الخميس، 2 يونيو 2011

ان غاب عنكوا بطرس غالى فكلكم بطرس غالى!!



الاول كده خلونا نتفق على ان احد الاسباب الهامه جدا فى نجاح الثوره كان العامل المادى ..لاحظ انى قلت نجاح الثوره و  ليست اندلاعها لانها بدأت فى البدايه مع شباب النت بسبب الكرامه و الحقوق السياسيه و شغل امن الدوله لكن تركيزى هنا على مرحله انضمام رجل الشارع العادى  و هم عاده اغلبيه صامته مطحونه تحت وطأه عجله الانتاج و دوامه الفلوس اللى اكيد كان من اكبر دوافعهم الحاله الاقتصاديه السيئه و معدلات النمو اللى محدش حاسس بيها و المرتبات اللى بتدفع دفع للرشوه و السرقه علنى .....

و طبعا كان بطل تلك المأساه وزيرنا الغالى بطرس غالى اللى كان بياخد منا ضرائب على النفس و الهواء و ان كان غير نقى ...

* 10% ضريبه مبيعات  : بمعنى اى حاجه تتباع و تشترى الدوله ليها فيها 10% و ان بيعت اكثر من مره فمش مهم اهو كله مكسب ...و ده يتضمن قطع غيار العربيات و بالاماره شوف فاتوره الميكانيكى بتاعك , يتضمن مكندولند و هارديز و بيتزا هات و غير هات بمعنى ان حتى قرارك ان تخرج مع اصحابك تاكل بره بتدى الدوله -من غير اى تعب او تكلفه منها- 10% مما تدفع فان كان الحساب 50 جنيه وجب ان تدفع 55 جنيه و الباقى فى ايد عمو بطرس غالى  و ان كان الضريبه دى بذات ابداع شخصى و كامل لوزير الماليه الاسبق محمد احمد الرزاز اللى حظى باكبر قدر ممكن من الكراهيه المصريه....و قد قيل عنه : 

- لو لم أكن رزازياً لوددت أن أكون رزازياً .. حكمة يحفظها عن ظهر قلب كل محصل للضرائب الرزازيه .. لدرجة أن أحد المحصلين أبدع قصيدة شعرية حباً فى الزاز ومطلعها

فات المعاد ووجب السداد فات فات تفيد بايه يا ندم وتعمل إيه يا عذاب

ورد عليه أحد الفقراء بقصيدة مطلعها

أخى جاوز الزاز المدى فحق الجهاد وحق الفدى

- بالكشف فى المعاجم المتخصصة عن كلمة رزاز .. نجد أنها من الفعل رزز أى نكد وكدر وعكر .. والترزيز أى السرقة بالإكراه .. ولا بد أن المؤلف كان يقصد أنها كانت تحت سمع وبصر الحكومة وجهازها الأمنى وقانونها المعروف بالطوارئ!

- قريباً سيصدر كتاب " الطريقة المصرية فى جمع الأوراق المالية " مؤلفه جابى – رزاز – رع .. وفيه شرح دقيق لكيفية استخلاص الأوراق المالية من الجيوب الشعبية وإدخالها إلى الجيوب الثرية .. وربما يستفيد منها الحرامية وذلك بعد مرورها على وزارة المالية !!
 
- و دى عينه من "نص كلمه" لاحمد رجب تلك الاوقات :   من شكاوى المقهورين ضحايا وزارة الابتزاز - المالية سابقًا - أن المموِّل الذى يتوجه لدفع ما عليه من ضريبة المبيعات يطلبون منه رسما جديدًا «جنيهين» اسمه رسم فتح الخزينة لوضع فلوس المموِّل بداخلها، وننبِّه وزير المالية على وجوب فرض رسم آخر «جنيهين أيضًا» اسمه رسم إغلاق الخزينة حتى لا يُضطرَّ الموظف إلى ترك الخزينة مفتوحة، لأن «أولاد الحرام كتير».

