الخميس، 23 يونيو، 2011

حكومتى العزيزه:انت شغالنا بنومك ليه ؟؟



الجمل: لن أتقدم بالاستقالة والحكومة لا تنام بسبب ضغط الإخوان عليها

الإثنين، 20 يونيو 2011
http://www.youm7.com/News.asp?NewsID=438572&SecID=65&IssueID=0


"شرف": "ما بقيتش أعرف أنام إلا لما أسمع "واحد اتنين عصام شرف فين!"

الأربعاء، 22 يونيو 2011
 http://www.youm7.com/News.asp?NewsID=440604&SecID=65&IssueID=0

فاكرين مسرحيه "سك على بناتك" لما حنفى جه لحماه بيشتكيه من ان مراته خدت العفش و هى غضبانه ..فرد عليه حماه : مش معاك نسخه من القايمه ؟؟..رد عليه حنفى : و انا هنام عالقايمه؟؟...فحسم حماه الحوار بجملته الشهيره : انت شغالنا بنومك ليه ؟؟ ما انشالله تنام و انت اقف زى الحصنه .....


فها انا اوجهه نفس الكلام لحكوماتنا الموقره : انتوا شغالنا بنومكم ليه ؟؟ نوم ايه ؟؟ هو  انتوا ليكوا نفس تناموا فى الايام المهببه دى ؟؟ اعملوا شغلكوا و ريحيوا الناس و ارتاحوا ..


س/ هل عمرك قريت تصريح زى كده من حكومات اوروبا و الدول المتقدمه ؟؟

ج/ اظن لا طبعا ....و عموما جو حرام عليكوا خفوا عنهم , كفايه اللى هما فيه بقى فاكس قوى بقى و نظام الاهات و الدموع و اكل الفول من على العربيات و تخريط البصل عالقلب مش هياكل معايا تانى ...و على رأى حليم "مبقاش في مخدوع بابتسامات و دموع"


فاما عن تصريح دكتور الجمل : بقى الحكومه مش بتنام من ضغط الاخوان ؟؟!!!!!!!!!!! هو الاخوان ليهم عندكوا ايه يعنى عشان يحرموكم من لذيذ المنام على رأى فايزه احمد ...الاخوان قوه سياسيه و حزب لسه مش ممثل فى البرلمان نظرا لان مفيش برلمان و بالتالى فلا سلطه ولا سلطان و لا اى نوع من الضغط مسموح او مقبول منهم على السلطه التنفذيه فى مصر حتى الان ...لما يبقى فى انتخابات و ياخدوا تلت البرلمان ولا نصه زى ما بيقولوا يبقى ليا كلام تانى ....عارف دى عامله زى ايه زى واحد بيحكم على واحده فى حاجه قبل ما يخطبها اصلا ....اه و بالمناسبه التصريح ده كان من يومين و لكن النهارده الدكتور الجمل فعلا قدم استقالته و قبلها شرف و رفضها المجلس العسكرى و التصريح ده فكرنى بتصريحات وزاره نظيف : "لا زياده فى اسعار الكهرباء" فاتوماتيك تجهز نفسك لزياده فى الفاتوره , الموضوع كان فى غايه البساطه فحرف "لا" غلطه مطبعيه مكرره فى جميع تصريحات حكوماتنا حاضرها و مستقبلها ...


فاما عن تصريح عصام شرف اللى مفاداه انه اتعود على ان الناس بتناديه و يطلبوا منه فئويات و هو مبسوط قوى اقول له : ده فى حد ذاته فشل ....فنزول مهندس الميكانيكا تحت العربيه عشان يصلحها او ان الدكتور هو اللى يشيل المرضى او ان مدير المصلحه ينظف المكتب فشل فى اداره كلا منهما فى الاداره , المهندس يوجه الميكانيكى , الدكتور يشخص و يعالج و التمرجى -مش الممرضه المؤهله- اللى يشيل المرضى , مدير المصلحه يدير و الساعى هو اللى ينضف ....
خصص شخص او اداره ما للرد و حل مشاكل الناس بدل ما يجوا لك شخصيا و بما انك مش هتقدر تشوف كل الناس فهتظلم اكتر بالطريقه العشوائيه دى ...غير ان ده بياخد وقتك و مخليك مش مركز فى شغلك الاهم اللى مبعتمولش بدليل ضغط الاخوان عليك .....


ملحوظه كده على جنب : "امال فين الفول ؟؟؟؟" 


فوجئ رواد ماكدونالدز المهندسين بجوار سور نادى الزمالك بالدكتور عصام شرف رئيس مجلس الوزراء مع أفراد أسرته في المطعم, وكان ينتظر حفيدته حتى تنتهى من اللعب أمام الحجرة المخصصة للعب الأطفال, كان شرف يرتدي ملابس بسيطة -تي شيرت وبنطلون, وغادر المطعم وهو يحمل حفيدته


http://www.akhbarak.net/articleview.php?id=2567274

الاثنين، 20 يونيو، 2011

حمله 20 يونيو ..ضد التحرش!!





التالى هو جزء من تدوينه سابقه احسست بالالحاح طرحها فى هذا الوقت :


"اتضايقت؟؟؟ طبعا اه...اتضايقت من الحاله المزريه اللى وصل ليها شبابنا ...الشباب اتهبلوا ولا ايه؟؟ تحرشات و معاكسات عالمكشوف كده؟؟؟ طلبه جامعيه من كليات المفروض انها محترمه و للاسف معظهم تجاره واداب وحقوق....و بتحرشوا بمين؟؟ بطالبات جامعيات برضه بصراحه حاجه تكسف بجد على الحاله الزفت اللى وصلنا ليها دى......يعنى انت سايب كليتك او بيتك و جاى مخصوص عشان تضايق بنات الناس ولا جاى تستمتع و تقضى وقت لطيف؟؟!!!!....اوعوا حد يقولى ان البنات هما السبب وانهم هما اللى بيدفعوا الشباب لكده لان مش ده اللى بيحصل لان البنات اللى فى دماغكوا دول الشباب بيخاف يقرب منهم بالعكس دول بيستغلوا البنات البسيطه ذات المظهر العادى اللى مش هتعرف تدافع عن نفسها او هتخاف من الفضيحه والاستغاثه بالاخريين....

ملحوظه كده على جنب: انا مش بتهم الكليات دى بعدم الاحترام او بتهم شبابها لان برضه من اللى شوفته النهارده شفت نماذح حلوه قوى من نفس الكليات...بما انى كنت لوحدى بما ان اانا واصحابى تهنا فى الحفله او تفرقنا لاسباب مختلفه و ابتدى اللى حواليا يضايقونى على الرغم من ان كعب جزمتى ال 10 سم كان بيقوم بالواجب من حيث هرس رجل من يقترب و رفض انى اخلى جد يبوظ متعتى عليا فتوليت الاهتمام بنفسى والدفاع عن موقعى المتقدم بالكوع والخبط لو عاز الموقف الا ان شله بنات و ولاد معرفهومش لما لاقونى واقفه لوحدى لاقيتهم بينادوا ويقولوا اقفى معنا عشان محدش يضايقك...الشله دى كانت 3 ولاد و بنتين الولاد عاملين شبه كردون عشان محدش يضايق اصحابهم والغريبه انهم وقفونى معاهم و سط البنات و اصبحت الحمايه مشتركه بعد التعرف طلعوا اولى و تانيه حقوق وتجاره ....بصراحه اتسعدت قوى ساعتها لانى حسيت ان البلد لسه فيها شباب جدع و رجاله وسط العيال و الفرافير...." 

القصه السابقه كانت بتاريخ 13 اكتوبر لعام 2010 يعنى من حوالى 8 شهور كامله و كانت بعد ذهابى لحفله تبع الجامعه للمطرب حكيم و اقيمت الحفله داخل الحرم الجامعى ....

ممكن اكون ما اديتش الموضوع حقه ساعتها نظرا لاحراجى الشخصى او لحساسيه الموقف لكن بعد مرور 8 شهور على الحادث اظننى جاهزه لتتحدث بقلب مفتوح و صراحه عما حدث فى هذا اليوم و غيره من الايام و ما نراه يوميا دون ان نستطيع التحدث فيه و لو للحظه ...


