الخميس، 28 يوليو 2011

خرب...مين قدك!!



بعد نجاح النسخه الاولى من كتاب ""100 طرق للتخريب دون الم""

http://suchasmallaffairs.blogspot.com/2011/03/10.html 

نقدم لك عزيزى المخرب كتاب المستوى الثانى فى كورس "المخرب الصغير معنا تنتقل من الهوايه الى الاحتراف" و هو كتاب " الشارع لمين؟؟" نعرف عزيزى المخرب لحبك لتطوير مهاراتك الابداعيه فدعنا نتساءل هو انت محدد نفسك فى المترو و متضيق على نفسك ليه اذا كان الشارع لك او بتعبير الحزب الوطنى "الشارع من اجلك انت" ..نعم عزيزى المخرب فالشارع لنا احنا لوحدنا و الناس التانيين دول مش مننا دول ناس انانين دول مش مننا ....و بالتالى فانطلق فى الشارع كما يحلو لك خرب بوظ دمر ما البلد سابت و انت اللى هتمسك نفسك هيا اشخذ مهاراتك التخربيه و يلا بينا : 

المرحله الاولى : فى تلك المرحله الهدف الاساسى هو كسر خوفك من النظام و ان تكون مهيأ و شجاع كفايه لتصل لمراحل الشجاعه الا نهائيه ...و بالتالى سنبدأ من حيث انتهينا المره السابقه انه مترو الانفاق و بلا اى ادوات ستقوم بيديك العارييتن او بالموس او القطر ان اردت بتشويه و انهاء اعلان الباتيه اللى فى محطه السادات ...ليس مهم السبب انما كسر خوفك هو العنصر المهم فقم كما بالشكل :



المرحله الثانيه : فلنخرج الى الشارع اخيرا ...استعد و لا يهمك و تذكر التدريب الطويل على التخريب و التشويه فهيا ايها الثورى قم بواجبك..فى تلك المرحله سنكتفى بتقطيع يدوى او باله حاده كمطواتك الخاصه بلا ادوات خاصه او استعداد معين ...و لكن المهم ان تلك اللوحه اللى ستمزقها تقع فى وسط ميدان رمسيس اى فى قلب القاهره و تحت اعين و اسماع الجميع و اتحدى ان يمنعك احد او حتى ان تلقى التعنيف او حتى النظرات و للتاكد يمكنك اظهار طرف مطواتك من جيبك فقط حتى تطمئن فتاكد انك لن تحتاجها ...اللوحه اللى بتشاور على شارع الجمهوريه و ايه يعنى لو حد تاه اهو برضه فسحه ببلاش..نفذ العمليه تماما كما بالشكل : 



المرحله الثالثه : بعد ان تملكتك الشجاعه و الجرأه الكافيه لتقطيع و انهاء لوحه بميدان رمسيس فالان ستوجه رأسا الى شراء بعض الادوات لمساعدتك على اداء افضل و فاعليه اكبر ...فى الحلقه السابقه نصحناك بتملك القلم الفلوماستر الاسود الذى لا يمحى فاما و انك انتقلت لمرحله اعلى فاهلا بك فى مرحله "الاسبراى" تستطيع شراءه من اى مكان و باسعار معتدله و بالالوان التى تفضلها و اطمئن فانه لا يمحى فعملك الفنى معه فى امان...من اجل التدريب ابدأ على اللوحه المعدنيه فى طريق وسط البلد و حتى لا يتهمك الاخريين بالخيانه فتستطيع كتابه اى شتيمه تحب للنظام السابق فمنه تدريب و منه وطنيه ...كما بالشكل :




المرحله الرابعه و الاخيره : بعد ان تمرنت كل هذا فتم عملك الفنى التشويهى التخريبى الاهم ...نعم انه الشهر العقارى المصرى الواقع بقلب القاهره بوسط البلد و للتغير بدل من ذم النظام السابق كما بالشكل السابق قم بكتابه مدح للنظام الحالى و بالهنا و الشفا ....فبيديك تستطيع تحويل الصوره الاولى الى الشكل التانى باستخدام عربه الاسبراى الخاصه بك :




بتحب مصر؟ بتموت فى التراب اللى بتمشى عليه؟؟ اه مش انت اللى بتشيل علم مصر فى الاستاد و فى القهوه ايام ماتشات المنتخب؟؟ عارفك انت من مفجرى الثوره و من رواد ميدان التحرير و عايز تخلص على السلفيين و الاخوان و الاحزاب و شرف و شفيق و نظيف و حسنى و المجلس العسكرى و الملك برضه و ماله ؟؟!!!.......لو سمحت بطل تخريب بلييييز او على الاقل حاربه كل ما تشوفه .....