* الضريبه العقاريه :  و ما ادراك ما الضريبه العقاريه نار الله الموقده , تخيل الدوله بتاخد منك فلوس على سكنك و ان لم تمتلك غيره , بتاخد ضرائب على شئ لم تكسب منه و لا يدخل اصلا فى دائره الانتاج فيتم تقييم بيتك على سعر السوق و تدفع عليه ضريبه مع انك مش هتبيعه اصلا .....بغض النظر عن كونك بتدفع كتير او لا لكن الفكره نفسها تعصب جدااا  ...بالمناسبه امبارح طلع سمير رضوان مع عمرو اديب و قال نيه الحكومه عن ارجاع "العوايد" التى تصل نسبتها ل 40%

* ضريبه التركات : بمعنى ان الدوله بتلهف فلوس و نسبه من تركه المتوفى و تقاسم اهل الميت فى فلوس الراجل ...يعنى لو واحد مات و عنده ولد وبنت يتحسب ان عنده ولد نصيبه كذا و بنت نصيبها نص كذا و بطرس غالى نصبه ضعف كذا ...طب الحكومه اتغرمت ايه فى موت الراجل عشان تاخد فلوس منه ؟؟

لجمارك : ااااااه من الجمرك و اى حد سافر عارف المأساه اللى بتكلم عنها من اول جمرك العربيه اللى اغلى من العربيه لحد غساله الاطباق .. 


و كأن كل ده مش كفايه فجاء سى سمير رضوان وزير الماليه الحالى فى حكومه سى شرف الاستاذ شرف فتح الباب جاب ضرف ...ليكمل علينا و يسويها بالارض مع رمى بعض الفتات يسدوا افواهنا ....

الكلام الجاى من موزانه 2011/2012 بختم سمير رضوان :

* 10% زيادة فى ضريبة مبيعات السجائر : كالعاده طبعا زى كل سنه و كل ما يتزنقوا يكملوا الميزانيه من السجائر و دى عاده بطرسيه غاليه قديمه ...

*وفرض ضرائب تصاعدية على الدخل، بإضافة شريحة جديدة قدرها 25%، لمن يزيد دخله عن 10 ملايين جنيه سنويا من الأفراد أو الشركات. : و سلم لى على الاستثمار ازاى تقدر تجذب استثمار اجنبى و انت عامل ضرائب 25 فى المئه فى حين ان دوله ايرلندا عامله ضرائب 6.5 % عشان تبقى مغاطيس اسثثمار  لكل العالم تشد الفلوس من اميركا نفسها ...و لما سألوا الوزير المبجل قال الناس بتحب مصر و تحب تستثمر فيها هو من امتى الاقتصاد بيتعاملوا بالحب ...

*  فرض ضريبة أرباح رأسمالية تقدر بـ 10%، على توزيعات شركات الأموال والأشخاص والدمج والاستحواذ وإعادة تقييم الأصول : عارفين يعنى ارباح راسماليه ؟؟ طب ركزوا بقى فى الحته عشان مهمه جدااااا :
  - لو اشتريت حته ارض المتر ب 100 جنيه و بعدين بعتها المتر ب 150 الدوله تاخد منك 10% من المكسب ...

- لو اشتريت سهم فى البورصه ب 6 جنيه و بعته ب 8 جنيه الدوله تاخد 10% من المكسب 

- لو عملت دمج بين شركتين الدوله تاخد 10% من المكسب ..و سلم لى عالاسثتمار ...

دعنى اسجل براءه الاختراع لهذا المولود الضريبى لاستاذ سمير رضوان 

* فما سبق فكان الضرائب فاما الاحق فالفتات اللى رماه : 

أنه سيتم تحديد قيمة الحد الأدنى للأجور بـ 700 جنيه شهريا، فى العالم المالى المقبل (2011 / 2012)، وقال وزير المالية، إن الحد الأدنى للأجور سيزيد تدريجيا ليصل إلى 1200 جنيه خلال خمس سنوات : احد اكبر الحاجات اللى كانت بتغيظنى فى النظام السابق و حكوماته انه مكنش بينفذ احكام القضاه و اهمها حكم ال 1200 جنيه فعلى الرغم من انى مش من مؤيدى فكره 1200 و شيفاهم كتير عالدوله لكن على الرغم من ان 700 مش قليل لكنه برضه مش تنفيذ للحكم و بالمناسبه الناس رفعت قضيه عالحكومه تانى ...