ما حدث فى ذاك اليوم خصوصا كانت حالات تحرش كامله و ليست جزئيه ...اقصد -و اعذرنى لصراحتى الموجعه- انها لم تكون مضايقات او حتى ملامسات بل كانت اشبه بالاغتصاب !!!!....ارجوك لا تغضب من صراحتى او وقاحتى لكن هذا ما حدث امام عينى ..

س/ كيف يجرؤ طالب جامعه على الاقدام  على التحرش  بطالبه جامعيه بكل هذا الكم من الفجاجه و الوقاحه داخل الحرم الجامعى؟؟
ج/ لانه متأكد انه لن يكشف لعلمه و اعتماده على صمت  تلك الانسه و خاصه لانه مختارها بمواصفات معينه , و لتأكده من افلاته من العقوبه - ده لو كان فى عقوبه اصلا- بتدخل ولاد الحرام اللى هيفضوا الليله دون اى خساره له

س/ اين الامن فى الجامعه ذلك الموقف ؟؟
ج/ فى الجامعه فى ذلك الوقت قبل الثوره كانت امام الجامعه تقبع عربيه امن مركزى غير الامن الداخلى للجامعه لكن كل هؤلاء كانوا بيتفرجوا على حكيم او بيستمتعوا بالفرجه على التحرش 

س/ ما رد فعل الطالبات؟؟
ج/ الصمت و محاوله الابتعاد ...فقط

س/ ما مواصفات الطالبات المتعرضات للتحرش؟؟
ج/  يسرنى انك سألت السؤال ده ... بنات جامعيات ذوات البنطلونات الجينز الفضفاضه و البلوزات الكاروهات و الطرح المتداوله / بنات جامعيات بجيبات عاديه و بلوزات متوسطه الطول و طرح طويله او قصيره / لمحت عدد 2 بنت بخمار مكشوف الوجه....بنات عاديات من النوع اللى بيحاول يبعد عن الشر و يغنى له خوفا من الفضيحه و نظرات الناس القاسيه التى لا ترحم تلك البنت التى تصرخ لتدافع عن شرفها اولا و كرمتها و احساسها انها بشر ثانيا ...

 س/ هل تقبلين التحرش اوحتى المضايقه بالنظره لبنت ترتدى ملابس مكشوفه ؟؟
ج/ طبعا لا ...طبعا لا ...فى اختراع ظهر فى القرن الماضى اسمه الحريه الشخصيه و غض البصر للى عايز يتقى الله...

س/ هل انتشار التدين الظاهرى بين الشباب بالذقن و الجماعات الاسلاميه قلل من نسبه التحرش ؟؟
ج/ لا

س/ هل الحركه الاسلاميه مسؤله عن ذلك؟؟
ج/ لا

س/ هل زياده نسبه الحجاب و انتشار الاسدال و الخمار و النقاب قلل نسبه التحرش؟؟
ج/ لا

س/ هل ساهم زياده نسبه الحجاب فى ازدياد التحرشات؟؟
ج/ لا اظن

س/ هل قللت الثوره من نسبه التحرش؟؟
ج/ لا...بدليل ان فى تحرشات اليومين دول شغاله جوه التحرير نفسه

س/ هل  تعرضت كل بنت فى مصر للتحرش ؟؟
ج/ 98% حصل و لو مره

س/ حتى انا ؟؟
ج/ حتى انا........


 يوم التدوين والزقزقة على تويتر وكل المدونات ضد التحرش الجنسي والعنف الجندري في مصر، شاركونا بمقالات، مدونات، أو تويتات طوال اليوم
يمكنكم التدوين باللغة العربية أو الإنجليزية، المهم أن تشاركونا

الهاش التاج الأساسي #endSH

بعد ما ظهر في بعض الصحف المصرية، من المهم التنويه بأن هذه المبادرة هي مبادرة مستقلة ومفصولة عن اي جمعية او تمويل. ان جمعيات نظرة وخريطة التحرش يتعاونون معنا على الموضوع ولكن من المهم التأكيد ان هذه المبادرة مستقلة وجاءت من ناشطين/ات مستقلين/ات.

الجزيرة الانكليزية ستقوم بتغطية الحدث مباشرة عبر برنامجها الجديد
The Stream

يمكنكم/ن اضافة اسمهم على تويتر بالاضافة الى الهاشتاج الخاص بالحدث اذا كنتم/ن تريدون التواصل معهم/ن وامكانية نشر ما تكتبونه في البرنامج.Ç

عنوان البرنامج على تويتر
@ AJStream

صفحة البرنامج
http://stream.aljazeera.com/

وقت العرض الحي
1930GMT/21:30القاهرة



سيقوم فريق عمل "خريطة التحرش" بتجميع التدوينات والزقزقات يوم 20 يونيو ونشرها على صفحة خاصة.

كما انضم الى الدعوة جمعية "نظرة" والتي ستنظم بالتعاون مع "خريطة التحرش" لقاء حواري بناء ينطلق من سؤال أساسى : ماذا بعد يوم التدوين و الزقزقة ضد التحرش الجنسى و العنف الجندرى فى مصر
فى تلك الحلقة النقاشية تفتح " نظرة للدراسات النسوية " و " خريطة التحرش " الباب للمدونين و النشطاء الذين خصصوا يوم الاثنين القادم 20 يونيو للتدوين من أجل انهاء التحرشات الجنسية و كل الممارسات العنيفة التى تعد أشكالا من التمييز التى يسمح بها المجتمع ضد المرأة سواء أخذت أشكال الايذاء النفسى أو البدنى او الجنسى

للتذكير : المسكوت عنه هى مبادرة اطلقتها " نظرة " فى بداية مايو من أجل الاقتراب من موضوعات اتفق المجتمع على اعتبارها تابوهات لا يجوز المساس بها , على أن تكون هذه المحاولات للاقتراب فى شكل أحداث فنية و ثقافية تعيد قراءة الكثير من المعايير الاجتماعية .


اللقاء الذى تنظمه " نظرة للدراسات النسوية " مع " خريطة التحرش" فسوف يكون الثلاثاء 21 يونيو 2011 في 44 شارع طلعت حرب

للمزيد من المعلومات الرجاء زيارة صفحة الحدث
http://ow.ly/5hFtB



الأحد، 19 يونيو، 2011

مكرونه التموين !!!!



احدثكم اليوم فى هذا الجمع المبارك عن موضوع هام و حيوى و يمس حاضر و مستقبل كل بيت مصرى وكل مواطن مصرى يمشى على ارض النيل السمراء فى وطننا الحضن الاكبر ذو ال 80 مليون روح تتنفس و تشكو الى الله كل فجر مما يفعله الناس بها كل فجر  و يتم شكوتها الى الله-برضه كل فجر- من الناس مما فعلته  ....


احدثكم عن "مكرونه التموين" ذلك الكائن اللزج , المعجن, ذلك الكائن الفضائى الممسوخ ....متضحكش عليا انا بتكلم جد ممكن تكون عزيزى القارئ من عليه القوم اللى بيشتروا  انواع المكرونه الايطاليه الفاخره اللى كيسها ب 20 جنيه ,  او اقل قليلا و بتشترى "روجينا" ام 5 جنيه , او اقل قليلا و نظام مكرونه "الملكه" او 2 و نص , او اقل قليلا من اصحاب المكرونه السايبه , او ان تكون -للاسف- من الواقعين تحت عجله و مأساه "مكرونه التموين" و لكنك لن تفهم كلامى الا عندما تتذوقها و تملآ حواسك بطلعتها البهيه...