ملحوظه : الصور من تصويرى الشخصى من رحلتى المكوكيه لوسط البلد و رمسيس و الفجاله من فتره قليله ..و ترتيبها و اضافه تعليقاتى هى مسئوليتى و اعذرنى على سوء الجوده فى بعض الصور فالسماء لا تمطر كاميرات ديجيتال  و ضيف لده كله عين من يراقب و تهمس "هل بتصور ايه؟" ...و ربنا يستر 

ملحوظه 2 : امتنعت عن نشر بعض الصور اللى القطها بالفعل لانى التشويه فيه فاق الحد و خاصه حدود الادب منها.... 

12 التعليقات:

carmen يقول...

لا حول ولا قوة الا بالله ماعرفش ليه التخريب وفى مصلحة مين طب انت لك مطالب ليه اكسر واسرق وانهب

ربنا يهد المفترى

طرح اكثر من رائع

تقبلى مرورى

غير معرف يقول...

بجد حاجه تضايق أوي لما واحد المفروض إنه بيحب بلده و يعمل فيها كده..حاجه من الاتنين يا إما هو ولا بيحبها و لاحاجه و ماشي مع القطيع يا إما هو بيحبها و من جهله (اللي الخراب بتاع السنين الي فاتت إتسبب فيه) بيعمل كده..و في الحالتين لكي الله يا مصر.

بوست مهم و تصويرك رائع و أسلوبك جميل كالعاده

كل سنه و إنتي طيبه و بخير و رمضان كريم عليكي و على كل اللي بتحبيهم

شيرين سامي

ابراهيم رزق يقول...

التخريب تأديب و تهذيب و اصلاح

تأديب لمن يعترض و ينال ما لا يرضيه
تهذيب للتفس البشرية و هو التنفيس و اخراج الكبت
و اصلاح لانه سيتم اصلاح ما افسدوه و لو بعد حين

تحياتى و تقديرى و يارب يرزقك بالديجيتال

د/دودى يقول...

كارمن : اللى بيكسر و ينهب و يسرق ده اهو على الاقل بيستفيد حاجه لكن اموت و اعرف الكتابه على الحيطان و تقطيع اعلانات يفيد فى ايه؟؟؟....اللى نفسى اعرفه فعلا هما بيعملوا الحاجات دى بيعملوها امتى؟؟ هى مصر بتنام ابدا ففى اى ساعه يتم ذلك...سيبك انتى رمضان كريم

د/دودى يقول...

شرين : وجودك بيفرحنى مش عارفه ليه ؟؟!! من القلب للقلب رسول...ما اظنش انه جهل لان مهم طلبه و ناس المفروض انها محترمه...اظنه نوع من الكبت يطلع مره بكتابه للالتراس و مره بحجه الدفاع عن الدين-اى كان هذا الدين- او يطلع فى السياسه -كل التيارات- المهم انه كبت بيطلع...المشكله انه بيطلع علينا

د/دودى يقول...

استاذ ابراهيم : يا سلام لو السما تمطر كاميرات ديجيتال دى كانت تبقى عسل عموما يا رب ...سيبك انت رمضان كريم

كريمة سندي يقول...

البعض يعتقد أن التخريب هو نصاحة وفهلوة مع الأسف

تصوير جميل ونقي ولكن موجع للقلب .. تحياتي الصادقة

سواح في ملك اللــــــــــــــــــه- يقول...

اقول ايه

احنا محتاجين ثورة اخلاقية

Bent Men ElZaman Da !! يقول...

بتخنق جدا بجد من الموضوع ده
انت المفروض عايز تعبر عن رأيك اللى المفروض فى صالح البلد
يبقى ليه تخرب فى البلد اللى انت عايز مصلحتها كده
شخصيات متناقضه

حسام بدوي يقول...

دكتورة دينا
أنا علقت على ردك في مقالك " أه يا مواطن يا ابن ال"
. أتمنى تقرأيه .

ع.سالم يقول...

أنا فاكر فعلا موضوع "10 طرق للتشويه بدون ألم".... كان حلو.. بس ده فعلاً دسم أكتر وجرعة التشويه (بالهاء مش بالقاف) أكبر.

أتوقع إن الموضوع ينال صدى كبير :)

تحياتي :D

سمو الامير يقول...

الكتابة ع الجدران والتقطيع والتخريب ده كله من أكتر التصرفات اللي بتنرفزني ودي عادة موجودة عند ناس كتير من زماااااااان كان أحمد خالد توفيق كتب عن المرض النفسي ده في مرة بس مشفاكر عنوان المقال ايه

حمدا لله ع السلامة وكل سنة وانتي طيبة :)

إرسال تعليق

حلو؟؟ وحش؟؟ طب ساكت ليه ما تقول....