السبت، 11 سبتمبر، 2010

ثلاثه رجال فى قارب...



"ثلاثه رجال فى قارب" تأليف جيروم ك جيروم.... كتاب مضحك ممتع ساخر...اخر كتاب خلص بين ايديه او بالاحرى بقى بين عينيا لانى كالعاده قريته على الكمبيوتر وان كان بدافع اخر غير الفلوس المره لانى عاده بقرا على الكمبيوتر الكتب الغاليه لكن فى الواقع مكتبه الاسره طبعت الكتاب ده من كام سنه كده بمعنى انه بقى متوفر بشكل رخيص للى يلاقيه و هى دى المشكله لانى ملقتوش و الكتاب كان شدنى قوى وسمعت عنه سمع خير لان الكتب زى الجواز كده لازم الكتاب لازم يتحلى بالسمعه الطيبه قبل ما تخطبوا اقصه تقراه ....بحثت عنه و لاقيت pdf فعلا نسخه مكتبه الاسره...الكتاب حجمه صغير فى طبعه مكتبه الاسره عن سنه 1997 فى 269 صفحه فقط ذو صفحات قصيره و بنط كبير مريح للعينين ....القصه بتحكى عن ثلاثه رجال فى قارب !!! عارفه كانك بتقول ايه الرخامه دى جبتى ايه جديد يعنى ما هو ده اسمه ساعتها هاقولك اصبر بس انت على طول مستعجل كده....القصه بتتكلم عن 3 رجاله هما جورج و الشخص التالت كان هو اللى الراوى و بالتالى اسمه ما وردتش كتير فبصراحه مش فاكره اسمه و معاهم كلب قرروا انهم ياخدوا اجازه لمده اسبوعين و بعد عده مدولات يقرووا انها تبقى فى قارب فى نهر التاميز و انهم يناموا فى المركب بدل حجز الفنادق ....

القصه فى حد ذاتها عاديه جدا و كان ممكن تاخد منحى تانى بانها تدور عن احداث الرحله وتركز عليها فيخلق مؤلفها مواقف صعبه وكتيره يحط فيها ابطاله لكن مش ده اللى حصل لكن الكتاب مضمونه فى حاجه تانيه هى الحكاوى اللى بيحكيها ابطالنا كفلاش باك او كقصص للتندر الجميل ان الكتاب تحول لشبه مجموعه من القصص القصيره اللى بيجمعها قالب واحد وهو الرحله...الكتاب ممتع ومضحك ب 3 رجاله فى عمر الكهوله بيتعبوا من كل حاجه صحيح عايزين يعيشوا جو الشباب لكن ساعه الجد تلاقى كل الرحله تتركز فى الخناق بينهم او الشكوى من الشغل او الاكل .... اما القصص الفرعيه فتحفه و زى ما بتقول عنها فى لغه المصريين انها "قصص فقريه" ...اجمل حاجه عجبانى فى القصه هو الكلب اللى اسمه  "مونتمورينسى" ذلك الكلب ذو العينين الحالمه والاخلاق الشرسه الكلب الكسول المشاكس اللى دايما بيتخيلوا حوارته مع القطط و الاشياء الاخرى....

كمثال للقصص الفرعيه اللى فى الكتاب اخترت القصه دى بذات لان احداثها منفصله عن النسق الاساسى وبالتالى كانها قصه قصيره فمش هتحرق لكوا القصه  و دى صوره من صفحات الكتاب:
 هههههههههههه.....هتلاقى فى حياه واحد فينا واحد زى العم ده اللى بتكشف انك لما توكل ليه مهمه انك هتشتغل اكتر و ان تنفيذ العمل كله بنفسك اوفر لصحتك....

موقف تانى برضه فطسنى من الضحك هى قصه السمكه اقرا و قولى رأيك :

من الاخر الكتاب تحفه لما تكون مضايق او عايز حاجه تضحك من قلبك بخفه ....

 http://www.4shared.com/document/urWw0xc6/______.html?cau2=403tNull
عموما اللينك للكتاب كامل اهو 



1 التعليقات:

Privatumzug Wien يقول...

الاسم جذااااااااب جدااااااا

إرسال تعليق

حلو؟؟ وحش؟؟ طب ساكت ليه ما تقول....