الأحد، 21 أغسطس، 2011

العبوا مع بعض !!!





من يومين -قبل احداث سيناء- لاقيت الفيس مولع ...خناقات و مناقشات و مشادات اخلاقيه و لا اخلاقيه ...اتهامات بالالحاد مقابله لاتهامات بالوهابيه ... شد شهر بين طرفين احدهما حامل لواء الديموقراطيه  و حامى حماته و الاخر حامل لواء الاسلام و المدافع الوحيد عنه ...اللى يضحك بجد ان الطرفين كانوا already مسلمين فاذا بى اشاهد المعركه دون فهم السبب....


و زى اى خناقه لما الاطراف بتسخن و فى وسط النقاشات ينسى الجميع او يتناسى السبب وراء ده كله ...و ببلاهه الاطفال سألت احدهم السؤال الابدى : هو فى ايه؟؟ ....

و اكتشفت ببساطه - على الرغم من ان الموضوع مش بسيط - ان الكاركتير هو المحفز الاساسى لتلك المعادله المشتعله ...


بديت القصه باول شتا لا سورى ...تبدأت القصه بكاركتير فى جريده الدستور اعتبره السلفيين اهانه ...اعذرونى لاعاده نشره لكن انا من انصار ان الحقيقه مش هتستخبى و عموما ده اتنشر فى جريده يعنى معروف و الناس شافته : 

بصراحه الكاركتير يغيظ نسبيا ....خاصه ان لو السلفيين مسكوا الحكم منفردين - وربنا ما يكتبه علينا - مش هيطبقوا الشريعه بالمنظر ده -او هكذا اتمنى - ...هو اللى يفقع فعلا و ضايقنى حقيقى هو الجمله المكتوبه فى البوكس الرمادى الخاص بالانفصال لانى باعتبره فعلا اهانه اكتر من اى جمله مذكوره فى الكاركتير لانه اتهام بانهم هيخربوا مصر و يفتتوتها و ده مش حقيقى و ظالم ...


و لكن متتخيلوش ان السلفيين غلابا يعنى لا دول بيخدوا حقهم و بيخدوه بزياده كمان و تم الرد سريعا و موجعا و كان هذا الكاركتير :


فاذا كان الكاركتير السابق قليل الذوق قراط فهذا الكاركتير قليل الذوق تلات اربع قراريط ....و رأيى هذا مبنى على ان الاهانه فيه شخصيه لشخص ابراهيم عيسى فحتى اذا كان على اختلاف مع السلفيين فهذا لا يعنى ابدا انه غير متدين او ان على راسه "اريال" فابراهيم عيسى على الرغم من اختلافى معاه فى دسته مواضيع الا انه بالتاكيد شخصيه معتدله و كان عامل برنامج دينى تاريخى فلا اظنه يستحق هذا ابدا ....العلمانيه لا تعنى كل هذا الكم من الاباحيه و قله الادب ...و الاكيد ان العلمانيه لا تشجع المذاهب الشيعيه ...


ده وقته ؟؟ هنمسك فى بعض تانى و نقطع فى بعض تانى ...من الاخر العبوا مع بعض

26 التعليقات:

الاحلام يقول...

الى متى سنكون هكذا لابد ان نتغير من الداخل كى يتغير ما حولنا مازال كل شىء كما هو وما زلنا نحتاج الى المعجزه كى نتغير من داخلنا
تحياتى الاحــــــــــــــــلام

مدونة صفوان يقول...

الله المستعان

غير معرف يقول...

على فكرة انا شفت الكاريكاتير الاول و ماكنتش اعرف انه سخرية بل من شدة واقعيه افتكرته الاول دعاية لمرشح السلفيين ابو اسماعيل لغاية ما شفت اللون الرمادى و فهمت المغزى..مش شايفة ان فيه حاجة تضايقهم لان ده بجد قراءه واقعية و مافهوش حاجة تزعل من كل المكتوب لانه واقعهم اما موضوع الانفصال ففكرى بالهدواة فى فكرهم ح تلاقى انه حتما يؤدى للانفصال

Tears

tears-demo3.blogspot.com

د/دودى يقول...

الاحلام : محتاجين معجزه؟!!...تقريبا هو ده الحل الوحيد فينا..شكرا للمرور و الرد

د/دودى يقول...

مدونة صفوان : يا رب .....

د/دودى يقول...

