الأربعاء، 31 أكتوبر، 2012

لزوم ما يلزم نجيب سرور pdf

لزوم ما يلزم نجيب سرور pdf

http://www.4shared.com/office/fM1a2SgL/___.html

ربع جرام عصام يوسف



لا استطيع ان اقول انى قرأت الروايه ربع جرام عصام يوسف بشكل كامل لكنى كل ما استطيع البوح به هو انى تعرفت عليها بالشكل الكافى للحكم عليها 

بدايه الروايه طويله جدا بالنسبه لمضمونها فهى 645 صفحه مطلوله...تتخذ شكل دورات كامله فالبطل يدمن و يروى لنا تفاصيل ادمانه بالتفاصيل الممله احيانا مما يرهق القارئ او حتى يخدش حيائه احيانا اخرى ...ثم يأتى حدث ما يشجع صلاح البطل على ترك ادمانه لفتره و يروى لك ايضا بالتفاصيل ما حدث مضيفا مزيد الملل احيانا و الاثاره احيانا ...ثم تتكرر الدوره مرات و مرات حتى نهايه الكتاب

وده طبيعي في حياة المدمن الحقيقيه وانا مش بقول إنها اجزاء مضافه او غير واقعيه ، لكن انا من الناس المقتنعه برأي علي سالم في الدراما بأن الواقع يجب ان يُطرق بمطارق الأبداع قبل تقديمه للمتلقي .. فمينفعش إن احنا نقدم الواقع زي ما هو وإلا تكون الأفلام الفيديو المنزليه نوع من الفن كان يجب التكدس بعض الشئ و ده هو واجب المؤلف

كما ان الروايه تتحول احيانا الى ما يشبه قطعه قماش كبيره...تكثر "الكشكشه" حينا فتتكدس الاحداث و يموت الاصدقاء ....و يكثر التطويل و الاسهاب حينا بلا احداث تذكر تشجعك على اكمالها

كان كل هذا هو النقد التقنى للروايه و بناؤها الدرامى...اما عن موضوعها فيعد موضوع مثير للقراءه او الكتابه خاصه و هو يدخلك الى هذا العالم المميز بتفاصيله المدهشه فى حيوات سريه لاشخاص قد تمر بهم فى الشارع او حتى تقابلهم وجها لوجه دون علم ما تخفى الغرف المغلقه

لم اتفاجئ كثيرا بمصطلحات المخدرات كما اندهش غيرى...ليس لانى مدمنه بالطبع لكن لظروف دراستى الطبيه قد جعلتنى اقابل عشرات من صلاح و رفاقه منصته منهم على افكارهم و عادتهم الغريبه 

قد يكون مأخذى على العمل هو كون شخصيه صلاح من العائلات شبه الثريه مما اضفى على الروايه جوا استقرطيا ضايقنى...و وددت لو انى سمعت نفس القصه من صلاح ابن الاسره المتوسطه فيضاف الى عبئه اليومى عب تحصيل تلك الاموال

للتحميل
http://www.goodreads.com/ebooks/download/3692091

نهاية اللعبة صامويل بيكت

مسرحيه نهايه اللعبه ل صامويل بيكت

ياااه بقالى كتير مقرتش حاجه حلوه...حاجه ادب راقى فعلا...ادب مش بياخد دور المهرج اللى بيسلى..ادب مش تجاره ادب يخلينى احتوى كل تلك المتعه الذهنيه بنسخه ورقيه احتضنها لاقراها مره وراء المره ب2 جنيه يا بشر...ادب مش بياخد دور الواعظ و ينصح و يضربك على ايديك...ادب تانى من نوع فريد امضاء صامويل بيكت ادب زى الورقه البيضا تكتب فيه اللى جواك...فى نهايه اللعبه خصوصا و فى اعمال بيكت عموما انت جزء من المسرحيه لا يقل عن اى عنصر اخر...الروايه نفسها مش بتقول حاجه اصلا لكن انت و انت بس اللى تحدد المسرحيه بتقول ايه

 بيدخلك بيكت فى حاله شعوريه فى اعمال تجعلك تستسيغ اللا منطق اكثر من المنطق ذاته...يجعلك تتقبل انتظار جودو المطلق و لا تتقبل صياح جيرانك على المرتب...فى لحظات كتلك تستطيع فهم اللوحات السيراليه فتملا الفراغات بروحك القلقه و يتضح المعنى كيف تتحدث طيله مئه صفحه دون ان تقول شئ؟؟ يبدو كسؤال صعب لكن لدى بيكت طريقه الخاصه..و احد تكنيك بيكت فى ذلك نظريه ا
ل
 

تكرار بطريقته المميزه كالمشهد التالى
و فى النهايه اترك نصيحتى الدائمه مع اعمال العبث...اترك عقلك بالخارج و لا تلوث فن العبث باعمال العقل البائس

الخطوبه بهاء طاهر




مجموعه "الخطوبه" بهاء طاهر

فى المجمل انها ببساطه مجموعه قصصيه اخرى لبهاء طاهر ذلك النوع من بداياته الاولى...فى مجملها بسيطه معظمها بنهايه مبتوره مع لمحات -خفيفه- من الفلسفه لكن من بين كل القصص تبرز قصتين بعينهم مختلفين

الاولى: القصه الرئيسيه "الخطوبه" ...حول بهاء طاهر قصه ذات بدايه تقليديه بحته الى قصه قصيره عن حق...بدايه هادئه و وسط سريع مع دفقات من المفاجأت الصغيره 

كيف تحولت قصه بسيطه عن شاب متوسط العمر يخطب زميله له من اب تقليدى الى ذروه دراميه بهذا الشكل...انه الفن

الثانيه: قصه اللكمه..اعجبت بها ربما بسبب نكهه "كافكا" السائده فى العمل...مشابه و لو قليلا لقصه المحكمه او القضيه بقلم كافكا...نفس السوداويه بلمسات من العبث الخالص

لعل ابعدهم الى قلبى كانت قصه "نهاية الحفل" التى فشلت فى ابقائى يقظه فلم يعد بامكانى قراءه قصه قصيره مكونه من 22 صفحه كامله...انها تدعى قصص قصيره لسبب

