الجمعة، 19 ديسمبر، 2014

قاهرتى

حاسه انى بحاول اشبع من قاهرتى بكل الوسائل قبل ما اتشحن على بلاد الله خلق الله المعروفة اعلاميا بالتكليف

عمرى ما عملت انى دخلت السينما ٣ مرات فى شهر واحد ، سينما من ام فلوس فى مول مش سينماتنا التى ترحب بالمفلسين زى المهرجانات اللى بتضمنا اخر الشهر ، حاسه انى بحفظ مشاهد الشوارع و باخد صور بعينيا مش بالموبايلات بس

بشترى كتب كبيرة جحما عشان تعمر معايا فى الغربه ، بنزل اغانى كتير على التابلت ك زاد و زوده مع ان التكليف لسه قدامه ٣ شهور ....بحفظ اسعار السوبر جيت و امكان انطلاقه انا القاهرية اللى حياتى تتلخص فى مشوار شبرا/العباسية و بالعكس

بستنشق دخان ميكروباصات الزحمة فى وسط البلد الساعه ٢ الضهر ، باخزن كل كلام "ما تجى نوصلك يا عسل" اللى مش هاسمعه غير فى عشوائيات مدينتى

هافتقد ده كله انا عارفه و متأكده

ملاحظة ١: الهيئة المصرية منزلة كتاب (تاريخ المذاهب الاسلامية) ل الشيخ محمد ابو زهرة....كتاب رائع ٧١١ صفحة و تقريبا ببلاش -١١ جنية- اشتروه لو مر عليكوا

ملاحظة ٢: سينما رمسيس هيلتون التذكرة ب١٥ جنية بس فى حفلات ١٠ و ١ و نضارات الثرى دى ايجار ببلاش ، و اللى شاف خماسية مملكة الخواتم يروح يكملها فى جزءها الاخير و لو انه كتيان فى رأيى

ملاحظة ٣: مش لازم بيج ماك تشيكن ، الهابى ميل حلوه معاها لعبه و بعشرين جنية.....او طبق كشرى ب٤ جنية حلو برضه ، عيش عيشة اهلك

0 التعليقات:

إرسال تعليق

حلو؟؟ وحش؟؟ طب ساكت ليه ما تقول....