الاثنين، 20 يونيو، 2011

حمله 20 يونيو ..ضد التحرش!!





التالى هو جزء من تدوينه سابقه احسست بالالحاح طرحها فى هذا الوقت :


"اتضايقت؟؟؟ طبعا اه...اتضايقت من الحاله المزريه اللى وصل ليها شبابنا ...الشباب اتهبلوا ولا ايه؟؟ تحرشات و معاكسات عالمكشوف كده؟؟؟ طلبه جامعيه من كليات المفروض انها محترمه و للاسف معظهم تجاره واداب وحقوق....و بتحرشوا بمين؟؟ بطالبات جامعيات برضه بصراحه حاجه تكسف بجد على الحاله الزفت اللى وصلنا ليها دى......يعنى انت سايب كليتك او بيتك و جاى مخصوص عشان تضايق بنات الناس ولا جاى تستمتع و تقضى وقت لطيف؟؟!!!!....اوعوا حد يقولى ان البنات هما السبب وانهم هما اللى بيدفعوا الشباب لكده لان مش ده اللى بيحصل لان البنات اللى فى دماغكوا دول الشباب بيخاف يقرب منهم بالعكس دول بيستغلوا البنات البسيطه ذات المظهر العادى اللى مش هتعرف تدافع عن نفسها او هتخاف من الفضيحه والاستغاثه بالاخريين....

ملحوظه كده على جنب: انا مش بتهم الكليات دى بعدم الاحترام او بتهم شبابها لان برضه من اللى شوفته النهارده شفت نماذح حلوه قوى من نفس الكليات...بما انى كنت لوحدى بما ان اانا واصحابى تهنا فى الحفله او تفرقنا لاسباب مختلفه و ابتدى اللى حواليا يضايقونى على الرغم من ان كعب جزمتى ال 10 سم كان بيقوم بالواجب من حيث هرس رجل من يقترب و رفض انى اخلى جد يبوظ متعتى عليا فتوليت الاهتمام بنفسى والدفاع عن موقعى المتقدم بالكوع والخبط لو عاز الموقف الا ان شله بنات و ولاد معرفهومش لما لاقونى واقفه لوحدى لاقيتهم بينادوا ويقولوا اقفى معنا عشان محدش يضايقك...الشله دى كانت 3 ولاد و بنتين الولاد عاملين شبه كردون عشان محدش يضايق اصحابهم والغريبه انهم وقفونى معاهم و سط البنات و اصبحت الحمايه مشتركه بعد التعرف طلعوا اولى و تانيه حقوق وتجاره ....بصراحه اتسعدت قوى ساعتها لانى حسيت ان البلد لسه فيها شباب جدع و رجاله وسط العيال و الفرافير...." 

القصه السابقه كانت بتاريخ 13 اكتوبر لعام 2010 يعنى من حوالى 8 شهور كامله و كانت بعد ذهابى لحفله تبع الجامعه للمطرب حكيم و اقيمت الحفله داخل الحرم الجامعى ....

ممكن اكون ما اديتش الموضوع حقه ساعتها نظرا لاحراجى الشخصى او لحساسيه الموقف لكن بعد مرور 8 شهور على الحادث اظننى جاهزه لتتحدث بقلب مفتوح و صراحه عما حدث فى هذا اليوم و غيره من الايام و ما نراه يوميا دون ان نستطيع التحدث فيه و لو للحظه ...


ما حدث فى ذاك اليوم خصوصا كانت حالات تحرش كامله و ليست جزئيه ...اقصد -و اعذرنى لصراحتى الموجعه- انها لم تكون مضايقات او حتى ملامسات بل كانت اشبه بالاغتصاب !!!!....ارجوك لا تغضب من صراحتى او وقاحتى لكن هذا ما حدث امام عينى ..

س/ كيف يجرؤ طالب جامعه على الاقدام  على التحرش  بطالبه جامعيه بكل هذا الكم من الفجاجه و الوقاحه داخل الحرم الجامعى؟؟
ج/ لانه متأكد انه لن يكشف لعلمه و اعتماده على صمت  تلك الانسه و خاصه لانه مختارها بمواصفات معينه , و لتأكده من افلاته من العقوبه - ده لو كان فى عقوبه اصلا- بتدخل ولاد الحرام اللى هيفضوا الليله دون اى خساره له

س/ اين الامن فى الجامعه ذلك الموقف ؟؟
ج/ فى الجامعه فى ذلك الوقت قبل الثوره كانت امام الجامعه تقبع عربيه امن مركزى غير الامن الداخلى للجامعه لكن كل هؤلاء كانوا بيتفرجوا على حكيم او بيستمتعوا بالفرجه على التحرش 

س/ ما رد فعل الطالبات؟؟
ج/ الصمت و محاوله الابتعاد ...فقط

س/ ما مواصفات الطالبات المتعرضات للتحرش؟؟
ج/  يسرنى انك سألت السؤال ده ... بنات جامعيات ذوات البنطلونات الجينز الفضفاضه و البلوزات الكاروهات و الطرح المتداوله / بنات جامعيات بجيبات عاديه و بلوزات متوسطه الطول و طرح طويله او قصيره / لمحت عدد 2 بنت بخمار مكشوف الوجه....بنات عاديات من النوع اللى بيحاول يبعد عن الشر و يغنى له خوفا من الفضيحه و نظرات الناس القاسيه التى لا ترحم تلك البنت التى تصرخ لتدافع عن شرفها اولا و كرمتها و احساسها انها بشر ثانيا ...