و الان بعد قراءتى ال5 مجموعات قصصيه التى كتبها بهاء طاهر...استطيع التعليق بحريه على اعماله...اشد ما ابغضه به هى "حياديه" شخصياته ,اعلم انه اسلوب معترف بيه ادبيا..لكنى اشعر بان شخصيه من ورق مش من لحم و دم...شخصيه الشاب متوسط العمر اللى عنده مشاكل مع العائله او الاصدقاء تكررت جدا فى 5 مجموعات ربما بتلون مختلف كل مره لكنها تظل شخصيه احاديه الابعاد مفهاش عمق كأنها "نماذج بشريه" مش بشر

للتحميل
http://www.goodreads.com/ebooks/download/7506799

الثلاثاء، 30 أكتوبر، 2012

كيف السيوفُ استباحتْ بني الأكرمينْ

كنتُ في كَرْبلاءْ

قال لي الشيخُ إن الحُسينْ

ماتَ من أجلِ جرعةِ ماءْ!

وتساءلتُ

كيف السيوفُ استباحتْ بني الأكرمينْ

فأجابَ الذي بصَّرتْه السَّماءْ:

إنه الذَّهبُ المتلألىءُ: في كلِّ عينْ.

إن تكُن كلماتُ الحسينْ..

وسُيوفُ الحُسينْ..

وجَلالُ الحُسينْ..

سَقَطَتْ دون أن تُنقذ الحقَّ من ذهبِ الأمراءْ?

أفتقدرُ أن تنقذ الحقَّ ثرثرةُ الشُّعراء?

والفراتُ لسانٌ من الدمِ لا يجدُ الشَّفتينْ?!

...

ماتَ من أجل جرعة ماءْ!

فاسقني يا غُلام.. صباحَ مساء

اسقِني يا غُلام..

علَّني بالمُدام..

أتناسى الدّماءْ!





من قصيدة : اوراق ابن نواس

أمل دنقل 
1940-1983

السبت، 27 أكتوبر، 2012

إذا استطعت....


إذا استطعت أن تحتفظ برأسك 

عندما يفقد كل من حولك رؤوسهم

و ينحون عليك باللائمة

إذا وثقت بنفسك عندما يفقد كل إنسان ثقته فيك

و لا تترك مع ذلك مجالاً للشك

إذا استطعت أن تنتظر دون أن تمل الانتظار

أو أن يعاملك الآخرون بالكذب

من دون أن تلجأ إليه

أو أن تكون موضع كراهية

و لكنك لا تدع لها مجالاً للتسرب إلى نفسك

و لا تبدو أفضل مما ينبغي

ولا تتكلم بحكمة أكثر مما يجب

إذا استطعت أن تحلم

و لا تدع للأحلام سيادة عليك

إذا استطعت أن تفكر

و لا تجعل الأفكار غايتك القصوى

إذا استطعت أن تجابه الفوز والفشل

و تتعامل مع هذين

المخاتلين … الخادعين … على حد سواء

إذا استطعت أن تكدس كل ما تملك من أرباح و تغامر بها دفعة واحدة

و تخسرها جميعاً … ثم تبدأ من جديد

من دون أن تنطق بكلمة واحدة عن خسارتك

إذا استطعت أن تعامل الناس

من غير أن تتخلى عن فضائلك

و أن تسير في ركاب الملوك

من دون أن تفقد مزاياك المعتادة

إذا عجز الأعداء … والأصدقاء … والمحبون...

عن إثارة حفيظتك … بإيذائهم إياك

إذا استطعت أن تملأ الدقيقة الغاضبة

التي لا تغفر لأحد

بما يعادل ستين ثانية من السعي ركضاً

فلك الأرض وما عليها

و أنت … فوق ذلك كله

ستكون رجلاً … يا بُني

قصيده "اذا استطعت"
تأليف " روديارد كبلينغ" 
الحائز على جائزة نوبل في الأدب سنة 1907
هو أصغر حائز على جائزة نوبل، 

الأربعاء، 24 أكتوبر، 2012

اللجان الالكترونيه لا دين لها



اتكلم سياسه القى لجان الاخوان تنط فى وشى....اقول بلا قرف لعن الله السياسه و من ساس و يسوس من سائس و مسوس على راى محمد عبده

اتكلم فى الكتب الاقى لجان الالكترونيه بتاعه الكتاب و دور النشر...اقول يلعن ابو الثقافه ما احنا بنقرا طول عمرنا خدنا منها ايه

تكلم فى الكوره يطلع لى الالتراس من ناحيه و بتوع شوبير من ناحيه...اقول بلاش كوره اهى اصلا حرام

لو اتكلمت فى طريقه عمل عصير البرتقال خايفه الاقى الرمان زعلان....عبوهم كلهم

اللجان الالكترونيه لا دين لها...

الأحد، 21 أكتوبر، 2012

السنجة احمد خالد توفيق pdf

بعد نزولها بدقائق....اقدم لكم روايه السنجة لاحمد خالد توفيق pdf

http://www.liilas.com/mustafa/senjeh.rar


نشجع شراء الكتاب نقدا طبعا كتضامن مع الكاتب....نقرا بى دى ف...نقرا ورق...المهم نقرا....اللى مستحرم او شايفنا حراميه يرحمنا من الفتوى و ميحملش و يتفضل يشترى ربنا يكرمه

الجمعة، 19 أكتوبر، 2012

الفيل الازرق pdf لاول مرة

فقط و لاول مره  حصريا على رفايع الروايه الاحدث ل احمد مراد: الفيل الازرق....النسخه كامله بى دى اف pdf ....اسفه على الدبجه التقليديه 
النسخه الافضل
http://www.mediafire.com/?bd1ylmjmm68478d
 الفيل الازرق pdf , تحميل كتاب الفيل الازرق , الفيل الازرق احمد مراد بى دى اف , الفيل الازرق لاحمد مراد pdf , الفيل الازرق احمد مراد, 4shared, mediafire

