الأربعاء، 31 يوليو، 2013

حوليات31:شفت القسوة بتعمل ايه؟

الاخوان لسه مش فاهمين الناس قلبت عليهم ليه - بل ان بعضهم معندوش قناعه ان الناس قلبت عليها اصلا !! - مش مصدقين ان العجلة لفت خلاص و ان الدنيا اتغيرت فى ليلة و ضحاها

و انا بفسر ده بانهم مش بيسمعوا ام كلثوم ...عارفين ليه؟ لان الست عندها اجابة عن اى سؤال بتدور عليه و يا سلام بقى لو بتسمع اجابة سؤالك ده فى البلكونة و معاها كوباية شاى مظبوط فى ساعه عصارى...اسمع بقى الست تشدو:

أنا غيرني عذابي في حبك
بعد ما كان أملي مصبرني
غدرك بيه .. أثر فيه
و أتغيرت شوية شوية
أتغيرت ومش بايديه

وبديت أطوى حنيني اليك
وأكره ضعفي وصبري عليك
واخترت أبعد وعرفت أعند
حتى الهجر قـدرت عليـــــــــه
شوف القسوة بتعمل ايه

********************
لما تطهق شعب كامل لمده سنه و تسويه على نار هاديه و تطلق رجالتك يشتموا فيهم و تطلع انت شخصيا كرئيس تشتم نص مصر - سابقة تاريخية لاول رئيس جمهورية يشتم قاضى بالاسم على الهوا - عايز الناس تعمل ايه لما تجى مؤسسه ليهم مركزها عند قلوب الغلابا اللى هى الجيش و يطلع فى البيان جملة من عينه: 

"هذا الشعب الذى لم يجد طوال تاريخة اليد التى تحنو عليه"
*****************************
أنا يا حبيبي صحيح با أتسامح
الا في عــزة نفسي وحبي
وأما يفيض بي ما باعرف أصالح
وأعرف آجي كتير على قلبي
غدرك بيه أثر فيه
وأتغيرت شويه شويه
اتغيرت ومش بايدية
وبديت أطوي حنيني اليك
وأكره ضعفي وصبري عليه
واخترت أبعد وعرفت أعند
حتى الهجر قدرت عليه


الثلاثاء، 30 يوليو، 2013

حوليات30:بين نظيرة و جوليا

 احد افلامى المفضلة على الاطلاق كان طبعا جولى و جوليا و هو فيلم شهير لميريل ستريب  و كنت منبهرة  بشخصية جواليا تشايلد
اللى مثلتها اللى من كتر جماله اترشحت عنه للاوسكار لولا ان ساندرا بلوك حققت المستحيل و اخدتها منها بفيلم "ذا بليد سايد" فى اداء لا اعتقد انه كان يستحق ابدا حرمان ميريل من حقها الشرعى

المهم و الاخطر بقى اننا عندنا فى مصر مثال اجمل و اقوى... فى كتاب شهير اسمه "ابله نظيرة" كان الناس بتتريق عليه...نظيرة دى كان معاها دكتوراه فى الطهى من انجلترا كبعثة فى العشرينات اللى مكنش ينفع ابدا ستات يسافروا لوحدهم فيها و رجعت تدرس فى كلية التدبير المنزلى لما رجعت..اما كتابها "اصول الطهى" بتاعها فحوالى 900 صفحة و هو كتاب ضخم و معقد...و من كبره اتقسم ل18 جزء بعد كده

مصر ممكن نعمل فيها افلام زى ما نحب...احنا تاريخنا اطول بكتير

**************************
انا معجبة بشخصية "نظيرة نيقولا" دى جدا مش بس عشان هى كانت بنوته سنه 1926 و قدرت تكسر كل الحدود بمنتهى الادب و تسافر فى بعثة لانجلترا مع بنات زيها بس ...لكن عشان بقت جزء من حياة كل مصرية عاشت الفترة دى ببرنامج شهير ذو موسيقى اشهر و هو "الى ربات البيوت" يعنى مش بس اكتفت ان يكون عندها معلومة لا و فادت المتجتمع

انت ليه متخيل انى بهزر او بتريق على بتقول ان عندها معلومة...لاحظ اننا فى العشرينات فدراسة اكاديمية لبنت عن اى حاجة هو انجاز فى حد ذاته

و هنا اتذكر تعليق وليد طاهر بانها سيدة سمراء قبطية يفرض عليها الصيام معظم ايام السنه تقدر تخلى مصر و الوطن العربى كلهم ياكلوا اصناف و اشكال من اللى هى حتى متقدرش تاكلها
*********************
لو دورنا جوه ذاتنا اهرامتنا هنلاقى قصص كتير و الله تعمل الف الف فيلم انضف من اعمال السبكى

الاثنين، 29 يوليو، 2013

حوليات29: لا تثق فى الكلمات

نفسى احاول اوصل للناس اننا المفروض لا نثق فى الكلمات كوسيلة للتعبير اصلا...الكلمات دى على الرغم من اهميتها الكبيرة راجع منولوج الكلمة من الحسين ثائرا الا انها على الرغم من انها افضل وسائلنا لتوصيل الافكار مش كاملة ولا قريبة حتى من الكمال بمعنى تخيل معايا السيناريوهات الاتية:

شخص1:السيسى ده زى عبد الناصر بالظبط
شخص 2:اه و الله فعلا عند حق

بص بقى ال4 سيناريوهات دول:
1- لو كان شخص 1 ده اخوان و شخص 2 اخوان برضه فالفكرة اللى وصلت من الاول للتانى ان السيسى ده حاكم ظالم مفترى قتل ناس و لسه هيتقتل غيرهم و انه هيشبع اعتقالات فى التيارات الدينيه و هيمنع الانتخابات...صورة ذهنيه تتلخص فى اعدام سيد قطب و اعتقال زينب الغزالى

2- لو كان شخص 1 ده مواطن كنبة و شخص 2 مواطن كنبة برضه فالفكرة اللى وصلت ان السيسى ده محرر مصر من الطغيان و الفساد و انه هيبنى مؤسسات الدولة و يحمي مدنيتها من العبث و الافكار الغريبة على مجتمعنا و انه ضهر لينا وقت العوزة و يمكن كمان يجى فى دماغه التخلص من النفوذ الاجنبى فى مصر و هيمنه امريكا علينا و خطاب "المعونة دى نرميها لهم عالجزمة و اللى مش عاجبه يشرب من البحر"  و عبد الحليم و هو بيغنى بالاحضان كل الصور الذهنية دى اتنقلت فى جزء من الثانية من الاول للتانى

3-شخص 1 ده اخوان و التانى كنبة و هنا تقع مسخرة حقيقة لان على الرغم من الاتفاق الشكلى للحوار الا ان الصور الذهنيه متضاربه جدا فالاول بيشتم السيسى و التانى موافق على تمجيده

4- شخص 1 كنبة و التانى اخوان و هنا تقع مسخرة اخرى لان الشخص الاول ببساطة كده بيشتم التانى و فيه مغزى للتهديد كمان بينما الاخوانى تقبل الامر بصدر رحب كنوع من الاتفاق التام مع افكار جماعته
************************************


************************************
فهمت انا عايزة اقول ايه؟؟ كل كلمة بنقولها مش بس بتحمل معناها لا دى بتحمل كل خبراتك و قناعتك و احلامك حتى ...القصة مش قصة عبد الناصر خالص القصة قصه تواصل مفقود عند كل البشر فى الاعتماد على الكلمات

فى كاتب عبقرى اسم لويجى بيراندللو  كتب فى مسرحية له اسمها "ست شخصيات تبحث عن مؤلف" كلام احسن و اشيك من كلامى لكنه عجبا نفس المعنى

"و لكن الا ترين ان علة البلاء كله فى الكلام؟ , كل واحد لديه عالم كامل فى نفسه , و كل واحد فى عالمه الخاص! فكيف يفهم بعضنا بعض ايها السادة اذا كنت اضع فى كلماتى التى اقولها معانى و قيم الاشياء كما افهما فى عالمى انا بينما يفترض من يستمع الى ان كلماتى لها المعانى و القيم بعالمه هو , نحن نظن اننا سوف نتقابل و الواقع اننا لن نتقابل ابدا"

