الثلاثاء، 31 أغسطس، 2010

علبه الوان .."4" الاصفر


اللون الاصفر!!!!...لون الانطلاق و الشباب مين يقدر يحبه ويقدره غير الشباب بالتاكيد عمرك شفت فوق الاربعين يلبس او يحب او حتى يقتنى اللون الاصفر فى حاجاته الشخصيه...اللون الاصفر هو انك تخرج مع صحابك من غير ما تعرف انتوا رايحين فين و لما تقرروا انتوا رايحين فين  من غير ما تعرفوا السكه وهنا تبدأ متعه من نوع اخر انك تسأل الرايح والجاى فين الطريق ؟؟ بعضهم  يبص لك من فوق لتحت و يقولك الطريق و بعضهم يبقى عارف ويستعبط و بعضهم يدلك غلط جهلا او غيظا فى هؤلاء الشباب المنطلق على غير هدى تتقبل الاهانه او الجهل بضحكه تنور قلبك و تحرق قلب اعدائك ...اللون الاصفر يعنى تخلص متعه خروجك مع صحابك وتكتشف انك واقف فى وسط الشارع و مش عارف تروح و الغريب انك بتضحك وسط ده كله لان المتعه متعه كسر التقليدى مش الخروج فى حد ذاته ...اللون الاصفر هو اللون اللى لما البسه فى الشارع الاقى الدنيا منوره و الكون يطل فاتح ثغره مبتسما سعيد لسعادتى هو اللون اللى تلبسه تلاقى الناس بتبص لك يحسدوك لانك رايق و فايق و لابس فاتح فى عز تراب القاهره تبص لده كله و من جواك تطلع لهم لسانك انهم حاقدين من جرأتك و شبابك ...اللون الاصفر يعنى لون جاره القمر فيروز المفضل و لونى المفضل انا كمان ...اللون الاصفر هو اللون اللى لما تكتسف انك تلبسه او تقتنى حاجات بلونه تعرف انك كبرت فى السن و انك دخلت مرحله تانيه تحولت فيها للكحلى للاسف...اللون الاصفر يعنى لون الشمس الصبيه اللى عمرها ملايين السنين و لسه فتيه لا تتحرج من نظرات الناس و لا تتاخر عن معادها ..... اللون الاصفر مش لون الحقد و الغل زى ما الناس بتقول بالعكس هو لون الحياه نفسها لما تبتهج




الاثنين، 30 أغسطس، 2010

علبه الوان.."3" الاحمر



اللون الاحمر !!!! يعنى شقاوه سعاد حسنى فى خللى بالك من زوزو وهى بتنطط فى الجنيينه و هى فى دراع حسين فهمى فى ايام تتمنى عودتها او اللحاق باول مركبه زمنيه للذهاب اليها....اللون الاحمر يعنى الجرأه انك تدخل محل غالى و انت معاك 20 جنيه تسأل نفسك هتدفع ازاى لو حبيت تشترى او تسأل نفسك بالاحرى هو انا دخلت هنا ليه؟؟؟...اللون الاحمر يعنى الاهلى فى بطوله افريقيا فى ماتش العوده فى استاد القاهره لما يكتسى الملعب احمر و تندلع نيران التشجيع تاكل اعصاب الخصم يعنى لون الانتصار او انتظاره على الاقل لانك متأكد ان فرقه بتلبس اللون ده مش ممكن تستسلم او تتخلى عن حلمها لما تلاقيها قفلت و تلاقى الجون فى الدقيقه 93 و الملعب بينتفض بسعاده لونها احمر ....االلون الاحمر يعنى اسبانيا و حلقه الثيران و جرأه المادتور و هو داخل على الثور و هو عارف انها ممكن تبقى اخر لحظه فى حياته ...اللون الاحمر لون الدم المسفوح يمكن فى سبيل الحق و يمكن فى سبيل الباطل الدم اللى ممكن تضحى بيه عشان تثبت لنفسك او للاخريين انك على حق و انك بتتدافع عن حاجه يمكن احيانا يبقى لون دم الشهدا اللى سلموا الروح لخالقها و سابوا الدنيا طمعا فيما هو اكبر واحلى و اكرم او ممكن يبقى لون دم ظالم طلب الدنيا و ترك الاخره فخسر الاثنين طمعا فى نار بلا قرار...اللون الاحمر يعنى لون عريبتك الجديده حمراء اللون لامعه عارف انك دافع فيها دم قلبك فتتهدى بيها على الطريق معجبا بها و تتمنى لو قدرت تسجل احساسك بيها على شريط عشان تسترجعه لما تدور حلقه الزمن و يتحول لونها لاحمر من درجه تانيه بسبب خليط الشمس و التراب و الخبطات و خربشه الرايح و الجاى فيها او نظرات حاسدين تقدر تفتكر شكلها اول يوم فى لونها الاحمر اللى فى دماغك ....اللون الاحمر لون خدود البنات من الخجل او من الغرام لون الورد البلدى مفتح احمر يغرى العيون بجماله....اللون الاحمر يعنى يوم الفالنتين اللى بيجى مرتين فى السنه و يدور و يدور على الناس و انت لا لا بتجيب لحد هدايا ولا حد بيفتكرك ....اللون الاحمر هو لون الحياه           

الأحد، 29 أغسطس، 2010

علبه الوان ..."2" البنفسجى


احيانا تلاقى يومك بقى بنفسجى ....لون راقى و رايق و رقيق....تلاقى نفسك صاحى من النوم سعيد على الهادى يومك زى ما بيقولوا ولاد الناس يوم smooth ...صحيت فى معادك رايق رحت شغلك او دراستك من غير زحمه اتعلمت مع الناس عالرايق من غير خناق تقضى حاجتهم و يقضوا حاجاتك ...البنفسجى يعنى الرقى يعنى تمشى فى مصر الجديده اخر النهار ...يعنى تاكل شيكولاته سقعه ...يعنى تشرب شاى مظبوط ...يعنى تشوف فيلم قديم الوان من بتوع هوليود ايام الخمسينات...يعنى تسوق  عربيتك فى شارع فاضى...او تركب اتوبيس وتقعد فى يوم مش حر...يعنى تحضر نفسك لسفر رحله و بقول تحضر مش تسافر لان التحضير نفسه متعه اما السفر فمسئوليه و المسئوليه دى بقى دى لون تانى خالص غير البنفسجى...يعنى تاخد مراتك و تتعشوا بره من غير ما تفكر هتدفع كام....البنفسجى يعنى تنزلى وسط البلد عشان تشترى شنطه من محلاتها العتيقه ....البنفسجى انك تدلع نفسك من غير ما تفكر فى المقابل...البنفسجى انك تحب نفسك زى ما بتحب الناس...البنفسجى انك تحس انك ملك روحك و انك رئيس جمهوريه نفسك...البنفسجى انك تلاقى نفسك وسط الزحمه ...البنفسجى انك ترش الهدوء على نفسك المضطربه...البنفسجى  هو ان يكون فى جيبك عشره جنيه لكن تقرر تقضى يوم جميل.......البنفسجى هو الرضــــــــــــــــــــــــــــا............






علبه الوان.."1"


حياتى و حياتك و حياه الكون علبه الالوان....

تغمق احيانا تفتح احيانا ...

غاليه احيانا و رخيصه احيانا...

منسقه احيانا ملخبطه احيانا...

كتييييره 64 لون تديك اشكال والوان احيانا و قلييييله 6 الوان احيانا تخلى جمال لوحتك يعتمد على شطارتك قبل امكانياتك...

