السبت، 30 نوفمبر 2013

حوليات152:الاوله للنبى

-ماما: امتحانك الجاى امتى؟

-انا: هو انتى لسه محفظتيش الجدول بتاعى؟ ده انا قلته يجى 30 مره! 

-ماما: انا عارفلك بقى؟ ما انتى بتمتحنى كل يوم بقالك 100 سنه

-انا:  ايه الذل ده؟....عموما الامتحان الجاى يوم الاربع و بعدين ناخد ريست 14 يوم و نبدأ نسا بقى اول امتحان يوم..

-ماما: "مقاطعة" ايه الصداع ده كله؟؟ الامتحان الجاى امتى و اخر امتحان امتى بلاش رغى

-انا: اللى جاى يوم الاربع و اخر واحد يوم 24 ديسمبر

-ماما: "فى فرحه" و بعد 24 ديسمبر؟؟

-انا: يبقى خلاص 

-ماما: يااااه ...قول لى يا دينا , اتعلمتى ايه فى ال7 سنين دول

-انا: "تنهيدة" بص يا ماما....الاولة للنبي. والتانيه ايوب. والتالته غربتي. والرابعه المكتوب. والخامسه اللي افترى حتما يبات مغلوب

-ماما: يااه اتعلمتى ان العدل موجود فى الدنيا؟

-انا: "فى غلاسة مطلقة" لا حفظت قصيدة احمد فؤاد نجم اللى قلت لك حته منها دى , و دى تقريبا الحاجه الوحيدة العدله اللى عملتها فى سنين الكلية السبع

الجمعة، 29 نوفمبر 2013

حوليات151: النور قطع جه هيييه


الساعه 2:05
النور قطع

-انا: يوووووووووه اللاب فصل كنت بكتب استايوس و اتقطع
-ماما: كفاية نت ارحمى نفسك
-انا: طب و اعمل ايه و النور قاطع

الساعه 2:06
النور جه

-انا: هييييييييييييييه النور جه النور جه
-ماما: يا عيلة

الساعه 2:10
النور قطع

-انا: اووووف الله يخرب بيتك يا سيس...
-ماما: ايه؟؟؟ يخرب بيت يا مين يا بتاعه البرادعى؟
-انا: "فى شجاعه مزيفة" السي 

الساعه 2:11
النور جه

-ماما: متكملى
-انا: خلاص بقى مش مشكلة
-ماما: اهو النور جه بسرعه عشان تعرفى بس

الساعه 2:15
النور قطع

-انا:احنا هنلعب بقى !
-ماما: اهى تسالى
-انا: تسالى؟؟ امال ايشمعنى ايام مرسى

الساعه 2:16
النور جه

-ماما: ماله مرسى؟
-انا: لا متشغليش دماغك...ده الواد ابو 20 جنيه بيلعب

الخميس، 28 نوفمبر 2013

حوليات150: كرواسون



يا ميت خسارة ع الرجال
مات الجدع فوق مدفعه جوة الغابات
جسد نضاله بمصرعه
و من سكات
لا طبالين يفرقعوا
ولا اعلانات
ما رأيكم دام عزكم
يا انتيكات
يا غرقانين
ف الماكولات و الملبوسات
يا دفيانين
ومولعين الدفايات
يا محفلطين
يا ملمعين يا جميسنات
يا بتوع نضال آخر زمن
ف العوامات

#نضال_العوامات
#نضال_الكرواسون
#نجم_كان_بيلقح_على_ناس_زمان_بس_انا_بلقح_على_حد_تانى_دلوقتى
#ايوه_هو_عاصم_عبماجد
#قالك_فر_بدينه
#فر_يبقى_فار_بعيد_عنك
#ميكى_ماوس_حاليا_عبماجد_سابقا
#هو_لينا_كام_هاتشتاج_فى_البوست_الواحد؟
#مش_مهم_اهى_تسالى
#بنتسلى_على_مارك_ابن_ام_مارك
#سيبك_انت_الكرواسون_حلو
#كرواسون_يا_معفنين

الأربعاء، 27 نوفمبر 2013

حوليات149:مزيد من التحديق

اقف على المحطة فى انتظار ميكروباص تعيس أجرته جنية و نص , غالبا هاقف فيه على السلم , مجبر اخاك لا بطل النهاردة امتحان... اضغط على السماعات تحت الطرحة السميكة ليشدو الشيخ أمام :

"حادي يا بادي يا عبد الهادي.
راح تفهم قصد الغنوة دي.
لمّا الشعب يقوم وينادي. 
يا احنا يا هم في الدنيا دي.
حزر فزر شغل مخك. 
شوف مين فينا حيغلب مين"

و فى وسط الاندماج , تجى بنوته صغيرة محجبة -غالبا 9 سنين- تنادى عليا فى اصرار , فاضطر انى اوطى صوت الشيخ أمام

-يا انسة هو الاتوبيس ده بيروح الزاوية الحمرا؟
-اه يا عسولة ده اتوبيس 915 و بيروح فعلا 
-شكرا "تجرى لتحلق به"
-"فى صوت خفيض" العفو يا اختى...مش صغيره عالطرحة ؟, اقطع دراعى ان ماماتك مكسلة تعمل لك شعرك

اركب الميكروباص التعيس فعلا , و افشل مره اخرى فى الجلوس ...و فجأة يشدو صوت فيروز فى وضوح

" آخر إيام الصيفيي 
و الصبيي شويي شويي،
وصلت عاساحة بميس الريم 
و إنقطعت فيها العربيي"

نهارنا فل ان شاء الله...فيروز فى الميكروباص يوم الامتحان ؟ ده ايه السواق العسلية دى! الله الله قولى يا ست ...هو امتحان عسل ان شاء الله 

تنتهى الاغنية ...و يبدأ صوت فرقة عمدان النور فى الوضوح

"جيبت لي صاحب وحبيته , زقنى فى المترو زقيته 
واما مات فيا ومت انا فيه روحتله بيته وعزيته !! 
حزن يا بقال ورا الجامع هات بنص ريال عسل فى الكوز
دة اللى كان عيل بقى شاعر واللى كان ضاحك بقى أراجوز"