الأحد، 28 يوليو، 2013

حوليات28:عن العالم الافتراضى

نرجع للواقع حتى لو الفاجعه دى حركتنا و نزلنا فى مظاهرات مسانده للاخوان و ضد الضرب العشوائى مش هنعرف نلم 12 واحد حتى و مش بعيد نتضرب من الاهالى قبل ما نضرب من الداخلية معاهم....و متعولش قوى على الناس لانهم بينسوا بسرعه اى حاجه تمس الجيش(راجع ماسبيرو خاصة) و لانهم بيسامحوا بسرعه برضه لما كلمة "الامن القومى" بتتقال

اشتم براحتك عالنت لكن مش هنعرف نساعدهم"واقعيا" حتى لو حبينا....و بالمرة كده 
يا عم ارحمونا و النبى مش من قله اللى ماتوا فى رابعه بتشحتوا صور من سوريا على صفحات الاخوان !! ده انا بنحاول نتعاطف معاكوا مش عارفين من كلامكوا



طب نبص لقدام بقى : الداخليه نوت للاخوان خلاص و ده بقى واضح و انت عارفه انك مش هتعرف تمنع ده خلاص "على ارض الواقع" ...الاخوان هيعملوا ايه؟ توقعى انهم هياندوا الناس بزيادة الاعداد على امل ان زيادة الاعداد تمنع فض الاعتصام "اللى هو حته اعتصام فى شارع يعنى مش حصن عسكرى" و اجراء زى ده فى سخونه الداخليه هتؤدى لقتلى اكتر ..طب و بعدين؟؟...على ارض الواقع بقى كان فى قاعدة بتقول ان "درء المفسدة مقدم على جلب المنفعة" ...واضح ان محدش سمع عنها
 
على الجانب الواقعى: كونى اشتمك و تشتمنى عالنت دى مهزلة فى حد ذاتها لان انا فى البيت قدام كيبورد و منزلتش مظاهرات اصلا من ساعه 30 يونيو و حضرتك فى البيت برضه قدام نفس ام الكيبورد و ده يدل انك مش فى رابعه "الا اذا كنت بتتكلم موبايل و ما اظنش فى ظروف رابعه السودا دى انك سايب الجثث و بتلعب فى موبايلك" و انا و انت هنرجع نبات فى حضن اهالينا فبلاش ام التنظير على ناس بتموت اصلا 

جدير بالذكر ان فى ناس تحس انهم مبسطوين ان فى حد مات مخصوص عشان يقولوا لنا "مش قالنا لكوا ان ده هيحصل؟" خلاص ؟ خلصت؟ روح بقى اقعد جنب ابوك و الناس اللى ماتت ارقام كالعادة و لو كان فى حاجة هتحصل كانت حصلت بعد "كارثة الحرس الجمهورى" معندناش غير كلمتين على الفيس محتملوناش اكتر ما نقدر...و تلاقى كلام شاب عسول من نوع : "بلوك لاى حد نزل فوّض السيسى" خلصت؟؟ خلصت خلاص؟؟حققت حلمك كده؟انتقمت من اللى قتلوا؟؟ روح بقى اقعد على اللاب
 و نفسى ادرس نفسية شاب بيصحى الصبح يسمع اللى حصل فى التليفزيون فيقرر فتح الفيس و ينتقم من المجتمع فى اصدقائه..يدخل كل بروفيل شوية يشتم صاحبه او صاحبتها و يحملهم دم كل اللى راحوا و يا سلام لو شوية ان فريند و بلوكات كمان عملت ايه كده يعنى؟؟ هتسيبوا الحمار و تتشطروا على البردعه؟؟ نفسك تخدم الاخوان او انت ضد العنف و واقف فى زورك سهله و المصحف...انزل الميدان معاهم او على الاقل انزل تساعد فى المستشفيات الميدانية و كده...بطلوا شغل اللجان الرخيص ده بقى انتوا مش مسلمين بورما 
 و هل انا مش بقعد عالفيس و بنظر و باخد لايكات؟؟ اه طبعا...بس عارفه ان كل ده هرى و عبط و غير واقعى و مش مؤثر و هو ده الفرق اللى بحاول اوصله للناس ...من الاخر كده : الاستاتيوس و التويت بتاعك مش هيغير حركة المجرات يا تيت ..اعصابك بس

هل انا عايشة فى الوهم؟؟ اه...بس مش مصدقاه و هو ده المهم 
 على ارض الواقع: فى بلاد تانيه مشكلتها ان محصول الورد قل السنه دى , و دول مشكلتها ان السمنه بقت زيادة فى الاطفال , و دول بينتخبوا حتى رئيس الحى ..بتخيل نفسى فى السويد ولا سويسرا الناس دى مشاكلها من نوع تانى

السبت، 27 يوليو، 2013

حوليات27: و عايزنى اكسبها؟

النهاردة و فى ظل الجماهير الكبيرة اللى نزلت الشوارع و الميادين و اللى مكنتش من ضمنهم -رغم نزول امى فيها- قررت انى ارجع اجيب اللى عملناه فى ال 3 سنين دول كلهم من الاول بقى و افهم ليه جه اليوم اللى ينزل فيه حزب الكنبة و تقعد النخب و القوى الثوريه فى البيت بين الفيس و التويتر و بين ريموت التليفزيون متنقلة بين القنوات بمصمصة شفايف عميقة

بحاول اقرب من حزب الكنبة بحاول افهمهم...قعدتى وسط "النخبة" كتير خلتنى قرفانه من نص المجتمع مع انى ساعه الجد مش هلاقى حواليا شباب فيس و تويتر و بلوجر, و لما العربية عطلت بيا فى الشارع اللى ركنها لى و كان هيجيب لى ميكانيكى مكنش بيعمل لى ريتويت

 من اول تعديلات 19 مارس كان شباب الثورة و من عرف بعد كده ب"النشطاء" مناخرهم فى السما و كم هائل من التعالى على الناس..فصوت منهم عدد ليس بالقليل عندا فيهم
و عايزنى اكسبها؟

 و يكفى للثورة هزيمة ان مرشحها فى الانتخابات كان مرسى , رجل محدش كان يعرف اسمه حتى , رجل مكنش رقم واحد ولا 2 و 3 حتى فى جماعته, راجل كذب علينا فى اولى كلمته "تذكر حدوته ناسا"...بقى الثورة دى كلها بكل مراحلها سواء اللى ضد العسكر او ضد مبارك يبقى المرشح بتاعها مرسى؟؟
و عايزنى اكسبها؟


 شتتنا نفسنا ب3 مرشحين محسوبين على الثورة: حمدين و ابو الفتوح و خالد على..و طالبنا من الناس تصوت ليهم كلهم باسم الثورة!! بل ان بعضهم حسب ابو اسماعيل كمرشح ثورى برضه يلا ما هو فرح
و عايزنى اكسبها؟


نزلنا فى الانتخابات بقائمة هزيلة "الثورة مستمرة" ...لا منها جابت اصوات ولا منها عملت كوادر و حرقنا وجوه شابه كان ممكن يبقى وضعها افضل
و عايزنى اكسبها؟


ضيعنا وقتنا فى مطالب ايدلوجيه و نسينا مطالب الناس الواقعية اكل و شرب و امان ...و سبنا لهم الاخوان بزيت و سكر و مستشفيات متنقلة و "الاسلام هو الحل"
و عايزنى اكسبها؟


 نظرنا عليهم لما شبعنا.. جوعناهم بكلامنا الكبير...و بندور عليهم و نبوس ايدهم عشان ينزلوا معانا مظاهرات...بلاش تكرهوا الناس فيكوا تانى...فى انتخابات جاية عزيزى الناشط اعصابك بس
****************************
ليس جلدا للذات بل محاولة لايجاد باب خروج "مش رواية فشير" حقيقى من الزنقة اللى احنا فيها دى

بداية و كمرحلة اولى : ابوس ايدكوا بلاش نكرر نفس الغلطات بالحرف بليز ...ركزوا

اذا كنتوا مش عايزين السيسى يترشح "و انا معاكوا جداااا" اتفقوا على مرشح من دلوقتى...عملوه يتكلم..شكلوا له مستشارين و نواب "بجد" مش زى بتوع مرسى...فككوا من ام التنظير بقى و انزلوا الواقع .......يمكن نعرف نكسبها
*********************************

- لأ .. مش محتاج حد يترافع عنّي .. و متشكر قوي للمحكمه اللى انتدبتك علشان تكمل الصوره المزيفه للعدل و القانون .. اتفضل يا أستاذ .. انا مش لازمني محامي , أنا أعرف ادافع عن نفسي كويس

* خلصت اللي عندك ؟ قسمتك بقي اترافع عنك .. عجبك مش عجبك هترافع عنك

- قلتلك مش محتاج محامي .. يا شاويش حنفي !