ترضى بعلبتك مهما كانت قليله و تخضنها سعيد احيانا أو تبص لعلب الناس وترمى علبتك ذات المئه لون طمعا فى علبه فيها لون واحد احيانا....

احيانا علبه شكلها من بره تحفه تفتح تلاقيها فاضيه او علبه مقطوعه و قديمه و تفتح تلاقيها كنز من الالوان...

لونك المفضل ممكن يكون اللون الاسوء بالنسبه للاخريين ...

و هو من دا و دا الدنيا كده ...

يوم وردى و يوم كحلى... 

ممكن مايكونش ليا فى الرسم لكن ليا فى الالوان!!!!!

السبت، 28 أغسطس، 2010

اهل الهوى..صلاح جاهين

و انا بقلب فى درفتى الصغيره اللى اسميتها "مكتبتى" على غير مسمى فهى مجرد ضلفه فيها حبه كتب بعضها جديد و بعضها قديم يرجع ملكيه لبابا اللى قرا الكتب دى وبالتالى اعتصبت ملكيتها ليا عنوه تاره ورخامه تاره اخرى....بقلب لقيت كتاب قديم لصلاح جاهين كان بقالى كتيييييييير ما اقلبتش فيه يمكن لغلبه كتاب الرباعيات اللى من كتر ما قريته جلدته بليت و اترسم فى دماغى و حفظته غيبا ...و انا بقلب فى قصايد صلاح جاهين الطويله نسبيا لاقيت قصيده "اهل الهوى" عجبتنى جدااااااا  بتتكون من خامسيات كل خماسيه عن قصه مختلفه من التاريخ او من قصص الحب يكثفها صلاح جاهين بعبقريته اللامحدوده ....


اهل الهوى


اللحم طينو العروق دود من ديدان الطين
ادم وحوا على ارض العدم حاطين
عاقبهم الرب.. اخرجهم من الجنه
أدم عمل حضن حوا جنته وغنى
الناس بتتهنى مهما كانو منحطين







 

لو لف لو شاف وليفته ورا الجبل هدمه
ياميت ندامه على جبلين واتصدموا
اتهد منهم جبل اسمه هابيل وانهار
قابيل أخوه اللى قاتله سكب دموه أنهار
واللى افتتن بالنهار .. بالليل يا ندمه





 
مرات عزيز مصر شابه وجوزها راجل كهل
يوسف حليوه فلسطينى عديم الأهل
فؤادها قاد نار صار تحت النهود لاعب
تهبش فى يوسف وتترجاه وتداعب 

 والعقل صاعب لكن خلق المتاعب سهل




 
وفى التاريخ كليوباترا الأسمرانيه
كانت غرامها غرام اسكندرانيه
غرام عنيف له حفيف تعبان ولسعة نار
من عشقها لحسنها خافت عليه يحتار
واختارت الأنتحار.. المعجبانيه





 

من برق سيف الجدع.. يطلع صباح أمله
عنتر معنتر لكن مسكين ابوه همله
بسيفه قدف فى بحر الدم عداه عوم
ولجل عبله وقبله منها.. ساد القوم
والحر له يوم ويدوق الشهد من عمله





 

عالم من الهمس من غير امس من غير غد
الشمس ليلى.. القمر ليلى.. السؤال والرد
ليلى.. ومجنونها قيس هايم يقول ليلى
دى مهما كانت لغيرى وقسمتى مايله
الروح مادام طايله.. مايهمش تنول اليد






 
عنتر من الغرب اسمر يندهوله عطيل
كلل على ديدمونه وشالها فى عنيه شيل
بياض عنيه لمع من ضى حلاوتها
اولاد حرام غيروه بالغيره موتها
والغيره غشوتها ماتفرق نهار من ليل

 



 

كل الأحبه على حبال الهوى طالعه
فاكرين نجوم السما شبابيك غرام والعه
أنظر لرميو الجرئ طالع يشوف جولييت
تعرف بأن الغرام يكره بيبان البيت
وان كنت حبيت ما تهزم قلبك قلعه










الريح تباريح جريح ما ينتهيله أنين
حسن قتيل من سنين ونعيمه فى المجانين
على كل ملقف هوا تستنى تستنى
يجيلها صوت كله موت ويئن أنه
والحب له نار وجنه وناس غلبانين










كان ياما كان ملك لكن مالوش أحباب 
عشق رمى التاج وعاش العمر كله شباب
فيه ناس يقولو عليه مجنون وناس جاحد
وانا اقول ابيع عمرى كله بيوم غرام واحد
ده الحب والحق واحد يا أولى الألباب



 


المقهى الاسبانى



"المقهى الاسبانى" تأليف عائد خصباك تقع احداثها فى 15 فصل مجموع صفحاتها 269 صفحه.....تبع سلسله افاق عربيه اللى تبع وزاره الثقافه و النسخه ب 2 جنيه فى طباعه جيده و ورق عالى الجوده....
الروايه بتدور احداثها فى المانيا وهى لكاتب عراقى و بعض شخصياتها مهاجرون لبيانيون تركيبه غريبه شويه صح؟؟ لكنها روايه عاليه المستوى و فيها فكر جيد ...فصولها منفصله متصله ممكن تظهر شخصيه فى قصه احد الابطال فى احد الفصول و تكون الشخصيه دى ثانويه بالنسبه لبطل الفصل ويصبح فى فصل اخر هو بطل الفصل و الاخ اللى قابله دى مجرد شخصيه ثانويه ....مش هى الحياه كده كلنا ابطال فى قصصنا و مجرد شخصيات ثانويه فى قصص الاخريين يكبر دورنا او يصغر حسب قربنا للشخص...بتدور عن الغربه و تأثيرها على الناس محدش منهم مضايق و عايز يروح بلده زى تصورنا العادى للغربه بالعكس دول متقنعيين بحياتهم و بيكملوا فيها و بيدخلوا فى اغوار الحياه بشجاعه احيانا و باجرام احيانا و يمكن بجبن واستسلام احيان تانيه...

قريت التعليق ده فى احد المواقع العرقيه عن الروايه دى : 
إقرأ هذه الرواية على مسؤولية موقع الناقد العراقي :
رواية المبدع العراقي ” عائد خصباك ” : ( المقهى الإسباني ) – صدرت ضمن سلسلة آفاق عربية التي تصدرها الهيئة العامة لقصور الثقافة في مصر – هي رواية الغربة والاغتراب والعذاب الإنساني .. مصائر انسانية تتقاطع وتتضارب وتتشابك تحت خيمة الخراب الوجودي الشامل الذي يخلقه الإنسان نفسه .. رواية عراقية وعربية وعالمية بامتياز .. وعائد خصباك المولود في الحلة والمقيم حاليا بألمانيا ، كان قد ” سمّم ” أجواء القصة العراقية حين أصدر مجموعته القصصية الأولى : ( الموقعة ) عام 1970 والتي عدها الكثير من النقاد بأنها عامل مؤثر في تشكيل تيار مهم في القصة العراقية ، يقدم في روايته هذه عملا يستحق أن يوضع في مصاف الأعمال الروائية الكبيرة بلا تردد . تحية للمبدع ” عائد خصباك ” .
 http://alnaked-aliraqi.com/article/1053