ملحوظه : كنت امل ان الثوره تمحى خطايا الضرائب و جو "فاوترك ولا اظبطتك" ثم جاءت الصاقعه بالابقاء على الماضى و اضافه معاناه جديده ....و محدش يقولى يعنى يعمل ايه بلاش جو اديله باليمين و اسحب منه من الشمال ...و ان غاب عنكوا بطرس غالى و الرزاز فكلكم بطرس غالى و الرزاز و لا عزاء للدفاعين ... 

25 التعليقات:

IMSA يقول...

د/ دودي :
الضرائب وبطرس غالي ..
ذكرتيني بمقالات قديمة كنت اكتبها ابان النظام السابق
مثل
http://klammganyn.blogspot.com/2010/01/blog-post_4444.html
كنت مستمتع بالكتابة عنه والاشارة اليه ..
اتمنى ان تقرئيه
اما ما كنت اخشى عليه في ايام المظاهرات هو حين يقوم بطرس غالي بعمل الاتي :
ضريبة شغل ميدان ..
ضريبة تظاهر ..
ضريبة استخدام اللافتات ..
ضريبة عدم قبول رئيس الجمهورية
والحمد لله ان المظاهرات نجحت ولو على مزاجي اجيب بطرس غالي اقعد اعمل فيه ضرائب لغاية طا يطلع له صحاب ..
بخصوص ان الحال مثل ما سبق فهذا لان الثورة لم تحقق مطالبها بعد
//
تحياتي لكِ وتقبلي ردي ومروري

د/دودى يقول...

اخطر حاجه فى الموضوع قاعده "لا ضريبه بدون تشريع" و بما ان مفيش مجلس شعب فالمجلس العسكرى هو اللى هيشرع و بالتالى كالعاده محدش هياخد راينا برضه...

أحمد عيسي يقول...

هم بيدرسولكو اقتصاد في كلية الطب؟؟
حقيقة استرسال رائع ووصف دقيق جدا خلاني اشك انك طالبة طب
اسمحيلي اشير التدوينة دي علي الفيس بوك لانها عاجباني جدا

اسلوبك علي فكرة ساخر ومحكم وقوي جدا..وسخريتك قريبة من سخرية واحد اعرف وشايفه علي شاشة اللاب حالا قدامي..بس لما يكون مزاجه رايق

تحياتي علي افضل تاني تدوينة قريتها في الحملة

د/دودى يقول...

استاذ احمد عيسى : ميرسى عالمجامله الرقيقه و الكلام الحلو ده .. اتفضل شير براحتك بس نفسى اعرف مين اللى عاللاب ده ؟؟ ....

قهوة بالفانيليا - شيماء علي يقول...

التغيير هياخد وقت .. و التطهير برضه ..
لكن يا دودي دايما في أمل ..
بطرس غالي دة كان مضايقني منه حاجات كتير ..
و أكتر حاجة ضايقتني استغلاله لسيارات الناس اللي محجوزة في الجمرك و بيستعملها هو و السكرتيرة بتاعته .. !!
و ماكانش بياخد الا البورش كايين أو المرسيدس و البي إم ..
و الناس رافعين عليه قضايا ضخمة يعني ..!!
ربنا كبير

د/دودى يقول...

شيماء : بطرس غالى كان مضايقك و مضايقنى و مضايق طوب الارض لكن انهم يجيبوا وزير يتبع نفس نظام الاستعباط يبقى لا بقى ...يزود المرتبات من الشمال و يلمهم ضرائب ...يا فرحتى

MR.PRESIDENT يقول...

بعد السلام والتحية
أما بعد
من رئيس الجمهورية

أنا هقولك حاجة بس أنا اصل مش عارف حاجة في الاقتصاد بس شكرا ليكي لانك بتسهلي الحصول علي المعلومة بطريقة ظريفة

حته الحد الأدني " أنا سمعت إن الدولة لو زودت الدخول بدون زيادة إنتاج هيحصل تضخم " يعني الراتب يزيد من هنا والاسعار تزيد من هناك ويبقي زي قديمة

حته سمير رضوان ، هو خد شعبية محترمة عند الطبقة المتوسطة من الشعب خصوصا بعد الغاء الضريبة العقارية

إن شاء الله الحال يتعدل بس حضرتك محتطيش في دماغك وانا مش ببرر للحكومة علي فكرا - إن فساد ربما آلاف السنين - أو نقول 60 سنة يتصلح في 3 شهور ،

صديقني باذن الله مصر حالها هيتعدل بسرعة

وخصوصا لما أكون ريس :))

غير معرف يقول...