* انت خايف يابني اكسب القضيه ؟ من الناحيه دى اتطمن .. هخسرها .. 99% هخسرها .. و هيحكموا عليك .. و هيبقي الحكم قاسي قوي .. و للمره المليون هيقولوا عليا محامي حمار .. قسمتنا كده .. حمار بيترافع عن حمار

- طيب لما انتَ عارف انك هتخسرها .. جاي ليه ؟

* تنفيسه .. ليا و ليك .. كلمه حلوه نقولها .. صحافي يلقط لمحه نضيفه .. قاضي تفلت منه كلمة شجاعه .. أهى تنفيسه و السلام.. زمن !

زمن بيبرروا يرموا فيه البومبه على ناس ملهمش دعوه بالحرب خالص و عايزني اكسبها ؟
زمن بتتشوي فيه الناس فى الأفران علشان لون جلدها احمر ولا اصفر و لا عنيها مسبسبه و عايزني اكسبها ؟
زمن بيلموا فيه ولاد الناس .. سن 16 و 17 سنه و يدفنوهم تحت الرمل بإسم الحريات الأربعه , و عايزني اكسبها ؟
زمن بيكسبوا فيه فرد واحد 5000 جنيه فى دقيقه , و بيغلوا على التاني اجره التروماي و عايزنى اكسبها ؟ 

 
كل اللي بتمناه انهم يخففوا عنك الحكم و لو سنه ..

اسكندريه ليه ؟ 1978

الجمعة، 26 يوليو، 2013

حوليات26:الحق و الرجال

فى محاولة جديدة لتحديد موقف نهائى من بكرة قلت الف على البروفيلات للناس اللى بثق فيها و اللى مش بثق فيها خالص يمكن اعرف احدد بوصلتى فى الايام المعوجه دى:

-ايمن نور بيقول النزول غلط و حرب اهلية...اممممم طالما ايمن نور قال كده يبقى النزول صح وش, ده راجل متلون و اللى يمشى وراه يبيع عياله اصلا  و مراته "جميلة اسماعيل" برقبته و ارجل منه ميت مرة

-يوسف زيدان بيقول النزول صح و تدعيم للجيش...امممم طالما ايمن نور قال كده يبقى النزول غلط وش, يوسف زيدان عندى زى هيكل عبقرى فى الماضى لكن ممكن يسوحك لو سمعت رأيه فى المستقبل ...مش قارئ جيد للاحداث و فى رأيى ملوش فى السياسة اصلا

-مختار نوح بيقول ان النزول صح و انه هينزل هو و عياله و مراته لتدعيم الجيش...اممممم طالما مختار نوح قال كده يبقى النزول اعتقد ان صح , احد قاده مصر القوية القليلين اللى بيفهموا , بأثق فى رأيه و دماغه نضيفه فى ايام انتشر فيها شم الكله المضروبه

-توفيق عكاشة بيقول النزول صح...ههههههه يبقى غلط تنين ده راجل مجنون اصلا ...هى وصلت لعكاشه؟؟

-علاء الاسوانى متحمس كده و سعيد و وصل بيه الامر انه متحفز قوى من مظاهرات الجمعه...امممم اول مرة اشوفه كده بيقول:" دعوة التظاهر الجمعة القادم أطلقتها القوى الثورية قبل الفريق السيسي. واجب المصريين جميعا ان ينزلوا الى الشوارع لحماية الثورة من إرهاب الاخوان" ....امممم عموما مش بثق فى اراء عاصرى اللمون عشان لبسونا فى الحيط قبل كده فده يدل ان النزول غلط

-موقف حسن نافعة كمان مفاجئ ليا جدا !!!! فضلت فترة طويلة عندى قناعه انه اخوان بشرطة ماله قلب على الاخوان كده ليه؟؟ و بيحملهم كل الدم فى اى حته....حسن نافعه احيانا بيفهم يمكن النزول مش وحش

-نجى بقى للزغلول الكبير حبيب هارتى دكتور بلتاجى اللى فى رأيى سبب كل 30 يونيو دى او على الاقل هو سبب ان انى مضيت تمرد فى 15 مايو 2013 و هو يوم لا انساه

 هو منين البلتاجى بيخوف الناس انهم هيموتوا يوم الجمعه و ان السيسى بيضحى بيهم و فى نفس ذات الوقت بيقول ان الاخوان "بيتعهدو بالسلمية" !!!!!!!!!!!!!!!!!!!! هينزلوا يقتلوا نفسهم يعنى؟؟ ارحم امى يا بلتاجى انت اللى لبست الاخوان فى الحيط اصلا...دى حاجة زى الانفجار السلمى و الاقتحام السلمى كده للى ميعرفش
http://gate.ahram.org.eg/News/376027.aspx


البلتاجى يضرب من جديد "و اترك لخيالك هو بيضرب ايه"

-اولا :انا باطالب بالشيك بتاعى من ال23 مليون دولار دول "دقيق قوى اسمالله" و عايزهم بالدولار و كاش

-ثانيا: هى اسم المليونية "اسقاط الانقلاب" ليه؟؟ مش اللى فاتت اسمها "كسر الانقلاب" ؟؟ و الجاية هتبقى ايه "لوى الانقلاب" و اللى بعدها "عدل الانقلاب"

-ثالثا: حلوة فكرة الجمعه اللى يوم الخميس دى قوى ...مع انى احييكوا عليها عشان الاحتكاك
اممممم و مدام "طبعا" البلتاجى بيقول النزول غلط...يبقى النزول اكبر صح فى الدنيا
****************************************
فهمت حاجة؟؟ لا طبعا هو انا لو حسمت امرى كان زمان حالى كده؟؟

عارفة طبعا ان : الرجال يُعرفون بالحق , وليس الحق يُعرف بالرجال ...بس بعتبرها محاولة لفض الاشتباك الذهنى
************************************************************  
عارفه ان مش محتاج تفويض عشان يحارب الارهاب بس مقدره ان الضغط الدولى عليه عالى...شايفاها خطوه غبية لكن مش كارثية "لسه" على الاقل مش هارفض او اقبل التفويض...متحفظة
كانت جدتى بتقول : "حرّص و لا تخوّن" نفسى نتعامل مع الجيش عموما و مع السيسى خصوصا بالمنطق ده...احنا اتلسعنا من الشوربة قبل كده ميت مرة انفخ فى الزبادى براحتك بس بعقل #‏خبط_بالعقل....انصحكوا بلاش صدام بين الجيش و شباب القوى الثورية..مش عايزين تنزلوا بلاش عادى بس بلاش نخسر "صداقة العدو" من دلوقتى خلوها قدام شوية...هى هتتفض هتتفض بس مش لازم بدرى كده


الخميس، 25 يوليو، 2013

حوليات25:مصر هى أمى "حرفيا"

طب اختصارا لموضوع السيسى ده انا عندى مشكلة من نوع تانى خااالص:

ماما قررت تنزل يوم الجمعة...و قرارها مفهوش رجعه انا عارفه...و مهما كانت توسلاتى و حديثى عن العسكر و الوفاق و المصالحة الوطنية مش هترجع...و اخر ما زهقت منى قالت لى طب خليكى بقى فى البيت و بلاش تبيعى مبادئك انا هانزل لوحدى...و تضيف جيلكوا ضيعنا و ضيّع البلد بشعارتكوا اللى جبتنا ورا...و انا خايفة عليها تنزل لوحدها 


