الثلاثاء، 31 أغسطس، 2010

علبه الوان .."4" الاصفر


اللون الاصفر!!!!...لون الانطلاق و الشباب مين يقدر يحبه ويقدره غير الشباب بالتاكيد عمرك شفت فوق الاربعين يلبس او يحب او حتى يقتنى اللون الاصفر فى حاجاته الشخصيه...اللون الاصفر هو انك تخرج مع صحابك من غير ما تعرف انتوا رايحين فين و لما تقرروا انتوا رايحين فين  من غير ما تعرفوا السكه وهنا تبدأ متعه من نوع اخر انك تسأل الرايح والجاى فين الطريق ؟؟ بعضهم  يبص لك من فوق لتحت و يقولك الطريق و بعضهم يبقى عارف ويستعبط و بعضهم يدلك غلط جهلا او غيظا فى هؤلاء الشباب المنطلق على غير هدى تتقبل الاهانه او الجهل بضحكه تنور قلبك و تحرق قلب اعدائك ...اللون الاصفر يعنى تخلص متعه خروجك مع صحابك وتكتشف انك واقف فى وسط الشارع و مش عارف تروح و الغريب انك بتضحك وسط ده كله لان المتعه متعه كسر التقليدى مش الخروج فى حد ذاته ...اللون الاصفر هو اللون اللى لما البسه فى الشارع الاقى الدنيا منوره و الكون يطل فاتح ثغره مبتسما سعيد لسعادتى هو اللون اللى تلبسه تلاقى الناس بتبص لك يحسدوك لانك رايق و فايق و لابس فاتح فى عز تراب القاهره تبص لده كله و من جواك تطلع لهم لسانك انهم حاقدين من جرأتك و شبابك ...اللون الاصفر يعنى لون جاره القمر فيروز المفضل و لونى المفضل انا كمان ...اللون الاصفر هو اللون اللى لما تكتسف انك تلبسه او تقتنى حاجات بلونه تعرف انك كبرت فى السن و انك دخلت مرحله تانيه تحولت فيها للكحلى للاسف...اللون الاصفر يعنى لون الشمس الصبيه اللى عمرها ملايين السنين و لسه فتيه لا تتحرج من نظرات الناس و لا تتاخر عن معادها ..... اللون الاصفر مش لون الحقد و الغل زى ما الناس بتقول بالعكس هو لون الحياه نفسها لما تبتهج




4 التعليقات:

محمد حويحي يقول...

اللون الأصفر هو اللون اللي بيخلي العينين تزغلل واليمين تركب شمال والشمال تحضن في اليمين بعد ما تقرأ المرافعة دي .. فتقتنع أنه لا بديل عن الكحلي

د/دودى يقول...

ههههههه...ايه اللى فكرك بالتدوينه دى ؟؟ دى قديمه شويه بس بصراحه هو لونى المفضل فعلا

محمد حويحي يقول...

كنت بقلب .. ضرية حظ وجت في اللون ده وانا عيني مزغلله وحدها

د/دودى يقول...

اول مره اخد بالى انا كمان عينيا زغللت

إرسال تعليق

حلو؟؟ وحش؟؟ طب ساكت ليه ما تقول....