الخميس، 18 يوليو، 2013

حوليات18:البرتقاليين و أنا

صورة طبق الاصل من تليفونى القديم
بداية كدة لازم اعترف ان حظى فى الموبيلات قليل "جهازا و خطا"...انا ابتديت ب3300 نوكيا ههههه و اللى ميعرفهاش يبقى اكيد مش مصرى او معصرش معانا التطور الطبيعى للموبيلات المصرى

و بعد ما عشنا مع بعض 3 سنين ربنا رحمنى منه و ابتلى بيه اختى الصغيرة فترة برضه ...يلا اهى ايام سودا و غارت


بعد كده تنقلت بين الاجهزة لحد موبايلى "المعفن" الحالى و هو اسوء موديلات سامسونج على الاطلااااااااق اه بالمناسبة مش بيقرا عربى فى النت يعنى يا تدخل عليه مواقع بالانجليزى يا اما تتعلم لغة العفاريت لانه هيجبرك انك تقرا بيها 

********************************************
اما فى الخطوط بقى فانا ابتديت بخط الثانوية العامة 2007 اللى عملته موبنيل لما وزعت خط على شهادة نجاح اى طالب و بالمناسبه فى السنه دى "و كانت الاولى من نوعها" مكنش فى خطوط او شركات بتدى خطوط غيرها ...و لسبب ما حسيت انهم عملوا معايا واجب جامد و لازم ارده لهم

و لما الشريحة باظت روحت "بكل عبط" و اشتريت خط موبنيل تانى برقم جديد !!!

********************************************
فاكرين مشكلة سويرس مع السلفيين؟؟ لما حط على تويتر صورة ميكى موس بدقن و السلفيين احلو دمه يومها ؟؟ "مع ان البابا المسحيين و حاخام اليهود و القائد الروحى للسيخ و حتى الاميش ليهم دقن يعنى دى مش حاجة exculsive على المسلمين يعنى" 

فاكر بقى لما السلفيين عملوا حملة مقاطعة و تغيير الكروت لشركات تانية غير موبنيل...مش عشان موبنيل حلوة تؤ تؤ بس عشان كبرت فى دماغى و مع ان مفهوم السلفيين مكنش واضح وقتها ولا كان فى حزب النور ولا الضلمة بس برضه حسيت ان الموضوع فيه تلكيكة و فضلت على خطى مع ان تقريبا كل صحابى غيروا

******************************************
شفت بقى يا شركة موبنيل انا عملت معاكى واجب جدعان شبرا ازاى؟؟ بقى بعد ده كله بتتضحكوا عليا ؟؟ روح يا شيخ الله يحرقكم

كل البيت فودافون و اتصالات و العروض ايه نازلة ترف عليهم تقريبا بطلوا يشحنوا من كتر الدقايق و الرسايل اللى ببلاش الا انا يا مؤمن !!!


و اخر المتمه كان عرض ال14 قرش ده...معروف ان اول شركة عملته كانت فودافون و بعدين قلدتها اتصالات سواء الدقيقة او الرسالة او الكول تول كل ده ب14 قرش...بينما انا بتحاسب على الدقيقة ب19 قرش و الرسالة ب30 قرش و الكول تون ب5 جنية !!


و انا عارفه و ساكته و بصبر "زى مصر كده" لكنى فى لحظة غضب اعبر و اغير الكارت و العناويين بس ادينى برد لهم الجميل "اللى مش عارفه ايه هو"...و اخيييييرا عملوا العرض ال14 قرش للكل قلت اتصل بيهم و اشترك فيه و كان هذا هو السيناريو و هارمز هنا بالرسالة المسجلة اللى بصوت ست رخمة ب"الولية":


أنا   : "اتصل ب400" انا هاشترك فى العرض اخيييرا
الولية: اهلا بكم فى موبنيل لاحدث العروض
أنا    : متكليش بعقلى حلاوه لا اهلا و سهلا خلصى
الولية : دلوقتى ممكن تشترك فى عرض ال14 قرش
أنا    : ايوه ما انا عارفه ايوه اشترك ازاى بقى؟
الولية : العرض يتيح لك الاستفادة بسعر 14 قرش للدقيقة و الرسالة النصية و ميجا                 الانترنت
أنا    : معنديش نت اصلا و بعدين فين "الكول تون" يا ولاد الحرامية ولا لسه ب5                  جنيه؟!
الولية : للاشتراك سيتم خصم 1 جنية من رصيدك
أنا     : يا ولاد ال**** لييييييييه؟؟؟ ما هى كل الشركات عماله ببلاش؟؟!!
الولية  : علما بانك لن تستطيع الرجوع لنظام خطك السابق
أنا      : لييييييييه؟؟ ما هو كل الشركات بتلغيه ببلاش و عادى يعنى
الولية : للاشتراك اتصل ب400
أنا : نعم؟؟؟؟ ما انا بتصل بيكوا اهو