لسبب ما اعتقد ان الموقف الصغير ده بينى و بين امى يلخص مشكلة مصر كلها

**************************************
مش عايزة ابالغ برضه فى اهميه اللى اتقال اهى مليونية و هتخلص...فرد عضلات و السى ان ان تصور و معاها شعار "ضد الارهاب" اللى امريكا عندها ارتكريا منه و بعدين كم الاغانى الوطنية اللى فى القنوات تخوف 0_* هو احنا بنحارب ولا حاجة؟

 انا بس فى حاجة واحد بفكر فيها من الصبح: مش انت عايز تحارب الارهاب؟؟ طب يلا جو اهيد هو حد ماسك ايديك؟؟مش انت جيش و كده مستنى ايه اصلا؟ هو احنا اللى هنسند الجيش ولا الجيش اللى مفروض يسندنا

و لو كان السيسى حدد ان التفويض ده فى سينا بس كنت نزلت بحب و نزلت اصحابى ...بس التفويض العام مخوفنى غصب عنى

 و لسة الاخوان بيهروا فى هل انكلاب ام ثورة و هياخدوا السلطة او لا مع اننا عدينا المرحلة دى خاااالص و وصل المصريين لمرحلة: انقلاب انقلاب و ماله؟ ...و لسة النشطاء بيهروا فى عدم اقصاء الاخوان من الانتخابات المقبلة و للاسف اعتقد اننا عدينا المرحلة دى برضه...دلوقتى احنا قلقانين على الاخوان نفسهم وسط غضب شعبى و استنفار عسكرى افهموها بقى ابوس ايديكوا


الاخطر بقى ان حتى لو 6 ابريل و كل الحركات الثورية منزلتش ولا هيفرق حاجة...حزب الكنبة بقى بيفكر بذهن خاص بيه بعيد عننا


و الاهم ان لو الوضع معكوس كان زمان الاخوان بيجهزوا المنصات و طلقوا الشيوخ و رشوا البخور و "اضرب يا سيسى" و هنروح بعيد ليه محدش ينسى جمعه قندهار الشهيرة بتاعه : "يا مشير يا امير احنا ولادك فى التحرير" 


و عموما احنا و انا شخصيا حذرت قبل كده من "هطل" الاخوان اللى هيؤدى لحاجة من الاقصاء الشعبى قبل الرسمى 


و اخيرا ملحوظتين ملهمش اى داعى:

1-انا مكنتش قلقانه من طنطاوى قد ما قلقانه من سيسى...لان طنطاوى كان سئ جدااا فى الخطابات و كان مهلل...انما السيسى عنده كاريزما و امور و بيعرف يتكلم و ده فى حد ذاته يخوف شوية لانه بيقنع الناس باى حاجة هيعوزها "اتمنى يبطل يقسم فى الناس و يستخدم كاريزمته ده استخدام مفيد"

2- النشطاء و احنا و المجتمع كله ولولوا لان الجيش و الحكومة مكنوش بيتحركوا قدام العك و الدم اللى فى الشارع و اللى فى سينا...و نفس الناس دى مرعوبة و بتصوت من الخوف بمجرد "تلويح" لتحرك حقيقى...احنا بس عشان اتلسعنا من الشوربة كتير



الأربعاء، 24 يوليو، 2013

حوليات24:مواسم الهرى

فى أغنية شهير لوردة الجزائرية اسمها: 
ياللي حبك مواسم
ازعل واغضب وخاصم 
اصلك على القلب حاكم 
وبقيت كل المنى
 وليالي تصفالي 
 وتسبني طول السنة
*****************************************

اهو حال مصر بقاله فترة بقى زى الاغنية دى بالظبط....خاصة مواسم "الرغى" و "الهرى" على الفيس و تويتر و خلافه...و كأن الناس ماسكين نتيجة و معلمين على ايام المناقشات "اللى عادة عقيمة" و زود على كده بقى نظرية القراءة الموسيمية

اكبر مثال على كده حالة السعار الفكرى اللى بيجى فى 23 يوليو من كل عام...و المشكلة ان اراء الناس معروفة جداا و متوقعه , الاخوان بيكرهوا ناصر و بيلقوها فرصة زى معاد ميلاد و وفاته و زود عليهم "ذكرى النكسة" عشان يشتموا و يسبوا و يلعنوا راجل متوفى من زمن اختلف عليه الجميع لكن يحترمه معظمهم

و الناصريين طبعا معروف هيقولوا ايه من اول خروج الانجليز من مصر لحد تأميم قناة السويس و 56 و حرب الاستنزاف ...و كمان معروف انهم هيشتبكوا كلاميا على الاقل مع فئة الاخوان فى خناقة موسمية شهير للغاية

ما هو المشكلة مش فى الكلام ذاته...المشكلة فى تكرار نفس الكلام كل سنه !!!

 بس جد علينا السنه دى الذكر المكثف ل"محمد نجيب" كمفجر الثورة الاصلى و القاضى على العسكرة...معندييش مشكلة مع الرجل ذاته لكن عندى مشكلة خطيرة ان كل الدلائل اللى بيتكلم عنها الناس فى الموضوع ده هو مذاكرات محمد نجيب نفسة !!!!!!!!!!

شايفة السؤال فى عينك اهو : و انتى ك دينا رأيك ايه؟؟ هاقول لك مش هاكتب النهاردة عشان اقسمت انى ما اتكلمش فى الموضوع ده النهاردة لان الهرى لا دين له
*********************************************
خد كمان بقى موسم 6 اكتوبر و 10 رمضان و حوار كل سنه بان السادات بطل الحرب و السلام او ان السادات باع مصر لاسرائيل

و زاد علينا فى الكام سنه اللى فاتت اسم "الشاذلى" كحل وسط للجميع للتخلص من انجاز السادات عشان يشتموه بمزاج...و تتكرر نفس مشكلة الدليل المادى باستعانه الجميع بمذاكرات "الشاذلى" نفسة كدليل على انه هو اللى حارب فى اكتوبر تقريبا لوحده

و كضرب عصفورين بحجر واحد يستعين البعض بالشاذلى ذاته للقضاء على "اسطورة" الضربة الجوية الاولى لحسنى مبارك,,و انقسموا فسطاطين الاول ان مبارك ملوش دعوه اصلا بالضربة الاولى بينما تبنى الاخرون ان هو اللى عملها لكنها كانت غير مؤثرة على الاطلاااااااااااق

و برضة مش هاقول رأيى فى الموضوع ده :D
*********************************************
 من كتر الكتب التاريخية المتناقضة اللى مرت عليا اتعملت حاجتين:

- التاريخ "دايما" بيتكتب مرتين , مرة اولية و مره بيد المنتصر فدايما كل حادثة تاريخية ليها زوايتين و احيانا اكثر ...و انحيازك لاحدها مبنى فى 90% من الحالات على مواقفك الشخصية و الفكرية و الايدلوجية مش على قوة سند احد الروايتين

- الكائن الاسطورى الخرافى المجنح ب7 اجنحة  و 3 ذيول و رأسين المسمى "كتاب تاريخى محايد" مش موجود أصلا...فلا تبحث عنه و انصحك بالاكتفاء بقراءة كتابين "فى اتجاهات مختلفة" فى كل موضوع خيرا و ابقى

الثلاثاء، 23 يوليو، 2013

حوليات23:عزيزى يوسف زيدان



عزيزتى الدكتور يوسف زيدان:

تحية طيبة و بعد....اكتب لك -مع انى متأكدة انها مش هتوصلك- اولا اعرفك بنفسى انا دينا نبيل , اكيد ميمثلش لك الاسم ده اى حاجة بس حضرتك تمثل لى كتير بصراحة...بس انا معجبة من نوع رخم شوية مش بحب "كل" أعمالك لكن بحترمها بشكل عام و احب اقولك ان رسالتى دى هدفها الاصلى انى ادفع حضرتك فى الاتجاة اللى هأحبك فيه اكتر, قريت لحضرتك كتير فى مختلف الكتب طبعا لان انتاجك غزير ما شاء الله "مش عارفه بتجيب الوقت ده كله منين" ...