بمناسبة بطرس غالى...اللواء عبد السلام المحجوب كان ضابط مخابرات وعمل حوار مع جريدة الفجر و قال ان المخابرات بلغت مبارك ان يوسف بطرس غالى بيتعاون مع السى اى ايه و بيسرب معلومات و العجيب ان مبارك قام بترقيته!!...ده من عشر سنين

Tears

راي اخر يقول...

اهلا د :دزدي

انتي ملكيش علاقة بالاقتصاد بتتكلمي ليه فيه يا ستي احكي في الحقن والدواء ملكيش دعوه بالاقتصاد الراجل ده افضل رجل في حكومة شرف والله كلام مميز وميزانية غير عادية ومتنسيش ان مفيش فلوس في بلدك علشان كله بقي بيحكي زيك ومحدش شغال


ارجوكي متضايقيش :) :) اتكلمي في اللي تعرفيه احسن هتفيدي الناس والثورة وهتبقي احسن من سمير رضوان


بلاش نقرا كلمتين في جرنال ونيجي نحكيهم زي ما هما بيقولوا ولو في السياسة ماشي لكن الاقتصاد لأ

:) منتظر ردك واتمني قبول النقد البناء واسف علي الاطاله او الخطأ إن فهمتيني خطأ بس والله هدفي الافادة فقط وحق الرد مكفول لكي

د/دودى يقول...

مستر برزتدت : معاك 100% فى حته التضخم و ده معروف اكيد ..

انا كمان من الناس اللى بتحب سمير رضوان عموما بس على فكره انا سمعته امبارح مع عمرو اديب و مقلش انو هيلغى الضريبه العقاريه لكن قال هيغير اسمها "العوايد" اللى نسبتها اعلى لكن قال 50% منها هتتوظف فى الحى و 50% تتبعت مركزى فى الميزانيه لكن مش هتتلغى...

د/دودى يقول...

تيرز : بينى و بينك انا بقت اشك فى المعلومات اللى مش النوع ده اصلها كترت شويه ...بطرس غالى طلع عينيا فى الاقتصاد لكن جو الاستخبارت ده ما اظنش

د/دودى يقول...

رأى اخر : الاول كده اهلا بيك فى المدونه و الاختلاف فى الرأى لا يفسد للود قضيه...ثم ان انا لا بفهم فى الاقتصاد ولا فى الطب الا على قدر معلمتى الضئيله فانا فى الاول و الاخر حته طالبه مش دكتوره لسه ....

انا مش بقول انى عالمه فى الاقتصاد و عمرى ما هاقول كده عشان انا مش كده ....لكن :

اللى بتكلم فيه واضح جدااا بسيط لدرجه العبط : انا شايفه ان لم الفلوس من الناس مجرد عجز كالعاده فى حكوماتنا المتتاليه فالدوله لا بتنج و لا بتصنع و لا بتعمل تقريبا اى حاجه مش بقول تبقى اشتراكيه لكن بقول الدوله يبقى ليها مصادر دخل عاقله غير لم الفلوس من الضرائب ...

رجل الشارع العادى اللى هيفرح بان مرتبه على 200 جنيه هيفاجئ بزياره الاسعار كبدايه -كجزء من التضخم من كون كل الناس عليت مرتباتها- و هيفاجئ كمان بضرائب جديده اشكال و الوان من سحب الفلوس فمش كفايه ان محدش قال نشيل ضريبه المبيعات العبقريه الخاصه بالرزاز لا و كمان بنخترع ضرائب عالبيع و الشراء و البورصه .....

انا بتكلم عن رجل الشارع اللى كله على دماغه مش كخبيره اقتصاد ...ثم انا قريت فى الخبر و شوفت الوزير مع عمرو اديب و سمعت وجهات نظر الخبراء اللى مع و اللى ضد و اقتنعت اكتر باللى ضد ...

ابراهيم رزق يقول...

ايه يا بنتى ده انتى حولتى من طب لتجارة
و بعدين انتى ايه عرفك بالرزاز
ده كان وزير و انا فى الجامعة
و شبع تريقة من احمد رجب

على فكرة كل انواع الضراثب دى ليها تجارب فى دول كثيرة قد نتفق معها او نختلف الا الضريبة العقارية ليس لها مثيل فى العالم كيف ادفع ضريبة على شىء لا يكسب لكن البركة فى سى بطرس غالى

تحياتى

د/دودى يقول...

