الاثنين، 28 مايو، 2012

مقاطعون مقاطعون فليحترقووون



مقاطعون مقاطعون فليحترقووون....هكذا اعلنتها بعد ان صحوت من صدمتى العميقه فى اختيارات شعب اقل ما يوصف به انه لا يريد حريته....


مقدرش اختار بين اللى ضيع عين حراره الشمال فى معركه الجمل و بين اللى اتفرج عليه و عينه اليمين بتضيع فى محمد محمود...و اذا كان حراره مقاطع فانا معه ...



عايز تعرف المرار اللى جوايا من الاخوان منين؟؟...عايز تعرف ليه مقررتش ببساطه اساند عضو الثوره القديم؟؟...تقدر تقول انى معقده...ايوه عقد و كلاكيع و كده......


17 ديسمبر 2012...فاكر التاريخ ده؟؟؟ ده عز احداث مجلس الوزراء و يوم مقتل و استشهاد علاء عبد الهادى الله يرحمه....و فى عز دموعى دى قعدت يومها عالفيس اتطلع غضبى فواجهنى هذا الفيديو المسجل فى اليوم نفسه فى احد اللجان الفرعيه ....تخيل و انت بتتقطع على الشباب و الاخوان بيغنوا يا صلاه الزين؟؟؟!!!!!!!............يلعن ابو اللى خان دم اللى راح عشان الكراسى


مرسى و شفيق الاتنين ولاد كلب...بس الفرق ان واحد منهم عارف و التانى عامل نفسه من شعب الله المختار...شفت السهوله؟...بالنوسبه للناس اللى مشاعرها بتتجرح من لفظ "ابن كلب"...على فكره لفظ "ولاد كلب" ده مش شتيمه دى ايدلوجيه معروفه....لما حد يسيب ناس تتقتل بدم بارد و هو رئيس حكومه من غير ما يدخل و ينقذهم....او لما لما حد يسيب الناس تتقتل و تنتش فى عينها بالخرطوش فى محمد محمود و هو زعيم اغلبيه فى البرلمان.........يبقى اقل وصف ليهم انهم "ولاد كلب" غير طبعا قتله و امثالها من المشتقات....


انا بقى عايزه اشوف حد هيدى مرسى و اعمل عليه دراسه نفسيه: ايه اللى عجبك فى شخصيته عشان تنتخبه ولا انت عارف انه قرطاس و مبسوط؟؟


اللى اختشوا...ماتوا فى موقعه الجمل و اتخرمت عينهم فى محمد محمود و اتعروا فى مجلس الوزراء ....دول اللى اختشوا


ايام الحزب الوطنى vs الاخوان....مكنتش بنزل ...كنت بحس ان الموضوع ميخصنيش اصلا... و هو نفس الحال اليوم


فقعونى بحجه انقاذ الثوره....ده اساس ان لو الاخوان كسبوا يبقى الثوره نجحت؟؟؟؟!!!!!!!!!!!!!!....قول و المصحف....ما هما اللى قالوا لى....شعار المرحله مع الريس مووووووووورسى



فعليا دى اخر انتخابات واقعيه ليك: بعد كده اتوماتك هتتحول من مرسى لبديع لعصام العريان للبلتاجى و هكذا....
او
من احمد شفيق ل جمال احمد شفيق ل شفيق جمال احمد شفيق و هكذا....اتفوووووو على دى اختيارات



تحب تعدم كبلطجى و خارج عن القانون ولا يتطبق عليك حد الحرابا لانك كافر و ملحد و مفسد فى الارض؟


و يقولك  يالا نتحد ضد الفلول و لو هيعيد ضد مرشح ثوري هيقولك يالا نتحد ضد العلمانيين الكفرة...



عايز تدى الاخوان و بعت روحك ليهم ...متشتغلش بقى انك ثورى و بتضحى بنفسك
عايز تدى شفيق و بعت روحك لنظام زفت...متشتغلش بقى انك مدنى و خايف عالبلد


و فى الحالتين متزهقش اللى مقاطع و قرفان من انه يحط ايده فى بلاعه
مات الكلام





4 التعليقات:

Tears يقول...

me3aky gedan wa enty be alf ragl

Lager Mieten يقول...

اللهم ولى امورنا خيرنا ولا تولى امورنا شرارنا
هبطل صووووووووووووووووووووووووتى .. انا كمان

mghool2004 يقول...

أبطلت صوتى ولسه شايف المدونه دلوقتى وقريت البوست ده حالا
مش محتاج أكتب كومنت دلوقتى طبعا, لأن كلنا شايفين الواقع وعارفين البلاعه اللى احنا وقعنا فيها
بس حبيت أرد هنا لمجرد إحياء البوست ده تانى.. للتاريخ

د/دودى يقول...

يااااه و الله و انا كمان كنت نسيت البوست ده....بحمد ربنا ان ما عصرتش لمون كان زمانى اتشليت

إرسال تعليق

حلو؟؟ وحش؟؟ طب ساكت ليه ما تقول....