بعد حدوث ازمه فى الارز فى تموين حكومتنا الموقره قررت الحكومه استبدال وزن الارز الشهرى فى التموين للاسر باكياس مكرونه!!! و انا للاسف لم اجد الرابط العجيب بعد بين السلعتين فالسعر مختلف و الاستخدام مختلف و كل حاجه فحكوماتنا الرشيده رأت ان لا فرق يذكر بين الارز و المكرونه اهو الاتنين ممكن تعمل بيهم ملوخيه و ان كانت مع المكرونه هتبقى فكره مقززه جدا لكن هذا هو الوضع و لتخبط رأسك فى اتخن حيط  و لسان حال حكوماتنا "يعنى عزيزى المواطن  انت شحات و بتتأمر" مع ان من جواك بيقول "مش معنى يعنى ابراهيم حسن بيتأمر و عايز حكام من اوروبا من غير ما الزمالك يدفع حاجه..و انا يعنى مليش نفس!!"   -و هنا اعنى الحكومات الحاليه و السابقه و السابقه للسابقه- وزاره نظيف و شفيق و شرف كلهم فى قفص الاتهام سواء بسواء لا يفرق بينهم ثوره و لا وزير تموين !!!...فما فائده استلامك للتموين ببطاقه ذكيه اذا كانت السلع اللى ستسلمها غبيه؟؟


فاذا اقررت بالواقع و تقبلت الوضع و استلمت تلك المكرونه الملعونه و قررت انك تطبخها و هنا بالتحديد سيتضح لك المأساه: 

اولا:  فهى تقريبا نفس الاحجام مع اختلاف طفيف فلا هى كبيره و لا هى صغيره فهى مكرونه قلم و ليست قلم فهى ليست مفهومه تماما كمرأه !!!

ثانيا : اذا قررت ان تحمرها لتصنع منها طبق على الغدا بجانب الفرخه المجمده ام 18 جنيه الكيلو الواحد قميئه الطعم فاذا بك قد وقعت فى الفخ..فالمكرونه بتشر نشا فستفاجئ بانها قد حولت شوبه المكرونه المحمره لعصير نشا ثقيل الظل , غير ممتع الطعم فاذا بك ترميه "بحلته" زى ماما ما بتقول مع القاء بعض الشتائم على عدم قدرتك على الطبيخ لتبدء المرحله الثانيه ...

ثالثا : بعد مرورك بالمرحله السابقه ستدرك ضروره تصفيه كل هذ الكم من النشا فتقرر ان تسلقها لتضعها بجانب نص كيلو اللحمه من ام شادر شبه المجمده ام الكيلو ب 28 جنيه و بجانبهم بعض من الصلصه خاصه انت اشتريت نص كيلو بس لان كيلو الطماطم ب 5 جنيه , و بعد سلقها و تصفيتها ستحصل على كائن نصف حى فهى كتله واحده مهما رويتها بالزيت -خاصه نوع زيت العربيات بتاع التموين برضه- لتصل الى مرحله العشق الممنوع بين حبات المكرونه فتجدها ملتصقه متحاباه لا تنفصل و ان جبت عوازل الدنيا كلهم , فتجد نفسك تنظر لها نظره شفقه تماما كنظره مهند على قبر سمر -اللى على البحر- فى مسلسل العشق الممنوع و  تأكلها بلا نفس حتى تحلل ما دفعته ...

رابعا : فى الحالتين السابقتين تجد ان المكرونه بها حادث غريب عجيبه كأنها معجزه!!..فجميع حبات المكرونه مقسومه بالطول الى نصفين او اكتر فى حاله مروعه وكأنك القيت عليها قنبله هيروشيما !!!...

خامسا : نصيحه قبل ان تقدم على تلك الخطوه البائسه فبعد فشلك فى سلقها او تحميرها ستلجأ بيأس الى حل المكرونه البشاميل فلا تقدم عليها صديقى المواطن حتى لا تضيع ثمن غاز الفرن و ثمن النص كيلو لحمه مفروم و ال5 بيضات غير اللبن ...لانها ستصير كالمكرونه البشاميل اللى كان يصنعها محمد صبحى فى"يوميات ونيس" لتقطع بالازميل و الشاكوش...


تنفق مصر 28 مليار جنيه على دعم الاغذيه فى العام اى عشره اضعاف دعمها للبحث العلمى ...فاذا كانت النتيجه بهذا المستوى فلنرمى الفلوس فى البحر احسن اهو منها نحسن صحه الثروه السمكيه و منها نريح معده الناس من العك و نريح مزاجهم من اكل ما لا يسرهم...

ملحوظه : عند ذهابى لمحل كشرى من يومين لمحت تلك المكرونه فى طبقى و بما انى اعرفها من بين الف نوع فساءلت صاحب المحل بان كانت دى مكرونه التموين فاجابنى ب "نعم" و لكنه اضاف انه سيوقف التعامل بها لشكوى الزبائن المتكرره منها ..لم اهتم لعدم قانونيه هذا العمل اكتر من بحثى فى ذهنى عن محل اخر لاتعود عليه نظرا لانى مقاطعه لمكرونه التموين اكثر من مقاطعه الاخوان لمكاندولد او مقاطعه شباب التحرير لكنتاكى!!!....


الثلاثاء، 14 يونيو، 2011

هل تسمح الدولة المدنية بتطبيق الشريعة؟!

علاء الاسوانى
* بغض النظر عن جزء التريقه الاخير, ولو ان الفيديو ده موجود لكن اظن ان الشيخ كان "بيهزر" كنوع من الدعابه لكن غير كده مقاله جيده ...


إذا كنت مصرياً ومهتماً بمستقبل بلادك. فقد أصبح أمامك اختياران لا ثالث لهما:

إما أن تؤيد الإخوان المسلمين والسلفيين وتساعدهم على الوصول إلى حكم مصر، وإما (إذا اختلفت معهم) أن تتحمل اتهامك بالعلمانية والعداء للإسلام.. السيد صبحى صالح، القيادى الإخوانى، أكد من قبل أنه «لا يوجد مسلم ليبرالى أو مسلم يسارى، وإنما يوجد فقط مسلم وكافر»، معنى ذلك أن الإسلام لا يمثله إلا فكر الإخوان وكل من يخالفه كافر.. أما الشيخ المحلاوى فقد أعلن بوضوح أن «من يطالبون بالدولة المدنية فى مصر كفرة وعبدة الطاغوت».. لا أكثر ولا أقل.. حكم التكفير فى الإسلام خطير وتبعاته جسيمة حتى قيل إنه لو كان هناك مائة سبب لتكفير المسلم وسبب واحد لاعتباره مؤمناً فإن الإسلام يعتبره مؤمنا ويمتنع عن تكفيره. وقد حذر رسول الله، صلى الله عليه وسلم، من الحكم بالتكفير على شخص ليس بكافر، فقال: «أيما امرئ قال لأخيه: يا كافر، فقد باء بها أحدهما، إن كان كما قال وإلا رجعت عليه».

بالرغم من ذلك فإنه لا يمر أسبوع إلا ونقرأ تصريحاً لأحد السلفيين أو الإخوان يتهم فيه المختلفين معهم بـ«الكفر».. المشكلة أن موجة التكفير لا تقف عند القياديين الإسلاميين بل تتعداهم إلى خطباء المساجد.. وقد تلقيت رسائل عديدة من قراء يحكون أن خطيب المسجد ينفق خطبته كلها فـى الهجوم على المطالبين بالدولة المدنية ويتهمهم بالعلمانية والإلحاد..

نحن إذن أمام قوة سياسية تستغل مشاعر الناس الدينية وتعتبر كل شىء مباحا من أجل هزيمة خصومها السياسيين والوصول إلى السلطة، حتى لو أدى ذلك إلى تكفير المسلمين. هذا السلوك ذاته حدث فى الاستفتاء الأخير الذى أُجرى أساساً على تعديل بعض مواد الدستور القديم، ولم يكن من بينها المادة الثانية التى تنص على إسلام الدولة، لكن بعض الإسلاميين وزعوا منشورات تدعو المسلمين إلى الموافقة على التعديلات لأن رفضها يؤدى إلى ضياع الهوية الإسلامية ومنع الأذان والحجاب والسماح للشواذ بالزواج من بعضهم البعض (!).. إلى هذا الحد يمكن لشهوة الحكم أن تدفع بعض الناس إلى تضليل الرأى العام باسم الدين.. الغريب أن هذه الحملة الرهيبة لتكفير المطالبين بالدولة المدنية تخلط عمداً أو جهلاً بين مفاهيم سياسية مختلفة تماما. ولعله من المفيد هنا أن نراجع بعض التعريفات:

الدولة المدنية الديمقراطية:

هى الدولة التى تكون فيها السيادة للشعب والسلطة للأمة.دولة القانون والمؤسسات التى يستوى فيها المواطنون جميعا أمام القانون بغض النظر عن أديانهم.

