الجمعة، 30 ديسمبر 2011

ما قرأت فى 2011


كما اقول دائما...عام 2011 كان سئ فى كل حاجه بالنسبه لى الا الكتب D:

حطيت هدف 52 كتاب فى السنه...و بسبب الثوره و اجازه نص السنه اللى خدناها مرتين وصل الامر لقراءه 180 كتاب ..استمتعت ببعضهم , ضيعت وقتى فى بعضم, بعضهم متوسط المستوى و هو عاده ما انسى انى قرأته بعد اسبوع

الاتى : لائحه بالصور من اغلافه كتب 2011




الخميس، 29 ديسمبر 2011

حجرتان وصالة : متتالية منزلية إبراهيم أصلان

بسيط لدرجه التعقيد...سهل لدرجه الصعوبه...فعلا يستحق وصف "عرض للدنيا من ثقب ابره"...حبيته بلا حدود..138 صفحه من الحياه اليوميه لكهل على المعاش

استطاع ابراهيم اصلان تكوين جو عام شديد الهدوء و الاريحيه للقارئ ..لغه بسيطه و شخصيات محده بدقه و تكوين قصصى ممتاز فهى ليست بالقصص القصيره او حتى بالروايه فهى اشبه بالاقصوصات ..فالاجواء بيت طبقه متوسطه و الابطال ناس عاديه تشوفهم كل يوم يمكن حتى يكونوا اهلك او انت فى يوم من الايام


عارف لما تتأمل حاجات صغيره و يتهيألك ان محدش واخد باله غيرك ثم تفاجئ باحساسك ده مكتوب فى روايه؟؟!!...وصف حبه لزجاجه المياه من غير غطاء , قراره بطرح اى سؤال حين يقرر ذلك لان العمر قد فات,وصفه لشكل الطبق المكسور ,ان يكتشف الانسان ان الوقت قد سرقه دون ان يهدى بدله القديمه لاخواته

قد تشعر بالملل يتسرب اليك قرب النهايه و لعله ملل مقصود فهو يمثل رتابه الحياه نفسها ...الحياه العاديه و ليست حياه القصص و الروايات المليئه بالاحداث على غير الواقع...قد تشعر بالرتابه ببساطه لان الحياه الطبيعيه رتيبه ...لكن كل هذا لا يدفعك لاغلاق هذا الكتاب الممتع

ممتعه بلا سبب...من الكتب اللى كنت اتمنى انى اكتبها او نفسى اكتب حاجه زيها فى يوم من الايام

:)

رابط الكتاب "بعد جهد جهيد"
http://www.goodreads.com/ebooks/download/7654939
******************

صفحه الكتاب الناقصة الاخيره
http://www.goodreads.com/review/show/252244168

الأربعاء، 28 ديسمبر 2011

شاب كشك فى رحلة البحث عن الجادون

كبدايه عجبنى الاسم جدا...و عجبتنى فكره الجادون اللى مصر كلها-وانا منهم-دورت عليه, فاكرين لما شركه كوكاكولا رسمت اجزاء العجله على غطا الازازه بتاعها و انت تدور و تشرب و توجع بطنك و تجمع كل الاجزاء الا الجادون اللى محدش فى مصر لاقاه .... توقعت ان الكتاب ساخر زى كتب الشباب و فؤجئت بان الكتاب جاد الى حدا ما 


على الرغم من اقتناع و اشاده كل من قرأ الكتاب ...ببساطه لم يعجبنى الكتاب فاما الاسباب فبسيطه 


اولا:احساسى بجلوس الكاتب على كرسى عالى -زى كرسى حكم التنس-و بيدلو بدلوه من حكم الحياه ...فالاول و الاخر ده شاب اكبر منى حاجه بسيطه فرأيت انه لا حق له فى كل هذا القدر من الحكمه و حسم الامور بل و نصح القارئ 


ثانيا:على الرغم من انى قريت الكتاب اليكترونى -ببلاش-الا ان كتاب زى ده خلص منى فى ساعه الا ربع ب20 جنيه من دار "دون" ...فكره مروعه طبعا ...20 جنيه ليه؟؟؟!!!ده احلى كتاب لتوفيق الحكيم ميجبش مبلغ زى ده فتخيل انه كتاب لكاتب شاب 


ثالثا:بمجرد وصولى للصفحه المئه تسرب الى الملل بشكل عجيب...و بالفعل لم يأت الكتاب بجديد فالنغمه واحده و المقالات متشابه 

-الكتاب جيد او لنقل متوسط المستوى ....انا عموما ناقد لاذع و لعلكم اكثر تعاطفا لكن اشهد له بانه كتاب ليس شبابى بالشكل الذى تتخيله

الثلاثاء، 27 ديسمبر 2011

تخلص من عقلك شريف عرفه



شجعنى لقراءه هذا الكتاب غلافه و صوره مؤلفه مشيرا الى بصباعه و كأنه عرابى و اعاد لى ذكريات صباع الفنجرى الشهير...و لذا و كنوع من الانتقام من الكاتب و عرابى و الفنجرى قررت قراءه الكتاب...اعترف فى البدايه بانى لست من محبى التنميه البشريه او الذاتيه او اى كان اسمها بل كون هناك وزاره فى مصر اسمها "التنميه المحليه"يدل على ان لفظ التنميه ده فى حد ذاته لفظ فاشل عمليا -لاحظ استحاله اقتران لفظ ناجح مع وكاله حكوميه-...لذا بدأت فيه 