"و خلصت المكالمة" !!!...المهم ما حوالى 4 مكالمات عرفت احول اخيرا :/
*********************************
التالى مشهد تخيلى بحت و يا ريت محدش ياخده بحرمانية و على رأى باسم/ بوسف ايديكوا ما تحرقوش المدونة:

"فى العالم الاخر"

-الملائكة   : حضرتك من مجلس ادارة موبنيل صح؟
-ابو كرافته: احممم هو اه فى حاجة؟
-الملائكة   : لا حضرتك هتروح النار على طول من غير حساب كده
-ابو كرافته: "فى توتر" مشمعنى انا يعنى؟ ده انا حتى راجل طيب
-الملائكة   : طيب ايه؟ ده انت عليك كم دعاء غير طبيعى! ده غير الناس اللى كنست عليكوا السيدة زينب و الاوليا كلهم ...ده الناس لو شفتك فى الجنه يمكن تمسك فى خناقك اصلا

-الملائكة: انتى كنت موبنيل فى التليفون صح؟
-أنا      : اه و الله ...دى كانت ايام سودا بحمد ربنا انى مت و تخلصت من الحرامية دول
-الملائكة: انتى بقى هتدخلى الجنه على طول 
-انا       : "فى سعادة بالغة" اشمعنى؟؟
-الملائكة: بصى يا دينا فى الشوال ده سيئاتك..و فى الكيس الصغير ده حسانتك
-انا      : "فى توتر" يا لهوى يبقى هادخل النار بقى كل الشوال ده سيئات !!!
-الملائكة: لا بالعكس الكيس الصغير فيه ورقه انك كونتى موبنيل يبقى هتخشى الجنه
-انا       : اشمعنى؟
-الملائكة: عشان اتعذبتى كتير فى الدنيا و مش معقول تبقى دنيا و اخره مبروك يا دينا
**************************
هتقولى ما تحولى؟؟ هاقولك لك لسبب "ما" مش عايزة اغير برضه



4 التعليقات:

غير معرف يقول...

حلو يا دينا بس غيري اسهل

Bent Men ElZman Da !! يقول...

ههههههههههههههههههه
احب اطمنك يا دينا إنك مش لوحدك
انا فودافون من سنيييين واعتقد إن كلمتي الوحيدة عليهم
إنها شركة حرامية
وخدمة العملاء بتوعها شويه حمير مابيفهموش
والخدمات بتاعتهم زبالة
و العروض بتاعتهم زي الزفت ولا بستفاد حاجة
هتقوليلي طب ماغيرتيش ليه
هاقولك نفس السبب اللي مخليكي ماغيرتيش إنتي كمان :D

ابراهيم رزق يقول...

ههههههههههههههههههههههههه
هههههههههههههههههههههههههههه

انا بقى ليا الجنة زيك
انا خطى موبنيل من حوالى 15 سنة لما كان الخط 1800 جنيه
بس مش عارف بحس فى موبنيل شعور ارستقراطى

تحياتى

وجع البنفسج يقول...

كان أول موبايل امسكه بأيدي هو موتورلا talk about
وبعد هيك جبت نفس الجوال اللي في الصورة واسمه عندنا في فلسطين " بشار " ههههههه ..وبعد هيك سامسونج وبعدين نوكيا وبعدين مش عارفة ايه المهم في الاخر n73 وشكله حالف يمين ما يتغير لـ جلاكسي اس فور !!!!هههه

وعلى فكرة اختي الكبيرة عمرها ما اشترت موبايل .. كنت كل ما اشتري واحد جديد اعطيها القديم وهكذا ..

بالنسبة لشركات المحمول .. فاحنا للاسف في غزة مفيش غير شركة واحدة اسمها " جوال " ومطلعة عنينا علشان مفيش لها شركة منافسة .. الأسعار خيالية ومفيش عروض خالص .. خليها ع الله .. :/

إرسال تعليق

حلو؟؟ وحش؟؟ طب ساكت ليه ما تقول....