الخميس، 19 أغسطس 2010

ثلاثيه غرناطه









انتهيت من نص ساعه بالظبط من روايه "ثلاثيه غرناطه" ل  رضوى عاشور ....قبل ما ابتدى فيها حبيت اقرا تعليقات ذو الخبره من الكتاب الكبار عشان اشوف هل تستاهل ولا ابدء فى الكتب المتلتله اللى اشتريتها ولسه مقرتش حاجه فيها و قريت عنها كلام كتير رائع اكتشفت بعد ما خلصتها انه اقل مما يوفى حقها...و لاقيت نفسى سايبه كل الكتب الممسوكه فى ايدى واتجهت رأسا للنت احملها بصيغه ال pdf اللى بتتعب عيني وتخيلنى مشدوهه و مشدوده قدام الشاشه و انتهيت منها فى وقت قياسى مقداره يومين و نص فقط مع ان الكتاب عدد صفحاته 504 صفحه كامله مكمله ......اما ليه pdf و مشترتش الكتاب فده موضوع تانى فى حمله مقاطعاتى لدار الشروق نظرا لغلو اسعارها و جمال كتبها مما يسبب لى الضغط كل ما اعدى عليها...


اما ايه هى الروايه اللى عملت فيا ده كله وليه؟؟؟ فاجيب بلا شك انها احد اروع واجمل ما قرأت من روايات ...تشابه فى بناءه الدرامى رائعه ماركيز "100 عام من العزله" اما فى محتواها فلا يضاهيها شيئا مما قرأت من كشف لمرحله غامضه من التاريخ كانت بقعه عميا بالنسبه لى و دايما كنت بتسأل "هى الاندلس دى فقدت اسلامها ببساطه كده؟؟؟نسيوا 700 سنه فى لحظه؟؟" و جاءت الاجابه فى تلك الروايه الممتعه بما بها من شجون و قهر لابطال الروايه بلا استثناء فاجيالها جميعا اما تموت قهرا او كمدا .....اجزائها الثلاثه منفصله متصله تجعلك تتنهد بعد كل جزء على مصير تلك العائله البائسه بينما تتلاطم الامواج على حاضرها و ماضيها و مستقبلها....
اجمل ما اسعدنى هو ان مؤلفتها "رضوى عاشور" اثبتت ان حواء قادره على الكتابه و منافسه الكبار بل و التفوق... 


اكثر ما اعجبنى من تعليقات هو تعليق د/ جابر عصفور
"غرناطة رواية المقموعين حيث يصبح مجرد البقاء على قيد الحياة بطولة في عالم عدواني يقمع تاريخاً كاملا"ً ...

و تعليق فريدة النقاش 
"حين ينتهى المرء من قراءة غرناطة لابد أن تعتريه قشعريرة في الروح".....

احب اوجهه رسالتى ل د/ فريده النقاس واطمنها واقولها الامانه وصلت و قشعريره الروح جت بالسلامه 

ده رابط الكتاب للى اشتاق للروايه من كلامى
 http://www.4shared.com/file/52287980/a9e2fecc/___online.html?dirPwdVerified=c567dd4b

3 التعليقات:

غير معرف يقول...

أنا لسا بادئ في الرواية دي
وشكلها جميلة فعلا
كان نفسي من زمان ألاقي حاجة بتكلم عن الأندلس
والحمد لله لاقيتها
كلامك شوقني أكتر ليها
كله يوسع بقا ^_^

ع الهامش : مدونتك بسيطة وجميلة جدااااا وان شاء الله متكونش آخر زيــارة :)

حسن محمد محمد يقول...

مدونة رائعة يا دكتور ... بالتوفيق دائماً
تحياتي
حسن محمد

د/دودى يقول...

اتشرف بزيارتكم لاول مره للبلوج واتمنى ما تكونش الاخيره

إرسال تعليق

حلو؟؟ وحش؟؟ طب ساكت ليه ما تقول....