طبعا "عزازيل" دى بيضة الديك, كتاب من كل جماله بحاول اكتب عنه ريفيو بقالى 4 سنين و مش عارفه مع انى نادرااا ما بعجز عن الكتابة بالعكس ده انا يمكن مشكلتى انى بكتب ريفيوهات اكثر من اللازم لكن لسبب ما اعجزتنى "عزازيل" و يشاركها هذا الموقف عمل واحد فقط هو "مئة عام من العزلة" لماركيز...غير كده انا بكتب للصبح, و من فشلى حطيت فى الريفيو صورة 5 نجوم و تعليق فيروز فى "عندى أمل فيك" : بيكفى تيراااا تيراااا

انما "النبطى" بقى فمش من اعمالى المفضلة خاالص, اممم يمكن عشان دخلت ليها بمعلومات مسبقة غلط قللت كتير من استمتاعى... السبب الرئيسى لقراءتى لها بالاساس هو معرفه كيف اسلم المصريين ..كيف اندمج العرب فى المجتمع المصرى..و كل شوية اقول اهو خلاص هانت الاسلام هينزل و بعدين نشوف انتشر فى مصر ازاى...نص الرواية خلص و مفيش حاجة حصلت و ماله؟ هانت....اهو الاسلام نزل اهو الحمد لله....بس الكتاب قرب يخلص مش مشكلة عادى...اهو هينزلوا مصر اهو و نشوف وجه نظر يوسف زيدان -الغير عادية اكيد- و فجأة هووووب الرواية خلصت...امممم يمكن ده كان عيب فى تسويق الرواية

و فى نفس المنوال كانت "ظل الافعى"  و كأنك ارادت "حشر" فيل بداخل صندوق للاحذية...ظلمت محتواها و قزّمت عمل كان من الممكن ان يكون اسطورى فى حدوته باهتة , مشكلتى الاساسيه فى هذا الكتاب كيف دمج يوسف زيدان كل تلك الاحاديث فى القصه الاصليه فهذا الدمج هو ما قلل من شأن الكتاب فاصرار يوسف زيدان على اقحام هذا الحديث فى "حدوته" ادبيه جاء سيئا للغايه...و اصراره على قولبه الكتاب فى عمل درامى ادبى جاء مبالغا فيه , مشكلتى مع ظل الافعى ليس المحتوى...فانا عشق الاحاديث عن المرأه و الالهات و تجسد النسويه فى الارض احب هذا النغمه ربما يكون تحيزى للمرأه هو السبب المباشر فى ذلك ففى عشق حواء يطير المنطق و العقلانيه مع انى قرأت تلك الاحاديث من قبل فى رائعه باولو كويلو ساحره بورتابلو

احم لكن و اعذرنى على قلة أدبى "محال" كانت كارثة تمشى على الارض...انتظار طويل ثم حلقات مسلسله فى الجرائد و تمهيد طويل لروايه محال تلا ذلك نزول الروايه بردود افعال من القراء اقل ما توصف انها مخيبه للامال ....السؤال هو لماذا؟؟ هى بالتاكيد لا تستحق كل هذه الضجه و الانتظار و اللهفه و تصميم وليد طاهر للغلاف-الغير مميز-..بل انها حتى لا تستحق كاتب كيوسف زيدان

انما بغض النظر عن الاعمال الادبية...الاعمال الفكرية ممتعة و فيها اثراء رائع للعقل و الروح


"اللاهوت العربي وأصول العنف الديني" لا استطيع-ولا اجرؤ-على شرح الكتاب نظرا لان شرح الكتاب يتشرح فى مجلد تكثر صفحاته على عدد صفحات الكتاب نفسه ..لكنه -كعاده يوسف زيدان- كتاب ممتع و خطر كانك فى حقل الغام فكرى فلا خطوه دون قنبله فكريه تحت قدمك...كفاية المقدمة حتى


"التقاط الألماس من كلام الناس" على الرغم من انه مقالات مجمعه و انا مش بحب النوع ده الا انه ممتع و مسلى و مفيد فى ان واحد...و فى كم برضه من المفتجرات كفاية مقال "بيع العيال" مقال نارى محدش كتير خد باله منه


 "فوائح الجمال وفواتح الجلال: نجم الدين كبرى" كان من بداية كتبى مع الصوفية ...سواء المقدمة مقدمه طويله اشبه بالدراسه عن تاريخ الشيخ نجم الدين و افضاله و اصحابه و معلميه و تلامذته و الجو التاريخى وصولا الى مشهد استشهاده... الجزء ده ممتع على الرغم من طوله و على الرغم من شعورى بانه موجهه للدراسين و المنشغلين بالبحث اكثر مما هو موجه الى القارئ العادى...او كتاب الشيخ نفسة ..شرح الكتاب ببساطه و بعمق عن الصوفيه بكثير من التفصيل لا ادعى انى فهمتها كلها لكنى احتفظ بها لقراءه ثانيه محتمله اكثر تدقيقا ...يتميز الكتاب بتقديمك لعالم الصوفيه المعقد بلطف و يجعلك مع مرور الصفحات تشعر بالصفاء الذهنى و المتعه الروحيه فكأنك تنظر للاسلام من زاويه ورديه حالمه رائعه حيث عشق العبوديه و الاستمتاع بالقرب من الله


لو حبيت اكتب عن تأثير حلقات "الاولياء" فيا هاحتاج ورق و ورق...منظرى اصلا و انا قدام التليفزيون الساعه 3 صباحا بتفرج و انا مثبته البيت كله صامتا عشان اتفرج بمزاج يتعمل عليه مقالات

و هابدأ قريب فى السباعية ...اللى متوقعه ان يكون فيها محتوى على مستواك المعتاد

و اخيرا هاوصل لسبب الرسالة الاصلى: 

سؤال بجد‬ هو ليه يوسف زيدان بكل علمه و حبه عن الصوفية و التاريخ مش بيكتب لنا عمل على نمط "قواعد العشق الاربعون" مع انه اجدر من مؤلفتها التركية بكده؟ و متفرغ لقصة حديثة فاشلة مفهاش عمق زى "محال" لا و كمان بيضيع وقته فى عمل اجزاء ليها؟؟ تاريخ الصوفية مليااااااااان قصص و مادة تحفة للشغل عليها و الله بس جرب حتى


الاثنين، 22 يوليو، 2013

حوليات22: نوستالجيا زززى

بما ان ده أسبوع النوستالجيا فى حوليات فضلت اعصر دماغى من الصبح على حاجة ليها علاقة بالحنين...و بغض النظر ان تلت اربع اللى بنكتبه اصلا له علاقة بالماضى..لكن كلمة نوستالجيا عندى تساوى شئ واحد و واحد بس...الساعه 10 صباحا فى القناة الثالثة و فترة الكارتون...و فترة الكارتون تساوى شئ واحد انه عزيزى مازنجر

مازنجر ..مازنجر..البطل الشجاع..
قواه الجبارة..تحارب الأعداء..
مارد يحارب ..في البر أو في الماء..
مارد يحارب..أطلق الصاارووخ ..
لقد حان الوقت ..و أنتصف النهار..
تجهز تحضَار ..لإطلاق الناار...
مازنجر...مازنجر ززززززززززززززى
***************************** 
بما ان الايام مرت بقى لازم اوجه الاسئلة اللى وقفت فى زورى من زمااااااان

اولا: هو البطل كان بيقود الجهاز الضخم اللى طوله 6 ادوار ده ببساطة كده ازاى؟؟
 هههههه يا اخواتى انا كنت بتفرج على العبط ده ازاى؟؟ دا انا عربيتى فيها ادوات اكتر من الكام دراع و و زار دول...بقى كووووووول الجهاز المعقد ده اللى بيجرى و ينط و يهزم الاعداء يبقى من جواه بسيط و لذوذ كده؟؟