! ! ! لا مستحيل....عمدان النور فى ميكروباص غمره!! هو فى حد يعرف اغنية الاراجوز غيرى؟ ده ان كل اللى اعرفهم يعرفوا الاغنية دى لا يتعدى 7 !! امتحان النهاردة شكله هيكون عجيب 

انا: على صوت الراديو يا اسطى و النبى
الجميع: "يحدق فى فى تعجب"
انا: الاغنية حلوة على الصوت 
الجميع: "مزيد من التحديق "
انا: هو فى ايه؟
-السواق: الراديو مش شغال يا انسه
-انا: امممم اااااه انا السماعات لسه فى ودنى !! انا و اقول الاغانى دى مش عند حد غيرى 
-الجميع "التحديق مازال مستمر زى الثورة كده"

الاثنين، 25 نوفمبر 2013

حوليات148:ابو بدلة

"المكان: حى شرق شبرا الخيمة , تحديدا: مكتب ماما"

-مواطن: "مرتدى بدلة كاملة" صباح الخير فين رئيس الحى و فين مدير الشؤون الهندسية؟

-ماما: براحة بس...صباح النور , رئيس الحى عند المحافظ و مدير الهندسية عنده مأمورية عموما انا اللى اقدر عليه ان حضرتك تقعد تشرب شاى لحد ما حد منهم يجى , "تشير له الى المقعد" اتفضل

-مواطن: انا بشتغل فى حقوق الانسان

-ماما: اتشرفنا نعمل لك ايه يعنى؟ حقوق الانسان على عينا و راسنا اتفضل اقعد

-مواطن: انا كمان بشتغل فى شركة الكهربا انتوا هنا بتقبضوا كام؟

-ماما:  بنقبض كام ازاى يعنى؟

-مواطن: اصل انتوا مظلومين نفس مؤهلاتكوا فى اماكن تانيه بياخدوا الالاف الجنيهات و انتوا هنا بتقبضوا ملاليم

-ماما: احنا مش بنقبض ملاليم ولا حاجة , احنا اتعينا على مرتب معين و اتفقنا عليه وقتها و وافقنا عليه و حال البلد ميستحملش اننا نقطم وسطها بمطالبات فئوية

-مواطن: ازاى يعنى و هو فين العدل فى كده امال الثورة قامت ليه؟

-ماما: ما هى الثورة باظت لما الناس اتكلمت زى حضرتك كده لما حبوا يترجموا كل حاجة لفلوس و كأن البلد وقعت على كنز بعد الثورة....احنا نشتغل لبلدنا و لو ببلاش بس لما نظامها يحترمنا و ممكن تبلع الزلط للى نحبه

-مواطن: على فكرة انا مش اخوان

-ماما: "ابتسامة خبيثة" و هو انا قلت انك اخوان؟ 

-مواطن: "يغادر المكتب"

-ماما: "معلنة للمكتب" الراجل ده مزقوق علينا , من الصبح بيلف من مكتب لمكتب يقول نفس الكلمتين دول للحى كله

#ماما_سيطرة #لغز_الراجل_ابو_بدلة #امى_رمز_الوطنية_زى_نسر_الاهلى_بالظبط

الأحد، 24 نوفمبر 2013

حوليات147:التظاهر

"قانون التظاهر الجديد يلزم منظم المظاهرة بتبليغ الداخلية بالشعارات"

-ظابط: ايوة يا اخويا عايز ايه؟

-شاب: عايزين تصريح لمسيرة لو سمحت

-ظابط: و الهتافات ايه بقى ان شاء الله؟

-شاب: هنقول حضرتك : "يسقط يسقط حكم العسكر" , "الانقلاب هو الارهاب" و "الداخلية بلطجية"

-ظابط: "يدون فى سرعة" الداخلية...بلطجية , بلطجية بالهه ولا بالته المربوطة؟

-شاب: "مفكرا" امممم مش عارف بالته المربوظة باين

-ظابط: مش عارف ولا متأكد دى قضيه

-شاب: ما هى مش فارقه ما هى نفس النطق 

-ظابط: هتغنوا "كان دايما فاشل فى الثانوية" المرة دى؟

-شاب: لا الواد زيكو عيان و اللى نازل معانا المرة دى التراس الزمالك فهنغنى اغانيهم بقى

-ظابط: "مدونا" ال..ز..م..ا..ل.ك , ماشى ماشى , تخلص المسيرة و تجى تاخد الرهن

-شاب: هابعت اخويا ياخده...مع السلامة يا غبى يا ابو 50 فى المية 

-ظابط: مع السلامة يا *ول 

السبت، 23 نوفمبر 2013

حوليات146:شعاع الامل


اكتر قصة بابا كان بيحكيهالى و انا اصغر كانت قصه سيدنا ابراهيم , حكالها كتير و كنت دايما بستمتع بيها ...جزء ابراهيم و هو بيدور على الاله , ابراهيم و هو على ثقة من الاله حتى و هو فى النار , ابراهيم بيقدم تضحيات و هو عارف ان ربنا مش هيخذله , ابراهيم و هو مؤمن لكن مصر ان يطمئن قلبه

و كان بابا بيقول لى ان سيدنا ابراهيم اللى هو نبى و بيكلم ربنا مباشرة و مؤمن من كل قلبه اصر انه يتأكد عشان عقله كمان يبقى مؤمن عشان ميكونش جواه ذرة شك او تشكيك , محدش قال له انت نبى عيب كده , او انت هتفهم اكتر من المؤمنين التانيين

و زرع بابا جوايا -يمكن من غير ما يحس- حته من روح سيدنا ابراهيم دى 

انا لقيت ربنا مع الملحدين مش مع الاسلامجية ...مع الملحدين بترجع للاساس للاصل الاول لانسان لقى نفسه فى الدنيا من غير ما يفهم هو فى ايه و عايش ليه؟...و وسط الشك و الخوف من انك لوحدك ده بيجى شعاع الايمان من بعيد صحيح احيانا ضعيف و قلق لكن تأثيرة و انك تشوفه و هو بيكبر شئ تانى

