الجمعة، 16 ديسمبر، 2011

مش عايزه اقرا تانى..





مش عايزه اقرا تانى...واضح ان القرايه مش بتغير حاجه و كمان بتفرجنى الصح اكتر 
فمبقتش اطيق الغلط.....هكذا اعلنتها على الملآ


مش هاقرا شعر تانى....و البنت ام عيون سودا تغير منها الغزلان بتتسحل فى الشارع


مش هاقرا سياسه تانى...و البلد محكومه بحكم عسكرى و مهدده بحكم دينى


مش هاقرا نجيب محفوظ و ابراهيم اصلان و انيس منصور و فريجنيا وولف ...و المثقفين عار يجب ان نمحيه ام بسجن الجسد فى سجون عسكريه او بقتل المخ بتكفيير


مش هاقرا ادب شباب....و الشباب بيمووووت و بيتسحل و بيتسجن و بيستشهد


مش هاقرا ادب ساخر....لان البلد اصلا بقيت مسخره


مش هاقرا كتب تاريخ...اذا كان التاريخ يعيد نفسه مرارا و تكرارا بلا ادنى نيه للتعلم من اخطاء الماضى


مش هقرا فلسفه...اذا كانت الفلسفه عندنا نوع من الزندقه او كلام فارغ بنملا بيه قراطيس اللب


مش هاقرا تنميه ذاتيه....لان ذاتى ضاعت و لا امل عندى فى تنميه اى شئ سوى شعرى  او لعلى اشترى نبات يساعدنى و اساعده


مش هاقرا كتب مخيفه...ده بشوفه كل يوم


مش هاقرا رومانسيه....لانها انتحرت لما كشفوا عن عذريه البنات


مش هاقرا فى الطب تانى....اذا تحول حلمى من ان اكتشف دواء للشفاء من السرطان الى ان يكون اقصى احلامى هو ايجاد اسرع طريقه للتخفيف من اثار الغاز المسيل للدموع و علاج ضرب الطوب على الرأس






حاسه انى ابتديت اكفر بكل الاشياء.....كل الاشياء...مبقاش عندى امل ان بكره احسن ولا حتى زى النهارده احنا بننزل كل يوم سلم و فيوم هالاقى نفسى انا و البلد فى قاع سلم...


كفرت بكل السياسين الدينى منهم و السياسى لا استثنى منهم احد....الناس بتتضرب فى الشاااارع و انتوا بتكوشوا على مقاعد مجلس الشعب....مجلس شعب ايه ؟؟؟ بالطريقه دى مش هيفضل شعب اصلا....


الاخ الفلحوس اللى عايز يحجب و ينقب البنات ...يدافع الاول عن البنات اللى بتتسحل فى الشوارع...الاخوه الليبرالين اللى بيحاربوا الجماعه بس و نسيوا الناس ...


مش عايزه افقد رؤيتى الطفوليه للاشياء بالابيض و الاسود...و اتحول لرؤيا الناضجين بكل مراحل الرمادى .....مش هاقبل بالغلط متحولش 



13 التعليقات:

donkejota يقول...

وانا مش هابطل افرح طول ما في بنات زيك في البلد

د/دودى يقول...

يا بختك....انا برضه بحاول بس مش عارفه

ابراهيم رزق يقول...

مش عارف اقول ايه
اقول معاكى حق
لما القناة الوحيدة اللى مهتمة بما يحدث هى الجزيرة بينما بقية الفموات فى امبابة و شبين و السويس و اخبارها تقدم حزب النور و تقدم حزب العدالة
ايه اللى بيحصل ده
فين الامن و الامان
لكن هارجع و اقول
لسه الطيور بتفن
و النحليات بتطن
و الطفل ضحكه يرن
مع ان مش كل البشر فرحانين

تحياتى

غير معرف يقول...