و الاهم بقى ان كل ما مازنجر كان بيضرب كان البطل يتوجع بداله؟؟ هو فى ارتباط عضلى عصبى بينهم ولا حاجة؟؟
*****************************************
و كله كوم و "الحوامة" دى كوم تانى خاااااااااالص
و مين من جيلنا مكنش نفسه فى بتاعه من دى؟؟ يروح بيها المدرسة و عند جدو..و كفاية انها حمرا و بتلمع و اهى تعمل شغل قدام العيال فى المدرسة و انت نازل بيها و بعدين تقلع الخوذة و تنفض شعرك يمين و شمال و صاحبك واقفين متغارين ...ههههه كان حلم قديم عندى و عند غيرى 
*****************************************
 نجى بقى لاسلحة الاخ مازنجر الفتاكة بالقوى
 اول ما عمو مازنجر يتزنق قوم قاطع دراعه و يطلع الصواريخ...و احيانا يقطع دراعه يلف يضرب الوحش فى وشه و تلف توماتكى توماتكى و ترجع تتلزق مكانها تانى...ياااااه يا اما حلمت انى اعرف اقطع دراعى يضرب الدكتور فى المحاضرة و يرجع يتلزق تانى ولا بلاش لاحسن كان فى بعض الحلقات الوحش بيدمرها و كان اونكل مازنجر يرجع مقطوع الايدين و يعملوا له غيرها, انما انا الاقى مين يعملى دراع تانى لو ضاع؟

"الاشعة تحت الصفراء" كنت بسميها كده زمان...كانت عينيه بتطق شرار لما يزعل...و انا صغيرة كنت بحس ان ماما عينها بطلع حاجات زى دى لما بتغضب...و كانت كالعادة الاشعة دى بتسيح الوحش الشرير مع ان الوحش التانى ده المفروض انه فولاذ يعنى مش هيسيح بالعبط ده 


ده غير انه طبعا كان بيطير ...ازاى بطل خارق و مش بيطير يعنى؟؟ بيطير ازاى؟؟ مش مهم يا عم المهم انه بيطير و خلاص
*****************************************
نجى بقى للمسخرة اللى فى المسلسل اللى اسمها افروديت دى

 انا رأيى ان افروديت دى ضيعت قضية المرأة...مع انى المفروض انى اكون سعيدة بان فى سوبر هيرو ست لا و ماشاء الله عليها روبرت عملاق كمان...لكن كونها بتضرب من الرايح و الجاى و مسخرة المسلسل و بتدغدع كل حاجة كان مخليها مدعاة لليأس اكتر منها للفخر
ده غير ان سلاحها الوحيد كان احممم "صواريخ بتطلع من صدرها" و علامة جنسية اتعجب من اقناعنا بها كأطفال...و خد كمان ان مكنش ليها اسلحة غير كده, بمجرد ان الصاروخين بتوعها يطلعوا و عاده مش بيدمروا حاجة كانت بتقف زى العبيطة و تستنى بقى اونكل مازنجر ينقذها

لا بس كانت ست جدعه احيانا ...هى صحيح احيان قليلة جدااا بس اهو احسن من مفيش يعنى
**********************************************
 اما بالنسبة لاصحاب ماهر و اخوه فكانوا عيال عبط بشكل ...ههههههه و منهم عيل مناخيره دايما سايبه كان شئ مقزز قوى
و صوتهم فى الدوبلج كان مسخرة هو كمان يا رفيييع قوى يا تخييين قوى
***********************************************
لكن المسخرة كانت تكمن فعلاااا فى "المزدوج" عدو مازنجر الاول
المزدوج اللى نصه راجل و نصه ست ...هههههه انا بستغرب احنا كانوا بيفرجونا على الحاجات دى ازاى و احنا صغيرين؟ بقى بطل مسلسل كارتون يبقى خنثى؟ يخرب بيت كده يا جودعان
********************************
نجى بقى للسؤال الذى حيّر الملايين: هو ايه الفرق بين مازنجر و جرندايزر... يااااااااااه احنا سألنا نفسنا السؤال ده كتييير قوى...نفس الرسمة, الاسلحة شبه بعض, بس الفرق ان اونكل جرندايزر فضائى كمان

عموما لو انت مهتم بالموضوع فى حد ملخص الفرق بينهم فى 3 صفحات :)
http://www.montada.com/showthread.php?t=247726 
*********************************
قال نوستالجيا قال....دا احنا عايشين اصلا جوه الماضى ده
/>
1 التعليقات

الأحد، 21 يوليو، 2013

حوليات21:شو بدى بالبلاد؟

امبارح كان يوم مميز لانه كان "سبوع" ابن اختى الجديد السيد الاستاذ الدكتور/أدم...ده تانى مرة أكون فيها خالة و هو احساس لطيف جدا بالمناسبة...اول مرة كانت مع "حمادة" ابن اختى الكبير و هو رفيق درب معانا بقاله 5 سنين اهو

و بغض النظر ان عمل "سبوع" فى رمضان مرهق جدا لان الضيوف جم قبل الفطار مما يستدعى تحضير فطار جماعى ل20 شخص ...و هو ما استدعى اننا نقف نحضر الوليمة دى قدام البوتجاز فى الحر و الصيام لساعات ..و انت اكيد عارف ان الاكل ده كله اترمى زى ما هو تقريبا لان الأصول المصرية تستدعى طبخ وليمة عظيمة كمضيف كما تستدعى انك متكلش كتير كضيف مما يؤدى الى نتيجة وحيدة حتمية تعلمها ست بيت و هى بترمى الاكل فى الاخر ده بالاضافة ان الصايم بيشبع من المية و العصاير قبل ما ياكل اصلا

الا ان الاخطر مكنش الفطار او حتى السبوع نفسة...الكارثة كانت اننا نحاول تجنب الكلام فى السياسة طوال الفطار و السبوع ببساطة لاننا اتجاهات سياسية كتيرة و هو مسكنا فى بعض و اتخنقنا هيبوظ السبوع و الفطار...يبان تجنب السياسة سهلا نظريا لكن الامر واقعيا اكثر صعوبة بمراحل فى وجود 30 واحد مصرى فى أوضة واحدة !!
**************************************
ابتديت المشكلة لما هتفت ماما بضحك و هزار "بنحبك يا سيسى" معلش أمى احيانا بتكون أوفر شوية هأعمل ايه يعنى اهى أمى...و المصيبة ان واحدة صاحبتنا اخوان بشرطة من الدرجة الاولى و جوزها كان فى رابعه العدوية يومها ..و احاول اشاور لماما انها تفهم مفيش فايده

و زادت المشكلة تعقيدا لما جت لنا اخبار ان فى اشتباكات فى الاتحادية ....و خد بقى للصبح تعليقات من الطرفين و المشكلة انى كنت بلعب دور السلك الشائك و احاول الفصل بين القوات المتناحرة

ههههههه لكن لب المشكلة كانت فى النسبة و التناسب لان 29 من ال30 انتى اخوان رسمى و بعضهم مبالغ فى كرههم للاخوان ...و واحدة بس غلبانه هى اللى اخوان بشرطة فكان الفصل اصعب لو تدرى
************************************
و بعد ما المولد اتفض و رشينا الملح و ال7 حبات و عدينا ام الولد على البخور 7 مرات و دقينا الهون فى ودن النونو و هى حاجات كنا بنفطس من الضحك و احنا بنعلمها خاصة اننا مش فاهمين احنا بنعمل كده ليه "بس الطقوس دى مسلية قوى بالمناسبة"

قعدنا نتنفس الصعداء و استغليت سماعات الصب اللى صوتها عالى قوى دى فى حاجة ممتعه جدا...ركبت فيه كارت الميمورى بتاعى و شغلنا فيروز و كان المنظر ممتع و كل واحدة بتدندن فى هدوء:

 كيفك قال عم بيقولو صار عندك ولاد
أنا و الله كنت مفكرتك براة البلاد
شو بدي بالبلاد , الله يخلي الولاد
بيطلع عبالي ارجع أنا و اياك
انت حلالي ارجع أنا وياك
أنا و انت ملا انت
/>
1 التعليقات

السبت، 20 يوليو، 2013

حوليات20:السودوكو و أنا

"السودكو تولد شعورا بالغا الرضا عند حلها. الارقام التسعة القوية,يظهر كل منها تسع مرات, متأهبا فى توازن تان لا يشغل اثنان المكانة او المرتبة نفسها. كأنها صورة راقصات ثبتت أثناء تنفيذ نمط معقد...السودوكو بالية صامت أبدى"

كريستيان ساينس مونتيتو...بوسطن الولايات المتحدة 

***********************************************
لو مريت عليا و شفتنى معايا كتاب صغير كده بدقق فيه , و ماسكة قلم رصاص مسنون, و مقربه النضارة من عينى منفصلة عن الواقع و المؤثرات الخارجية ....فالامر واضح و جلى: انا امارس رياضتى الفكرية المحببة "السو دو كو"