اعادة اكتشافك للعبادات الروتنية و انك ترجع فيها الروح بتاع العادة بقى تعرفها وسط اهل الحب a.K.a الصوفيين و لهؤلاء حديث أخر

الجمعة، 22 نوفمبر 2013

حوليات145:الكسل


فى حد الفيس مرشحه لى كصديق محتمل...الصورة الشخصية عبارة عن مرسى و هو بيسلم طنطاوى التكريم بعد الاقالة

امممممممممممم ده معناه حاجة من 2:
-يا اما ان صاحب البروفيل اخوان و حاطط الصورة من ناحية احنا اللى علمنا على الجيش و عزلنا وزير الدفاع يا معلم

-او يكون من كارهى الاخوان و حاطط الصورة من باب انتوا اللى كرمتوا طنطاوى قاتل الصورة كجزء من حملة فاكرهم و نكد عليهم
*****************
و بينى و بينك كسلت افتح البروفيل عشان اعرف ‫#‏يهده_الكسل‬

الخميس، 21 نوفمبر 2013

حوليات144:جرافتى 2

أغرب جرافتى -و طبعا انت عارف و واعى لمعنى "جرافتى" اليومين دول اقصد هنا الشخبطة اللى باسبراى مش رسومات فن- شفته فى مترو غمره ...كل ما اروح الكليه اقف اتأمل انى افهم حاجة...مفيش خالص

باختصار ال"جرافتى" مكتوب فيه:
البراجوزية حلاوة كسح

!!!!
برجاء اللى فاهم معنى الجرافتى يفهمنى

الأربعاء، 20 نوفمبر 2013

حوليات143:الانتحار صمتا

-ماما: بتعملوا ايه عالنت غير الرغى؟؟ بتاخدوا معلومة؟ بتكتسبوا مهارة؟ بتتعلموا حاجة؟ ولا مقضينها صور و ألش و نكت و تريقه عالرايح و الجاى

-انا: "صمت متأمل"

-ماما: انما الاخوان؟ لجان منظمة بيعملوا رأى عام ...كل واحد فيهم عامل نفسه سفير للجماعه بصوره , بكلامه 

-انا: "صمت اكثر تأملا"

-ماما:بتعلموا ايه لما تطلعوا معسكرات و رحلات؟ بتقضوها غنى و رقص و تهريج؟ و ألش؟ 

-انا: "صمت مكتئب"

-ماما: الاخوان فى معسكراتهم سياسة , بيطلعوا الجبل و تمارين عسكرى ...عشان كده ساعه الجد قعدتوا انتوا تعيطوا و شبعوا فيكوا ضرب

-انا: "صمت اكثر اكتئابا"

-ماما: بتعملوا ايه فى الاحزاب؟ بتتخانقوا؟ بتشتموا بعض؟ بتخونوا بعض؟ حد بيحضر نفسه للانتخابات؟؟ ولا كل واحد بياخد نفسه و يعمل انشقاق و حزب جديد 

-انا: "صمت مفكر فى الانتحار"

-ماما: انما الاخوان بيحضروا من دلوقتى لرفض الدستور قبل ما يكمل اصلا...و بيحضروا للبرلمان حتى و هما فى اللى فيه ده

-انا: "صمت مفكر فى طريقة الانتحار امممم الحبوب vs قطع الشرايين"

-ماما: خليكوا كده على طول....يلا يا بتاعه البرادعى

-انا: و انا بتاعه البرادعى ليه؟ انا مالى يا ستى؟ هو كان جوز اختى؟!!

-ماما: يعنى رديتى اخيرا

-انا: ما هو احسن ما انتحر صمتا

الثلاثاء، 19 نوفمبر 2013

حوليات142: انابيب


استكمالا للقصه الجيم و الشارع و انا...و انا مروحه عديت على مخزن الانابيب اللى جنب بيتنا -احنا عندنا غاز طبيعى الحمد لله بس الناس دى بتجى من الشوارع الخلفية الاضيق اللى مفهاش غاز- و براقب الزحمة كل يوم و بقدر بيها حجم الازمة

النهاردة كان فى زحمة واضحة -بس اقل من الايام اللى فاتت شوية- و كالعادة عدد هائل من التكاتك و الموتسيكلات و عربيات الكارو اللى هتاخد الانابيب و تسرح بيها فى الشارع و تبيع 

كل ده عادى و ممل و فى اى منطقة....الجديد بقى ايه؟

توكتوك منهم مشغل باعلى صوت -و انت عارف صوت دى جى التوكتوك- مشغل ايه يا ولاد؟؟ تسلم الايادى؟ ايه؟ تسلم الايادى ...اه و الله

اللى يفقع بقى ان كم البشر اللى قاعدين بيصقفوا و يغنوا معاها !!

حاول اسأل نفسى ليه؟ مقلتش اجابه...قلت يمكن بيشغولها تريقه؟؟؟ ما اظنش شكلهم مكنش بيهزر ...كانوا بيغنوا بجد !!!

اه يا بلد مجانين

الاثنين، 18 نوفمبر 2013

حوليات141:مناظرات

على فكرة انا كنت شخص "عادى" فى يوم من الايام و كنت بسمع شرايط مناظرات احمد ديدات....اه و الله بس خفيت الحمد لله 

اذكر ان بابا كان بيستلف شرايط الكايست دى من صديق له...و طلب بابا مناظرة معينة و الصديق ده اداه مناظرة تانيه....فالصديق كلم بابا فى ودنه عشان منسمعش و بعدين بابا ملامحه اتغيرت و وافق على الشريط اللى الراجل جابه

بعد كتير عرفت فحوى الكلمتين فى ودن بابا دول....كان فيما معناه ان بلاش المناظرة دى عشان القسيس اللى فيها كان بيتكلم احسن من الشيخ