الدولة الدينية:

هى الدولة التى يتولى فيها الحاكم السلطة باسم الدين لا باسم الشعب. وقد عرف التاريخ الإنسانى نوعين من الدولة الدينية: الدولة الثيوقراطية التى يعتبر فيها الحاكم نفسه ظل الله على الأرض، فهو يحكم بالحق الإلهى ولا يحق لأحد أن يحاسبه أو يعزله..

ودولة رجال الدين، حيث يتحالف الحاكم معهم ليحكم باسم الدين، وهو يعتبر كل من يعارضه خارجا على الدين.. لم يعرف التاريخ دولة دينية عادلة أو رشيدة، بل اقترنت الدولة الدينية دائما بالظلم والاستبداد.. ويكفى أن نقارن أى دولة ديمقراطية فى أيامنا هذه بدول مثل السعودية وإيران والسودان لندرك خطورة الدولة الدينية ونتائجها السلبية على حرية الناس وإرادتهم.

العلمانية:

حركة اجتماعية تتجه نحو الاهتمام بالشؤون الأرضية بدلاً من الاهتمام بالشؤون الدينية، وهى تقوم على فكرة الاستبدال.. تستبدل العالم الذى نعيشه بالعالم الآخر، وتستبدل الواقع بالغيب والدنيا بالدين. وبالتالى فإن العلمانية فعلا حركة معادية للأديان جميعاً.

الليبرالية:

مذهب اسمه مشتق من لفظ LIBER وهى كلمة لاتينية تعنى «الحر».. فالليبرالية حركة وعى اجتماعى سياسى داخل المجتمع، تهدف لتحرير الإنسان من القيود التى تقيد حريته أو قدراته، وهى تقوم على احترام استقلال الفرد والحريات السياسية والمدنية، على أن تحرر الليبرالية ليس مطلقا لكنه مقيد بالقوانين التى تختلف وفقا للأخلاق والقيم من مجتمع إلى آخر، أما الليبرالية الاقتصادية فهى تتبنى فكرة الاقتصاد الحر الذى يمنع تدخل الدولة فى الأنشطة الاقتصادية ويترك السوق لتضبط نفسها بنفسها، وإن كان بعض المفكرين قد تحدثوا عن الليبرالية الاجتماعية التى تؤيد تدخل الدولة فى الاقتصاد وتتخذ موقفا وسطا بين الرأسمالية المطلقة والاشتراكية، حيث تسعى لتحقيق موازنة بين الحرية والمساواة وتحرص على تأهيل الناس للعمل، كما تهتم بالخدمات الاجتماعية مثل التعليم والضمان الصحى.

اللادينية:

هى اتجاه فكرى يرفض مرجعية الدين فى حياة الإنسان، ويرى أن النص الدينى هو مجرد نص بشرى محض لا ينطوى على قداسة خاصة، ولا يعبر عن الحقيقة المطلقة.

إذا قرأنا هذه التعريفات التى تحمل معانى مختلفة فسوف ندرك مدى عشوائية المعركة السياسية الدائرة فى مصر التى يتم فيها خلط الأوراق من أجل ابتزاز مشاعر البسطاء الدينية حتى يصل بعض الإسلاميين إلى السلطة. إن تقسيم الناس إلى إسلاميين وعلمانيين هو تصنيف جائر وخاطئ إلى أبعد حد، فالذين يختلفون مع أفكار الإسلاميين ليسوا ضد الإسلام نفسه.. المطالبون بالدولة المدنية ليسوا بالضرورة علمانيين أو لادينيين بل قد يكونون مسلمين أتقياء حريصين على دينهم لكنهم يرفضون أن يُستعمل الدين كغطاء لحكم استبدادى عادة ما يكون قمعيا وظالما..

والحق أن نضال الشعب المصرى منذ مطلع القرن العشرين كان دائما من أجل إقامة دولة مدنية ديمقراطية. وإذا استثنينا مشروع الإخوان المسلمين فإن مصر طيلة تاريخها الحديث لم تسمع عن الدولة الدينية إلا فى أواخر السبعينيات عندما وصل إليها لأول مرة الفكر الوهابى المدعوم بأموال النفط. ولو وافقنا الشيخ المحلاوى على تكفير المطالبين بدولة مدنية فمعنى ذلك أن سعد زغلول ومصطفى النحاس وجمال عبدالناصر وأنور السادات وغيرهم من زعماء مصر كانوا كفارا، لأنهم جميعا وبلا استثناء واحد نادوا بفصل الدين عن السياسة. الدولة المدنية الديمقراطية إذن ليست علمانية وليست لادينية، وإنما هى تقف على مسافة واحدة من الأديان جميعا وتحترم مواطنيها جميعا بنفس القدر، وقد استحدث الإخوان شعارا جديدا، فهم ينادون الآن بدولة مدنية ذات مرجعية إسلامية.

وهذا كلام غريب فلا توجد أبدا دولة مدنية بمرجعية دينية.. ما المقصود بالضبط بالمرجعية الإسلامية..؟! إذا كان المقصود بها مبادئ الإسلام مثل العدل والحرية والمساواة فهذه هى الأسس التى تنهض عليها الدولة المدنية وبالتالى فهى لا تحتاج إلى مرجعيات إضافية.. أما إذا كان المقصود بالمرجعية الإسلامية وضع أسس مقدسة غير قابلة للنقاش وفرضها على الناس باسم الدين فإننا نكون إزاء الدولة الدينية الاستبدادية وإن تغيرت التسمية.

السؤال الآن: هل يمكن تطبيق الشريعة فى دولة مدنية ديمقراطية؟!. الإجابة: نعم بالتأكيد، لكن على أن يتم ذلك باختيار الشعب وإرادته الحرة.. فإذا كان هناك حزب سياسى إسلامى يعتبر أن القانون المصرى غير مطابق لمبادئ الشريعة فمن حقه أن يسعى إلى تطبيق ما يراه صحيحا، وعليه عندئذ أن يدعو بوضوح إلى برنامج انتخابى يشرح فيه القوانين التى سيسنّها من أجل تطبيق الشريعة، فإذا حصل هذا الحزب على غالبية الأصوات فى انتخابات نزيهة يكون من حقه أن يطبق البرنامج الذى انتخبه الناس من أجله..

أما أن يتولى الحزب الإسلامى الحكم ثم يعتبر أن تطبيق الدين (وفقاً لمفهومه) أمر واجب يجب ألا يستشار فيه الناس بل يجب أن يفرض عليهم، فنحن مرة أخرى أمام حكم قمعى يستعمل الدين كغطاء للاستبداد.. قد يقول قائل إن النتيجة واحدة فى الحالتين.. إلا أن الاختلاف فى الطريقة مهم وفارق، فعندما تحتكم إلى إرادة الشعب يكون تطبيق القانون شرعيا لأنه تم باختيار الناس وإرادتهم.. أما إذا فرضت عليهم ما تعتقد أنه صواب فإنك تعتدى على حقهم فى اختيار ما يريدونه لحياتهم من قوانين ومبادئ.

