السبت، 30 يوليو، 2011

Larry Crowne 2011






ها قد عدت لارتدرى عباءتى السينمائيه مره تانيه بعد غياب طال .... المره دى فيلم توم هانكس و جوليا روبرتس الجديد اللى محبتش احط عليه امل كبير قبل مشاهدته لتجنب حاله خيبه الامل اللى راكبه جمل بعد مشاهدتى لافلام هوليود متصدره البوكس اوفيس و لى فى فيلم "ذا توريست" بتاع انجلينا جونى و جونى ديب اسوه حسنه , و لذلك و لجميع ماسبق ذكرته قررت انى اتفرج عليه بلا اى نوع من التوقعات ...


من التترات بان الجو العام للفيلم اولا انه بطوله توم هانكس و جوليا روبرتس و انتاج توم هانكس و تأليف توم هانكس  و بالتالى فواضح ان توم هانكس واخد الفيلم مقاوله من الجلده للجلده و تقريبا هيختم بوجوده الكريم 90% من مشاهد الفيلم ...عموما و ماله ما توم هانكس عاملها قبل كده فى Cast Away 2000 اللى كان عامل فيه دور الراجل اللى كان عالجزيره لوحده بيكلم "ويلسون" كره الطائره اللى كانت مصحباه طول الفيلم فعلى الرغم من انه تقريبا كان واخد كل الفيلم الا فيما ندر لكن قدراته التمثليه و النص الرشيق منع حدوث الملل بل و جعل الملل فى الفيلم ده اشبه بالعنقاء فلا وجود لها ....


التيمه العامه للفيلم و هاطمنك تانى مفيش حرق للقصه : لارى (توم هانكس) موظف باحد المحلات الشامله و بيبان اللى بيشتغل فيه من مجه طويله و فى المشهد الاول هيفاجئ بانه اتطرد بحجه انه مش معاه شهاده جامعيه , بعد قليل جدا يتضح انه فى ازمه ماليه و مديون و كل الوطائف المتوفره سيئه فيقرر انه يدخل الجامعه ...و هناك يلتحق بمادتين الاولى "التواصل و التحدث" اللى بتدرسها جوليا روبرتس و التانيه "اصول و قواعد الاقتصاد" اللى بيدرسها ممثل ظريف قوى فيه عرق صينى او يابانى انتوا ادرى بقى ...هناك بيطور و تتطور الحكايه ...طبعا فى خط درامى تانى اصفه بالثانوى اللى هو حكايه جواليا روبرتس نفسها مع زوجها لكنه يظل خط درامى اضافى ليس اكثر...




Box Office
Budget: $30,000,000 (estimated)
Opening Weekend: $13,006,875 (USA)  
Gross: $42,738,000 Worldwide

ميزانيه : 130 مليون دولار ؟!!!....ليه ان شاء الله ؟؟...اذا كانوا المنتجين اغبياء كفايه لانتاج فيلم مكرر جدا و عادى بمبلغ ده يبقوا حريين بقى...
ايرادات امريكا فقط حتى الان : 13 مليون؟؟!!..واضح ان كمان المشاهدين الامريكان اغبياء كفايه لدفع الفرق و عليه مكسب....ولا ادفع فى فرجته عشره جنيه دى ده انا بفكر ارفع قضيه اطالب فيها بتعويض
ايراد كلى :42 مليون!...رزق الهبل عالمجانين

التالى هو تقييمى اللى ملوش اى اهميه اطلاقا (بتفكرنى بمدحت شلبى الحته دى):




* توم هانكس : دور عادى  بمساحه واسعه و تقريبا ولا ماستر سين واحد , تحس انه بيمثل براحته مفيش مشاعر اوفر او مشاعر اصلا , الدور اسهل من اللازم فمش باين فيه جمال تمثيله زى انشودتى المفضله سينمائيا "فورست جامب" مثلا ,, مش دور جوائز طبعا لكن اقل من قدراته ...