#ترو_ستورى 
#ذكريات
 #كانت_ايام_عجيبة

الأحد، 17 نوفمبر 2013

حوليات140:شارعنا

و انا رايحة الجيم النهاردة بحب اخدها مشى اهو منها تسخين و منها فرجة عالشارع ...لاحظت النهاردة ان : شارعنا بقى نضيف اخيرااااا....مأساة الزبالة فى منطقتنا ليها تاريخ طويل , من بعد الثورة و الشارع فجأة كده بقى مقلب زبالة متنقل فى كل مكان و على كل ركن

و لما جه مرسى و اعلن حملة "وطن نظيف" معملش حاجة غير ان علق لوحة عليها شعار حزب الحرية و العدالة و سيفين الاخوان...فقرر اهل المنطقة انهم يعملوا مكان اللوحة دى مقلب زبالة جديد  اه و الله ترو ستورى فعلا

و تتعاقب الانظمة و شارعنا مش عايز ينضف...لحد ما حد -الله و اعلم مين بس الله يكرمه- قرر يغير نوعية صناديق الزباله الكبيرة الحديد العالية اللى الناس مش بتطولها و بالتالى بتحط الزبالة عالارض بصناديق اصغر فى الحجم فببساطة الناس بقت تحط الزبالة فى الصندوق و فجأة و على غير ميعاد الشارع فعلا بقى نضيف

و بدل صنادوق واحد كبير و عالى على اول الشارع بقوا 8 صناديق اصغر فى الحجم و موزعة بشكل افضل

اظن النهاردة مثال انك لو عملت منظومة صح الناس هتتجاوب

#فى_أمل

السبت، 16 نوفمبر 2013

حوليات139:شفوى فى عالم موازى


"المكان: مستشفى الدمرداش فى عالم موازى "

-الدكتور: ها جاهزة لامتحان الشفوى؟

-انا: ان شاء الله يا دكتور

-الدكتور: اسمك ايه؟

-انا: دينا نبيل

-الدكتور: دينا نبيل بتاعه الجودريدز؟

-انا: "فى خجل مصطنع" اه انا

-الدكتور: انا متابع كل الريفيوهات بتاعتك...انتى بتقرى ده كله امتى؟

-انا: "مزيد من الخجل المزيف" انا بقرا بسرعه يا دكتور

-الدكتور: و ها بتقرى الجراحة بسرعه برضه؟

-انا: "ابتلع ريقى" احم لا بصراحة اصل ماليش فى الطب قوى

-الدكتور: مش مهم مش مهم ...المهم الثقافة ...انا هاديكى الدرجة النهائية

-انا: الف شكر , الف شكر

-الدكتور: دينا معندكيش رواية حلوه اقراها؟

-انا: لو مقرتش "قواعد العشق الاربعون" اقراها هتعجبك جدا

-الدكتور: اه سمعت عنها فعلا...شكرا يا دينا

-انا: العفو يا ضكتور

الجمعة، 15 نوفمبر 2013

حوليات138: فكر

و قعدت مع نفسى افكر -كجزء من فراغ ما قبل الامتحان- اسأل روحى هو احنا وصلنا للدرك الاسفل ده ازاى؟...و بعد تفكير كتير وصلت لسبب غريب , ببساطة كده احنا معندناش مفكرين

لما الشباب الاسلامى بيهتف فى المظاهرات بحماس قوى "اسلامية اسلامية" بيكون يقصد ايه؟؟ الاجابة الاسهل: ان الشريعة فيه كل حاجة و معدش فى مجال للبحث او التفكير , و اظن انها اجابة خادعة ....انها تظبط كل اراء الشريعة دى على الوقت الحالى فى زمن الناس همها الاصلى فى ميه عالمريخ و لو فى ينفع نعيش هناك او لا محتاج تفكير و مجهود ذهنى كمفكرين ...و حتى المفكرين التقليدين زى سيد قطب و مالك بن نبى و بنجوفتش و خلافه اخرهم كانت جمل كبيرة بخط عريض مش منهج مفصل قابل للتطبيق ...و لنا فى "مسخرة" مشروع النهضة مثال

و لما الشباب الليبرالى بيهتف فى المظاهرات "مدنية مدنية" يعنى ايه برضه؟ ..الاجابة الاسهل ان المدنية هى اللى مش عسكرية ولا دينية , و اعتقد برضه انها اجابة خادعة لاننا ادركنا -بالطريقة الاصعب- ان كونك عارف انت مش عايز ايه لا يعنى على الاطلاق انك عارف انت عايز ايه...و المفكرين بتوعتنا ميفرقوش كتير عن عيل عنده 16 سنه فاتح اكاونت فيس جديد و كل شوية يدخل يرمى فيه كلمتين و يمشى

الشباب اليسارى بقى لعله الاكثر حظا و الاتعس فى نفس الوقت...الاكثر حظا لان المنهج بتاعه الى حد ما مفصل و اتجرب قبل كده بشكل شبه كامل , و الاتعس لانه تقريبا فشل فى كل مرة اطبق فيها لعيوب فى التطبيق
*********************
هتقول لى بقى كل الناس اللى بتفكر و تتكلم دى و معندهاش مفكرين؟؟؟ اقول لك اه طبعا 

احنا عندنا ناس بتنظر على ابونا بس ...بيهروا بالكهربا مش اكتر

الخميس، 14 نوفمبر 2013

حوليات137:وفاة موظف

فى قصة شهيرة ل أنطون تشيخوف اسمها "وفاة موظف" ....انا قريت القصه دى حوالى 12 مرة , كل تلت اربع شهور اطلعها و اقراها...ليه؟؟؟ مش عارفه

اول مره قريتها مفهمتهاش ....و كل مرة اقراها اشوفها بزاوية مختلفة , برؤيا جديدة عن اللى قبلها ....كل مرة اسأل نفسى هو تشيخوف كان يقصد ايه؟؟

كان يقصد ان الذل هو اللى قتله؟...ان الاحراج قتله؟...ان اتعود على الاعتذار لدرجة ان عدم قبوله يمنع وجوده على وجه الارض؟

