الأربعاء، 29 فبراير 2012

رأيت رام الله..مريد البرغوثى




كتاب ممتع مميز مؤلم لاقصى و اقسى حد ممكن....على جميع الاصعده


اشيائى الصغرى تعذبنى هكذا قال نزار قبانى و كهذا شعرت مع نهايه الكتاب فصغائر احداث الغربه هى ما وجعت قلبى مثلا: كيف بدأ قصته بيوم 5يونيو حين -حسب تعبيره الجميل- نجح فى اخد الشهاده الجامعيه و فشل فى العثور على حائط يعلقها عليه.. 
كيف يضطر ان يشرب فى فناجين الغربه بلا اختيار فهى اما فنجاين ساكن سابق او فنجاين الفنادق فالغريب ليس له حق الاقتناء فهو مسافر للابد


كيف اضحكوا عسكرى المرور فى فينا حين اجتمعوا كعائله و حين اظهروا جوازات السفر و كل منهما بجنسيه على الرغم من اتفاق و اشتراكهم فى اسم البرغوثى


كيف اصر ابنه اللى مشفوش نص حياته بنادئه عمو فاذا صحح له صار يناديه عمو بابا


كيف تؤثر السياسه على القهوه بغياب فرد من العائله 


كيف مر على الجسر بين الضفتين باسمائه جسر العوده ,جسر المللك حسين او كما اسموه "الجسر"...ممتع و مؤلم و بيكفى


لعلها صدفه فاثناء قراءتى فاذا بمسرحيه وجهه نظر شغاله و الممثل يتنهد قائلا :كل ليل و له اخر فيجيب مسعود:الا الليل بتاعنا ..تشابه مؤلم


ملحوظه: التشابه بين رايت رام الله و الطنطوريه لرضوى عاشور واضح و مبرر فى رأيى

الثلاثاء، 28 فبراير 2012

و بدأ الحوار ب "اشربى خميره"





الاول احب انوه ان اللى هتقراه ده حوار حقيقى 100% لم اضيف عليه اى بهارات دراميه قررت ان اكتبه لا لشئ الا لكى افكر فيه اكثر لعل الصوره ان تتضح لى و لو قليلا....


المكان : داخل ميكروباص المتجه الى مترو غمره
الزمان: الساعه 8 و ربع
الشخصيات: انا و بنوته قابلتها فى الميكروباص....
البنوته فى حدود 19 -20 سنه, تحمل بيدها كيس ساندوشات فول و طعميه , مستوى ملابسها عادى بالنسبه لفتاه عامله , اللهجه شعبيه بعد الشئ....


يبدأ الحوار بشكل مفاجئ بلا مقدمات تقريبا .....


الانسه   : اشربى خميره
انا        : "فى صدمه" ايه؟؟؟
الانسه   : اشربى خميره عشان حب الشباب
انا        : بس انا بتعالج منه و كده عموما هو اتحسن كتير
الانسه   : ما هو باين ...بس اصل فى دكتوره كانت زبونه لبابا هى دكتوره جلديه فى  
            مستشفى "كذا" قالت له ان حب الشباب لو اتعالج عادى  بيخف بس بيسيب اثر
           و قالت له خلى بنتك اللى هى اختى تجى على نفسها و تشرب خميره كل يوم و 
           بكده الحبوب هتخف من غير ما تعمل اثر...و هى فعلا عملت كده و بعد شهر و 
           نص الحبوب راحت من غير ما تسيب اثر ....
انا        : "رغبه فى انهاء الحديث" طيب هأسال و اشوف 
الانسه   :"موجه كلامها للسائق" مال عربيتك زحمه ليه كده؟؟
السائق   : ما انتى رايحه شغالك و تلاقيه زحمه برضه
الانسه   : لا يا اخويا انا مديره فى شغلى
انا        : طب يا ستى يا بختك...انا اكبر منك و لسه بدرس
الانسه   : طب ما هو انا كمان طالبه
انا        : اهلا و سهلا...كليه ايه؟؟
الانسه   : تجاره انجليش
انا        : عين شمس؟؟
الانسه   : لا 6 اكتوبر
انا        : تشرفنا....حلوه تجاره انجليش بس غاليه شويه
الانسه   : اه بس هى المستقبل...لعلمك انا جبت مجموع هندسه بس مرتضش...اصل بابا 
            مهندس ميكانيكا
انا        : صدفه ظريفه انا كمان بابا مهندس ميكانيكا ...عندنا بتوع تجاره انجليش 
             بيفضلوا يغيظوا تجاره عادى بشكل يضحك...و انتى سنه كام؟؟
الانسه   : سنه تانيه
انا        : انا قلت برضه كده شكلك صغير 
الانسه   : و انتى؟؟
انا        : انا فى خامسه
الانسه   : تجاره انجليش برضه؟؟
انا        : "مفكره ان تجاره 4 سنين بس يبقى ازاى اكون فيها يعنى؟؟" لا انا طب
الانسه   : ناويه تتخصصى ايه؟؟
انا        : "فى تجنب لحوار طويل يشرح كيف ان التخصص بعد التخرج بفتره طويله"
            ناويه انف و اذن و حنجره ان شاء الله
الانسه   : اخويا محمد فى سنه سابعه
انا        : "مفكره فى ان محدش فى طب بيقول هذا اللفظ ابدا" عين شمس ولا القصر 
           العينى؟؟
الانسه   : جامعه 6 اكتوبر برضه...بس هو ناوى يتخصص جراحه و طوارئ
انا        : تخصص حلو بس عايز اعصاب
الانسه   : بس هو قلبه جامد...ده مره عرف انى بعمل فيه مقلب
انا        : "فى استغراب" ازاى يعنى ؟؟
الانسه   :  اصل انا عندى لاب توب...دخلت جوه و قعدت اكلمه على انى بنت بتحبه و 
              كده بس اللى كشفنى انى بغلط فى كلمه reader دايما و بقولها leader و لما 
              غلطت فيها عرفنى على طول
انا        : لا كده فعلا ينفع طوارئ و جراحه
الانسه   : ده بيقولى ان اسهل حاجه انه يعمل عمليه بس صعب عليه جدا انه يعملها ليا او       
              لحد بيحبه
انا        : "مفكره فى ان طالب الامتياز لا يقدر حتى على خياطه جرح و ليس عمليه" 
             هو ده عموما حتى فى الطب العادى لان القرارات بتتهز
الانسه   : محمد مره اتقدم لواحده بس ابوها رفضه
انا        : عادى هو عموما لسه طالب
الانسه   : لا اصله عنده شقته و حاجته جاهزه و مش ناقص حاجه...بس هو كان بيحب 
            كمان واحده تانيه بس هى كانت بتحب اتنين
انا        : بتحب 2 ازاى يعنى؟؟
الانسه   : قصدى انها كانت متعلقه بالاتنين...كل ما واحد يغيب التانى يفضل يتكلم عليه 
            لحد ما فضلت التانى...و بعدين رجعت تعيط لى و تقولى اتوسطى لى انا عايزه 
           ارجع لمحمد بس انا قلت لها انه لما بينسى مش بيسامح اصل انا رومانسيه جدا
            ومبحبش اتنين يسيبوا بعض
انا        : "فى حاله ارتباك بحثا عن كلمات" خير ان شاء الله
الانسه   : انتى عندك 23 سنه؟؟
انا        : لا 22 بس
الانسه   : اصل محمد لما كان قدك كان 23 بس اه انا افتكرت ده هو عاد خامسه ...انتى 
             مش نازله ؟؟
انا       : بس لسه المحطه ما جتش...
الانسه  : تعالى تعالى نتمشى 


