الأربعاء، 28 مايو، 2014

امتياز27: سعدى

"تجلس دينا لتقرأ , ماما تشاهد التليفزيون"

-دينا: "بصوت مسموع" هااااا

-ماما: ايه التنهيدة دى كلها؟

-دينا: عارفه يا ماما لما زكريا احمد بيقول "يا صلاة الزين ع ابو سعدة" عارفه مين ابو سعدة ده؟

-ماما: مش انتى اللى بتعرفى كل الحاجات؟ قولى بقى مين 

-دينا: بغض النظر عن التريقة فى كلامك لكن هاكمل برضه, سعدة دى تبقى جميلة جميلات تونس و كانت بتحب الامير مرعى ابن الهلالية , ابو سعدة دى بقى يبقى الزناتى خليفة

-ماما: طيب كويس

-دينا: عارفه يا ماما سعدة دى جالها عرسان من الشرق و الغرب و من بلاد تركب الافيال عشان يتجوزها بس هى كانت بنت صاحبة مزاج فاخدت عهد على ابوها انه ميجوزهاش غير بموافقتها و ارادتها

-ماما: "تتطلع للتليفزيون" ماشى

-دينا: و بعد الوعد ده قرر انه يبنى لها قصر لوحدها تعيش فيه بمزاجها , يكون طوبة دهب و طوبة فضة و منور بالجواهر بدل القناديل و على بابه موقفين واحد طول الوقت يدى اى حد معدى من قدام الباب فلوس

-ماما: طيب قومى اعملى شاى 

-دينا: "تذهب للمطبخ" ليه يا رب مخلقتنيش بنت الزناتى خليفة؟

-ماما: ما انتى بنت الزناتى نبيل , مشى حالك بينا مؤقتا يا ست سعدة

#اسمها_سعدى_مش_سعدة
#بس_مش_هارجع_اصلح_كل_ده
#صيدلية_جديدة_فتحت_اسمها_صيحة_الحق
#بقى_ده_اسم_صيدلية_بذمتك؟
#ده_ميمعنش_ان_يا_صلاة_الزين_عابو_سعدى
#مش_لازم_الهتاشتاج_يكون_له_علاقة_بالبوست

امتياز26: مربوط

(+18)

"تقف دينا مرتدية قفاز مطاطى ابيض تفحص جرح رجل فى خمسينات عمره"

-دينا: الجرح ده اتلوث يا حاج , و كده للاسف هيسيب اثر شكله بايخ ... مجتش فى ساعتها ليه يتخيط و تاخد مضاد حيوى كويس ؟ لو كنت عملت كده كان ساب اثر رفيع 

-الحاج: اعذرينى يا بنتى كنت مشغول بالعيال و همهم

-دينا: "تحاول تلطيف الجو" العيال بيشوفوا حالهم يا حاج المهم صحتك

-الحاج: هو فى حد بيعرف يعمل حاجه لوحده؟ اهى البنت اتجوزت الاسبوع اللى فات

-موسيقى داخلية: مبروك عليك ست الحلوين , عرفت يا عريسنا تنقى , رشوا الملح يا ناس من عين و رقصونى ما انا من حقى

-دينا: الف مبروك و يجعل حياتها سعد ان شاء الله

-الحاج: ما هى اتطلق امبارح

-موسيقى داخلية: ليه يا زمان مسبتاش ابريا

-دينا: لا حول ولا قوه الا بالله , العريس طلع نصاب ولا ايه؟

-الحاج: يا ريت , طلع العريس مربوط

-دينا: "تبتسم فى بلاهه"

-صوت داخلى 1: يعنى ايه مربوط دى؟

-صوت داخلى 2: بقى مش عارف يعنى ايه مربوط؟

-صوت داخلى 1: اااه ما بيغسلش سنانه بالليل

-صوت داخلى 2: اسم الله عليك اديك لاقت التردد

-صوت داخلى 3: المهنية يا منى , انتى نسيتى فى الزحمة انه متعور

-الحاج: و قلنا له مدام ملكش فى الزفت الجواز بتبهدل بنات الناس معاك ليه؟ ها ليه؟ و بعدين روح للدكاترة يعالجوك ولا حد يقرا عليك قرآن يفك من عليك السحر ده

