتى متخيلة القوة اللى عندك حاليا؟! الواد صفحة بيضا و ممكن نسميه اللى يعجبنا ، اى اسم يعجبنا

صوت داخلى ١: نسميه "سميث" و النبى يا دينا ، من زمان و انا نفسى اسمى الاسم ده

صوت داخلى ٢: سميث ايه بس؟ سميث محمد ده اسم بذمتك؟!

صوت اشتراكى داخلى: كارل ماركس محمد .... اسم يملا العين و الله

دكتور التحليل: انتى سرحتى فى ايه كده؟ اسم العيان ايه يا دكتورة ؟!

دينا: "بارهاق" : اسمه محمد محمد

صوت داخلى ٢: يخرب بيت ابتكارك و خروجك من الصندوق بصراحة

سبع فوايد

-دينا: "تصيح" يا نهار الوان الطيف ، يا خراب بيتك يا حظك النيلة يا بنت نبيل

-ماما: "تتفاجئ" ايه عمر خيرت ولا الابنودى حصل لهم حاجة؟

-دينا: هو ده مفهوم الكارثة عندك؟!

-ماما: اصلى كنت سمعت انهم تعبانين ، طب فى ايه تانى؟

-دينا: وزارة الصحة لغت التظلمات الامنية ، يعنى تكليفى هيبقى فى اسوان و لو ربنا كرمنا هنروح السلوم

-ماما: يا شيخة خضيتنى ، طب و ماله ما تروحى...السفر فيه ٧ فوايد

-دينا: اروح فين؟! ما كل بنات ال٣ دفع اللى فاتوا خدوا تعينهم جنب البيت مش معنى حظى اهلى انا يعنى؟!

-ماما: بلدنا كل يوم بحال ، متشغليش دماغك...تبات نار تصبح رماد

-دينا: يعنى مش كفاية صحابى اللى ليهم نيابة فى الجامعه هيسبقونى بكذا سنه و كمان اتسوح انا فى الاقاليم وسط العقارب و التعابين؟! و هما فى العباسية

-ماما: عجبتك الانتخة؟ و يفوز باللذات كل مغامرا

-دينا: هى مالها طالبة معاكى امثال كده ليه النهاردة؟! عموما النقابة هتعمل وقفة و ربنا يستر

-ماما: و هتروحى؟

-دينا: عندى شغل يومها ، وقت الله يعين الله

-ماما: ايه ده هو انا مكنتش قلته المثل ده؟! :D

عزيزتى جلوريا

عزيزتى Gloria Gaynor ، تحية طيبة و بعد..

الجواب ده اللى غالبا مش هيوصلك مكتوب مخصوص عشان شكر ليكى ، اغنيتك اللى طلعت بصوتك سنه ١٩٧٨ قبل ما اتولد اصلا بكتير ، انقذتنى لعدد قد لا يحصى من المرات...لا تشجيع نافع و لا منتخب شافع يا جلوريا يا اختى  ...التهييس ملى الكيس و مشيها التهييس و خليكى مؤدبة

لما بقع فى مصيبة متوسطة مفيش غير صوتك العالى على خلفية الموسيقى الدوشة فى تسجيل بائس الكوالتى بتاعه وحش لكن اتعودت عليه و مبقتش اقدر اغيره او ادور على احسن منه

'I Will Survive' 
هى الحل شبه الوحيد فى الظروف الالوان دى

عارفه يا جلوريا -و اسمحيلى اقولك جلوريا كده حاف من غير غموس- سمعت حدوته زمان عن راجل حكيم -ما هى كل الحكاوى بتبدأ كده- بيعلم احد اثر المشاكل ، قال له كل ما تتضايق من حاجة دق مسمار فى الخشبة دى ، رجع لقى الخشبة مرشقة من فوقها لتحتها مسامير ...شالهم واحد ورا واحد و فى الاخر قال له اهو المواقف السيئة كده هتروح اه بس هتفضل الخشبة مخرومة من اللى عملته