 س/ هل تقبلين التحرش اوحتى المضايقه بالنظره لبنت ترتدى ملابس مكشوفه ؟؟
ج/ طبعا لا ...طبعا لا ...فى اختراع ظهر فى القرن الماضى اسمه الحريه الشخصيه و غض البصر للى عايز يتقى الله...

س/ هل انتشار التدين الظاهرى بين الشباب بالذقن و الجماعات الاسلاميه قلل من نسبه التحرش ؟؟
ج/ لا

س/ هل الحركه الاسلاميه مسؤله عن ذلك؟؟
ج/ لا

س/ هل زياده نسبه الحجاب و انتشار الاسدال و الخمار و النقاب قلل نسبه التحرش؟؟
ج/ لا

س/ هل ساهم زياده نسبه الحجاب فى ازدياد التحرشات؟؟
ج/ لا اظن

س/ هل قللت الثوره من نسبه التحرش؟؟
ج/ لا...بدليل ان فى تحرشات اليومين دول شغاله جوه التحرير نفسه

س/ هل  تعرضت كل بنت فى مصر للتحرش ؟؟
ج/ 98% حصل و لو مره

س/ حتى انا ؟؟
ج/ حتى انا........


 يوم التدوين والزقزقة على تويتر وكل المدونات ضد التحرش الجنسي والعنف الجندري في مصر، شاركونا بمقالات، مدونات، أو تويتات طوال اليوم
يمكنكم التدوين باللغة العربية أو الإنجليزية، المهم أن تشاركونا

الهاش التاج الأساسي #endSH

بعد ما ظهر في بعض الصحف المصرية، من المهم التنويه بأن هذه المبادرة هي مبادرة مستقلة ومفصولة عن اي جمعية او تمويل. ان جمعيات نظرة وخريطة التحرش يتعاونون معنا على الموضوع ولكن من المهم التأكيد ان هذه المبادرة مستقلة وجاءت من ناشطين/ات مستقلين/ات.

الجزيرة الانكليزية ستقوم بتغطية الحدث مباشرة عبر برنامجها الجديد
The Stream

يمكنكم/ن اضافة اسمهم على تويتر بالاضافة الى الهاشتاج الخاص بالحدث اذا كنتم/ن تريدون التواصل معهم/ن وامكانية نشر ما تكتبونه في البرنامج.Ç

عنوان البرنامج على تويتر
@ AJStream

صفحة البرنامج
http://stream.aljazeera.com/

وقت العرض الحي
1930GMT/21:30القاهرة



سيقوم فريق عمل "خريطة التحرش" بتجميع التدوينات والزقزقات يوم 20 يونيو ونشرها على صفحة خاصة.

كما انضم الى الدعوة جمعية "نظرة" والتي ستنظم بالتعاون مع "خريطة التحرش" لقاء حواري بناء ينطلق من سؤال أساسى : ماذا بعد يوم التدوين و الزقزقة ضد التحرش الجنسى و العنف الجندرى فى مصر
فى تلك الحلقة النقاشية تفتح " نظرة للدراسات النسوية " و " خريطة التحرش " الباب للمدونين و النشطاء الذين خصصوا يوم الاثنين القادم 20 يونيو للتدوين من أجل انهاء التحرشات الجنسية و كل الممارسات العنيفة التى تعد أشكالا من التمييز التى يسمح بها المجتمع ضد المرأة سواء أخذت أشكال الايذاء النفسى أو البدنى او الجنسى

للتذكير : المسكوت عنه هى مبادرة اطلقتها " نظرة " فى بداية مايو من أجل الاقتراب من موضوعات اتفق المجتمع على اعتبارها تابوهات لا يجوز المساس بها , على أن تكون هذه المحاولات للاقتراب فى شكل أحداث فنية و ثقافية تعيد قراءة الكثير من المعايير الاجتماعية .


اللقاء الذى تنظمه " نظرة للدراسات النسوية " مع " خريطة التحرش" فسوف يكون الثلاثاء 21 يونيو 2011 في 44 شارع طلعت حرب

للمزيد من المعلومات الرجاء زيارة صفحة الحدث
http://ow.ly/5hFtB



11 التعليقات:

كريمة سندي يقول...

لم أفهم ما المقصود بالعنف الجندري فكلمة جندري ليست منشرة هنا

وأحيكم على هذه الحملة الهادفة والتي تتناسب مع المنهج الإسلامي القويم

تحياتي الصادقة

سمو الامير يقول...