-صوت داخلى 3: الجرح يا يسرى

-الحاج: معندكيش يا بنتى عريس للبت؟ دى غلبانة و حظها قليل

-دينا: "تنهمك فى تطهير الجرح" كنت لقيت لروحى يا حاج ما انا اغلب

امتياز25: انتخاباتك

"نهار داخلى , المستشفى , يدخل مريض مضجر بالدم و يصاحبه صديق مصاب بدرجة اقل , من الخارج صوت الاطفال يلعبون"

-دينا: "تفحص الجرح" انت يا ابنى اتعورت ازاى كل التعاوير دى؟

-مريض: و انا خارج من الانتخابات شديت فى الكلام مع واحد اخوانجى فى شارعنا قام ضربنى على دماغى بطوب و اشتبك معايا هو انا متعور جامد؟

دينا: عندك جرحين فى فروة راسك كل واحد هياخد 5 غرز للاسف , هو ايه اللى وشك ده كمان؟ هو كان مع اللى ضربك ده كلب؟

صوت الاطفال من الخارج: يا كعبو كعبو , السيسى هيلعبوا

صديق: لا يا دكتورة ده هو اللى عضه فى وشه , "يشير الى وجهه و يديه" و عضنى انا كمان بس ما عرفش يضربنى

دينا:   الراجل عضك فى وشك؟ و ايه اللى بيقولوه العيال بره ده؟

صديق: اه و الله حتى شوفى 

دينا: "تفحص الصديق" نهار ملون ده اثار سنان فعلا !!!

صوت الاطفال من الخارج: الاسفلت مولع ليه , السيسى ماشى عليه

صديق: هو لما شافنا عملنا حرف CC على ايدينا بالحبر السرى اتسعر و قعد يشتم و يحدف طوب مع ان دقنه قد كده

دينا: "بصوت منخفض" يا انتخاباتك مصر
*********************************
"نهار داخلى , مدرسة انتخاب دينا , تعطى القاضى البطاقة و على ذراعها البالطو مفرود و فى الخارج الموسيقى تتصاعد"

القاضى: اتفضلى يا دكتورة 

دينا: شكرا , "تذهب للتصويت و تعلم على حمدين" 

القاضى: حطى الصوت فى الصندوق و اتفضلى البطاقة هو انتى تخصص ايه بقى؟

الجسمى: خدت ايه مصر بسكوتك مستخسرش فيها صوتك

دينا: انا دكتورة امتياز يعنى لسه ما تخصصتش

الجسمى: دى بشرى خيييييييير 

القاضى: طب عايزة تتخصصى ايه؟

دينا: "بصوت منخفض" هو السؤال ده ورايا ورايا؟! يا انتخاباتك مصر

*********************************
"ليل خارجى , دينا تقف امام المنزل , تقف مع ماما و جارهم العجوز و صوت تسلم الايادى تشدو"

ماما: بعد ما روحت اللجنة و وقفت فى الطابور اكتشفت انى نسيت البطاقة

دينا: ما انا شفتها بعد ما خرجتى و جبتها ليكى اهو ارجعى بقى صوتى قبل الزحمة

الجار: روحتى صوتى يا دكتورة؟

دينا: اه رحت الضهر "تشير باصبعها على العلامة الفوسفورى"

ماما: و يا ريتها ما راحت , الدكتورة راحت مخصوص عشان تدى حمدين

الجار: بس حمدين ده اخوان

ايهاب توفيق: افتحوا لنا كتاب تاريخنا واحكوا للناس دولا مين

دينا: يا عمو اتقى الله , حمدين اخوان ازاى يعنى؟

الجار: ايوه اخوان ده حتى اخته متجوزة فلان الفلانى اللى اخوه علان الاخوان

ايهاب توفيق:قول يا ابونا وقول يا شيخنا يعنى ايه 73

دينا: طب ما انا عمى اخوان يبقى انا اخوان؟

الجار: بس هو اخوان و الله

دينا: ما انا صوت خلاص يعنى هاروح اسحب صوتى

ايهاب توفيق: اللى ردوا لنا اعتبارنا وربك كان ليهم معين

الجار: طب على الطلاق حمدين اخوان

دينا: "بصوت منخفض" يا انتخاباتك مصر

#دينا_تنتخب 
#يا_انتخاباتك_مصر
#بوست_طويل_ليوم_اطول

الثلاثاء، 13 مايو، 2014

امتياز24:العصير

"دينا ممسكة بالتابلت تقرأ , بينما تدخل والدتها ممسكه بكوب عصير"

