الاثنين، 8 يوليو، 2013

حوليات8: حزب الضلمة

بصوا بقى انا خلقى ضيق و مش بطيق الغلاسة على رأى عبد الناصر "فى خطبة شهيرة عن رفض المعونه"...و حزب النور ابتدى يرخم و انا بزهق من التأمير بصراحة 


"اصل انا بقرف قووووى قوووى قووى مره فتحت بطيخة لقيت كلها بذر رميتها....فتحت مانجايه لقيت فيها بذره كبيره اغمى عليا...اغمن عليا اغمن عليا اااى اااى اااى" حزب النور معلقا على ترشيحات الوزارة

مش فى ناس بتبيع تين شوكى على الكورنيش اهو حزب النور بيشتغل صفيحة ميه هناك...حزب لا له هيكل ولا نيله و الحقيقة مش عارفه هما بيتفردوا و يتنوا علينا ليه؟ 
انا بقول نفقع مرارة الاخوان بجد و نمسكها لثروت الخرباوى

و على رأى المدونة الرائعة نوران سراج الدين :  سيادتك عارف الشعب اللى ف الميادين ده ؟؟؟ - أيوه .. - وحش ..ماتبقاش تشكل حكومة منه ! ‏#حزب_النور

لا استبعد ان يوم فعلا شباب حزب النور فى رابعه و قادة الحزب بيدمروا التوافق السياسى على جانب الثورة...هو عموما حزب مهلل و كارتونى من زمان



و لعل اشهر مثال هو لما اتفق قاده نفس الحزب مع ابو الفتوح ايام الجوله الاولى من الانتخابات و ده اللى خسروا اصوات بعض الليبرالين -و انا منهم- و بعد كده شباب حزبه صوّت لمرسى و غرقوا الراجل

بقى بعد ما فرحت امبارح ان البرادعى مسك لسه هاقول هيييييه و قلت مصر عادت شمسك الذهب بقى ... يعنى هنرجع نشرب خمرة و نشم هيروين و نضرب مكس و نقلع الحجاب زى زماااان بقى و كوليدات البيرة الساقعه هتنشر فى الشوارع , و نقلع الحجاب بقى على غرار ليبرالية يعنى ايه يا برادعى و يكون اول رئيس وزراء ميعرفش حزمه الجرجير فيها كام عود...و يمكن يستخدم علاقاته و يجيب انجلينا جولى وزيرة ثقافة

لا بجد انا كان عندى امل ان تعيين البوب اللى اتأخر 3 سنين يكون الحل بقى بعد مرحلة طويلة من التخبط من عصام شرف لقنديل و من سئ لاسوء...و حد يقنع العالم بلغته و فصاحته اننا ماشيين فى الطريق الصح

مش هاقول الكلام المعتاد بان حزب النور معملش حاجة فى 30 يونيو عشان يتشرط علينا..بس اظن كفاية بقى عك...فضايحكوا كتير و اظن كفاية بقى
*********************
اعتذر مره اخرى عدم استطاعتى التدوين بوحى صور "حوليات" فالوضع ببساطة لا يسمح

3 التعليقات:

Aya Mohamed يقول...

متفقة معاكى جدا فى كل كلامك عن حزب النور
وبالنسبة لصور حوليات هى محاولة للخروج من الوضع
لكن انا شخصيا مبسوطة انك مختلفة :)

richardCatheart يقول...

عالم جزم ولاد معفنه ماعرفش طلعولنا من اى خرابة بلا قرف دا لو صفيحة ميه حتى فهى مية معفنه راكده تجيب تسمم ربنا ياخدهم

وجميل البوست اووووووووووى ضربهم فى معامعهم

وجع البنفسج يقول...

ربنا يصلح الحال يارب .. ويعدي هالأيام السودة على خير ..

إرسال تعليق

حلو؟؟ وحش؟؟ طب ساكت ليه ما تقول....