ما انكرش انى مش فاهمة هو عم الحكيم ده كان عايز يقول ايه بس اظن انه يقول ان "البقاء" لوحده مش كفاية ...... امممم بس اهو الموفر

عزيزتى جلوريا ، شكرا على المتوفر

دينا نبيل
١٦ نوفمبر
(الشكر لساعى البريد)

اسباب للحياة

من الصبح قاعدة بدور على سبب تمسكى بالحياة او السبب اللى بيدفعنى انى اصحى من النوم و اكمل اليوم ، و بعد عصف ذهنى طويل اكتشفت ان حلمى الاهم فى الدنيا -لا الجواز ولا الطب ولا الفلوس- حلمى انى اخلص قائمة التو ريد بتاعتى

طب و الله ما بهزر ، بحس ان تكملتى فى الدنيا هدفها انى اجيب فلوس و اكون فى صحة كويسة و عندى حياة مستقرة نفسيا و عاطفيا و مهنيا  عشان الكام ساعه اللى بخطفهم دول فى الروقان ده

و بما ان قائمة التو ريد عمرها ما هتخلص على الاقل لان فيها ركائز اساسية زى : رباعية الاسكندرية ، خماسية مدن الملح ،  خماسية الساقية ، الحرب و السلام بترجمة كاملة ، موبى ديك ، لعبة الكريات الزجاجية .نهايك بقى عن ال٤٢ مجلد بتوع قصة الحضارة و موسوعه حسن سليم  ...يبقى هاعيش للابد :D

ريفيو القصص القصيرة

اصعب ريفيو يتكتب هو ريفيو "مجموعة القصص القصيرة" و ل حد مهووس زيى بالكتابة عن الكتب ، بعتبر الكتابة عنها مهمة شاقة

فى ٣ طرق ، الاولى انك تقسم الريفيو على عدد كل القصص و تكتب تعليقك و يمكن تقييمك لكل واحدة على حدى و ده -عن تجربة- ريفيو متعب فى كتابته و اطول من انه يتقرى ...فى كمان طريقة كتابة ريفيو واحد عن القصص كلها و عادة الطريقة دى صعبة شوية بتبقى مش عارف تكتب عن ايه و تسيب ايه ...و فى طريقة انك تختار العلامات البارزة فى المجموعه بس و تحكى عنها و اللى عادة بيكونوا فى حدود ٣

و طبعا فى دايما الطريقة الرابعه ، انك تفضل تفاضل و تحتار بين الطرق لحد ما ال٤٨ ساعه الاولى تعدى و ده هيؤدى لعدم كتابة اى حرف عن الكتاب اللى ممكن تكون اعجبت بيه جدا و عندك كلام كتير عنه

#قواعد_كتابة_الريفيو_اللى_مش_اربعون

اتفاق جنتلمان

احنا نعمل اتفاق جنتلمان , ماشى؟

من ناحية لو انا اتخطبت -لا قدر الله- ارحمكم من هرى "in relation with" و صورة الايدين المتشبكة و صورة "انا عروسة" بتاعة البنوته الصغيرة , ولا هاقرفكوا بعشروميت بوست قبل الفرح

و من ناحية تانية لو انا انتحرت , ترحموا روحى الغلبانة المعلقة مستنية الفرج من الهرى و اللت و العجن و فتاوى الشيوخ , و تشريح ام حالتى النفسية

اظن كده فير

كتب/موز بالكسترد/سليفى

اليوم ده طويل جدا

الصبح رحت المكتبة العامة رجعت الكتب القديمة و استعرت 5 جداد , و من اللى رجعته كتاب الغيطانى اللى قررت اخد منه اجازة اسبوع عشان نرجع لبعض بشوق اكتر... جبت رسالة الصبابة و الوجد , نسف الادمغة , ما رأيكم فى شكلى الان, السيدة صاحبة الكلب , القوس و الفراشة