الخميس، 18 أكتوبر، 2012

السيخ عقائدهم وتاريخهم


السيخ عقائدهم وتاريخهم
by محمد سعيد الطريحي


 خمسه و عشرون مليون مواطن من السيخ يعيشون فى العالم...ربما هو عدد ضئيل لديانه مستقله و خاصه فى بلد واسع الرقعه وكثيف السكان مثل الهند...لكن اذا ذكرنا ان نسبه المتفوقين و ضباط الجيش و لاعبى المنتخبات الاولمبيه فى الهند تتجاوز الربع لذا يلزم الانتباه لتلك الطائفه الصغيره حجما المثيره للاهتمام

الامام الاول و واضع اساسها: نانك ..زار العراق و المدينه و مكه....تلاحظ ببساطه لامسات من الاسلام و كأنه فرع متطرف من الصوفيه. .. باستثاء وضع كتاب خاص و فكره التناسخ والكارما

بدأ توريث الامامه بناء على الاكثر حقا و -كالعاده- تحولت الى ميراث شخصى من الاب للابن

الامام الرابع:بدء مراسم الوثنيه و فكره الاعفاء الكامل من الذنوب بالحوض فى المعبد الذهبى...و بدء مرحله الثراء بل و الطمع فى السلطه بخوض الحروب و كعاده اى فكره سلميه بدت نبيله لمفكرها الاول تتحول الى العنف و سيل الدماء و الطمع

كما ان الشكل النهائى بالكافات الخمسه لم تكتمل الا فى عصر الخليفه التاسع

تلا ذلك اشكال رهيبه من الحروب و القتل بل و اجبار الخلائق على اتباع السيخ...ثم مرحله التفاخر و الغرور و انطلاق لفظ مهراجا بعد التقشف و الزهد و التصوف

كما تشيع السيخ لتسع شعب رئيسيه باختلافات تبدو ضئيله لكنها مفرقه بالطبع...و لكن يذكر المؤلف ان هذا التشيع لم تتضح نتائج عمليه له بسبب كون السيخ اقليه فى الاصل فلا مجال واسع للتحزب

كما سعدت بالجزء المكتوب بقلم محمد اقبال و استمتعت بشرحه الوافى...لكن لكثره مؤلفيين الكتاب تكررت الافكار كثيرا و الاحداث التاريخية

للتحميل pdf
http://www.goodreads.com/ebooks/download/15835799

صهاريج اللؤلؤ خيرى شلبى

عندى 4 ملاحظات سلبيه كبيره على الكتاب ده+ ملاحظه ايجابية وحيدة

اولا: هو ليه اسمه "صهاريج اللؤلؤ"؟؟ ..سؤال طرح على من الاخريين و طرحه على نفسى و فى كل الحالات لم اجد اجابه واحده مقنعه...لم يرد لفظ "لؤلؤ" على الاطلاق فى الكتاب...بينما ذكر لفظ "صهاريج" الا فى موقف واحد كأسم شارع لشخصيه شديده الثانويه...و فى كل الحالات لم اجد له معنى


ثانياً : دا سابع عمل ليا مع خيري شلبي ومع الرغم ان مستوي الكاتب عموماً متميز إلا ان الروايه اقل من المتوسط لعلها من اعماله الأولى لكنها في النهايه ، ممم مش جديره بخيري شلبي

ثالثاً : خطر لخيري شلبي فكرة تأليف عمل ادبي على الموسيقى او بالأحرى ، تأليف عمل يضم معلوماته هو شخصياً عن الموسيقى العربيه ، وشعرت ان لُب كل تلك القِصه ، هو رغبة خيري شلبي في تدوين معرفته على الورق اكثر منها حياكه لرواية جيده 

رابعاً : حجم الكتاب ! الكتاب يحتوي على 337 صفحه وكان الخط شديد الصِغر ، مع ان الحجم الحقيقي لتلك الروايه دون الأضافات والحشو والمد والتطويل والصفحات الكامله من الثناء والمدح في البطل والشكر في الحانه ، لم يكن يتعدى 200 على الأكثر 

ولكن ، لي ملاحظه واحده جيده حتى نكون منصفين ، هو ان الرسم الدرامي لشخصية البطل كان شديد الأتقان فلم يتطور تطور مبالغ فيه ، او خارج عن سياق القصه ، بل ظل كما هو مجرد شاب ريفي ربما حتى يكون جاهلاً .. شابٌ بسيط إنتهى به الحاال إلى تقليد كل ماكان يكرهه في ابوه ، فاتبع نفس السياق ، سياق الشك ، والقلق ، والتردد .. وربما حتى نفس السياق في إبعاد ابنائه عن الفن .

روايه متوسطه ، وكنت اودها اكثر من ذلك بكثير 

للتحميل pdf

ألف وعام من الحنين رشيد بوجدرة


روايه اقل ما توصف بها انها روايه "غريبه"...جو عام و هيكل كلى للروايه غريب اشبه بالاساطير و القصص الخياليه

استمتعت بمتابعه حياه"محمد عديم اللقب" و عائلته....و حكايه ظله الذى لم يكن يسير ورائه...قدرته المغناطيسيه على طيور الباحه...معاشرته للنساء بلا شق للعذريه...ذلك الخوف الذى يسكت الاطفال و الطيور على بعد 166 متر...علاقته بابنه الحاكم...نطقه باللغات القديمه عند الولاده...هذيانه حول ابن خالدون...و كونه اصلا بلا لقب او توأم كأخوته الثمانيه عشر

تمتعت بالقصص التاريخيه المصاحبه و تضافرها الشيق مع القصه

لعل مأخذى هو قله الاحداث على الرغم من براعه الجو العام للقصه مما اجبرنى على تخطى بعد الصفحات

كما ان الكتاب بالانجليزى اسمه"الف و عام من النوستلجيا"...ترجمه نوستلجيا بكلمه"حنين" مش مريحنى...مفيش فى دماغى تجربه بديله دلوقتى بس نوستلجيا ده احساس تانى خالص و انطباع غير حنين دى...نوستالجيا كلمه ليها علاقه بالماضى...التشبث بالماضى و عدم القدره من الخروج منه ...معنى اشمل شويه من الحنين

