sicko..بين الصراحه والفضيحه

sickoفيلم اخراج المبدع سليط اللسان مايكل مور اللى استطاع بطوله لسانه و قولته للحقيقه مهما كانت قاسيه انه ينتزع احترام المشاهدين مش فى امريكا بس لكن فى العالم كله ....فيلم "سيكو" مجرد فيلم وثاقئ بيتكلم عن نظام الصحه والعلاج فى امريكا الفيلم كان انتاج 2007 بميزانيه لا اعتقدها كبيره لكن بابداع و جرأه و شجاع تحتويه الحاويات بيتكلم فيه عن الشعب الامريكى المطحون فى شغاله و تطلع عينه فى شغله ويفضل طول عمره يحضر نفسه فى شركات التأمين و يدفع لها ما نعبر عنه ب "دم القلب" عشان لما يعيا ولا تحصل له مصيبه تهدد حياته من مرض ولا حادثه يلاقى حد وراه و مايضطرتش انه يدخل مستشفيات الحكومه اللى بهدلتها توازى بهدله مستشفيات مصرنا الحبيبه و فى وسط ده كله يلاقى نفسه وسط مؤامره تحيكها جميل القوى اللى حواليه تتفق جميعا على وجوده وحيدا فى النهايه و لما تحصل له الازمه اللى دفع فلوس علاجه مقدما يلاقى شركه التأمين و شركات الادويه و المستشفيات كلها تتفق على الا تتفق و يلاقى نفسه فى الاخر لوحده برضه و يتلكك له على اى حاجه بحيث يلاقى المريض نفسه متعلق له المحاليل و بقميص المستشفى و مرمى على الرصيف و هى حاله جت فى الفيلم فعلا من احد المواطنات الامريكيات اللى المستشفى رميتها فى الشارع بعد ما بدأت علاجها بالفعل ....يعرض مايكل مور القضيه من الناحيه السياسيه اولا فيعرض الرؤساء المتعاقبين على امريكا وتغيير الوجهه و ثبات فشل حل القضيه و ارتفاع سر الاوديه بلا سيطره تحت قوه رؤساء شركاتها الاعضاء فى الكونجرس بل ويعرض المبالغ اللى بياخدها اعضاء الكونجرس بالاسم والمبلغ و الصوره من شركات الادويه و كمان ذكر اسماء شركات الادويه بالاسم دون خوف و تردد و لا طريقه "قامت احدى شركات الادويه بكذا" اللى بيستخدمها جرنال لما بيحاول يكشف فساد ....يلى ذلك عرض لاحوال اهل امريكا المطحونين بين مطرقه شركات التأمين وسندان شركات الادويه مقارنه مع اهل بلاد مجاوره لهم زى كندا مثلا اللى بعض الامريكيين بيلجأوا ليها ويتجوزوا منها عشان ياخدوا الجنسيه و يتعالجوا فى مستشفيات كندا البراقه ببلاش لانهم مواطنين كنديين!!!!!! مقارنه اخرى يسافر فيها مايكل مور الى فرنسا وانجلترا ليقارن بالدلع اللى فى البلاد دى بحيث ان تكلفه العلاج تساوى ربع كلفه العلاج فى امريكا و موقف اخر يعرضه مايكل مور ليغيظ به مشاهديه الامريكان اكتر لما بيعرض ان الحكومه الفرنسيه بتعرض ذهاب موظفه من الشئون الاجتماعيه لمساعده الام اللى بترزق بطفل جديد و بتغسل لها هدوم النونو!!!! و زياده فى نكايه المشاهد الامريكى يسافر مايكل مور الى كوبا تلك البلد اللى الامريكان يطيقوا العما و ميقدوش يطيقوا تلك البلاد اللى بيوصفوها بالقمع و الاستبداد و ان كاسترو بيموت اهله بلاده جوعا و مرضا و بيجرب مايكل مور و ياخد معاه مجموعه من المرضى اللى فشلت امريكا فى علاجهم منهم احد منظفى كارثه 11 sept اللى كان بيشيل الانقاض و اتملى صدره تراب لحد ما جاله ذات الرئه  و يدخلهم مايكل مور احد المستشفيات الحكوميه فى كوبا فتفاجأ بجوده العلاج و رخصه و بالفعل تتحسن صحه مرضاه !!!! ثم يضرب مايكل مور ضربته الاخيره ليقضى على اعصاب مشاهديه و يعرض نظام الرعايه الصحيه فى معتقل غوانتانمو اللى يجدها المشاهد رعايه صحيه افضل مما يجده دافعا مبالغ مقدما فيذهب مايكل مور و رفاقه من المرضى الى معتقل غوانتانمو للحصول على الرعايه الصحيه باعتبارها ارض امريكيه و انهم من حقهم الحصول على بعض الاهتمام شانهم شأن المعتقلين السياسيين....و ينتهى الفيلم بتلك النهايه المقلقه للجمهمور....


زى ما قلت الفيلم انتاج 2007 و طبعا انا متفرجتش عليه اليومين دول يعنى لان عادتى تقتضى انى اتفرج اول باول و مارنكش الافلام كتير....عارفه انت بتقول طب ايه اللى فاكرك بيه؟؟؟ الاجابه مش عشان مستوى الرعايه الصحيه فى مصر وجعنى ولا حاجه لكن عشان كلام اليومين دول عن ان كل حد يحاول يفجر قضيه فساد فى فيلم ولا برنامج فتطلق الصيحات اننا كده بنفضح مشاكل مصر او على قد تعبيرهم "بننشر غسيلنا القذر قدام الناس" فها هو مايكل مور يواجهه مشاكله بجرأه و قوه مما يوحى لك كمشاهد ان امريكا قربت تشحت و انك لازم تلم تبرعات لفقراء ومساكين تلك البلاد الغنيه الفقيره...