خلصت روايه "1984" لجورج ارويل فى ايدى بالظبط من 27 دقيقه و حبيت ادون اللحظه ....ما انكرش انى اتاثرت بالروايه دى تاثير كبير ببساطه لانها تمثل عالم مظلم قاسى بلا قلب حين تكون المعايير مزدواجه فى الروايه دى هتقابل الالفاظ تبرجل مخك و تخلى نفسك تقلقل مما قد يفعله البشر فى بعض من اعتصاب تفكيرك و اغتيال مخك و تمنى الموت فلا تجده ...ازدواجيه التفكير هو حجر الاساس فى الروايه الغريبه دى : خد مثلا شعار الحزب اللى بيحكم بلد بطل قصتنا ....
الحرب هى السلام
الحريه هى العبوديه
الجهل هو القوه
كلام غريب صح !!!! الاغرب هو ازاى كفرد من افراد البلد دى انك تقول الكلام ده و انت مقتنع بيه المشكله مش انك تقوله لان الكلام اللى من ورا القلب و من خارج العقل كتييير و عادى انك تقول حاجه مش مقتنع بيها لكن انك تجبر على تغيير قناعتك و تقولها بقلبك و بعقلك هو ده الجنان فى حد ذاته...فعندما يقتنع الحزب بان 2+2 =5 لازم تقولها مش كرياء او اجبار لكن تقولها وانت مقتنع بيها و تكذب اى حد يقول ان 2+2=4 و تقول بكل جوارحك انه اما كذّاب او انه مجنون .....احد الالفاظ اللى استوقفتنى لفظ "بياض السواد" فهى لما توصف بيها حد صديق يبقى معنها انه هو اللى بيحسن الحياه و لما توصف بيها حد عدو يبقى معنها انه بيوظ الحياه....
اذا كانت روايه "مزرعه الحيوانات" هى الرمز و روايه "الصعود الى الهواء" الخوف من المستقبل تبقى روايه "1984" هى الحياه المظلمه نفسها بسوادها وكأبتها و ال 3 روايات لنفس الكاتب بنفس المخاوف و القلق....
اولا اسم الروايه : الروايه اسمها "1984" فاذا علمت ان الروايه دى اتكتبت سنه 1944 و انها بتمثل المستقبل بعد 40 سنه تتضح لك الامور قليلا فهى بتصور ماذا لو انتصر الفكر الشمولى الفاشى الشيوعى فى فرض السيطره على العالم فتتركز الحياه فى شخص واحد كحاكم و القائد الملهم وهو شخصيه "الاخ الكبير" اللى حتى وجودها نفسه مشكوك فيه لانك باختصار عمر الشعب ما شافه فهو اما صوره او صوت او فيديو او تمثال و صوره بحجم متر اجباريه فى كل صوره تبرز وجهه و تحتها عباره "الاخ الكبير يراقبك"
ثانيا الاجواء العامه: القصه بتبدء فى لندن سنه 1984 فى المستقبل نسبه الى زمن الكتابه و بطل قصتنا هو "ويستون سميث" عضو خارجى فى الحزب ....البلد بتتكون من 2% هما الصفوه و اعضاء الحزب الداخلى من القاده و رؤساء القطاعات و دول نسبيا بيعيشوا حياه مترفه بيبوت كبيره وخدم و مكاتب كبيره و 13% اعضاء الحزب الداخلى هما الموظفين فى هيئات الحكومه بيعيشوا حياه اقل باكل ردئ و شقق فى مجمعات سكنيه اوضه واحده او اوضتين فى حاله العائلات و 85% هما الرعاع او عامه الشعب و هما مش اعضاء فى الحزب اطلاقا و لا حتى مهتم بيهم و دول بقى فى عيشه ضنك و بيشتغلوا فى الدعاره والمخدرات و السرقه والنهب والخدم و الخمارات وصغار الامور....
ثالثا الممنوعات : تعالوا بقى نستعرض الحاجات الممنوعه على اعضاء الحزب خاصه الفرع الخارجى الممنوع هو الافكار و تعبيرات الوجهه و الحب و حتى المتعه الجنسيه اثناء الزواج و شراء الاقلام او الكتب او كتابه مذاكرات و اى حاجه من السوق السودا زى رباط الجزم او امواس الحلاقه اما الكسل و الغياب عن اجتماعات الحزب فمن المحرمات ...ضف على ذلك وجود شاشات الرصد فى الشغل و البيت و المقهى و اى مكان هتتواجد فيه والشاشات دى ليها دورين الاول انك تتراقب طول الوقت و الدور التانى هو عرض الاشارات والتقرير بل و الاوامر و الموسيقى .....
رابعا فى حاله المخالفه : فى حاله المخالفه بجريمه الفكر و هى انك يكون عندك فكره ضد الحزب او تؤمن بحاجه مش مؤمن بيها الحزب او جريمه تانيه هى جريمه الوجهه و ده انك تعبر عن مشاعرك على تقاسيم وجههك...العقاب بعد التعذيب بكل انواعه فهو الدخول فى الغرفه 101 اما ما هى الغرفه وما فيها ....فده خليه لما تقرى الروايه نفسها اللى هتأثر فى نفسك
عموما ده الرابط لو خدك الشوق
0 التعليقات:
إرسال تعليق
حلو؟؟ وحش؟؟ طب ساكت ليه ما تقول....