لم يكن بالسوء الذى تخيلته لكنى تيقنت فى وسطه انه كتاب رائع فعلا للاطفال و المراهقين!!...و الله ما بهزر فعلا الكتاب ده بجمله -البريئه السذاجه احيانا- و صوره الكاركتيريه فعال لتحت 16 سنه


لكن لا تحاول اقناعى بانه مفيد لمن تخطى مرحله الثانويه العامه...لا تنخدع بالغلاف الانيق و العنوان البارق او المؤلف الشاب الجذاب فهو كتاب سوقى كغيره من اجل البيع ولا شئ غير البيع


على رأى احمد خالد توفيق :"الطريقه الوحيده لتغير حياتك بكتاب تنميه ذاتيه هو ان تكتبه"..ساعتها هتكسب فلوس تبقى تغير حياتك


امضاء
عدوه التنميه الذاتيه او البشريه او المحليه او حتى المهلبيه

الاثنين، 26 ديسمبر 2011

أجنحة الفراشة محمد سلماوي

دى المقدمه الرسميه للروايه محمد سلماوى الشهيره : اجنحه الفراشه التى اشتهرت بكونها"الروايه التى توقعت بالثوره"....المقدمه تعطيك احساس بانك ستقرأ سونته من سونتات شكسبير...اما التالى فهو رأيى انا : 



لعبه تسويقيه قذره...اراد الناشر تسويق روايه تافه و فاشله و ساذجه و بيعها بنسخ باهظه الثمن باسم الثوره التى لولاها ما ذكرت تلك الروايه فى اى حديث ثقافى خارج بيت المؤلف 


:دعونا ننقد الروايه على اساس منظم 


اللغه:لغه ركيكه بلا مبرر ...و استخدام غير مبرر للغه الفصحى على لسان الشخصيات خاصه و ان بعضها متوسط الحال 


الاحداث:احداث مصتنعه بلا اى مقدمات...فضحى تترك زوجها بلا سبب محدد...عبد الصمد يلجأ للشذوذ بلا داعى و من اجل مئه جنيه؟؟!!!...ايمن يعثر على امه لكننا لا نفهم ابدا ماذا حدث و كيف و لماذا...اما عن احداث الثوره فحدث ولا حرج فهى فقط ليست مصطنعه و مبتوره بل انها حتى ليست مطابقه لما "جسد على ارض التحرير"على رأى الناشر 


الرمزيه: احد اكثر الرموز ركاكه ..فهى حتى لا ترقى لطبقه الرمزيه 


:ملاحظات جانبيه 
اختيار سئ لاسماء الشخصيات فى رأيى :ضحى و ايمن و مشيره و عبد الصمدو مدحت...فى رأيى اسماء سيئه- 


اشتم رائحه تقليد لعلاء الاسوانى من حيث تعدد الشخصيات..الابعاد السياسيه...اشتياق ضحى الجنسى...شذوذ عبد الصمد ...لعل نجاح "خلطه الاسوانى"اجتذبت تقليد اعمى حتى من الكتاب الكبار 


تعلق الكاتب بقسوه بفكره اسم الروايه"اجنحه الفراشه"فقرر اغراق الروايه بالفرشات فتاره وصف ضحى بانها دوده فى شرنقه منتظره تحولها لفراشه...و تاره كتاب ملئ بصور الفراشات...و تاره تأثير الفراشه..وتاره شكل الفراشه..و تاره الفراشات الفرعونيه...خلاص فهمنا ان الروايه اسمها اجنحه الفراشه 


بدايه ممطوطه...و نهايه متسرعه..و وسط مهلهل

الأحد، 25 ديسمبر 2011

إييييييية العبارة ؟!! ... ياعسكرى


اول اغنيه تعبر عن اللى جواااااياااااااااا......


حزر فزر من غير وزن

خايف النكته توه فى الحزن

عندى سؤال هبفرتك مخى 

لو انا كتمته و مسألتوش

ايه العباره؟؟؟!!!


 ايه هى الثورة؟! مين اللى عملها؟! فين اللى حماها؟! مين اللى سرقها؟ مين ماسك إعلامها؟!

مين اللى حاكمنا محاكمة عسكرية؟! مين اللى بيوصفنا إن احنا بلطجية؟!!

فين الدبابة!؟ مين اللى سايقها؟! مين اللى دهسنا؟! ايه العبارة؟!

مين اللى واكسنا؟ مين اللى مجوعنا؟! مين قاتل فرحتنا؟! ايه العبارة ؟


مين اللى مخوننا؟!مين اللى مفرقنا؟!مين اللى كابتنا؟!ايه العباره؟

السبت، 24 ديسمبر 2011

العسكر و الخطايا السبع المميته!!







