امتياز32: صيام عصير التفاح

"الساعة 10:40 مساء , تدخل فتاة حوالى 17 سنة بصحبتها 4 صديقات و امها , الفتاة ترتدى اسود , حزينة لكن تبدو بصحة جيدة"

-دينا: "فى ارهاق" مين فيكوا اللى تعبان يا جماعه؟

-صديقة 1: "تشير الى الفتاة" هى يا دكتورة , بصى تعبانة ازاى؟

-دينا: ولا تعبانة ولا حاجة , البنت شكلها كويس اهو الحمد لله , عموما نقيس لها الضغط برضه و نفحص

"بعد الفحص"

-دينا: زى ما قلت البنت كويسة و زى الفل

-ام المريضة: دى مكلتش بقالها اسبوع يا دكتورة

-دينا: اسبوع؟! و مش بتاكلى ليه؟ فى قئ او بطنك بتوجعك او اسهال؟

-الفتاة: "فى رقة" اصل ماليش نفس

-صوت داخلى 1: يا بختك , ده دينا من صباحية ربنا لا كلت ولا داقت الزاد فى المستشفى المهببة دى و هتموت من الجوع يا عينى

-ام المريضة: قاطعة الاكل بقالها اسبوع يا عينى , قلنا نجى نعلق لها محاليل

-دينا: بتشرب سوايل يا ماما؟

-صديقة 2: بتشرب عصير التفاح بالعافية

-صوت داخلى 1: يا بختتتك , ده دينا بقالها 11 ساعات هتموت على بق ميه حتى مش عصير و حتى مش لاقيه وقت تروح تشترى ازازة مية بدل ريقها الناشف ده

-ام المريضة: هتعلقى لها محلول صح؟ "تخفض صوتها" اصلها مخانقة مع خطيبها عشان كده صايمه

-صوت داخلى 1: يا بنت المحظوظة و كمان عندك خطيب؟! ده دينا المسكينة بقى عندها 24 سنه و لسه عزباء و شكلها هتفضل كده حتى الموت

-دينا: "تحاول تجاهل الصوت الداخلى" البنت حالتها العامة كويسة يا ماما , المحلول ده مش اكل ده ميه و ملح لتعويض السوائل مش اكتر

-ام المريضة: بس البت مش بتاكل

-دينا: المحلول مفهوش فراخ يا ماما , انا ممكن اريح دماغى و اعمل لك اللى انتى عايزاه بس مش هينفعها فى حاجة...شطارتك انك تقنعيها تاكل و تصلحى لها حالتها النفسية

-صوت داخلى 1: و دينا مين يصلح لها حالتها النفسية؟ 

-صوت داخلى 2: "يتدخل اخيرا" يا اخى نكدت على البنت , سيبها تشوف شغلها