الأحد، 5 سبتمبر 2010

لن اعيش فى جلباب ابى!!!!!



VS
لن اعيش فى جلباب ابى !!!!! متصورش انى هاتفلسف و احكى عن مأساتى الشخصيه فى انى عايزه اخرج عن سيطره ابويا اللى عايزنى اشتغل زيه و جو المقالات الهابط ده!!!و ملحوظه رفيعه على جنب كده انا مش عايزه اطلع من جلباب ابى يمكن لان بابا اصلا بيلبس بدل و هو مهندس و انا فى كليه الطب بمعنى انى تقريبا بعدت عن شغله و خلاص ... المهم ارجع التدوينه دى بتتكلم عن موضوع تانى خالص ببساطه هى مجرد مقارنه بين روايه "لن اعيش فى جلباب ابى " تأليف /احسان عبد القدوس الصادره عن دار نشر اخبار اليوم فى كتاب ظريف قصير عدد صفحاته لا يتجاوز 152 صفحه فقط ...و بين مسلسل "لن اعيش فى جلباب ابى المنتج سنه 1995" سيناريو وحوار مصطفى محرم و إخراج أحمد توفيق و بطوله نور الشريف .......


السنه اللى فاتت و فى احد شهور السنه الفاضيه اللى الدراما فيها بتفلس لاننا فى مصر قررنا اننا نشاهد اعمال دراميه فى رمضان بس فى حاله تخمه و نخبط دماغنا طول السنه ونعيد القديم واذا كان عجبنا المهم لاقيت ال art بتعرض المسلسل ده و الاغرب انى لاقيت نفسى باتبعه مع انى شوفته بتاع خمسين مره و بالفعل ابتديت اتفرج واتابع المسلسل بحلقاته ال 35 كلها بتفاصيله و احداثه الكتيييييره من اول نور الشريف من لما كان فى جلابيته الزرقا بيشيل الخرده و عم سردينه ممثلا بالرائع "عبد الرحمن ابو زهره" و رحله الصعود بكل تفاصيلها و احداثها و عبد الغفور البرعى بعياله و مراته و ابنه اللى خالع منه و مش طايقه تقريبا و فى وسط الناس و الزحمه ضاع الاحساس والرحمه ايه اللى بقوله ده لا لا لا فى وسط ده كله فى شخصيه "نظيره " الابنه الاصغر اللى كانت بتمثلها حنان ترك و فى وسط ده كله برضه فى شخصيه صاحب عبد الوهاب شخصيه "حسين" اللى كان بيلعب دوره "احمد سلامه" فاكرينهم خليهم على جنب دلوقتى هايجى دورهم بعدين.....المسلسل بصراحه ينسب الى مصطفى محرم اكتر من ما ينسب ل احسان عبد القدوس لانه تفاصيل المسلسل كتير و مفهاش حاجه تبع الروايه اصلا بصراحه اكتر عاجبنى المسلسل فى نقطه واضحه انه مفهوش مط و كل حلقه فى حاجه جديده تشغلك كمشاهد و تجرى الاحداث حبه حبه.....


اما الروايه فزى ما قلت عدد صفحاتها 152 صفحه فقط و طبع اخبار اليوم ...قريتها بعد متابعتى للمسلسل وجالى ذلك الفضول القاتل انى اعرف حجم وشكل الروايه اللى اتاخد منها المسلسل الطويييييييل ده و كانت مفاجاه فعلا لما شفت حجمها الصغير و كانت المفاجأه لما قريتها !!!!!!!! 
????????? whaaaaaaaaaaaaaaaaaaaaaaaaat
 هو ده كان رد فعلى لما الروايه خلصت....الروايه لا تحتوى على اى تفاصيل من اى نوع و لا اى شخصيات من اى نوع برضه ...فاكرين شخصيات "نظيره و حسين" تخيلوا بقى ان الشخصيات دى هى الشخصيات الوحيده فى الروايه و بقول الوحيده مش الرئيسيه لان ببساطه كل الشخصيات التانيه عبرت مجرد عبور على الاحداث فى نطاق الراوى و انه يحكى لك الجو المحيط بالشخصيات مش اكتر .....و يكفى ان انقل لك صفحه من الصفحات المعدوده اللى بتتكلم عن "عبد الغفور البرعى" 


لاحظت ان الكلمات المعدوده دى اللى لا تتجاوز صفحه واحده جرى مجريتها فيما لا يقل عن 15 حلقه ده على الاقل....اكتر ملاحظه غاظيتنى فى القصه كلها ان مقوله "لن اعيش فى جلباب ابى" فى الروايه عائده على لسان "نظيره" بينما تحولت بشكل غريب فى المسلسل و بقت على لسان "عبد الوهاب" و اتاكل حق شخصيه نظيره المنفتحه اللى اتبنت عليها الروايه كلها و لم تحصل فى المسلسل الا على القدر اقل من القليل ....






وادى قصه البنات كلهم و لو لاحظت هتلاقى حتى الاسامى غير موجوده ناهيك بقى عن عائله الوزير و عائلات اخرى ظهرت من غير اى وجود فى القصه الاصليه!!!!!!........و تبقى سلسله تحريف الروايات كما يشاء واضع السيناريو

دينا نبيل

3 التعليقات:

سمو الامير يقول...

انا قرأت الرواية واتفرجت ع المسلسل
فرق شاااااااسع بين الاتنين

طبعا الرواية معجبتنيش ( البته )
لأني حسيت انها كروتة مفيش بعد كده :(

IMSA يقول...

د/ دودي :
اولا كيف الحال ؟
ثانيا الفرق بين الرواية وبين المسلسل ، فرق شاسع ، مصطفى محرم أزاد من الشخصيات في المسلسل وهذا يحسب له ، والطريقة التي تحولت بها الشخصية القائم عليها القصة من نظيرة لعبد الوهاب نظرا لنظرة المجتمع للبطل وليس البطلة ( يمكن دا يحسب لإحسان عبد القدوس إنه كان يكتب ويبلور الشخصية البطلة وليس البطل فقط )
مصطفى محرم يحسب ليه إنه استطاع أن يكتب شخصيات ويبلورها ويزودها في العمل الدرامي ولا تشعري معها بالملل أو الضيق ..
يمكن صدمتك وصدمة ناس كتير في المقارنة بين الاثنين هو انعدام القراءة لدى مستويات كثيرة من الشعب ، والصدمة تكون حين يعلموا الحقيقة
ولقد تناولت عدة افلام مخالفة للواقع التاريخي
مثل سيف الدين قطز والناصر صلاح الدين
http://klammganyn.blogspot.com/2009/11/blog-post_8805.html
وام الخير بنت اسماعيل
http://klammganyn.blogspot.com/2009/12/blog-post_896.html
تحياتي لك واتمنى ان اكون قد شاركت بشكل جيد

د/دودى يقول...

imsa : اولا : الحمد لله...

ثانيا : عندك حق فعلا خاصه ان الشعب المصرى بطبيعته لا يقرأ فيمنفعش تنسب المسلسل للقصه التى لن يقرأها احد من الاصل على الرغم من جوده التحويل...

إرسال تعليق

حلو؟؟ وحش؟؟ طب ساكت ليه ما تقول....