السبت، 10 ديسمبر 2011

رافض الاخوان اختار مما بين الاقوس...




اذا كنت -رافض لتطبيق الشريعه الاسلاميه- اقصد انك مش هترشح الاخوان او السلفيين او عالاقل حزب الوسط فاختر حقيقتك من بين الاقواس :
(شاذ - خمورجى - مدمن مخدرات - حرامى - بلطجى )....سؤال اجبارى بلا اختيارات اخرى ...


اما اذا كنتى -رافضه لتطبيق الشريعه الاسلاميه- برضه اقصد ترشيح الاخوان و السلفيين او عالاقل حزب الوسط فليست امامك سوى اختيار اجبارى واضح -طبقا للكاركتير- هو انى تكونى عاهره !!!!!......

اهلا.....و بدأ الجزء الثالث من الحمله المخطط لها بدقه -انا من اعتى اعداء نظريه المؤامره لكن الحمله التى اقصدها هنا سياسيه واضحه المعالم....


بدأت الحمله باطلاق السلفيين على الفضائيات بالوعيد و التهديد باجبارنا و ان كان عجبنا...كانت الحمله مقترنه بخوف شعبى واضح


اما الجزء الثانى: فكان حبايبنا الحلوين -اقصد هنا الاخوان غالبا- بنفى ما تردد بكل رقه و كأنهم بيقولونا لو خايف من البعبع اقعد هنا على حجر عمو و اطمن....اكتر حاجه تفقع فى هذا الجزء هو الكذب المتواصل فهم من يصرحوا و هم من ينفوا فى كذب مكين و عاده ما يكون التصريح مدون اما فى جريده محترمه او فيديو و مع ذلك بيكذبوا و احنا بنشربها ...و ماله


اما الان فالجزء الثالث وهى مرحله اغانى عمر دياب : و ماله؟؟!!...و تبدأ المرحله بتشكيكك فى نفسك ...انت مش مسلم؟؟ طب متأكد؟؟ امال معترض على شريعه ربنا ليه ؟؟
و لاحظ فى تلك المرحله ان شريعه ربنا تعنى اصواتك فى الانتخابات


المرحله الرابعه -ان شاء الله- : انت مش مسلم....انا متاكد انك مش مسلم...و كمان مش عايز شرع ربك يا كافر :(


فعزيزى رافض الاخوان و السلفيين اختار مما بين الاقواس او لترحل الى كندا بس متعملش حسابى لانى قاعده فيها....

14 التعليقات:

ابراهيم رزق يقول...

انا قاعد معاكى على قلبهم

تحياتى

د/دودى يقول...

يا خوفى ...

faroukfahmy58 يقول...

استنوا ياجماعة ما تمشوش من غيرى والا اقول لكم نروح الهند احسن حبايبى كتير هناك وابراهيم رزق يسلك معاهم قوى يادكتورة اسألينى انا
والله ياابراهيم عوزين نكرر مشوار التحرير تانى

Tarkieb يقول...

عارفة دول عاملين زي ايه؟ زي واحد دخل معركة ضد حاكم واتصاب ودول بقى الدبان الاخضر والازرق والاسود اللي هجمو على جرحة ....لو الراجل قاوم ح يكلو وينضفو الجرح ولو استسلم الراجل ح يدود ويشغى الدود في المنقوع ......

Bent Men ElZman Da !! يقول...

هى بقت كده ؟!! :D
احنا نفضل قاعدين على قلبهم لحد ما نقطع نفسهم ويبطلوا حركاتهم دى
ده احسن حل مع البنى ادمين دول

سواح في ملك اللــــــــــــــــــه- يقول...

لماذا لاننتظر

لماذا نستبق الاحداث

ونبادر بالاتهامات

لست سلفيا ولا اخوانيا

وليس تبرؤا

ولكني ايضا لااحب مهاجمتهم او مهاجمة اي تيار اخر ليبرالي ا و علماني

هؤلاء الناس عانوا الامرين في عهد المخلوع

انا مش فاهم ايه المطلوب

هي فين الديمقراطية لما احنا عايزين نقصي طائفة موجودة بالفعل

علي ارض مصر

انا اميل للاعتدال

فربنا قال من شاء فليؤمن ومن شاء فليكفر

والحساب هناك عند خالقنا

د/دودى يقول...

faroukfahmy : هو احنا نقدر نمشى و نسيبك برضه ...اممم حلوه فكره الهند اهى جديده برضه و ابعد من كندا و اهو ننفى نفسنا قبل ما ينفونا

د/دودى يقول...

Tarkieb : تعبير غريب مع انها صادم و حقيقى و حسب رأيى الطبى ان المريض ده هيموت و هياكلوه...يارب اطلع غلطانه

د/دودى يقول...

Bent Men ElZman : متضايقه انها وصلت لكده...ولسه دا احنا ياما هنشوف عجب

د/دودى يقول...

سواح في ملك اللــه : بذمتك انا اللى بهاجم ؟؟!!...انا نقلت الكاركتير من عالفيس بعد ما اتحرق دمى و قررت انى ارد على المتخلف اللى متخيل انى لمجرد انى مختلفه معاه ابقى مدمن او مترشى او عاهره !!!...يبقى مين اللى غلطان؟؟.....ثم نستنى ايه اذا كنا عالبر اهو و ابتديت الشتيمه و قله الادب لمجرد الاختلاف فى الراى

سواح في ملك اللــــــــــــــــــه- يقول...

سؤال محدد يادكتورة

انتي سمعتي هذا الكلام علي لسان حد منهم

دي حاجة

تاني حاجة هو لما اي واحد ييجي يقوللي فلان مثلا شتمك

انا علي طول ابادر بمهاجمته والا اشوفه شتمني والا لا الاول

واشوف ايه مصلحةاللي بلغني

د/دودى يقول...

سواح في ملك اللــه : كلام ايه؟؟ انا نقلت الكاركتير ده من الصفحات السلفيه و الاخوانيه فى الفيس و هو كاركتير منتشر جدا و متداول عالنت انا مخترعتوش ...يعنى هيكون حد ليبرالى هو اللى عامل كاركتير زى ده؟؟

وجع البنفسج يقول...

رغم اني مش اخوانجية ولا سلفية ولا ملوخية .. إلا اني باقولكم ما تخافوش من حكم الاخوان .. لانه احنا جربنا حكمهم .. بصراحة في الاول ح يكون حملة تأديب للجميع وبعد هيك راح يمسكوا البلد بالحديد والنار وبعد هيك يبدأ تطبيق القانون مع اضافة روح اسلاميه له وللأمانة في المرحلة الاخيرة راح يكون في استقرار في البلد وأمان .. طبعا مع تقييد حرية البعض ممن هم في الكاريكاتير .. وبتهيالي كمسلمة لن ارفض ان يتم تقييد حريتهم بل القضاء عليهم ... !!!!! هههه

Umzug Wien يقول...

الله لو بطلنا نخون بعض ونخااااااااااف من بعض
حياتنا هتبقى افضل .... :)

إرسال تعليق

حلو؟؟ وحش؟؟ طب ساكت ليه ما تقول....