اعتقد إنن الأسباب الجذرية للموضوع هي ضعف دور التعليم والأسرة والإعلام بالإضافة لضعف دور المؤسسات الدينية عن القيام بدورها
بالاضافة للغلاء وسوء الحالة الاقتصادية اللي أدى لتأخر سن الزوج
دعك بالطبع من انتشار المخدرات والمكيفات

وغيرها وغيرها من الأسباب اللي المفروض نقتلعها من جذورها

Tamer Nabil Moussa يقول...

التحرش سلوك غير محترم بالمرة

واسبابة كتير ومتشابكة

وربنا يصلح الحال

مع خالص تحياتى

غير معرف يقول...

أحييكي على صراحتك
مش كل البنات عندها الجرأه تعترف و لو لنفسها انها اتعرضت لده بندفن راسنا في الرمل كالعاده بس آن الأوان منسكتش.
تحياتي الخالصه لكي


شيرين سامي

العصفورية يقول...

إلي الموهوبة دودو
تسمحي لي أتحرش بيكي- عقلياً- وأسأل من أين لك هذه الشجاعة والثقة في النفس؟. يا ابنتي ليت شابات مصر كلهن لديهن نفس الشجاعة. يا ابنتي أنا كنت منذ يومين أكتب لصديقة مراسلة عن أيام كانت فيها مصر مختلفة وكانت النخوة والرجولة والإحساس بالمسؤلية تجاه كل بنت في الشارع هي السمة الغالبة ورغم أن الخسة والندالة كانت موجودة في بعض الناس إلا إن هذا المتحرش كان إذا انكشف للعامة بياكل أحلي علقة في حياته، لأن رجال وشباب مصر الجدعان وخاصة في الأحياء الشعبية كان عندهم مفهوم بنت الحتة ومبدئ نصرة الطرف المستضعف في أي موقف سواء سيدة أو رجل حتي. إن ما حدث ياابنتي من تحول في الخلق المصري وفي السلوك ظاهرة تحدث مع التحلل الأخلاقي السياسي والذي يفرز تحللاً اجتماعياً وأزعم أنها موجة عاتية سوف تنقشع بإذن الله وذلك لثقتي في معدن هذا الشعب وأدعو الله أن يحفظك وابنتي وبنات المصريين جميعهم حتي تنزاح هذه الكدرة في الأخلاق المصرية. حفظك الله وحفظ مصر كلها. مع خالص تقديري

Bent Men ElZaman Da !! يقول...

زى ما فى شباب بيتحرشوا بالبنات ومش بيراعوا حرمه اى حاجه
فى شباب بجد رجاله وبيدافعوا عن اى بنت يشوفوها فى موقف وحش
انتى عندك الجرأه انك تدافعى عن نفسك و تروحى حفله فى الجامعه ودول معروف بيبقوا عاملين ازاى لانى روحت حفله قبل كده وشوفت المنظر وكان فى بردو شباب بيحوطوا على البنات كده عشان مفيش اى حد يتعرضلهم
بس فى بنات تانيه مش هتقدر يكون عندها الجرأه دى ولا هتتكلم عشان بتتحرج وعشان زى ما قولتى "الفضيحه"
رغم انى مش شايفاها فضيحه بأى شكل من الاشكال
دى واحده بدافع عن نفسها
ان شاء الله تلم عليه الدنيا مش احسن ما تسكت
تاخد حقها افضل
تسلم ايدك على البوست

محمد الجرايحى يقول...

السلام عليكم ورحمة الله وبركاته
اقيمت الحفله داخل الحرم الجامعى .... الحرم الجامعى
هل بعد كل ذلك ومازالت الجامعة حرماً ..!!!!
لقد كانت قديماً حرماً عندما كانت لها قدسيتها وكان للعلم قدسيته وأيضاً للأساتذة قدسيتهم.
ولكن بعد أن تتحول إلى ساحة للتحرش أو حسب كلماتك الاغتصاب ..فماذا بعد ذلك.
لن أتكلم عن الحل من وجهة نظرى حتى لااتهم بالتزمت والتخلف وأننى من السلفيين أو الجهاديين وغير ذلك
وهذا لايمنع أن أشكر جرأتك وموضوعيتك وطرحك لهذا البوست الذى كشف عن الكثير .....

حضرة الظابط يقول...

احم احم
سلامو عليكو

انا تقريبا دلوقتي مريت علي اكتر من 10 تدوينات بتتلكم عن التحرش
بس مفيش ولا حد فيهم اقترح حل
والحكاية دي فعلا زادت عن حدها ومحتاجين حل ضروري
محتاجين نقول لا للتحرش بطريقة عملية اكتر


شكرا
سلامو عليكو

غير معرف يقول...

مقاله جريئه وموضوع يستحق المناقشه من كل الاتجاهات
Eslam

سيدات com يقول...

كلام حلو وجميل وصريح ...

غير معرف يقول...

u look like Eman el ba7r Darwish are you relatives?
Eslam

إرسال تعليق

حلو؟؟ وحش؟؟ طب ساكت ليه ما تقول....