استاذ ابراهيم : هههههههه مش عارفه ليه حسيت التجاره الذ و بفكر .....

الضريبه العقاريه دى زى كره السرعه كده اختراع مصرى صرف ....اما عن الرزاز فسمعت عنه حكايات و حكاوى عنه

Carmen يقول...

ماحنا كنا بنتسرق ومش عارفين نعمل حاجة ودلوقتي حقنا بيضيع وبرضه مش عارفين نعمل حاجة

Tamer Nabil Moussa يقول...

انا بقول ياريت قبل الثورة

كان بطرس

عمل ضرائب على المدونات وتبقى 100 المية

عشان يخلص النظام من المدونين المزعجين ههه.


الضرايب مطلوبة

بس عايزة نظرة عدل

وواحد بيفهم ويقدر

مع خالص تحياتى

re7ab.sale7 يقول...

والله يا دينا ما انا عارفة اقولك اية
اصلا انا مقهورة من اللي بيحصل
وكأن شيء لم يكن وكأن مفيش ثورة عشان الظلم والفسالد والاستعباط بتاع الحكومة
بجد حاجة تخنق
لما كان اخويا يقوللي عايز اهاجر كنت اتعصب قوووي
دلوقت بقيت حاسة اني نفسي اهاجر اوووي برغم اني بحب مصر اوووووووي

كريمة سندي يقول...

ما شاء الله عليكي المفروض يمسكوا وزارة المالية كلها على بعضها عشان يعرفوا إزاي البلد فيها خير كتير تحياتي لك

عماد هلال يقول...

والله ماكنت فاكر ان انت بتعرفى فى الاقتصاد حلو قوى
كل يوم بتكشفى عن شئ جديد
احيك على حمل معانات الناس مع الضرائب والعوايد
طول عمر الشعب المصرى بيدفع فواتير
بس كان ناقص يالهههههوى

ENG./ELSAYED,PMP يقول...

http://hesshesss.blogspot.com/2011/06/blog-post_04.html

rack-yourminds يقول...

مشكلتنا اننا مستعجلين في قطف ثمار الثوره,يا سيدتي الثوره لم تكمل بعد شهرها الخامس ,محتاجين صبر شويه

جمال العربي يقول...

بعد إجراء التقييم الشهري الذي نجريه علي المدونات المضافة إلي دليل زوارك وجدنا أن مدونتك متميزة وتم إعطاؤها تقييم وستظهر المدونة ضمن المدونات المتميزة في الدليل مما يكسبها المزيد من الزوار أضف أخر ما تكتب إلي صفحة مدونتك بالدليل لتحقق اعلي إفادة من الدليل وذلك عبر إضافة تعليق أسفل المقال الخاص بمدونتك راعي أن يكون التعليق باستخدام الاسم/عنوان url واجعل الاسم عنوان المقال و url رابط المقال
وهذا هو رابط مدونتك علي الدليل (http://dir.zowark.com/2011/04/blog-post_6098.html )


لم تضف رابط الدليل
من خلال التقييم الشهري الذي نجريه علي المدونات المضافة إلي دليل زوارك لاحظنا انك لا تضع رابط الدليل وقد كان شرط الاشتراك والحصول علي مزاياه هو إضافة رابط الدليل بشكل دائم أضف الرابط http://dir.zowark.com/p/blog-page_07.html


...........
جمال العربي
من فريق عمل مجموعة زوارك للتسويق والتوظيف وخدمات البورصة

عازفة الالحان يقول...

فِكر عآلٍ .,
وأكثَر هُنآ


وكنت آأيضاً انا هنآ أرتِششف وحِي قلمِك

دمتي بخير

Ms Venus يقول...

ماليش اوى فى الاقتصاد

بس حبيت اسجل تحيتى ليكى يا دكتورة دودى

mena يقول...

انا حماره ف كل حاجه سياسه اقتصاد واى حاجه مالى بيجو ف النشره بس انتى عثل اوى اوى واسلوبك بيعجبنى موت .......

بحبك ف الله بقى ^_^

إرسال تعليق

حلو؟؟ وحش؟؟ طب ساكت ليه ما تقول....