- 259 صفحه يا مؤمن تتخيل انى اقرهم كلهم فى انتظار موعد؟؟؟؟؟؟؟؟!!!!!!!!!!.....اوضح اكتر اتفقتنا انا و صديقه اننا نتقابل عشان نروح مشوار مش فاكره كان بمناسيبه ايه؟؟ تقريبا درس او كنا رايحين معرض مش مهم...المهم اننا اتفقنا اننا نتقابل فى محطه مترو و تكون فاضيه طبعا عشان اللى يوصل الاول يعرف يقعد و يستنى التانى لما يجى...كان المعاد المنتظر الساعه 9 و طبعا صحيت انا 7 ونص و لبست بسرعه و كنت فى الشارع الساعه 8 تمام و كنت فى المحطه مكان المعاد الساعه 8 و نص كالعاده بوصل بدرى و بقعد استنى على اعتبار الواحد يوصل بدرى احسن و اتصلت صحبتى بيتقولى انتى فين؟ قلت لها انا فى المحطه اصلى جيت بدرى شويه و رديت بسرعه خوفا من اللى بالى "هو انتى فين؟" و جاءت النتيجه المتوقعه انا لسه صاحيه دلوقتى يعنى قدامى كتير طب استنى انا هاجى بسرعه على قد ما اقدر....ولانى متوقعه ان المعاد لازم يتأخر كالعاده كنت عامله حسابى وجايبه روايه"المقهى الاسبانى" فى الشنطه تحسبا للظروف و التأخير ...تيك توك تيك توك تيك توك تيك توك تيك توك تيك توك تيك توك تيك توك تيك توك ....الساعه بقت 10:30 يعنى مرت ساعتين كاملتين و انا قعده فى محطه المترو ناس تنزل و ناس تطلع و انا قعده و بالطبع ساعتين من القراءه كانوا كافيين ان روايتى تخلص ...و اخيرا الساعه 10 و نص اقبلت صحبتى تتهدى قائله "اتأخرت صح؟؟؟؟" كتمت انفاسى حتى لا اخسرها....

دعوه



دعوه  


كان كل شئ معد
الطاوله الكبيره التى تتوسط البهو
و الشمعدان
و الزجاجات الصغيره اللامعه
و واحد وعشرون كرسيا
و الظهور الكثيره التى تعكس الضوء
الظهور الكثيره اللتى ظللت 
-على مسافه بعيده-
أنظر اليها 
دون ان أنتبه 
لانتهاء الحفل

من كتاب "تدريبات يوميه
للكاتب "محمد السيد اسماعيل

أدعوك



أدعوك و لا تأتى

أدعوك ...فما افعل أكثر من هذا؟

اليوم يمر..اللحظات تضيع و لا طائل

هل ينتظر الطائر الغريب على غصن أعوج كثير؟ 

العوده الى الاغصان عند الغروب تثير فى قلبى الحنين

طيور الحقل البيضاء تحتفل بعوده كل واحد  منها بضجه عظيمه

ادعوك..فلا تنظر فى جدران لا تحمل شيئا

لا تغلق نافذه تفتح عبر الارض الخضراء الممتده 

او عبر الارض الصفراء الممتده

او عبر سماء زرقاء بلا اخر او يعبرها الكروان الصائح فى الليل

لا تنظر نحو الجدران القاتمه بلا معنى

اعبرها...شق طريقا يفتح بابا فيها 

شق طريقا نحوى

هل تأتى ؟؟؟ 


 من روايه "رحله السمان"

للكاتبه / سحر توفيق



الجمعة، 27 أغسطس، 2010

الجبل الخامس..باولو كويلهو


"الجبل الخامس" تأليف : باولو كويلهو ...ياااااااااه حته روايه اقل ما يقال عنها انها تحفه فنيه حقيقيه.....ليها 3 ذكريات مهمه جدا لقلبى عززت جمالها فى دماغى :

الشراء : بدايه النسخه اللى معايا تبع "مكتبه الاسره" (ربنا يخليكى لينا يا ماما سوزان) فى 289 صفحه الصوره اللى فوق دى هى صوره حقيقيه من نسختى متصوره بموبيلى الكحيان .....الثمن بجد معرفش بس انا اشتريتها ب 4 جنيه لان الراجل الحرامى اللى بشترى منه بيغير السعر بالقلم الفلومستر فوق السعر و بما انه كتب 4 جنيه يبقى تمنها حوالى 3 جنيه مثلا ..الراجل بيفرش جنب محطه الاتوبيس اللى جنب الكليه و بالتالى يوم ما اركب الاتوبيس بلاقى نفسى دفعت اضعاف تمن التذكره بما انى وفرت شويه فى تمن الكتب المغريه اللى عند الراجل ده ...الراجل ده فيه عاده زفت بصراحه من النوع اللى بيتخنق لو قلبت فى الكتب يفضل يقولك هتشترى ولا بتتفرج و بالتالى بما انى عارفه اسلوبه بعمل حسابى انى لو وقفت عنه يبقى لازم اشترى اى حاجه و لو مش ناويه اشترى يبقى ماابصش احسن......يوم ما اشتريتها كان عندى اجتماع فى الراديو "ايوه انا معده و مذيعه برنامج تبع راديو الكليه" و يومها قالوا لى اسكتى يا دينا ده احمد المسلمانى مقدم برنامج "الطبعه الاولى" جاى البرنامج بتاعنا اما ايه اللى حصل فخيلها فى مدونه تانيه بقى لاحسن يومها كان يوم عجيييييييب و محتاج كلام كتير........

القراءه : اما قراءه القصه دى فبرضه ليها ذكريات جميله لانى قريتها فى رحله "الاقصر و اسوان" اللى كانت تبع الجامعه اللى كانت فى شهر 3 السنه دى فكانت بجد ممتعه و اكتر حاجه ممتعه فيها انها كانت تبع اتحاد الطلبه و كانت ب 150 جنيه فقط و لمده اسبوع كامل تستمتع فيه بجمال الاثار و الاكتر انك تكتشف عراقه القطارات فى مصر اللى كادت ان تفسد تلك الرحله الجميله ...و بالتحديد كان موقع قراءه الروايه فى رحله الاتوبيس من الاقصر لاسوان الرحله اللى استغرقت 4.5 ساعات كامله مع انى توقعت من كلمه الاقصر واسوان ان فرق المسافه ساعه على الاكثر مش انها رحله بالطول ده كله ...و كانت الفتره دى كفايه انى انتهى من "الجبل الخامس" و بصراحه قصرت السكه زى ما بيقولوا....اااااااااااااااااه كانت ايام جميله

المناقشه: و من كتر اعجابى بالكتاب ده اخترته انه يبقى كتابى فى نادى الكتاب اللى كل واحد بيختار كتاب يتكلم عنه و يشرحه للقاراء الاخريين و بالتالى تخرج عندك فكره عن 20 كتاب روعه....يومها بصيت لمكتبتى الصغبره اتأملها و اسأل نفسى هاختار ايه و لا ايه و كونى اختار "الجبل الخامس" من بين كل كتبى و رواياتى ده يدل على انى اتأثرت بشكل واضح بمحتواها و عجبنى اكيد...