للتحميل pdf
http://www.goodreads.com/ebooks/download/11028723

Button vs the box


القصه القصيره Button, Button 

هى اللى اتعمل منها فيلم "ذا بوكس" بتاع كاميرون دياز

الحبكه فى الاول تبان حلوه...حد بيخبط على بابك ....يديك صندوق فيه زر...لو ضغطت عليه تاخد فلوس كتير فى القصه كانوا نص مليون...و فى الفيلم بقوا مليون...و مقابل الفلوس دى فى حد "متعرفوش" هيموت

لغايه كده الحبكه تقارب العبقريه...انها المعضله الابديه بين حب المال و بين الانسانيه

هل الفلوس تبرر انك تقتل روح؟؟...و الاهم هل كونك متعرفش الشخص ده مبرر كافى لتهدئه ضميرك؟؟...شوف لحد هنا العبقريه تتحدث

اما اللى حصل بعد كده فكان شبيه بالكارثه الحقيقه ...الفكره العبقريه دى افسدها مؤلفها بجداره و بعد الحديث عن المعضلات الانسانيه وجدنا انفسنا فى قلب قصه خيال علمى و اذا بالفضائيين دخلوا

ازاى؟؟؟ معرفش

طبعا ما اقدرش احكم على الكتاب من الفيلم..انا دوده قرايه قديمه و عارفه...بس تقدر تكون ان الفيلم قفلنى من الكتاب

عدل المسامير خيرى شلبى

من لم يقرأ اى عمل لخيرى شلبى انصحه بقراءه عدل المسامير فهى ببساطه مزيج لكل ما كتب خيرى شلبى


تشعر برحيق الروايات الكبرى ممثله فى قصصه الصغير بنفس الجو العام و الرائحه

و على سبيل المثال لا الحصر

قصه الشأفه : تمثل روايه زهره الخشاش بموضوعها الصحفى و تعنت الامن و الناس

قصه الفتح المبين: ممثله للجزء الاول من ثلاثيه الورق اولنا ولد بموضوعها عن الاشقياء التائبين و الرجوع الى الحياه المستقيمه بتفاصيلها الهادئه

قصه جلباب من الزفير المقلم: و كأنها مقدمه لروايه الاوباش نفس الجوع و الفقر ....عماله الاطفال كافراد اجره فى الوسيه

قصه بح خلاص: و لعلها اجمل قصص الكتاب شبيه ببعض اجزاء الاوباش لخيرى شلبى و قصه اسباب للكى بالنار

و لكن تظل بعض القصص متفرده ممتعه كقصه"عدل المسامير" و قصه "فتاه الجمباز" لم اجد لهما -حتى الان- مثيل فى كتابات شلبى

للتحميل
http://www.mediafire.com/view/?03hu6ef3izxrblp

الأربعاء، 17 أكتوبر، 2012

How to Kill a Human Being 2008

فيلم تسجيلى من شبكه البى بى سى بيتكلم عن نائب بريطانى سابق فى البرلمان بيبحث عن اكتر وسيله انسانيه بدون الم او تعذيب للمحكوم عليه...

الفيلم مميز لكذا سبب...الاول ان الفكره نفسها مبتكره ان حد يتعب نفسه و يعرض روحه للخطر احيانا و يجرب على نفسه عشان يدور على وسيله انسانيه بدون وحشيه او الم او ساديه...

بيجرب الحقنه القاتله اللى مستخدمه بانتشار فى امريكا...و بيبن ان لها مشاكلها منها مثلا انها مش تحت اشراف طبى او تمريض لان قسم ابقراط بيمنع الدكتور انه يقتل او يشرف على ايذاء حد -عجبنى احترامهم للقسم و عجبى اكتر ان الدوله مش عايزه تدخلهم فى معضلات اخلاقيه- و بسبب كده التقنيين بيقوموا بالمهمه مما يؤدى لحوادث منها مثلا ان المحكوم عليه بدل ما يموت فى دقيقه بيموت و يتوجع و يتعذب نص ساعه...

بيجرب الشنق فيكتشف انها مشكله كبيره...يا اما بتؤدى بنقص فالمحكوم عليه يفضل "يفرفر" نص ساعه...او تؤدى بزياده مما يؤدى لفصل الرأس عن الجسم زى ما حصل فى اعدام اخو صدام حسين

بيجرب الكرسى الكهربى...و ده مصيبه حقيقيه لوحدها بكوارثها الكتير

بيجرب غرفه الغاز و غيرها من الطرق....لحد ما يوصل فعلا لطريقه انسانيه بحته بتموت فى 15 ثانيه من غير وجع او مشاكل على الاطلاق...لكن السؤال هل الناس تحب ان المحكوم عليه بالاعدام يموت من غير الم اصلا؟؟؟السؤال ده و اسئله تانيه زى ايه هى الطريقه المثاليه دى مش هاحرقها لعلك تشاهد الفيلم ....

فيلم تسجيلى مبتكر....ده لينك الفيلم كامل على اليوتيوب

الاثنين، 15 أكتوبر، 2012

بالنسبه للدستور


بالنسبه للدستور....احنا ليه متخليين اننا بنخترع الذره؟؟ او كأننا اول ناس فى التاريخ نعمل دستور او كأن مصر مكنش فيها دستور قبل كده؟؟

الموضوع سهل: الدستور لازم يكون توافقى....بكل ما يحمل المعنى من تصريف

ملوش دعوه بالانتخابات او بالاغلبيه لان الدستور دائم و الاغلبيه متغيره...النهارده الشعب عاجبه الاخوان بكره يمكن لا ....لذا كان يجب ان يكون الدستور ممثل للكل حتى الاقليات و حبذا لو كان بنظام الكوته لضمان التمثيل الشامل...لا بيض ولا دجاجه ولا حاجه مجرد اتباع لتقاليد معروفه عالميا

اللجنه تضم 4 اصناف من البشر: اهل السياسه و الاحزاب و الشخصيات العامه (بالتساوى و بغض النظر عن الاغلبيات)....اهل النقابات العماليه و المهنيه...تمثيل للاقليات الدينيه و الجغرافيه يعنى فى مصر يبقى المسحيين و النوبه و البدو و خلافه...و اهل القانون و الدستوريين لصياغه افكار كل هؤلاء بحيث يكون هؤلاء القانونيين غير مسيسين على الاطلاق و بمنتهى الحياديه.....و احبذ ان يكون كوته النساء فى كل ذلك لا يقل عن 30%

قارن يا عزيزى بين تلك المواصفات العالميه و بين لجتنا المصونه:
تجد اغلبيه سياسيه من تيار واحد.......عدم تمثيل حقيقى للاقليات او المرأه.....تضاد فى المصالح لاكثر من نصف الاعضاء ممثليين فى مجلس الشورى و يا العجب هم من يحددون بقاء مجلس الشورى من عدمه!!!!!