على طريقه فيلم se7en بتاع براد بيت ...دعونا نحلل الخطايا السبع المميته لحكم العسكر فى عام اذاقونا فيها المرار و طعم الدماء :




الغرور :  "جيش مصر خط احمر" ...."اسقاط المجلس العسكرى يعنى اسقاط الدوله"..."اسقاط المجلس العسكرى يعنى اسقاط مصر" ....  " إن القوات المسلحة ممثلة في مجلسها الأعلى على استعداد تام لتسليم المسئولية فورًا إذا أراد الشعب ذلك من خلال استفتاء شعبي إذا اقتضت الضرورة ذلك"..........كانت تلك عينه من الخطابات و الشعارات و التصريحات التى اطلقها العسكر اذا اقتضت الحاجه و عاده ما تكون الحاجه هى كارثه ادت لموت عشرات برصاص ميرى.....يكفى هؤلاء البشر غرورا بانهم هم مصر و انهم هم الخط الاحمر بينما نحن الخطين الحمر زى الزمالك نتغلب رايح جاى...يكفيهم غرورا بانهم هم الخط الاحمر بينما كلنا موبانيل .....هم مصر و احنا ضيوف ....محدش منهم سمع المثل المصرى الشهير "ياما امم زالت و دامت مصر"...و مش معنى هما يعنى اللى مش هيمشوا غير باستفتاء و هو رئيسهم كان راح باستفتاء؟؟!!




الطمع : كلمتين فقط يدلوك على الطمع ...الكلمه الاولى :وثيقه...الكلمه الثانيه: السلمى...ايوه اديك فهمتنى انها وثيقه السلمى اللى مش بس كانوا عايزين نص فلوس الموازنه من غير ما حد يناقشهم لا دول كمان هيكونوا دوله فوق الدوله ...يعنى مش كفايه عليهم سنه هبش من غير حساب لا كمان عايزين البوفيه يفضل مفتوح امد الدهر..ده الطمع وحش حتى!!


الغضب : اذا كان الغضب وحده خطيئه ...فالغضب بضرب النار ضد عزل من السلاح هو الخطيئه الكبرى....على الرغم من انهم بينكروا دايما انهم عملوا اى حاجه لكن كلمات   تتساقط من هنا وهناك باشارات من "استفزاز" جانب الشباب ...فى محمد محمود كان الاستفزاز بالطوب...فى ماسبيرو مفهمناش قوى لكن يمكن الصليب كان مضايقهم و اعتبروه اشاره للضرب........و كانت دائما نتيجه الغضب دماء مصريه بسلاح ميرى عاده او دهسا بالمدرعات فى ماسبيرو


الحسد : حسد المجلس العسكرى الشباب على شهرتهم و حب الناس لهم....و بما ان العين وحشه قرروا الانتقام بمحاكمات عسكريه و اتهامات بالعماله و الخيانه و التأمر و كره الناس فى الشباب ليكونوا هم و هم وحدهم الملاذ الامن.....


النهم : ادخل اى مؤسسه عسكريه...بذح و فلوس و وسع من الرزق ...هو احنا ملناش نفس ...هما بياخدوا كام من ميزانيه الدوله....عندنا مريض الدمرداش بينام عالبلاط ...اه يا بلد


الكسل : بعد اندلاع الاحداث "البالون,محمد محمود,ماسبيرو,مجلس الوزراء,احداث السفاره الاسرائليه" باربع خمس ست سبع ساعات و احيانا يوم يومين يبقى المجلس يتفضل و يتأمر بمنع الضرب و اطفاء الحرائق و اقامه سور حاجز و القاء بيان تافه و اهبل مزود بيد خفيه و اطراف ثالثه و كائنات فضائيه و اصابع فنجريه...لكن لا يتم اجراء تلك الخطوه الا بعد التأكد من قتل 10 او اكثر على الاقل....


الشهوه : و مكفاش العسكر اغتيال كرامتنا و شباببنا و ثورتنا حتى الشرف راح!!!






دول الخطايا القديمه الشهيره و اذا كانوا دول الخطايا المميته امال دول يبقى ايه؟؟
كسر الحلم....قتل الخيال...اغتيال الامل....مسح الكرامه...سحل الاحساس...دهس المستقبل....طعم الدماء .........سنه منيله الهى ما يرجعها


http://www.facebook.com/events/147279238714049/

الجمعة، 23 ديسمبر 2011

بس يا سيدى و رحنا وزاره الدفاع





امبارح بالنسبه لى كان يوم سووووبر...من اجمل الايام اللى عيشتها فى حياتى...من الايام القليله اللى حسيت انى فرقت فيها....


امبارح كانت وقفه احتجاجيه كامله...اول وقفه احتجاجيه ليا ...خرجت فيها شحنه لو كانت فضلت جوايا كنت اتحرقت


رحت الساعه 10 الكليه عشان اشمشم كده هما هيعملوا ايه...لاقيت بنات و ولاد كتير كل واحد واخد لوحه بيضاء و الوان فلوماستر و بيكتب و بيبدع و بيفن...قبلت اصحاب و بعد كسر الجليد على رأى الامريكان بدأت الشغل... حلو قوى انك تتطلع كل غلك و همك و كسر حلمك على ورق..كان كأنه معرض كبير للحزن...صور علاء فى كل حته و كلمات الغضب فى كل مكان...عملت لوحتين شالوهم ناس غيرى بس كنت مبسوطه
انا فى الصوره دى




و الساعه 1 بدأت الوقفه ....و كانت من اجمل ما رأيت...الالف الطبه لابسين اسود ...واقفين طابور طويل من اول العباسيه لاخرها و احنا شايلين اللوح ...و كل واحد فينا حاطط صوره علاء بدبوس على صدرنا....وقفنا كتير وقفه شبه صامته ...حوالى الفين شاب و فتاه واقفين طابور واحد عالرصيف عشان منعطلش الطريق...قلت بينى و بين نفسى اهو دول الدكاتره اللى احب اتعالج عندهم....شباب زى الورد و بنات فل و ياسمين متشحيين بالسواد اه لكن جوانا نار لا تنطفئ....


