الجمعة، 10 أكتوبر، 2014

مفرطة الطول

فى جمال خاص للروايات "مفرطة الطول" لا يفهمه الا قليل

حاجة زى رواية جيفرى ارتشر "عندما يطير الغراب" و دى رواية  972 صفحه كلها كلام و رغى عن  تشارلي ترامبر اللى ابوه كان بيبيع خضار و هو هيتدرج فى الحياة لحد ما يبقى غنى... و زى ما انت شايف رواية مش اعجاز ولا فيها حاجة مميزة لكن اهو قريتها و انا فى تالته طب

رواية 1Q84 بتاعه هاروكى موركامى عدد صفحتها 1308 صفحة , رواية طويلة عريضة عن خطين دراميين لراجل و ست و احداث غريبه و بارانورمال و تفضل بين الصفحات تفهم و تربط الرابط بين الخطوط دى .... رواية عبقريه اه لكن طولها المفرط يحبط اجدع قارئ انه يكمل , لكن اهو قريتها فى اسبوع امتحانات الجراحة فى سادسة طب

رواية "الانسة كاف" بتاعه مصطفى امين 964 صفحة , عن القصة التقليدية عن البنت "المسترجلة" اللى هتخرج من الشرنقة بالحب و تتحول لمزة على ايد عادل علاء الدين الفتك اللى مقطع السمكة و ديلها ...رواية ظريفة طبعا و فيها حاجات تانية غير الفكرة دى بس بتختبر صبر القارئ كتير و اهو قريتها فى تانية طب

الروايات الطويلة زى مسلسل ليالى الحلمية كده بيخرجك من عالم يومى ملل و يدخلك عالم تانى منفصل , نوع من القراءة رائع فى ايام الانتظار الطويلة...علما بان الخطة الخماسية ليا تتضمن انى فى يوم اقرا "الدون الهادئ"ل  ميخائيل شولوخوف صاحب نوبل الادب  ب 1481 صفحه كامله ربنا يعينى عليها

0 التعليقات:

إرسال تعليق

حلو؟؟ وحش؟؟ طب ساكت ليه ما تقول....