الأربعاء، 10 ديسمبر، 2014

عالسطح سهرانة

بقالى ٥ ايام باخد شيفتات ورا بعض ، بنزل بالليل و برجع الضهر تانى يوم يا دوبك انام و اصحى البس و انزل تانى و هكذا دواليك... مش عارفه كنت عايزة اثبت لنفسى ايه بس انا منهكة جسديا و فكريا بشكل جديد

مكاسب الفترة دى انى خلصت ٣ كتب (النسياد اكتور اباد و الجزء الاول و التانى من رباعية الاسكندرية)

الحقيقة انى سعيدة بقرارتى فى مجال الطب كلها و مش بتكسف منها

مثلا قرارى فى انى ادخل كلية الطب ذاتها...كان قرار صائب لو سألتنى بعد السنين دى ، لانى لو مكنتش داخلتها كان زمانى مؤمنة بالانسانية و فى قدرتها على اصلاح عيوبها و التعاطف البشرى و كنت هابقى هبلة جدا و انا ما احبش الهبل

و قرارى فى انى اقضى ٦ شهور امتياز فى وزارة الصحة اللى كان بيعارضه اصدقائى محبى الدمرداش...لانى لو مكنتش رحت كان زمانى مؤمنه بان فى اكذوبة علاج مجانى لانه فى اغلبه لا علاج ولا مجانى الا فى بعض المحاولات الفردية على اقصى تقدير اما لناس جديدة الماكنه مفرمهتش لسه او ناس عندها ثبات الجبال ربنا يجعلنا من بركاتهم و لو انى ما اظنش يحصل...و انا مبحبش الاكاذيب فالحمد لله انه نجانا منه و لو انه منجاناش من التجربة

و قرارى انة اقضى ٦ شهور امتياز فى مستشفى الجامعه و هو القرار اللى كان بيعارضة كارهى الدمرداش..لو انى مرحتش و قدرت اهرب بشكل ما كان زمانى مصدقة اسطورة مستشفيات الجامعه و ان المريض هناك بيشوفه ناس كبيرة بتفهم و ان النايب بيمارس طب مش بيقضى ١٨ ساعه من يومه بيركن عربية المدرس المساعد ، يدور على جهاز الضغط عشان التمريض مكسل يقوم ، يتحايل على بتوع الاشعه و يمرمط الامتياز معاه و يجدد تذاكر عشان محدش يقول علينا حاجة...و الاهم يتمحلس للدكاترة الاكبر و ينزبق صحابه عشان يبقى (ستاف) و هو ستافيلو كوكس اوريس اصلا و هما مخبيين عليه عشان يفضل التور ماشى فى الساقية ....و انا مش بحب الاساطير -مدام مش مرتبطة بحضارات الشرق القديم و مفهاش زيوس ولا شيفا- فنحمد الله برضه

#يا_بخت_من_بكانى_و_بكا_عليا_و_جاب_الجيران_يبكوا_عليا_كمان_ماهى_ناقصة

#و_الى_عشر_ليالي_عالسطح_سهرانه_و_حاسة_بحالي_تعبانه_ونعسانه

0 التعليقات:

إرسال تعليق

حلو؟؟ وحش؟؟ طب ساكت ليه ما تقول....