السبت، 7 مارس، 2015

خطط طويلة المدى

اصحى من النوم ...احط خطط طويلة المدى ...البس  و احط فى الشنطة مجلدات قصة الحضارة السودا التقيلة عشان فى الخطة امر على المكتبة و ابدلهم...اركب ميكروباص للمظلات...يغير البيه رأيه و يقرر انه هيروح المؤسسة بس...انزل و اضطر اركب عربية تانية...اقرر ان المشى رياضة و انى هاروح السجل المدنى لوحدى من غير توكتوك...يطلع المشوار اللى بيتاخد فى التوكتوك 3 دقايق بياخد مشى 20 دقيقة...اروح استلم السجل الساعه 11 زى ما البية قال لى ... يطلع انه مجاش و يقول لى الموظف العتيد انى اعدى عليه تانى الساعه 12 على اساس انى من مواهبى مشاوير الفيش و التشبيه و بكتب فى السى فى بتاعى فى خانة الهوايات انى بروح المصالح الحكومية اناء الليل و اطراف النهار...

اخد توكتوك بقى للمترو...انزل محطة الشهداء...اكتشف انى بقالى 7 سنين بروح المشوار ده من غير ما اعرف هو انا بركب خط المرج ولا حلوان ...اقف فى وسط الزحمة ابص فى الخريطة... و فى الاخر امشى مع الزحمة و اوصل لباب المترو...الناس بتدوس فوق بعض و كانوا هيكسروا رجل ست عجوزة..اقفش نفسى و انا باندن "نفسى انده لك بكلمة متقالتش لحد تانى" ....امشى فى زحمة الشوارع حوالين الدمرداش ...احس بتقل المجلدات على ضهرى... الاقى ست بتبيع بومبار جنب واحد بيبيع برفان "هوجو" و "بوص" المضروب ... واحدة ست لابسة بلوزة شبه بلوزتى بالظبط ماشية قدامى ... الراجل صاحب الكشك اللى جنب المشرحة مشغل اغانى شعبى .... افكر للمرة الالف ان المشرحة لازن تتنقل مكان تانى غير جنب الباب الرئيسى ... استغرب انى كل ده مش حاطه السماعات فاندندن انا اغنية لفيروز

اوصل لمكتب الموظفة عشان اعمل الاخلاء...تكتب لى كلمتين على الورقة اللى مليانة كلام و اختام و بقت شبه الحجاب...اروح مبنى تانى خالص و طبعا مفيش اسانسير ...اطلع 4 ادوار على رجلى و انا باغنى "غدرك بيا , أثر فيا , و اتغيرت شوية شوية" ...اروح لمكتب يمضى لى تانى على الورقة..ارجع لنفس الموظفة تانى تمضى لى على الورقة نفسها...تقل الكتب على شنطتى بقى اكبر و ريقى نشف...اروح الكافتيريا اشترى مصاصة بطعم اللمون اول ما ادوقها احس انى انتعشت...ارجع تانى لنفس الدور الرابع اختم الورقة و هناك اقابل دكتور امتياز جديد افرجه على ورقى بمنتهى الفخر و احاول اشرح له من غير ما اسودها فى وشه...ابص للساعة تطلع الساعه 1

اخد ميكروباص لمحطة الاتوبيس...افك منه 20 جنية .. اركب الاتوبيس و اتنهد ...اطلع السماعات و اشغل اغانى البيتلز ...يلف بيا الاتوبيس نص القاهرة و ضواحيها...اوصل للمحطة الساعه 1 و نص...اقرر اتعلم من اخطائى و اخد توكتوك يودينى السجل المدنى بسرعة قبل ما الموظفين يمشوا...بعد ما ياخد 5 جنيه اكتشف انه ودانى سجل مدنى غير اللى انا عايزاه...اسأل الرايح و الجاى و اشتم فى سرى و علنى بكل اللى يجى فى دماغى...اوصل الساعه 1 و 40 دقيقة و الاقى الموظف بيقفل المكتب و بيقول لى اجى بكرة...اتحايل عليه يمد ايده فى المكتب و يطلع لى الفيش بتاعى ...ميرضاش طبعا و يقول لى اجى بكرة

اتمشى لحد المحطة ...و اركب الميكروباص للعدد بطلت اعده...و اطلع السماعات و اغنى معاها "لو حسيت انك مجروح , هات الروح , تسكن فى الروح , كل جراح الدنيا تروح" ...اوصل للبيت و اكتشف انى نسيت اروح المكتبة و ان مجلدات قصة الحضارة زى ما هى فى الشنطة

0 التعليقات:

إرسال تعليق

حلو؟؟ وحش؟؟ طب ساكت ليه ما تقول....