-ماما: انتى مشغولة؟ دينا عايزة اقولك على حاجة

-دينا: "تنزل عينها من الكتاب" هاتى بس الاول العصير ده و اتكلمى براحتك

-ماما: عارفه طنط فلانه؟ عايزة تجوزك لابنها

-دينا: "تشرب العصير"

-ماما: هو عنده شقه 4 اوض و كان مسافر بره و مؤهل عالى 

-دينا: "تستمر فى شرب العصير"

-ماما: هو الولد مؤدب و محترم و العائلة كويسة بس كان خاطب قبل كده و الموضوع ده قلقنى

-دينا: "تقلب العصير فى صمت"

-ماما: عندك حق , دى مش طريقة للجواز تنفعك انتى بذات ...مع اى حد ممكن لكن انتى لازم تتجوزى حد بيفهم و بيقرا و الا هتخلى حياته وحشة و حياتك نفسها هتبوظ

-دينا: "تنهى العصير و تفتح التابلت و تعاود القراءة"

-ماما: انتى صح انا لما هاقابلها بكرة هاقول لها دينا مش بيتفكر فى الجواز حاليا , ما انا مش معقول اضغط عليكى فى قرار عمرك , صح كده؟

-دينا: ابقى قللى السكر فى العصير شوية ربنا يكرمك

امتياز 23:رجلى

"يدخل المكتب رجل ثلاثينى بصحبته زوجته , الزوجة فى حالة غثيان و ارهاق"

-دينا: طيب خليها تسترح على سرير الكشف و انا هاجى ابص عليها 

-زوج المريضة: اه و النبى الحقينا يا دكتورة لاحسن هى تعبانة من امبارح

-دينا: احكى لى بقى مالك؟

-المريضة: اصل امبارح شربت لبن و تقريبا كان بايظ و جالى تسمم باين

-دينا: يعنى وجع فى بطنك و قئ؟ ولا حاجة كمان؟

-المريضة: لا الوجع اللى فى بطنى ده مش مشكلة ده وجع خفيف , انا اللى تعبنى ان من ساعتها رجلى بتوجعنى

-دينا: رجلك؟! طيب واحدة ولا الاتنين؟

-المريضة: لا رجلى الشمال بس 

-دينا: و انتى متخيلة ان النزلة المعوية اللى عندك من اللبن البايظ هو اللى واجع لك رجلك؟

-المريضة: اه طبعا ما هو الوجع جه بعد اللبن

-دينا: بقى بذمتك ده منطق يرضى ربنا؟ سيبك من الطب و من اى حاجة , اللبن يوجع لك رجلك بامارة ايه؟ انا مش بقول ان رجلك مش بتوجعك بس بوضح لك ان التسمم ملوش دعوة بالموضوع

-المريضة: "فى عدم اقتناع" اللى تشوفيه يا دكتورة

-دينا: "تبدأ فى الكتابة" هاكتب لك شوية ادوية و هتبقى زى الفل ان شاء الله

(بينما تشرع دينا فى الكتابة , تدخل اسرة مكونة من 4 افراد, الاب يحمل الام فى حالة اغماء تام)

-دينا: اسمها ايه؟

-زوج المريضة 2: اسمها فلانة

-دينا: "تحاول افاقتها" يا فلانة يا مدام فلانة , ردى عليا لو سمحتى انا عارفه انك سمعانى

-المريضة 2: "لا استجابة"

-دينا: "فى تأفف تخرج كحول و ترغمها على استنشاقه" مش بحب اعمل كده 

-المريضة2: "تصحو فجأة و تبدأ فى البكاء"

-دينا: ايوه كده , قومى و كلمينى

-زوج المريضة 2: هو فى ايه فى الازازة دى يا ابلة؟

-دينا: "تنظر للزوج" انا مش ابلة , "تنظر للزوجة2" الازازة فيها سحر بيفوق النايمين , ها احكى لى بقى بتشكى من ايه قبل الاغماء؟