ليه قصه قصيرة مركزة زى دى شدتنى كده؟ انا عاده مش بقرا الحاجة اكتر من مرة واحدة

اعمال تشيخوف كقصص قصيرة كتييييييير لكن اقرا قد ما اقرا و ارجع تانى لى "وفاة موظف" اقراها و استغرب
********************
للناس اللى مقرتهاش
http://aocol.com

الأربعاء، 13 نوفمبر 2013

حوليات136:شفوى


-الدكتور: ها يا دينا بنعالج حصوات الكلى ازاى؟

-انا: بنبدأ بأدوية و سوائل و مسكنات للوجع

-الدكتور: طيب و لو فشل ده نعمل ايه؟

-انا: ربنا ما يجيب فشل يا ضكتور

-الدكتور: نعم؟ ايوه ايه الخطوة التانية

-انا: نعمل ESWL يا بيه

-الدكتور: و ال ESWL ده رمز لايه يا دينا؟

-انا: "افتح فمى فى اندهاش" نعم؟؟ لا ما اعرفش يا بيه ...انا هابعت لهم بالرمز و خلاص

-الدكتور: طيب اطلعى بره يا دينا

-انا: الف شكر , الف شكر

"حوار تخيلى بينى و بين دكتور الشفوى من وحى المذاكرة النص كم"

الثلاثاء، 12 نوفمبر 2013

حوليات135:شرعية

اللى فى الصورة ده يبقى: احمد فؤاد الثانى و هو صغير طبعا
https://ar.wikipedia.org/wiki/%D8%A3%D8%AD%D9%85%D8%AF_%D9%81%D8%A4%D8%A7%D8%AF_%D8%A7%D9%84%D8%AB%D8%A7%D9%86%D9%8A

ركز معايا بقى: 

اهو ده "بالمنطق كده" هو الوحيد فى مصر اللى عنده شرعية 

لان ناصر انقلب على ابوه "و ده انيكلاب" فميتحسبش 
و ناصر سلمها للسادات ل حسنى "ما بنى على باطل فهو باطل"
و الطنطاوى قلب على حسنى فى "انيكلاب 11 فبراير" غير شرعى برضه ميتحسبش
طنطاوى بقى سلمها لمرسى "برضه باطل"
جه السيسى لطشها من مرسى "برضك باطل ما هو سارقها من الاول"

يبقى ايه؟ يبقى الرئيس الشرعى مش موجود , لان اللى موجود الملك الشرعى احمد فؤاد الثانى

انه الكينج..انا بقول نعمل انكيلاب تانى و نسلمها لمحمد منير اهو مننا و علينا


يا ادى النيله و نسيت محمد نجيب كمان :D

#اهى_اتحلت 

الاثنين، 11 نوفمبر 2013

حوليات134: يسارى

كل يسار ثورى بيتحول ليمين محافظ مع الزمن .... الكل من غير استثناء...حتى الاديان -كل الاديان- اللى بتبدأ كموجة من التغيير العارم على وضع مكلس و متجمد بتتحول مع الوقت لتكلس جديد

حتى الثورة بتتحول مع الوقت لتابوه جديد...طوطم بيعبد بعد ما كان انقلاب على الطوطم الاصلى

المشكلة تكمن ان الكل بيتكلس غصب عنه ...حتى انا هتكلس , دلوقتى بعد سنه بعد 2 بعد 20 سنه لكن التكلس جاى جاى

#مفيش_فايدة
 #و_يبقى_وجه_ربك
 #دايرة_و_عالكل

الأحد، 10 نوفمبر 2013

حوليات133: مسك باين او عنبر

بابا اشترى مسك باين او عنبر مش عارفه اميز و كان عايز يحط منه, الكيوت بقى انا ماما قالت له ارمى العك ده بدل ما ريحتك تبقى زى السلفيين ما البرفان جوه

 يعنى بذمتك حد يسيب هوجو و يحط مسك؟؟ انا ابويا بيشتغل مع اجانب يا جدعان...مش لايق على الاستايل خالص


#امى_سيطرة
#بابا_اليسارى_هيبقى_اخوان_وش
#فعلا_ريحته_رخمه #يعنى_ايه_علمانية_يا_برادعى_ان_ابويا_يسيب_المسك_و_يحط_هوجو

السبت، 9 نوفمبر 2013

حوليات132:جرافتى

الاخوان عندنا عامليين كذا جرافتى فى المنطقة -طبعا مش جرافتى من بتوع محمد محمود يعنى ده اسبراى حقير و حظ زبالة- بصوا بقى , فى الايام الاولى بعد الانيكلاب كتبوا بالخط العريض كده ورا حمادة بتاع الكفتة "الحياة مش اكل و شرب يا عبيد" اممممم تقعد تتأمل الجملة كده و تحس ان اللى كتبها حد مجنون او يمكن اناركى بقى و بتاع 

بعدها بكام يوم كتبوا برضه بالخط العربيض بس جنب كشرى الزعيم "ياسيسى يا بشار الاسعار بتولع نار" اممممم و بغض النظر ان موضوع الاسعار ده فى تدهور دائم و مستمر من الثورة لدلوقتى مش بتتحسن فى اى مرحلة , لكن مشكلتى الاساسية انها -ببساطة- متناقض جدا مع الجرافتى الاولانى خاصه انه نفس الخط و نفس الاسبراى يعنى غالبا نفس الشخص او على الاقل نفس العينة

اممممممم يلا ربنا ياخدهم

الجمعة، 8 نوفمبر 2013

حوليات131:ناصح يا واد

فى سكتى للاوبرا فى جرافتى حد من الشباب عمله مكتوب فيه كالتالى "انت مش محتاج تختار بين الفاشية العسكرية و الفاشيه الدينية" 

حلو؟؟ ماشى ...قام جه حد غالبا اخوانجى و عمل بويه بيضاء على اخر كلمتين فبقت كالتالى : "انت مش محتاج تختار بين الفاشية العسكرية" 

اممممممممممممم لا ناصح يا واد

اولا: البويه البيضا خفيفة و الكلام باين من تحتها , ثانيا: حتى لو اتعمينا شويه اظن كلمة "تختار" و "بين" يدى احساس ان فى شئ ناقص يا خفيف