كما أن فرض حكم الدين يختلف باختلاف عقلية من يفرضه.. فمفهوم تطبيق الشريعة عند مفكرين مستنيرين مثل طارق البشرى وأحمد كمال أبوالمجد مختلف بالتأكيد عنه عند مشايخ السلفية.. فالشيخ أبوإسحاق الحوينى مثلاً يرى أن الدراسة فى كلية الحقوق حرام، ويعتبر أن كل الطالبات فى جامعات مصر آثمات لأنهن يدرسن مع زملائهن الذكور فى نفس المدرجات، وهو يؤكد أن العلوم الشرعية إنما خُلقت للرجال فقط دون النساء، فالمرأة فى رأى فضيلته مهما تلقت من علم ستظل دائما مقلدة وعامية. أما مشكلة مصر الاقتصادية فإن الشيخ الحوينى يقدم لها حلاً ممتازاً..

يتلخص فى أن تدعو مصر دولة أجنبية غير مسلمة (السويد مثلاً) إلى دخول الإسلام. فإذا رفضت حكومة السويد الإسلام أعلنت مصر عليها الجهاد فإذا انتصرت مصر على السويد وغزتها واحتلتها فإنها تخير السويديين بين الدخول فى الإسلام ودفع الجزية، ولاشك أن الجزية المفروضة على السويد ستنعش الاقتصاد المصرى، أما إذا رفض العدو السويدى دخول الإسلام أو دفع الجزية فيكون من حقنا أن نتخذ من السويديين عبيدا وجوارى.. العبد السويدى يساعدنا فى أعمالنا مقابل توفير أكله وكسوته..

أما النساء السويديات (المشهورات بالجمال) فمن حق السيد المصرى أن يتخذ منهن الجوارى، ومن حق المصرى أن يمارس مع جاريته السويدية العلاقة الزوجية دون عقد أو شهود لأنها تكون ملك يمينه، أما إذا فاضت جاريته عن حاجته أو مل منها فله عندئذ أن يبيعها فى سوق النخاسة فتتحسن أحواله الاقتصادية. هذه الآراء المدهشة للشيخ الحوينى مسجلة بالصوت والصورة.. ماذا نتوقع من رجل بهذه العقلية إذا تولى حكم مصر وفرض علينا رؤيته للدين؟!

لقد قامت الثورة المصرية من أجل تحرير المصريين من الاستبداد والقهر، ولن يقبل المصريون أبداً أن يستبدلوا بالاستبداد السياسى استبدادا دينيا. إذا أراد الإسلاميون أن يطبقوا مشروعهم السياسى فعليهم أن يعرضوه على الشعب المصرى صاحب السيادة المطلقة فى النظام الديمقراطى.. فإذا اختار الناخبون برنامج الإسلاميين فليس من حق أحد أن يعترض لأنها إرادة الشعب، أما إذا رفضوه فليس من حق أحد أن يفرضه عليهم مهما كانت الأسباب والمبررات.

الديمقراطية هى الحل.




http://www.almasryalyoum.com/node/467846

الاثنين، 13 يونيو، 2011

خالتى بتسلم عليك!



مره واحد صيعدى اسمه "هريدى" جابوه عشان يشتغل جاسوس , قالوا له : جمع المعلومات و هنبعت مندوب ياخدها منك و كلمه السر "خالتى بتسلم عليك"...بعد شهر المندوب راح يلم المعلومات من هريدى...سأل البواب :هى شقه هريدى فين؟؟ ,رد البواب : عندنا اتنين هريدى احد فى الدور التانى و واحد فى الدور الرابع ..طلع المندوب الدور التانى ففتح واحد قاله المندوب : خالتى بتسلم عليك , رد عليه الراجل و قله : لا حضرتك تقصد هريدى الجاسوس ده ساكن فى الدور السادس !!!.....


امبارح قبضوا على واحد جاسوس اسرائيلى لكن مش عارفه ليه حسيته جاسوس اهبل ...البيه الجاسوس بياخد صور فى التحرير و جنب الهرم و فى الجوامع و فى نفس الوقت واخد صور مع الاقصى و هو لابس هدوم الجيش الاسرائيلى بل و اكتر و هو واقف و وراه العلمين الاسرائيلى و الامريكانى !!..حاسه حاجه هبله شويه و لا انا متيهيألى ؟؟.....و لاحظ كده البيه متصور بنفس الكادر و الوقفه الغبيه فى جميع المواقف بشكل ساذج قوى ما هى الجاسوسيه سهله قوى اهى يا رجاله..امال مشفناش ولا صوره لرأفت الهجان لحد دلوقتى ليه ؟ ...شويه شويه ناقص يحط الصور عالفيس..


التالى ردود افعال الشباب عالفيس و التويتر بعد الخبر :

ويرى ابراهيم محمد ان كل هذه تعتبر افلام هابطه وتساءل مندهشا لماذا ارسلت اسرائيل جاسوس ليجمع معلومات عن الثورة في ظل توافر كافة المعلومات عن ثورة 25 يناير عبر الفضائيات .

و قال مصطفى محمد انه بعد سقوط فيلم جمعة الوقيعة بين الجيش والشعب ''جمعة الغضب الثانية سابقا'' فانتظروا قريبا بالأسواق جمعة الجواسيس يوم وقريبا جدا المزيد من الافلام العسكرية التي تتحدي الملل.

فيما طالب احمد عاصم الكنيست الاسرائيلى بضرورة محاسبة الموساد اذا ثبت انه ارسل جاسوس لمصر بتهمة اهدار المال العام.

وعلق سيد محمد قائلاً '' الذ حاجة ان عنده صفحة على الفيس بوك ووضع صوره عليها... زيه زينا...يبقى انا جاسوس'' واضاف ''اخر الانباء عاجل : تدهور حالة الجاسوس النفسية .. وانباء عن نقله لمستشفى شرم الشيخ لتلقي العلاج''.

وعلى موقع التواصل تويتر انتشرت تعليقات تتهكم على قرار الكشف على الجاسوس الاسرائيلى حيث تغنى محمد يوسف بالموضوع قائلاً '' جاسوسة راحت تقابل جاسوسة.. ملقتهاش جاسوسة يا عيني, لقطها مجلس يا عيني يا ليل '' .

فيما قالت هند رافت انه في اولى رد فعل لرافت الهجان الجاسوس المصرى المعروف بعد ما قرأ خبر القبض على الجاسوس الاسرائيلى تنهد رافت تنهيدة طويلة وهو يرى بروفايل الجاسوس على الفيس بوك قائلاً '' المهنة لمت يا جدعان ''.

وطالب عمر طنطاوي بضرورة القبض على الواد مهند لانه جاسوس لتركيا، وان هذا القرار سيجد ترحيبا من قبل رجال مصر .

وعلق جمال البشير قائلا انه بعد موضوع الجاسوس .. اتوقع ان المجلس هايكشف عن هجوم للكائنات الفضائية والاطباق الطائرة على مصر.

بينما قال شادى سمير انه في السنة اللي مسكنا فيها الجاسوس الاسرائيلي هربنا رشيد و غالي و حسين سالم'' مخابرات مصري ..ام الاجنبي'' .

بينما كتب عمرو حسام مازحاً '' الليلة عيد و الجاسوس بيتجسس، و مدام الجاسوس بيتجسس يبقى الجاسوسة هتتجسس''.
















الأحد، 12 يونيو، 2011

مليونيه اللحيه ..



طبعا لما تشوف العنوان و ان كنت قارئ دائم ليا هتكون متوقع رد فعل انى استشيط غضبا او على الاقل انى اعترض كعادتى المضاده للتيار المتأسلم فى مصر و اعذرنى فى هذه التسميه اللى هاكون مصره عليها نظرا لان كلنا مسلمين و لانى لما اقول التيار الاسلامى عمل كذا يبقى انا مش مسلمه !!.....اعترف بانى اتصدمت فى الاول لعجب الفكره  بل و اعترف انى منطقها عصبنى لانها بتعتمد على نظريه الشكل اللى ياما نادينا انها نظريه فاشله و بدليل ارتفاع نسبه المحجبات و ارتفاع نسبه التحرش و ارتفاع نسبه الملتحين و ارتفاع نسبه السرقه عادى جدا ...  