"الجزء التالى من الحوار يجرى فى الشارع"

الانسه  :" تتأبط ذراعى رغم عن ارادتى" ماما بتشتغل مترجمه للغه التركى..عارفه 
            بتزعق بتفضل ترطن تركى و محدش بيفهمها ههههههه....عارفه اخويا التانى 
            مهندس بيفضل يتريق على محمد و يقوله انت لما هتتخرج هتشتغل ب300 
           جنيه و انا هاقبض بالعشرين الف جنيه
انا      : "منتهزه الفرصه لسحب يدى" مين اللى قالك الكلام ده هما كلهم 260 جنيه اول  
           عن اخر مش 300
الانسه  : انتى رايحه انهى اتجاه فالمترو؟؟
انا       : المرج "و كلى امل ان تكون متوجه الى حلوان"
الانسه  : انا للاسف رايحه حلوان
"و اتفرق الصديقين ربما الى الابد "

**************************

كانت تلك المحادثه بعضا مما كان ...فالحديث كان شخصى اكثر من جانبها و صامت جدا من جهتى بكثير من التفاصيل الشخصيه التى لم اوردها هنا ....

لا انكر انى قلقت للحظات خاصه عندما سرنا فالشارع فلعها سارقه او تريد بى الشر لكنى طردت هذا الهاجس لعده اسباب اولها انى لا ارتدى اى ذهب ...و اننا فى وضع النهار...و انى اكبر حجما و سنا و استطيع المقاومه ...اعلم انها خيالات مريضه لكنها وردت فى ذهنى

التالى مجرد تفكير و تحليل لما كان ,فى رأيى هناك 3 طرق للتفكير فى هذا الموقف :

الاول : ان تكون كاذبه فى كل او معظم ما تقول بدليل انها بتقول انها طالبه و فى نفس الوقت بتشتغل و فى نفس الوقت مديره فى شغلها و فى نفس كل تلك الاوقات رايحه اتجاه حلوان بعيدا عن الجامعه..."و لهذا تفسيراته النفسيه ان صح الظن"

الثانى : ان تكون من النوع اللى بيبحث عن عروسه فى الشوارع و هو نوع ليس نادر كما تتخيل ...هذا النوع يميل الى المدح المبالغ فيه فى العائله (لاحظ الاصرار على ذكر الاب المهندس و الام المترجمه و الاخ المهندس) كما بالطبع يكثر المدح فى العريس موضع الكلام ...كما يتضمن عاده تعليق على سن البنت و اخد تفاصيل حياتها 

الثالث : ان تكون البنت بريئه جدا و مجرد انها منفحته و عشاريه و يظل هذا احتمال قائم بالطبع و هو من حسن الظن بالناس

و ارجع و اقول انا شخصيا ما اعرفش ...و قررت تدوين الحوار لعلى افهمه اكثر

السبت، 25 فبراير 2012

عن التحول... اتحدث





لعلك لاحظت -خاصه اذا كنت متابع للمدونه من فتره و هو ما لا اظنه فليس بها فى رأيى ما يستحق القراءه- ان موقفى السياسى قد تحول بشكل يمكن ان اطلق عليه جذرى دون ان اقع فى خطأ التهويل او ضروب المبالغه....