طرت بعد تأخير على الكلية اقابل Sarah House رغينا لما شبعنا , و طلعنا على "ابو صلاح" كلنا بيتزا و مكرونة و اتعمينا اكل , ده انا لسه شبعانة لحد دلوقتى...حتى الحلو -فطيرة الموز و الكسترد- معرفناش ناكلها من حلاوة البيتزا

بعد مشكلة المترو طلع عينينا فى المرواح ,لا فى اتوبيسات ولا اى منفذ و ركبنا 3 مواصلات فى بعض

ما صدقت روحت البيت , لقيت ماما بتلح انى اروح معاها فرح...مرضتش اكسفها ....غيرت هدومى و لبست الحته النضيفة و طلعنا عالفرح

قول سيبنا من ان الفرح كتيان و ان تلت اربع بنات الفرح سايبين العروسة و قاعدين بيحاولوا ياخدوا سيلفى و بعد المحاولة ال13 -عدتهم من الفضا- قدروا ياخدوا الصورة المنشودة , و انا قاعدة بغنى (افتح ازوزة ولا مالوش عوزة ,متحسي بيا يا استاكوزا) بتاعه الليثى ... و صحاب ماما بيشوروا عليا ك الضكتورة التنكة اللى لابسة نضارة و مش واقفة مع البنات, الاهم ان العروسة اصغر منى ب5 سنين؟! العروسة كانت بتستهجئ اسمها و انا بقرا ل هيجل! ...تلاميذنا فكرونا عجزنا

و يختم اليوم بسواق تاكسى بيتمنى عوده مرسى او حسنى مبارك الاتنين مع بعض؟!

الصبح اجمل بيكوا

البوست ده عن صوت فرانك سيناترا الحزين و هو بيقول
Then if you go, Ill understand.
Leave me just enough love to fill up my hand.

و عن همس فيروز و هى بتقول :
"ريما ريما الحندقة شعرك اشقر ومنقى واللى يحبك ببوسك واللى بغضك شو بيترقى"

و عن "نتع الست من الشمخ الجوانى" فى :
" غني له الحان الغرام،  احكي له أسباب الهيام وافرح يا قلبي بالمرام وأبلغ مناك ويا الحبيب افرح يا قلب"

#من_اسباب_الصحيان_من_النوم
#الصبح_اجمل_بيكوا

الثلاثاء، 11 نوفمبر 2014

بلد جاكتات

النهاردة صحيت رايقة ، مخططة انى هانتقل من شبرا للعباسية اروح الدمرداش امضى عالسريع و بعدين اطلع على الاوبرا اتفرج على الافلام و اشوف فرصه عمل الكارنية

لبست الجاكيت الجديد اللى نقشته زى جلد النمر ، شنطة لميع سودا و صغيرة مش جراب الحاوى اللى بروح بيه عادة ، لمعت الجزمة ، حطيت روج فاتح و رشه برفان منعش بريحة الخوخ

سيبك من عنكننه انى ادبست فى شيفت و بدل ما امضى و اروح قضيت اليوم فى المستشفى من غير البالطو و ان كان شكلى عجيب و انا "شيك" وسط العيانين ، و ان افلام المهرجان راحت عليا تانى

الغريب هو المواقف اليومية اللى اختلفت لمجرد انى غيرت الجينز الازرق و تيشرت سبونج بوب ، اول ما طلعت الاتوبيس ٣ قاموا عشان يقعدونى ، اروح اشترى نسكافية الراجل ينفض لكل اللى واقفين و يجيب لى قبل الكل و يدهولى بابتسامة كمان!! ، ده حتى الراجل بتاع السندوتشات اللى عادة فاضية  و كتيانة النهاردة متوصية -ده السندوتش كان هينفجر من كل البطاطس- و معاه قراطسين واحد مخلل من كل صنف و التانى بتجان مقلى سخن ، فى السكة و انا راجعه التباع يسيب لى ٥٠ قرش فى الاجرة