* جوليا روبرتس : اذا كان دور توم هانكس عادى فدور جوليا عادى و اقل من عادى على رأى اصاله ..مساحه نسبيا صغيره و مستوى اى ممثله ممكن تعمله مستريح ...دور لم يضف لها و لم ينقص منها ...



* Cedric the Entertainer: كان تقريبا هو الحسنه الوحيده فى الفيلم كله باداء رشيق بين الحين و الاخر و كان دوره كجار توم هانكس اللى بيبع حاجاته طول النهار..كوميديا راقيه ضحكتنى فى المرات القليله اللى ظهر فيها 

الخلاصه : عايز تتفرج عليه يبقى على مسؤليتك الخاصه انا مليش دعوه لكن حتى لو هتتفرج ما تتوقعش انك هتشوف "فورست جامب" او "بريتى ومن"....تقييمى الخاصه 5.5 من عشره 

http://www.rottentomatoes.com/m/larry_crowne/

http://www.imdb.com/title/tt1583420/

 للتحميل مترجم :
http://forums.myegy.com/thread125133.html 

الخميس، 28 يوليو، 2011

خرب...مين قدك!!



بعد نجاح النسخه الاولى من كتاب ""100 طرق للتخريب دون الم""

http://suchasmallaffairs.blogspot.com/2011/03/10.html 

نقدم لك عزيزى المخرب كتاب المستوى الثانى فى كورس "المخرب الصغير معنا تنتقل من الهوايه الى الاحتراف" و هو كتاب " الشارع لمين؟؟" نعرف عزيزى المخرب لحبك لتطوير مهاراتك الابداعيه فدعنا نتساءل هو انت محدد نفسك فى المترو و متضيق على نفسك ليه اذا كان الشارع لك او بتعبير الحزب الوطنى "الشارع من اجلك انت" ..نعم عزيزى المخرب فالشارع لنا احنا لوحدنا و الناس التانيين دول مش مننا دول ناس انانين دول مش مننا ....و بالتالى فانطلق فى الشارع كما يحلو لك خرب بوظ دمر ما البلد سابت و انت اللى هتمسك نفسك هيا اشخذ مهاراتك التخربيه و يلا بينا : 

المرحله الاولى : فى تلك المرحله الهدف الاساسى هو كسر خوفك من النظام و ان تكون مهيأ و شجاع كفايه لتصل لمراحل الشجاعه الا نهائيه ...و بالتالى سنبدأ من حيث انتهينا المره السابقه انه مترو الانفاق و بلا اى ادوات ستقوم بيديك العارييتن او بالموس او القطر ان اردت بتشويه و انهاء اعلان الباتيه اللى فى محطه السادات ...ليس مهم السبب انما كسر خوفك هو العنصر المهم فقم كما بالشكل :



المرحله الثانيه : فلنخرج الى الشارع اخيرا ...استعد و لا يهمك و تذكر التدريب الطويل على التخريب و التشويه فهيا ايها الثورى قم بواجبك..فى تلك المرحله سنكتفى بتقطيع يدوى او باله حاده كمطواتك الخاصه بلا ادوات خاصه او استعداد معين ...و لكن المهم ان تلك اللوحه اللى ستمزقها تقع فى وسط ميدان رمسيس اى فى قلب القاهره و تحت اعين و اسماع الجميع و اتحدى ان يمنعك احد او حتى ان تلقى التعنيف او حتى النظرات و للتاكد يمكنك اظهار طرف مطواتك من جيبك فقط حتى تطمئن فتاكد انك لن تحتاجها ...اللوحه اللى بتشاور على شارع الجمهوريه و ايه يعنى لو حد تاه اهو برضه فسحه ببلاش..نفذ العمليه تماما كما بالشكل : 