رأيى فالثوره كان معروف من قبل ما تقوم و مقالى مدونه بتاريخها بكل اخطائها حتى الاملائيه منها على الرغم من امكانيه تعديلها بسهوله و هو ما لن سيلاحظه احد لكنى احتفظ بها كجزء من ذاتى و كونه كان رأيى فى يوم من الايام : 


1- مرحله ما قبل الثوره : كنت من غير المتفائلين تماما بثوره تونس بكل ما شاهدته بها عبر الفضائيات و حقيقيه خفت على مصر مما كنا نشاهده تلك الايام .....و فى ظل كل هذا جاءت مقاله و لكن بكم من الضحايا؟؟ التى كنت بصراحه ادعو الى عدم النزول فى يوم 25 يناير ...لاحظ فالفتره دى كانت منتشر ظاهره احراق المواطنين لنفسهم قدام مجلس الشعب...


2- مرحله الثوره نفسها: شئ لا افتخر بيه طبعا بس انا مكنتش من المتحمسين و لا حتى المؤيدين للثوره ...حقيقه لا اعلم السبب لعله التليفزيون المصرى اللى مهيأ لينا ان الشوارع حجيم و ان مصر بتتحرق هييييه .....تلا ذلك مقال العند التى كنت ادعو فيها بصراحه الى اتباع خطه الخطاب الثانى الرئيس السابق او المخلوع (من فتره بسيطه كان لفظ المخلوع بالنسبه لى يمثل اهانه لكن الايام تتغير)


3- مرحله ما بعد الثوره مباشره : كان المقال الاساسى لى فى احداث الثوره حتى استطيع احترام نفسى ...حين اقرأ هذا المقال الان اضحك بكل ما ما لدى من قدره....اتعجب من كونى حتى كتبت تلك الكلمات فى يوم من الايام ....انا طول عمرى لا بحب حسنى ولا نيله امال كتبت الكلام ده ليه؟؟ لعله برضه تأثير التليفزيون ...لكنى فعلا كنت مخنوقه من الاحزاب التقليديه و لعلى مازالت احب سوزان بسبب مكتبه الاسره اللى اتربيت عليها .....الغريب كان رأيى فى البرادعى اللى اختلف كل الاختلاف فعلا بقيت بحترم الراجل ده جداا و حزنت يوم ما انسحب ....


4- مرحله الليبراليه المتحمسه : و هى الفتره التى اتسمت بزياده شغل السلفيين و لعلى تحمست وقتها زياده لكنى و الحمد لله لم اغير رأيى فى هذه الامور و ان كنت اتمنى بعض الهدوء اللى سرعان ما كنت بفقده مع حوارى معاهم...تتمثل المرحله دى فى المقالات التاليه : ماذا لو لو خربوها؟؟...عيد تحرير مسجد النور....اه يا ليبرالى يا ابن ال.......مليونيه اللحيه


5- مرحله علاء عبد الهادى : لعلها المرحله الاهم لى لانها كانت سبب تحولى ....يمثلها مقال علاء مات....و مقال علاء كمان و كمان


6- مرحلتى الان: اسميها المرحله النشطه اللى اخيرا عرفت طريقى الصح فيها (او على الاقل اللى انا مقتنعه بيه الان) ....بس يا سيدى و رحنا وزاره الدفاع ...و بس يا سيدى و رحنا مجلس الشعب!! ورساله الى رفايع  شغل اخر كبير لم اكتب عنه لاسباب شخصيه ...


**************
حاجه طبعا لا افخر بيها بانى عرفت الحق بس لما مات لى حد قريب ...لكن ان تأتى متاخرا خيرا من الا تاتى ابدا ....


لن اعبد الا الله...



قرار اخدته زمان و فضلت مصره عليه....انا لن اعبد الا الله , كل شئ قابل للنقاش الا هذه القاعده اما اى شئ اخر فقابل للحوار و بالتالى اليك بعض النصائح :


-اوعى تبنى ايمانك بالله او حبك للاسلام على التافه من امور الدنيا :


-اوعى تبنى ايمانك على الشجره اللى مكتوب عليها "محمد"... عشان لة الشجره طلعت فوتوشوب ....حبك لمحمد لن يسقط


-اوعى تبنى اقتناعك بدينك على حدوته البنت المسيحيه اللى لما سمعت الست بتقر   القرآن فى المترو قعدت جنبها و نطقت الشهادتين...عشان لما تتطلع الحدوته فشنك او تطلع البنت عندها ازمه نفسيه و بتلجئ لحل سهل ....اقتناعك بدينك لا يتزعزع


-اوعى تبنى احترامك للشيوخ و اهل العلم على شيخ الفضائيات المبتسم دائما بلا سبب او الغاضب دائما بلا مبرر او ذلك الشاب الوسيم المرح...عشان لو اكتشفت ان حد فيهم كان بيشتغل مع امن الدوله او ان حد فيهم حصل له فضيحه اخلاقيه ....احترامك لحاملى العلم و  القرآن مايتغيرش