علاقتى بصديقى سودكو قوية و متينه...ابتدينا مع بعض من 5 سنين تقريبا مع الجرايد طبعا , لا انكر انى محبتهاش على طول لكن طول العشرة بالاضافة للحالة الراقية الفكرية و الذهنية اللى بكون فيها و انا بحلها مع الاضافة لفرحتك الصغيرة مع كل رقم بكتبه و فرحتك الكبيرة مع كل لعبة بتخلصها بمربعتها ال81 بالاضافة لفرحتك العظمى لما تخلص كتاب كامل 100 صفحة منه ...شئ مثير للاهتمام و التعلق

و لان "دار الشروق للمطبوعات" حرامية نظمى فهمى رسمى فاول كتاب سودكو اشتريته من منشوراتهم كان ب10 جنية بينما اكتشفت بعد كده عالم مطبوعات السودكو الرخيص اللى الكتاب ب2 جنية عادى يعنى...اظن ان دار الشروق سينتهى بيها الامر بجانب شركة موبنيل فى قاع الجحيم مع الناس اللى بتاخد كتبى و تستلفها و تكمرها

اظن انى حليت حوالى 5 كتب كاملة لحد دلوقتى غير الجرايد و المجلات و على النت
*******************************************
يمكن تضحك عليا او تعتبرنى عبيطة لو قلت لك انى اعشق السودكو السهل اللى بتحل بسرعة :)

بكره مستويات السودكو الصعبة اللى على الرغم انى بعرف احلها فى النهاية لكن طول الوقت فى حلها و توترى و انا بحلها بيدمروا متعتى و الهدوء النفسى اللى بحبه فى عزيزى سودكو...و بصراحة مش فاهمه ايه فايدة انى افقع مرارتى فى لعبة صعبة اذا كان ممكن اتبسط بلعبة سهلة 

و طلعوا فى المقدر جديد السودكو المركب كمان !!! اللى هو 9 لعبات فى بعض !! هو صحيح فاضية بس مش قوى كده
****************************************
احد الاسئلة اللى عمرى ما جاوبت عليها : هو انتى بتحلى اللعبة دى ازاى؟ ما تعلمينى كده

فتكون اجابتى الغير مفيدة كالعادة: اللعبة عبارة عن 9 مربعات جوه كل مربع 9 مربعات..مطلوب انك تكتب ال9 ارقام من غير ما تتكرر فى نفس المربع او الخط الافقى او الخط الرأسى
**************************************
كانت بدايتى مع "الكلمات المتقاطعة" و هى عشق بابا القديم و على الرغم انى مكنتش وحشة فيها الا انى قررت ان يكون ليا شئ مستقل عن حاجات بابا خاصه انى عارفه انى عمرى ما هاكون احسن منه فيها و هو نفس السبب اللى خلانى اتجه لعلمى علوم و من  للطب على الرغم من فرصتى فى دخول هندسة من علمى رياضة لو دخلت
************************************
انا بحب السودكو عالبحر , فى الرحلات , هى و الكتب كلوا نص عمرى اصلا ...بس بحبهم اعمل ايه يعنى؟
0 التعليقات

الجمعة، 19 يوليو، 2013

حوليات19: بلاش أفورة

قالها سعد زغلول زمان : "مفيش فايدة" و واضح انه بقى اسلوب حياة فى مصر مش مجرد سطر فى كتاب التاريخ

بقالى فترة مش بقرا جرايد عموما و جرايد الحكومة خصوصا بصراحة لان مرارتى الصغيرة لا تحتمل النفاق بصراحة...خاصة ايام الاخوان اللى كانوا تقريبا احتلوا الجرنال ...تخيل يتشال مقالات الكتاب و يتفرد مكانها مقال حلمى الجزار و محمد العمدة...ثم مين حلمى الجزار ده اصلا عشان يكتب فى جرنال بحجم الاهرام؟؟...ده غير ان صور مرسى الدائمة على الصفحة الاولى كانت بتجيب لى ارتكريا مش بيفنع معاها مضادات حساسيه ولا دى دى تى حتى

و بما ان اللى كان بيعين رؤساء التحرير هو مجلش الشورى "المحلول و ليس المنحل لانه حٌل و لم يكن ينحل اخلاقيا فهو محلول و ليس منحل و هو خطأ شائع فى مصر " هو انا كنت بقول ايه قبل درس النحو ده؟؟ اه افتكرت مجلس الشورى ابو ال7 فى المية اللى بيجتمع دلوقتى عالقهوة فى مدينة نصر كان هو اللى بيعين رؤساء التحرير فكان النفاق اجبارى و راجع مشكلة رئيس تحرير الجمهوريه اللى مشى لما شتم المشير اللى ايامها كان سمن على عسل مع الاخوان 

و لكل الاسباب دى مجتمعه قاطعت النوع "المقزز" ده من الجرايد...و قلت يمكن بعد 30 يونيو يتعدل حالهم
**********************************
لكل على رأى جدتى: "لقيت ما التقيتك و الطبع فيك غالب , و ديل الكلب ما ينعدل لو علقوا فيه قالب" ...واضح ان النفاق عند الجرايد القومية مزاج خاص  و داء مش هيتخلصوا منه...مش قادرين يحسوا انهم جرنال الناس مش الحكومة ...فؤجئت بكم شتيمة و قباحة و تلبيس للاخوان "للى شبعوا فيهم نفاق" و على الصفحات الاولى !!! طبعا مش لازم افكرك موقفى ايه من الاخوان عشان انا صايمة و انا بكتب و اخاف افطر عليهم بصراحة...بس اللى بتعمله جرايد الحكومه ده ببساطة تقزز

شوف كده مثلا...دى الصفحة الاولى من جرنال الأخبار "اخدتها سكانر" شوف بقى الخبر اللى انا معلمة عليه بالاصفر

طب نافق الجيش ماشى...نافق الثورة ممكن...اشتم فى الاخوان و ماله ...كل ده مقبول فى عرف النفاق

انما تعزو انخفاض نسبة النجاح لوزير التعليم الاخوانى؟!!!!!!!!!!!!!!!!!!!!!!!!!!!!!!!!!!! ده ايه المستوى الجديد قووووى ده...انتوا بتجيبوا الابداع فى النفاق ده منين؟ ايوه بتستعينوا بخبرات خارجية يعنى؟ ولا الذكاء الاصطناعى بينفع ؟

و ارجع و اقول للاخوان تستاهلوا...زى ما اتبسطوا قوى لما نفس الجرنال ده نافقكوا و شتم معارضينكوا بنفس الهطل...يبقى يتساهلوا

ايوه بس الوزير ماله و مال نتيجة الثانوية العامة؟؟؟ اممممم  لا هو اللى بيحط الامتحانات ولا هو اللى بيمسك ايد العيال لما بيجابوا فى الامتحان و بعدين هو وزير التعليم ولا وزير الثانوية العامة؟؟ ثم ان انخفاض المجاميع ده عادى جدا و حصل فى سنين قبل كده

و ارجع و اقول لو على و مصطفى امين شافوا اللى بتعمله "أخبار اليوم" كانوا ماتوا حسرة على ضياع مجهود عمرهم

الخميس، 18 يوليو، 2013

حوليات18:البرتقاليين و أنا

صورة طبق الاصل من تليفونى القديم
بداية كدة لازم اعترف ان حظى فى الموبيلات قليل "جهازا و خطا"...انا ابتديت ب3300 نوكيا ههههه و اللى ميعرفهاش يبقى اكيد مش مصرى او معصرش معانا التطور الطبيعى للموبيلات المصرى

و بعد ما عشنا مع بعض 3 سنين ربنا رحمنى منه و ابتلى بيه اختى الصغيرة فترة برضه ...يلا اهى ايام سودا و غارت


بعد كده تنقلت بين الاجهزة لحد موبايلى "المعفن" الحالى و هو اسوء موديلات سامسونج على الاطلااااااااق اه بالمناسبة مش بيقرا عربى فى النت يعنى يا تدخل عليه مواقع بالانجليزى يا اما تتعلم لغة العفاريت لانه هيجبرك انك تقرا بيها 

********************************************
اما فى الخطوط بقى فانا ابتديت بخط الثانوية العامة 2007 اللى عملته موبنيل لما وزعت خط على شهادة نجاح اى طالب و بالمناسبه فى السنه دى "و كانت الاولى من نوعها" مكنش فى خطوط او شركات بتدى خطوط غيرها ...و لسبب ما حسيت انهم عملوا معايا واجب جامد و لازم ارده لهم

و لما الشريحة باظت روحت "بكل عبط" و اشتريت خط موبنيل تانى برقم جديد !!!

