الخميس، 23 يونيو 2011

حكومتى العزيزه:انت شغالنا بنومك ليه ؟؟



الجمل: لن أتقدم بالاستقالة والحكومة لا تنام بسبب ضغط الإخوان عليها

الإثنين، 20 يونيو 2011
http://www.youm7.com/News.asp?NewsID=438572&SecID=65&IssueID=0


"شرف": "ما بقيتش أعرف أنام إلا لما أسمع "واحد اتنين عصام شرف فين!"

الأربعاء، 22 يونيو 2011
 http://www.youm7.com/News.asp?NewsID=440604&SecID=65&IssueID=0

فاكرين مسرحيه "سك على بناتك" لما حنفى جه لحماه بيشتكيه من ان مراته خدت العفش و هى غضبانه ..فرد عليه حماه : مش معاك نسخه من القايمه ؟؟..رد عليه حنفى : و انا هنام عالقايمه؟؟...فحسم حماه الحوار بجملته الشهيره : انت شغالنا بنومك ليه ؟؟ ما انشالله تنام و انت اقف زى الحصنه .....


فها انا اوجهه نفس الكلام لحكوماتنا الموقره : انتوا شغالنا بنومكم ليه ؟؟ نوم ايه ؟؟ هو  انتوا ليكوا نفس تناموا فى الايام المهببه دى ؟؟ اعملوا شغلكوا و ريحيوا الناس و ارتاحوا ..


س/ هل عمرك قريت تصريح زى كده من حكومات اوروبا و الدول المتقدمه ؟؟

ج/ اظن لا طبعا ....و عموما جو حرام عليكوا خفوا عنهم , كفايه اللى هما فيه بقى فاكس قوى بقى و نظام الاهات و الدموع و اكل الفول من على العربيات و تخريط البصل عالقلب مش هياكل معايا تانى ...و على رأى حليم "مبقاش في مخدوع بابتسامات و دموع"


فاما عن تصريح دكتور الجمل : بقى الحكومه مش بتنام من ضغط الاخوان ؟؟!!!!!!!!!!! هو الاخوان ليهم عندكوا ايه يعنى عشان يحرموكم من لذيذ المنام على رأى فايزه احمد ...الاخوان قوه سياسيه و حزب لسه مش ممثل فى البرلمان نظرا لان مفيش برلمان و بالتالى فلا سلطه ولا سلطان و لا اى نوع من الضغط مسموح او مقبول منهم على السلطه التنفذيه فى مصر حتى الان ...لما يبقى فى انتخابات و ياخدوا تلت البرلمان ولا نصه زى ما بيقولوا يبقى ليا كلام تانى ....عارف دى عامله زى ايه زى واحد بيحكم على واحده فى حاجه قبل ما يخطبها اصلا ....اه و بالمناسبه التصريح ده كان من يومين و لكن النهارده الدكتور الجمل فعلا قدم استقالته و قبلها شرف و رفضها المجلس العسكرى و التصريح ده فكرنى بتصريحات وزاره نظيف : "لا زياده فى اسعار الكهرباء" فاتوماتيك تجهز نفسك لزياده فى الفاتوره , الموضوع كان فى غايه البساطه فحرف "لا" غلطه مطبعيه مكرره فى جميع تصريحات حكوماتنا حاضرها و مستقبلها ...


فاما عن تصريح عصام شرف اللى مفاداه انه اتعود على ان الناس بتناديه و يطلبوا منه فئويات و هو مبسوط قوى اقول له : ده فى حد ذاته فشل ....فنزول مهندس الميكانيكا تحت العربيه عشان يصلحها او ان الدكتور هو اللى يشيل المرضى او ان مدير المصلحه ينظف المكتب فشل فى اداره كلا منهما فى الاداره , المهندس يوجه الميكانيكى , الدكتور يشخص و يعالج و التمرجى -مش الممرضه المؤهله- اللى يشيل المرضى , مدير المصلحه يدير و الساعى هو اللى ينضف ....
خصص شخص او اداره ما للرد و حل مشاكل الناس بدل ما يجوا لك شخصيا و بما انك مش هتقدر تشوف كل الناس فهتظلم اكتر بالطريقه العشوائيه دى ...غير ان ده بياخد وقتك و مخليك مش مركز فى شغلك الاهم اللى مبعتمولش بدليل ضغط الاخوان عليك .....


ملحوظه كده على جنب : "امال فين الفول ؟؟؟؟" 


فوجئ رواد ماكدونالدز المهندسين بجوار سور نادى الزمالك بالدكتور عصام شرف رئيس مجلس الوزراء مع أفراد أسرته في المطعم, وكان ينتظر حفيدته حتى تنتهى من اللعب أمام الحجرة المخصصة للعب الأطفال, كان شرف يرتدي ملابس بسيطة -تي شيرت وبنطلون, وغادر المطعم وهو يحمل حفيدته


http://www.akhbarak.net/articleview.php?id=2567274

19 التعليقات:

ENG./ELSAYED,PMP يقول...

طول عمرهم مصدرين نفسهم على انهم شوية ناس بركة طاعنين ف السن ووراهم هم ما يتلم ...!
تحياتى

كريمة سندي يقول...