القصه : الروايه بتتكلم عن النبى الصغير "ايليا" اللى بتبتدى القصه و هو مستخبى فى اسطبل و صديق لى و هما منتظرين الموت بأمر زوجه ملك البلاد اللى امرت بقتل كل الانبياء من بنى اسرائيل هما و اى حد مؤمن بالله ان لم يرجع و يعبد الهه بعل القصه بتدور فى عام 870 ق.م فى بلاد الشام عموما من فيفينا و فلسطين القصه بتدور عن الايمان بالله و اختباره اكتر من مره عشان الايمان الحقيقى يظهر و ينقى من الشوائب هى قصه الايمان بالله و حب الناس و تقبل القدر بحلوه و مره بطلوعه و نزوله و اننا ممكن نغير الواقع بالايمان و المجهود و التعب ويمكن احيانا بمأساه .....مش هاحكى القصه طبعا لانى مش من مشجعى حرق القصص عشان تقدر تقرا القصه و تستمتع بيها من غير ما اكون بوظت مفاجاتها الكثيره و بناءها الدرامى المحكم ....اما مؤلفها "باولو كويلهو" فده مؤلف "الخيمائى" الغنى عن التعريف المنطلق بسرعه الصاروخ فى التوزيع و الترجمه و الابداع

عموما ده الرابط لو حبيت تستمتع بالقصه الرائعه دى
http://www.4shared.com/file/45558874/9c2e9662/___.html


الأربعاء، 25 أغسطس، 2010

31 ثوره فبراير






"ثوره 31 فبراير" تأليف محمد شكرى طباعه دار "اكتب" ...كانت اول تجاربى الشرائيه  مع دار اكتب اللى عاده بيكتب لها كتاب شباب لاول مره بيكتبوا احيانا بيبقى عبط و احيانا بتبقى مواهب حقيقيه على الطريق ....الكتاب كان ب 10 جنيه و كان فى خصم فجبته ب 8 جنيه بس....شدنى فيه اسمه بصراحه اصل "ثوره 31 فبراير" اسم غريب قوى و حسيت انه هيبقى تحفه بس بصراحه مطلعش زى اللى فى خيالى اقصد انه طلع خفيف زياده عن اللزوم خاصه انه جه فى وقت كنت لسه مخلصه روايه"مدام بوفارى" القويه المؤثره...الفيلم بيتكلم عن ثوره قامت عن فكره طقت في دماغ عم خميس راجل غلبان بتاع عيش و نجحت و اتحققت الثوره واتغيرت البلد تماما يمكن للاحسن و يمكن للاوحش المهم عنصر التغيير نفسه طبعا كل ده فى نطاق كوميدى خفيف و ظريف و فيه خفه دم شديده ...دى مقتطفات منه : 




عناوين الصحف بعد الثورة
- مسئول بوزاره التربيه والتعليم :
..بمناسبه حلول يوم 31 فبراير تم الغاء مايسمي بالدروس الخصوصيه وفرضت عقوبه قد تصل الي الاعدام لكل من يضبط متلبسا وهو يمارس عمله كمدرس خصوصي..

-مظاهرات عديده قامت بها حركه ( مرايه) للمطالبه لالاتي:
توفير سي دي البوم بريتني سبيرز الجديد لكل مواطن
شامبو فعال ضد القشره
قرص فياجرا يومي من النوع الاصلي الاكسترا
-قررت وزارات التعليم والتضامن الاجتماعى والداخلية والرى التنسيق فيما بينهم.. حيثيذهب الفرد للتعلم في وزارات التربية والتعليم والتعليم العالى.. ثم يتخرج فيشحت في ذهب إلى وزارة التضامن الاجتماعى.. وعندما يواجه البطالة يتحول إلى إرهابىفتتلقفه وزارة الداخلية..وعندما يتم تظبيطه جوه أمن الدولة يخرج عشان يشرب من البحرعند وزارة الرى

-خسر النادى الأهلى للمرة التاسعة على التوالى في الدورى العام.. ومن المعروف أنالنادى الأهلى رغم خسارته مازال يتصدر الدورى بفارق 97 نقطة عن أقرب منافسيه وهونادى ........... مش فاكر اسمه .. هوه نادى بيلبس أبيض

-عمال الغزل والنسيج في قمه فرحهم بعد رفع اجورهم الي الضعف بدون مطالبتهم بذلك وبدون مظاهرات واعتصامات..
-فتح باب القروض من الصندوق الاجتماعي للشباب وتوفير أي قرض لأي شاب يصل الي 10 مليون دولار بدون وتسدد علي 100 سنه بالتقسيط المريح ..

-صرح السيد الوزير (تيييييييت) بانه سوف يتقدم باستقالته بعد غد لسياده رئيس الجمهوريه وذلك لانه لم يجد جديد يقدمه للشعب المصري
-يفتتح اليوم الدكتور ( تييييت) رئيس الوزراء مترو الانفاق الواصل بين الاسكندريه والسلوم بتكلفه 80 مليون جنيه فقط بدون علاوات ومصالح وسمسره


-اعلن وزير الاسكان والتعمير بانه قد تم بناء 100 مدينه سكنيه جديده للشباب باسعار رمزيه وبدون مقدم وبالتقسيط علي 40 سنه
-قامت الحكومه بتخفيض اسعار المنتجات البتروليه ولتعويض الفارق المادي قامت بزياده اسعار السجائر بنسبه 200 %

-في مدينة كفر شكر تم إكتشاف أبار مياة غازيه علي عمق 3 متر من مستوي سطح الأرض وإنشاء مصنع بجانبه وأطلق عليه أسم بيبسي شكرا ..

-بعد نجاح حمله وقفه مصريه للحد من الانجاب فقد تم انطلاق حمله قعده مصريه من اجل الانجاب لان الشعب بقي قليل فحت وبقينا هفيه في المجتمع الدولي..

 اعلانات مابعد الثورة

تعلن شركه بوهيا للتليفون المحمول عن طرحها لشريحه اليكترونيه توضع في دماغ المستخدم بدل من استخدام الهواتف ولو(عايز بوهيا روح لمايا )..

تعلن شركه باي بوينت لمستلزمات الشعر عن توصلها لتركيبه كيميائيه أطلقت عليها T.H تجعل شعر مستخدمها شبيها بشعر تامر حسني

لرجال الاعمال وهواة المنظرة:
- اشتري تليفون محمول ماركه بوهيا ليدل دلاله قويه علي انك غني ومتهمكش الفلوس
- مزود بمكبر صوت علشان كل الناس تسمع وتعرف انك معاك تليفون مجسم
- يشد البنات اليك
للبيع 5000 طن فجل ورور بضمان 3 سنوات

مطلوب سكرتيره شقراء الشعر خضراء العينين مسمسه الوجه صغيرة الانف ولا يشترط المؤهل..




د/سمير مكي زميل الاكاديميه الدوليه لجراحه التجميل-عضو الاكاديميه الامريكيه للتجميل- جمال تخصصنا
- حقن سليكون للجسم كله 120 الف جنيه مصري
- نفخ ارداف 10 الاف
- شفط ارداف 10 الاف
- شفط صدر 5 الاف
- نفخ صدر 5 الاف
- رفع صدر 7 الاف
- نفخ شفايف 30 جنيه بمنفاخ يدوي

 

اسئله ذكاء لطلبه ما بعد الثورة
  سمي ابو تريكه بهذا الاسم لأن : - عنده ابن اسمه تريكه - عنده ابن اسمه محمود - معندوش ولاد خالص
- جميع ما سبق


من هو بطل فيلم الشموع السوداء؟
- مانويل جوزيه
- محمد بركات
- شادي محمد
- صالح سليم


من هو بطل فيلم رد قلبي؟
- براد بيت
- براد واد
- براد شاي
- شكري سرحان


في اي بطوله فاز المنتخب الوطني علي البرازيل 12-0
- في كأس القارات
- في بطوله وديه
- في كأس العالم
- في المشمش

اكل العيش يحب
- الطعميه
- الملوخيه
- الخفيه
- جميع ماسبق


لاصحاب عربيات النقل فقط
متبصليش بعين رضيه دنا طلع عين امي في
- السعوديه
- الامارات العربية
- الجمهوريه الليبيه
- جميع ماسبق


مين أطلق الرصاص علي هند علام
- منظمه الهجرة والتكفير
- منظمه القاعده
- حركه طالبان
- نبيله عبيد



الحلوة اسمها تفاحه للسفرو....
- المناحه
- الصراحه
- السباحه
- السياحه



لماذا تشرق الشمس في القاهره قبل اسوان
- عشان القاهره عاصمه مصر
- تونس
- محمود المليجي
جميع ما سبق

أين تقع الشرابيه
- مصر
- امريكا
- بريطانيا
- الامارات


و جزء ل حظك اليوم الجديد و افلام ما بعد الثوره و تليفزيون ما بعد الثوره و كده يعنى....بصراحه لاقيته خفيف اكتر من اللزوم مع ان قماشه الفكره طويله و واسعه لكن المؤلف فضل ان

اسفه …ساتخلص منك!!!!




