الأحد، 7 يوليو، 2013

حوليات7: الدنيا زى المرجيحة

الدنيا زى المرجيحه يوم تحت وفوق
فى خلق عايشه ومرتاحه وفيها ناس مش فوق
وانا ماشى بتمرجح فيها من تحت لفوق لفوق لفوق لفوووووووق


مصائب قوم عند قوم فؤائد: جاء اصطدام طائرة بوينج 777 فى امريكا مصلحة ليا و لمصر لان السى ان ان طلعتنا من دماغها...فانتقل الاخوان الى "الحرة" القناة الامريكانى اللى بالعربى

شفت على قناة "الحرة" -العربى بتاعه امريكا- الاخ عمرو عبدالهادي بتاع جبهه الضمير و الايميلات لو تفتكر ...يزبد و يرغى و يتوعد بشل البلد و ان الاخوان هيقضوا رمضان فى الشارع


يااااااااااااه فى نفس المكان ده كنت بخطط انى اقضى رمضان فى الشارع صياما و فطورا و دعاء على مرسى و الاخوان...فتلف الايام فى خلال اسبوع لا اكثر فتنقلب الادوار و يدعوا علينا احنا...الدنيا زى المرجيحة يوم تحت و فوق

لعل اجمل ما فى الموضوع ان الكابتشن عمرو عبد الهادى ده كان يقسم حتى من اسبوع انه مش اخوان بس بيحترمهم :D ....و جبهه الضمير بتاعتهم دى اللى هى الماركة المضروبة من جبهة الانقاذ و هو مثال حى زى حملة "تجرد" و هى تلاعب لفظى ليس اكثر من "تمرد" 

و يحضرنى هنا ذكرى اخرى هى سمنه "روبى" ايوه ده مش غلطة مطبعية دى كانت علبه مضروبة عن السمنة الاكثر نجاحا وقتها "روابى"...و علبه سمنه "النخلة" و هى تحريف للسمنه الانجح ايضا "النخلتين"...و نكتشف ان تجرد و جبهه الضمير هم تلاعب لفظى ليس اكثر و مؤسسات كارتونية ورقية لتشتيت الاعلام ليس اكثر و كلهم اخوان بس بيحترموهم

سيبك انت كنا فين و بقينا فين من اسبوع؟ : سبحان المعز المذل...ضاقت فلما استحكمت حلقاتها فرجت وكنت أظنها لا تفرج 

الان قواعد اللعبة مختلفة تماما عن ما قبل 30 يونيو ولاول مره الثورة هى الكفة الاعلى.. شدوا الناس لقدام...اتحركوا فى الفترة الانتقاليه...اتكلموا فى تشكيل الوزارة , فى لجنة تعديل الدستور , فى الجدول الزمنى...اتحركوا فى خط مستقيم يجبر الناس انها تتقبل الوضع الحالى فيقل العنف و الاكتئاب

و للناس اللى عايزة مرسى ترجع...دعونى استعين بكلمات الزعيم الراحل نفسه: عقارب الساعة لن تعود الى الخلف
******************************
لا بجد هو انت متخيل ان مرسى ممكن يرجع؟؟ حتى لو حصل تنازلات ممكن تتخيل انه يرجع؟؟

يرجع يحكم شعب مش طايقه...و جيش رماه فى السجن...و قضاء ما صدق و جاب ريس مؤقت من عنده...و شرطة وزعت عالناس عصير ابتهاجا انه مشى...و فوق ده كله اعلام يقيم الافراح من يومها؟؟

 ده الراجل لو حس ان مراته مش بتحبه بيطلقها...و بعدين مش احنا شعب قذر و ما نستهلش؟؟ سيب اهالينا فى حالنا بقى

*******************************
-اعتذر عن الكتابة عن صورة حملة حوليات...فلن استطيع الكتابة الادبية الان باى شكل وسط حرب بلدى مع اعدائها...يمكن فى المستقبل لما نروق شوية

2 التعليقات:

richardCatheart يقول...

هع هههههههههههههههههههه تحففففففففففففففففففففففففففففففففففففففففة قال يرجع قال ربنااكبر خلاص بعون المولى

يسلم قلمك وقلم اهلك وعائلتك كلها وربنا :)

Bent Men ElZman Da !! يقول...

اهو انا بيعجبني في بوستاتك والاستياتوس بتاعتك إنها جايبه من الأخر يا دينا :D

إرسال تعليق

حلو؟؟ وحش؟؟ طب ساكت ليه ما تقول....