ثقافة الهزيمة .. عصابة البقرة الضاحكة‏ 3

وأنا تقديري الشخصي لهذه العملية الخاصة بسعاد حسني أنه لم يكن ثمة ما يدعو لأقتحام الغرفة عليها أثناء وجودها مع ممدوح والأكتفاء بمواجهتها بالصور التي حصلنا عليها من عملية الكنترول خاصة وأن الأقتحام تم أثناء ممارسة أوضاع جنسية وكانت سعاد عريانة،

وأذكر أنه في مرحلة من مراحل العملية كانت سعاد وممدوح متغطيين بملاية وكان ذلك من ضمن الأسباب التي دفعت إلى التفكير في الأقتحام أنما هذا لا يمنع من أننا ألتقطنا لهم صور قبل ما يتغطوا بالملاية، وقد كانت هذه العملية الخاصة بسعاد حسني هي أول عملية نلجأ فيها إلى هذا الأسلوب في التجنيد وهو ضبطها متلبسة. ...

باقى المقال ضمن مجموعة مقالات ثقافة الهزيمة ( بقلم غريب المنسى ) بالرابط التالى www.ouregypt.us

هذه هى الحقيقة العارية للعصابة التى كانت و مازالت تحكم مصر.

ع.سالم يقول...

إيييييه !
الواحد مش عارف يقول إيه ولا إيه ولا إيه! للأسف أنا مصاب بنفس الإحساس، انا حاسس إن القراءة ملهاش لازمة، ما أنا هتثقف، بالنسبة للجهلة دول نعمل فيهم إيه، هنعترض شوية ع النت، ننزل التحرير، وبعدين ؟ ... أول مرة أحس بإحساس الإحباط الشديد ده، أنا كاتب بوست محبط، وإنتِ كاتبة بوست جميل، بس أكتر إحباطًا... :(

MSMO يقول...

لا هنقرأ وهنقرأ أكتر علشان يستمر الكفاح والسير في الطريق لتحرير الوطن هناك مقولة تقول

"إن مهمة المثقف هي أن يطرح علنا للمناقشة أسئلة محرجة ، و يجابه المعتقد التقليدي و التصلب العقائدي بدل أن ينتجهما ، و يكون شخصا ليس من السهل على الحكومات أو الشركات المؤسسات استيعابه ، و أن يكون مبرّر وجوده تمثيل كل تلك الفئات من الناس والقضايا التي تُنسى و يُغفل أمرها على نحو روتيني "

قد نيأس قليلا أو نشعر بالتخاذل في الطريق لكننا سنقوم و نكمل الطريق :))

Carmen يقول...

انا كمان اعصابى تعبت من الاخبار اللى واضح جدا انها مش بتجيب اى فايدة ربنا يستر

هبة فاروق يقول...

لا ده انا على كده مريحه دماغى على الاخر
لا بقرا ادب ولا شعر ولا سياسيه اقصد بلوتيكا
بجد احساس عالى جدا وشعور محمل بالحزن والهم والياس
اصابنى وانا بقرا كلامك
ريحيى دماغك من السياسه شويه واكتبى فى اى حاجه حتى لو كانت مجرد تخاريق ..شخبطى شويه فى مدونتك الدنيا مش تبوظ
تحياتى لكلماتك التى اصابت قلبى بسهم ممزوج بالحزن

د/دودى يقول...

ابراهيم رزق : كل واحد بيدور على حاله ...يلعن ابو كل المجالس اللى هيموتنا عليها ....و يلعن ابوهم هما كمان

د/دودى يقول...

ع.سالم : واضح انه احساس عام...مودى فى الارض عموما و عندى احساس بعثيه الاشياء..كل الاشياء

د/دودى يقول...

MSMO : عارفه انى هكمل لكن حماسى فى نفع ما افعله يتضاءل قتيلا قتيلا ...

د/دودى يقول...

Carmen : احنا صحيح اعصابى بتتعب من الاخبار لكن مش الحل انى ابطل اتفرج

د/دودى يقول...

هبة فاروق : كل ما احول اريح دماغى القى الهم بيدور عليا

إرسال تعليق

حلو؟؟ وحش؟؟ طب ساكت ليه ما تقول....