لكن  انا كواحده بدعى الليبراليه بقول هما احرار ايوه احرار دعوه عاديه جدا صحيح فكرتها سحطيه و التزام بسنه مؤكده مع تجاهل مشاكل اخطر بل لا تتناسب مع فقه الاولويات فى الايام السودا دى لكن مش من حق حد يمنعهم او يتريق عليهم لان ببساطه واحد سايب دقنه التانى زعلان ليه ؟؟  و مدام الفكره قانونيه و ممكن تكون كمان مع التحلى بالاخلاق فاوكى...


س/ هل انا ك دينا نبيل بحب السلفيين او الاخوان؟؟
ج/ لا ...طبعا

س/ هل انا علمانيه ؟
ج/ على الرغم من ان العلمانيه مش شتيمه لكن لا 

س/ هل وجود اللحيه من عدمها يجعلنى احترم شخص اكتر ؟؟
ج/ برضه لا 

س/ هل تمانعى فى ان يكون هناك اغلبيه ملتحيه من الرجال؟
ج/ و انا مالى ؟؟...المهم يكون فى حد فاضل غير كده لانى ما اظنش هينفع ارتبطت بحد منهم.. 


اخطر ما فى الموضوع هو ان الحوار مع حباينا الحلوين مفهوش كاسب و خاسر لانك ببساطه لو اعترضت على حمله زى دى مثلا لاى سبب تراه فاما عدم مؤامه الوقت او عدم اقتناعك بنظريه الشكل او خوفك من اختلاط الدين بالسياسه الذى يفسد الاتنين انك بتضع رقبتك دون ان تدرى تحت المقصله الفكريه و تتدخل بقدميك عش الدبابير مليان مصايب و تقدم نفسك كمتهم فى محاكم تفتيش الاندلس ... 

تقدر تقولى هتعبر ازاى عن رفضك لحمله اذا ارتبطت بالدين ؟...هتخش تتكلم عن عدم ضروريه وجود التزام اخلاقى مع الالتزام الشكلى و دون ان تشعر ستجد نفسك فى الباب الرابع لكتاب ما لابن تيميه!! ...

ايوه طب جرب و شوف و بدل ما كنت بتتكلم عن المجتمع هتلاقى روحك ادبست فى الفرق بين السنه و الفرض ...عارف ليه ؟ لان بتقارن الذى لا يخطئ و هو الدين بفكر البشر اللى غالبا غلط ....

فما سيكون الموقف من حمله المليون نقاب ؟؟ ساعتها برضه هنسكت و هاحط الجزمه فى بقى و مقدرش اتكلم لانى ساعتها هكون دخلت نفسى فى عش الدبابير و ينتهى بيا الامر فى الفصل الخامس لكتاب ما للالبانى بيوضح فيه فضل النقاب مع انى بتكلم عن المجتمع بل و خوفى من انتشار النقاب غصبا و على غير اراده السيدات و كما حدث مع الحجاب حيث اصبح نوع من الضغط المجتمعى اكتر منه التزام دينى... 

اعترف بانحيازى الدائم لرأى الازهر فى اى شئ ...مش عارفه ليه بس احساس بالثقه فى ان "الازهر هو الحل " .. زى احساسى لما بكون عيانه و بروح للدكتور  فى حاله الازهر او احساسى و انا عيانه و بستشير العطار  مع حباينا الحلوين ...



اعترف انى فكرت انى ابطل كلام عن السلفيين خالص نظرا لما عنيته من المناقشات موجعه لكن فكره انى ابقى جبانه اعطنى القوه الكافيه لانى اكمل فيما ظننته صحيح و فى مصلحه تلك البلد التى لا استطيع التخلى عنها لانى ببساطه معنديش غيرها .......

فاذا  شككت فى كلامى جرب و شوف و ليك فى تعليقات البوستات التاليه عظه و موغطه :

ماذا لو لو خربوها ؟؟ 

عيد تحرير مسجد النور !
 

اه يا ليبرالى يا ابن ال....

الفصل بين طلبه الجامعه..ماذا بعد؟ 


فى مدونه الاستاذ محمد الجرايحى "كلمه و نص" هناك الموقف المضاد لما كتبته ...و لكن دعنى ارد على نقطه واحده فيما كتب :
http://7ikayat2020.blogspot.com/2011/06/blog-post_11.html


آخر السطر:
من الأشياء التى لفتت انتباهى وأدهشتنى الحملة التى اطلقها التيار السلفى تحت شعار مليون لحية
ورد الشيخ محمد حسان : بل نريدها 80 مليون لحية فاشطاط التيار العلمانى .غيظاً .....

* نقول تانى انا مش علمانيه و ده الاول فممكن تبقى -عزيزى القارئ- تشتمنى شتيمه مختلفه لما تجى ترد...عزيزى الشيخ محمد حسان مصر مفهاش 80 مليون راجل بالغ ...و بالمناسبه انا مش عايزه يبقى عندى دقن.... 



الخميس، 9 يونيو، 2011

حيره بعد حيره ما البدايه للنهايه


اتجول بين الازرار فى الكيبورد فلا اجد ما اريده , جوايا كلام عايز يطلع بس مش عارف ينظم نفسه , سياسه اممم ممكن بس مش معقول يعنى اشغل القارئ بكلام احبطه و كرهه و زهق و بحث عن بعض الرفاهيه على العالم الافتراضى النت فاجد نفسى ازيدمن اكتئابه بتشاؤمى المزمن او زى ما لخص واحد عاقل الموضوع فى جمله احببتها ( هل احسست بالاكتئاب و الاحباط و راوضت فكره ان تلقى بنفسك من برج القاهره او ان تجلس عليه ,اذا فامامك اختيار من ثلاثه : اما ان تذهب لطبيب نفسى محترم , او  تبدأ فى اجراءات الهجره بلا عوده , او ان تؤمن بالامل المطلق الغير مشروط علما بان لا ضامن له الا رحمه ربنا ) يبقى بلاش سياسه و عموما ما اظنش ايدى حيرانه ده كله عشان تكتب سياسه و زى ما قال الشيخ محمد عبده :  أعوذ بالله من  السياسه و من ساس يسوس  ومن سائس و مسوس،...




مازالت الحيره تلآلآ بين ظلمات النفس ....طب اكتب عن فيلم من اللى شفتهم قريب ؟ امممم لا مش معقول بعد ده كله اكتب عن ابداعات حد تانى فالفيلم ده عصاره بنى ادم عصر نفسه و حطه ليك كمشاهد فى كوبايه فاذا بيك تنتقده كمان ....و الامر متساوى فى الكتب برضه ....

و الحقيقه متوهانى ....فى الشوارع ليه بنسأل ميت سؤال ؟؟ و الطريق نمشيه و تانى بنرجعه ..كل حاجه فوق حدود الاحتمال ...كل واحد فينا جرحه بيوجعه ...."جزء من اغنيه الشوارع" ....مزيكا ااااه نفسى المزيكا تتكتب لكن ملهاش حل احيانا مش بلاقى حاجه بتعبر عن اللى عايزه اقوله اكتر من حته موسيقى بلا كلمات كأنك بتكلم بنى ادم اخرس لكن فاهم انت عايز تقول ايه لانه الوحيد اللى بيسمع بينما يتحدث الناس...




يمكن عندى اكتئاب ؟؟ و الله ممكن ....هى ايام الامتحانات كده بينزل عليا كلام غريب فى الايام دى , المفروض اقفل المدونه الايام دى لارحم الناس من تخاريفى و حيرتى و اصرارى كل سنه قبل الامتحانات بيومين انى اعرف سر الكون و احنا هنا فى هذا الكوكب البائس ده بنهبب ايه ؟؟!! ...الايام تتوالى  بنفس وصف و.ب. بيتس "تمضى الاعوام كالثيران السوداء الهائله تدوس العالم , الرب راعيها ينخسها من الخلف , و انا تحطمنى الحوافر الماضيه"   ....او زى ما قال ماثيو ارنولد "اجول حائر بين عالمين : عالم قضى و عالم عاجز عن الخروج للحياه" ...او على طريقه  جون درايدن لما قال  "اما نحن فكحراس محكومون بالوقوف فى ليال بلا نجوم . ننتظر الساعه الموقوته" .....فى لحظات كتلك تستطيع فهم اللوحات السيراليه فتملا الفراغات بروحك القلقه و يتضح المعنى...اسفه تانى شويه فلسفه على فذلكه 





فهمت انا عايزه اقول ايه ؟؟؟...فهمت ازاى يعنى اذا كنت انا نفسى مش فاهمه !!!....اظن تلك المقاله نواه لمقاله اخرى لم اعييها بعد و لم اكتبها بعد .....