-اوعى تخلط بين الدين الاسلامى و الاسلام السياسى ....عشان لما السياسين يمارسوا القهر و الاضطهاد او لما يطبخوا القوانين او لما يفشلوا فى خطط الاقتصاد...قناعتك بكون الاسلام حل لمشاكل البشر ميروحش


-اوعى تربط اعجاز القرآن بتنبؤ باحداث 11 سبتمبر زى الكلام المتداول فى الصوره:
عشان لما تعرف ان الكلام ده غلط و ان ربنا لا يرضى بقتل الابرياء و ان دين الاسلام برئ من الارهاب و الدماء ....لا تشك لحظه فى كلام الله او تكون -عن قصد او غير قصد- اسأت بسمعه دينك و كتابك الجليل


- اوعى تربط بين اعجازات الله فالكون و فى انفسنا بصوره صخره زى الحصان بتشرب من الميه....عشان لما تطلع متفبركه ...متكونش قلصت كل نعم الله التى لا تعد ولا تحصى حتى فى نفسك الى المرحله دى....


-اوعى تتخيل ان اشتراكك فى جروب "تحديت يهودى بجمع مليون مسلم فى ساعه" يساعد الاسلام فى شئ...او ان فعلتك هذه افيد للناس من الابتسام فى وجوههم


-اوعى تعمل كده عشان لما نجح عبد الله الشحات فى مرحله الانتخابات الاولى صرخوا "نجح الاسلام" ...و عندما سقط فى الاعاده لن نقول "فشل الاسلام".....


من الاخر: ايمانك  و يقينك يكون ف الله و دينك و فى رسولك .........و اجعل الشك و المسائله للبشر "كل البشر"

الأربعاء، 22 فبراير 2012

بس يا سيدى و رحنا مجلس الشعب!!



ياااه امبارح كان يوم عالمى بجد...مسيره شبابيه طلابيه من كليه الطب الى جامعه عين شمس الى جامعه القاهره الى كوبرى عباس الى مجلس الشعب....


يوم كده عامل زى يوم : بس يا سيدى و رحنا وزاره الدفاع


نفسى ادون كل اللى حصل بتفاصيله لكن ما اظنش ان فى كميه كلمات تقضى اليوم الحلو ده :


تررررررن تررررررن تررررررن "صوت المنبه المزعج"....افتح عينا بسرعه و اقوم من نومى بحماس على غير عادتى تماما من فتح عينى ببطء و تثاؤب السنين ....عندما يكون لدى ما افعله فعليا يكون يومى ملون بلون الحماس....


ارتدى بنطلونى البنى و بلوفر بيج و سكرى و شال على كتفى ارتديه دائما فى المظاهرات فهو ينفع دائما....تستطيع ان تلبسه, تضعه على الارض لتجلس عليه,تغطى به وجهك عند وجود كاميرات امن الدوله التى يعلمها كل من صار فى مظاهرات, تتدفئ به على كتفك او تضعه على كتف رفيق كنوع من المجامله او صدقه جاريه........كم انت عظيم ايها الشال 


انزل الى الشارع و اتمنى ان اصرخ بانى اليوم هو يوم الطالب العالمى لما رموا طلبه مصر فالنيل و فتحوا عليهم الكبرى سنه 1946 ,تعالوا معايا نحتفل و نصرخ بوجود رأى سياسى للطالب المصرى دون سحله او سجنه او قتله....


اذهب اولا الى المستشفى لحضور السيكشن لم اركز فى البدايه من حماسى لكنى بطريقه ما ركزت فى الدرس و من حسن الحظ ان الدكتوره كانت ظريفه و انهت الدرس مبكرا و ذهبت طائره الى الاجتماع فى الكليه....


ذهبت امام المبنى المتفق على اجتماع المظاهره....فى ايفنت الفيس بوك وافق 70 طالب طب على الانضمام و بمجرد ذهابى صعقت على الفور بل و مات الكلام من هول المفاجأه
*
*
*
*
عدد الموجودين 4 !!!!....كالعاده كنت البنت الاولى فى الوقفه بانتظار الاخرين او هكذا اتمنى.....مرت الدقائق و العدد لا يزيد....و بعد مرور ساعه وصل العدد الى 14 طالب.....


جاء وقت الذهاب للجامعه و عددنا قليل و يفضح ....كان فى اختيارين لا ثالث لهم :
الاول: اننا ننفذ ما اتفقنا عليه من تنفيذ مسيره داخل الكليه بهتاف ضد العسكر عشان نجمع عدد اكبر (وقت الاتفاق تخيلنا ان العدد هيكون اكبر)
الثانى: اننا نمشى من سكات الى الجامعه من غير شوشره.....


ترددنا فتره فالتفكير و اخير استقرينا على عمل المشيره بالهتافات مهما كان العدد....كان معانا صوره "بانر" كبير جدا بحجم 3 متر للشهيد علاء عبد الهادى شهيد كليه طب عين شمس  و دفعتى برصاصه الغدر فى احداث مجلس الوزراء اثناء تواجده بالمستشفى الميدانى للمساعده فى علاج الجرحى....كانت حمل الصوره فكره ناجحه لان بانر بالحجم ده يجعل اى عدد و ان كان صغير يبان كأنه عدد ضخم و بالفعل حمل البانر ال14 ثائر بل و بطل لان صعب قوى انك تحافظ على املك فى موقف زى ده ...8 شباب و 6 بنات كانوا النواه بهتفاتهم القويه ضد العسكر ضد اليأس ضد التخاذل ضد نظرات الطلبه المستفزه و ضحكهم المعتاد....