الناس فى العربيات كان منهم اللى بيرفع لنا علامات النصر ...منهم اللى قالنا الله يخرب بيوتكم وقفتوا حال البلد "مع اننا كنا واقفين عالرصيف" ....منهم اللى بص لنا و مصمص شفايفه "كنت فى يوم من الايام زى دول"...منهم اللى طلع علم مصر و رفرف لنا بيه ...منهم اللى سألنا واقفين ليه؟ حكينا كتير ناس فهمت و ناس لا .....تعبنا اه لكن رغبتنا فى الاستمرار كانت جارفه


طلعنا باربع طوابير ورا بعض الى الجامعه....مصاحبين بالهتاف الشهير "يسقط يسقط حكم العسكر"....داخلنا الجامعه و لمينا حوالينا الطلبه ...ندنا ليهم ينضموا لينا منهم كتير قوى انضموا لينا -معظم دول كانوا بنات- ساعتها بس عرفت ان بنات مصر اجدع من رجالتهم....فى ولاد للاسف كان موقفهم غريب شتمونا و شتموا علاء -اول مره اشوف حد يشتم شهيد- ...منهم اللى قال لنا :هو يعنى عشان هو فى كليه الطب انتوا زعلانين؟ طب و اللى ماتوا فى الكليات التانيه ؟؟ فجاء الرد "طب بس موت انت و احنا هناخد لك حقك... الغريبه ان لما حد كان بيخبط فينا كده كان صوتى بتتحاش  على الرغم من انى لمضه لكن الموضوع كان اصعب مما اتخيل....


كان من المقرر انهاء الوقفه عند الجامعه....لكن تم اجراء تصويت نفضل هنا ولا نطلع على وزاره الدفاع....و كانوا البنات هما القوه التصويتيه اللى غلبت فكره اننا نطلع على وزاره الدفاع خاصه لما شفنا معانا كريم اخو علاء الله يرحمه....كون الشباب كردون حوالين البنات و مشوا البنات فى النص محواطين باجدع رجاله شفتها...شباب بشوفه فى الكليه كل يوم مكنتش اتخيل انهم رجاله قوى كده غير دلوقتى...
انا فى الصوره دى...دور انت بقى


كنا اتفقنا اننا مش هنوقف الطريق ....لكننا فؤجنا بان الجيش قفل الطريق رايح جاى ...اللى نفسى افهمه بس هما عرفوا ازاى اننا جايين على الرغم من اننا نفسنا مكناش نعرف اننا جايين غير من نص ساعه؟؟!!!!......




فؤجئت بالكم المبالغ فيه من السلاح و الرجال و العتاد و الدبابات و المدرعات .....دا احنا شويه طلبه قاعدين عالارض مش التتار!!....كانوا فى الاول و طول الطريق الولاد هما اللى عاملين كردون حوالين البنات...انما فى صلاه العصر كانوا البنات هما اللى عاملين كاردون حوالين الولاد...قضيت ساعتين الارض فى شعارات و هتافات ضد العسكر انعشتنى .....اول مره ليا اخرج اخيرا النار كالتنين .....


و بعد كده جاء الحدث الاهم فى المظاهره....انضمت مظاهره هندسه لينا....دخلوا بنعش رمزى للشهيد الهندسه / محمد مصطفى ....التحمت المظاهرتين و وصل عددنا حسب اليوم السابع ل5 الالف طالب معظمهم طلبه طب و هندسه...


واضح ان القتل بقى بالمجموع ....


و بعد صلاه المغرب ....مشيوا البنات و بعدها بشويه مشيوا الولاد ...و توته توته خلصت الوقفه...يمكن فيوم نجتمع تانى يوم ما نجيب حق علاء  و محمد.......اترككم مع فاصل من بعض  ما كنا نهتف به :


علي في سور السجن وعلي بكرة الثورة تشيل ما تخلي


مش بنخاف مش بنطاطي احنا اخادنا عل المطاطي


يا طنطاوي يا حبيب حسني ابعت هات دبابه تدسني


ضحكو علينا و قالو تغير شالو مبارك و جابو مشير


شدى حيلك يا بلد...الحريه ببتولد


اه لو كان ابن المشير..كانت الف رقبه تطير 


ااااااه ....يا بلدنا...يا تكيه...يا وسيه....حكموكى شويه حراميه "هتافى المفضل"


شالوا حرامى جابوا شيخ منصر...يسقط يسقط حكم العسكر..ايوه بنهتف ضد العسكر..احنا الشعب الخط الاحمر


