و بقى مصدر النشوة الوحيد عندى هو صوت ختم النسر بينزل على ورقى بعد لفة الشخروميت امضاء من كل موظفين المبنى
انا بقيت بحلم بالاختام ...يعنى مثلا امبارح الحلم كله كان انى فى واقفة فى طابور يوم القيامة مستنية امضاء ٢ ملايكة و ختم النسر قبل ما ادخل الجنة و انا واقفة ازعق من روتين ال٢ ملايكة و ليه مش واحد بس يعنى؟ ان السما كمان فيها ختم نسر !
داخلة اسجل رغبات التكليف على جهاز اختى عشان مش عارفة اظبطه على التابلت , سلك الماوس قصير جدا مش عارفه اتحرك و حاطه الهيدفون اللى سلكها بيعلق يعنى لازم اثبت دماغى و الا الصوت بيقطع , مشغله اغانى عمرو دياب القديمة و اذ فجأة كده اكتشفت ان اغنية ميال ميال لطيفة جدا و لو انى مش عارفه اتحرك و اتجاوب مع الاغنية....فاتحة يجى ميت tab و بين لخبطة الجهات الخارجية و مستشفيات الامانة و بنوك الدم و الوحدات الصحية القريبة و النائية و احلام التخصص بتطير و معاها احلام الاستقلال المادى عن العائلة و مفاضلى الماجستير القريب ولا المرتب الاحسن ولا تخصص الاحلام اكتشفت انى تايهة و النهاردة اخر يوم فى التسجيل......اه هو انا قلت كمان ان "ميال ميال" حلوة؟!
و ليه تقوم تخلص اللى وراك و تنجز ورقك بينما ممكن تقعد فى البيت تأنب روحك و تعمل قائمة باللى المفروض تعمله؟!
دينا: ١
المنطق: صفر
اعطنى حريتى اطلق يديا ، اننى اعطيت -عليا الطلاق بالتلاته و الله العظيم و النعمه و اللى خلقنى و خلقك - ما استبقيت شئ ...
0 التعليقات:
إرسال تعليق
حلو؟؟ وحش؟؟ طب ساكت ليه ما تقول....