كم انا اسفه لفعلى هذا

لم اكن اتوقع ان افعل هذا بك فى يوم من الايام

لقد احببتك كما لم احب من قبل و لا من بعد

اذكر الان ايامنا الجميله معا

اذكر نظرات الناس وانا بصحبتك اعرف تلك النظرات جيدا

نعم اعرفها انها نظرات الحسد و الحقد

كنت جميلا قويا يافعا تملوئك القوه

كم اهتتمت بك حينها و وددت ان احملك بين ذرعى كالطفل فى مهده

كنا ثنائيا لا يقهر لا يتواجد فى مكان الا و انتزعت صيحات الاعجاب بنا

تفرغت لك و تركت حياتى لحمايتك و عنايتك من الشرور

اعذزثت بالله من عيونهم و اطلق الخمسات فى وجههم

كنت قويا انذاك فوقعت فى غرامك

اما الان فانا اكرهك..لما تستغرب نعم اكرهك

كنت قويا فاصبحت ضعيفا

كنت تنتزع نظرات الاعجاب فتحولت لنظرات الشفقه

اصبحنا ثنائيا غير لافت للانظار كما كنا

كلما يرانا الناس ينهالوا عليا بالنصائح لتعود كما كنت

لما اتحمل كل هذا الهم وحدى وانت غير عابئ

نعم سأتخلص منك ..ترددت كثيرا لكنى عزمت

قررت ان تنتهى من حياتى ..قررت ان تختفى

عزيز انت علىّ فلا استطيع فعلها بنفسى

قررت ان تكون بيد غيرى و ليست يدى

نعم انه هذا القاتل المأجور دفعت له و اتفقت معه

سأدفع له مالا لاتخلص منك

هل كنت تتخيل تلك النهايه البائسه لعلاقتنا الورديه

لن اهتم اين تذهب بعد ان تنتزع منى

فليدفنوك …او يرمونك …او ليحرقوك اذا شائوا

ها هو القاتل المأجور يقترب منك امام عينى

ها هى اداته الحديديه الامعه الحاده تقرب منك وتنزع روحك

قل عنى خائنه او جبانه او ما تشاء لكنى عزمت و لن استطيع التراجع الان

لماذا انت مستسلم هكذا؟؟؟!!!!

لماذا لا تتوسل او تطلب الصفح لتنجو بحياتك

هاهو جلادى ينفذ بك حكمى عادل كان ام لا…من يهتم؟؟؟

ادير ظهرى للجلاد فلا استطيع روئيتك تنتهى

ها انت تنفصل عنى الى الابد

ها انت تسقط على الارض خائر القوى منزوع الروح

لماذا لا ابكيك ؟؟!!.. لماذا انا قاسية القلب عليك ؟؟!!

اكتفي بنظراتي .. نظرات الشفقه ؟؟ نظرات الكره ؟؟

 لا بل نظرات الوداع الاخيره ……

وداعا يا……….

*

*

*

*

*

*

*

*

*

*

*

*

*

*

*

يا شعرى الحبيب….

الثلاثاء، 24 أغسطس، 2010

اعذرينى ومخاوف اخرى








"اعذرينى و مخارف اخرى" : الكتب تبع دار "اكتب" تمنه 15 جنيه فى طباعه جيده ...و بما انى مش معقول ادفع مبلغ زى ده فى كتاب لناس مش مشهورين فبالتالى وصول الكتاب لايدى ماكنش بطريق الشراء...بل وصل كهديه عيد ميلاد لاختى الصغيره من احد اصدقائها المهتمين بالقراءه وبما انها مش متهمه بالقراءه قوى وبالتالى كعادتى مع الكتب برشطت على الكتاب فورا "برشطت جايه من برشوط لو حد ابن ناس قوى يعنى ومش عارف معنها" ابتديت فيها فى مصيف رأس البر السنه دى يعنى من 10 ايام كده و خلصت فى اليوم التالى ..استمتعت بيها لحد ما و ان كانت مش عبقريه ...




 تأليف مجموعه من الشباب بيدور عن قصص الرعب فى قصص قصيره متفاوته المستوى بعضها ممتاز بعضها جيد و بعضها متوسط المستوى و البعض شديد السذاجه .....هاكتب اسم كل قصه فيهم ورأيى فيها :


ملحوظه هامه : طبعا ده رأيى الخاص  كنوع من الانطباع الاول ..مش هاحكى اى قصه عشان لو حبيت تقرأها تبقى لسه مش محروقه و تقدر تقرأها براحتك و لو حد قراها وحب يعلق يتفضل :




1- اعذرينى


تأليف : الشيماء السيوفى


* تنافس على لقب افضل قصص الكتاب من حيث المحتوى  و تفوز فى المركز الاول فى طولها حوالى 57 صفحه و ان كانت جيده الحبكه مرتفعه المستوى ببناء درامى جميل  الا ان بصراحه عنوانها كشفها ليا من اول صفحه و للاسف توقعى طلع صح بمعنى ان النهايه طلعت زى اللى فى دماغى و ده غلط طبعا فى قصص الرعب اللى لازم تكون نهايتها مفأجاه للقارئ فيطلق تلك الشهقه اللى بتدل على المفاجأه  بعد قرأتها الا ان للاسف ل تنتزع  "الشيماء السيوفى" على تلك الشهقه منى .....اديلها 9 من عشره


2- ضيوف المقابر
تأليف :حسن الجندى
* بتدور فى 22 صفحه... بدايه جيده ونهايه متوقعه بقوه ...ده ملخص القصه دى نسخه مطوره شويه من فيلم "the others " بتاع نيكول كديمان...توقعت النهايه فى رابع صفحه و للاسف برضه طلعت صح و لم تزل تلك الشهقه محشوره فى حلقى و لم تطلع ....مع نهايتها العاديه للغايه و حيلها المكشوفه الى حد ما اديلها فقط 7 من عشره


3- حدث ليلا
تأليف :علاء محمود
* بتدور فى 18 صفحه....جو غير مصرى على الاطلاق من برد و رعد و مطر و مكنش فاضل غير التلج بصراحه طب ازاى و مصر مكتوب عليها الصيف طول السنه  و كل الخلق عارفه و اللى ميشفوفش كده يبقى زى اللى قال عليهم سمير صبرى فى فيلم فى الصيف لازم نحب  " يبقى قلبه مش طبيعى مش طبيعى " ...دى الاجواء اما الاحداث فقديمه طحن من جو افلام الخمسينات العربى زى سفير جنهم بتاع يوسف وهبى ...اما النهايه فصدمه بصراحه بس للاسف مش صدمه بالمعنى المطلوب تقدر تقول كده صدمه أسف على قصه جيده استعجل عليها مؤلفها ونهاها نهايه مبتوره عاديه و منطقيه زياده عن اللزوم فى نوع من القصص يجب ان يخرج عن المطق....6.5 من عشره