-المريضة2: رجلى بتوجعنى

-دينا: لا و النبى؟! رجلك بس؟ طيب دايخة او مصدعه؟

-المريضة: لا هى بس رجلى اليمين بتوجعنى من امبارح

-دينا: طيب و اغمى عليكى ليه؟

-المريضة: "تنظر فى خجل"

-دينا: خلاص ولا يهمك , المهم صحتك , الحقنة دى هتريح اعصابك شوية

(ترجع دينا الى المكتب , تستقبلها الدكتورة الاكبر)

الدكتورة: مالك اتأخرتى بره ليه؟

دينا: اصل تقريبا فى فيرس جديد بيضرب فى الرجلين برة

#يوم_الارجل_العالمى
#فينك_يا_عبعاطى
#دينا_سيندروم

اولاد حارتنا

رواية اولاد حارتنا ل نجيب محفوظ

556 صفحة , طباعة دار الاداب بيروت
التقييم 5/5
************************
"نجيب محفوظ يعيد كتابة تاريخ البشرية" هكذا عبر جورج الطرابيشى فى كتابه "الله فى رحلة نجيب محفوظ الرمزية" عن وصفه لرواية القرن الذى كتب عنها اضعاف عدد صفحتها نقدا و سلبا و مدحا

أولاد حارتنا هى -ببساطة- رواية تقرأ ثم تقرأ من جديد , مع كل اعادة قراءة ستجد فيها عنصر جديد فات على الذهن فى القراءة السابقة , و ها انا مع القراءة الثالثة اقع من جديد فى غرام عم نجيب

يخلق لك نجيب عالم موازى ليعيد فيها تمثيل تاريخ العالم , بحارة محدودة جغرافيا و عدد سكانها قليل ليكون بمثابة مسرح لاعادة تخليق تاريخ الله/الانسان المشترك بكل تفاصيله المعقدة
************************
يفاجئك محفوظ بقصة سريعة الايقاع من الصفحة الاولى , سطور قليلة يلقيك بعدها فى مشهد تولى ادهم للمسؤولية دون ادريس , تتعجب قليلا من مفاجأة محفوظ لك دون تحضير للمشهد التاريخى الاهم لكنك سرعان ما تدخل فى اجواء القصة فى هدوء متجاوزا روتين المقدمات المعتاد

و ربما ليس من المنطق ان نقول ان ادهم هو رمز ل ادم , ف ادهم هو ادم بكل ما فيه و العلاقة بين ادم و ادهم وثيقة تامة و ليس فى تباعد رفاعة/المسيح , جبل/موسى , قاسم/محمد , عرفة/العلم ... ففى كل الخيوط الدرامية التالية يعطينا نجيب القدر الكافى فقط لنربط بين شخصيات حارته -التى لا يفوق عدد الذباب فيها سوى عدد القمل- و بين انبياء العصر السابق بينما فى ثنائية ادم/ادهم فالوضع ابسط و اوضح

ادهم الذى لم يفهم قط لم فضل هو على ادريس و لم فضل همام على قدرى و لم يحظى صاحب التفضيل دوما بالكوارث المفاجأة دون البركة المتوقعة؟ , الذى لم يتخلى قط عن حلمه فى الحديقة الغناء و رضا الجبلاوى عنه بالرغم عما ما مر به , و الذى لم يحصل على طعم السعادة ابدا بعد مأساة قدرى و همام سوى فى لحظة واحدة خاطفة عندما العن الجبلاوى الرضا عنه
************************
فى ثلاثية جبل/رفاعة/قاسم يجرى الامر سلسا , معلومات كافية للقارئ ليربط ذهنيا بين اولاد الحارة و الانبياء ... محاولات دائمة للانتصار على الضعف و الجبن و الظلم و نبوت الفتوات , مرات بالقوة كحالة جبل و قاسم و مره بالحب فى حالة رفاعة , يتبعه نجاح مؤقت و سعادة قصيرة ثم انتكاسة و تعاسة دائمة ...ليكون تاريخ حارة الجبلاوى شريط من السواد يحوى نقط قصيرة من النور