شلنا حسنى جابوا لنا حسين...كتهم نيله الاتنين


اتلهوا على خيبتكوا..احلقوا شنابتكوا...طنطاوى عرى بناتكو


اه يا مجلس الاوباش...المصريه متتعراش


اللى يقتل اهله و ناسه...يبقى عميل من ساسه لراسه


ارفع كل رايات النصر ...احنا الطلبه نحرر مصر "مع رفع علامه النصر"


حريه......حريه....حريه....حريه


سلميه...سلميه...سلميه...سلميه 


 يا حرية فينك فينك المشير بينا وبينك


يا نجيب حقهم....ينموت زيهم


علاء دكتور ...علاء دكتور...مش بلطجى ولا ديكاتور


الشعب يريد اسقاط/ اعدام المشير 


يا علاء نام و اتهنى ...و استننا علباب الجنه


متعبناش متعبناش...الحريه مش ببلاش 


هنشيله...هنحله...هنفك المجلس كله



الأربعاء، 21 ديسمبر 2011

طب و احنا؟؟!!



طب سيويرس بياخد فلوس من موبنيل...و الاخوان من قطر...و السلفيين من السعوديه ...و احنا ايه ملناش حد بيديلنا فلوس؟؟


طب الجيش هو الدوله و لو سقط تسقط الدوله...و الاخوان هما الدين لو سقطوا يسقط الدين...و احنا بس اللى ولاد كلب نسقط عادى؟؟!!


طب الاخوان خدوا نص البرلمان....و السلفيين النص التانى....و الكتله و الوفد خدوا "لحسه برلمان"...طب و احنا ؟؟؟


طب الكتله الصامته عايزه الاستقرار...و الجيش عايز الاستحمار...و الاخوان و السلفيين عايزين حتى النهار...طب و احنا؟؟؟


طب الشباب و قتلوهم...و البنات سحلوهم ...و الاولاد و يتموهم...طب و احنا؟؟؟


طب الغنى هيسافر كندا...و رجال الاعمال هيروحوا انجلترا ....طب واحنا ؟؟؟


طب السياحه و حرموها...و الصناعه و خربوها...و البورصه و دمروها...طب و احنا؟؟؟


طب فى الاول قالوا حموا الثوره...فى المحكمه قالوا مكنش فى حاجه نحمى الثوره منها...و دلوقتى قالوا مكنش فى ثوره نحميها...طب و احنا؟؟


طب مسرح البالون...و ماسبيرو...و محمد محمود...و مجلس الوزراء...طب و احنا؟؟؟


طب الفنجرى بصباع...و المشير مبيعرفش يقرا خطاب...و عصام شرف بسكوته...و الجنزورى نسى صلاحياته عالحوض قبل ما ينزل..طب و احنا؟؟


طب عكاشه مجنون...و منى الشاذلى بتأتأ..و مجدى الجلاد بيحاول...لميس بتعدل شعرها..التليفزيون المصرى تييييييت ...و الدمرداش مندهش...سيد على غاوى نظريه المؤامره...و عمرو اديب مكتئب...طب و احنا؟؟؟


الجيش بيقول علينا بلطجيه..الاخوان و السلفيين بيقولوا علينا كفره...اهالينا بيقولوا مش مربيين...الازهر بيقول بنلقى انفسنا فى التهلكه...احنا ايه؟؟


طب شفيق مشى...و شرف مشى...و الجنزورى مسك...طب و احنا؟؟


طب علاء و مات....و محمد مات....و الشيخ عماد مات...طب و احنا؟؟


هتقولى احنا مين؟؟...هقولك احنا اللى مش معاهم ...احنا اللى مش الجيش...احنا اللى مش ابناء مبارك...احنا اللى مش فلول...احنا اللى مش حتى الاغلبيه الصامته....يمكن احنا الشباب او يمكن احنا العيال ....المهم ان احنا اللى ملناش حد غير ربنا....قالوا زمان اللى ملوش ضهر يضرب على بطنه و خلاص بطننا مبقتش تستحمل....اشكو اليك :((

العناكب و الله اعلم!!



غلاف قصه"العناكب"المقرره على ثانيه ثانوى عام
دعونى لا اكتفى بمنحى لها نجمه واحده كتقييم...فلو باستطاعتى سحب حتى تلك النجمه لفعلتها 


وضع القصه دى لمنهج  ثانويه عامه وحده هو اهانه لعقل الطالب المصرى و تضييع لوقته اللى لو قشر فيه بطاطس كان استفاد اكتر من متابعه العنكبوت النونو اللى عمال يطنطط من حته لحته طول الروايه التافهه دى و خاصه انه -مستقصد-البطل لدرجه انه عضه مرتين...مقدرش اقول انى قريتها بس لانى قريتها يجى خمسين مره و حفظتها و دخلت فيها امتحان ميت مره و لم استفد منها سوى درجات ..




كان هذا هو الريفيو اللى كتبته عن قصه "العناكب" المقرره على ثانيه ثانوى عام فى مصرنا الغاليه التى تصر على اكل اولادها...ريفيو قصير طبعا لكنه معبر عن الحقد اللى جوايا تجاه القصه دى اللى ضيعت من وقتى الكثير و لم تضف لى شيئا ...


الغريب كان ردود الافعال على الموقع الممتع goodreads بحيث فؤجئت بكم هائل من الاعجابات و التعليقات ....واضح انى مكنتش لوحدى ....