Tears : وحشتينى بقالى كتير مشفتش مقالتك الناريه ...انتى عارفه موقفى من السلفيين و الاخوان و التيار ده عموما و انتى عارفه انا تعبت منهم قد ايه لكن انا وجهه نظرى ان لو حتى هما حسوا بالاهانه اكيد الكاركتير التانى مهين اكتر بمراحل ....اما بالنسبه للتقسيم فما اظنش انهم ممكن يبوظوها قوى كده ...و عموما زى ما قلت ربنا ما يكتبها علينا برحمته ....

متغيبيش عنا تانى...

ابراهيم رزق يقول...

بصى يا دينا صلى على النبى
كمان زيدى النبى صلاه

قال تعالى

و ان تعفو اقرب للتقوى و لا تنسوا الفضل بينكم
و قال تعالى
ان تبدو خيرا او تعفوا عن سوء فأن الله كان عفوا قدير
و قال تعالى مخاطبا الرسول صلى الله عليه و سلم
فعف عنهم و استغفر لهم و شاورهم فى الامر
صدق الله العظيم

ايات كثيرة و احاديث كثيرة تحث على العفو
اولا الكاركتير لم يتطرق لهم هو اوضح لهم وجهة نظره اما هم فقد سبوا و اخطاوا
هم لا يفهمون اوليات دينهم فكيف يطبقوه الدين المعاملة
ماذا تنتظرين منهم

تحياتى

Radwa Ashraf يقول...

كده بجد غلط .. ليه دلوقتى نرجع نفرق فى بعض و نمسك فى خناق بعض تانى !!
السلفية لا تعنى بهدلة مصر -رغم أنى لا أؤيد فكرة أهم يحكموا-
و العلمانية مش معناها قلة الأدب !!
لازم تبقى دماغنا أكبر من كده ..
تسلم إيدك ..

ماشي بنور الله يقول...

هههه هههه
شر البلية ما يضحك
.................
كل عام وانتم بخير

غير معرف يقول...

وحشتيني يا دودو
اخبارك اية....؟
انا معاك بالنسبة للكلام اللي تحت الخاص بابراهيم عيس لاني بختلف معاه في دستتين مواضيع بس مش بهينه ولا عمري ههينه لاني محبش حد يهيني عشان كدة محبش اهين حد
بس كمان الكاركاتير بجد مستفز جدا سواء الاول او الثاني
وبجد بجد للمرة المليون حاسة ان مصر ف متاهه
مش عارفة هتخرج منها ازا
ربنا يستر
مش عارفة لية مش عارفةو اعلق ف مدونتك
هحاول اعلق ب مجهول اشوف كدة هينفع والا اية...
رحاب صالح

ريبال بيهس يقول...

مساء الورد د/دودي

هل تعلمين مشكلة مصر ليست في سلفية مغلقة متشددة

أو علمانية ليبرالية متفتحة ، مشكلة مصر كبيرة

بكبر الخلاف الدائر بين أبنائها فكل مجموعة أنزوت

تحت راية وبدأت بحملات التشهير والإفلاس اللفظي الذي

تكيله لأي مجموعة مخالفة وهذا مازاد أنين مصر

فكنا نعتقد بأن الثورة ستجمع الكل تحت رايتها و

لكننا وجدنا مصالح تغلب وإتهامات تكال وكل طرف

يرى أنه خلاص مصر الذي سيخرجها من هذه الأزمة وكأن

لا حل إلا بهم ...

سيدتي في عهد الرسول الكريم عليه الصلاة والسلام كان

الإسلام في ذروته ورغم ذلك لم نجد تخلف وإنهزامية

وووو بل وجدنا تحرر ونهظة في كل مجال ومع ذلك لم

يلغي المصطفى فئة ما مهما كانت ديانتها وهذا هو

أسلوب الحياة الإجتماعي الصحيح الذي يكفل خلق مجتمع

متماسك قوي يقف في وجه كل التيارات الجارفة ..

كلا الكاريكاتيران مسيئان بل يندى لها الجبيان

فليس هذا أسلوب تعامل بين تيارين يخدمان نفس

البلد ...

تحياتي وإحترامي

العصفورية يقول...

تفتكري يادودو ح يسمعوا الكلام؟! مع خالص تحياتي وتقديري.

Ms Venus يقول...

مش عارفة بقى انا جالى احباط

حلها ايه طيب ؟

د/دودى يقول...

ابراهيم رزق : عليه الصلاه و السلام ...و كمان عليه الصلاه و الف سلام ...

بص انا مش هقدر اطلب من حد العفو لانه اختيار شخصى و ثوابه عند ربه لكن على الاقل ان يكون العين بالعين لان الكاركتير التانى -فى وجه نظرى- اكثر اهانه و موجع اكثر بكثير...