الأربعاء، 8 يونيو، 2011

تنكيس علم مصر !!



ايه هيكون احساسك لو شفت علم مصر بيتنكس قدام عينيك ؟ ...شعور بالغضب , باليأس , بالحميه لرجوعه يرفرف تانى , بالحزن ممكن كمان ....ايوه بتكلم عن علم مصر اللى ماتوا فى التحرير و هما فى حضنهم , عن علم مصر اللى كنت بتشيله فى ماتشات المنتخب يوم ما غلبنا الجزائر 4-0 او يوم جون ابو تريكه بعد جهاد زيدان فيه , العلم بتاع المدرسه لو كنت بتحضر الطابور...ايوه العلم رمز "جمهوريه مصر العربيه"

طب سؤال كمان : تفتكر ايه الاسباب اللى ممكن علم مصر يتنكس بسببها : 
1: حاله من الحزن العام لموت حد عزيز - و ان كنت اعترض على الفكره دى-
2: نكون اتهزمنا فى حرب ولا حاجه
3: حاله كارثيه ..زلزال ولا موت الالالف فى مصيبه...
* المهم ان فى يكون مصيبه فى البلد تكسر القلب و الوجدان .......

طيب بعد التحضير النفسى ده خد بقى الخبر ده و قولى قولى ايه رأيك جرب و اوصفلى :  

المحامون المعتصمون يهددون بتنكيس علم مصر ورفع علم أسود على نقابتهم


الثلاثاء، 7 يونيو 2011 - 16:18
 أعلن المحامون المعتصمون بالنقابة العامة، أنهم سينكسون علم مصر على نقابة المحامين وسيرفعون العلم الأسود، حتى تتم إعادة النقابة إلى المشهد السياسى وتمثيلها فى الحوارات الوطنية، ومشاركتها فى الحوارات التى تجرى حول التعديلات التشريعية والقانونية.

وأكد المحامون أنهم سيمهلون المجلس العسكرى ورئيس محاكم استئناف القاهرة حتى يوم 21 يونيو الجارى للاستجابة لمطالبهم، بحل مجلس النقابة وقيام رئيس محكمة الاستئناف باستلام النقابة ودعوته لإجراء الانتخابات تنفيذا للحكم بعدم دستورية القانون 100 لسنة 1993.

فيما أعلن خالد أبو تريكة وكيل النقابة، أنه تقدم باستقالته من المجلس منذ 5 شهور بعد صدور الحكم بعدم دستورية القانون 100، والذى أدى إلى فقدان المجلس لشرعيته، مشددا على ضرورة حل المجلس فورا والدعوة لانتخابات حرة نزيهة، تأتى بمجلس نقابة قوى يراعى مصالح المحامين ويساهم فى عودة النقابة إلى ريادتها فى المجتمع وعدم تهميشها.



ايون ...المحامين عايزين ينكسوا العلم و يحطوا علم اسود!!..مفهمتش السبب بوضوح يمكن لان فكره تنكيس العلم نفسها عملتلى رعب و خضه ...اه بالمناسبه -حته تفاهه على جنب كده- خدت بالك ان وكيل النقابه اسمه "خالد ابو تريكه" اصل الاسم ده نادر و بالمناسبه لو حد يعرف معنى تريكه ايه يبقى يقولى ....

ملحوظه : اسفه بقوه و بشده لعدم انضباطى  بحمله التدوين اليوميه بصراحه لانها مرهقه جدا لايجاد افكار و خفت انى اكتب اى كلام بطحينه -ده على اساس انى بكتب كلام عدل اصلا - و كمان الامتحانات كبسه عليا بقوه فانا دلوقتى بكتب محاطه بالكتب و المذاكرات و امتحان بعد بكره لسه مقرتش فيه حاجه ...و بالتالى قررت اطبق نظريه مورفى "اذا فشلت فاخفى كل الادله انك حاولت"....



الخميس، 2 يونيو، 2011

ان غاب عنكوا بطرس غالى فكلكم بطرس غالى!!



الاول كده خلونا نتفق على ان احد الاسباب الهامه جدا فى نجاح الثوره كان العامل المادى ..لاحظ انى قلت نجاح الثوره و  ليست اندلاعها لانها بدأت فى البدايه مع شباب النت بسبب الكرامه و الحقوق السياسيه و شغل امن الدوله لكن تركيزى هنا على مرحله انضمام رجل الشارع العادى  و هم عاده اغلبيه صامته مطحونه تحت وطأه عجله الانتاج و دوامه الفلوس اللى اكيد كان من اكبر دوافعهم الحاله الاقتصاديه السيئه و معدلات النمو اللى محدش حاسس بيها و المرتبات اللى بتدفع دفع للرشوه و السرقه علنى .....

و طبعا كان بطل تلك المأساه وزيرنا الغالى بطرس غالى اللى كان بياخد منا ضرائب على النفس و الهواء و ان كان غير نقى ...

* 10% ضريبه مبيعات  : بمعنى اى حاجه تتباع و تشترى الدوله ليها فيها 10% و ان بيعت اكثر من مره فمش مهم اهو كله مكسب ...و ده يتضمن قطع غيار العربيات و بالاماره شوف فاتوره الميكانيكى بتاعك , يتضمن مكندولند و هارديز و بيتزا هات و غير هات بمعنى ان حتى قرارك ان تخرج مع اصحابك تاكل بره بتدى الدوله -من غير اى تعب او تكلفه منها- 10% مما تدفع فان كان الحساب 50 جنيه وجب ان تدفع 55 جنيه و الباقى فى ايد عمو بطرس غالى  و ان كان الضريبه دى بذات ابداع شخصى و كامل لوزير الماليه الاسبق محمد احمد الرزاز اللى حظى باكبر قدر ممكن من الكراهيه المصريه....و قد قيل عنه : 

- لو لم أكن رزازياً لوددت أن أكون رزازياً .. حكمة يحفظها عن ظهر قلب كل محصل للضرائب الرزازيه .. لدرجة أن أحد المحصلين أبدع قصيدة شعرية حباً فى الزاز ومطلعها

فات المعاد ووجب السداد فات فات تفيد بايه يا ندم وتعمل إيه يا عذاب

ورد عليه أحد الفقراء بقصيدة مطلعها

أخى جاوز الزاز المدى فحق الجهاد وحق الفدى

- بالكشف فى المعاجم المتخصصة عن كلمة رزاز .. نجد أنها من الفعل رزز أى نكد وكدر وعكر .. والترزيز أى السرقة بالإكراه .. ولا بد أن المؤلف كان يقصد أنها كانت تحت سمع وبصر الحكومة وجهازها الأمنى وقانونها المعروف بالطوارئ!

- قريباً سيصدر كتاب " الطريقة المصرية فى جمع الأوراق المالية " مؤلفه جابى – رزاز – رع .. وفيه شرح دقيق لكيفية استخلاص الأوراق المالية من الجيوب الشعبية وإدخالها إلى الجيوب الثرية .. وربما يستفيد منها الحرامية وذلك بعد مرورها على وزارة المالية !!
 
- و دى عينه من "نص كلمه" لاحمد رجب تلك الاوقات :   من شكاوى المقهورين ضحايا وزارة الابتزاز - المالية سابقًا - أن المموِّل الذى يتوجه لدفع ما عليه من ضريبة المبيعات يطلبون منه رسما جديدًا «جنيهين» اسمه رسم فتح الخزينة لوضع فلوس المموِّل بداخلها، وننبِّه وزير المالية على وجوب فرض رسم آخر «جنيهين أيضًا» اسمه رسم إغلاق الخزينة حتى لا يُضطرَّ الموظف إلى ترك الخزينة مفتوحة، لأن «أولاد الحرام كتير».