المرحله الثالثه : بعد ان تملكتك الشجاعه و الجرأه الكافيه لتقطيع و انهاء لوحه بميدان رمسيس فالان ستوجه رأسا الى شراء بعض الادوات لمساعدتك على اداء افضل و فاعليه اكبر ...فى الحلقه السابقه نصحناك بتملك القلم الفلوماستر الاسود الذى لا يمحى فاما و انك انتقلت لمرحله اعلى فاهلا بك فى مرحله "الاسبراى" تستطيع شراءه من اى مكان و باسعار معتدله و بالالوان التى تفضلها و اطمئن فانه لا يمحى فعملك الفنى معه فى امان...من اجل التدريب ابدأ على اللوحه المعدنيه فى طريق وسط البلد و حتى لا يتهمك الاخريين بالخيانه فتستطيع كتابه اى شتيمه تحب للنظام السابق فمنه تدريب و منه وطنيه ...كما بالشكل :




المرحله الرابعه و الاخيره : بعد ان تمرنت كل هذا فتم عملك الفنى التشويهى التخريبى الاهم ...نعم انه الشهر العقارى المصرى الواقع بقلب القاهره بوسط البلد و للتغير بدل من ذم النظام السابق كما بالشكل السابق قم بكتابه مدح للنظام الحالى و بالهنا و الشفا ....فبيديك تستطيع تحويل الصوره الاولى الى الشكل التانى باستخدام عربه الاسبراى الخاصه بك :




بتحب مصر؟ بتموت فى التراب اللى بتمشى عليه؟؟ اه مش انت اللى بتشيل علم مصر فى الاستاد و فى القهوه ايام ماتشات المنتخب؟؟ عارفك انت من مفجرى الثوره و من رواد ميدان التحرير و عايز تخلص على السلفيين و الاخوان و الاحزاب و شرف و شفيق و نظيف و حسنى و المجلس العسكرى و الملك برضه و ماله ؟؟!!!.......لو سمحت بطل تخريب بلييييز او على الاقل حاربه كل ما تشوفه .....

ملحوظه : الصور من تصويرى الشخصى من رحلتى المكوكيه لوسط البلد و رمسيس و الفجاله من فتره قليله ..و ترتيبها و اضافه تعليقاتى هى مسئوليتى و اعذرنى على سوء الجوده فى بعض الصور فالسماء لا تمطر كاميرات ديجيتال  و ضيف لده كله عين من يراقب و تهمس "هل بتصور ايه؟" ...و ربنا يستر 

ملحوظه 2 : امتنعت عن نشر بعض الصور اللى القطها بالفعل لانى التشويه فيه فاق الحد و خاصه حدود الادب منها.... 

الأربعاء، 27 يوليو، 2011

اه يا مواطن يا ابن ال....



و رجعنا بعد الفاصل معاكوا انوا كان فاصل طويل شويه مر عليا كالدهر و السبب بسيط للغايه انى كنت فى الامتحانات الانهائيه و النهارده بس 26 يوليو خلصت الامتحان الهام الاخير و يتبقى امتحان شفوى يوم 28 و ساعتها اتخلص تماما من تلك السنه "الجملى" اللى عالنار بقالها 11 شهر ....و ارجع لكم بموضوع مشابهه ل



اه يا ليبرالى يا ابن ال....

http://suchasmallaffairs.blogspot.com/2011/05/blog-post.html



عارفه ان كلامى بيعزل و زعل و هيزعل ناس كتيييير ....لكنى قطعت عهد على نفسى بالا "ابيع الصدق بالاكاذيب , و مقولش للحمل الوديع يا ديب و مقولش للديب يا اعز حبيب "....