شريط طويل من الظلام و الظلم يكون فيه الحال على حاله , الجبلاوى صامت منعزل , الفتوات يجرى النبوت فى ايدهم اكثر من الكلمات فى لسانهم, الناس هائمين كالسحاب شائعين كالذباب لا يساوى دم احدهم اكثر من كلمة تطلق على لسان الفتوة, و الكل يصرخ "اين الجبلاوى" و الكل يقتل او يموت فى انتظار الرد , و فى الخلفية دائما صوت الشاعر يحكى حكاية ادهم و بؤسه و جثة رفاعة على يد الجبلاوى و نبوت جبل يكسر جمجمة الظالم
************************
الى هنا فالامر واضح , فرفاعة و جبل و قاسم هم الانبياء ال3 , لكن ما ان يصل عرفة الى القصة يرتبك القارئ , هل عرفه نبى جديد من خيال نجيب؟ هل يرمز به للحسين؟ مين هو ذلك الشاب الجديد الذى تبدأ قصته و الام يرمز؟

عرفة ذلك المتشكك التعيس لا تبهره قصص الشعراء ولا يهتم بالوقف , يتسأل عن جدوى الجبلاوى و عن سبب ابتعاده و وحده يملك الجرأة ليصل الى الحقيقة

"الحكايات غامضة كهذا البيت المغلق, لا اثر فيه لحياة الا لرءوس اشجار الجميز و التوت, و اى دليل على حياة الجبلاوى الا الاشجار و الحكايات؟" هكذا يعبر عرفة فى بساطة .... و كما صابر فى "الطريق" حين سأل عن جدوى ضياع عمره فى البحث عن والد قبل ان يتأكد من وجوده , فتجيبه امه انه لن يتأكد من وجوده الا بالبحث .... كانت رحلة عرفة فى البحث عن الجبلاوى

و تصل القصة الى الذروة التى ترسل قشعريرة باردة فى جسم القارئ حين يلعن موت الجبلاوى , ربما لم يقتله عرفة لكنه يتسبب فى ذلك بشكل او باخر

لكن رسالة الجبلاوى قبل موته هو انه راض على عرفه , يرى الطرابيشى هنا ان ما يريد محفوظ ايصاله لنا ان العلم قد يخطئ الدرب , قد يكون سند للسلطة الغاشمة احيانا او يفقد انسانيته قد يتسبب حتى فى موت الدين لكنه لا يمكن ان يكون مبغوض عند الله لان العلم اليوم هو نبى الانسانية الجديد بعد انتهاء عصر الانبياء و به وحده يمكن ارجاع العدل , و ان الشئ المطلوب منه عند الدين هو -فقط- ان يرجع الى الانسانية
************************
و بالبحث عن كراسة عرفه تنتهى قصة حارة لم تنته ابدا , قصة انسانية عانت فى ما لا يمكن تلخيصه فى كتب , انسانية لم تفقد الامل قط حتى فى احلك فترات الظلام ,تثق فى قدوم الحلم ثقة أدم فى الرجوع للحديقة, ثقة رفاعة فى قوة الحب , ثقة جبل فى قوة الحق, ثقة قاسم فى قوة العدل

ملحوظة: كان هدفى فى ريفيو "اولاد حارتنا" بالذات انه يكون قصير لانه مش افضل ما كتب عن رواية القرن كما احب ان اسميها , و اولاد حارتنا بالذات اتكتب عنها افضل و اكتر من كده بكتير ...اعتذر للقارئ عن سطحية الريفيو لكنى حتى بعد القراءة الثالثة لم اصل لقاع ما اراد محفوظ فى الرواية , ربما فى القراءة الرابعة او حتى الخامسة ...مازال الريفيو -فى رأيى- قاصر و قصير الى اشعار اخر

دينا نبيل
13 مايو 2014

الخميس، 8 مايو، 2014

امتياز22: منمل

"تدخل عائلة كاملة مكونه من 8 افراد , يحملون شاب يعانى صعوبة فى التنفس"

