الأربعاء، 17 أغسطس 2011

Mary and Max 2009







ايه اللى يثبت "مارى دازى دينكل" اللى من استراليا ذات ال 8 سنوات مع "ماكس هوروتس" ذو ال 50 عام ذلك المريض النفسى الغير سوى العازب من نيويورك امريكا ؟؟ ...الاجابه ببساطه هى الطيبه و الوحده و الشيكولاته !! 

يقدم لنا المخرج الرائع ادم اليوت الحاصل على الاوسكار عن فيلمه الممتع  Harvie Krumpet فيلم اخر ممتع ...
 
فى الفيلم الممتع "مارى اند ماكس" انتاج 2009 , الفيلم الكارتون غريب الاطوار جميل المحتوى نرجع لسحر الصداقه ...الصداقه اللى هى كلمه تقريبا نسينا معناها فى الواقع و فى السينما .....عارفين اجمل حاجه فى الفيلم ده كان ايه ؟؟ اجمل حاجه فيه انه مبنى على قصه حقيقيه ...حاجه حلوه قوى اننا نرجع تانى نصدق ان الدنيا فيها صداقه مجرده من غير طلب او مصلحه , عارفه انه معنى طفولى و يمكن ساذج لكن الطيبه حلوه برضه على الاقل احيانا ...

تبدأ القصه بمارى الطفله فى استراليا اللى حياتها سيئه لحد كبير باسره غريبه و وحده قاتله ...


هى دى مارى ...طبعا اكيد خدت بالك من غرابه شكل الكارتون لكن بعد فتره بتتعود على شكله و هتحسه معبر اكتر من جو الثرى دى او الجرافيك ...


هى دى والده مارى و هى زى ما انت شايف كده سبب تعاسه بنتها فى رأيى ...والده مارى سكيره طول الوقت , بتدخن طول الوقت, بتنام كل الوقت, و فوق كل ده و ده بتسرق من المحلات كمان و لها عاده بسماع الماتشات فى الراديو  و بتعرض مارى بطفولتها ان والدتها "بتستلف " من المحلات  و انها بتدوق "الشيرى" ...

شخصيه الام محوريه فى بدايه القصه لما بتقول لمارى ان الاطفال بيجوا الدنيا فى قاع كوبايات البيره و بالتالى تتساءل مارى طيب فى امريكا بيلاقوا الاطفال فين ؟؟ و بما ان امريكا بتشرب كانزات كوكاكولا فبتفكر مارى انهم بيلاقوا الاطفال فى قاع الكانز!! فتقرر الاتصال برقم عشوائى من امريكا لسؤاله....و يقع الحظ و الاختيار على صاحبنا ماكس من نيويورك...

و ده ماكس ذلك العازب التعس من نيويورك , ماكس بيتجاوب ببساطه و طفوليه مع طلب مارى ....و بالتالى تتكون تلك الصداقه الممتعه الرائعه بين طرفين ..... 

من الاخر فيلم ممتع ...بسيط...مسلى ...متقلب الاحوال كثير الاحداث

الفيلم بتقييم 8.2 على الموقع الشهير imdb ...يحتل المرتبه 194 من افضل 250 فيلم فى تاريخ السينما ...تقييم 94% على موقع rottentomatoes


http://www.rottentomatoes.com/m/1209767-mary_and_max/


http://www.imdb.com/title/tt0978762/


ملحوظه : لا تنسى ان الفيلم قصه حقيقيه

للتحميل 
http://www.arbcinema.com/pen/showthread.php?t=14462

10 التعليقات:

ع.سالم يقول...

جميل، شوقتيني أشوفه..

بنزّله حالياً :)

Bent Men ElZaman Da !! يقول...

شجعتينى احمله واشوفه :)
ميرسى ليكى

blue-wave يقول...

هاشوفه ان شاء الله

العصفورية يقول...

دودو الصغيرة
فيلم (Mary and mAX ) هو فيلم تحريك ( clayography ) وليس فيلم كارتون - الكاتون جزء من أفلام التحريك- وهو فيلم رائع أما البشاعة في الأشكال فهي بسبب أنه فيلم ( clayography ) ولذلك أتت الأشكال كما ترينها في كل الأفلام المماثلةحيث تصنع الماكيتات من الصلصال والبولي إيثلين وأحيانا الأكريليك ومواد أخري وبسبب كثرة التحريك في الأجزاء لصناعة اللقطة بل الثانية الواحدة فتجديها معظمها تقنياً غليظة القسمات حتي تتحمل التحريك ولا ترهق الصناع في التفاصيل المنمنمة. وبعدين يادودي؟ هو انا كل يوم ح اصلح لك معلوماتك؟ تحياتي وتقديري.
د. محمد زكريا الأسود

ريبال بيهس يقول...

صباح الورد

للأسف شوه البشر معنى الصداقة لذلك ولو رايتها

على أرض الواقع دون أن أعرف ملابسات القصة فبالتأكيد

كنت سأشك في الخمسيني وصدق نواياه ...

فيلم مميز

تحياتي

د/دودى يقول...

ع.سالم : يارب يعجبك ...و لو معجبكش متدعيش عليا

د/دودى يقول...

Bent Men ElZaman Da: ميرسى ليكى انتى يا قمر على مقالتك و مدونتك الممتعه اللى متابعها لكن للاسف مش برد كتير..

يا رب الفيلم يعجبك

د/دودى يقول...

blue-wave : اهلا و سهلا بيك فى رفايع كبدايه ...و يارب يعجبك

د/دودى يقول...

د. محمد زكريا الأسود : الاول ربنا ما يحرمنا منك و من اصلاحاتك و ربنا ما يقطع لنا عاده...

ثانيا : عارفه انه اللى كنا بنسميه زمان "صلصال" لكن ده ميمنعش انى شفت صلصال شكله الطف من كده ..خاصه ان المخرج ده انا شفت له فيلم تانى اللى هو Harvie Krumpet و اللى بالظبط نفس الشاكله و الملامح ....

و تجاوزا كده بقول عليه فيلم كاتون مش معقول هاقول عليه "فيلم صلصال" ....

و تانى ربنا ما يقطع لك عاده

د/دودى يقول...

ريبال بيهس : و الله عندك حق لكن الغريبه ان طوال الفيلم محستش و لو للحظه بسوء نوايا البطل يمكن لان فى الكارتون كل حاجه حلوه من غير شك و بغضاء

إرسال تعليق

حلو؟؟ وحش؟؟ طب ساكت ليه ما تقول....