طريقة عرض لذيذة لمشكلة عويصة بجد .. صح النوم يا بلد !!!!

تحياتي الصادقة

Tamer Nabil Moussa يقول...

النوم مطلوب عشان راجة الجسم ولا عمل ولا نتائج بدون نوم وراحة

بس الحاجة اللى كلنا نتمنى ان يكون فى نتائج ايجابية تفرح وتسعد شعب طال انتظارة

مع خالص تحياتى

أم يقول...

ولا أحلى من كدا .. المسائل شوربة خالص .. تحياتي

Bent Men ElZaman Da !! يقول...

احنا الحكومه بتاعتنا مختلفه عن اى حكومه
لازم يهتموا بالنوم
ماهو لو مش عرفوا يناموا هيطلع علينا :))
موضوعك جميل اوى
تسلم ايدك

غير معرف يقول...

هههههههه أنا بقيت بسمع الجمله دي كتي (انت شاغلني بنومتك ليه) بس انت صورتيها صح.
هتزعلي مني لو قولتلك اني مع شرف رغم ان معظم الناس ضده بس أنا حاسه انه ماشي بخطوات ثابته و عاجبني تحديه انه يمسك في الوقت ده و بساطته حاجه مش متعودين عليها لكن زي ما انتي قلتي مفروض يبقى في ناس كتير يساعدوه في حل المشاكل اللي مالهاش آخر.
موضوع مهم بطرح جميل
تحياتي ليكي

شيرين سامي

Ms Venus يقول...

عاوزين يناموا !!!

لما دلوقتى يناموا امال امتى هيصحوا !


رحمتك يارب

Tarkieb يقول...

دة أنت متابعة ومحللة جددة....حلو اووي تعليقك على الاحداث بكوميديا سوداء...الجمل ده لوحده اكبر كوميديان

بسنت يقول...

والله اتمنى اشوف اى قرار صادر بدل التصريحات اللى على الفضيه والمليانه
انا شخصيا مش عايزه اشوف اى مسئول فى التليفزيون ولا لقاءات ينفذوا واعمالهم وادارتهم هى اللى هتتكلم

بس لازم تعذريهم بردوا النوم سلطان زى ما انتى عارفه

Carmen يقول...

رائع فكرك ومتابعتك ووعيك حبيبتي تسلم ايدك
تحياتي

حضرة الظابط يقول...

احم احم
سلامو عليكو

تصدقي انا كمان مبقتش اعرف انام
الناموس عندنا بايخ قوي
فكرك اعمل مظاهرة ولا اعتصام ؟؟
ولا اطلع علي شرف علي طول
بس هلاقيه علي عربية الفول ولا في مكدونالز
يارب يكون في مكدونالز


حلو البوست
سلامو عليكو

قلم جاف يقول...

يرى البعض أن "عصام شرف" أفضل دعاية للثورة ، لييييه؟

لإن أداؤه وأداء حكومته البشع حيخلي الناس تشتم النظام السابق اللي "اكتشف" "عصام شرف" وخلاه وزير في يوم من الأيام!

لكن دة يترد عليه بسؤال تاني : ما دام النظام السابق الفاشل جاب "عصام شرف" وزير ، جه رئيس وزارة بعد الثورة ليه؟

صعبان عليا "عصام شرف" وأنا زعلان له وهو مستاء من إن الناس بتقول له "واحد اتنين عصام شرف فين".. بما إن الميديا وإعلام المال السياسي اللي سرق الثورة صور له إن الشعب بيقول له - مع الاعتذار للبنانيين- "واحد اتنين تلاتي.. شرف يا حياتي"!

عندما تبعثر رسائلك يقول...

http://fedkalemat.blogspot.com/

سيدات com يقول...

ربنا يحفظ مصر وشعبها وجميع المسلمين......

مصطفى سيف يقول...

هذه الحكومة امتداد لما سبقها من حكومات
تدهور الاوضاع الداخلية واهمالها كعادة من سبقوها
تحياتي

Carmen يقول...

http://karmenhome.blogspot.com/2011/07/4.html

http://karmenhome.blogspot.com/2011/07/3.html

http://karmenhome.blogspot.com/2011/07/blog-post.html

http://karmenhome.blogspot.com/2011/07/2.html

لك هدية روح استلمها :D

ابراهيم رزق يقول...

يا رب تكونى بخير

طمنينا عليكى

تحياتى

ع.سالم يقول...

حكومتنا ما زالت حكومتنا .. !
أحب أهنيك على التدوينة دي بالذات وعلى المدونة كلها.. أنا من متابعينها من زمان بس معرفش ليه كنت بكسّل أعلّق! (بس خلاص هعلّق بعد كده :))

تحياتي ليكي.. وياريت تلقي نظرة على مدونتي :)

http://3een-wants-to-see.blogspot.com/

الاحلام يقول...

المهم ان تكون النتائج قرارات صائبه تكون لصالح مصر والمصريين تحياتى الاحـــــــلام

إرسال تعليق

حلو؟؟ وحش؟؟ طب ساكت ليه ما تقول....