 D'Arcy Adrian-Vallance....من هى تلك الدرسى اللى كتبت القصه دى؟؟...و اذا كانت كاتبه غير مصريه فكيف تم "دبلجه الاسماء" لاسماء مصريه و عربيه؟؟...و الاهم هل تستحق تلك القصه ان تحفظ عن ظهر قلب لملايين المصريين؟؟؟

الاثنين، 19 ديسمبر 2011

علاء كمان و كمان!!

انا فى الصوره دى




امبارح كنت فى الوقفه الاحتجاجيه اللى فى كليتنا -للتنديد-باستشهاد زميلنا علاء عبد الفتاح...على الرغم من كرهى لكلمه تنديد الا اننا نظريا كنا بنعمل كده لاننا مكناش نعمل حاجه مفيده الا الصراخ و البكاء و الهتاف لكنه كان تنفيس لغضب فى صدورنا كاد يعصف بنا..


او دى مره انزل حاجه زى دى ...انتوا عارفينى مليش فى الحاجات دى,الا انها مختلفه تمام الاختلاف بالنسبه لى...


على الرغم من تفاهه ما ساكتبه الا انى وددت تنوين كل ما تم فى هذا اليوم من اوله :


بعد نوم متقلب باحلام مفزعه صحيت الصبح الساعه 8 الا ربع كعادتى....دخلت اوضتى عشان البس الا انى قررت القيام بامر لا تعلم به ماما...التقطت بنطلونى الاسود الفضفاض و بادى اسود و لبست فوقيه فيست اسود ساده...مكنتش عايزه اخرج من الاوضه غير لما اكمل لبس عشان تبقى مفاجاه لماما و ما تستنكرش لبسى لاسود خاصه انها بتمنعنى منه حتى فى حاله وفاه قريب للعائله ...كادت نظريتى تنجح لولا ان الاوضه مفهاش دبابيس للطرحه...اضطريت اطلع الصاله و ماما شافتنى بنفس نظره العتاب فباغتها : عندنا قتيل فى الدفعه عايزانى البس ايه بمبى؟؟!! فاذنت لى على كراهه مع انى لاحظت انتفاخ عينها من البكاء سرا....لفيت 3 بندانه على شكل علم مصر و فوقهم طرحه سودا ساده و حذاء مريح لاستعدادى ليوم طويل ...و لبست خاتم علم مصر لاتمم الشحن النفسى....


من ساعه من نزلت من البيت و لحد ما ركبت المواصلات و انا شايفه مزيج من الاستغراب فى عيون الناس و خاصه الجيران و رغبه عارمه لمعرفه مين اللى مات؟....تركتهم و الدهشه تاكلهم انا مش ناقصه اصلا....و انا ماشيه شفت الدعايه الانتخابيه و اتغظت بشكل كبير و جوايا صوت بيهتف "انتخابات ايه؟؟..علاء اتقتل"


ركبت الاتوبيس و بمجرد ما قعدت استخرجت سماعات موبايلى كعادتى و شغلت اغانى....جاء اختيارى لصوت عمار الشريعى "حبيبى من ضفايرها طل القمر"  


جاء اللحن عذب ممتع و موجع و كأنها بتحضننى و يودينى واحه نضيفه من غير عك.....الى ان جاء 
"
لو الزمن ليِّل ما يرهبنا ليل 


شوقنا فى عروقنا يصحى شمس الشروق
للحلوة قلب كبير يضم الولاد 
وزاد وزوادة وضلة وسبيل 
الموت والاستشهاد عشانها ميلاد 
وكلنا عشاق ترابها النبيل

و كأنك ضغطت على زناد مدفع رشاش....انطلق الدموع من عينى بلا انقطاع و لكنى هذه المره لم احمل نضارتى الشمس السوداء الضخمه التى تنقذنى عاده...هذه المره لم اهتم بتكفيف دموعى بل تركتها فانا فى حاله حداد و هذا من حقى ....

ادركت بانى اخترت الاغنيه الخاطئه فانا على حافه الدموع اصلا و اغنيه كتلك تبكينى بلا مناسبه تعتبر الان ثقل على اعصابى....امسكت الموبايل و بحثت عن اغنيه اقل وطأ على اعصابى : غنى لى وحدى فى اذنى محمد نوح بحماسه المعتاد "من صغر السن" ......الى ان غنى : 

ترحيله....أجرتنا قليله ترحيله....صحتنا عليله ترحيله....أنا شيلتي تقيله مش قادر ولكني بحاول علشانك ازرعها سنابل وعشانك ابدورها قنابل لو ضربك خولي الترحيله يامني عينى

وصلت السيكشن لقيت غيرى و غيرى لابسين اسود....بعد ما خلص الراوند روحت على الكليه عشان الوقفه....قررت بلا سبب واضح ان اخلع البندانه الحمراء و البيضاء و قررت ان اسود تماما لعلى احرجت من وضع علم مصر قبل ان اعلم قاتله ...

بعد صلاه الغائب على روحه بدأت الوقفه....كان حاضر العميد و رئيس الجامعه و عميد كليه الحقوق -عشان هو اللى رافع القضيه- و ناس كتير تانيه من ضمنهم شيخ من الازهر و بدأ هو الكلام.....