الخميس، 7 نوفمبر 2013

حوليات130:يلعن ابو الاتنين

و قعدت مع نفسى افكر ايه اللى خلانى بطالب ان مرسى و الشله يمشوا بالحماس ده و لقيت حاجات كتير لكن اتذكر ان الbreaking point بتاعى كان موضوع وزير الثقافة 

يجى حد من الجمهور و يسألنى يا كابتن لطيف يعنى انتى تافه لدرجة انك سايبه كل حاجه و ماسكة فى موضوع زى ده

ارد عليه و اقول له اولا: و انت مالك؟ 
و ثانيا: الرعب اللى جالى كان مصدره انى حتى لو سبت السياسه كلها و تقوقعت مع كتبى و مزيكا مش هيسبونى فى حالى , هيغيروا اصدارات الكتب , حتى حفله الاوبرا اللى الرفاهيه الوحيدة ليا هتتمنع او تتغير طبعها , مش هيسبونى اكتئب براحتى حتى

يومها مر على ذهنى الثورة الايرانية و التحول اللى حصل لها و اترعبت نكون كتبنا مستقبلنا الزفت بايدنا

و هو ده الفرق الرئيسى بين الفاشيه الدينيه و العسكريه , العسكريه لو فكيتك من السياسه و حطيت الجزمه فى بقك هتعيش نمله و تاكل سكر , الدينيه بقى بيدخلوا وراك جوه بيتك , جوه مزيكتك , جوه نيتك , مفيش مهرب غير السفر و الهججان 

يلعن ابو الاتنين طبعا , بس انا بوضح لك الفروق

الأربعاء، 6 نوفمبر 2013

حوليات129:فهمانى يا ماما

-انا: مالك يا ماما دايخة كده ليه؟؟ اجيب لى جوافه انا غسلت واحده حلوه
-ماما: لا انا مصدعه , عايزة اشرب قهوة
-انا: كويس اعمل لى معاكى
-ماما: متبقيش رخمه بقى و اعمليها انتى , انا صباعى بيوجعنى من امبارح
-انا: اممم ورينى كده...بيوجع كده؟
-ماما: كده لا
-انا: "احركه فى اتجاه اخر" و كده؟
-ماما: اه كده بيوجعنى
-انا: ابتدى الوجع من امتى؟
-ماما: امبارح بعد الضهر كده..تقريبا عشان شلت حاجه تقيلة
-انا: بيوجعك على طول و لا بيروح و يرجع؟
-ماما: اممم مش عارفه , على طول اظن
-انا: ايه بيزود الوجع و ايه بيقلله؟
-ماما: يعنى ايه؟ اهو بيوجعنى و خلاص
-انا: "اتقمص الشخصية" اممم طب الوجع بيسمع؟
-ماما: "فى نفاذ صبر" لا...ايوه و بعد التحقيق ده يعنى الوجع من ايه؟
-انا: مش عارفه بس غالبا عشان شيلتى حاجة تقيلة فعلا

-بعد مرور 5 دقائق من الصمت-

-ماما: على فكرة انا مش بنسى انا برضه عايزة القهوة...انتى عملتى الفيلم ده كله عشان ما تقوميش
-انا: فهمانى انتى يا ماما  

الثلاثاء، 5 نوفمبر 2013

حوليات128:حلم "الرئيس المدنى"


الحقيقة ان حلم "الرئيس المدنى" راح على مرحلتين:

-المرحلة الاولى: مرسى...انا نفسى افهم ازاى اول رئيس مدنى فى تاريخ مصر ملوش خلفيه عسكريه يكون بالتفاهه دى؟!!...الناس اللى قعدت تختار الرئيس اللى هيمثل مرحلة جديدة من تاريخ مصر "الممتد 7 الالف سنه يا مؤمن" ازاى دماغها وقفت لدرجة انها تختار محمد مرسى دون عن كل رجاله مصر المدنيين فوق 40 سنه؟...كأنهم قاصدين يفشلوا التجربة من اول لحظة ...وجوده الكاركتيرى كان كافى لدمار الفكرة

-المرحلة التانيه: "للاسف" كان هروب البرادعى...ببساطة بدل ما نبنى عند المواطن المنتخب اللى هو الشريحة العامه للجمهور نموذج الدكتور المدنى المفكر اللى بيقدر يحكم بلد كبير -لاحظ ان البرادعى كان فى منصب نسبيا جيد كان يقدر يجهز نفسه فيه لقيادة مصر بالتدريج- بدل ده خلقنا نظريه الراجل المدنى "المقموص" اللى كل ما فى حاجة متعجبوش يسيب الجمل بما حمل و يرحل...و اتأكدت لمره تانيه نظرية ان المدنيين طرى لدرجة تمنعهم من الحكم

تقدر تعتبر براءة و بساطة عمك "عدلى منصور" مرحلة تالته لو تحب بس انا مش شايفه ان وجوده أثر فى التجربة كتير

و لله الامر من قبل و من بعد



الاثنين، 4 نوفمبر 2013

حوليات127: ابعبع بالاتحاديه

خلاص خلصتوا ضحك على محاكمه بكره ؟؟ خلونى بقى ابعبع شويه بأثر موقعه الاتحاديه فيا 

عارف مصطفى ابراهيم لما قال "تلت الرصاص لللعدو تلتينه للخاين الطعنه جايه من هنا مش من هناك تعب انهارده غير تعب بكره الوقت مش دايما معاك" اهو انا بقترح تعديل النسبه ل90 فى الميه مش التلتين بس....اتعودنا ان الاعتصامات تتفض بايد الداخليه , الجيش , البلطجية انما انه يتفض من زمايل الميدان؟؟؟ 