مرفق طيه منشور 6 ابريل الجديد للدعوه للنزول الى جمعه فى التحرير و حياتك مبقتش متابعه اسم الجمعه السابقه من الاحقه نظرا لانشغالى اولا بالامتحانات و سنينها و ثانيا لان متابعه اسامى مظاهرات مصر كمحاولتك لمتابعه كل مسلسلات رمضان فى وقت واحد او كمحاوله الزراعه فى الصحراء الكبرى فى شهر اغسطس  , ببساطه الاسامى كترت و بصراحه العمليه بوخت شويه فان لم تكن تشى جيفارا فستكون قد مللت بالتاكيد...

لا تقلق من جوده الصوره فهى كشكل عام نظرا لان عمليه التفصيص اتيه لا ريب فيها كعادتى السيئه ...

ملحوظه : الصباع الظاهر فى الصوره هو صباعى و التصوير بموبيل اختى كسلف ...اتمنى الحصول على كاميرا ديجيتال لكن ما باليد حيله فالانتظار هو الحل او الدعاء بان تمطر السماء كاميرات ديجتال ...عموما يا رب


بالفعل الجمله الاولى كررت بشده الايام السابقه  من الشعب ايوه الشعب تلك الاغلبيه الصامته اللى فعلا زهقت ...متلموش الناس على احساسهم بالخوف اذا لم تقدم لهم الامان ...متلموش الناس على الاستعجال لاستقرار الامر فالبطون الفارغه لا تعرف طريق الصبر ...متلموش الناس على عتابهم على الثوره لانهم مكلوش حاجه يشربوا عليها ميه ...ببساطه هدف السياسه الاساسى هو تقديم اقصى قدر من الحريه و الخدمات للمواطن فالكل يتبارى لخدمه ذاك المرفه المواطن الا فى مصر طبعا حيث الشعب بالنسبه للحركات السياسيه مجرد عدد فى مظاهره تهدف لمطالب الحزب ....رضا الشعب و الجماهير هو الغايه و ليست الوسيله يا اهل السياسه !!!

"دول تبع امريكا و اسرائيل " ببساطه و من غير خناق اذا كانت حركه 6 ابريل متهمه فاما الاثبات بمستندات او البراءه فبلاش التشويش و القلق ....اعترف بوصفى لحركه الجيش بتخوين 6 ابريل ب "الغباء السياسى" و اتمنى الا يتعدى الامر الغباء لمراحل اخرى اشد سوءا ..

اما بالنسبه لعجله الانتاج فايوووه الاتهام صحيح فعلا الانتاج واقف و السياحه اتضربت بالنار ده مش اتهام دى حقيقه اما سببها فعوامل متعدده لكن اكيد المظاهرات و القلق كل يومين عامل مؤثر قطعا....


here we go again ....الموضوع الانهائى اللى مبيخلص قطعا و ان لم يعجبنى لهجه الاستهزاء لكن حقهم و هو برضه موضوع قلق ...اوكى



بصراحه بقى 1200 جنيه كتير ...و توفير 1200 جنيه لادنى موظف يستلزم بالضروره توفير ضعف المبلغ للدرجه التانيه و التالته و ده هيؤدى لتضخم غير استحاله توفير المبلغ من غير فرض ضرائب مجحفه او ان السما تمطر فلوس زى امنيتى بان تمطر السماء كاميرات ديجيتال عموما يا رب ....الحد الاقصى للاجور اراه واجبا فعلا ....بصراحه فى النقطه دى بذات موضوع الفلوس الكلام و التظاهر سهل بينما تدبير الفلوس فى الهم اللى احنا فيه ده فعلا صعب على الرغم من كرهى المشهور لحكومه شرف المخسوف على شبابه...


 بلاش اللعب بورقه الشهداء ...بلاش لعب بالعواطف اذا كونتوا هتشتغلوا سياسه ...و بصراحه عندى احساس بان بين حركات الشباب و الداخليه ثأر شبه شخصى فعلا رجل الشارع العادى معندوش مشكله مع الداخليه بينما تصر حركات الشباب على التحدث باسمه ...و دائما اللعب بورقه دم الشهداء العاطفيه قبل اى شئ....