مشى ال14 بطل لحد جامعه عين شمس..و فى الطريق تعثرت فى الطريق و لوى كاحلى على الرغم من تفاهه هذا الحدث الا انى سيؤثر فى اليوم...هناك كان العدد اكبر بكتير و انضم ال 14 الى ال 400 طالب متجمعين امام قصر الزعفرانه بالجامعه....مشيت مسيرات لحشد الطلبه من الكليات و بالفعل زاد العدد...ارتفعت معنوياتنا اكثر على الرغم من بلاده تفكير بعض الطلاب بل و افتعال المناقشات و الجدال المعتاد من نظام : انتوا عايزين تسقطوا البلد, شوفوا التمويل الخارجى الاول , و هذا الجو الهابط عديم الجدوى...دارت ناقشات كثيره لو كتبتها هتاخد مدونات و مدونات....


جاء وقت الذهاب الى جامعه القاهره مكان التجمع النهائى ....كان من المقرر ان تقلنا اتوبيسات الجامعه لكن كعاده الجامعه خذلتنا كما تخذلنا دائما ...قرر المتظاهرين استقلال مترو الانفاق ...و بالفعل ركبنا المترو بل ملئنا المترو على اخره....


كانت فى بعض عربات المترو مليئه بالثوار و لاننا كنا عزوه هتفوا الشباب كعادتهم ضد العسكر....بينما ركبت انا فى عربه الثوار فيها قليلون كالعاده و ضن الهتاف ....لكن اتفقنا ان نهتف وقت فتح الابواب فى المحطات الهتاف التالى:
يا اللى واقف عالرصيف...قولى فين حق الرغيف
عندنا ازمه فى الانابيب...و غازنا رايح تل ابيب
و لاول مره اكون انا الكابو الذى يهتف اولا ثم يرد عليه الجمهور (احساس ظريف قوى بالمناسبه)


و اخيرا وصلنا محطه مترو "جامعه القاهره" و الحقيقه ان هذا التسميه خاطئه بالتاكيد فالمسافه التى قطعناها مشيا على الاقدام كانت اطول مسافه مشيتها بين محطه مترو و مكانها على الاطلاق.....


و اخيرا وصلنا الى جامعه القاهره .....و هنا كانت اللحظه الاجمل على الاطلاق .....رأينا تجمع حاشد حرفيا فعلا تجمع كبير ...لوح من جامعه القاهره ,الجامعه الامريكيه,الجامعه الالمانيه,جامعه الزقازيق,ناس جايه من المنصوره مخصوص,جامعه حلوان و اخيرا احنا : جامعه عين شمس .....


لا انكر انى بكيت وقتها.....ال 4 للى كانوا قدام كليتهم مكسورين الخاطر بقوا 4000 طالب كلهم حماس فى رحله طويله سيرا على الاقدام الى كوبرى عباس و منه الى مجلس الشعب مسيره مشى على الاقدام لمده 5 ساعات متواصله محمله بالهتاف ضد العسكر مرددين : وحد صفك,كتفى بكتفك,حركه طلابيه واحده,ضد السلطه اللى بتدبحنا ......اصحى يا طالب مصر يا مجدع و اعرف دورك فى الكليه,مهما تذاكر مهما هتتعب عرقك رايح للحرميه...



الاثنين، 20 فبراير 2012

رساله الى رفايع

عزيزتى رفايع


الاول كده ازيك و عامله ايه فى الدنيا لوحدك من غيرى؟؟...انا متابعاكى من بعيد و شايفاكى كويسه ...احيانا بتغاظ انك كويسه من غيرى..ادخل على الاحصائيات الاقى عدد اللى بيدخلوا مش فارق كتير من غير ما اكتب فيكى....






طبعا انتى عارفه ان البنى ادم بيكره ان الدنيا تستمر من غيره بيولد احساس كبير فى الانسان انه ملوش لزمه و ان الكون ماشى ماشى بدون ارشادته العظيمه....


عارفه انا بكتب ليكى او بمعنى ادق فيكى ليه؟؟...لانى بكره الاصدقاء القدامى....اكتر حاجه بكرهها فى الدنيا انى اقابل حد مشفتوش من فتره و نلخص لبعض اللى حصل خلال الفتره دى....افضل دايما انى اكون وحيده بذكريات صديق قديم على انى اقابله و اكتشف ان هو اتغير او انى اتغيرت ...عشان كده حبيت احكى ليكى اللى حصل الفتره اللى فاتت و الجديد يبقى اول باول ....


اممممم ابتدى منين؟؟؟.....كبدايه انا مشغوله عالنت اليومين دول فى الجودريذر و الفيس و التويتر اكتر منك ...و حياتك انا ضميرى بيأنبنى جدا انى مهملاكى...بس حسيت انى محتاجه اسمع الناس زى ما بتكلم ...عشان كده ضغطى ابتدى يعلى بس كويس اهو يصلح ضغطى الواطى اصلا...هنا راحه بال لانى بكلم نفسى بس مش راحه البال هى اللى بدور عليها ...بس اكيد كمان مش بدور على وجع القلب ...يمكن بدور على الحقيقه....بتضحكى؟؟؟ عندك حق هو فى حد يدور عالحقيقه عالفيس و التويتر و الجودريدز؟!!