-ام المريض: "تصرخ" حد يلاحقنا فى المستشفى دى الواد هيموت

-دينا: "تجرى نحوها" وطى صوتك شويه يا ماما الناس تعبانة , انا خلاص معاكى اهو و انت فى المستشفى يعنى اطمنى خالص مش هيطلع من هنا تعبان ان شاء الله , حد يقول لى فى ايه بقى؟

-اخو المريض: مش قادر ياخد نفسه يا ابله بقاله ساعة

-دينا: انا مش ابلة , "تخلع السماعة و تبدأ الكشف" بتتعالج من اى حاجة؟

-المريض: "يبكى"

-ام المريض: "تبكى" لا مفيش حاجة خالص ولا اى ادوية 

"تبدأ الاسرة كلها فى البكاء فى وقت واحد"

-صوت داخلى 1: الحالة نفسية طبعا ... اوكسجين و امبول افيل و ريحى دماغك عندنا عيانين كتير و انتى واقفة لوحدك

-صوت داخلى 2: يا عم واحد سيب البنت تكشف عليه كويس ليكون فى حاجة

"يستمر النقاش الى ان تنحاز دينا للصوت الثانى"

-دينا: "تحرك السماعة فى اماكن مختلفة على صدره" خد نفس هنا , امم و هنا , كح , حد يعدله عشان اسمع ضهره لو سمحتوا

-صوت داخلى 1: اهو طلع نفسى يا سى اتنين , ما قلنا من الصبح

-صوت داخلى 2: واجبنا القانونى اننا نعمل كده يا عم الاسطى

-دينا: هو فى حاجه مزعلاك؟

-المريض: "يزيد البكاء"

-دينا: خلاص فهمت , هياخد جلسة الاكسجين دى و الحقنة دى و بعدها نتكلم شوية

"بعد نصف ساعة , تأتى زوجة اخ المريض تصرخ"

-زوجة اخ المريض: الحقينا يا دكتورة , الواد تعبان

-دينا: "تنهض و تمشى معها" بيشتكى من ايه دلوقتى يا حبيبى؟

-زوجة اخ المريض: الحتة دى فى صدره كل ما ندوس عليها توجعه

-دينا: طب و بتدوسوا عليها ليه؟ هو بيشتكى منها يعنى؟

-زوجة اخ المريض: لا بس لما بندوس عليها بيشتكى , اه و لسانة منمل كمان

-دينا: منمل؟! ايه يا ماما الشكوى العجيبة دى؟

-ام المريض: و كمان كل ما ندوس على رجله تسمع فى بطنه

-صوت داخلى 1:  لميتى علينا الناس يا دينا , و لسه كمان عشان تبقى تسمعى صوت 2 كمان 

-صوت داخلى 2: الراجل تعبان نفسيا يا دينا , فضى نفسك ربع ساعه و اقعدى معاه خليه يشتكى ليكى شويه

-اصوات متجمعه صادرة من الاستقبال: يا دكتووورة , معانا حادثة , منكوا لله يا مستشفى اوساخ , هتموتونا , الحقونا , يا دكتووورة

"تستمر المناقشة بين صوت 1 و 2 الى ان تنحاز دينا لصوت 1"

-دينا: الحقنة دى كمان شوية هتنمه فلازم يروح دلوقتى و للاسف محتاجين السرير

"ترحل الاسرة حامله المريض"

دينا: "تنظر للمريض فى حزن , تشعر بالتقصير ... لكن شتيمه محمله بالصراخ من مرضى الحادثة تحملها على التحرك"

الاثنين، 5 مايو، 2014

امتياز21:اهرب

"تجلس دينا مع حاج فى الستنيات من عمره , دينا ترتدى سماعة طبية و تقرأ مؤشر جهاز الضغط"

دينا: انت مال ضغطك عالى كده ليه يا حاج, انت مش ماشى على العلاج كويس؟

الحاج: ابدا يا ضتكوره ماشى كويس , ده انا حتى واكل امبارح 3 اطباق جبنة قديمة عشان اعرف انام

دينا: طيب و ضغطك عالى بتاكل جبنة قديمة ليه؟

الحاج: ما هى بتوطى الضغط فكل ما يعلى ضغطى شويه من العصبية اكلها و اتظبط بقى عليها