********************************************
فاكرين مشكلة سويرس مع السلفيين؟؟ لما حط على تويتر صورة ميكى موس بدقن و السلفيين احلو دمه يومها ؟؟ "مع ان البابا المسحيين و حاخام اليهود و القائد الروحى للسيخ و حتى الاميش ليهم دقن يعنى دى مش حاجة exculsive على المسلمين يعنى" 

فاكر بقى لما السلفيين عملوا حملة مقاطعة و تغيير الكروت لشركات تانية غير موبنيل...مش عشان موبنيل حلوة تؤ تؤ بس عشان كبرت فى دماغى و مع ان مفهوم السلفيين مكنش واضح وقتها ولا كان فى حزب النور ولا الضلمة بس برضه حسيت ان الموضوع فيه تلكيكة و فضلت على خطى مع ان تقريبا كل صحابى غيروا

******************************************
شفت بقى يا شركة موبنيل انا عملت معاكى واجب جدعان شبرا ازاى؟؟ بقى بعد ده كله بتتضحكوا عليا ؟؟ روح يا شيخ الله يحرقكم

كل البيت فودافون و اتصالات و العروض ايه نازلة ترف عليهم تقريبا بطلوا يشحنوا من كتر الدقايق و الرسايل اللى ببلاش الا انا يا مؤمن !!!


و اخر المتمه كان عرض ال14 قرش ده...معروف ان اول شركة عملته كانت فودافون و بعدين قلدتها اتصالات سواء الدقيقة او الرسالة او الكول تول كل ده ب14 قرش...بينما انا بتحاسب على الدقيقة ب19 قرش و الرسالة ب30 قرش و الكول تون ب5 جنية !!


و انا عارفه و ساكته و بصبر "زى مصر كده" لكنى فى لحظة غضب اعبر و اغير الكارت و العناويين بس ادينى برد لهم الجميل "اللى مش عارفه ايه هو"...و اخيييييرا عملوا العرض ال14 قرش للكل قلت اتصل بيهم و اشترك فيه و كان هذا هو السيناريو و هارمز هنا بالرسالة المسجلة اللى بصوت ست رخمة ب"الولية":


أنا   : "اتصل ب400" انا هاشترك فى العرض اخيييرا
الولية: اهلا بكم فى موبنيل لاحدث العروض
أنا    : متكليش بعقلى حلاوه لا اهلا و سهلا خلصى
الولية : دلوقتى ممكن تشترك فى عرض ال14 قرش
أنا    : ايوه ما انا عارفه ايوه اشترك ازاى بقى؟
الولية : العرض يتيح لك الاستفادة بسعر 14 قرش للدقيقة و الرسالة النصية و ميجا                 الانترنت
أنا    : معنديش نت اصلا و بعدين فين "الكول تون" يا ولاد الحرامية ولا لسه ب5                  جنيه؟!
الولية : للاشتراك سيتم خصم 1 جنية من رصيدك
أنا     : يا ولاد ال**** لييييييييه؟؟؟ ما هى كل الشركات عماله ببلاش؟؟!!
الولية  : علما بانك لن تستطيع الرجوع لنظام خطك السابق
أنا      : لييييييييه؟؟ ما هو كل الشركات بتلغيه ببلاش و عادى يعنى
الولية : للاشتراك اتصل ب400
أنا : نعم؟؟؟؟ ما انا بتصل بيكوا اهو

"و خلصت المكالمة" !!!...المهم ما حوالى 4 مكالمات عرفت احول اخيرا :/
*********************************
التالى مشهد تخيلى بحت و يا ريت محدش ياخده بحرمانية و على رأى باسم/ بوسف ايديكوا ما تحرقوش المدونة:

"فى العالم الاخر"

-الملائكة   : حضرتك من مجلس ادارة موبنيل صح؟
-ابو كرافته: احممم هو اه فى حاجة؟
-الملائكة   : لا حضرتك هتروح النار على طول من غير حساب كده
-ابو كرافته: "فى توتر" مشمعنى انا يعنى؟ ده انا حتى راجل طيب
-الملائكة   : طيب ايه؟ ده انت عليك كم دعاء غير طبيعى! ده غير الناس اللى كنست عليكوا السيدة زينب و الاوليا كلهم ...ده الناس لو شفتك فى الجنه يمكن تمسك فى خناقك اصلا

-الملائكة: انتى كنت موبنيل فى التليفون صح؟
-أنا      : اه و الله ...دى كانت ايام سودا بحمد ربنا انى مت و تخلصت من الحرامية دول
-الملائكة: انتى بقى هتدخلى الجنه على طول 
-انا       : "فى سعادة بالغة" اشمعنى؟؟
-الملائكة: بصى يا دينا فى الشوال ده سيئاتك..و فى الكيس الصغير ده حسانتك
-انا      : "فى توتر" يا لهوى يبقى هادخل النار بقى كل الشوال ده سيئات !!!
-الملائكة: لا بالعكس الكيس الصغير فيه ورقه انك كونتى موبنيل يبقى هتخشى الجنه
-انا       : اشمعنى؟
-الملائكة: عشان اتعذبتى كتير فى الدنيا و مش معقول تبقى دنيا و اخره مبروك يا دينا
**************************
هتقولى ما تحولى؟؟ هاقولك لك لسبب "ما" مش عايزة اغير برضه



الأربعاء، 17 يوليو، 2013

حوليات17:توّن عمرى

و انا بكتب المقال ده اختى بتبص لى بغيظ و حقد و الصراحة عندها حق...لان اللاب توب بتاعى حاله تعبت قوى قررت ابعته لمحل التصليح يتظبط و يتروق و تتحط له نسخة ويندوز "مضروبة" جديدة و يا سلام لو نضف من الفيروسات بقى اللى ميقدرش عليها اى انتى فيرس ...اسكت يا اخويا ده انا قلبى بيقطع عشان اللاب بايت بره البيت يااااااه اكيد هو ده احساس الضنا عند الام :(

و لان ظروفى صعبة زى ما انت شايف قررت استلف "او قل اشحت" كمبيوتر العائلة الاصلى اللى اختى بقت ملكة متوجة عليه من فترة...شوفت بقى انا منتظمة و ملتزمة بمشروع "حوليات" ازاى؟ بتذل ذل الابل من أجلكم و من أجل رفاهيتكم ايها الجماهير العريضة 
*******************
اختى مستنية انى اقوم عشان "تتون الجيتار"...قعدت فترة عشان افهم ايه حكاية التون دى كمان , انا اصلا فضلت فتره عقبال ما استوعبت فكرة ان اختى عندها جيتار و قعدت شهر عشان اطلع منه نغمة عدله ههههه و حياتك ما طلعت غيرها

فكرة التتوين دى بقى انك ترجع الاوتار لحالتها الاصلية عشان تتطلع نغمات مظبوطة و موحدة مع اى جيتار تانى لان الزمن و العك بيغيروا فى الجيتار و يخليه ينشز و يطلع الحان غريبة و بمزاجه

و لسبب ما متخيلة أصالة و هى قاعدة يتغنى: قبلك يا اما سنين فى حياتى كنت فى عالم ملوش تون....انا دلوقتى معاك يا حياتى توّن عمرى بأجمل تووووون

هو ينفع اتوّن انا كمان؟ ينفع اروج لحد يظبط لى النشاز اللى فى دماغى و صوتى ده؟ ارجع تانى فبريكة أصلى من غير لعب و تشوية؟ ....و ارجع اقول يا بخت اللاب و الجيتار هما هيتظبطوا و هافضل انا نشاز و مفيرسة كده لحد ما ربنا يرزقنى بحل 
رسائل أحدث رسائل أقدم الصفحة الرئيسية