4- كانت تعرف
تأليف :اسماعيل خالد وهدان
* بتدور فى 10 صفحات بس...لما قريتها اعجبت بيها لان بطلها طفل و عجبنى قوى ان مؤلفها و هو اكيد كبير عرف يعبر عن نفسيه الطفل و طريقه تفكيره بعد فتره اكتشفت ان مؤلف تلك القصه من مواليد 1996 يعنى عنده 14 سنه بس و ده عجبنى اكتر هى صحيح من قصه مبهره بس مكتوبه حلو و فيها فكره عجبتنى ....نظرا لصغر سن المؤلف و جودتها النسبيه اديلها 8.5 من عشره


5- العجوز
تأليف : هبه الله محمد محسن
* بتدور فى 5 صفحات بس ...نهايه جيده لبدايه جيده ...وصف المؤلفه فى المطاردات دخلك جوه الاحداث بصوره جيده هى صحيح فكرتها مش بتعتمد على المفأجاه لكن دخولك فى خوف البطل كافى لاخافتك ...قد لا تكون اعظم قصص الكتاب لكنها جيده ...اديلها 8 على عشره
  
6- بيت قديم
تأليف : هبه الله محمد محسن برضه
* بتدور فى  9 صفحات ...القصه دى بقى بتعتمد على عنصر المفاجأه و بما ان المفاجأه متوقعه فالقصه نزلت فى مستواها كتير...اسمها عادى كان المفروض يبقى الاسم مثير عن كده شويه ...اديلها 7 من عشره


7- تحرر
تأليف : حنان عبد الغفار
* بتدور فى 4 صفحات....قصه محبوكه و جميله عجبتنى بشكل شخصى عنصر المفأجاه متوفر و ان كانت احداثها مش مقعنعه شويه ...اديلها 7.5 من عشره


8-  سر الورقه الحمراء
تأليف :  محمد الدواخلى
* بتدور فى 7 صفحات ...اكتر قصه عجبتنى فى الكتاب كله فيها شغل عالى و مبذول فيها جهد واضح من المؤلف اللى اكد ان التمهيد للاحداث قد يكون اهم من الاحداث ذاتها خاصه وان اخبرتك ان احدثها الفعليه تدور فى اخر صفحتين فقط و ال 5 صفحات الاولى تمهيد للاحداث يجعلك تشعر بحقيقه مخاوفك و انها مأرخه فى الكتب محفوظه حقيقيه من لحم و دم اعترف انها اخافتنى فعلا الى حدا ما ...تنافس بقوه على لقب افضل قصص الكتاب بتقييم 9.5 من عشره


9- صفير الشيطان
تأليف : حسن الجندى مؤلف القصه ال 2 "ضيوف المقابر"
*بتدور فى 9 صفحات...قصه فوق المتوسط احداثها محبوكه نوعا ما جيده المستوى فيها اثاره وتشويق و تفاصيلها بارزه وضحه توحى انها مكتوبه بضمير ...اديلها 8 من عشره


10- بو جلود
تأليف : عبد العزيز ميراث
* بتدور فى 10 صفحات...جو غير مصرى يعتمد على جو الهلاوين اللى مش موجود فى مصر و اقحمه المؤلف عنوه فى الحاره المصريه...نهايه جيده  و لم تعجبنى بصراحه فيها اثاره بس مش عبقريه يعنى...اديلها 7.5 من عشره


11- مجرد بيت
تأليف : ايمان اسامه القوصى
* بتدور فى 12 صفحه ....فى الكتاب اكتر من قصه عن بيوت قديمه لكن دى افضلهم و احسنهم نهايتها هو ما اعجبنى بها حسيت انه دغدغ دماغى و عجبتى الفكره جدا...تنافس بسبب نهايتها الجميله اللى تعتبر النهايه اللى مجتش على بالى على  لقب افضل قصه لهذا الكتاب بتقييم 9 من عشره.....


12-  حكايه زواج
تأليف : محمد الدوخلى مؤلف الورقه الحمراء رقم  8
*  بتدور فى 21 صفحه..قصه هايله فعلا محبوكه و واسعه الخيوط الدراميه ممتعه تحيرك طول القصه لغرابه احداثها ثم تضع لك النقط فوق الحروف اخر صفحه فتبهرك و تعجبك و نالت دهشتى الغاليه عليا ...نالت 9.5 من عشره


13- أرض الظلال
تأليف : دعاء منير
* بتدور احدثها فى 11 صفحه...غير ممتعه مصتنعه و مقلده هو ده رد فعلى الاول عن القصه دى حتى الاسماء امريكيه الصنعه امثال "اليكس" و "روز" و "ال" ..تحس انها فيلم امريكانى هابط من اللى بنتفرج عليهم اللى بيفضل الابطال يصوتوا فيه بلا داعى ...من الاخر مختوم عليها made in america ...مما يعيطيها 6.5 من عشره


14- حكايات ليليه
تأليف : عبد العزيز ابو ميراث مؤلف بو جلود رقم 10
* مجموعه قصص قصيره الواحده لا تتعدى الصفحه او الصفحتين مجموعهم 6 قصص فى 12 صفحه ...افضلهم اخرهم و فى المجموع كده تاخد 7.5 من عشره


15- رائحه الدماء
تأليف : مدحت على شراب
* 12 صفحه...امريكيه الصنع معرّبه بشكل غير متقن باين انها متقيفه على الجو المصرى ...من الاخر فيلم اجنبى باسامى مصريه...7 من عشره


16- الساحره
تأليف : رانيا محمد حسن سليم
*5 صفحات...مفاجأه متوقعه فى قصه مبنيه على حتميه المفأجاه و بالتالى فقدت محتواها سريعا ...7 من عشره


17-  وحوش مدينتنا
تأليف :اسماعيل خالد وهدان ذو ال 14 ربيعا
*3 صفحات.... اخر قصص الكتاب للاسف مش على مستوى "كانت تعرف" فباتت سذاجه  واضحه مكشوفه...6.5 من عشره.


فى رأيى افضل المؤلفين هو "محمد الدواخلى" صاحب "حكايه زواج" و "سر الورقه الحمراء" و يعد مكسب هذا الكتاب اللى بيضم مواهب جديده بتتلمس طريقها ....


الأحد، 22 أغسطس، 2010

يا طالع الشجره و علامات التعجب و الاستفهام



يا طالع الشجره
هات لى معاك بقره
تحلب وتسقينى 
بالمعلقه الصينى......
؟؟؟؟؟؟؟؟؟؟؟؟؟؟


يعنى ايه؟؟؟؟  ماخدتش بالى ابدا من غرابه الاغنيه دى غير لما سمعت عن مسرحيه توفيق الحكيم "ياطالع الشجره" .....
يا طالع الشجر......ماشى اوكى حد طالع شجره
هات لى معاك بقره...ايه؟؟؟؟ و هيجيب البقر ده ان شاء الله هو البقر بيطرح على الفروع!!!!!
تحلب وتسيقنى....يعنى البقره اللى هنجيبها من على الشجره هتحلب نفسها وكمان تسقيك!!!!
بالمعلقه الصينى.....يا سلام على القلاطه!!!!
الاغنيه من تراث الاغانى الشعبيه فى الفلاحين و الاطفال على الرغم من غرابتها الا انها انتشرت واشتهرت و محدش فكر فى تفاصيلها و اللى فكر ماهتمش انه مش فاهم وان اصلا المعنى مش موجود.....
كل ده تحليل فى الاسم بس فما بالك بتلك المسرحيه غريبه التكوين ...عجيبه الاحداث....متشابكه التفكير..... 