انك تنزل تتظاهر ضد اعلان دستورى غريب و عجيب فتفاجئ -لاول مره- باعتصام مواجه و مظاهرات تأييد -قبل ما يعلن اصلا- و يتفض اعتصامك و تترمى خيامك فى الشارع و تتشتم و تضرب و -تموت احيانا- و يتقبض عليك من ناس مدنيه لا تبع الداخليه و الجيش ولا يحق لهم احتجازك اصلا و يتحقق معاك انك تعترف على اللى بعتوك و لو صوتك على تتشبح على باب القصر الجمهورى اللى انتخبت ريسه ...كل ده تحت اشراف موظفين القصر الجمهورى و تحت نظر رئيس جمهورية نايم على قفاه -بيسبح بحمد الشرعية- و الناس بتتعذب بره 

اجيب لك فيديو الراجل المسيحيى اللى خاف يقول اسمه ليقتلوه؟؟...اجيب لك فيديو الشاب الطويل الملتحى المهذب اللى بيكتم نفس سيده فى الستين من عمرها و يتضح انها امينة الفلاحين؟...اجيب لك اشكال الناس و هى خارجه من اوض التعذيب؟...افكرك بالناس اللى بعد ما شبعت ضرب راحت عالنيابه متشوهه و طلع رئيس الجمهوريه فى خطاب عالهوا يقول انهم ممولين و اعترفوا و بعدها ب4 ساعات يطلعوا براءة من سرايا النيابه؟؟

يومها كان اول يوم لبلال فضل بعد فترة صمت طويله و يومها وصى الناس تقرا "حيونة الانسان" ل ممدوح عدوان تعليقا على فيديو جبنه نستو يا معفين اللى طلع فيه طبيب امتياز زميل و هو بيفض اعتصام بايده ....عارف يعنى ايه تقرا فى الوقت ده كتاب عن ايه البشر اتحولوا لحيوانات؟ المشكلة انهم مش اى ناس....المشكلة انهم ناس المفروض انهم يفهموا

عارف يعنى ايه تانى يوم يروح المرشد و "زوجه الرئيس" اللى المفروض سيده مصر الاولى مش سيده الاخوان الاولى يعنى يزوروا و يعيطوا فى جنازات شباب الاخوان اللى هما دفعهوهم يقتلوا خلق الله...عارف يعنى ايه تحس ان شبابك اللى ماتوا زباله ولا حد يهتم بيهم و الاخوان دمهم ازرق و الدم ملكى يتحرك له اهم راجل فى مصر...انما اللى يتقتل من عامه الشعب فبعد ما يفقد روحه يتشتم كمان -بعد ما يموت- انه مرتزقه و فلول؟

عارف يعنى ايه لما تسمع "شهدائنا في الجنة وقتلاهم في النار" ؟...و تعرف من جواك ان الرئيس المؤمن اللى جه القصر بدمك و دم اصحابك هتقضى معاه 4 سنين كلهم على الشاكله دى...اى حركه ليك عالارض فيها خطوره ان الاخوان بايدهم ينزلوا عليك؟

و اذكر حوار مع صديق لصديق لما اتسأل هو انتوا هاجمتهم خيام المعتصمين السلميين ليه؟؟ فرد بمنتهى القناعه: هو رسم الجرافتى و تشويه القصر ده سلميه؟

يومها كان محاوله لفكره "الثورة المباشرة" من غير تدخل من الجيش ...و النتيجة كانت ايه؟ انك اتضربت و اتشتمت و اتقتلت و يأست من مفهوم خلع الرئيس مباشره من غير قوه سياديه تسندك

عموما تبريرات الاخوان متوفره: و هو قد ايه يعنى اللى ماتوا؟ ده كلهم اخوان؟ سايبن مبارك و السيسى و بتحاكموا مرسى على كام واحد؟ و وزير الداخليه مش بيتحاكم ليه؟

- سمعت كلام ربك "ولا تعتدوا إن الله لا يحب المعتدين" ؟ ...لما تروح تضرب و تشتم و تقتل شباب غيرك لمجرد انه مختلف معاك فى الرأى؟ و بعدين ترجع تولول ان الفرقه اللى بتعتدى مات منها حد

-نجى بقى للعدد -مع ان البلاد المحترمه مش بتقيس القتل بالكليو- القصه و ما فيها نقص امكانيات مش اكتر..الاخوان مش حرفيه فى القتل قدرتهم على الضرب احسن فالعدد القتلى كان قليل نسبيا و عدد الجرحى اكتر ...و تأكد -شوف تأكد- ان لو الداخليه كانت مع مرسى يومها كانوا هيستخدموها بمنتهى الاريحيه و كان -مع خبره الداخليه- العدد تضاعف

-و حضرتك بقى عجبك مبارك قوى فعملته نبراس و بتقلده ؟؟؟ ولا عالم بالغيب و عارف ان فى حد هيجى اسمه السيسى هيعمل فيك فبتاخد حقك من بدرى؟

-يومها مكنش يوم وزراة الداخليه -يومها سابونا لبعض- الاخوان عملوها بايدهم يومها...الجمله اللى حضرتك حافظها هنعوزها و الله بس مش فى القضيه دى...فى قضيه جيكا و الجندى ان شاء الله
****************************
خلصتوا ضحك عالمحاكمه؟؟ اصل ده دم -و حرقة دم- مش هزار

حوليات126:برهان العسل

اسم الكتاب: برهان العسل
تأليف:  سلوى النعيمي
151 صفحة
برهان العسل

خلينى اصدمك شوية

انا معنديش مشكلة ان الرواية دى من الادب الايروتيكى خاصه انه مش نوع جديد بالعكس يمكن ده اقدم انواع الادب و الف ليلة و ليلة بنسخها الغير منقحة شاهد بل ان الكتاب اللى استعانت بيها المؤلفه تشهد فى حد ذاتها

ليس فهو الموضوع...ولا ان المؤلفة ست لان عندى قناعه ان الغلط غلط و الصح صح سواء ست او راجل

الواقع انى عندى مشكلة تانية مختلفه مع الكتاب...مش انه كتاب ايروتيكى تؤ تؤ انه كتاب ايروتيكى وحش
:D

الكتاب فى احسن الاحوال عبارة عن نميمة ستات حوالين صينية قهوة او فى كوافير ك تسالى و فواصل بين النميمة ...مش اكتر من كده و مينفعش نصنفه كرواية او حتى اقصاقيص او مذاكرات