اليوم -يالعجب- مفهوش معاكسة او قلة ادب على العكس مجاملات لطيفة و جو مختلف :D

ما انا هو انا يا بشر ، بلد جاكتات صحيح

#ماشية_الدكتورة_كده_كده_كدهو

رسائل الى كارمن

و اعلمى يا كارمن ان المصائب الصغيرة ليها متعتها الخاصة ، بتكسر حلاوة الحياة اللى تخنق ...ده اللى عبر عنه عمك كونديرا -ما انا حكيت لك عنه- و اطلق عليه مفهوم النشوة السوداء

و ان -وفقك الله- للمصائب المتوسطة ميزة انها تنسيك المصايب الصغيرة.... اما المصائب الكبيرة فربنا يحوشها عنك لعل دعوتى تنفع فى انها تلطف فيه مش تمنعه
و اوصيك يا كارمن بانك تفهمى انجليزى و تقريه ، و تتكلمى شبراوى اصيل...البسى بره اشيك حاجة عندك و فى البيت ترنج قديم....دوقى الاكل الايطالى و الهندى و الصينى و الفرنساوى و كلى -بجد- كشرى

اضربيها صرمة يا كارمن ، و لو تعرفى تضربيهم بيها كمان يبقى افيد

#رسائل_دينا_بنت_نبيل_ل_كارمن_بنت_اللى_ميتسماش

سلامات يا سيما

هو انا كنت قلت ان شاء الله؟! ... اعتقد لا

بهوات مهرجان السينما بعد ما غبت من الشغل و صحيت بدرى و "سافرت" من شبرا للجيزة مواصلات و سينما و مشى ، مرضيوش يدخلونى من بوابة الاوبرا حتى !!!

الكارنية يا انسة ، تقول له هاحضر بتذاكر زى المهرجان اللى فات انا مش اول مرة احضر مهرجانات و منهم مهرجان القاهرة ، يقولك اصل جالنا اشارة ان التذاكر تتباع فى مسرح الجمهورية ....يا ابنى ازاى افلام بتتعرض فى الجيزة يتباع تذاكرها فى وسط البلد؟! فى شرع مين يعنى؟! ما المهرجان اللى فات التذاكر على باب السينما ...يقول لى اصل النظام اتغير ، يا اخويا يلعن ابوكوا على ابو نظامكوا ، هو انتوا متعرفوش تنظموا حاجة خالص من غير غباوة التتاش المصرى!!

المهم بعد ما رجعت من على باب الجنة ، عملت المتوقع من اى بنت مخنوقة و حد وقع من نظرها .... رحت محل جديد و اشتريت هدوم ب٤٠٠ جنية خلصت فيهم المرتب و نص المصروف و فوقيهم فلوس تذاكر  المهرجان كلها

#بس_سيبك_الجاكيت_اللى_جبته_ظريف

الحرية مسؤولية

اهلى ملهمش عين يتكلموا بعد كده عن "الحرية مسؤولية" و الحوار ده للابد ، هو فى مسؤولية اكبر و اخطر من انك تمسك ريموت التليفزيون ، ها ؟ ها؟ ابدا مفيش طبعا

امبارح كنت عاملة شاى بالقرفة ، فاتحة كتاب الغيطانى ، جايبه على الريسيفر اذاعه الاغانى ، عبد الحليم بيقول "و فى وسط الشوق و الحنية ، غمضت عينيا شوية" .....و وسط كل ده بابا قاعد ينفخ و يزبد فى صمت ، قلت يا بت خليكى ذوق و اديله الريموت و الاجر و الثواب عند الله و خليها عليكى ....ياخده و يجيب برنامج عكاشة مع احمد موسى!!!