بس بلاش اتهامات بالتفاهه ....انا كمان اليومين دول مشغوله عالارض لاول مره....اه بجد تخيلى انا بقيت زبونه مظاهرات و اعتصامات و كنت على وشك الاضراب عن الطعام فى الكليه لولا تدخل الاصدقاء...لا تسألينى كيف تحولت لشكل من كنت لا اطيق؟!!!...بشكل ما بقيت ثوريه بشكل غريب ....يمكن موضوع علاء و يمكن لاحساسى انا كمان او حد من اللى حواليا ممكن نموت فى اى لحظه..


مثلا الاسبوع اللى فات كنت فى مسيره من الكليه الى الجامعه الى وزاره الدفاع....كلاكيت تانى مره طبعا المره اللى فاتت بعد علاء بايام كان العدد اكبر و القهره اكبر بس المره دى كانت الذ بالنسبه لى.....


اه نسيت اقولك انى شاركت فى الاضراب...كانت مسخره كليتنا بيموتوا نفسهم على نص درجه و انا منقطعه عن الدراسه ....بس احلى حاجه انى اتعرفت على شباب زى الورد حبيتهم و حبونى


استمرت شله الاضراب و هو عباره عن مكس ممتع من الايدلوجيات : ليبرالين و يسارين و ثوريين و اشياء اخرى....تولدت فكره كيان ثورى دائم و عشان يكون شكلها رسمى هنعملها اسره فى الكليه....عارفه اللى يضحك ايه؟؟ ان انا بقيت الاخت الكبرى للاسره ههههه حسيت انى كبرت قوى ساعتها و عجزت بس اتبسطت جدا .....


عايزه تعرفى بكتب لك ليه بذات النهارده؟؟....بكره فى مسيره من الكليه الى الجامعه و منها الى جامعه القاهره و منهم لمجلس الشعب ...محدش يعرف انى رايحه غيرك انتى و اللى هيقرا الكلام ده ...عايزه اوصيكى على نفسك محدش يعرف ايه ممكن يحصل بكره...عموما انا هاخلى بالى من نفسى كويس او هكذا اتمنى


لما صحابى بيقولوا لى انتى بتعملى كده ليه مع انه خطر...بقول لهم انى افضل اموت برصاصه عن انى اموت كمدا...

