الصعود الى الهواء...

"الصعود الى الهواء" ل جورج ارويل....اخر رواياتى اللى كنت بقراها خلصت اول امبارح و بما ملقتش النسخه الورقيه فكعاده اكتفيت بالنسخه الالكترونيه pdf اللى بضطر انى اتزنق قدام الكمبيوتر غير الخناقات و الحروب و احيانا مؤامرات  على طريقه "نيكولو مكيافيلي" فى كتابه فى فن السياسه و الوصول للمبتغى كتاب الامير و ده كله للحصول على الكمبيوتر لبضع الساعات خاصه ان للكمبيوتر فى بيتنا خيار استراتيجى  لكذا شخص و الكل يتمنى نفس الامل و بما انى لسه محصلتش على مطلبى العادل او غير العادل فى الحصول على لاب توب شخصى فى ظل الاسعار الحاليه و لك عزيزى القارئ ان تتخيل الصعوبات اللى واجهتنى فى الانفراد بالجهاز لكتابه تلك التدوينه و احساسى بانى بكتبها على اسنه الرماح....هو انا بتكلم عن الموضوع ده ليه وبدوشك بمشاكلى ؟؟؟ هو انا اصلا كنت بتكلم فى ايه؟؟؟ ااااااااه صحيح كنت بتكلم عن "الصعود الى الهواء" لجورج ارويل عدد صفحاتها 282 صفحه فقط يعنى متعتبرش كبيره قوى  من طباعه دار الفارابى اللى اظن انها الوحيده اللى طبعتها لانى مشفتش دور تانيه ليها طبعه فى الروايه دى...جورج ارويل مؤلف الروايه الاشهر "مزرعه الحيوانات" اللى قريتها فى ظروف خاصه شويه ...جورج ارويل ( 1903 -  1950) كتب فى مرحله مميزه تاريخيا شويه انطبعت على كتابته و انه وصف بانه الكاتب الوحيد اللى بزع فى الفتره بين الحرب العالميه الاولى و الحرب العالميه التانيه كتب فى فتره تقدر تقول ان البشريه كانت مدهوسه فيها دهسه تقدر تبوظ اعصاب اجدع شخص فى العالم ...روايه "الصعود الى الهواء" بتتكلم عن الفتره دى فبطلها "جورج" هو بطلها و الراوى والمتركز عليه القصه بالكامل كمثال للفتره دى فهو شارك فى الحرب العالميه الاولى و خايف من الحرب العالميه التانيه من ان تنتصر الفاشيه و النازيه و يجد نفسه مسجون فى نفسه فهو كما لا يحب سجن عقل الفاشيه فهو ايضا مش محب للديمقراطيه والرسماليه اللى استنفذوا روحه و اعصابه و شغله ...القصه مفهاش اى حوار لانها على لسان جورج بالكامل فهو اما بيتذكر او بيعيش و يوصف الواقع ....جورج بطل قصتنا موظف عادى جدا من الطبقه المتوسطه متزوج من "هيلدا" اللى مش بتبطل زن او شكوى و جورج مخلف ولدين و عنده بيت فى الضواحى هو مش بيكره حياته الرتيبه او بيحبها هو ممكن يكون بيحب تغييرها لكن لما حس فى لحظه انى ممكن يفقدها تشبث بحياته دى ملأ ايديه خوفا من ضياعها ..جورج حصل على ثروه صغيره من فلوس بره الشغل و قرر انه يصرف الفلوس دى لوحده من ورا مراته قصه الروايه هو هيقرر يعمل ايه بالفلوس دى...ممكن القصه دى تبقى عاديه او تنصف بانها اجتماعيه لو فى زمن عادى لكن بما ان القصه بتدور سنه 41 و اننا على مشارف حرب عالميه تانيه و بما ان بطل قصتنا شارك فى الحرب العالميه الاولى وهو شاب فهنا تكمن اهميه قصتنا اللى بقت سياسيه فى قالب اجتماعى 


تطورات جورج ارويل واضحه فاذا كانت "مزرعه الحيوانات" هى رمزيه الفاشيه و تطورها من البدايه باحلامها البارقه الاولى وخيبتها التقيله فى الاخر.....فان "الصعود الى الهواء" هو الخوف من مستقبل الفاشيه....فروايه " 1984" هى عيش حياه الفاشيه برعبها و سجنها للعقل و الروح ....
 اسفه انى هاضطر اخلص التدوينه دى لانى فعلا بقيت قعده على اسنه الرماح و العيون عليا ولسان حالها بيقول "قومى بقى يا بايخه"