دينا: خلينى افاجئك يا حاج بقى , الجبنة القديمة بتعلى الضغط اصلا ...انت دلوقتى ضغطك 180/110 ضغطك منهم يجى 100 و ال80 التانيين ضغط الجبنة القديمة بقى

الحاج: طب ادينى اى حاجه يا بنتى

دينا: "تشرع فى الكتابة" على عينى يا حاج هاديك حاجة تظبطه لك بس هتقعد معانا شويه لحد ما يتظبط

"تدخل ممرضه مسرعة فجأة على دينا و الحاج, الممرضة مضجرة بالدماء و تبكى ممسكة ذراعها"

دينا: يا نهار الوان الطيف , مالك يا فلانة ايه اللى حصل؟

ممرضة: ام عيان كانت بتضرب دكتور الاشعه بالكرسى فبدل ما يجى فيه جه فيا , و 
النبى يا دكتورة اكتبى لى على اشعه ليكون دراعى اتكسر

دينا: لا استنى استنى , مين ضرب مين تانى؟

ممرضة: ام عيانة كانت بتحدف دكتور الاشعه على دماغه بالكرسى عشان اتأخر على ابنها فى الCT

دينا:  يا حلاوة مولد النبى

صوت خارجى: و النبى انا هاكسر لكوا المستشفى دى يا ولاد ال****ة , و حياة ** امكم لاكسرها على دماغكوا , يا ولاد ال***

دينا: و ده ايه ده كمان؟

ممرضة: اصل كمان فى عيان تانى مات فى العناية و اهلكوا جم و شكلهم هيضربوا دكتور الرعاية , و النبى يا دكتوره اكتبى الاشعة

دينا: "تخلع البالطو فى بطئ" مين ده اللى دكتور؟ اهو انتى صحيح ...و النبى يا حاج لو حد سألك انا مين ابقى قول انى بنتك ربنا يستر عليك

ممرضة: طب و الاشعه بتاعتى؟

دينا: و مين اللى هيعملها لك اصلا اذا كان دكتور و فنى الاشعة مضروبين? 

الأحد، 4 مايو، 2014

امتياز20:بنت عمتى

"تجلس دينا مع مندوبة شركة الادوية تاخد منها عينات "

دينا: و ال keflex ال1 جرام بقى بكام دلوقتى؟

مندوبة: بقى ب11 جنيه و نص بس 6 اقراص 

دينا: طب و الله كويس , و ال500 ملى؟

"تدخل مريضة تقطع الكلام فجأة"

مريضة: انا كنت هنا بالليل و كان عندى مغص كلوى و ادونى مسكن بس و روحت و قالوا لى اجى الصبح اعمل اشعه و تحليل

دينا: طيب يا حبي , نكتب لك على الاشعه و التحليل

ام المريضة: بس احنا معناش فلوس خالص

دينا: و دى انا احلها ازاى؟ التحليل رخيصه اه بس لازم فيها فلوس, انا ماليش فى الفلوس يا حبيبى ولا بحب اتكلم فيها اصلا, ممكن تسألى فى المعمل

ام المريضة: طب هى بكام انا مش معايا غير 5 جنية

صوت داخلى 1: هو فى حد ينزل من بيته من غير فلوس؟ انتى عايزه تفهمينى انك ماشية من غير حتى تمن التوكتوك ؟!

صوت داخلى 2: ايه البراجوزية دى يا صوت واحد , دى ست غلبانة من اللى فى دوامة فائض القيمة , اللى طول عمرهم بيشتغلوا و عمرهم ما خدوا

صوت داخلى 1: اما انت صوت داخلى شيوعى صحيح

صوت داخلى 2: لا دا انت اللى صوت داخلى رأسمالى متعفن

"يستمر الجدال الداخلى لدقيقة الى ان تحسم دينا رأيها"

دينا: خلاص يا ماما بلاها التحليل لو مش معاكى فلوس , خلينا نكتب لك العلاج على الاقل "تكتب اسماء ادوية فى ورقة" و انتى مروحه هاتى الادوية دى و ان شاء الله تخفى و لو بعد 10 ايام مفيش تحسن ابقى تعالى تانى