الشيخ عبد الله بركات ابتدى كويس عن الشهيد و مكانته و قدره عن الله....صحيح كنا بنبكى لكننا كنا مبسوطين ان علاء فى مكان افضل ....حسيت انى مش لوحدى فيما سميته -الحزن النبيل-.....لكن الشيخ عبد الله بركات "سرح" فى الكلام و ابتدى يتكلم عن "التغيير السلمى" و "اهميه ان الانتخابات تكمل" و "اى كان اللى هيختاره الشعب نقبله اخوان سلفيين مش مهم"  واشياء من هذا القبيل ....هنا بس ضاعت رهبه الموت و نزع قناع الدين و ظهرت الرساله اللى الشيخ عايز يقولها ....تململت قليلا فى البدايه فى سرى....زاد تململى اكثر خاصه مع نسيان الشيخ لشهيدنا و مدحه فى الانتخابات ...فؤجئت بانى لست وحدى من تململ و علا الصياح "يسقط يسقط حكم العسكر" مدوى و قاطع لكلام الشيخ اللى الشباب تقريبا طردوه....هتفنا "طلبه طلبه" عايزين طالب مننا يحسوا بالهم اللى احنا فيه

انتخابات ايه يا شيخنا و نيله ايه؟؟....هتموتنا عشان الانتخابات...يلعن ابو الانتخابات 

بعد كده جبه شادى الغزالى حرب اللى شفى بعض من غليلنا....

انطلقت الهتافات -وانا معاهم- :

"عسكر يقتل مدنى ليه.. إحنا صهاينة ولا إيه"
"عسكر يقتل مدنى ليه...احنا فى سوريا ولا ايه"
و"يادى الخيبة ويادى العار.. مصرى بيقتل أخوه بالنار"
"يسقط يسقط حكم العسكر"
"يا مشير يا هلفوت...دم علاء مش هيموت"
"كفى دموعك و متبكيش..اموت يا امى و بلدى تعيش"
"الشعب يريد اعدام المشير"
"علاء دكتور..علاء دكتور...مش بلطجى ولا ديكاتور"
"واحد المجلس يمشى.. اتنين دم علاء ما يرحشى.. تلاتة إحنا ما بنخافشى.. أربعة إحنا الطب المصرى"، و"قتلوا علاء والشيخ عماد.. ظلم العسكر غطّى وزاد".

السبت، 17 ديسمبر 2011

علاء مات!!

اخر كلماته عالفيس


علاء مات....مش علاء مبارك هو اللى اتضرب بالنار فى دماغه فى الشارع...اللى مات علاء عبد الهادي صاحب ال23 سنه ...اللى مات علاء عبد الهادي دفعتى :"((...علاء عبد الهادي خامسه طب عين شمس دفعتى.....علاء عبد الهادي اللى اتضرب بالرصاص الحى...علاء عبد الهادي اللى كان فى المستشفى الميدانى بيحاول يعمل اللى عليه على الرغم من قله خبرتنا الطبيه....علاء عبد الهادي اللى عيد ميلاده بكره مااات.....


المره دى مختلفه معايا...اول مره ابكى على شهيد بجد دموع حاره ....اول مره احس احساس اهل الشهداء اللى قلبهم محروق من غير ما يتاخد حقهم....المره دى دفعتى...اه مكنتش اعرفه شخصيا لكن اكتشفت ان اصدقائنا مشتركين ...المره دى مختلفه لانها قريبه منى قوى


مش متخيله اننا دخلنا الكليه مع بعض..قضينا خمس سنين مع بعض...بس هو اتخرج النهارده من مسجد النور مكفن بدلا من ان نتخرج معا...


المره دى حاسه بثأر شخصى...علاء مش اول شهيد لكنه مختلف بانى اعرفه ممكن ميكونش سبب مميز ليك لان مع الوقت تحول عدد القتلى الى مجرد عدد ...قلبى مش هيصفى من الجيش المره دى...المره دى ثأر شخصى


كان مع علاء صديق دفعه اخر محمد نزيه اللى اختفى فجأه و موبايله اتقفل...و كان نفسى تتفرج على منظر قلق الدفع من -حسب تعبيرهم- حرقه قلب تانيه و شهيد تانى ....و لما اطمننا عليه انه بخير و موبايله فتح اتشهدنا ...صحيح الحرج ملمش لكننا بالتاكيد مكناش ناقصيين...




http://www.youtube.com/watch?v=J3WlB07gwFM


التفاصيل المتتابعه موجعه بشكل غريب...اصر عميد كليتنا الدكتور الكفراوى على حضور تشريح علاء -على حسب تعبيره- عشان حقه ما يضعش...والده علاء اللى جت من طنطا بتسأل سؤال واحد محدش عارف يجاوب عليه : هو مين اللى قتله ؟؟


كان فى مسيره النهارده بعد الدفن راح فيها اصدقاء كتير لكنى للاسف مقدرتش انزل لظروف عائليه....لكنى هاعوضها فى وقفه صامته بكره بالملابس السوداء فى الكليه هتكون اول اشتراك ليا حقيقى فى اى شغل الارض بس لانها المره دى مختلفه ...المره دى الثأر شخصى



الله يلعن ابو المجلس العسكرى و المجلس الاستشارى و مجلس الشعب و مجلس الشورى و المجلس المحلى .....و اى مجلس بيموت شاب زى الورد فى اول عمره:(



الجمعة، 16 ديسمبر 2011

مش عايزه اقرا تانى..





