عزيزتى رفايع

عزيزى رفايع ، تحية طيبة و بعد

ازيك يا بت؟ عاملة ايه؟ ايش احوالك؟... حاسه بالوحدة اكيد بس انا رجعت تانى اهو نتكلم من غير صداع

انت كبرتى بقى و بقى عندك ٥ سنين و السنه فى عمر المدونات ب١٠ سنين زى الكلاب كده ، اعصابك بس مقلش انك كلبه بقولك زى زى

انا زهقت من الفيس يا رفايع يا اختى ، اللون الازرق بقى يجيب لى اركتريا لوحده كده...الناس كلها بقت مركزين دوت كوم ، منبهين دوت نت، مفيش كلمة تتكتب الا و الاقى الناس بتهب فى وشى و بتصرخ مع ان الامر اتفه كتير مما يبدو

من ناحية انا مخنوقة من السلفيين و نفسى افصص كلامهم و افككه و انتقده من جواه خاصه انى بقرا فيه اليومين دول.... و من ناحية ماليش مزاج انى اقعد اجادل و اتخانق و اتشتم من ناس "اسلام ويب" عندها له مصداقية عن كلام طه حسين و العقاد ، الله و اعلم مين صح و مين غلط لكن الاكيد الاكيد اكيد اننا مختلفين....يمكن مختلفين لدرجة لا يمكن الرجوع فيها

من ناحية تفسى ارجع اتكلم فى السياسة و اتكلم فى افكارى و. ذكرياتى و صدماتى المتتالية ...بس ماليش دماغ ولا مرارة للنقاشات التالية، للشد و الجذب و التفاصييييييل اللى بتفصل اى مود فى الكون

عارفه يا رفايع يا اختى النهاردة الافكار جابت بعضها و افتكرت ايام المجلس العسكرى....الايام كانت ابسط، الحق كان واضح و الباطل كان باين ، الاخوان والعسكر و الاسلامجية فى ناحية و احنا فى ناحية ، كانت سهلة و بسيطة

ايام ما الابنودى رجع فيا الروح ب"و اللى سرق هيخبى شيلته فين" ، كان كل اللى بحبهم فى جنب و كل اللى بكرهم فى جنب...كانت صريحة

دلوقتى كله فى بعضه ....بقول يمكن انا اللى اتغيرت لوحدى؟! اممممم يمكن برضه يا رفايع

حتى "احنا" اللى كنا فى جنب ده اتغير ، النشطاء بقوا نشطاء من بقوا احنا....بقوا بيتريقوا علينا فى فرحنا -كلام ماهينور فى ٦ اكتوبر- و يتريقوا علينا فى الحزن زى كلام علاء السخيف يوم ارهاب سينا

و انا مش عارفه اخد جنب ، لا عمرى هابقى مع اللى اشتهروا فجأة ، ولا مع اعداء الماضى ، ولا قطعا مع اللى ممكن يقتلنى قربان لاله مش شبه الهى ، ولا هابقى ابو الفتوح على اخر العمر

صدعتك يا رفايع صح؟