 اهو اكتر مجنانى فى البلد دى هو موضوع الغاز ده ...لو مكتوب فى كامب ديفيد و ده فرض علينا باسعار قليله يقولوا و ما اظنش ان الناس هتعترض نظرا لان المضطر يركب التاكس و ما اظنش ان المصريين يحبوا يحاربوا دلوقتى - او ابدا- ....اما لو الموضوع عقد و فيه شرط جزائى زى ما قالوا يقولوا و يمكن نعمل استفتاء ندفع العقوبه ولا نكمل ....فعلا ذلك الكائن الخيالى اللى بيدعى "الشفافيه" يبقى حل فعال جدا فى تلك المعضله ...اوكى


 الاعلام الحكومى بقى مقرف حرفيا ...اخبار اهرام جمهوريه حاجه تعل , قناه اولى تانيه و تالته و متخصصه كلهم زفت...مش عشان بيشتموا 6 ابريل لكن لاصرارهم على ان يكونوا اعلام حكومه اعلام رسمى غير محايد ....معاكوا فى دى اوكى


 مش معاكوا فى دى يا شباب ...لو المحكمه طلعت كل الناس دى بريئه يبقى تعظيم سلام محدش يقدر يتكلم و لا حتى انتوا ...و فعلا يوم ما القاضى هيضغط عليه عشان يبرأ او يدين يبقى اليوم اللى انا  و انت نحضر شنطننا و ندور لنا على بلد تانيه لسه فيها عدل ...مفضلش غير القضاء ابوس ايديكوا ابعدوا عنه ....و لا اقول لكم اذا كان حكم المحكمه مش هيعجبكم ما تقتلوهم بايدكم احسن اه why not?? و نعملها زى الثوره الفرنسيه و نبعت للناس للمقصله من بره بره و ان كنت عايز تعرف الاحساس ده احساس الانتقام اقرا رائعه تشارلز ديكينز "قصه مدينتين" او ارجع اقراها تانى لو كنت قريتها قبل كده...و خاف على ثورتك ان تتحول لانتقام همجى ارجوك خاف عليها...من الاخر سيبوا القضاء فى حاله



مش معاكوا فى دى كمان يا شباب ...مفيش حد ليه حقوق اكتر من حد يا بهوات ...اراه مطلب انتقامى اكتر من اى حاجه تانيه و اقصاء لا معنى له عندى بل و اضافه وصايه على المنتخب و انا لا احب فرض الوصايه و رأيى ان نتبع مبدأ العمله الجيده تطرد العمله الرديئه ..
كما انه طلب فضفاض غير محدد فمثلا المطلب يعنى جميع  اعضاء الحزب اى الاعضاء العاديين بمعنى ال 3 مليون او القيادات؟؟ و لو افترضنا انهم يقصدوا القيادات فباى مستوى؟؟....مطلب شكله حلو يحمس الجمهور و باطنه مش داخل ذمى ببصله


معنديش مشكله مع المطلب ده ....و لو انى مش بحب فكره اننا نشيل الموظفين العموم بمظاهره لكن و ماله ؟؟...اوكى معاكوا 

 لقد وقعنا فى الفخ ؟؟؟؟....التهديد و الوعيد  و الانتهام بالسلبيه و يمكن التخوين و بيع دم الشهيد ؟؟!!!!!!!....مش هعلق عشان منزعلش من بعض لكن فعلا قطعه مستفزه .....


ملحوظه : الملحوظات السابقه ليست قاصره على 6 ابريل بل كل الحركات الليبراليه و الشبابيه كلها متشابهه....


محدش خد باله بان لسته المطالب دى كلها مفهاش طلب من حكومه شرف المصونه فمثلا غلاء الاسعار اللى كاوى البشر مش موجود ...رجوع السياحه اللى ضارب شغل نص البلد مش موجود.....اااااه يا بلد عايزه ولد