و السلام ختام

توقيع
صديقتك الدائمه
ديــــــــــنــــــــــــا

الخميس، 16 فبراير 2012

جداريه درويش..و بيكفى




عندما تتدخل جداريه محمود درويش فادخل على مهلك بتروى


فانت لا تقرأ كلمات شاعر بل تدوس فى جسد شاعر


انت لا تقرأ شعر و لكنك تتنفس انفاس انسان معذب


انت لا تقرأ اوزان و جمل و لكنك تشاهد كلمات رجل معلق بين الحياه و الموت


انك تلمس الكلمات و تلسع حواسك بلا رحمه


فحين يقول درويش خضراء، أرض قصيدتي خضراء عاليه


انه لا يعنى لفظ خضراء و لا انت تقرأ لفظ خضراء


انه يأخدك من يدك ليريك اللون ...ها انت فى حضن الربوه لا تقرأ عنها


حين يقول درويش أيٌها الموت انتظرني خارج الأرض


انه لا يعنى لفظ الموت و لا انت تسمع لفظ الموت


انه يأخدك من يدك ليريك طائر الموت الاسود


تره ينقض على روح فترقص رقصه الموت الاخيره


لا تقييم جداريه درويش بالنجوم او بالارقام فالروح لا تقيم


و كأننى اقرأ لشاعر يكتب بدمه يغرز فيه ريشيته و يكتب


لا كاتب يجلس فى مكتبه الوثير و حوله الاوراق و اعقاب السجائر


انها جداريه درويش.....و بيكفى


شو بدك يعنى اكتب بعد فيه


****************************************





أيٌها الموت انتظرني خارج الأرض،
انتظرني في بلادِك، ريثما أنهي
حديثا عابرا مع ما تبقٌي من حياتي
قرب خيمتك، انتظِرْني ريثما أنهي
قراءة طرْفة بنِ العبْد. يغْريني
الوجوديٌون باستنزاف آلٌِ هنيْهةي
حرية، وعدالة، ونبيذ آلهةي“/
فيا موْت! انتظرني ريثما أنهي
تدابير الجنازة في الربيع الهشٌ،
حيث ولدت، حيث سأمنع الخطباء
من تكرار ما قالوا عن البلد الحزين
وعن صمود التينِ والزيتونِ في وجه
الزمان وجيشِهِ. سأقول: صبٌوني
بحرف النون، حيث تعبٌ روحي
سورة الرحمن في القرآن. وامشوا
صامتين معي علي خطوات أجدادي
ووقع الناي في أزلي. ولا
تضعوا علي قبري البنفسج، فهْو
زهْر المحْبطين يذآٌِر الموتي بموت
الحبٌ قبل أوانِهِ. وضعوا علي
التابوتِ سبْع سنابلي خضراء إنْ
وجِدتْ، وبعْض شقائقِ النعْمانِ إنْ
وجِدتْ. وإلاٌ، فاترآوا ورْد
الكنائس للكنائس والعرائس/
أيٌها الموت انتظر! حتي أعِدٌ
حقيبتي: فرشاة أسناني، وصابوني
ومآكنة الحلاقةِ، والكولونيا، والثياب.
هل المناخ هناك معْتدِل؟ وهل
تتبدٌل الأحوال في الأبدية البيضاء،
أم تبقي آما هِي في الخريف وفي
الشتاء؟ وهل آتاب واحد يكفي
لتسْلِيتي مع اللاٌ وقتِ، أمْ أحتاج
مكتبة؟ وما لغة الحديث هناك،
دارجة لكلٌ الناس أم عربيٌة
فصْحي
ويا موْت انتظرْ، ياموت،
حتي أستعيد صفاء ذِهْني في الربيع
وصحٌتي، لتكون صيٌادا شريفا لا
يصيد الظٌبْي قرب النبع. فلتكنِ العلاقة
بيننا ودٌيٌة وصريحة: لك أنت
مالك من حياتي حين أملأها..
ولي منك التأمٌل في الكواآب:
لم يمتْ أحد تماما، تلك أرواح
تغيٌر شكْلها ومقامها/
يا موت! ياظلٌي الذي
سيقودني، يا ثالث الاثنين، يا
لوْن التردٌد في الزمرٌد والزٌبرْجدِ،
يا دم الطاووس، يا قنٌاص قلب
الذئب، يا مرض الخيال! اجلسْ
علي الكرسيٌ! ضعْ أدواتِ صيدك
تحت نافذتي. وعلٌِقْ فوق باب البيت
سلسلة المفاتيح الثقيلة! لا تحدٌقْ
يا قويٌ إلي شراييني لترصد نقْطة
الضعف الأخيرة. أنت أقوي من
نظام الطبٌ. أقوي من جهاز
تنفٌسي. أقوي من العسلِ القويٌ،
ولسْت محتاجا  لتقتلني  إلي مرضي.
فكنْ أسْمي من الحشرات. آنْ منْ
أنت، شفٌافا بريدا واضحا للغيب.
آن آالحبٌ عاصفة علي شجر، ولا
تجلس علي العتبات آالشحٌاذ أو جابي
الضرائبِ. لا تكن شرطيٌ سيْري في
الشوارع. آن قويٌا، ناصع الفولاذ، واخلعْ عنك أقنعة
الثعالب. آنْ
فروسيا، بهيا، آامل الضربات. قلْ
من معني إلي معني » : ماشئْت
أجيء. هِي الحياة سيولة، وأنا
« أآثٌفها، أعرٌفها بسلْطاني وميزاني
وياموْت انتظرْ، واجلس علي
الكرسيٌ. خذْ آأس النبيذ، ولا
تفاوِضْني، فمثلك لا يفاوِض أيٌ
إنسان، ومثلي لا يعارض خادم
الغيبِ. استرح“ فلربٌما أنْهِكْت هذا
اليوم من حرب النجوم. فمن أنا
لتزورني؟ ألديْك وقْت لاختبار
قصيدتي. لا. ليس هذا الشأن
شأنك. أنت مسؤول عن الطينيٌ في
البشريٌ، لا عن فِعْلِهِ أو قوْلِهِ/
هزمتْك يا موت الفنون جميعها.
هزمتك يا موت الأغاني في بلاد
الرافدين. مِسلٌة المصريٌ، مقبرة الفراعنةِ،
النقوش علي حجارة معبدي هزمتْك
وانتصرتْ، وأِفْلت من آمائنك
الخلود“
فاصنع بنا، واصنع بنفسك ما تريد

الأربعاء، 8 فبراير 2012

اصبحت لا احتمل...



زياده فى ضربات القلب...رعشه فى اليد....اختناق فى الصوت....زياده التعرق....تقطع النوم او الارق....و فى النهايه الموت كمدا....هذه هى اعراض ان تكون لا تحتمل الخطأ فى مصر....


بمعنى ادق هى اعراضى انا فى تلك الايام.....من خيانه الاخوان ل تسليم السلفيين ل تيييت المجلس العسكرى ل تخاذل دكاتره الجامعات ل فساد المؤسسات الحكوميه ل استعباط وسائل الاعلام ل فقع مرارتى من التليفزيون المصرى ل المؤامرات الخارجيه ل كتابه الشباب لوصيتهم و بقاء المشير على قلبنا ل مخططات تقسيم مصر اللى التليفزيون فقعنا بيها رسمى....


اصبحت لا احتمل الغباوه ...
اصبحت لا احتمل التخاذل....
اصبحت لا احتمل التخلف....
اصبحت لا احتمل الحلول الوسط....
اصبحت لا احتمل الخوين....
اصبحت لا احتمل كلمه خربتوا البلد.....
اصبحت لا احتمل كلمه بلطجى...
اصبحت لا احتمل كلمه هيبه الدوله...
اصبحت لا احتمل الاصابع الخفيه....
اصبحت لا احتمل الطرف الثالث....
اصبحت لا احتمل النفاق العلنى دون مواربه....
اصبحت لا احتمل  تصفيق مجلس الشعب....
اصبحت لا احتمل الاحزاب الكارتونيه...
اصبحت لا احتمل الاغانى الوطنيه الحنونه بلا صراخ....
اصبحت لا احتمل الشعر الوردى و حب البنات....
اصبحت لا احتمل ان تزل افه حارتنا النسيان....
اصبحت لا احتمل ان اكتم دموعى و صرخاتى....
اصبحت لا احتمل الحياه فى هذا البلد الذى يقتل ابناؤه ثم يحيل الامر للجنه تقصى حقائق.......