و ارجع و اقول ربنا ما يكتب حكمهم علينا

د/دودى يقول...

Radwa Ashraf : سلمت يديك ....ميرسى على مرورك العذب

اصلى متحيزه لبناتيت المدونات :)

د/دودى يقول...

ماشي بنور الله : ياه بقالى كتر ما اتكلمتش معاك ...انت بتغيب شويه و انا بغيب شويه عموما حمد الله عالسلامه لينا كلنا.....شر البليه ما يضحك و الله البلد بقت مسخره..

د/دودى يقول...

رحاب صالح : انا اسفه و الله على موضوع التعليقات اللى معلقه دى مش عارفه ايه المشكله ولا ايه الحل !!!

المتاهه بقت امر واقع لازم نتعامل معاه و لسه كل ما الانتخابات هتقرب كل ما الخناقه هتزيد...

د/دودى يقول...

ريبال بيهس : لا فوض فوك و مات حاسدوك ....ايه الكلام الحلو ده كله ؟!! احلى بكتير من كلامى الاهبل مقارنه ..

د/دودى يقول...

العصفورية : نفسى يسمعوا كلامى و يلعبوا مع بعض و لو ان دى حتى ممكن تبقى وحشه و يتفقوا علينا...

د/دودى يقول...

Ms Venus : اظن و الله اعلم و ده حل صعب ان الاتنين يحترموا بعض و يحترمونا احنا بالمره...

محمد الجرايحى يقول...

الأخت الفاضلة : دم دودى
السلام عليكم ورحمة الله وبركاته
مع كل الأسف هناك من يريد أن يشغلنا بقضايا قتلت بحثاً
وحتى لاننتبه لما هو أهم...نسأل الله تعالى أن يبصرنا سبل الهداية والحق
اللهم آمين
بارك الله فيك وأعزك

د/دودى يقول...

استاذ محمد الجرايحى : البلد للاسف ماشيه خطوه لقدام و خطوتين لورا ..كل ما نتفق على حاجه و نقفل مواضيع يجى حد يلعب و نرجع نناقش كل البدهيات من اول نوع الدوله لحد حق المرأه فى السواقه...ربنا يهدى

بسنت يقول...

للاسف شاطرين جدا فى الاختلاف فاشليين جدا فى التجمع
للاسف بردوا كلا الطرفين (وان كان ابراهيم عيسى غير علمانى ابدا من وجهه نظرى هو مائل كثيرا لليبراليه ليس إلا ) مش بيشوف غير الشكل المتطرف فى الاخر مش المعتدل لانهم الظاهرين
ربنا يهدى فعلا لان العقول دى علشان تتغير عايزه مسح ذرى شامل واعاده برمجه ودا مستحيل

د/دودى يقول...

بسنت : احنا مش فالحين غير فى التفرقه و التحزب و الدليل كميه الائتلافات و الاحزاب و محدش طايق حق...و ارجع و اقول محدش غلطان اكتر من التانى كتهم نيله هما ال2

Sara يقول...

عادي يا دودي D:

كله بيلعب مع بعضه و بيفتعل خناقات لا مبرر لها !

و ربنا يرحمنا من أمثال كل التافهين و اللي بيلعبوا XD

قلم جاف يقول...

العالمانية "الفكرة" -ودي لسة ما وصلتلناش- ترفض تديين السياسة أيا كان مسماه وأيا كان الشعار الذي يتم ذلك تحت ستاره ..

العالمانية اللي شغالة هنا في مصر وبكل أسف هي عالمانية مصلحتي أولاً ، أتحالف مع تيارات دينية لمصلحتي ، أبوس إيدين تيار ديني بيدين السياسة في مواجهة تيار ديني برضه بيدين السياسة ، على أساس إن الناس معندهمش أي مخ يذكر،العالمانية "النسخة المصرية" إساءة للعالمانية كفكرة ولولا حماقات التيارات الدينية سواء تيارات الدين السياسي أو التيارات المذهبية أو المؤسسة الدينية المسيحية لما كان للنسخة المصرية الفهلوية من العالمانية أي تأثير..

لدينا في مصرنا العجيبة مشجعون لا معتنقون لمبادئ تعلموها أو تلقنوها خطأ ، تذكري فقرة "الديكتاتور" في مسرحية "تخاريف"..حوار "الرأسمالية" و"الاشتراكية" و"الرأسماكية"!

إرسال تعليق

حلو؟؟ وحش؟؟ طب ساكت ليه ما تقول....