الخميس، 23 يناير، 2014

حوليات207:استفتاء 1


زى ما توقعت, رحت اللجنه الساعه 12 كده لقيت -كالعاده- امة لا اله الا الله مشفتش حاجه مختلفه عن اى استحقاق انتخابى سابق هى هى نفس الطوابير و هى هى نفس الزحمه ...و الصورة المرفقة دى صوره اللجنه اللى جنبى لان اللجنه بتاعتى كانت زحمه و معرفتش اتصور حاجه ولا اصور حاجه 

الجزيرة الصبح قالت ان الصور قديمة من الدستور اللى فات بدليل ان الناس لابسه صيفى فقررت بلاش تيشرت و برولو و خليها صوف مع ان الدنيا حر بس عشان الجزيره تتبسط

السن اللى شفته كان معظمه فوق الاربعين , ستات غلابا بخمار طويل و نضارات طبيه بسيطة , و ستات عواجيز بيسندوها -كالعاده- عساكر الجيش فى مشهد مكرر للغايه مرضتش اصوره لان الصوره دى اشهر من اللازم و لعلها بقت اكليشه فى حد ذاتها

انا لحد و انا واقفه فى الطابور مكنتش حسمت هاقول نعم زى ما قريت الدستور ولا هاغلس على مصر و اقول لا تناحه كده و خلاص , و فى الانتظار يدور الحوار التالى بين سيدتين كلاهما فوق ال40 و بين صوت الستات اللى بره اللجنه اللى بتهتف كتسلية بما ان الطابور طويل و بين صوتى الداخلى اللى احتفظت بيه لنفسى:

سيدة 1: امال قعدوا يقولوا محدش هينزل ما الزحمه اهى 

سيده 2: اللى مش هينزلوا دول قله

انا: "ما شاء الله "قله" و فصحى كمان يا شعب مصر ؟ "

حشود: يا ابو نسر يا ابو ضبورة

سيدة 1: الواد قاعد فى البيت يقولى السيسى عمل ايه و انا اشتم فيه

حشود: مصر هتفضل منصورة

سيدة 2: قولى له مبقناش سوريا ولا ليبيا ولا اليمن

انا: "ايه يا اخويا الثقافه اللى نزلت عالطابور النهارده؟"

حشود: تسلم الايادى

سيدة 1: الواد عامل يقولى مرسى مرسى , قلت له ما انت يا خايب متخرج من الحقوق بقالك 3 سنين كان عملك ايه مرسى؟

انا: "اسمعى كلامى انا يا ست ولا السيسى هيعمل له حاجه"

حشود: تسلم يا جيش بلادى

سيدة 2: انا مش عارفه مين الرخم اللى هينزل يقول لا ده

انا: "بصى يا حاجه انا كنت هارخم بس يلا انا هاصوت عشانك بذات"

الظابط: يلا يا جماعه عايزين 5 من لجنه 150

انا: ايوه انا

سيدة 1: ربنا يحميكوا و يخليكوا يا ابنى لعيالكوا و للبلد

انا: "يا وليه بطلى ارحمى روحك بقى"


0 التعليقات:

إرسال تعليق

حلو؟؟ وحش؟؟ طب ساكت ليه ما تقول....