* الضريبه العقاريه :  و ما ادراك ما الضريبه العقاريه نار الله الموقده , تخيل الدوله بتاخد منك فلوس على سكنك و ان لم تمتلك غيره , بتاخد ضرائب على شئ لم تكسب منه و لا يدخل اصلا فى دائره الانتاج فيتم تقييم بيتك على سعر السوق و تدفع عليه ضريبه مع انك مش هتبيعه اصلا .....بغض النظر عن كونك بتدفع كتير او لا لكن الفكره نفسها تعصب جدااا  ...بالمناسبه امبارح طلع سمير رضوان مع عمرو اديب و قال نيه الحكومه عن ارجاع "العوايد" التى تصل نسبتها ل 40%

* ضريبه التركات : بمعنى ان الدوله بتلهف فلوس و نسبه من تركه المتوفى و تقاسم اهل الميت فى فلوس الراجل ...يعنى لو واحد مات و عنده ولد وبنت يتحسب ان عنده ولد نصيبه كذا و بنت نصيبها نص كذا و بطرس غالى نصبه ضعف كذا ...طب الحكومه اتغرمت ايه فى موت الراجل عشان تاخد فلوس منه ؟؟

لجمارك : ااااااه من الجمرك و اى حد سافر عارف المأساه اللى بتكلم عنها من اول جمرك العربيه اللى اغلى من العربيه لحد غساله الاطباق .. 


و كأن كل ده مش كفايه فجاء سى سمير رضوان وزير الماليه الحالى فى حكومه سى شرف الاستاذ شرف فتح الباب جاب ضرف ...ليكمل علينا و يسويها بالارض مع رمى بعض الفتات يسدوا افواهنا ....

الكلام الجاى من موزانه 2011/2012 بختم سمير رضوان :

* 10% زيادة فى ضريبة مبيعات السجائر : كالعاده طبعا زى كل سنه و كل ما يتزنقوا يكملوا الميزانيه من السجائر و دى عاده بطرسيه غاليه قديمه ...

*وفرض ضرائب تصاعدية على الدخل، بإضافة شريحة جديدة قدرها 25%، لمن يزيد دخله عن 10 ملايين جنيه سنويا من الأفراد أو الشركات. : و سلم لى على الاستثمار ازاى تقدر تجذب استثمار اجنبى و انت عامل ضرائب 25 فى المئه فى حين ان دوله ايرلندا عامله ضرائب 6.5 % عشان تبقى مغاطيس اسثثمار  لكل العالم تشد الفلوس من اميركا نفسها ...و لما سألوا الوزير المبجل قال الناس بتحب مصر و تحب تستثمر فيها هو من امتى الاقتصاد بيتعاملوا بالحب ...

*  فرض ضريبة أرباح رأسمالية تقدر بـ 10%، على توزيعات شركات الأموال والأشخاص والدمج والاستحواذ وإعادة تقييم الأصول : عارفين يعنى ارباح راسماليه ؟؟ طب ركزوا بقى فى الحته عشان مهمه جدااااا :
  - لو اشتريت حته ارض المتر ب 100 جنيه و بعدين بعتها المتر ب 150 الدوله تاخد منك 10% من المكسب ...

- لو اشتريت سهم فى البورصه ب 6 جنيه و بعته ب 8 جنيه الدوله تاخد 10% من المكسب 

- لو عملت دمج بين شركتين الدوله تاخد 10% من المكسب ..و سلم لى عالاسثتمار ...

دعنى اسجل براءه الاختراع لهذا المولود الضريبى لاستاذ سمير رضوان 

* فما سبق فكان الضرائب فاما الاحق فالفتات اللى رماه : 

أنه سيتم تحديد قيمة الحد الأدنى للأجور بـ 700 جنيه شهريا، فى العالم المالى المقبل (2011 / 2012)، وقال وزير المالية، إن الحد الأدنى للأجور سيزيد تدريجيا ليصل إلى 1200 جنيه خلال خمس سنوات : احد اكبر الحاجات اللى كانت بتغيظنى فى النظام السابق و حكوماته انه مكنش بينفذ احكام القضاه و اهمها حكم ال 1200 جنيه فعلى الرغم من انى مش من مؤيدى فكره 1200 و شيفاهم كتير عالدوله لكن على الرغم من ان 700 مش قليل لكنه برضه مش تنفيذ للحكم و بالمناسبه الناس رفعت قضيه عالحكومه تانى ...

ملحوظه : كنت امل ان الثوره تمحى خطايا الضرائب و جو "فاوترك ولا اظبطتك" ثم جاءت الصاقعه بالابقاء على الماضى و اضافه معاناه جديده ....و محدش يقولى يعنى يعمل ايه بلاش جو اديله باليمين و اسحب منه من الشمال ...و ان غاب عنكوا بطرس غالى و الرزاز فكلكم بطرس غالى و الرزاز و لا عزاء للدفاعين ... 

الأربعاء، 1 يونيو، 2011

تجربه ثوريه ..."اقراها للاخر"



الاول كده دى مقاله صلاح منتصر بتاعه امبارح اعجبت بيها جدا و قررت اديها ليكوا ...

نصيحه هامه : اقراها للاخر ففى النهايه ستكون المفاجأه ستنطلق من الضحك او يمكن البكاء على حالنا ...لا تنسى هناك مفاجاه


كنت أتصور أن الأمة كلها متحفزة متأهبة وأنها تنتظر طليعة تقتحم أمامها السور‏,‏ فتندفع وراءها صفوفا متراصة منتظمة‏,‏ ثم فاجأني الواقع‏,‏ قامت الطليعة بمهمتها واقتحمت سور الطغيان وخلعت الطاغية‏.


ووقفت تنتظر وصول الزحف المقدس للصفوف المتراصة وجاءتها جموع لا أول لها ولا آخر, ولكن ما أبعد الحقيقة عن الخيال, كانت الجموع التي جاءت أشياعا متفرقة وفلولا متناثرة.

كنا في حاجة إلي النظام, فلم نجد وراءنا إلا الفوضي, وكنا في حاجة إلي الاتحاد, فلم نجد وراءنا إلا الخلاف, وكنا في حاجة إلي العمل فلم نجد وراءنا إلا التكاسل.

وذهبنا نلتمس الرأي من ذوي الرأي والخبرة من أصحابها, ومن سوء حظنا لم نعثر علي شيء كثير, كل رجل قابلناه لم يكن يهدف إلا إلي قتل رجل آخر, وكل فكرة سمعناها لم تكن تهدف إلا إلي هدم فكرة أخري, ولو أننا أطعنا كل ما سمعناه لقتلنا جميع الرجال وهدمنا جميع الأفكار.

وإنهالت علينا العرائض والشكاوي بالألوف ومئات الألوف, ولو أن هذه الشكاوي والعرائض كانت تروي لنا حالات تستحق الإنصاف أو مظالم يجب أن يعود إليها العدل لكان الأمر منطقيا ومفهوما, ولكن معظم ما كان يرد إلينا لم يزد أو ينقص عن أن يكون طلبات انتقام كأن الثورة قامت لتكون سلاحا في يد الأحقاد والبغضاء.
ولو أن أحدا سألني في تلك الأيام ما أعز أمانيك لقلت له علي الفور: أن أسمع مصريا يقول كلمة إنصاف في حق مصري آخر, أن أحس أن مصريا قد فتح قلبه للصفح والغفران والحب لإخوانه المصريين أن أري مصريا لا يكرس وقته لتسفيه آراء مصري آخر.

من كتاب فلسفة الثورة بقلم جمال عبد الناصر نشرت لأول مرة في21 أغسطس1953 بعد عام من ثورة يوليو. 1952



مفاجاااااااااااااااااااااااااااااااااااااااه ......

المقاله دى جزء من حمله التدوين اليومى و يارب متزهقوش منى .... 
الايفيت من هنا
http://www.facebook.com/event.php?eid=153550154710959