عندما يكون هذا منظر الديسك توب ....اعلم انى على حافه نوبه جديده من الاكتئاب

مجلس اونطه عايزين اصواتنا!!!





احاول ترتيب افكارى وسط  الحزن و الغضب و خيبه الامل من جلسه اليوم ....لم استطع بعد تحديد كلمات معبره عما اريد قوله ....


ملخص جلسه مجلس الشعب "الموقر": من الجائز شرعا قصر الصلاه قبل البرلمان....ان هيئه الحزب لها اولويه فى الحديث على اعضائها....برافو وزير الداخليه بس استنى لما نعمل لك قانون عشان تقتل فالناس براحتك


اجد نفسى اصرخ ....طب و انا مال امى ؟؟!!!!!!....فضلوا يحكوا عن اولويه الدور فى الكلام و انا مالى؟؟!!!!


لما الاقى وزير الداخليه اتوقع ان يكون هناك عصف على الوزير بسبب كذبه و قتله للناس على بعد شارعين من المجلس ....و لكنى افؤجئ بان الاعضاء يتخانقوا نص ساعه عشان ياخدوا الكلمه و لما ياخدوها يقضوا الوقت المتاح لهم فى شرح اللائحه فى اولويه الحديث و ميتكلموش فى الناس اللى بتتنش خرطوش و رصاص على بعد شارعين!!


لما الاقى وزير الداخليه......لا اتخيل بان العضو المحترم بيأذن فى المجلس !!!


لما الاقى وزير الداخليه....عمرى ما اتخيل ان الاعضاء -الموقرين- هيشجعوا الوزير على ضرب الناس اكثر لحمايه مبنى وزير الداخليه و ليحترق البشر....


لما الاقى وزير الداخليه....عمرى ما اتخيل سياده النائب اللى كان ضابط داخليه و كان ناقص يضرب تعظيم سلام للوزير كأنه لسه فى الخدمه....


لما الاقى وزير الداخليه....لا اتخيل ان يكون موقف الاغلبيه (200 و شويه كرسى للاخوان + حاجه و 90 كرسى للسلفيين) يكون بكل هذا القدر من التخاذل ....بمسك العصايه من النص دائما فيحيى الداخليه و الثوار فى ان واحد بلا موقف محدد


و بالتاكيد بعد 50 ساعه من الرغى و الزعيق و التصفيق على الفاضيه و المليانه ...لم اتوقع تلك (التوصيات)


1-تحميل السيد وزير الداخلية المسؤلية عن قتل واصابة المتظاهرين،ويتخذ المجلس اجراءات سحب الثقة منه.
*يعنى ايه تحميل مسؤليه؟؟؟...يعنى سياسيا ام جنائيا؟؟!!! 


2-البدء بتطهير وغربلة وزارة الداخلية من الفاسدين.
* يعنى ايه؟؟...ما هى الخطوات الجديه و التفاصيل و اذا كان الوزير فاشل و محتمل لدم الناس فكيف يكون هو من سيغربل الوزاره 


3-الوقف الفوري لاستخدام العنف مع المتظاهرين السلميين
*عقبال ما اتكلمتوا كان الضرب وقف مع ان الضرب كان شغال من 4 ايام و سقط خلالهم 15 شهيد 


4-الالتزام الفوري بسلمية الاعتصامات وعدم مهاجمة مؤسسات الدولة وعلي المتظاهرين في محيط وزارة الدخلية والعودة إلي ميدان 
التحرير لتمييز المخربين والتعامل معهم.
 *انا سمعت الكلام ده فى ايام الثوره برضه


5-سرعة اصدار تشريع يكفل حق التظاهري السلمي يوقع عليه لجنة حقوق الانسان ولجان التشريع في البرلمان.
*يدينا و يديكوا طوله العمر ...لسه هتبعت للجنه التشريع و بعدين يعملوا مشروع قانون و بعدين يوضع للنقاش و يتخانقوا عليه ... 


6-تفعيل القوانين الخاصة بحمل الاسلحة البيضاء والنارية بدون ترخيص.
 *هو كل ده مكنش متفعل ؟!!...ثم يعنى ايه نفعله هو مش اى قانون مفعل و لا مستنى مجلس الشعب يشغله


7-ضرورة نقل موقع وزارة الدخلية لمعاناة السكان وأصحاب المحال التجارية .
 *ههههههه.....الحته دى بتضحكنى قوى




و اخيرا فاعلن عدم قبولى لمبدأ قله الخبره السياسيه و جو استنوا شويه هيجى منهم ....دول كلهم فوق الستين هيتعلموا امتى ان شاء الله؟؟....مع ان شباب البرلمان اكثر حنكه من شيوخها ...


و فى الاول و فى الاخر و فى النص


يسقط يسقط حكم العسكر
يسقط يسقط حكم العسكر
يسقط يسقط حكم العسكر



السبت، 4 فبراير 2012

ساعه المستقبل

من كتاب "سأخون وطنى" محمد الماغوط