و ما خفى كان اعظم

المعارضه الرشيده


كبدايه كده نظريه "المعارضه الرشيده" دى مصطلح تحشيش مصرى صرف...فكره ان فى معارضه تعارض لما يكون فى مصايب بس (و طبعا ساعتها هيقولوا لها هو ده وقت معارضه؟!) و تفضل حاطه الجزمه فى بوقها فى الحاجات "البسيطه" عشان محدش يتهمتها بالتفاهه شئ بيسلب من فكره المعارضه اللى هو التقويم و المحاسبه قلبه النابض

عمرك شفت فى البلاد اللى فيها ديموقراطيات قديمه حاجه زى كده؟؟ لا طبعا....الحزب الجمهورى واقف للحزب الديموقراطى على كل حاجه بالتفاصيل و بالمليم ببساطه لان اى حزب هدفه الشرعى السلطه و محدش فى امريكا بيقول للحزب الجمهورى انه وصولى هدفه كرسى الحكم ولا عايز يخرب البلد....احنا عاطفيين بزياااااده قوى و ده عموما جايبنا ورا

و الفكره اللى بدعى لها الاخوان او التيار المحافظ فى مصر من حيث ان لو الريس عمل حاجه "حلوه" ان المعارضه تؤيديه و تصقف له ده حاجه عجيبه برضه بصراحه....و انا عمرى ما فهمت حكايه مظاهرات التأييد دى!!!....ايه هدفها يعنى؟؟...انا اعرف حد معترض على حاجه فينزل يطالب تغييرها انما مظاهرات التأييد دى مفهاش غرض غير فرعنه الحاكم و تأليه....

ده غير ان مفيش فى مصر طوارئ تحتم علينا تقبل معارضه تافهه زى دى...لا احنا بنحارب مثلا ولا فى وضع كارثى يحتم على المعارضه الخضوع او كتم كلمه الحق عشان مصلحه الدوله

بصراحه الكلام من نوع "المعارضه الرشيده" دى ميفرقش كتير عن كلام السادات بتاع "الديموقراطيه لها انياب"....كان كلام تحشيش برضه

و اشياء اخرى كتير ممكن تتقال فى المعارضه الرشيده بس ايدى وجعتنى


الأحد، 14 أكتوبر، 2012

اجابتك صح بس مش اللى فى دماغى!!

و انا فى 5 ابتدائى كنت متفوقه شويه و كان المدرس بتاع الانجليزى بيكرهنى لسبب غير مفهوم اممممم يمكن عشان مكنتش باخد معاه دروس.....

كان راجل شرير و غبى ضرب احيانا من غير سبب من النوع اللى تحس انه ظابط امن دوله....

جه فى يوم كتب جمله على السبوره و عليها سؤال جرمر....وقفنى و قال لى حلى....حليت السؤال....لقيته بيقولى هو اجابتك صح بس مش هى اللى فى دماغى...و ضربنى بغباوه بعصايه كده شبه نابوت الغفير

هنا يظهر سؤالين: الاول/ انا ليه لسه فاكره الموضوع ده بتفاصيله و ليه بفكر فى الموقف ده النهارده بذات؟؟ التانى: انا ليه مردتش عليه؟؟؟ ليه ما دفعتش عن نفسى؟؟ انا جاوبت السؤال صح يفرق ايه بقى هى اللى دماغك ولا لا؟؟؟ و لو كانت الاجابه صح بشكل مختلف عن اللى فى دماغك هل ده يستدعى العقاب؟؟ و هل العقاب يبقى بالضرب؟؟

الاهم هو ضربى فى اليوم ده علمنى ايه؟؟؟...يمكن ان اللى بعمله مش صح غير ما يطابق اللى فكر المدير المباشر بتاعى؟؟ او مثلا علمنى انى اربط الحمار مطرح ما عايز صاحب الحمار؟ 


القصه دى و غيرها مما اخجل من روايته اهداء الى وزير التعليم

http://www.almasryalyoum.com/node/1175301

فرج رضوى عاشور




عشت مع ندى ايام طويله...عشت مع ندى الطفله ذات الفستان الاحمر و الاب المسجون..عشت مع ندى المناضله بين جنبات الجامعه....عشت مع ندى هاربه بالخزى الى فرنسا...عشت معاها فى احضان نادر و نديم ...عشت مع عقده الذنب من سهام و اروى ....حبيت رحلتها و ان كانت المتنى كثيرا





طريقه السرد يؤخد و يرد عليها...فهى من جانب صعبه على المؤلف من حيث التسلسل غير الزمنى و ذكر احداث قبل احداث و كأنها قصه حقيقيه ليست من وحى الخيال او الفكر فهى مهاره عاليه اشهد بصعوبتها و احترمها بل واقدرها , لكن فى المقابل الطريقه دى "بتلخبط"القارئ احيانا و تدخله فى دوامه من التفاصيل تتطلب ذاكره احيانا كثيره مما ارهقنى

لم استمتع بها بقدر الطنطوريه و ثلاثيه غرناطه لكنها بالتاكيد اكثر من المتوسط

لكن اكثر ما ضايقنى هو اسم الروايه الذى لم يكن مفهوما حتى الرمق الاخير من الروايه اى الفصل الختامى ....و حينما وصلت اليه لم يقنعنى البته على الرغم من انى قريت "تلك العتمه الباهره"كاملا لكنى لم اجد مبرر لفعله رضوى عاشور

كم اكره النهايات المفتوحه او لنقل الانهايه


السؤال بقى: هو جرنال الاخوان بيشير لايه؟؟؟


على رأى بابا: هما الاخوان نسوا انهم هما بقوا السلطه ولا لا؟؟

لما جرنال الاخوان "الرسمى" يلبس كل اللى حصل ل"امن الدوله" يبقى فى حاجه غلط....