مش عايزه اقرا تانى...واضح ان القرايه مش بتغير حاجه و كمان بتفرجنى الصح اكتر 
فمبقتش اطيق الغلط.....هكذا اعلنتها على الملآ


مش هاقرا شعر تانى....و البنت ام عيون سودا تغير منها الغزلان بتتسحل فى الشارع


مش هاقرا سياسه تانى...و البلد محكومه بحكم عسكرى و مهدده بحكم دينى


مش هاقرا نجيب محفوظ و ابراهيم اصلان و انيس منصور و فريجنيا وولف ...و المثقفين عار يجب ان نمحيه ام بسجن الجسد فى سجون عسكريه او بقتل المخ بتكفيير


مش هاقرا ادب شباب....و الشباب بيمووووت و بيتسحل و بيتسجن و بيستشهد


مش هاقرا ادب ساخر....لان البلد اصلا بقيت مسخره


مش هاقرا كتب تاريخ...اذا كان التاريخ يعيد نفسه مرارا و تكرارا بلا ادنى نيه للتعلم من اخطاء الماضى


مش هقرا فلسفه...اذا كانت الفلسفه عندنا نوع من الزندقه او كلام فارغ بنملا بيه قراطيس اللب


مش هاقرا تنميه ذاتيه....لان ذاتى ضاعت و لا امل عندى فى تنميه اى شئ سوى شعرى  او لعلى اشترى نبات يساعدنى و اساعده


مش هاقرا كتب مخيفه...ده بشوفه كل يوم


مش هاقرا رومانسيه....لانها انتحرت لما كشفوا عن عذريه البنات


مش هاقرا فى الطب تانى....اذا تحول حلمى من ان اكتشف دواء للشفاء من السرطان الى ان يكون اقصى احلامى هو ايجاد اسرع طريقه للتخفيف من اثار الغاز المسيل للدموع و علاج ضرب الطوب على الرأس






حاسه انى ابتديت اكفر بكل الاشياء.....كل الاشياء...مبقاش عندى امل ان بكره احسن ولا حتى زى النهارده احنا بننزل كل يوم سلم و فيوم هالاقى نفسى انا و البلد فى قاع سلم...


كفرت بكل السياسين الدينى منهم و السياسى لا استثنى منهم احد....الناس بتتضرب فى الشاااارع و انتوا بتكوشوا على مقاعد مجلس الشعب....مجلس شعب ايه ؟؟؟ بالطريقه دى مش هيفضل شعب اصلا....


الاخ الفلحوس اللى عايز يحجب و ينقب البنات ...يدافع الاول عن البنات اللى بتتسحل فى الشوارع...الاخوه الليبرالين اللى بيحاربوا الجماعه بس و نسيوا الناس ...


مش عايزه افقد رؤيتى الطفوليه للاشياء بالابيض و الاسود...و اتحول لرؤيا الناضجين بكل مراحل الرمادى .....مش هاقبل بالغلط متحولش 



اغنيه اليوم 15/12

كنت بسمعها من يومين فى المواصلات و فؤجئب بعينى 

تدمع فى النهايه و لولا النضاره الشمسيه كانت بقت فضيحه




حبيبتى من ضفايرها طل القمر 
وبين شفافيها ندى الورد بات
ضحكتها بتهز الشجر والحجر 


وحنانها بيصحى الحياة فى النبات 
حبيبتى بتعلمنى أحب الحياة 
من حبى فيها حياتى شمس وربيع
والحب فى الدنيا دى طوق النجاة 
لولاه يضيع قلبي المحب الوديع
يا حلوة يا بلدنا يا نيل سلسبيل 
بحبك انت رفعنا راسنا لفوق 
لو الزمن ليِّل ما يرهبنا ليل 
شوقنا فى عروقنا يصحى شمس الشروق
للحلوة قلب كبير يضم الولاد 
وزاد وزوادة وضلة وسبيل 
الموت والاستشهاد عشانها ميلاد 
وكلنا عشاق ترابها النبيل
******* 
حبيبتى من تنهدها حن الوتر 
غنت سحر صوتها الشجر والنخيل 
واتعلم النجم البعيد السهر 
وساب سماه وسرح فى موجك يا نيل 
حبيبتى غنوتها غيطان الحنان 
شموسة صافية نورها ما ينطفيش 
فى حضنها بنرتاح ونلقى الأمان 
نعيشه حتى ان متنا ليها نعيش
يا حلوة يا بلدنا يا نيل سلسبيل 
بحبك انت رفعنا راسنا لفوق 
لو الزمن ليِّل ما يرهبنا ليل 
شوقنا فى عروقنا يصحى شمس الشروق
للحلوة قلب كبير يضم الولاد 
وزاد وزوادة وضلة وسبيل 
الموت والاستشهاد عشانها ميلاد
وكلنا عشاق ترابها النبيل

لو الزمن ليِّل ما يرهبنا ليل 
شوقنا فى عروقنا يصحى شمس الشروق....