الكتاب نفسه طباعه "مكتبه مصر " عدد صفحاته 187 صفحه و كان تمنها 4.5 جنيه ...طبعا فى طبعات تانيه اظن من دار الشروق  على ما اظن بس طبعه افضل و كالعاده اغلى بس احنا يعنى هنعمل ايه بالكتاب بعد ما نقراها يعنى هناكله؟؟؟ ....
اشتريتها فى رحله لرأس البر من سنتين و طبعا اخدت كلمتين فى عضمى زى كل مره من اول "احنا جايين مصيف عشان تدفنى وشك فى الكتاب؟؟؟" لاحد " كفايه شرا كتب بقى حرام عليكى الدولاب هيقع" ...لكن كالعاده شيلتها كالطفل بين راحتى امه و لروحت بيها للشقه المصيف لاقضى معاها اعجب الاوقات!!!!

المسرحيه شبيه باعمال بيكاسو بشكل الرسم التكعيبى...انت فاهم و مش فاهم...حاسس بس مدرك...عقلك بيلف و بيحاول ملآ الفراغات فلا يستطيع فيظل فى حاله صيحان و نشاط  و انتباه... تبدأ بلا نهايه و هى ايضا لا تنتهى....كأنك بين الصيحان و النوم....بيقوم بدور عقلك النابه شخصيه المفتش اللى بيحول يفهم ما لا يفهم .....اما دور السحليه فبجد مش عارفه ترمز لايه او فى الاصل هل ترمز اصلا؟؟؟...فهمت مفهمتش مش هى دى المعضله فالمسرح بالنوعيه دى عاده ما يدغدغ العقول زى اشهر مسرحيات هذا النوع "فى انتظار جودو" اللى يكثر عنها الكلام واثرت فى تفكيرى تأثير ليس بالقليل....عموما الحياه مش منقسه ومظبطه قوى يعنى زى المسرحيات التقليديه فلا يوجد للحياه بدايه و وسط ونهايه و لا قفزات دراميه ها هو توفيق الحكيم يضرب العقل عرض الحائط و يبقيك كقارئ او مشاهد فى حيره ...

يكفينى ان انقل منها اول جزء اللى بيعرض فيه المؤلف الديكور و شكل المسرح "على لسان توفيق الحكيم" :
"لا توجد مناظر فى هذه المسرحيه ..و لا توجد فواصل بين الازمنه و الامكنه..فالماضى والحاضر والمستقبل احيانا توجد كلها فى نفس الوقت..و الشخص الواحد يوجد فى مكانين على المسرح و يتكلم بنفس صوته مرتين فى نفس الوقت.كل شئ هنا متداخل و لا يوجد اثاث ثابت ..كل شخص فى المسرحيه يظهر حاملا بيده اثاثه و لوزامه و يخرج بها بعد الانتهاء منها..و هكذا يظهر ضابط المباحث او الشرطه "المحقق" حاملا بيمينه كرسى وملفه..و تظهر خلفه "الخادم العجوز" تحمل منضده خفيفه تضعها امامه فينشر عليها اوراقه" 


 عاده الجزء ده بيبقى مخصص لعرض شكل المسرح و الخطوط العريضه لشغل المخرج ...و لكن ها نحن نجد الفلسفه نفسها فى مكان عاده ما يكون شديد العمليه والتحديد...بصراحه اشفق على اى مخرج يقرر اخراج المسرحيه دى  لانه لو حب يخليها منطقيه عشان تتخرج هتدمر بين ايديه فهى كالبلوره شديده الحساسيه وغير قابله للتعديل...ها هو توفيق الحكيم يضع العراقيل امام المخرج من اول حرف فى المسرحيه فكيف يكون الممثل فى مكانين بنفس الوقت و كيف يوصل مفهوم الزمن المتداخل للمشاهد العادى....

ده جزء من حوار الكتاب يبين وجهه نظر المؤلف و حيره القارئ:

 يسأل المحقق الزوج: ألم تقل الآن أنك دفنتها تحت هذه الشجرة بعد أن قتلتها؟.
فيقول الزوج: لقد تحدثت عن الدفن.. ولكن لم أتحدث عن القتل. 
المحقق: تقصد أنك دفنتها ولكنك لم تقتلها!.
الزوج: لم أقتلها!.
المحقق: ولكنك دفنتها!!.
الزوج: هذه مسألة أخرى بيني وبينها، ولكنني لم أقتلها!.
المحقق: ومن الذي قتلها؟.
الزوج: أهي قُتلت؟!.
المحقق: أنت أدرى، مادامت قد دُفنت!.
الزوج: أهي حقا دُفنت؟!.
  

 و تبقى علامتى الاستفهام و التعجب هما بطلان تلك المسرحيه؟؟؟؟؟؟؟؟!!!!!!!!!

!


السبت، 21 أغسطس، 2010

المخططين



المخططين "مسرحيه" تأليف يوسف ادريس  ظروف شرائها و قرائتها الاتنين ظروف استثنائيه ...
الشراء جه فى معرض للكتب تبع احد اسر الكليه اظن معرض "الصفوه" يومها كنت لسه شاريه شنط كتب و مكنتش ناويه اشترى حاجه خالص مهما بلغت المغريات و قلت ادخل مع اصحابى المعرض عشان ابين لهم قوه جأشى و تحملى للاغراء و ازاى هامسك نفسى و اترهنوا صحابى انى هاشترى  وانا اضحك من انهم هيخسروا الرهان.....
ودخلت الجنه المعوده نظرا لان اى مكان يحوى كتب سواء بيع وشراء او مكتبه يبقى هو الجنه على الارض طبعا و قلبت فى الكتب بمختلف اشكالها و انواعها و بقين على الشمال و لاقيت جزء "مكتبه مصر جوده السحار شركاه" تتميز دار النشر دى اسعارها الحلوه و محتوى روايتها و خاصه انها انها بتحوى روايات الكتاب الكبار يعنى نجيب محفوظ ..يوسف ادريس...يوسف السباعى...يوسف ادريس..المنفالوطى كده يعنى.....و طبعا فى ثوانى وقبل ما احس لقين نفسى اشتريت 4 كتب من بينهم مسرحيه "المخططين"


هى صغيره قوى حوالى 112 صفحه بس  و كانت ب 2 جنيه....قرتها كلها فى الاتوبيس فى رحله بين القاهره والاسكندريه تبع الكليه كانت اول مره اروح اسكندريه... بتتكلم عن مجموعه من البشر قرروا انهم يغيروا العالم كله لان احوالهم مش عجبهم و شكل التغيير هو ان يلبس جميع الناس فى كل العالم الملابس المخططه بالابيض والاسود و القضاء على باقى الالوان جميعا و اى نقشه غير المخطط  ...و بالفعل يستطيع رئيس المجموعه بالتعاون مع فريقه الى فرض النظام الجديد على الكون ...و يخضع العالم كله لهذا الرئيس...فاذا به فى عز اوجه يقرر ان النظام ده غير مفيد و انه قرر ان العالم يرجع زى ما كان ...وطبعا مجموعته اللى بقوا رؤساء وزعماء بقاع الارض يرفضوا انهم يتنازلوا عن كل السلطه دى و يتضح انهم قاموا بما قاموا بيه للسلطه مش لخدمه العالم زى ما قالوا ....و يتأمروا على رئيسهم و يقدروا يستبعدوه و يعينوا واحد مكانه.......