لان على حسب اخر معلوماتى ان امن الدوله ده جهاز حكومى تابع لوزاره الداخليه التابعه لرئيس الجمهوريه اللى هو اخوان !!!

يبقى حاجه من الاتنين: يا اما رئيسهم المباشر اللى هو مرسى اللى نزلهم و قال لهم خربوا براحتكم و هو ما لا اظن ان جرنال الاخوان بيشير اليه

او

ان يكون الضباط دول اللى بيشتغلوا فى الدوله و بيقبضوا من ميزانيه الدوله اللى هى مش ناقصه بلاوى...خارجين عن السيطره....و ساعتها يبقى رئيسهم المباشر اللى هو برضه مرسى مش عارف يلم رجالته و سايبهم يحرقوا البلد و ملوش حكم على وزارته و هو برضه ما الا اظن ان جرنال الاخوان يشير اليه

 السؤال بقى: هو جرنال الاخوان بيشير لايه؟؟؟  

الأربعاء، 10 أكتوبر، 2012

اسهل حاجه فى مصر انك تبقى وزير


اسهل حاجه فى مصر انك تبقى وزير

مثلا تبقى وزير كهربا و لما الناس تصوت ان الكهربا بتقطع ...تطلع تقول اعمل لكوا ايه ما انتوا كتير؟؟ ما انتوا بتستخدموا كهربا كتير؟؟ اطفوا النور و هو يتصلح.....

تبقى وزير المياه و كل ما المياه تقطع تطلع تقول يعنى هنعمل ايه؟؟ ما انتوا كتير؟؟ اقفلوا المياه شويه...و يمكن يدى لنا محاضره عن فوايد مناديل الحمامات

او تبقى وزير مواصلات و كل ما الناس تشتكى من المواصلات تطلع تلبس بدله حلوه و مش بعيد جزمه جديده و تملى صدرك هوا كده و تقول بكل ثقه : انتوا كتير و المواصلات قديمه...مفيش ميزانيه...السنه الجايه (طبعا من غير ما يزيل الكلمه ب ان شاء الله) هنعمل كذا و كذا...انا وزير بقالى شهرين بس اعمل لكوا ايه يعنى؟...و يمكن يشرح لك فوايد المشى

او تبقى زى عصام شرف (الله يسامحه بقى) و كل ما حد يكلمك ترد عليه و تقوله انا مش بنام...
حكومتى العزيزه:انت شغالنا بنومك ليه ؟

او تبقى زى قنديل و تشرح للمواطنين فؤائد القطونيل...

ما هو انا لو عايزه اطفى النور مكنتش جبت حضرتك وزير...لو هاطفى المياه كنت مسكت انا وزاره المياه...لو مش عارف تعمل حاجه فى شهرين مش هتعملها فى سنتين ده حتى زمان كانوا بيقولوا الغربال الجديد له شاده مال غربالنا مرخرخ كده ليه؟...و مش عايزه اعرف الوزير بينام او لا؟؟ بيصلى او لا؟؟ انا عايزه اشوف شغل....اه و طبعا لا اقبل انى اسمع فوايد القطن من رئيس وزاره مصر....

بس ارجع و اقول مدام "الناس" اللى هما الاخوان و لجانهم الاليكترونيه شغاله مبسوطين يبقى فل...و بما ان رب البيت بالدف ضاربا بالتبريرات فطبيعى الوزراء يبقوا كده و اكتر كمان...

كان فى نكته مشهوره فى الثمانينات بتقول: واحد قاعد على القهوه قال لصاحبه انا ممكن ابقى مدرب المنتخب...رد عليه صاحبه قال له ازاى؟ ده مبتفهمش فى الكوره هتدرب ازاى؟؟...قال له مش مدرب المنتخب بيقبض بالدولار و بيتغلب؟؟ خلاص يدونى نفس الفلوس و انا اتغلب لهم ...

نفس النظريه...خلونى ابقى وزيره و اشتغل لكوا تبريرات بالجمله....التبريرات لا دين لها

الثلاثاء، 9 أكتوبر، 2012

نظريه المواطن الخيشه


نظريه المواطن الخيشه:

ده نوع من البشر كده شغلته فى حياته انه يتبهدل....

يصحى من نومه غالبا قرب الفجر بس مش عشان يصلى و ينام زى حبايبنا الحلوين...بيتهرس فى الاتوبيس اللى كان ب50 قرش و فجأه بقى بجنيه مع انه هو هو نفس الاتوبيس , الكمسرى بيصرخ فى وشه هو عشان يدخل جوه, جوه فين؟؟ محدش بيرضى يجاوبه على السؤال ده...مفيش حته حديد يمسك فيها من المرجحه لكن المواطن المؤذى كسرها و الحمد لله...يروح الشغل يكون وظيفته انه يتمسح "بيه" الارض و ليس العكس لا قدر الله ...

المواطن الخيشه مش دايما موظف لا خالص....احيانا كتير بيكون طالب المفروض يتهزأ  هو ساكت...يلعبوا فى نظام امتحاناته 30 مره عشان يرضى رئيس القسم....عندك مثلا اختراع مصرى عبقرى محدش يعرف بوجوده غير قله قليله فى مصر اسمه "طالب خامسه او سادسه قديم" دى مصطلح كده لواحد خلص فتره عقوبته فى السنه الدراسيه بس محدش راضى يفرج عنه......

 احيانا يكون اختراع مصرى تانى اسمه "نايب قسم" او دكتور امتياز و ده حاجه كده برضه مزيج من الممرضه و عامل النضافه مع مسؤوليه كطبيب فى المصايب بس لكن اكيد  مش فى المرتب....

و فى طبعا "المواطنه الخيشه" دى بقى تلبس حجاب متلبس هتتعاكس و هيتحرش بيها و هتسكت...هتحط الجزمه فى بقها و هتسكت...مهما وعدت نفسها انها المره الجايه مش هتسكت و هتصرخ و هتلم عليه الناس ....برضه هتسكت اخرها هتسيب المكان او الاتوبيس وتمشى .....