فانا طبقت نظرية حليم "رميت الورد طفيت الشمع" قمت رميت الشاى فى الحوض ، قفلت الكتاب على البوك مارك ...و قررت اقعد اتريق عليهم و اغلوش ....العكننة بعكننة و البادى اظلم

#اذا_مت_ظمأنا_انشالله_ما_حد_شرب

العصير

المصريين عندهم ايمان عميق -غير قابل للتشكيك- فى القوة السحرية للعصير ، اه و الله ما بهزر

العيان متعور ، ضغطه واطى ، ضغطه عالى ، انخفاض فى السكر او ارتفاعه برضه ، العيان مكسور ، مهجور ، ازمة نفسية/عصبية ، العيان فى الرعاية المركزة ، العيان على جهاز تنفس صناعى ، العيان على انعاش قلبى رئوى CPR -و ال٣ اللى فى الاخر دول شفتهم بعينى و ربنا شاهد- ، هتلاقى حد من اهل العيان بيقول الجملة الخالدة: طب نجيب له عصير يا ضكتور؟

هتحاول تشرح لهم ان العصير ملوش دعوه باى حاجة و ان اللى بتباع فى العلب ده مش عصير من اصله و ان ابوهم عنده سكر و مينفعش ....و هتفشل ، هتفشل فشل ذريع، فى الااخر هتستسلم و تتقهقر و تقول لهم ماشى

ساعتها هيخبطك فى وشك السؤال التالى: طب نجيب عصير مانجا ولا برتقان؟....هتحاول تشرح لهم انها متفرقش و ان الاتنين جلوكوز و الوان صناعية اصلا ، هتفشل برضه فشل ذريع...هتستسلم -تانى- و تقول لهم لا عصير برتقان طبعا المانجة ممنوعه
**********
و بحثا فى جذور المأساة دى وجدنا ان اجدادنا المصريين كانوا مؤمنين بالقوى العلاجية ل كوكاكولا اول ما نزلت مصر و كانت نادرة شوية....و قيل ان الدكتور صاحب بابا كان بيوصفها لمرضى النزلة المعوية !!

#قواعد_العصير_اللى_مش_اربعون

الحبكة / التكنيك

علما بان التقييم الادبى (الحبكة - اللغة- التكنيك..الخ) ملوش علاقة باعحابك او كرهك للعمل ، العمل اكس بيلعب دور ، ان المؤلف و هو بيكتب يضرب وتر حساس فيك بيلعب دور

مثلا رواية "حديث الصباح و المساء" رواية اوستيك و شغل فنادق ، تكنيك عبقرى ... مش الشغل المصرى بتاع الفهلوه ده خالص ، رواية مؤلفها اخد وقت يظبط و يعدل و يركب قصته فى قالب مبتكر .... مع ذلك مش هتلاقيها الرواية المفضلة عن ناس كتير

على جانب اخر ، رواية زى "الاخر مثلى" ل سارامجو احد رواياتى المفضلة على الاطلاق ، مع انها مملة و بطيئة و ٩ من كل ١٠ هيبدؤا فيها هيسيبوها قبل النهاية ،يعنى مش مشوقة......و لا هى رواية "عظيمة" زى الحرب و السلام ولا الاخوة كرمازوف ولا موبى ديك عشان تصبر عليها و دى لها بدل الفرصه ٢ و ٣.... الاخر مثلى عظيمة بكل ديفوتها و مشاكلها و كرفاتها على الاقل بالنسبة لى، مع ان اى حد بيقرا ل سارامجو هيقولك انها من رواياته الكتيانة

كيت كات

-الورد ولا الفل؟

كيت كات

-جلاكسى ولا كادبورى؟

كيت كات

-يوسا ولا ماركيز؟

كيت كات

-انف و اذن ولا رمد؟

كيت كات

#فى_مديح_الكيت_كات
#و_ماذا_كانت_ستفعل_فى_الشيفتات_الطويلة_بغير_الكيت_كات؟
#صديقة_الطلبة_و_عدوة_الميزان_الاولى