المسرحيه جزء من مسرح يوسف ادريس العجيب فهو اميل للامعقول و مسرح العبث و الفكر الفلسفى و دى نكهه يوسف ادريس المميزه مسرحيا اللى اشتهر بيها فى مسرحيات تانيه وطبعا اروعهم و احبهم الى قلبى "الفرافير " اللى هاتدولها بالبحث لكن فى تدوينه تانيه لانها موضوع كبير بجد....بيقولوا انها رمزيه سياسيه "ونشر في 1969 المخططين منتقداً فيها نظام عبد الناصر ومنعت المسرحية" 
يكفى انك تعرف اسماء الشخصيات وانت تقدر مقدار غرابه وفلسفيه المسرحيه "الترتيب ده حسب الظهور" :
1- اهو كلام
2-فركه كعب
3-الجنيه
4-دكتور ع الريق
5- 56 غربيه
6-طعميه
7-الاخ
8- ر.م.ا
9- ألماظ


اسماء غريبه صح؟؟؟ اما رئيس المجموعه فهو "الاخ" ....

ملك الغرفه المظلمه



تانى كتاب اقراه لطاغور بعد "البيت و العالم" بس المره دى مسرحيه اسمها "ملك الغرفه المظلمه" برضه صادره من هيئه قصور الثقافه فى سلسله افاق عالميه فى نسخه انيقه ب 2 جنيه فى 149 صفحه بغلاف اسود بنقوش صفراء و الصوره اللى فوق دى من نسختى بموبايلى الكحيان اللى على قده خالص....شدنى فيه مؤلفه طبعا اللى قريتله قبل كده و عجبنى جدا و اثر فيا لفتره ليست بالقليله.....و فى اول الكتاب منكرش حسيت بملل شويه بسبب ان لغايه الصفحه ال 60 مثلا ماكنتش الاحداث اتحركت قيد انمله و طوال ال 60 صفحه مجرد عرض للشخصيات وجو  القصه العام....لكن بصراحه من اول الصفحه ال 80 كده ابتديت الاحداث تسخن الى حدا ما و تتطور الدراما سنه....الروايه بتتكلم عن بلد الملك بتاعها عمر ما حد فى البلد شاف وشه و لا حتى الملكه لانها بتقابله فى غرفه مظلمه بحيث متشفش وشه ابدا....المسرحيه رمزيه بشكل كبير يعنى ممكن تحط مكان الملك اى حاجه  و اى وصف تحبه او تتخيله بس هى فى الاصل -وده حسب المقدمه- ترمز لاله من الهه الهند ...بصراحه اكتر بما انى بكتب فى مدونتى يعنى البيت بيتى المسرحيه على الرغم من جودتها الا انها ممزجتنيش بمعنى انها رمزيه زياده عن اللزوم و ده خلانى افضل عليها عمل طاغور الاول بالنسبه لى "البيت و العالم" ....اما المزاج فانى بعد ما اخلص الكتاب يحصل لى حاله block لفتره مرضاش اقرا فيه حاجه تانيه عشان اعيش تأثير الكتاب اما فى الكتاب ده فقفلت الكتاب من هنا و قمت ادور على غيره من هنا ........

رفايع مش اكتر

تفلسف (2) ..الزمن؟؟؟!!





Who will buy
This wonderful morning?
Such a sky
You never did see
Who will tie
It up with a ribbon
And put it in a box for me?
So I could see it at my leisure
Whenever things go wrong
And I would keep it as a treasure
To last my whole life long.


Who will buy
This wonderful feeling?
I'm so high
I swear I could fly. 
 Me, oh my!
I don't want to lose it
So what am I to do
To keep the sky so blue?
There must be someone who will buy...


There'll never be a day so sunny,
It could not happen twice.
Where is the man with all the money?
It's cheap at half the price!

.???who will buy

الزمن؟؟؟؟!!!!!!.... هل هو فعلا وحدات معروفه محسوبه بدقه زى نظره رجال الاعمال و المنشغلين بماديه الاشياء؟؟؟ هل فعلا "الوقت من ذهب" و "الوقت كالسيف ان لم تقطعه قطعك" و " الوقت هو المال" ...هل هو فى الصوره الجامده الصريحه المريحه دى؟؟؟

الزمن؟؟؟؟!!!!!....هل هو فعلا شئ نسبى غير محسوس متفاوت التأثير زى نظره الفلسفه و المحبين و المنشغلين بأمور الروح و القلب ؟؟ هل "ساعه بقرب الحبيب احلى امل فى الحياه" و "غدا لنظره لقريب" و "الاوقات الحلوه بتخلص بسرعه " و "ساعه الانتظار دهر" يعنى وحدات غير متسويه ....هل فعلا الاوقات و الزمن بيتأثر بحالتك النفسيه و مدى ساعدتك او تعستك فيها....

الزمن؟؟؟!!!! هل ممكن يقف؟؟ هل نستطيع ان نفرمل عجلاته قبل ان تدهم سعادتنا و لحظاتنا ؟؟؟ ....هل ممكن نجمد الصوره للحظات ...هل ممكن نعمل زى الاغنيه اللى فوق و نشتريه ؟؟ نشترى لحظاتنا الحلوه و نحطها فى علبه و نلفها بقوس قزح زى ما الشاعر قال عشان نرجعلها لما الامور تسوء ....

الزمن؟؟؟؟!!!! هل تستطيع الكاميرات ان تهزمه فى عقر داره؟؟ امال يعنى اخترعنا الكاميرات ليه مش عشان نقدر نجمد الصوره و ننقذها من الاعيب الوقت و تغيير الاحوال و المشاعر او زى ما عبر عنها ال ABBA

Slipping through my fingers all the time
I try to capture every minute
The feeling in it
Slipping through my fingers all the time
Do I really see what's in her mind
Each time I think I'm close to knowing
She keeps on growing
Slipping through my fingers all the time
Sometimes I wish that I could freeze the picture
And save it from the funny tricks of time
    Slipping through my fingers all the time


الزمن؟؟؟!!!! بساطته و وضوحه هو ما حير البشريه...فهو يمضى بلا رجوع بلا وقفه بلا تغيير فى السرعه مجرد يمضى فى اتجاه واحد للامام بمعدل ثابت لا يحيد عنه...فلما نلومه اذا كانت دى وظيفته الابديه التى لا يستطيع تغييرها و لا حتى تعديلها.....نألف افلام عجله الزمن بقى ...نكتب ونتخيل و يمكن كمان نحاول و يستمر فى نظرته لنا و يمضى بنا و بكل من حاول فى نفس الاتجاه بنفس السرعه....ثوانى ف دقائق ف ساعات ف ايام ف شهور ف سنين ف عقود ف قرون ف الفيه كما هو لا يتبدل و لا يتحول ....حتى معجزات الانبياء لم تطوله و لا تمسه و لا تغير من معدله الثابت

و يبقى السؤال هل يستطيع الاستنثاء لى هذه المره فقط؟؟؟


مجرد رفايع.....