لعلنا...لا ننسى



يا خلق تكره كل شئ جميل 
يا عباد تبات عقلا تقوم مخابيل
كيف خي عز عليه وجود خيه 
وكيف قابيل اشتاق لدم هابيل

عبد الرحمن الابنودى

*فى ذكرى مذبحه ماسبيرو...و فى ظل كون سفاحى تلك المجزره خارج السجون بل توليهم مناصب فى الفريق الرئاسى لمرشح الثوره!!!!! لعلنا لا ننسى

فكرنى كده التليفزيون المصرى اتطور ازاى؟؟؟....اه ما انا بقول برضه....احلى حاجه فى التكنولوجيا الحديثه انها اداه ضد النسيان..لعلنا لا ننسى

الخميس، 4 أكتوبر، 2012

the over and over again movies

among all movies that i watched ...and believe me i watched many movies hahaha may be too many movies there was some of them 
that deserve the name of : the over and over again movies

اعذرنى على الحته لغه الفرنجه دى بس هى بصراحه متجيش غير كده هو لقب و لزق بيها خلاص باختصار ده لسته افلام اقدر اشوفها عشرين مره و ما ازهقش مش عارفه ليه؟! فى افلام كتير عبقريه عشقتها لكن مش كل الافلام العبقريه دى اقدر استحمل اشوفها تانى لذا كانت تلك مجموعه تانيه خالص....دعونى اقدم لكم لائحه "ذا اوفر اند اوفر اجين موفيز" من غير ترتيب كده:

Stranger Than Fiction 2006

يحتل طبعا مرتبه اولى فى الافلام دى..Stranger Than Fiction ...بحب اشوف الفيلم ده كتييير يعنى لو جه على التليفزيون (بيلف مى بيجى كتير) بتفرج عليه و تانى بالليل فى الاعاده...بحب اشوف الكوميديا الراقيه او يمكن الكوميديا السودا اللى فى الفيلم ده....طبعا داستن هوفمن بطلته القصيره ممتع...يمكن كمان جو الادب و الروايات اللى فى الفيلم مشجع...
little did he know
بعشق واقع الجمله دى فى الفيلم...بنهايته اللذوذه ...فيلم يستحق المشاهده من غير ما تعد المرات

The Truman Show1998
احد اهم افلام السينما الامريكيه اللى اتظلم جامد و مخدش اى اوسكار و فى رأى وصمه عار فى جبين الاكاديميه انها اهملت الفيلم ده و احتقرته يمكن عشان كوميدى انه ...حظه وحش جدا تقريبا كان مع شكسبير ان لاف و اتهضم حقه جامد فى الجوايز....لكن فكك من كل ده...ده فيلم ببساطه عبقرى....اقدر اتفرج عليه الف مره...بحب اتفرج على اللى حواليه و هما بيعملوا اعلانات و بيتسموا قوى للكاميرا...و هما بيمنعوه من انه يسافر...و هو بيلمس السما فى الاخر...و هو بيقول 
Good morning, and in case I don't see ya, good afternoon, good evening, and good night

The King's Speech 2010

الفيلم ده بقى الاكاديميه ادتوا حقه كامل...4 اوسكار الكبار احسن ممثل و فيلم و اخراج و سيناريو ده غير 80 جايزه تانيه و 101 ترشيح....ده بقى حملته على اللاب كل ما احس ان الدنيا ضلمت فى وشى شويه افتحه و اتفرج عليه...يمكن شفته امممم حوالى 18 مره لحد دلوقتى....بعشق بدايته تهتهته كولين فيرث و اللكنه الانجليزى طبعا...بحب الوسط بتمارينه و فتح قلبه و ذكريات امير تحسه فى الاول مرفه لكنه من جوه مكسر و مجرح زينا كلنا...بحب نهايته و انا بقول معاه الخطبه و بصلح له غلطاته و قلبى بيتخطف معاه لما يقف او الكلام يتحشر فى حنجرته....يمكن بلاقى فيه نفسى احيانا لما بكون بتخانق و الكلام يقف فى زورى زيه...

the sixth sense

اعترف ان الفيلم ده غريب على التركيبه شويه نظرا لانه فيلم حبكه محدش بيحب يتفرج على فيلم فكرته نفسها هى قلبه...لكنى بصراحه بحب اتفاجئ كل مره...اوووه بقى بروس ويلز شبح...ده غير ماستر سين الولد و هو بيحكى لامه على انه شاف جدته...

there will be blood 2007

ده بقى الناس كلها اتفقت عليه انه فيلم عبقرى بس متنساش ده مش تقييم للعبقريه او الجوده ..ده تقييم للمشاهده المتكرره لكن مين يقدر يقاوم اداء الممثلين العبقرى فى الفيلم ده؟...اداء دانيال داى ليوس و هو بيدفن "اخوه"...و هو قاعد مع ابنه الاصم...و هو فى الكنيسه بيعترف بالعافيه عشان ياخد الارض..و هو بيذل القس فى الاخر و بينتقم منه...الفيلم ده فيه يجى 6 مشاهد ماستر سين يسرنى و يشرفنى انه اشوفهم ميت مره..

grease 1978
ده بقى فيلم وهم...يجى بالليل اسهر له...يجى بالنهار اغيب من الكليه او اعيد مواعيدى كلها عشان الحقه...مش بس لانى حافظه كل اغانيه و ببقى شكلى "ويرد" جدا و انا بغنى معاه بس لان ترافولتا فى الفيلم ده محدش يعرف يقاومه خالص....الشباب حلو برضه...دانى و ساندى <3

[first lines] 
Sandy: I'm going back to Australia; I might never see you again
Danny: Don't... don't talk that way, Sandy 
   Sandy: But it's true! I've just had the best summer of my life, and  now I have to go away. It isn't fair 
[Danny starts kissing her] 
Sandy: Danny, don't spoil it
Danny: It's not spoiling it, Sandy, it's only making it better
Sandy: Danny... is this the end 
Danny: Of course not; it's only the beginning



فى افلام تانيه؟؟؟ يوووه كتير...بس دول اللى فى الحته الشمال اكتر من اى حاجه...