مريضة: طب و التحليل؟

دينا: ما انتى مش عايزاه

مريضة: لا ما بنت عمتى عملته امبارح

دينا: طب فين نتيجة التحليل؟

مريضة: لا ما هو مع بنت عمتى

دينا: ها؟

مندوبة : ركزى يا حببتى عشان الدكتورة تعرف تساعك مين اللى عيان اصلا؟

مريضة: لا بنت عمتى و عملته امبارح هنا ببلاش

دينا: مش فاهمة حاجة , عملته هنا ببلاش ازاى؟ كانت محجوزة يعنى؟

مريضة: لا بس عملته فى المعمل اللى فوق ببلاش

دينا: ما اعرفش حكاية المعمل ابو بلاش ده , المهم خدى الدوا بس اللى كتبته ليكى

مريضة: لا ما هو الدكتور بتاع بالليل كتب لى ادوية

دينا :  "تمزق الروشتة فى عنف" و مدام انتى لا عايزة تعملى تحليل و اصلا معاكى ادوية امال جايه ليييييييييه؟!

مندوبة: يا حبيبتى ركزى عشان خاطرى انا , هو انتى عايزه ايه؟

مريضة: لا اصل الدكتور كتب لى الادوية امبارح بس الروشته وقعت و انا رايحة الصيدلية فقلت اجى اخلى الضكتوره تكتب لى غيرها

"دينا تفقد الامل مع المريضة و تتوجه للمندوبة"

-دينا: اه صحيح هو ال keflex ال500 بقى بكام؟

-مندوبة : كيفليس ايه بقى , دا انتى ربنا يكون فى عونك اصلا

الخميس، 1 مايو، 2014

امتياز19: البوب

"الساعة 8:55 am ...تدخل الممرضة الى المكتب"
ممرضة: مفيش ادوات خياطة يا دكتورة كان فى حادثة كبيرة امبارح و خلصوا كل الادوات و هتقعد فى التعقيم لمده 3 ساعات انا بابلغك اهو

دينا: "بصوت منخفض" شت, يعنى مفيش خياطة؟!  امال هاكتب ايه عالفيس النهاردة , دى الخياطة بالنسبة لى مسلية اكتر من مسلسل تامر و شوقية

ممرضة: انتى بتقولى ايه؟!

دينا: لا مفيش , بس لما تجى الادوات بلغنى لو سمحتى
***************************
"الساعة 12:05 pm , تدخل نفس الممرضة"

ممرضة: الادوات جهزت و فى حالة مستنية الخياطة فى الاوضة

صديق المريض: الحقينا يا ابلة

دينا:  انا مش ابلة , "موجهه كلامها للمريض" ايه اللى حصل يا صديقى؟

المريض: اتعورت فى صباعى الصبح الساعة 7

دينا: "تفحص الجرح" امممم من الصبح بس , متأكد؟!

المريض: هو بصراحة من امبارح بالليل

صوت داخلى لدينا: دكتور الجراحة قال لك الجرح يتخيط لو بينزف , افحصيه احسن ما تبصى للساعة

دينا : "بمجرد لمس الجرح يبدأ فى النزيف" اممم هيتخيط فعلا بس لو سمحت بلاش تضحك على الدكتور بتاعك تانى ببساطة لانه هيعرف
المريض: معلش بقى يا ابلة

دينا:"تقرب النضارة على عينها و تنحنى ممسكة بملقاط طبى" انا مش ابلة 
المريض: هما كده اربع غرز؟

صديق المريض: و انت عايزهم 4 ليه؟ انت اخوان ياض؟

دينا: انت منهم؟  يبقى نخليهم 5 غرز بقى ولا اقولك خليهم 3 و نسيب باقى الجرح مفتوح

المريض: لا و الله يا ابلة , طيب انتى تبع مين و انا معاك؟

دينا: انا مش ابلة , انا تبع البرادعى يا سيدى

صديق المريض : البرادعى؟! ماشى اجدع ناس برضه

المريض: ندفع فين و كام ؟

دينا: لا كل ده ببلاش , احنا مستشفى حكومه

المريض: "ضاحكا" يحيا البرادعى

دينا: "تهتف" ألف مرة , "تدندن" # ليالى الانس فى فينا #