عارف "الولية" اللى كانت فى رواية علاء الاسوانى "نادى السيارات" اللى مكتنش فالحة غير فى الحاجات دى...اهو شبه كده

سلوى النعيمى حبت تعمل رواية عن الجنس تصدم بيها المجتمع...فانتهى بيها الامر لشبه رواية بتتكلم عن شبه الجنس و مصدمتش حد -او على الاقل ما صدمتنيش انا- اممممم كتاب اقل من توقعاتى

الأحد، 3 نوفمبر 2013

حوليات125:لقيطة إستانبول

اسم الكتاب: لقيطة إستانبول
عدد الصفحات: 433 صفحة
التأليف: إليف شافاق
لقيطة إستانبول

لو مستنى تقرا "قواعد العشق الاربعون" اخرى فريح دماغك لانه مش هيحصل ...لكن ستجد اثبات بان طريقة "القواعد" هى محور اسلوب اليف الجذاب و عموما اعتقد ان قواعد المرأة الاسنطبوليه الحصيفه هى افضل ما فى الرواية

فى رأيى ان اجمل ما فى الكتاب كانت شخصية "زليخة" الرائعة و عشان كده كان الفصل الاول المخصص بالكامل ليها هو فصلى المفضل - بالمناسبه قريته و انا مستنية موظف شباك تذاكر دار الاوبرا عشان حفلة اوبرا عايدة- مش عارفه بقى هل هو كمال شخصية زليخة دراميا و كونها مثيرة للاهتمام بجونلة قصيره و حلق صغير فى انفها و تحديها لقواعد المنطق بل و اهمالها لقواعد المرأة الحصيفة ام انه مجرد تأثير انك تقرا جوه دار الاوبرا المصريه بكل الجمال و البهاء ده -الارجح انه خليط- لكن عموما ده كان جزئى المفضل

و زى ما "ايلا" معجبتنيش فى قواعد العشق الاربعين كانت "روز" اضافة غريبه للحبكة محبتهاش خالص

جزء اخر جميل هو البيت التركى البسيط المركز على الاكل و القصص الجميله , البيت اللى الناس بتفرح فيه لما كاس الشاى يتكسر لانه فقع عين الحاسد , و بتصب فيه الرصاص لمنع الحسود, و لسه بيتاكل فيه عشورا


الكتاب تألق فى بعض الاجزاء لكن اعتقد انه كان ممل فى لحظات كتير و كانوا ال424 صفحة دول ممكن يكونوا 200 ببساطة , عموما انا محتاجة اقرا عن موضوع "الارمن" اكتر من كده

و طريقة "الافلام الهندى" و افلام حسن الامام فى تشابك النسب فى العيله معجبنيش خالص

السبت، 2 نوفمبر 2013

حوليات124: مرسى و القراطس

المقله اللى تحت بيتنا فيها راجل لذيذ قوى , قبل الثورة عمرنا ما شفنا له اهتمامات ولا شفنا له دقن لا طويله ولا قصيره...بعد الثورة دقنه طولت قوى و بقى من بتوع لازم حازم -و لسه بسأل نفسى لحد دلوقتى هو لازم ليه يعنى- و حط صورة اسد الاسلام اجبار كده على الزباين فى المحل... و بعد ما ابو اسماعيل كله الوبا -زى هنادى كده- حلق شوية من دقنه و علق صورة عمونا خيرت الشاطر , و بعد ما الشاطر كلته القطة -زى السمكة كده- شال حته كمان من دقنه و علق لنا صور محمد مرسى 

طيب انا بحكى الحكاية البايخة دى ليه؟ و ليه بشترى منه مع كل ده؟..اولا بشترى منه عشان اللب بتاعه تحفه و ابن هرمه ...ثانيا بقى السبب

امبارح بعد ما خلصت كيس اللب الابيض الحلو لقيت صورة جوه الكيس...فتحته صعقت..لقيت صورة محمد مرسى من الدعايا ايام الانتخابات ...تخيلو؟

-تفتكروا عامل كده كطريقه للتخلص من الورق اهو بدل ما يترمى؟
-ولا نوع من الدعايا لمرسى؟

#مرسى_بقى_قراطس_لب  #ترو_ستورى

الجمعة، 1 نوفمبر 2013

حوليات123:غرفة العناية المركزة

غرفة العناية المركزة
تأليف: عزالدين شكري فشير 
303 صفحة
غرفة العناية المركزة

تتركز روعه تلك الروايه فى عاملين الاول تقنى درامى و الاخر سياسى اجتماعى

فاما الشق التقنى الدرامى:فاستخدام هذا الاسلوب -الصعب و الممتع-كان شيمه تلك الروايه من حيث تجميع البازل و المكونات و تستمتع بكونك تجمع الصوره شئ فشئ ليتكمل المنظر و تتحسر على حال الشخصيات

فاما الشق الاجتماعى فممثل لحال مصر المشوهه و المقطعه و المحكومه بهلاهيل بشريه من صفوه المجتمع البالى....من ضابط فقد الامن لمحاميه مزدوجه الشخصيه لصفحى كفاوست باع ذاته للشيطان لقبطى خذله وطنه و المجتمع

عجبنى جدااا جزء ورد النيل و تعبيرات الشخصيات عن تمثليات مكافحه ورد النيل كعاده مصر و كأننا نفعل شيئا

لكن اعيب على الروايه ثلاث عيوب خفضت تقديرها من الخمسه الى الاربعه الى الثلاثه

الاول:هو اسهاب الروايه النسبى و مطها كثيرا مما استدعانى تخطى بعض الصفحات

الثانى:عدم فهمى لاختيار الاسم و عدم حبى له و لو اسميتها لاطلقت عليها اسم "ورد النيل"...هكذا سميتها...غرفه الرعايه المركزه؟؟!!بمعنى ايه و ايه المغزى لم افهم

الثالث:النهايه المفتوحه او لنقل الانهايه اصلا