الأربعاء، 3 أكتوبر، 2012

عن اضراب الاطباء اتحدث


من الاول كده و عشان نبقى واضحيين انا من اشد المؤيدين لاضراب الاطباء ...و لو الدكاتره مش هيقفوا مع بعض فعلا من غير اتجاهات حزبيه او حسابات سياسيه يبقى مفيش فايده فعلا...و لو الاطباء فضوا الاضراب بوعود على الورق كالعاده يبقوا من الاخر عبط دى فرصه العمر مش بس لتصليح الاجور لكن لاصلاح المنظومه كلها يا نستفيد منها و ندخل التاريخ يا نبقى هبل زى اللى قبلنا...تأييد خسرنى اصدقاء حتى بس انا ماشيه على قاعده : انا مش هابيع الصدق بالاكاذييب و مقولش للحمل الوديع يا ديب و مقولش للديب يا اعز حبيب...و الصدق مهما عز من الازمه مش ههتز...و دى مسأله مبدأ

فمتجييش بقى على الدكتور اللى بيتضرب كل يوم من البلطجيه و نقابته مش مهتمه بيه و اتضرب فى كل مياديين الثوره و اتبرئ منه فى كل احداثها و اعتقل و اتبهدل و اتقتل طلاب كليته و فى بيسكن فى مزبله و تقول لى انه هو الديب......و ان وزير الصحه و النقيب و كل كبارات العمداء و الدكاتره ذوى الحل و الربط اللى الواحد منهم بيقبض من الحزب و من العياده و من البيزنس و من المستشفيات الخاصه هما الحمل الوديع...

العيان اللى متضرر من الاضراب يطلع على وزير الصحه اهو دكتور برضه خليه يعالجك مع انى اظن انى نسى الطب....او اطلع على رئيس الوزراء قال له يفتح لك مستشفيات الجيش اللى بتاخد ميزانه لوحدها ....او اطلع على الريس و قول له يحل ازمه الدكاتره بانه كبدايه يحترم عقولهم اكتر من كده...او على رأى استاذ عماد هلال المدون القدير :  او يروح يشرب بول ابل حسب اللى ماشى اليومين دول


الجلديه...الرمد....الانف و الاذن و الحنجره....النفسى...معظم حالات الجهاز الهضمى...معظم حالات التنفس...معظم حالات القلب....عيادات السكر...عيادات الكلى...متابعات حمل النسا و التوليد....عيادات الروماتوزم
كلها اقسام لا يوجد فيها طوارئ و معظم امراضها مزمنه.....عشان بس نخلص من حدوته الناس اللى بتموت

و كله بقى كوم و كلام جرنال الاهرام "اللى المفروض انه محترم" و هجومه السافر على الاطباء و بقول ده طبيعى مش مجلس الشورى هو اللى حاطط رؤساء الجرايد القوميه عايزه مجلس شورى الاخوان يحط صحافيين شكلهم ايه يعنى؟؟؟....طبيعى يحطوا كلام *** عن اضراب الدكاتره اللى هدفه المريض قبل الدكتور...عشان كده لما قولنا الجرايد القوميه تبقى قوميه فعلا يعنى للبلد مش للحكومه كان عندنا حق...و لما قلنا نحرر التليفزيون المصرى من فكره لحس البياده كان عندنا حق...و على رأى صاحبتى ان "قوميه" دى خالته خاله مين مش مهم بس هى خالته ...و الجدير بالذكر انها اخت سلميه بتاعه المظاهرات و ساميه بتاعه مهنه الطب

التالى هو جزء من واقع مستشفيات وزاره الصحه المصونه المصره على الاستمرار فى المهزله دى:
من درج عيادة النزلات - استقبال مستشفى المنيرة الجامعى للاطفال

على يدى....كل صحابى فاكرين شكلى و انا ماشيه بفرده جزمه واحده و التانيه بقتل فيها الصراصير فى عنبر الرمد قبل امتحانى فى الدمرداش المصون....دى بقى بذات على يدى...انا كنت هنا و صاحبتى كانت هنا و الصرصار كان هنا فى عنبر الرمد...و انا بفرده واحده بضرب الصراصير بالتانيه....هل لو زود المرتبات و ساب الصراصير انا هابقى مبسوطه ...لا....

سألونى يعنى نعمل اضراب و نوقف الشغل عشان صرصار؟؟...جاوبت: لا نعالجهم و نخفههم و يجى الصرصار ينقل عدوى جديده و نعالجهم من الاول

سألونى طب ما تتصرفوا كاطباء؟؟...جاوبت: اعمل ايه مثلا؟؟ نمشى كل واحد بازازه راجون؟؟...انا عملت اللى عليا لما شفت الصراير مقرفتش ولا خفت قلعت جزمتى و قتلتهم بس ما اقدرش امشى بفرده واحده طول العمر

مستشفى بلطيم المركزى _محافظة كفر الشيخسكن الاطباء
ده سكن الاطباء ولا اوضه الفيران؟؟...ترضى تنام فى اوضه زى دى؟؟؟ لو زود المرتبات من غير احترام لاداميه الاطباء يبقى انا مبسوطه؟؟ لا


 انا بذات تفرق معايا لان مجموعى على قده يعنى ليا رحله مؤكده مع مستشفيات القرى و النجوع انا تفرق معايا قوى لانى هابقى جزء من المنظومه و مش هاسمح لنفسى افرط فى حقى و حق العيانين من دلوقتى

مطبخ بني سويف العام الذي تسبب في إصابة 8 مريضات بالتيفود من 15 /7 حتى 21 / 7 منهن مريضه توفيت يوم 15 /7

و سلملى على مركز مكافحه العدوى




لا بس حاطيين علامه الخطر الحمرا على الباب...يا واد يا مؤمن
*************************************

و يظل السؤال لمصلحه مين ان الاضراب يقف و تفضل كل حاجه على حالها؟؟؟ هل لمصلحه حد ان الوضع ده يستمر؟؟ لا دكاتره ولا مرضى و لا اى حد....و الوزير اللى كل همه انه يسكت الدكاتره و يكمم افواهم عشان يقدم تقرير هادئ لرئيس وزارته وزير فاشل ملوش احلام او طموح....